Kapitulo 18

Gibohon na Saindong Pasohan na Maglingkod sa Dios Sagkod Lamang

1, 2. Ano pa an kaipuhan apuera sa pagkaigwa kan kaaraman nin Dios?

 IMAHINARA na nagtitindog kamo sa atubangan nin sarong barat na pinto palaog sa kuarto na may laog na dakulang kayamanan. Sabihon niato na an sarong autorisadong tawo itinao sa saindo an liabe asin sinabihan kamo na bahala na kamong kumua kan mahahalagang bagay na ini. An liabe mapakikinabangan sana nindo kun gagamiton nindo iyan. Kaagid kaiyan, dapat na gamiton nindo an kaaraman tanganing mapakinabangan nindo iyan.

² Ini partikularmenteng totoo dapit sa kaaraman nin Dios. Tunay nanggad, an tamang kaaraman dapit ki Jehova Dios asin ki Jesu-Cristo nangangahulogan nin buhay na daing katapusan. (Juan 17:3) Pero, an paglaom na iyan dai maootob paagi sana sa pagkaigwa nin kaaraman. Kun paanong gagamiton nindo an sarong mahalagang liabe, kaipuhan na iaplikar nindo sa saindong buhay an kaaraman nin Dios. Si Jesus nagsabi na an mga naggigibo kan kabotan nin Dios ‘malaog sa kahadean.’ An siring na mga indibiduwal magkakapribilehio na maglingkod sa Dios sagkod lamang!​—Mateo 7:21; 1 Juan 2:17.

3. Ano an kabotan nin Dios para sa sato?

³ Pakatapos na manodan kun ano an kabotan nin Dios, mahalaga na gibohon iyan. Ano sa paghona nindo an kabotan na iyan nin Dios para sa saindo? Iyan angay na masusumaryo sa mga tataramon na ini: Arogon si Jesus. An 1 Pedro 2:21 nagsasabi sato: “Huli kaini kamo inapod, huli ta minsan si Cristo nagtios para sa saindo, na winalatan kamo nin padara tanganing sunodon nindo  nin estrikto an saiyang mga lakad.” Kun siring, tanganing magibo an kabotan nin Dios kaipuhan nindong sunodon an halimbawa ni Jesus sagkod sa pinakaestriktong magigibo nindo. Arog kaiyan an paggamit nindo sa kaaraman nin Dios.

KUN PAANO GINAMIT NI JESUS AN KAARAMAN NIN DIOS

4. Taano ta dakolon an aram ni Jesus manongod ki Jehova, asin paano nia ginamit an kaaraman na ini?

⁴ Si Jesu-Cristo mas pamilyar an kaaraman dapit sa Dios kisa sa iba. Sia nabuhay asin nagtrabaho sa kaibahan ni Jehova Dios sa langit sa laog nin halawigon na panahon bago nagdigdi sa daga. (Colosas 1:​15, 16) Asin ano an ginibo ni Jesus sa gabos na kaaraman na iyan? Dai sia nakontento sa pagkaigwa sana kaiyan. Si Jesus namuhay sono dian. Iyan an dahelan na sia mabooton, mapasensia, asin mamomoton sa saiyang relasyon sa mga kapwa tawo. Paagi kaiyan inarog ni Jesus an saiyang langitnon na Ama asin guminawe sia oyon sa saiyang kaaraman dapit sa mga dalan asin personalidad ni Jehova.​—Juan 8:23, 28, 29, 38; 1 Juan 4:8.

5. Taano ta nagpabautismo si Jesus, asin paano nia inotob an kahulogan kan saiyang bautismo?

⁵ An kaaraman na yaon ki Jesus nagpahiro man sa saiya na gumibo nin mahalagang aksion. Hale sa Galilea nagpasiring sia sa Salog nin Jordan, kun saen sia binautismohan ni Juan. (Mateo 3:​13-15) Ano an isinimbolo kan bautismo ni Jesus? Bilang sarong Judio, namundag sia sa sarong nasyon na dusay sa Dios. Huli kaini, si Jesus dusay na poon kan mamundag. (Exodo 19:​5, 6) Paagi sa pagpabautismo, iprenesentar nia an saiyang sadiri ki Jehova na gibohon an kabotan nin Dios para sa saiya kan panahon na idto. (Hebreo 10:​5, 7) Asin inotob ni Jesus an kahulogan kan saiyang bautismo. Ginamit nia an saiyang sadiri sa paglilingkod ki Jehova, na ihinihiras an kaaraman nin Dios sa mga tawo sa lambang oportunidad. Nakanompong si Jesus nin kaogmahan sa paggibo kan kabotan nin Dios, na sinasabi pa ngani na ini garo pagkakan para sa saiya.​—Juan 4:34.

6. Sa anong paagi pinaindahan ni Jesus an saiyang sadiri?

⁶ Aram nin lubos ni Jesus na an paggibo kan kabotan ni Jehova mangangahulogan nin dakulang pagsakripisyo​—na iyan mangangahulogan pa ngani kan saiyang buhay. Minsan siring, pinaindahan ni Jesus an saiyang sadiri, na ibinugtak sa segundang  lugar an saiyang personal na mga pangangaipo. An paggibo kan kabotan nin Dios perming naenot. Sa bagay na ini, paano daw niato masusunod an sangkap na halimbawa ni Jesus?

MGA AKSION NA MINAGIYA PASIRING SA BUHAY NA DAING SAGKOD

7. Ano an nagkapirang aksion na dapat na gibohon nin saro tanganing makualipikar para sa bautismo?

⁷ Bakong arog ni Jesus, kita bakong sangkap asin makaaabot sana sa makahulogan na okasyon nin pagpabautismo pakatapos na gumibo nin iba pang mahalagang mga aksion. Minapoon ini paagi sa paglaog nin tamang kaaraman dapit ki Jehova Dios asin ki Jesu-Cristo sa satong puso. An paggibo kaini pinangyayari kita na gumibo nin pagtubod asin magkaigwa nin hararom na pagkamoot sa Dios. (Mateo 22:​37-40; Roma 10:17; Hebreo 11:6) An pagsunod sa mga pagboot, prinsipyo, asin pamantayan nin Dios maninigong magpahiro sa sato na magsolsol, na nagpapahayag nin diosnon na pagmondo sa satong nakaaging mga kasalan. Minagiya ini pasiring sa pagkakombertir, an boot sabihon, pagbakle asin pagbaya sa ano man na salang dalan na satong sinunod kan mayo pa kita kan kaaraman nin Dios. (Gibo 3:19) Natural sana na kun kita may ginigibong kasalan sa hilom imbes na an matanos an ginigibo, tunay na kita dai pa nagbakle, ni nadadaya man niato an Dios. Naiisihan ni Jehova an gabos na pagsaginsagin.​—Lucas 12:​2, 3.

8. Anong aksion an maninigo nindong gibohon kun minamawot nindong makikabtang sa aktibidad na paghuhulit kan Kahadean?

⁸ Ngonyan na kamo nagkukua kan kaaraman nin Dios, bako daw na angay na personal na gayong horophoropon an espirituwal na mga bagay? Posible na gustong-gusto nindong isabi an saindong nanonodan sa saindong mga paryentes, katood, asin iba pa. Sa katunayan, tibaad ginigibo na nindo ini, kun paanong ihiniras ni Jesus sa iba an maogmang bareta sa impormal na mga kamugtakan. (Lucas 10:​38, 39; Juan 4:​6-15) Ngonyan tibaad minamawot nindo na gumibo nin orog pa. An Kristianong kamagurangan maoogmang makipag-olay sa saindo tanganing madeterminaran kun baga kamo kualipikado asin puede nang makikabtang sa regular na aktibidad na paghuhulit kan Kahadean kan Mga Saksi ni Jehova. Kun iyo na, an kamagurangan magibo nin mga areglo na makaiba nindo an sarong Saksi sa ministeryo.  Sinunod kan mga disipulo ni Jesus an saiyang mga instruksion tanganing magibo an saindang ministeryo sa aregladong paagi. (Marcos 6:​7, 30; Lucas 10:1) Makikinabang kamo sa kaparehong tabang mantang nakikikabtang kamo sa pagpalakop kan mensahe kan Kahadean sa harong-harong asin sa iba pang mga paagi.​—Gibo 20:​20, 21.

9. Paano an saro naggigibo nin pagdusay sa Dios, asin paano nakakaapektar sa buhay nin saro an pagdusay?

⁹ An paghuhulit kan maogmang bareta sa gabos na klase nin tawo sa teritoryo kan kongregasyon sarong paagi na manompongan an mga may matanos na boot asin kabale iyan sa marahay na mga gibo na nagpapatunay na kamo igwa nin pagtubod. (Gibo 10:​34, 35; Santiago 2:​17, 18, 26) An regular na pag-atender sa Kristianong mga pagtiripon asin pagkakaigwa nin makatuyohan na pakikikabtang sa paghuhulit mga paagi man tanganing ipaheling na kamo nagsolsol asin nagbakle na asin desidido na ngonyan na mamuhay sono sa kaaraman nin Dios. Ano an sunod na rasonableng aksion? Iyan an paggibo nin pagdusay ki Jehova Dios. Nangangahulogan ini na sa odok sa pusong pamibi, sasabihon nindo sa Dios na boluntad asin bilog na puso nindong itinatao sa saiya an saindong buhay tanganing gibohon an saiyang kabotan. Arog kaini an pagdusay kan saindong sadiri ki Jehova asin pag-ako kan maboot na sakal ni Jesu-Cristo.​—Mateo 11:​29, 30.

BAUTISMO​—KUN ANO AN KAHULOGAN KAIYAN PARA SA SAINDO

10. Taano ta maninigo kamong magpabautismo pakapagdusay nindo kan saindong sadiri ki Jehova?

¹⁰ Sono ki Jesus, an gabos na magigin saiyang disipulo dapat na bautismohan. (Mateo 28:​19, 20) Taano ta kaipuhan ini pakapagdusay nindo sa Dios? Mantang idinusay na nindo an saindong sadiri ki Jehova, aram nia na sia namomotan nindo. Alagad daing duwa-duwa na bobooton nindong gumibo nin dugang pang aksion tanganing ipaaram sa iba an manongod sa saindong pagkamoot sa Dios. Bueno, an bautismo nagtatao saindo nin oportunidad na ipahayag sa publiko an saindong pagdusay ki Jehova Dios.​—Roma 10:9, 10.

11. Ano an kahulogan nin bautismo?

¹¹ An bautismo mayaman sa simbolikong kahulogan. Mantang kamo ibinobontog, o “ilinolobong,” sa tubig, garo man sana  kamo nagadan sa saindong dating pamumuhay. Paghawas nindo sa tubig, garo man sana kamo nagbutwa sa sarong bagong buhay, saro na an kabotan nin Dios an sinusunod asin bakong an kabotan nindo. Siempre, dai boot sabihon kaiyan na dai na kamo masasala, huli ta gabos kita bakong sangkap asin sa siring nagkakasala aroaldaw. Minsan siring, bilang sarong dusay, bautisadong lingkod ni Jehova, luminaog na kamo sa sarong espesyal na relasyon sa saiya. Huli sa saindong pagsolsol asin sa saindong mapakumbabang pagpabautismo, si Jehova andam na patawadon an saindong mga kasalan basado sa pantubos na atang ni Jesus. Kaya an bautismo minagiya pasiring sa malinig na konsensia sa atubangan nin Dios.​—1 Pedro 3:21.

12. Ano an boot sabihon kan bautismohan (a) “sa ngaran kan Ama”? (b) ‘sa ngaran kan Aki’? (c) ‘sa ngaran kan banal na espiritu’?

¹² Pinagbotan ni Jesus an saiyang mga parasunod na magbautismo nin bagong mga disipulo “sa ngaran kan Ama asin kan Aki patin kan banal na espiritu.” (Mateo 28:19) Ano an boot sabihon ni Jesus? An bautismo “sa ngaran kan Ama” nagpaparisa na an saro na binabautismohan bilog na pusong inaako si Jehova Dios bilang an Kaglalang asin an may diretsong Soberano kan uniberso. (Salmo 36:9; 83:18; Eclesiastes 12:1) An pagbautismo sa ‘ngaran kan Aki’ nangangahulogan na an indibiduwal minimidbid si Jesu-Cristo​—asin partikularmente an Saiyang pantubos na atang​—bilang an solamenteng paagi nin kaligtasan na itinao nin Dios. (Gibo 4:12) An bautismo ‘sa ngaran kan banal na espiritu’ nangangahulogan na an kandidato sa bautismo minimidbid an banal na espiritu, o puersa aktiba, ni Jehova bilang instrumento nin Dios sa pag-otob kan Saiyang mga katuyohan asin sa pagtao nin kapangyarihan sa Saiyang mga lingkod tanganing gibohon an Saiyang matanos na kabotan sa kaibahan kan Saiyang organisasyon na ginigiyahan nin espiritu.​—Genesis 1:2; Salmo 104:30; Juan 14:26; 2 Pedro 1:21.

ANDAM NA DAW KAMO PARA SA BAUTISMO?

13, 14. Taano ta dai kita maninigong matakot na pilion na maglingkod ki Jehova Dios?

¹³ Mantang makahulogan na marhay an bautismo asin iyo iyan an pinakaimportanteng pangyayari sa buhay nin saro, iyan daw sarong aksion na dapat nindong ikatakot? Bako nanggad! Mantang an desisyon na magpabautismo dai dapat na basangbasangon,  iyan dai mapagdududahan na iyo an pinakamadonong na desisyon na mahihimo nindo.

¹⁴ An bautismo ebidensia kan saindong pagpili na maglingkod ki Jehova Dios. Horophoropa an mga tawo na nakakamidbid nindo. Sa laen-laen na paagi, bako daw na an kada saro sa sainda may pinaglilingkodan na kagurangnan? An iba nagpapaoripon sa mga kayamanan. (Mateo 6:24) An iba mahigos na pinag-aaabot an saindang karera o pinaninigoan an saindang sadiri paagi sa paggibo na pangenot sa saindang buhay an pag-otob sa saindang sadiring mga kamawotan. An iba pa naglilingkod sa falsong mga dios. Alagad pinili nindo na maglingkod sa tunay na Dios, si Jehova. Mayo nang iba na nagpapaheling nin siring kadakulang kabootan, pagdamay, asin pagkamoot. An Dios tinatawan nin dignidad an mga tawo paagi sa makatuyohan na gibohon na nagtotokdo sa sainda pasiring sa kaligtasan. Saiyang tinatawan nin balos na buhay na daing katapusan an saiyang mga lingkod. Sierto nanggad, an pagsunod sa halimbawa ni Jesus asin pagtao kan saindong buhay ki Jehova bakong dalan na dapat ikatakot. An totoo, iyan sana an nakapaoogma sa Dios asin lubos na rasonable.​—1 Hade 18:21.

15. Ano an nagkapirang parateng olang sa bautismo?

¹⁵ Pero, an bautismo bakong aksion na dapat gibohon huli sa kapiritan. Iyan personal na bagay sa pag-oltanan nindo ni Jehova. (Galacia 6:4) Mantang nag-ooswag kamo sa espirituwal, tibaad napag-isip-isip nindo: “Ano an nakaoolang sako na mabautismohan?” (Gibo 8:​35, 36) Puedeng hapoton nindo an saindong sadiri, ‘Nakaoolang daw sa sako an pagtumang nin pamilya? Kalabot pa daw ako sa bakong Makakasuratan na situwasyon o makasalan na gibo? An dahelan daw ta natatakot akong mawaran nin pag-oyon kan komunidad?’ Nagkapira ini sa mga bagay na dapat horophoropon, alagad turotimbangon nindo iyan sa realistikong paagi.

16. Paano kamo makikinabang sa paglilingkod ki Jehova?

¹⁶ Bakong realistiko na turotimbangon an mga mawawara na dai hinohorophorop an mga pakinabang sa paglilingkod ki Jehova. Halimbawa, horophoropa an bagay dapit sa pagtumang nin pamilya. Nanuga si Jesus na dawa kun an saiyang mga disipulo mawaran kan saindang mga paryentes huli sa pagsunod sa saiya, sinda magkakamit nin mas dakulang espirituwal na pamilya.  (Marcos 10:​29, 30) An mga kapagtubod na ini pahehelingan kamo nin sa-tugang na pagkamoot, tatabangan kamong matagalan an paglamag, asin susuportaran kamo sa dalan na pasiring sa buhay. (1 Pedro 5:9) An kamagurangan sa kongregasyon nangorognang makatatabang sa saindo na maatubang an mga problema asin mapangganahan an iba pang mga kadepisilan. (Santiago 5:​14-16) Mapadapit sa pagkawara kan pag-oyon kan kinaban na ini, marahay na hapoton nindo an saindong sadiri, ‘Ano an posibleng makakokomparar sa pagkaigwa kan pag-oyon kan Kaglalang kan uniberso, na nagpapangyari sa saiya na maggayagaya sa pinili kong buhay?’​—Talinhaga 27:11.

PAMUMUHAY SONO SA SAINDONG PAGDUSAY ASIN BAUTISMO

17. Taano ta maninigo nindong mansayon an bautismo bilang kapinonan imbes na katapusan?

¹⁷ Mahalagang girumdomon na an bautismo bakong an katapusan kan saindong espirituwal na pag-oswag. Nagtatanda iyan kan kapinonan nin bilog na buhay na paglilingkod sa Dios bilang ordenadong ministro asin saro sa Mga Saksi ni Jehova. Minsan ngani mahalagang marhay an bautismo, bako iyan garantiya sa kaligtasan. Si Jesus dai nagsabi: ‘An gabos na mabautismohan maliligtas.’ Imbes, sia nagsabi: “An makatagal sagkod sa katapusan iyo an maliligtas.” (Mateo 24:13) Kun siring, mahalaga na hanapon nguna nindo an Kahadean nin Dios paagi sa paggibo kaiyan na pangenot na interes sa saindong buhay.​—Mateo 6:​25-34.

18. Pakatapos nin bautismo, ano an nagkapirang pasohan na dapat pag-aaboton?

¹⁸ Tanganing magdanay sa saindong paglilingkod ki Jehova, bobooton nindo na magbugtak nin espirituwal na mga pasohan para sa saindong sadiri. An sarong mahalagang marhay na pasohan iyo na dugangan an saindong kaaraman dapit sa Dios paagi sa regular na personal na pag-adal kan saiyang Tataramon. Magplano para sa pagbasa kan Biblia aroaldaw. (Salmo 1:​1, 2) Regular na umatender sa Kristianong mga pagtiripon, huli ta an pakikiasosyar na manonompongan nindo dian matabang sa pagtao saindo nin espirituwal na kosog. Sa kabtang nindo, taano ta dai gibohon na saindong pasohan na magkomento sa mga pagtiripon kan kongregasyon asin sa siring omawon si Jehova asin hingoahon na mapakosog an iba? (Roma 1:​11, 12) An saro pang puedeng  magin pasohan iyo na paoswagon an kualidad kan saindong mga pamibi.​—Lucas 11:​2-4.

19. Matatabangan kamo kan banal na espiritu na ikapaheling an anong mga kualidad?

¹⁹ Tanganing makapamuhay kamo sono sa kahulogan kan saindong bautismo, kaipuhan na permi nindong atenderan an saindong ginigibo, na tinotogotan an banal na espiritu nin Dios na magpaluwas sa saindo kan mga kualidad na arog kan pagkamoot, kagayagayahan, katoninongan, pakatios, kabootan, karahayan, pagtubod, kahoyoan, asin pagpopogol sa sadiri. (Galacia 5:​22, 23; 2 Pedro 3:11) Girumdomon, itinatao ni Jehova an saiyang banal na espiritu sa gabos na namimibi na logod tawan kaiyan asin nagkukuyog sa saiya bilang saiyang maimbod na mga lingkod. (Lucas 11:13; Gibo 5:32) Kaya mamibi sa Dios na logod tawan kamo kan saiyang espiritu asin magpatabang sa saiya sa pagpaheling nin mga kualidad na nakapaoogma sa saiya. An siring na mga kualidad magigin mas risa sa saindong pananaram asin gawe mantang napadadara kamo sa impluwensia kan espiritu nin Dios. Siempre, an kada indibiduwal sa Kristianong kongregasyon nagmamaigot na pataluboon an “bagong pagkatawo” tanganing magin mas arog-Cristo. (Colosas 3:​9-14) An lambang saro sa sato napapaatubang sa laen-laen na angat sa paggibo kaini huli ta kita nasa manlaenlaen na grado nin espirituwal na pag-oswag. Mantang kamo bakong sangkap, dapat kamong magmaigot na magkaigwa nin arog-Cristong pagkatawo. Alagad dai kamo noarin man madesesperar sa bagay na ini, huli ta posible iyan sa tabang nin Dios.

20. Sa anong mga paagi maaarog nindo si Jesus sa ministeryo?

²⁰ Maninigong kabale sa saindong espirituwal na mga pasohan an mas maingat na pag-arog sa magayagayang halimbawa ni Jesus. (Hebreo 12:​1-3) Namotan nia an ministeryo. Kun siring, kun may pribilehio kamong makikabtang sa aktibidad na paghuhulit kan Kahadean, dai iyan pagtogotan na magin na sanang rutina. Hingoahon na makanompong nin satispaksion sa pagtotokdo sa iba kan manongod sa Kahadean nin Dios arog kan ginibo ni Jesus. Gamiton an pagtotokdo na itinatao kan kongregasyon tanganing matabangan kamong umoswag bilang paratokdo. Asin manarig kamo na kaya kamong tawan ni Jehova kan kosog na magibo an saindong ministeryo.​—1 Corinto 9:​19-23. 

21. (a) Paano niato naaaraman na pinahahalagahan ni Jehova an maimbod na bautisadong mga indibiduwal? (b) Ano an nagpapaheling na mahalaga an bautismo para sa satong kaligtasan sa paghokom nin Dios sa maraot na palakaw na ini nin mga bagay?

²¹ An sarong dusay, bautisadong tawo na maimbod na nagmamaigot na sumunod ki Jesus espesyal para sa Dios. Sinisiyasat ni Jehova an gabos na binilyon na puso nin tawo asin aram nia kun gurano kabihira kan siring na mga indibiduwal. Ibinibilang nia sindang kayamanan, “kawiliwiling mga bagay.” (Haggeo 2:7) An mga hula sa Biblia nagpapaheling na an mga siring ibinibilang nin Dios na mga tinandaan na makaligtas sa saiyang paghokom na sa dai na mahahaloy maabot sa maraot na palakaw na ini nin mga bagay. (Ezequiel 9:​1-6; Malaquias 3:​16, 18) Kamo daw “may tamang tendensia sa buhay na daing katapusan”? (Gibo 13:48) Odok daw an saindong pagmawot na matandaan bilang saro na naglilingkod sa Dios? An pagdusay asin bautismo kabtang kan tandang iyan, asin iyan kaipuhan para sa kaligtasan.

22. Sa anong mga paglaom makatatanaw an “dakulang kadaklan”?

²² Pakatapos kan panglobong Baha, si Noe asin an saiyang pamilya nagluwas sa dahong pasiring sa sarong lininigan na daga. Siring man ngonyan, “an sarong dakulang kadaklan” na nag-aaplikar kan kaaraman nin Dios sa saindang buhay asin nagkakamit kan pag-oyon ni Jehova igwa kan paglaom na makaligtas sa katapusan kan maraot na palakaw na ini nin mga bagay asin magkamit nin buhay na daing katapusan sa permanente nang lininigan na daga. (Kapahayagan 7:9, 14) Paano daw an magigin buhay na iyan?

BALOON AN SAINDONG KAARAMAN

Paano boot ni Jehova na gamiton nindo an saindong kaaraman dapit sa saiya?

Ano an nagkapirang aksion na minagiya pasiring sa bautismo?

Taano an bautismo ta bakong katapusan kundi sarong kapinonan?

Paano kita makapamumuhay sono sa satong pagdusay asin bautismo?

[Mga Hapot Para sa Pag-adal]

 [Ritrato sa pahina 172]

Naggibo na daw kamo nin pagdusay sa Dios sa pamibi?

 [Mga ritrato sa pahina 174]

Ano an nakaoolang sa saindo na mabautismohan?