Kapitulo 16

Kun Paano Kamo Makararani sa Dios

1. Anong mga pagkakaagid an maririsa sa dakol na relihion?

 AN SARONG turista na nagsongko sa sarong nasyon sa Oriente napangalas sa relihiosong mga rituwal na naheling nia sa sarong Budistang templo. Minsan ngani an mga imahen bako man na ki Maria o ki Cristo, an dakol sa rituwal nakakaagid sa mga rituwal kan saiyang iglesya duman sa sainda. Halimbawa, narisa nia an paggamit nin mga rosaryo asin an pagkanta nin mga pamibi. An iba nagsabi man nin siring na mga pagkomparar. Sa Sirangan o sa Solnopan, an mga paagi nin paghihingoa nin mga debotado na rumani sa Dios o sa mga sinasamba ninda haros magkakaagid.

2. Paano ilinaladawan an pamibi, asin taano ta dakol na tawo an namimibi?

² An dakol nangorognang naghihingoang rumani sa Dios paagi sa pamimibi sa saiya. An pamibi sinasabing “akto nin pakikikomunikar nin tawo sa sagrado o banal​—an Dios, mga dios, an rona sa luwas kan kinaban, o an lihis sa natural na mga kapangyarihan.” (The New Encyclopædia Britannica) Minsan siring, kun minadolok sa Dios sa pamibi, an iba nag-iisip sana kan manongod sa makukua nindang pakinabang dian. Halimbawa, may sarong lalaki na naghapot kaidto sa saro sa Mga Saksi ni Jehova: “Kun ipamimibi mo ako, mareresolberan daw an mga problema ko sa pamilya, sa trabaho, asin sa sakong salud?” Minalataw na siring kaiyan an paghona kan lalaki, alagad dakol an namimibi asin nanonompongan ninda na nagpapadagos an saindang mga problema. Kaya tibaad ihapot niato, ‘Taano man nanggad ta maninigo kitang rumani sa Dios?’ 

KUN TAANO TA DAPAT NA RUMANI SA DIOS

3. Kiisay maninigong ipanongod an satong mga pamibi, asin taano?

³ An pamibi bakong daing kahulogan na rituwal, ni saro sanang paagi na makakua nin pakinabang. An sarong mayor na dahelan sa pagdolok sa Dios iyo na magkaigwa nin dayupot na relasyon sa saiya. Kaya an satong mga pamibi maninigong ipanongod ki Jehova Dios. “Si Jehova harani sa mga nag-aarang sa saiya,” an sabi ni salmista David. (Salmo 145:18) Inaagda kita ni Jehova na magkaigwa nin matoninong na relasyon sa saiya. (Isaias 1:18) An mga naghihimate sa pangagdang ini minaoyon sa salmista na nagsabi: “Kun para sa sako, an pagrani sa Dios marahay para sa sako.” Taano? Huli ta an mga minarani ki Jehova Dios magkakamit nin tunay na kaogmahan asin katoninongan sa isip.​—Salmo 73:28.

4, 5. (a) Taano ta mahalaga na mamibi sa Dios? (b) Anong klaseng relasyon sa Dios an mapatatalubo niato paagi sa pamibi?

⁴ Taano ta dapat na mamibi sa Dios para sa tabang kun ‘aram na nia an satong kaipuhan bago kita humagad sa saiya’? (Mateo 6:8; Salmo 139:4) An pamibi nagpapaheling na kita igwa nin pagtubod sa Dios asin minamansay sia bilang Burabod nin “lambang marahay na balaog asin lambang sangkap na regalo.” (Santiago 1:17; Hebreo 11:6) Nawiwili si Jehova sa satong mga pamibi. (Talinhaga 15:8) Naoogma siang dangogon an satong makahulogan na mga kapahayagan nin pag-apresyar asin pag-omaw, kun paanong naggagayagaya an sarong ama na madangog an saiyang aki na nagtataram nin sinserong mga tataramon nin pasasalamat. (Salmo 119:108) Kun igwa nin marahay na relasyon an mag-ama, igwa nin maogmang komunikasyon. An aki na namomotan gustong makipag-olay sa saiyang ama. Totoo man iyan kun manongod sa satong relasyon sa Dios. Kun talagang pinahahalagahan niato an satong nanonodan manongod ki Jehova asin sa pagkamoot na ipinaheling nia sa sato, magkakaigwa kita nin makosog na pagmawot na ipahayag sa saiya an satong saboot sa pamibi.​—1 Juan 4:​16-18.

⁵ Kun minadolok sa Kaharohalangkaweng Dios, maninigo kitang magin magalang, minsan ngani dai man kaipuhan na mahadit nin labi-labi manongod sa eksaktong mga tataramon na ginagamit niato. (Hebreo 4:16) Permi kitang makadodolok  ki Jehova. Asin kanigoan na pribilehio na puede niatong ‘paboloson an laog kan satong puso’ sa Dios paagi sa pamibi! (Salmo 62:8) An pagpahalaga ki Jehova minagiya sa maogmang relasyon sa saiya, arog kan nakamtan kan maimbod na tawong si Abraham bilang katood nin Dios. (Santiago 2:23) Alagad kun namimibi sa Soberanong Kagurangnan kan uniberso, dapat kitang sumunod sa saiyang mga kahagadan sa pagdolok sa saiya.

MGA KAHAGADAN SA PAGRANI SA DIOS

6, 7. Minsan ngani an Dios dai naghahagad nin bayad tanganing dangogon an satong mga pamibi, ano an hinahagad nia sa sato kun kita namimibi?

⁶ Kaipuhan daw an kuarta tanganing makadolok sa Dios? Dakol na tawo an nagbabayad sa klero tanganing ipamibi sinda. An iba naniniwala pa ngani na an saindang mga pamibi dadangogon sono sa kantidad kan donasyon na saindang itinatao. Minsan siring, an Tataramon nin Dios dai nagsasabi na may hinahagad na dolot na kuarta tanganing makadolok kita ki Jehova sa pamibi. An saiyang espirituwal na mga probisyon asin an mga bendisyon gikan sa relasyon sa saiya sa pamibi makukua na daing bayad.​—Isaias 55:​1, 2.

⁷ Ano, kun siring, an hinahagad? An saro na kaipuhan iyo an tamang kamugtakan nin puso. (2 Cronica 6:​29, 30; Talinhaga 15:11) Sa satong puso dapat kitang maggibo nin pagtubod ki Jehova Dios bilang an “Paradangog nin pamibi” asin “an parabalos sa mga maigot na naghahanap sa saiya.” (Salmo 65:2; Hebreo 11:6) Dapat man kitang magkaigwa nin mapakumbabang puso. (2 Hade 22:19; Salmo 51:17) Sa saro sa mga ilustrasyon nia, ipinaheling ni Jesu-Cristo na kan magdolok sa Dios an sarong mapakumbabang parasingil nin buhis na may mahoyong puso napatunayan na mas matanos kisa sa aroganteng Fariseo. (Lucas 18:​10-14) Kun minadolok kita sa Dios sa pamibi, girumdomon niato na “an gabos na mapaabaw-abaw sa puso bagay na ikinaoongis ni Jehova.”​—Talinhaga 16:5.

8. Kun minamawot niato na simbagon nin Dios an satong mga pamibi, ano an maninigo niatong linigon sa satong sadiri?

⁸ Kun minamawot niato na simbagon nin Dios an satong mga pamibi, dapat na linigon niato sa satong sadiri an makasalan na gawe. Kan dagkahon ni disipulo Santiago an iba na rumani  sa Dios, idinugang nia: “Hanawe nindo an saindong mga kamot, kamong mga parakasala, asin linigi nindo an saindong mga puso, kamo na mga nagduduwaduwa.” (Santiago 4:8) Pati an mga parakasala puedeng magkaigwa nin matoninong na relasyon ki Jehova kun sinda magsosolsol asin mabaya sa saindang dating paagi nin pamumuhay. (Talinhaga 28:13) Dai kita puedeng dangogon ni Jehova kun kita nagsasagin sana na lininigan na niato an satong dalan. “An mga mata ni Jehova nasa mga matanos, asin an saiyang mga talinga nasa saindang pagngayongayo; alagad an lalauogon ni Jehova tumang sa mga naggigibo nin maraot,” an sabi kan Tataramon nin Dios.​—1 Pedro 3:12.

9. Paagi kiisay kita maninigong dumolok ki Jehova, asin taano?

⁹ An Biblia nagsasabi: “Mayo nin tawong matanos sa daga na padagos na naggigibo nin marahay asin dai nagkakasala.” (Eclesiastes 7:20) Kaya tibaad ihapot nindo: ‘Kun siring, paano kita makadodolok ki Jehova Dios?’ An Biblia minasimbag: “Kun an siisay man makagibo nin kasalan, igwa kita nin parasorog sa Ama, si Jesu-Cristo, sarong matanos.” (1 Juan 2:1) Minsan ngani kita mga parakasala, puede kitang dumolok sa Dios na may katalingkasan sa pagtaram paagi ki Jesu-Cristo, na nagadan bilang pantubos para sa sato. (Mateo 20:28) Sia an solamenteng paagihan na kita makadodolok ki Jehova Dios. (Juan 14:6) Dai niato ipamugtak na segurado na an merito kan pantubos na atang ni Jesus dawa kun kita tuyong gumibo nin kasalan. (Hebreo 10:26) Minsan siring, kun ginigibo niato an satong pinakamakakaya na lumikay sa maraot pero nagkakasala kita kun minsan, puede kitang magsolsol asin humagad nin kapatawadan sa Dios. Kun madolok kita sa saiya na may mapakumbabang puso, dadangogon nia kita.​—Lucas 11:4.

MGA OPORTUNIDAD NA MAKIPAG-OLAY SA DIOS

10. Kun dapit sa pamibi, paano niato maaarog si Jesus, asin ano an nagkapirang okasyon para sa pribadong pamibi?

¹⁰ Pinahalagahan na marhay ni Jesu-Cristo an saiyang relasyon ki Jehova. Kun siring, si Jesus nagtalaan nin panahon na makipag-olay sa Dios sa pribadong pamibi. (Marcos 1:35; Lucas 22:​40-46) Marahay na arogon niato an halimbawa ni Jesus  asin mamibi nin regular sa Dios. (Roma 12:12) Angay na ponan an aldaw nin mga tataramon nin pamibi, asin bago matorog, tamang pasalamatan niato si Jehova sa mga aktibidad kan aldaw. Durante kan aldaw, magin determinado kamong dumolok sa Dios “sa gabos na panahon.” (Efeso 6:18) Puede ngani kitang mamibi nin silensio sa satong puso, sa pakaaram na madadangog kita ni Jehova. An pribadong pakipag-olay sa Dios nagtatabang sa sato na parigonon an satong relasyon sa saiya, asin an pamimibi ki Jehova aroaldaw nagtatabang sa sato na magin mas harani sa saiya.

11. (a) Taano an mga pamilya ta maninigo na iribang mamibi? (b) Ano an boot sabihon kan pagsabi nindong “Amen” sa poro nin pamibi?

¹¹ Naghihinanyog man si Jehova sa mga pamibi na idinodolot para sa mga grupo nin mga tawo. (1 Hade 8:​22-53) Puede kitang rumani sa Dios bilang sarong pamilya, na pinangengenotan kan payo nin pamilya. Pinasasarig kaini an bogkos nin pamilya, asin si Jehova nagigin tunay para sa mga aki mantang nadadangog ninda an saindang mga magurang na mapakumbabang namimibi sa Dios. Kumusta kun an saro irinirepresentar sa pamibi an sarong grupo, tibaad sa sarong pagtiripon kan Mga Saksi ni Jehova? Kun kita kabilang sa mga presente, atentibo kitang maghinanyog tanganing sa poro kan pamibi, bilog na puso kitang makapagsabi nin “Amen,” na an boot sabihon “Mangyari logod.”​—1 Corinto 14:16.

MGA PAMIBI NA DINADANGOG NI JEHOVA

12. (a) Taano ta dai sinisimbag nin Dios an ibang mga pamibi? (b) Taano ta dai kita maninigong magkonsentrar sana sa personal na mga pangangaipo kun namimibi?

¹² An iba tibaad maghona na dai sinisimbag nin Dios an saindang mga pamibi minsan ngani namimibi sinda sa saiya paagi ki Cristo. Minsan siring, si apostol Juan nagsabi: “Minsan ano an satong hagadon sono sa . . . kabotan [nin Dios], nadadangog nia kita.” (1 Juan 5:14) Kaya, kun siring, kaipuhan kitang humagad sono sa kabotan nin Dios. Huling interesado sia sa satong espirituwal na kapakanan, an ano man na nakakaapektar sa satong espirituwalidad tema na angay na ipamibi. Dapat niatong tumangon an sugot na magkonsentrar sana sa pisikal na mga pangangaipo. Halimbawa, minsan ngani tama na mamibi na logod  tawan nin pakamansay asin sarig nin boot sa pag-atubang sa helang, an mga kahaditan manongod sa salud dai maninigong makatahob sa espirituwal na intereses. (Salmo 41:​1-3) Kan marisa na labi-labi an saiyang paghadit manongod sa saiyang salud, an sarong Kristiana naghagad nin tabang ki Jehova na magkaigwa kan tamang punto-de-vista dapit sa saiyang helang. Bilang resulta, an saiyang mga problema sa salud nagin mas sadit na sanang pinaghahaditan, asin namatean nia na sia tinawan nin “kapangyarihan na lihis sa ordinaryo.” (2 Corinto 4:7) Kuminosog an saiyang pagmawot na tabangan an iba sa espirituwal, asin sia nagin pambilog na panahon na parabalangibog kan Kahadean.

13. Siring kan sinasabi sa Mateo 6:​9-13, ano an nagkapirang angay na tema na puede niatong iiba sa satong mga pamibi?

¹³ Ano an puedeng iiba niato sa satong mga pamibi tanganing maogma si Jehova na dangogon iyan? Tinokdoan ni Jesu-Cristo an saiyang mga parasunod kun paano mamimibi. Sa modelong pamibi na nasusurat sa Mateo 6:​9-13, nagtao sia nin arogan na mga tema na tamang ikapamimibi niato. Ano an maninigo na may pangenot na halaga sa satong mga pamibi? An ngaran asin Kahadean ni Jehova Dios dapat na ipaorog. Angay an paghagad kan satong materyal na mga pangangaipo. Importante man na hagadon an kapatawadan sa satong mga kasalan asin an pagkaligtas sa mga sugot patin sa maraot, si Satanas na Diablo. Habo ni Jesus na kantahon niato an pamibing ini o na orootrohon iyan, na sinasambit iyan na dai hinohorophorop an kahulogan kaiyan. (Mateo 6:7) Magigin anong klaseng relasyon iyan kun ginagamit nin sarong aki an iyo man sanang mga tataramon sa lambang panahon na nakikipag-olay sia sa saiyang ama?

14. Apuera sa mga kahagadan, anong mga pamibi an maninigo niatong idolot?

¹⁴ Apuera sa mga kahagadan asin odok sa pusong mga pagngayongayo, maninigo kitang magdolot nin mga pamibi nin pag-omaw asin pasasalamat. (Salmo 34:1; 92:1; 1 Tesalonica 5:18) Puede man niatong ipamibi an iba. An mga pamibi manongod sa satong espirituwal na mga tugang na lalaki asin babae na nagsasakit o pinaglalamag nagpapaheling kan satong interes sa sainda, asin naoogma si Jehova na madangog kitang nagpapahayag  kan siring na pagmakolog. (Lucas 22:32; Juan 17:20; 1 Tesalonica 5:25) Sa katunayan, si apostol Pablo nagsurat: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.”​—Filipos 4:​6, 7.

MAGMAIGOT SA PAMIBI

15. Ano an maninigo niatong girumdomon kun garo baga dai sinisimbag an satong mga pamibi?

¹⁵ Minsan ngani nagkukua kamo kan kaaraman manongod sa Dios, tibaad mamatean nindo na an saindong mga pamibi kun beses dai sinisimbag. Puedeng totoo ini huli ta tibaad bako pang panahon na simbagon nin Dios an sarong espisipikong pamibi. (Eclesiastes 3:​1-9) Tibaad togotan ni Jehova an sarong situwasyon na magpadagos sa halipot na panahon, alagad talagang sinisimbag nia an mga pamibi asin aram nia an pinakamarahay na panahon na gibohon iyan.​—2 Corinto 12:​7-9.

16. Taano ta dapat kitang magmaigot sa pamibi, asin paano makakaapektar sa satong relasyon sa Dios an paggibo kaini?

¹⁶ An satong kaigotan sa pamibi naghahayag kan satong odok sa pusong interes sa satong sinasabi sa Dios. (Lucas 18:​1-8) Halimbawa, tibaad hagadon niato ki Jehova na tabangan kitang mapangganahan an sarong kaluyahan. Paagi sa pagmamaigot sa pamibi asin paghiro kaoyon sa satong mga kahagadan, ipinaheheling niato an satong sinseridad. Maninigo kitang magin espisipiko asin sadiosan sa satong mga kahagadan. Nangorognang mahalaga na mamibi nin maigot kun kita nakakaeksperyensia nin sugot. (Mateo 6:13) Mantang kita padagos na namimibi mantang naghihingoang pogolan an satong makasalan na mga horot, maheheling niato kun paano kita tinatabangan ni Jehova. Pakokosogon kaini an satong pagtubod asin paririgonon an satong relasyon sa saiya.​—1 Corinto 10:13; Filipos 4:13.

17. Paano kita makikinabang sa mapagngayongayong kaisipan sa paglilingkod sa Dios?

¹⁷ Paagi sa pagpatalubo nin mapagngayongayong kaisipan sa  pagtao nin banal na paglilingkod ki Jehova Dios, marerealisar niato na dai kita naglilingkod sa saiya sa satong sadiring kosog. Si Jehova an nagpapangyari na magibo an mga bagay. (1 Corinto 4:7) An pagmidbid kaini matabang sa sato na magin mapakumbaba asin mapaoswag sa satong relasyon sa saiya. (1 Pedro 5:​5, 6) Iyo, igwa kita nin marigon na mga dahelan na magmaigot sa pamibi. An satong odok na mga pamibi asin mahalagang kaaraman dapit sa kun paano marani sa satong mamomoton na langitnon na Ama magpapangyari na magin tunay na maogma an satong buhay.

AN PAKIKIKOMUNIKAR KI JEHOVA BAKONG SARO SANANG LADO

18. Paano kita makapaghihinanyog sa Dios?

¹⁸ Kun boot niato na dangogon nin Dios an satong mga pamibi, dapat kitang maghinanyog sa sinasabi nia. (Zacarias 7:13) Dai na nia ipinapaabot an saiyang mga mensahe paagi sa pinasabngan nin Dios na mga propeta asin siertong dai sia naggagamit nin espiritistikong mga paagi. (Deuteronomio 18:​10-12) Alagad puede kitang maghinanyog sa Dios paagi sa pag-adal kan saiyang Tataramon, an Biblia. (Roma 15:4; 2 Timoteo 3:​16, 17) Kun paanong tibaad kaipuhan niatong pag-adalan na magustohan an pisikal na kakanon na marahay para sa sato, sinasadol kita na ‘magkaigwa nin pagmawot sa daing kasalak na gatas kan tataramon.’ Pag-adalan na magustohan an espirituwal na kakanon paagi sa pagbasa kan Tataramon nin Dios aroaldaw.​—1 Pedro 2:​2, 3; Gibo 17:11.

19. May anong pakinabang sa paghorophorop sa saindong binabasa sa Biblia?

¹⁹ Maghorophorop sa saindong binabasa sa Biblia. (Salmo 1:​1-3; 77:​11, 12) Nangangahulogan iyan na odok na isip-isipon an materyal. Puedeng iagid nindo ini sa pagtunaw nin kakanon sa tulak. Puede nindong tunawon an espirituwal na kakanon paagi sa pagkonektar kan saindong binabasa sa mga bagay na dati na nindong aram. Horophoropon kun paano nakakaapektar sa saindong buhay an materyal, o pensaron kun ano an ihinahayag kaiyan manongod sa mga kualidad asin pagtratar ni Jehova. Sa siring paagi sa personal na pag-adal, makakakan nindo an espirituwal na kakanon na itinatao ni Jehova. Orog kamo  kaining irarani sa Dios asin tatabangan kamo na atubangon an mga problema sa aroaldaw.

20. Paano kita tinatabangan kan pag-atender sa Kristianong mga pagtiripon na makarani sa Dios?

²⁰ Puede man kamong rumani sa Dios paagi sa paghinanyog sa saiyang Tataramon na ipinaliliwanag sa Kristianong mga pagtiripon, kun paanong an mga Israelita atentibong naghinanyog kan sinda nagtitiripon sa pagdangog kan pampublikong pagbasa kan Pagboot nin Dios. An mga paratokdo kan panahon na idto tinatawan nin kahulogan an saindang pagbasa kan Pagboot, sa siring tinatabangan an mga naghihinanyog sa sainda na makasabot asin mapahiro na iaplikar an saindang nadangog. Ini nagbunga nin dakulang kagayagayahan. (Nehemias 8:​8, 12) Kaya ugaleon nindo na umatender sa mga pagtiripon kan Mga Saksi ni Jehova. (Hebreo 10:​24, 25) Tatabangan kamo kaini na masabotan dangan iaplikar an kaaraman nin Dios sa saindong buhay asin matao ini saindo nin kaogmahan. An pagigin kabtang kan pambilog na kinaban na Kristianong asosasyon nin magturugang matabang sa saindo na magdanay na harani ki Jehova. Asin siring kan satong maheheling, puede kamong makanompong nin tunay na katiwasayan sa tahaw kan banwaan nin Dios.

BALOON AN SAINDONG KAARAMAN

Taano ta maninigo kamong rumani ki Jehova?

Ano an nagkapirang kahagadan sa pagrani sa Dios?

Ano an puede nindong iiba sa saindong mga pamibi?

Taano ta maninigo kamong magmaigot sa pamibi?

Paano kamo makapaghihinanyog ki Jehova ngonyan?

[Mga Hapot Para sa Pag-adal]

 [Bilog na pahinang ritrato sa pahina 157]