Kapitulo 7

Kun ano an Ginibo nin Dios Tanganing Iligtas an Katawohan

1, 2. (a) Paano nasabotan nin sarong Romanong senturyon kun siisay an Aki nin Dios? (b) Taano ta itinogot ni Jehova na magadan si Jesus?

 SARONG hapon nin tigsoli kaidtong haros 2,000 na taon na an nakaagi, sarong Romanong senturyon an nagheheling sa tolong lalaki na luway-luway, makologon an paghihigagdan. Nangorognang narisa kan soldados na iyan an saro sainda​—si Jesu-Cristo. Si Jesus napapako sa sarong hariging kahoy. Duminiklom an langit kan odto mantang nagdadangadang an oras kan saiyang kagadanan. Kan magadan sia, makosog na natanyog an daga, asin an soldados nagkagsing: “Totoong gayo na an tawong ini iyo an Aki nin Dios.”​—Marcos 15:39.

² Aki nin Dios! Tama an soldados na idto. Naheling pa sana nia an pinakamahalagang pangyayari na nangyari sa daga kasuarin pa man. Sa naenot na mga pangyayari, an Dios mismo inapod si Jesus na saiyang namomotan na Aki. (Mateo 3:17; 17:5) Taano ta tinogotan ni Jehova na magadan an saiyang Aki? Huli ta ini an paagi nin Dios sa pagligtas kan katawohan hale sa kasalan asin kagadanan.

PINILI PARA SA SARONG ESPESYAL NA KATUYOHAN

3. Taano ta angay na an bugtong na Aki nin Dios an pilion para sa sarong espesyal na katuyohan manongod sa katawohan?

³ Siring kan satong naenot nang nanodan sa librong ini, si Jesus nag-eksister na bago nagin tawo. Inaapod siang “Aking bugtong” nin Dios huli ta sia direktang linalang ni Jehova. Pakatapos kaiyan ginamit nin Dios si Jesus sa pagpangyari na mag-eksister an gabos na iba pang bagay. (Juan 3:18; Colosas 1:16) Si Jesus espesyalmenteng nawiwili sa katawohan. (Talinhaga 8:​30, 31) Bakong  makangangalas na pinili ni Jehova an saiyang Aking bugtong tanganing magserbi sa sarong espesyal na katuyohan kan an katawohan mapasairarom kan silot nin kagadanan!

4, 5. Bago nagdigdi sa daga si Jesus, ano an ihinayag kan Biblia manongod sa Mesiyanikong Banhi?

⁴ Kan ipinahahayag an sentensia ki Adan, Eva, asin Satanas sa tatamnan nin Eden, an Dios nagtaram dapit sa Paraligtas sa ngapit bilang sarong “banhi.” An Banhi, o aki, na ini maabot tanganing haleon an makaturotristeng mga kasakitan na pinangyari ni Satanas na Diablo, “an enot na halas.” Sa katunayan, an ipinanugang Banhi roronoton si Satanas asin an gabos na nagsunod sa saiya.​—Genesis 3:15; 1 Juan 3:8; Kapahayagan 12:9.

⁵ Durante kan nakaaging mga siglo, an Dios progresibong naghayag nin dakol pa manongod sa Banhi, na inaapod man na Mesiyas. Siring kan ipinaheheling sa tsart sa pahina 37, kadakol na hula an nagtao nin mga detalye manongod sa dakol na kabtang kan saiyang buhay digdi sa daga. Halimbawa, magtitios sia nin makuring pagmaltrato tanganing maotob an saiyang kabtang sa katuyohan nin Dios.​—Isaias 53:​3-5.

KUN TAANO TA MAGAGADAN AN MESIYAS

6. Sono sa Daniel 9:​24-26, ano an gigibohon kan Mesiyas, asin paano?

⁶ An hula na nasusurat sa Daniel 9:​24-26 patienot na nagsabi na an Mesiyas​—an Linahidan na Saro nin Dios—​maotob sa sarong dakulang katuyohan. Madigdi sia sa daga tanganing “pondohon an paglapas, asin taposon an kasalan, asin tuboson an sala, asin darahon an katanosan” sagkod lamang. Hahaleon kan Mesiyas an silot na kagadanan sa maimbod na katawohan. Alagad paano nia ini gigibohon? Ipinaliliwanag kan hula na sia “hahalean nin buhay,” o gagadanon.

7. Taano an mga Judio ta nagdolot nin mga atang na hayop, asin ano an ipinanganino kaini?

⁷ An suanoy na mga Israelita pamilyar sa ideya na pagtubos sa sala. Sa saindang pagsamba sa irarom kan Pagboot na itinao sa sainda nin Dios paagi ki Moises, sinda regular na nagdolot nin mga atang na hayop. Ini nagpagirumdom sa banwaan nin Israel na an mga tawo nangangaipo nin sarong bagay tanganing tuboson, o tahoban, an saindang mga kasalan. Sinumaryo ni apostol Pablo an prinsipyo sa paaging ini: “Kun dai nin pagpabolos  nin dugo dai nin kapatawadan.” (Hebreo 9:22) An mga Kristiano bakong sakop kan Mosaikong Pagboot kaiba an mga kahagadan kaiyan, arog kan mga atang. (Roma 10:4; Colosas 2:​16, 17) Aram man ninda na an mga atang na hayop dai makatatao nin permanente asin kompletong kapatawadan sa mga kasalan. Imbes, an mga dolot na atang na ini nanganino sa orog pang mahalagang atang​—an atang kan Mesiyas, o Cristo. (Hebreo 10:​4, 10; ikomparar an Galacia 3:24.) Minsan siring, tibaad ihapot nindo, ‘Kaipuhan daw nanggad na magadan an Mesiyas?’

8, 9. Anong mahalagang marhay na mga bagay an nawara ni Adan asin Eva, asin paano an saindang iginawe nakaapektar sa saindang mga gikan?

⁸ Iyo, an Mesiyas kaipuhan na magadan kun boot na maligtas an katawohan. Tanganing masabotan kun taano, dapat niatong girumdomon an tatamnan nin Eden asin hingoahon na saboton an kadakulaan kan nawara ni Adan asin Eva kan sinda magrebelde tumang sa Dios. Puede nindang kamtan an buhay na daing sagkod! Bilang mga aki nin Dios, nagkamit man sinda nin direktang relasyon sa saiya. Alagad kan isikwal ninda an pamamahala ni Jehova, nawara ninda iyan gabos asin nagdara sinda nin kasalan asin kagadanan sa rasa nin tawo.​—Roma 5:12.

⁹ Garo baga sinayang kan satong enot na mga magurang an dakulaon na kayamanan, na ibinugsok an saindang sadiri sa kotkot nin utang. Ipinamana ni Adan asin Eva an utang na iyan sa saindang mga aki. Huli ta dai kita namundag na sangkap asin mayong kasalan, kada saro sa sato makasalan asin nagagadan. Kun kita nagkakahelang o may maraot na ikinataram na gusto kutana niatong bawion, naeeksperyensiahan niato an mga epekto kan satong minanang utang​—an pagkabakong sangkap nin tawo. (Roma 7:​21-25) An paglaom sana niato mabawi an nawara ni Adan. Minsan siring, dai niato kayang makua an sangkap na buhay nin tawo. Mantang an gabos na bakong sangkap na tawo nagkakasala, an nakukua niato gabos kagadanan, bakong buhay.​—Roma 6:23.

10. Ano an kaipuhan tanganing mabalukat an nawara ni Adan?

¹⁰ Pero, may ikatatao daw bilang karibay kan buhay na iwinara ni Adan? An pamantayan nin Dios sa hustisya naghahagad nin pagkatimbang, “kalag sa kalag.” (Exodo 21:23) Kaya dapat na may buhay na itao bilang bayad sa buhay na nawara. Dai magkakaigo  an buhay nin basta siisay na sana. An Salmo 49:​7, 8 nagsasabi dapit sa bakong sangkap na mga tawo: “Mayo ni saro sa sainda an sa ano man na paagi makababalukat minsan sa tugang, ni makatatao sa Dios nin pantubos para sa saiya; (asin an halagang pambalukat sa saindang kalag dakulaon an halaga na iyan nag-ontok na sagkod sa panahon na daing katapusan).” Kun siring, mayo na daw nin paglaom an situwasyon? Dai nanggad.

11. (a) Ano an kahulogan sa Hebreo kan terminong “pantubos”? (b) Siisay sana an puedeng bumalukat sa katawohan, asin taano?

¹¹ Sa Hebreong tataramon, an terminong “pantubos” nangangahulogan kan halaga na ibinayad tanganing balukaton an sarong bihag asin nagpaparisa man nin pagigin magkatimbang. Solamente an tawong may sangkap na buhay bilang tawo an makatatao kan katimbang kan nawara ni Adan. Pagkagadan ni Adan, an solamenteng sangkap na tawong namundag digdi sa daga iyo si Jesu-Cristo. Huli kaini, an Biblia inaapod si Jesus na “an huring Adan” asin inaasegurar kita na si Cristo “nagtao kan saiyang sadiri bilang katimbang na pantubos para sa gabos.” (1 Corinto 15:45; 1 Timoteo 2:​5, 6) Mantang si Adan nagpamana nin kagadanan sa saiyang mga aki, an pamana ni Jesus buhay na daing sagkod. An 1 Corinto 15:22 nagpapaliwanag: “Kun paanong an gabos nagagadan dian ki Adan, siring man an gabos bubuhayon dian ki Cristo.” Angay nanggad, kun siring, si Jesus inaapod na “Amang Daing Sagkod.”​—Isaias 9:​6, 7.

KUN PAANO IBINAYAD AN PANTUBOS

12. Kasuarin si Jesus nagin Mesiyas, asin anong dalan nin buhay an sinunod nia pakatapos kaiyan?

¹² Kan tigholog nin 29 C.E., si Jesus nagduman sa saiyang paryenteng si Juan tanganing mabautismohan asin sa siring ipresentar an saiyang sadiri na gibohon an kabotan nin Dios. Sa okasyon na idto linahidan ni Jehova si Jesus nin banal na espiritu. Kaya si Jesus nagin an Mesiyas, o Cristo, an saro na linahidan nin Dios. (Mateo 3:​16, 17) Dangan pinonan ni Jesus an saiyang tolo may kabangang taon na ministeryo. Linibot nia an saiyang sadiring daga, na naghuhulit manongod sa Kahadean nin Dios asin nagtitipon nin maimbod na mga parasunod. Minsan siring, arog kan ihinula, dai nahaloy duminakol an pagtumang sa saiya.​—Salmo 118:22; Gibo 4:​8-11. 

13. Ano an mga nangyari bago kan pagkagadan ni Jesus bilang nagdadanay sa integridad?

¹³ Mapusong ibinuyagyag ni Jesus an pagsaginsagin kan mga namomoon sa relihion, asin sinda naghingoang ikapagadan sia. Sa katapustapusi nakahaman sinda nin maraoton na pakana na kalabot an pagpasaloib, salang pag-arestar, ilegal na pagbista, asin putik na sahot nin sedisyon. Si Jesus sinuntok, linutaban, pinag-olog-olog, asin linatigo na sinadyang lugadon an saiyang laman. Dangan an Romanong gobernador na si Poncio Pilato sinentensiahan siang magadan sa sarong hariging pasakitan. Ipinako sia sa kahoy na palo asin ibinitin dian na patindog. An kada hangos makologon, asin dakol na oras pa an uminagi bago sia nagadan. Sa bilog na pagsakit na idto, si Jesus nagpadanay nin sangkap na integridad sa Dios.

14. Taano ta itinogot nin Dios na magsakit asin magadan an saiyang Aki?

¹⁴ Sa siring, kan Nisan 14, 33 C.E., na itinao ni Jesus an saiyang buhay bilang “pantubos karibay kan dakol.” (Marcos 10:45; 1 Timoteo 2:​5, 6) Hale sa langit, naheheling ni Jehova an saiyang namomotan na Aki na nagsasakit asin nagadan. Taano ta itinogot nin Dios na mangyari an siring na makaturotristeng bagay? Ginibo nia iyan huli ta namotan nia an katawohan. Si Jesus nagsabi: “An Dios namoot na gayo sa kinaban na itinao nia an saiyang Aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Itinotokdo man sa sato kan kagadanan ni Jesus na si Jehova Dios nin sangkap na hustisya. (Deuteronomio 32:4) An iba tibaad magngalas kun taano ta dai binayaan nin Dios an saiyang mga prinsipyo nin hustisya na naghahagad nin kalag sa kalag asin inignoro an bayad sa makasalan na dalan ni Adan. An dahelan iyo na si Jehova perming nagsusunod sa saiyang mga ley asin sinusuportaran iyan, maski magsakripisyo sia nin dakula.

15. Mantang magigin bakong makatanosan na itogot na permanenteng matapos an pag-eksister ni Jesus, ano an ginibo ni Jehova?

¹⁵ An hustisya ni Jehova naghagad man na an kagadanan ni Jesus magkaigwa nin maogmang resulta. Total, magkakaigwa daw nin hustisya sa pagtogot sa maimbod na si Jesus na matorog sa kagadanan sagkod lamang? Siempre dai! An Hebreong Kasuratan naghula na an maimbod na saro nin Dios dai magdadanay sa lolobngan. (Salmo 16:10; Gibo 13:35) Natorog sia sa kagadanan  sa laog nin mga tolong aldaw, dangan binuhay sia liwat ni Jehova Dios bilang makapangyarihan na espiritung persona.​—1 Pedro 3:18.

16. Ano an ginibo ni Jesus pagbalik sa langit?

¹⁶ Sa saiyang pagkagadan, itinao ni Jesus an saiyang buhay bilang tawo para sa gabos na panahon. Kan buhayon liwat sa langit, sia nagin espiritung nagtatao nin buhay. Saro pa, kan si Jesus sumakat sa kabanalbanaleng lugar sa uniberso, nakaibanan giraray nia an saiyang namomotan na Ama asin pormal na iprinesentar sa Saiya an halaga kan saiyang sangkap na buhay bilang tawo. (Hebreo 9:​23-28) An halaga kan mahalagang marhay na buhay na iyan puede nang iaplikar para sa makinuyog na katawohan. Ano an kahulogan kaiyan para sa saindo?

AN PANTUBOS NI CRISTO ASIN KAMO

17. Paano kita makakukua nin kapatawadan basado sa pantubos na atang ni Cristo?

¹⁷ Horophoropa an tolong paagi na an pantubos na atang ni Cristo mapakikinabangan nindo dawa ngonyan. Enot, iyan nagtatao nin kapatawadan sa mga kasalan. Paagi sa pagtubod sa pinabolos na dugo ni Jesus, igwa kita “kan pagkabutas paagi sa pantubos,” iyo, an “kapatawadan sa satong mga kasalan.” (Efeso 1:7) Kaya dawa nakagibo kita nin magabat na kasalan, puede kitang humagad nin kapatawadan sa Dios sa ngaran ni Jesus. Kun kita tunay na nagsosolsol, iinaaplikar sa sato ni Jehova an halaga kan pantubos na atang kan saiyang Aki. An Dios pinatatawad kita, na itinatao sato an bendisyon na marahay na konsensia, imbes na singilon an padusang kagadanan na satong nakua paagi sa pagkakasala.​—Gibo 3:19; 1 Pedro 3:21.

18. Sa anong paagi kita tinatawan nin paglaom kan atang ni Jesus?

¹⁸ Ikaduwa, an pantubos na atang ni Cristo nagtatao kan basihan sa satong paglaom sa ngapit. Sa bisyon, naheling ni apostol Juan na “an sarong dakulang kadaklan, na dai nin siisay man na makabibilang” makaliligtas sa maabot na kapahapahamak na katapusan kan palakaw na ini nin mga bagay. Taano ta makaliligtas sinda kun laglagon na nin Dios an kadakol na iba pa? Sarong anghel an nagsabi ki Juan na an dakulang kadaklan ‘hinugasan an saindang mga gubing asin pinaputi iyan sa dugo kan Kordero,’ si Jesu-Cristo. (Kapahayagan 7:​9, 14) Sagkod na kita nagtutubod  sa pinabolos na dugo ni Jesu-Cristo asin namumuhay kaoyon sa mga kahagadan nin Dios, kita magigin malinig sa pagheling nin Dios asin magkakaigwa kan paglaom na buhay na daing katapusan.

19. Paano pinatutunayan kan atang ni Cristo na sia asin an saiyang Ama namomoot sa saindo?

¹⁹ Ikatolo, an pantubos na atang iyo an pinakanangongorog na patotoo kan pagkamoot ni Jehova. Ilinadawan kan kagadanan ni Cristo an duwang pinakadakulang akto nin pagkamoot sa kasaysayan kan uniberso: (1) an pagkamoot nin Dios sa pagsugo kan saiyang Aki na magadan para sa sato; (2) an pagkamoot ni Jesus sa boluntad na pagdolot kan saiyang sadiri bilang pantubos. (Juan 15:13; Roma 5:8) Kun kita tunay na nagtutubod, an pagkamoot na ini minaaplikar sa lambang saro sa sato. Si apostol Pablo nagsabi: “[An] Aki nin Dios . . . namoot sako asin itinao an saiyang sadiri para sa sako.”​—Galacia 2:20; Hebreo 2:9; 1 Juan 4:​9, 10.

20. Taano ta maninigo kitang magtubod sa pantubos na atang ni Jesus?

²⁰ Kun siring, ipaheling niato an satong pagpasalamat sa pagkamoot na ipinaheling nin Dios asin ni Cristo paagi sa pagtubod sa pantubos na atang ni Jesus. An paggibo kaiyan minagiya pasiring sa buhay na daing katapusan. (Juan 3:36) Pero, an satong kaligtasan bakong iyo an pinakamahalagang dahelan kan buhay asin kagadanan ni Jesus digdi sa daga. Dai, an saiyang pangenot na interes nasa sarong orog pang mahalagang isyu, sarong unibersal na isyu. Siring kan satong maheheling sa sunod na kapitulo, an isyung iyan mahalaga sa sato gabos huli ta ipinaheheling kaiyan kun taano ta tinotogotan nin Dios an karatan asin pagsakit na magpadagos nin halawigon sa kinaban na ini.

BALOON AN SAINDONG KAARAMAN

Taano ta kinaipuhan na magadan si Jesus tanganing iligtas an katawohan?

Paano ibinayad an pantubos?

Sa anong mga paagi kamo nakikinabang sa pantubos?

[Mga Hapot Para sa Pag-adal]

 [Bilog na pahinang ritrato sa pahina 67]