Kapitulo 17

Makanompong nin Katiwasayan sa Tahaw kan Banwaan nin Dios

1, 2. Paano an situwasyon nin katawohan nakakaagid sa situwasyon nin mga tawo sa sarong lugar na rinaot nin bagyo?

 IMAHINARA na may sarong bagyo na ruminaot sa lugar na saindong iniistaran. Nagaba an saindong harong, asin nawara an gabos nindong rogaring. Kulang an kakanon. An situwasyon garo baga mayo nin paglaom. Dangan, uminabot an dai linalaoman na mga ayuda. Kadakol kan itinaong kakanon asin gubing. Ipinatogdok kamo nin sarong bagong harong. Sierto nanggad na magpapasalamat kamo sa tawo na nagtao kan probisyon na ini.

² May kaagid na nangyayari ngonyan. Arog kan bagyong idto, an pagrebelde ni Adan asin Eva nagin dahelan nin dakulang danyos sa rasa nin tawo. Nawara an Paraisong erokan nin katawohan. Poon kaidto, an mga gobyerno nin tawo nasudya na protehiran an mga tawo sa guerra, krimen, asin inhustisya. An relihion dakolon an ginutom na marhay sa masustansiang espirituwal na kakanon. Minsan siring, sa espirituwal na pagtaram si Jehova Dios nagtatao ngonyan nin kakanon, gubing, asin istaran. Paano nia iyan ginigibo?

“AN MAIMBOD ASIN MADONONG NA ORIPON”

3. Paano si Jehova nagsusuplay nin mga probisyon para sa katawohan, arog kan ipinaheheling nin anong mga halimbawa?

³ An mga ayuda sa kadaklan ipinapanao paagi sa sarong organisadong paagihan, asin sa kaagid na paagi si Jehova nagtatao nin espirituwal na probisyon para sa saiyang banwaan. Halimbawa, an mga Israelita nagin “kongregasyon ni Jehova” sa laog nin mga 1,500 na taon. Kabilang sa sainda an mga naglingkod  bilang paagihan nin Dios sa pagtokdo kan saiyang Pagboot. (1 Cronica 28:8; 2 Cronica 17:​7-9) Kan enot na siglo C.E., ilinuwas ni Jehova an Kristianong organisasyon. Naporma an mga kongregasyon, asin nagpunsionar sinda sa irarom kan paggiya nin sarong namamahalang grupo na kompuesto nin mga apostol asin kamagurangan na lalaki. (Gibo 15:​22-31) Siring man ngonyan, inaasikaso ni Jehova an saiyang banwaan paagi sa sarong organisadong grupo. Paano niato ini naaaraman?

4. Siisay an nagin “maimbod asin madonong na oripon” sa modernong mga panahon, asin paano itinatao an espirituwal na mga probisyon nin Dios?

⁴ Si Jesus nagsabi na sa panahon kan saiyang presensia na may kapangyarihan sa Kahadean, “an maimbod asin madonong na oripon” manonompongan na nagtatao nin “kakanon sa igong panahon” sa Saiyang mga parasunod. (Mateo 24:​45-47) Kan si Jesus patukawon bilang langitnon na Hade kan 1914, siisay an nagin “oripon” na ini? Sierto nanggad na bakong an klero nin Kakristianohan. Sa kadaklan, an saindang aripompon pinapakakan ninda nin propaganda na nagsusuportar sa saindang sadiring nasyonal na mga gobyerno kaidtong Guerra Mundial I. Alagad an igo asin napapanahon na espirituwal na kakanon itinatao kan grupo nin tunay na mga Kristiano na linahidan kan banal na espiritu nin Dios asin kabtang kan inapod ni Jesus na “sadangoton na aripompon.” (Lucas 12:32) Ihinulit kan linahidan na mga Kristianong ini an Kahadean nin Dios imbes na an mga gobyerno nin tawo. Bilang resulta, sa nakaaging mga taon minilyon na matanos an boot na “ibang karnero” an uminiba sa linahidan na “oripon” sa paggibo kan tunay na relihion. (Juan 10:16) Ginagamit an ‘maimbod na oripon’ asin an Namamahalang Grupo kaiyan sa presenteng aldaw, ginigiyahan nin Dios an saiyang organisadong banwaan tanganing ikapaabot an espirituwal na kakanon, gubing, asin istaran sa gabos na nagmamawot na magkaigwa kan mga probisyon na ini.

“KAKANON SA IGONG PANAHON”

5. Ano an espirituwal na kamugtakan sa kinaban ngonyan, alagad ano an ginigibo ni Jehova manongod kaini?

⁵ Si Jesus nagsabi: “An tawo dapat na mabuhay, bakong sa tinapay  sana, kundi sa lambang tataramon na minaluwas sa ngoso ni Jehova.” (Mateo 4:4) Pero, makamomondo, an dakulang mayoriya kan mga tawo dai nagtatao nin atension sa mga sinasabi nin Dios. Arog kan ihinula kan propeta ni Jehova na si Amos, igwa nin “sarong gutom, bakong sa tinapay, asin pagkapaha, bakong sa tubig, kundi sa pagdangog kan mga tataramon ni Jehova.” (Amos 8:11) Pati an relihiosong marhay na mga tawo nagugutom na marhay sa espirituwal. Minsan siring, kabotan ni Jehova na “an gabos na klase nin tawo makaligtas asin makaabot sa tamang kaaraman kan katotoohan.” (1 Timoteo 2:​3, 4) Huli kaiyan, nagtatao sia nin abundang espirituwal na kakakon. Alagad saen iyan makukua?

6. Paano pinakakan ni Jehova sa espirituwal an saiyang banwaan kaidtong nakaaging mga panahon?

⁶ Sa bilog na kasaysayan, si Jehova nagtatao nin espirituwal na kakanon sa saiyang banwaan bilang sarong grupo. (Isaias 65:13) Halimbawa, tinipon kan mga saserdoteng Israelita an mga lalaki, babae, asin aki para sa pangrupong pagtotokdo kan Pagboot nin Dios. (Deuteronomio 31:​9, 12) Sa irarom kan paggiya kan namamahalang grupo, an mga Kristiano kan enot na siglo nag-organisar nin mga kongregasyon asin naggibo nin mga pagtiripon para sa pagtotokdo asin pagpakosog sa gabos. (Roma 16:5; Filemon 1, 2) Sinusunod kan Mga Saksi ni Jehova an arogan na ini. Kamo odok na iniimbitaran na umatender sa gabos na pagtiripon ninda.

7. Paano an regular na pag-atender sa Kristianong mga pagtiripon konektado sa kaaraman asin pagtubod?

⁷ Siempre, tibaad dakol na kamong nanodan sa saindong personal na pag-adal sa Biblia. Posibleng may saro na nagtabang saindo. (Gibo 8:​30-35) Alagad an saindong pagtubod ikakaagid sa sarong tinanom na maluluyos asin magagadan kun dai iyan tinatawan nin tamang pag-ataman. Huli kaini, kaipuhan kamong umako nin igong espirituwal na kakanon. (1 Timoteo 4:6) An Kristianong mga pagtiripon nagtatao nin dayaday na programa nin pagtotokdo na sinadya tanganing pakakanon kamo sa espirituwal asin tabangan kamong padagos na magtalubo sa pagtubod mantang nag-oorog an saindong kaaraman dapit sa Dios.​—Colosas 1:​9, 10. 

8. Taano ta dinadagka kita na umatender sa mga pagtiripon kan Mga Saksi ni Jehova?

⁸ An mga pagtiripon nagseserbi sa saro pang mahalagang katuyohan. Nagsurat si Pablo: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon.” (Hebreo 10:​24, 25) An termino sa Griego na trinadusir digding “mandagka” puede man na mangahulogan nin “pataromon.” An sarong talinhaga sa Biblia nagsasabi: “Sa batbat, an batbat mismo minatarom. Kaya an tawo minapatarom sa lalauogon nin ibang tawo.” (Talinhaga 27:17) Kita gabos nangangaipo nin dayaday na ‘pagpapatarom.’ An aroaldaw na mga pangigipit kan kinaban puedeng pangorolon an satong pagtubod. Kun kita nag-aatender sa Kristianong mga pagtiripon, igwa nin pagriribayan nin pagpakosog. (Roma 1:​11, 12) Sinusunod kan mga miembro kan kongregasyon an sadol ni apostol Pablo na ‘padagos na magparangaranga asin magpakinosogkosogan,’ asin an siring na mga bagay nagpapatarom sa satong pagtubod. (1 Tesalonica 5:11) An regular na pagpresente sa Kristianong mga pagtiripon nagpaparisa man na satong namomotan an Dios asin nagtatao sato nin mga oportunidad na omawon sia.​—Salmo 35:18.

“ISOLOG NINDO AN PAGKAMOOT”

9. Paano si Jehova nagtao kan halimbawa sa pagpaheling nin pagkamoot?

⁹ Nagsurat si Pablo: “Isolog nindo an pagkamoot, huli ta iyan sangkap na bogkos nin pagkasararo.” (Colosas 3:14) Maugayon na itinatao sato ni Jehova an gubing na ini. Sa anong paagi? An mga Kristiano makapaheheling nin pagkamoot huli ta iyan saro sa itinao nin Dios na mga bunga kan banal na espiritu ni Jehova. (Galacia 5:​22, 23) Ipinaheling mismo ni Jehova an pinakadakulang pagkamoot paagi sa pagsugo kan saiyang bugtong na Aki tanganing magkamit kita nin buhay na daing katapusan. (Juan 3:16) An kadarudakulaing pagpaheling na ini nin pagkamoot nagtao nin modelo para sa sato sa pagpahayag kan kualidad na ini. “Kun siring kaini an pagkamoot sato nin Dios,” an isinurat ni apostol Juan, “kun siring kita may paninimbagan na magkaminorootmootan.”​—1 Juan 4:11. 

10. Paano kita puedeng makinabang sa “bilog na kasararoan nin mga tugang”?

¹⁰ An pag-atender nindo sa mga pagtiripon sa Kingdom Hall matao saindo nin marahayon na oportunidad na magpaheling nin pagkamoot. Makakamidbid nindo duman an dakol na manlaenlaen na tawo. Daing duwa-duwa na madadagka tolos kamo na makidayupot sa dakol sa sainda. Siempre, magkalaen an mga personalidad maski sa tahaw kan mga naglilingkod ki Jehova. Tibaad kaidtong nakaagi linilikayan na sana nindo an mga tawo na bako nindong kapareho an interes o ugale. Pero, an mga Kristiano dapat na ‘mamoot sa bilog na kasararoan nin mga tugang.’ (1 Pedro 2:17) Kun siring, gibohon na pasohan nindo na makamidbid an mga nasa Kingdom Hall​—pati an mga indibiduwal na bako nindong kapareho an edad, personalidad, rasa, o grado nin edukasyon. Posibleng manonompongan nindo na an kada saro nangongorog sa sarong kawiliwiling kualidad.

11. Taano ta dai nindo maninigong ikaribok an manlaenlaen na personalidad sa tahaw kan banwaan ni Jehova?

¹¹ An pagkakalaenlaen nin personalidad sa kongregasyon dai dapat na ikaribok nindo. Sa pag-ilustrar, imahinara na kadakol na auto an nagdadalagan kasabay nindo sa tinampo. Bakong gabos parareho an rikas, ni parareho man an kamugtakan kan gabos. An iba dakol nang milya an dinalagan, alagad arog nindo, an iba nagpopoon pa sana. Minsan siring, apisar kan mga pagkakalaen na ini an gabos nagdadalagan sa tinampo. Kaagid iyan kan mga indibiduwal na minabilog sa sarong kongregasyon. Bakong gabos nakapatatalubo nin Kristianong mga kualidad sa pararehong rikas. Saro pa, bakong gabos nasa pararehong pisikal o emosyonal na kamugtakan. An iba dakol nang taon na nagsasamba ki Jehova; an iba nagpopoon pa sana. Pero, an gabos nagdadalagan sa tinampo na pasiring sa buhay na daing katapusan, na ‘nagkakasararo sa saro sanang pag-isip asin sa saro sanang paghonahona.’ (1 Corinto 1:10) Kun siring, hanapon an marahay na mga kualidad imbes na an mga kaluyahan kan mga nasa kongregasyon. An paggibo kaiyan magpapaogma sa saindong puso, huli ta marerealisar nindo na an Dios talagang nasa tahaw kan banwaan na ini. Asin sierto nanggad na digdi nindo gustong mamugtak.​—1 Corinto 14:25. 

12, 13. (a) Kun may saro sa kongregasyon na magkasala sa saindo, ano an puede nindong gibohon? (b) Taano ta mahalaga na dai magtanom nin paghinanakit?

¹² Mantang an gabos na tawo bakong sangkap, kun minsan may saro sa kongregasyon na tibaad makataram o makagibo nin sarong bagay na ikauuyam nindo. (Roma 3:23) Si disipulo Santiago realistikong nagsurat: “Kita gabos nasisingkog nin dakol na beses. Kun an siisay man dai nasisingkog sa pagtaram, an sarong ini sangkap na tawo.” (Santiago 3:2) Ano an magigin reaksion nindo kun may magkasala sa saindo? An sarong talinhaga sa Biblia nagsasabi: “An pagmansay nin tawo nakapopogol nanggad sa saiyang kaanggotan, asin kagayonan nia an pagtahob sa kasalan.” (Talinhaga 19:11) An pagkaigwa nin pagmansay nangangahulogan na helingon nin mas hararom an situwasyon, saboton an pundamental na mga dahelan na nagpapangyari sa saro na magtaram o gumawe sa sarong paagi. An kadaklan sa sato naggagamit nin dakol na pagmansay sa pananarahotan para sa satong sadiring mga sala. Taano ta dai man iyan gamiton tanganing saboton asin tahoban an mga pagkabakong sangkap nin iba?​—Mateo 7:​1-5; Colosas 3:13.

¹³ Dai noarin man paglingawan na dapat niatong patawadon an iba kun boot niato mismo na mag-ako kan kapatawadan ni Jehova. (Mateo 6:​9, 12, 14, 15) Kun ginigibo niato an katotoohan, tatrataron niato an iba sa mamomoton na paagi. (1 Juan 1:​6, 7; 3:​14-16; 4:​20, 21) Kun siring, kun magkaproblema kamo sa sarong indibiduwal sa kongregasyon, labanan an pagtanom nin paghinanakit. Kun kamo nagugubingan nin pagkamoot, pagmamaigotan nindo na husayon an problema, asin dai kamo mag-aalangan na humagad nin tawad kun kamo an nagkasala.​—Mateo 5:​23, 24; 18:​15-17.

14. Anong mga kualidad an maninigo niatong isolog?

¹⁴ Maninigong kabale sa satong espirituwal na gubing an iba pang kualidad na konektadong marhay sa pagkamoot. Si Pablo nagsurat: “Isolog nindo an mamomoton na mga pagmate nin pagdamay, kabootan, kababaan nin boot, kahoyoan, asin pakatios.” An mga ugaleng ini, na sakop gabos nin pagkamoot, kabtang kan diosnon na “bagong pagkatawo.” (Colosas 3:​10, 12) Maghihingoa daw kamo na isolog ini? Nangorogna kun solog  nindo an sa-tugang na pagkamoot na magkakaigwa kamo kan nagpapamidbid na tanda kan mga disipulo ni Jesus, huli ta sia nagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”​—Juan 13:35.

SARONG LUGAR NA MAY KATIWASAYAN

15. Paanong an kongregasyon garo sarong istaran?

¹⁵ An kongregasyon nagseserbi man na istaran, sarong nagpoprotehir na pailihan kun saen puede kamong makamate na tiwasay. Dian makanonompong kamo nin sadiosan an pusong mga tawo na nagmamaigot na gibohon an tama sa pagheling nin Dios. An dakol sa sainda hinale na an maraot na mga bisyo asin ugale na tibaad kapareho kan pinagmamaigotan nindong mapangganahan. (Tito 3:3) Puede ninda kamong tabangan, huli ta sinabihan kita na “padagos na magturowangan sa pagabat sa lambang saro.” (Galacia 6:2) Natural, an pagsunod sa dalan na minagiya pasiring sa buhay na daing katapusan sa katapustapusi sadiri nindong paninimbagan. (Galacia 6:5; Filipos 2:12) Pero, itinao ni Jehova an Kristianong kongregasyon bilang marahayon na paagi nin tabang asin suporta. Gurano man kanakasususto kan saindong mga problema, igwa kamong mahalagang makukuanan nin suporta​—sarong mamomoton na kongregasyon na maandorog sa saindo sa mga panahon nin kasakitan o pagtios.​—Ikomparar an Lucas 10:​29-37; Gibo 20:35.

16. Anong tabang an itinatao kan kamagurangan sa kongregasyon?

¹⁶ Kabilang sa mga masuportar sa saindo an “balaog na mga lalaki”​—nombradong kamagurangan, o paraataman, sa kongregasyon na gikan sa boot asin maigot na nagpapastor sa aripompon. (Efeso 4:​8, 11, 12; Gibo 20:28; 1 Pedro 5:​2, 3) Mapadapit sa sainda, si Isaias naghula: “An lambang saro magigin siring sa pailihan sa doros asin taguan sa bagyo, siring sa mga sapa nin tubig sa sarong disyerto, siring sa limpoy nin dakulang gapo sa mainit na daga.”​—Isaias 32:2.

17. (a) Anong klaseng tabang an nangorognang boot na itao ni Jesus? (b) Anong probisyon an ipinanuga nin Dios para sa saiyang banwaan?

¹⁷ Kan si Jesus uya digdi sa daga, makamomondo na an  mga namomoon sa relihion nagkulang sa mamomoton na pag-ataman. An kamugtakan kan mga tawo odok na nakapahiro sa boot nia, asin nangorognang boot niang tabangan sinda sa espirituwal. Naherak sa sainda si Jesus huli ta “sinda naanitan asin nagkakaralagalag siring sa mga karnero na mayong pastor.” (Mateo 9:36) Angay nanggad na ilinaladawan kaini an presenteng makaheherak na kamugtakan nin dakol na nagtitios nin makologon sa pusong mga problema na mayo ni saro na madodolokan para sa espirituwal na tabang asin karangahan! Alagad an banwaan ni Jehova igwa nanggad nin espirituwal na tabang, huli ta nanuga sia: “Bubugtakan ko sinda nin mga pastor na magpapastor nanggad sa sainda; asin dai na sinda magkakatarakot, saka dai na sinda magkakatirikbahan, asin mayo ni saro na mawawara.”​—Jeremias 23:4.

18. Taano ta maninigo niatong dolokon an sarong magurang kun nangangaipo kita nin espirituwal na tabang?

¹⁸ Makipagmidbidan sa nombradong kamagurangan sa kongregasyon. Dakol an saindang eksperyensia sa pag-aplikar kan kaaraman nin Dios, huli ta naabot ninda an mga kualipikasyon para sa mga paraataman na nasusurat sa Biblia. (1 Timoteo 3:​1-7; Tito 1:​5-9) Dai mag-alangan na dolokon an saro sa sainda kun nangangaipo kamo nin espirituwal na tabang sa paghale sa sarong bisyo o ugale na kontra sa mga kahagadan nin Dios. Manonompongan nindo na sinusunod kan kamagurangan an sadol ni Pablo: “Rangahon an mga kalag na nagmomondo, tabangan an maluya, magin matinios sa gabos.”​—1 Tesalonica 2:​7, 8; 5:14.

MAGKAMIT NIN KATIWASAYAN SA KAIBAHAN KAN BANWAAN NI JEHOVA

19. Anong mga bendisyon an itinatao ni Jehova sa mga naghahanap nin katiwasayan sa laog kan saiyang organisasyon?

¹⁹ Minsan ngani nabubuhay kita sa tahaw nin bakong sangkap na mga kamugtakan, si Jehova nagtatao sato nin espirituwal na kakanon, gubing, asin istaran. Siempre, dapat niatong halaton an ipinanuga nin Dios na bagong kinaban tanganing maeksperyensiahan an mga pakinabang sa sarong pisikal na paraiso. Alagad an mga kabilang sa organisasyon ni Jehova  nagkakamit na ngonyan kan katiwasayan sa sarong espirituwal na paraiso. Mapadapit sa sainda, si Ezequiel naghula: “Sinda mag-eerok nanggad sa katiwasayan, na mayo nin siisay man na mapatakot sa sainda.”​—Ezequiel 34:28; Salmo 4:8.

20. Paano babalosan ni Jehova an ano man na tibaad isinasakripisyo niato para sa pagsamba sa saiya?

²⁰ Makapasasalamat nanggad kita na si Jehova nagtatao nin mamomoton na espirituwal na mga probisyon paagi sa saiyang Tataramon asin organisasyon! Rumani kamo sa banwaan nin Dios. Dai kamo sumibog na natatakot sa tibaad iisipon sa saindo nin mga katood o paryentes huli sa pagkua kan kaaraman nin Dios. An iba tibaad kumontra huli ta nakikiasosyar kamo sa Mga Saksi ni Jehova asin nag-aatender sa mga pagtiripon sa Kingdom Hall. Alagad labi pa an ibabalos ni Jehova sa ano man na isinasakripisyo nindo para sa pagsamba sa saiya. (Malaquias 3:10) Saro pa, si Jesus nagsabi: “Dai nin siisay man na nagbaya sa harong o mga tugang na lalaki o mga tugang na babae o ina o ama o mga aki o mga oma huli sa sako asin huli sa maogmang bareta na dai magkakamit nin mananggatos ngonyan sa panahon na ini, mga harong asin mga tugang na lalaki asin mga tugang na babae asin mga ina asin mga aki patin mga oma, na may mga paglamag, asin sa madatong na palakaw nin mga bagay buhay na daing katapusan.” (Marcos 10:​29, 30) Iyo, ano man an saindong binayaan o dapat na tagalan, makanonompong kamo nin maogmang kairiba asin espirituwal na katiwasayan sa tahaw kan banwaan nin Dios.

BALOON AN SAINDONG KAARAMAN

Siisay “an maimbod asin madonong na oripon”?

Anong mga probisyon an itinatao ni Jehova sa pagpakakan sato sa espirituwal?

Paano puedeng makatabang sato an mga nasa Kristianong kongregasyon?

[Mga Hapot Para sa Pag-adal]

 [Bilog na pahinang ritrato sa pahina 165]