Puede Kamong Magkaigwa nin Maogmang Ngapit!
Kapitulo 1
Puede Kamong Magkaigwa nin Maogmang Ngapit!
1, 2. Ano an boot kan saindong Kaglalang na kamtan nindo?
SARONG mainit na kugos nin saro na namomotan nindo. Maogmang pagngirisi durante nin masiram na pagkakan kaiba kan saindong namomotan na mga katood. An pagkawiling masdan an saindong mga aki na maogmang nagkakarawat. An mga oras na arog kaini maogmang mga pangyayari sa buhay. Minsan siring, para sa dakol an buhay garo nag-aatubang nin sunod-sunod na magabat na problema. Kun iyan an saindong naeeksperyensiahan, kosogan nindo an saindong boot.
2 Kabotan nin Dios na kamo magkamit nin nagdadanay na kaogmahan sa irarom kan pinakamarahay na mga kamugtakan sa kawiliwiling mga palibot. Bako ining pangatorogan sana, huli ta an Dios talagang iinoopresir sa saindo an liabe sa siring kaogmang ngapit. An liabeng iyan iyo an kaaraman.
3. Anong kaaraman an liabe sa kaogmahan, asin taano ta makaseseguro kita na kayang itao nin Dios an kaaraman na iyan?
3 An pinag-oolayan niato sarong espesyal na klase nin kaaraman na nangongorog kisa kadonongan nin tawo. Iyan “an mismong kaaraman nin Dios.” (Talinhaga 2:5) Kaidtong haros 2,000 na taon na an nakaagi, an sarong kagsurat sa Biblia nagsabi: “An lambang harong igwa nin kaggibo, alagad an naggibo kan gabos na bagay iyo an Dios.” (Hebreo 3:4) Isip-isipa an kaaraman na seguradong yaon sa Kaggibo kan gabos na bagay! An Biblia nagsasabi na binibilang asin nginangaranan nin Dios an gabos na bitoon. Abaa kamakangangalas na isipon, mantang igwa nin ginatos na bilyon na bitoon sa sato mismong galaksia, asin sinasabi nin mga astronomo na igwa nin mga sanggatos na bilyon na iba pang galaksia! (Salmo 147:4) Aram man nin Dios an gabos manongod sa sato, kaya siisay pang iba an makatatao nin mas marahay na mga simbag sa mahalagang mga hapot dapit sa buhay?—Mateo 10:30.
4. Taano ta maninigo niatong laoman an Dios na magtao nin mga instruksion tanganing gumiya sato, asin anong libro an nagpapanigo sa pangangaipong ini?
4 Imahinara an duwang lalaki na naghihingoang hirahayon an saindang kotse. Nauuyam, nagpondo na sa paghirahay an sarong lalaki. An saro kalmadong hinusay an problema, binirik an liabe sa pagpaandar, asin naghuyom kan umandar an makina asin marahay an dalagan. Dai kamo madedepisilan na tuodan kun siisay sa duwa an igwa nin manwal hale sa paragibo. Bako daw na rasonable sana na an Dios matao nin mga instruksion tanganing giyahan kita sa buhay? Arog kan tibaad aram nindo, an Biblia naghihingako na siring nanggad kaiyan—sarong libro nin instruksion asin giya hale sa satong Kaglalang, na sinadya tanganing itao an kaaraman nin Dios.—2 Timoteo 3:16.
5. Gurano kahalaga kan kaaraman na yaon sa Biblia?
5 Kun totoo an paghihingako kan Biblia, isip-isipa kun guranong kayamanan na kaaraman an laog kan librong iyan! Sa Talinhaga 2:1-5, sinasadol kita kaiyan na hanapon an kadonongan, na kotkoton iyan siring sa pagkotkot niato sa natatagong kayamanan—bakong sa daga nin sa-tawong kaisipan, kundi sa mismong Tataramon nin Dios. Kun maghahanap kita dian, satong ‘makukua an mismong kaaraman nin Dios.’ Huling nasasabotan nin Dios an satong mga limitasyon asin pangangaipo, tinatawan nia kita nin instruksion na matabang sato na magkaigwa nin matoninong, maogmang buhay. (Salmo 103:14; Isaias 48:17) Dugang pa, an kaaraman nin Dios nagtatao sa sato nin nakapupukaw nin boot na maogmang bareta.
BUHAY NA DAING KATAPUSAN!
6. Anong pag-asegurar an itinao ni Jesu-Cristo manongod sa kaaraman nin Dios?
6 An bantog na persona sa kasaysayan na si Jesu-Cristo ilinadawan sa malinaw na mga termino an tampok na kabtang na ini kan kaaraman nin Dios. Sia nagsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Imahinara nanggad—kaaraman na minagiya pasiring sa buhay na daing katapusan!
7. Ano an ebidensia na bakong intension nin Dios na kita magadan?
7 Dai tolos pagsayumahan an buhay na daing katapusan na garo saro sanang pangatorogan. Imbes, masdan nindo an pagkagibo sa hawak nin tawo. Iyan magayonon na dinisenyo tanganing makanamit, makadangog, makaparong, makaheling, asin makamate. Kadakol digdi sa daga na nakapaoogma sa satong mga sentido—masiram na kakanon, kawiliwiling awit nin gamgam, mahamot na mga burak, magagayon na tanawon, asin nakaoogmang pag-iribaiba! Asin an satong makangangalas na hotok labi pa nanggad kisa makosogon na komputer, huli ta pinangyayari kita kaiyan na mag-apresyar asin maogma sa gabos na bagay na iyan. Sa paghona daw nindo boot kan satong Kaglalang na kita magadan asin mawaran kan gabos na ini? Bako daw na mas rasonableng isipon na boot nia na kita mamuhay na maogma asin magkamit nin buhay sagkod lamang? Bueno, iyan an puedeng magin kahulogan sa saindo kan kaaraman nin Dios.
BUHAY SA PARAISO
8. Ano an sinasabi kan Biblia manongod sa ngapit kan katawohan?
8 An sinasabi kan Biblia manongod sa ngapit kan daga asin kan katawohan puedeng sumaryohon sa sarong tataramon—Paraiso! Nasambitan iyan ni Jesu-Cristo kan sabihan nia an sarong naghihigagdan nang lalaki: “Ika makakaibahan ko sa Paraiso.” (Lucas 23:43) An pagkasambit sa Paraiso daing duwa-duwa na nagpagirumdom sa lalaking iyan kan maogmang kamugtakan kan satong enot na mga magurang, si Adan asin Eva. Kan lalangon sinda nin Dios, sinda sangkap asin nag-istar sa sarong garo tatamnan na parke na dinisenyo asin tinanoman kan Kaglalang. Iyan angay na inapod na tatamnan nin Eden, ngaran na nangangahulogan nin kaogmahan.
9. Paano an buhay sa orihinal na Paraiso?
9 Kanigoan kamakawiwili kan tatamnan na iyan! Iyan sarong tunay na paraiso. Kabale sa magagayon na kahoy kaiyan an mga nagbubunga nin masiram na prutas. Mantang dinidiskobre ni Adan asin Eva an saindang sakop na erokan, iniinom an mahamis na tubig kaiyan, asin ginogono an bunga sa mga kahoy kaiyan, mayo sinda nin dahelan na maghadit o matakot. Pati an mga hayop bakong peligroso, huli ta ibinugtak nin Dios an lalaki asin an saiyang agom sa mamomoton na pagsakop sa sainda gabos. Dugang pa, an enot na tawong mag-agom igwa nin mabagsik na salud. Sagkod na sinda nagdadanay na makinuyog sa Dios, sarong daing sagkod, maogmang ngapit an naghahalat sa sainda. Tinawan sinda kan nakakokontentong trabaho na pag-ataman sa saindang magayonon na Paraisong erokan. Dugang pa, si Adan asin Eva tinawan nin Dios kan pagboot na ‘panoon an daga asin sakopon iyan.’ Sinda asin an saindang mga aki pahihiwason an mga pagdolonan kan Paraiso sagkod na an satong bilog na planeta magin sarong lugar na magayon asin maogma.—Genesis 1:28.
10. Kan magtaram si Jesus dapit sa Paraiso, ano an nasa isip nia?
10 Minsan siring, kan masambitan ni Jesus an Paraiso, dai nia hinahagad sa sarong naghihigagdan nang lalaki na horophoropon an haloyon nang nakaagi. Dai, si Jesus nagtataram dapit sa ngapit! Aram nia na an satong bilog na erokan na daga magigin paraiso. Sa siring ootobon nin Dios an saiyang orihinal na katuyohan para sa katawohan asin sa satong daga. (Isaias 55:10, 11) Iyo, ibabalik an Paraiso! Asin magigin iyan arog sa ano? Pasimbaga an Tataramon nin Dios, an Banal na Biblia.
BUHAY SA IBABALIK NA PARAISO
11. Sa ibabalik na Paraiso, ano an mangyayari sa helang, paggurang, asin kagadanan?
11 An helang, paggurang, asin kagadanan mawawara na. “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo usa, asin an dila kan pula magkukurahaw sa kaogmahan.” (Isaias 35:5, 6) “An Dios mismo masasakaibanan [kan katawohan]. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:3, 4.
12. Taano ta makaseseguro kita na mawawara na an krimen, kadahasan, asin karatan sa maabot na Paraiso?
12 An krimen, kadahasan, asin karatan mawawara na sagkod lamang. “An mga maraot gagadanon . . . Dai na mahahaloy, asin an mga maraot mawawara na . . . Mayo na sia dian. Alagad an mga mahoyo mismo magmamana kan daga.” (Salmo 37:9-11) “Kun manongod sa mga maraot, sinda popohoon sa daga; asin kun manongod sa mga madaya, sinda hahaleon dian.”—Talinhaga 2:22.
13. Paano papangyayarihon nin Dios an katoninongan?
13 An katoninongan makalalakop sa daga. “Pinaoontok nia [nin Dios] an mga ralaban sagkod sa kaporoporohi kan daga. An arko saiyang binabari asin pinagpuputolputol an mga garod.” (Salmo 46:9) “An matanos mamumurak, asin an kadakolan nin katoninongan sagkod na mayo na nin bulan.”—Salmo 72:7.
14, 15. Ano an sinasabi kan Biblia manongod sa pagharong, trabaho, asin kakanon sa ibabalik na Paraiso?
14 An pagharong magkakaigwa nin seguridad asin magigin nakakokontento an trabaho. “Sinda siertong magtotogdok nin mga harong asin mag-oontok sinda dian . . . Dai sinda magtotogdok asin iba an mag-oontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili. Dai sinda magpapagal na mayong kapakanan, ni mangangaki man sinda para sa karibokan.”—Isaias 65:21-23.
15 Magkakaigwa nin abundang masustansiang kakanon. “Magkakaigwa nin kadakoldakol na tipasi sa ibabaw kan daga; magkakaigwa nin abundansia sa alitoktok kan kabukidan.” (Salmo 72:16) “An daga mismo magtatao kan bunga kaiyan; an Dios, an satong Dios, mabendisyon sa sato.”—Salmo 67:6.
16. Taano ta magigin nakaoogma an buhay sa Paraiso?
16 An buhay na daing katapusan sa paraisong daga magigin nakaoogma. “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) “An kaawagan asin an alang na lugar mag-oogma, asin an disyerto maggagayagaya patin mamumurak arog kan azafran.”—Isaias 35:1.
AN KAARAMAN ASIN AN SAINDONG NGAPIT
17. (a) Ano an maninigo nindong gibohon kun nakaaakit sa saindo an buhay sa Paraiso? (b) Paano niato naaaraman na an Dios magpapangyari nin dakulang mga pagkaliwat digdi sa daga?
17 Kun nakaaakit sa saindo an buhay sa Paraiso, dai pagtogotan na may makaolang sa saindo sa pagkamit kan kaaraman nin Dios. Namomotan nia an katawohan asin saiyang papangyayarihon an mga pagliliwat na kaipuhan tanganing gibohon na paraiso an daga. Total, kun igwa kamo kan kapangyarihan na taposon an kasakitan asin inhustisya na lakop na marhay sa kinaban, dai daw nindo iyan gigibohon? Lalaoman daw niato na bakong arog kaiyan an gigibohon nin Dios? An totoo, an Biblia klarong nagtataram dapit sa sarong panahon na hahaleon nin Dios an pano nin iriwal na palakaw na ini asin sasalidahan iyan nin sangkap, matanos na pamamahala. (Daniel 2:44) Alagad an Biblia dakol pang ginigibo apuera sa pagsabi sana sa sato kan manongod sa gabos na ini. Ipinaheheling kaiyan sa sato kun paano kita makaliligtas pasiring sa ipinanuga nin Dios na bagong kinaban.—2 Pedro 3:13; 1 Juan 2:17.
18. Ano an puedeng gibohon sa saindo ngonyan kan kaaraman nin Dios?
18 An kaaraman nin Dios mapakikinabangan man nindo nin marhay ngonyan mismo. An pinakahararom asin pinakanakapupurisaw na mga hapot dapit sa buhay sinisimbag sa Biblia. An pag-ako sa paggiya kaiyan matabang sa saindo na magpatalubo nin pakikikatood sa Dios. Abaa kadakulang pribilehio! Asin papangyayarihon kamo kaini na makamtan an katoninongan na an Dios sana an makatatao. (Roma 15:13, 33) Mantang pinoponan nindong kumua kan mahalagang kaaraman na ini, nagpopoon kamo sa pinakamahalaga asin pinakakapakipakinabang na paghihingoa sa saindong buhay. Dai kamo noarin man magbabasol sa pagkua kan kaaraman nin Dios na minagiya pasiring sa buhay na daing katapusan.
19. Anong hapot an pag-oolayan niato sa sunod na kapitulo?
19 Sinabi niato na an Biblia iyo an libro na igwa kan kaaraman nin Dios. Pero, paano niato naaaraman na iyan, bakong libro nin sa-tawong kadonongan, kundi nin sarong bagay na labi kanangongorog? Pag-oolayan niato an hapot na ini sa sunod na kapitulo.
BALOON AN SAINDONG KAARAMAN
Taano an kaaraman nin Dios ta puedeng gumiya sa saindo pasiring sa daing sagkod na kaogmahan?
Paano an magigin buhay sa maabot na Paraiso digdi sa daga?
Taano ta makikinabang kamo sa pagkua kan kaaraman nin Dios ngonyan?
[Mga Hapot Para sa Pag-adal]
