Tumangon an Maraot na mga Puersang Espiritu
Kapitulo 12
Tumangon an Maraot na mga Puersang Espiritu
1. Ano an nagin reaksion ni Jesus kan may makahampang siang maraot na mga espiritu?
DAI nahaloy pakatapos kan saiyang bautismo, si Jesu-Cristo nagduman sa kaawagan nin Judea tanganing mamibi asin maghorophorop. Duman hiningoa ni Satanas na Diablo na kombensiron siang balgahon an pagboot nin Dios. Minsan siring, isinikwal ni Jesus an paon kan Diablo asin dai sia nadakop sa litag kaini. May nakahampang si Jesus na iba pang maraot na mga espiritu durante kan saiyang ministeryo digdi sa daga. Pero, paorootro nia sindang tinuyaw asin tinumang.—Lucas 4:1-13; 8:26-34; 9:37-43.
2. Anong mga hapot an pag-oolayan niato?
2 An mga tala sa Biblia na naglaladawan kan mga paghampangan na iyan maninigong kumombensir sa sato na talagang nag-eeksister an maraot na mga puersang espiritu. Hinihingoa nindang dayaon an mga tawo. Minsan siring, puede niatong tumangon an maraot na mga espiritung ini. Alagad saen hale an maraot na mga espiritu? Taano ta hinihingoa nindang dayaon an mga tawo? Asin anong mga paagi an saindang ginagamit tanganing magibo an saindang mga katuyohan? An pakakua sa mga simbag sa siring kaining mga hapot matabang sa saindo na tumangon an maraot na mga puersang espiritu.
MARAOT NA MGA ESPIRITU—AN SAINDANG PINAGHALEAN ASIN KATUYOHAN
3. Paano nagkaigwa nin Satanas na Diablo?
3 Si Jehova Dios naggibo nin kadakoldakol na espiritung linalang haloy pa bago sia naglalang nin mga tawo. (Job 38:4, 7) Siring kan ipinaliwanag sa Kapitulo 6, an saro sa mga anghel na ini nagpatalubo nin pagmawot na pasambahon sa saiya an mga tawo imbes na sumamba ki Jehova. Ipinagpapadagos an katuyohan na iyan, an maraot na anghel na ini tinumang asin pinakaraot an Kaglalang, na isinuherir pa ngani sa enot na babae na an Dios putikon. Angay nanggad, kun siring, na an rebeldeng espiritung linalang na ini namidbid na Satanas (paratumang) na Diablo (parapakaraot).—Genesis 3:1-5; Job 1:6.
4. Paano nagkasala an nagkapirang anghel kan kaaldawan ni Noe?
4 Kan huri, an iba pang anghel kuminampi ki Satanas na Diablo. Kan kaaldawan kan matanos na tawong si Noe, an nagkapira kaini binayaan an saindang paglilingkod sa langit asin nagmateryalisar sa hawak na laman tanganing panigoan an saindang horot sa seksuwal na pakikidorog sa mga babae sa daga. Daing duwa-duwa na inimpluwensiahan ni Satanas an mga anghel na idto na gibohon an kasumbikalan na iyan. Nagbunga iyan kan saindang pangangaki nin mga mestiso na inapod na Nefilim, na nagin madahas na mga paradaogdaog. Kan papangyarihon ni Jehova an dakulang Delubyo, linaglag kaiyan an maraot na katawohan asin an bakong natural na mga aking ini kan sumbikalan na mga anghel. An rebeldeng mga anghel nakadulag sa kalaglagan paagi sa paghubad kan saindang hawak na laman asin pagbalik sa rona nin mga espiritu. Alagad pinogol nin Dios an mga demonyong ini paagi sa pagtratar sa sainda bilang mga pinalayas pasiring sa espirituwal na kadikloman. (Genesis 6:1-7, 17; Judas 6) Alagad ta ipinadagos pa man giraray ni Satanas, an “poon kan mga demonyo,” asin kan saiyang maraot na mga anghel an saindang pagrebelde. (Lucas 11:15) Ano an saindang pasohan?
5. Si Satanas asin an saiyang mga demonyo igwa nin anong katuyohan, asin ano an ginagamit ninda sa pagsiod sa mga tawo?
5 An maraot na katuyohan ni Satanas asin kan mga demonyo iyo na patumangon ki Jehova Dios an mga tawo. Huli kaini, an mga maraot na ini nandadaya, nananakot, asin nan-aatake sa mga tawo sa bilog na kasaysayan nin tawo. (Kapahayagan 12:9) An mga halimbawa sa modernong aldaw nagpapatunay na an pananalakay nin mga demonyo orog na maraot ngonyan kisa kasuarin pa man. Tanganing siodon an mga tawo, parateng ginagamit kan mga demonyo an espiritismo sa gabos na porma kaiyan. Paano ginagamit kan mga demonyo an paon na ini, asin paano nindo ikadedepensa an saindong sadiri?
KUN PAANO HINIHINGOA KAN MARAOT NA MGA ESPIRITU NA DAYAON KAMO
6. Ano an espiritismo, asin ano an nagkapira sa mga porma kaiyan?
6 Ano an espiritismo? Iyan pakikikabtang sa mga demonyo, o maraot na mga espiritu, magsalang direkta o paagi sa sarong tawong patagolainan. An espiritismo ginagamit nin mga demonyo kun paanong an paon ginagamit nin mga paraayam: Iyan nakaaakit sa biktima. Asin kun paanong an sarong paraayam naggagamit nin laen-laen na paon tanganing akiton an mga hayop pasiring sa saiyang litag, dinadagka man kan maraot na mga espiritu an manlaenlaen na porma nin espiritismo tanganing makontrol ninda an mga tawo. (Ikomparar an Salmo 119:110.) An nagkapira sa mga pormang ini iyo an pagtoodtood, salamangka, paghanap nin mga signos, panraratak, pan-eengkanto, pakikihumapot sa mga patagolainan, asin pakikihumapot sa mga gadan.
7. Gurano kalakop kan espiritismo, asin taano ta nag-ooswag iyan minsan sa Kristiano daang mga nasyon?
7 Nag-aaser an paon, huli ta an espiritismo nakaaakit sa mga tawo sa bilog na kinaban. An mga nag-iistar sa mga baryo sa kadlagan nakikihumapot sa mga pading parabolong, asin an mga de opisina sa siudad nakikihumapot sa mga astrologo. An espiritismo nag-ooswag pati sa Kristiano daang mga nasyon. An mga pagsiyasat nagpaparisa na sa Estados Unidos sana, mga 30 magasin na may pinagsararong sirkulasyon na labing 10,000,000 an idinudusay sa laen-laen na porma nin espiritismo. An mga taga-Brazil naggagasto nin labing 500 milyones na dolyar sa espiritistikong mga gamit kada taon. Pero, an 80 porsiento kan mga nag-aatender sa espiritistikong mga sentro nin pagsamba sa nasyon na iyan bautisadong mga Katoliko na nagsisimba man. Mantang an nagkapirang klerigo naggigibo nin espiritismo, an dakol na relihiosong tawo naghohona na an paggibo kaiyan inaako nin Dios. Alagad totoo daw iyan?
KUN TAANO TA KINOKONDENAR KAN BIBLIA AN PAGGIBO NIN ESPIRITISMO
8. Ano an Makakasuratan na pagmansay sa espiritismo?
8 Kun kamo tinokdoan na an nagkapirang porma nin espiritismo mga paagi nin pakikikomunikar sa marahay na mga espiritu, tibaad mabigla kamo na maaraman an sinasabi kan Biblia manongod sa espiritismo. An banwaan ni Jehova pinatanidan: “Dai kamo dumolok sa mga patagolainan, asin dai kamo makihumapot sa mga paratoodtood, tanganing magin marigsok huli sa sainda.” (Levitico 19:31; 20:6, 27) An libro sa Biblia na Kapahayagan nagtatao kan patanid na “idtong mga naggigibo nin espiritismo” masasa “danaw na naglalaad nin kalayo asin asupre. Ini an ikaduwang [daing katapusan na] kagadanan.” (Kapahayagan 21:8; 22:15) An gabos na porma nin espiritismo dai inooyonan ni Jehova Dios. (Deuteronomio 18:10-12) Taano ta siring?
9. Taano ta makakokonklusyon kita na an mga mensahe sa presenteng aldaw hale sa kinaban nin mga espiritu bakong gikan ki Jehova?
9 Si Jehova nagsugo nin marahay na mga espiritu, o matanos na mga anghel, tanganing makikomunikar sa nagkapirang tawo bago natapos na isurat an Biblia. Poon kan ikasurat iyan, an Tataramon nin Dios nagtatao kan paggiya na kaipuhan nin mga tawo tanganing makapaglingkod ki Jehova sa inaakong paagi. (2 Timoteo 3:16, 17; Hebreo 1:1, 2) Dai nia linilihisan an saiyang banal na Tataramon paagi sa pagtao nin mga mensahe sa mga patagolainan. An gabos na siring na mensahe sa presenteng aldaw na hale sa kinaban nin mga espiritu naggigikan sa maraot na mga espiritu. An paggibo nin espiritismo puedeng magbunga kan pananakot nin mga demonyo o pagsanib pa ngani nin maraot na mga espiritu. Kun siring, an Dios mamomoton na nagpapatanid sa sato na dai makikabtang sa ano man na espiritistikong mga gibo. (Deuteronomio 18:14; Galacia 5:19-21) Saro pa, kun kita magpadagos sa paggibo nin espiritismo pakatapos na maaraman an punto-de-vista ni Jehova mapadapit dian, kita makikikampi sa rebeldeng maraot na mga espiritu asin magigin mga kaiwal nin Dios.—1 Samuel 15:23; 1 Cronica 10:13, 14; Salmo 5:4.
10. Ano an pagtoodtood, asin taano ta maninigo niatong likayan iyan?
10 An sarong popular na porma nin espiritismo iyo an pagtoodtood—pagprobar na aramon an manongod sa ngapit o an dai aram paagi sa tabang nin mga espiritu. An nagkapirang porma nin pagtoodtood iyo an astrolohiya, pagsirip sa bolang kristal, pag-interpretar sa mga pangatorogan, panhihimalad, asin panhuhula paagi sa paggamit nin mga baraha. An pagheling nin iba sa pagtoodtood aling-alingan na dai nakaaano, alagad ipinaheheling kan Biblia na an mga parahula asin maraot na mga espiritu magkairibahan. Halimbawa, nasasambitan sa Gibo 16:16-19 an “sarong demonyo sa pagtoodtood” na nagpangyari sa sarong aking babae na gumibo nin “panhuhula.” Minsan siring, nawara an saiyang abilidad na maghula kan ngapit kan mapaluwas an demonyo. Malinaw nanggad, an pagtoodtood sarong paon na ginagamit kan mga demonyo tanganing akiton an mga tawo pasiring sa saindang litag.
11. Paano an mga pagprobar na makikomunikar sa mga gadan nagdadara pasiring sa sarong litag?
11 Kun ipinagmomondo nindo an pagkagadan nin sarong namomotan na kapamilya o sarong dayupot na katood, puede kamong pasil na matentaran nin saro pang paon. An sarong patagolainan tibaad magtao saindo nin espesyal na impormasyon o tibaad magtaram na an boses garo boses kan nagadan. Magmaan kamo! An mga pagprobar na makikomunikar sa mga gadan nagdadara pasiring sa sarong litag. Taano? Huli ta an mga gadan dai nakatataram. Arog kan daing duwa-duwa na nagigirumdoman nindo, an Tataramon nin Dios malinaw na nagsasabi na pagkagadan an saro “minabalik sa saiyang daga; sa aldaw na iyan an saiyang mga pag-isip napapara.” An mga gadan ‘mayo man lamang nin pakaaram.’ (Salmo 146:4; Eclesiastes 9:5, 10) Saro pa, mga demonyo an sa katotoohan midbid sa pag-arog kan boses kan nagadan asin sa pagtao sa patagolainan nin impormasyon manongod sa nagadan. (1 Samuel 28:3-19) Kaya an “siisay man na nakikihumapot sa gadan” nasisiod kan maraot na mga espiritu asin minagawe nin kontra sa kabotan ni Jehova Dios.—Deuteronomio 18:11, 12; Isaias 8:19.
POON SA PAN-AAKIT SAGKOD SA PAN-AATAKE
12, 13. Ano an ebidensia na an mga demonyo nagpapadagos sa pagsugot asin pagsalakay sa mga tawo?
12 Kun nagkukuyog kamo sa hatol kan Tataramon nin Dios mapadapit sa espiritismo, isinisikwal nindo an paon kan mga demonyo. (Ikomparar an Salmo 141:9, 10; Roma 12:9.) Boot daw sabihon kaini na an maraot na mga espiritu mapondo na sa paghihingoang bihagon kamo? Dai nanggad! Pakatapos na tentaran si Jesus nin tolong beses, si Satanas “binayaan sia sagkod sa ibang kombenyenteng panahon.” (Lucas 4:13) Kaagid kaiyan, an sutil na mga espiritu bako sanang nan-aakit sa mga tawo kundi inaatake man sinda.
13 Girumdoma an satong naenot na pag-adal dapit sa pag-atake ni Satanas sa lingkod nin Dios na si Job. An Diablo an dahelan kan pagkawara kan saiyang mga hayop asin kan pagkagadan kan kadaklan sa saiyang mga oripon. Ginadan pa ngani ni Satanas an mga aki ni Job. Sunod, hinampak nia mismo si Job nin makologon na helang. Alagad si Job nagdanay sa saiyang integridad sa Dios asin binendisyonan na marhay. (Job 1:7-19; 2:7, 8; 42:12) Poon kaidto, ginigibo kan mga demonyo an nagkapirang tawo na magin pula o buta asin padagos na nag-oogma sa pagsakit nin mga tawo. (Mateo 9:32, 33; 12:22; Marcos 5:2-5) Ngonyan, ipinaheheling nin mga bareta na an nagkapira sinasalakay nin mga demonyo sa seksuwal na paagi asin an iba ginigibong bua-bua. Dinadagka pa ninda an iba na gumadan asin maghugot, na mga kasalan tumang sa Dios. (Deuteronomio 5:17; 1 Juan 3:15) Minsan siring, rinibong tawo na nasiod kaidto kan maraot na mga espiritung ini an nakatalingkas. Paano ini nagin posible para sa sainda? Nahimo ninda iyan paagi sa paggibo nin mahahalagang aksion.
KUN PAANO TUTUMANGON AN MARAOT NA MGA ESPIRITU
14. Kaoyon sa halimbawa kan mga Kristiano sa Efeso kan enot na siglo, paano nindo matutumang an maraot na mga espiritu?
14 Ano an sarong paagi na matutumang nindo an maraot na mga espiritu asin protehiran an saindong sadiri asin an saindong pamilya sa mga siod ninda? An mga Kristiano sa Efeso kaidtong enot na siglo na naggigibo nin espiritismo bago nagturubod naggibo nin positibong mga aksion. Mababasa niato na “an dakol sa mga salamangkero nagtiripon kan saindang mga libro asin sinolo iyan sa atubangan nin gabos.” (Gibo 19:19) Dawa kun dai kamo naggigibo nin espiritismo, haleon an ano man na bagay na ginagamit sa o nagsusuherir nin espiritismo. Kabale digdi an mga libro, magasin, video, kartel, rekording sa musika, asin gamit sa espiritismo. Kabale man an mga idolo, anting-anting asin iba pang gamit na isinusulot para sa proteksion, asin mga regalong inako hale sa mga naggigibo nin espiritismo. (Deuteronomio 7:25, 26; 1 Corinto 10:21) Sa pag-ilustrar: An sarong mag-agom sa Thailand haloy nang sinasalakay nin mga demonyo. Dangan hinarale ninda an mga gamit na konektado sa espiritismo. Ano an resulta? Napondo na an mga pag-atake sa sainda nin mga demonyo asin pakatapos kaiyan nag-oswag na sinda sa espirituwal.
15. Sa pagtumang sa maraot na mga puersang espiritu, ano an saro pang mahalagang aksion?
15 Tanganing matumang an maraot na mga espiritu, an saro pang mahalagang aksion iyo an pag-aplikar kan hatol ni apostol Pablo na isolog an bilog na espirituwal na pangalasag na itinao nin Dios. (Efeso 6:11-17) Dapat na pasarigon kan mga Kristiano an saindang mga pandepensa tumang sa maraot na mga espiritu. Ano an kabale sa aksion na ini? “Orog sa gabos,” an sabi ni Pablo, “gamiton an dakulang kalasag nin pagtubod, na huli kaiyan masisigbo nindo an gabos na naglalaad na bosog kan maraot.” Iyo nanggad, mientras na mas makosog an saindong pagtubod, mas makosog man an saindong abilidad na tumangon an maraot na mga puersang espiritu.—Mateo 17:14-20.
16. Paano nindo mapakokosog an saindong pagtubod?
16 Paano nindo mapakokosog an saindong pagtubod? Paagi sa padagos na pag-adal sa Biblia asin pag-aplikar kan hatol kaiyan sa saindong buhay. An kakosogan kan pagtubod nin saro nasasarig na marhay sa karigonan kan pundasyon kaiyan—an kaaraman nin Dios. Dai daw kamo minaoyon na an tamang kaaraman na saindong nakua asin isinapuso mantang kamo nag-aadal sa Biblia nakapakosog sa saindong pagtubod? (Roma 10:10, 17) Daing duwa-duwa, kun siring, na mantang ipinapadagos nindo an pag-adal na ini asin inuugale nindo an pag-atender sa mga pagtiripon kan Mga Saksi ni Jehova, an saindong pagtubod orog pang maparirigon. (Roma 1:11, 12; Colosas 2:6, 7) Iyan magigin makosog na depensa tumang sa mga pag-atake nin demonyo.—1 Juan 5:5.
17. Ano pang mga aksion an tibaad kaipuhan sa pagtumang sa maraot na mga puersang espiritu?
17 Ano pang mga aksion an magigibo nin saro na determinadong tumangon an maraot na mga puersang espiritu? An mga Kristiano sa Efeso nangaipo nin proteksion huli ta nag-iistar sinda sa sarong siudad na gulpi an demonismo. Huli kaini, si Pablo nagsabi sa sainda: “Padagos kamong mamibi sa gabos na panahon sa espiritu.” (Efeso 6:18) Mantang nabubuhay kita sa kinaban na gulpi an demonyo, an maigot na pamimibi para sa proteksion nin Dios kaipuhan sa pagtumang sa maraot na mga espiritu. (Mateo 6:13) Nakatatabang sa bagay na ini an espirituwal na tabang asin mga pamibi kan nombradong kamagurangan sa Kristianong kongregasyon.—Santiago 5:13-15.
IPADAGOS AN SAINDONG PAKIKILABAN TUMANG SA MARAOT NA MGA ESPIRITU
18, 19. Ano an puedeng gibohon kun an saro riniribok giraray kan mga demonyo?
18 Minsan siring, maski pakatapos na gibohon an pundamental na mga aksion na ini, an iba riniribok pa nin maraot na mga espiritu. Halimbawa, an sarong lalaki sa Côte d’Ivoire nag-adal sa Biblia kaiba kan Mga Saksi ni Jehova asin saiyang rinaot an gabos niang anting-anting. Pakatapos kaidto, marahay an saiyang pag-oswag, idinusay an saiyang buhay ki Jehova, asin nabautismohan. Alagad sarong semana pakalihis kan saiyang bautismo, an mga demonyo nagpoon na ribokon sia giraray, asin may mga boses na nagsasabi sa saiya na bayaan an saiyang bagong manompongan na pagtubod. Kun nangyari ini sa saindo, boot daw sabihon kaini na nawaran na kamo kan proteksion ni Jehova? Dai man.
19 Minsan ngani an sangkap na tawong si Jesu-Cristo igwa kan proteksion nin Dios, nadangog nia an boses kan maraot na espiritung linalang na si Satanas na Diablo. Ipinaheling ni Jesus an dapat na gibohon sa siring na kamugtakan. Sinabihan nia an Diablo: “Humale ka, Satanas!” (Mateo 4:3-10) Sa kaagid na paagi, maninigo kamong magsayuma na hinanyogon an mga boses hale sa kinaban nin mga espiritu. Tumangon an maraot na mga espiritu paagi sa pag-apod ki Jehova para sa tabang. Iyo, mamibi nin makosog na ginagamit an ngaran nin Dios. An Talinhaga 18:10 nagsasabi: “An ngaran ni Jehova makosog na torre. Dian minadalagan an matanos asin tinatawan nin proteksion.” Ini an ginibo kan Kristianong lalaki sa Côte d’Ivoire, asin an maraot na mga espiritu puminondo sa pagsalakay sa saiya.—Salmo 124:8; 145:18.
20. Bilang sumaryo, ano an puede nindong gibohon tanganing tumangon an maraot na mga espiritu?
20 Tinogotan ni Jehova an maraot na mga espiritu na magdanay sa pag-eksister, alagad ipinaheheling nia an saiyang kapangyarihan, partikularmente para sa saiyang banwaan, asin an saiyang ngaran ipinahahayag sa bilog na daga. (Exodo 9:16) Kun magdadanay kamong dayupot sa Dios, dai kamo kaipuhan na matakot sa maraot na mga espiritu. (Bilang 23:21, 23; Santiago 4:7, 8; 2 Pedro 2:9) Limitado an saindang kapangyarihan. Pinadusahan sinda kaidtong kaaldawan ni Noe, pinalayas sa langit dai pa sana nahahaloy, asin ngonyan naghahalat sa ultimong paghokom. (Judas 6; Kapahayagan 12:9; 20:1-3, 7-10, 14) An totoo, ikinatatakot nindang marhay an saindang maabot na kalaglagan. (Santiago 2:19) Kaya baga man hinihingoa kan maraot na mga espiritu na akiton kamo paagi sa sarong klase nin paon o atakehon kamo sa ano man na paagi, kaya nindo sindang tumangon. (2 Corinto 2:11) Isikwal an ano man na porma nin espiritismo, iaplikar an hatol kan Tataramon nin Dios, asin pagmaigotan na kamtan an pag-oyon ni Jehova. Gibohon ini na dai nin pag-atraso, huli ta an saindong buhay nasasarig sa pagtumang nindo sa maraot na mga puersang espiritu!
BALOON AN SAINDONG KAARAMAN
Paano hinihingoa kan maraot na mga espiritu na dayaon an mga tawo?
Taano ta kinokondenar kan Biblia an espiritismo?
Paano an saro makatatalingkas sa maraot na mga puersang espiritu?
Taano ta maninigo nindong padagos na tumangon an maraot na mga espiritu?
[Mga Hapot Para sa Pag-adal]
[Ritrato sa pahina 110]
Ano an pagheling nindo sa espiritismo sa dakol na porma kaiyan?
