An Guerrerong Hade—Nanggana sa Armagedon
Kapitulo 39
An Guerrerong Hade—Nanggana sa Armagedon
Bisyon 13—Kapahayagan 19:11-21
Tema: Pinangenotan ni Jesus an langitnon na mga hukbo sa paglaglag kan sistema nin mga bagay ni Satanas
Panahon nin kaotoban: Pakalaglaga kan Dakulang Babilonya
1. Ano an Armagedon, asin ano an mga pangyayari na masagkod dian?
ARMAGEDON—sarong makatatakot na termino para sa dakol! Alagad para sa mga namomoot sa katanosan, iyan nangangahulogan kan haloy nang hinahalat na aldaw na gigibohon ni Jehova an pangultimong paghokom sa mga nasyon. Iyan bakong guerra nin tawo kundi “guerra kan dakulang aldaw nin Dios na Makakamhan sa Gabos”—an saiyang aldaw nin pamamalos tumang sa mga namamahala sa daga. (Kapahayagan 16:14, 16; Ezequiel 25:17) Sa pagkalaglag kan Dakulang Babilonya, nagpoon na an dakulang kahorasaan. Dangan, sa sutsut ni Satanas, ikokonsentrar kan kolor eskarlatang mabangis na hayop asin kan sampulong sungay kaiyan an saindang pagsalakay sa banwaan ni Jehova. An Diablo, na mas grabe an kaanggotan sa garo babaeng organisasyon nin Dios kisa kasuarin pa man, determinadong gamiton an saiyang mga nadadaya sa pakikiguerra sa mga natatada sa banhi kaini sagkod sa katapusan. (Kapahayagan 12:17) Ini an ultimong oportunidad ni Satanas!
2. Siisay si Gog nin Magog, asin paano sia imamaniobra ni Jehova na salakayon an Saiyang sadiring banwaan?
2 An maisog na pagsalakay kan Diablo buhay na buhay na ilinaladawan sa Ezequiel kapitulo 38. Dian, an marigsok na si Satanas inaapod na “Gog kan daga nin Magog.” Binugtakan ni Jehova nin piguratibong mga banwit an panga ni Gog, na inaakit sia asin an saiyang dakulang puersa militar na sumalakay. Paano nia ini ginigibo? Paagi sa pagpangyari na paghelingon ni Gog an Saiyang mga Saksi bilang daing kalabanlaban na banwaan “na tiniripon hale sa mga nasyon, na nagtitipon nin kayamanan asin rogaring, an mga nag-eerok sa tahaw kan daga.” An mga ini lataw sa daga bilang an solamenteng banwaan na nagsayumang sumamba sa mabangis na hayop asin sa imahen kaiyan. An saindang espirituwal na kosog asin prosperidad ikinakaanggot ni Gog. Kaya si Gog asin an saiyang dakulang puersa militar, kaiba an mabangis na hayop hale sa dagat na may sampulong sungay, burunyog na masalakay sa panggadan. Minsan siring, bakong arog kan Dakulang Babilonya, an malinig na banwaan nin Dios may proteksion nia!—Ezequiel 38:1, 4, 11, 12, 15; Kapahayagan 13:1.
3. Paano paparaon ni Jehova an militarisadong mga puersa ni Gog?
3 Paano paparaon ni Jehova si Gog asin an bilog niang hukbo? Hinanyoga! “‘Aapodon ko tumang sa saiya sa gabos kong mabukid na rehion an sarong espada,’ an sabi kan Soberanong Kagurangnan na Jehova. ‘An espada nin lambang saro magigin tumang sa saiyang sadiring tugang.’” Alagad ni nuklear ni bakong nuklear na mga armas daing pakinabang sa ralaban na iyan, ta sinasabi ni Jehova: “Maghohokom ako sa saiya, na dara an peste asin dugo; asin an nakakapabahang oran asin mga gapong graniso, an kalayo asin asupre papaoranon ko sa saiya asin sa saiyang mga tropa patin sa dakol na banwaan na kairiba nia. Asin papadakulaon ko nanggad an sakong sadiri asin sasantipikaron ko an sakong sadiri patin ipapamidbid ko an sakong sadiri sa mga mata nin dakol na nasyon; asin kaipuhan na makaaram sinda na ako si Jehova.”—Ezequiel 38:21-23; 39:11; ikomparar an Josue 10:8-14; Hokom 7:19-22; 2 Cronica 20:15, 22-24; Job 38:22, 23.
An Saro na Inaapod na “Maimbod Asin Totoo”
4. Paano ilinaladawan ni Juan si Jesu-Cristo na nakapuesto sa pakikilaban?
4 Nag-apod si Jehova nin sarong espada. Siisay an makapot kan espadang ini? Sa pagbuelta sa Kapahayagan, manonompongan niato an simbag sa saro pang nakakapukaw sa boot na bisyon. Sa atubangan kan mga mata ni Juan an langit nabukasan tanganing ipaheling an sarong eksena na nakakapukaw nanggad nin may pagkangirhat na paggalang—si Jesu-Cristo mismo na nakapuesto sa pakikilaban! Sinasabi sato ni Juan: “Asin naheling ko an langit na nabukasan, asin, uya! sarong kabayong puti. Asin an nakakabayo dian inaapod na Maimbod asin Totoo, asin sia naghohokom asin nakikiguerra sa katanosan. An saiyang mga mata naglalaad na kalayo, asin nasa saiyang payo an dakol na diadema.”—Kapahayagan 19:11, 12a.
5, 6. Ano an isinisimbolisar kan (a) “kabayong puti”? (b) ngaran na “Maimbod asin Totoo”? (c) mga matang siring sa “naglalaad na kalayo”? (d) “dakol na diadema”?
5 Arog kan mas naenot na bisyon kan apat na nangangabayo, an “kabayong puti” na ini angay na simbolo nin matanos na pakikiguerra. (Kapahayagan 6:2) Asin siisay sa mga aki nin Dios an mas matanos pa kisa makakamhan na Guerrerong ini? Mantang “inaapod na Maimbod asin Totoo,” segurado na sia “an maimbod asin totoong saksi,” si Jesu-Cristo. (Kapahayagan 3:14) Sia nakikiguerra tanganing gibohon an matanos na mga paghokom ni Jehova. Sa siring, sia minahiro sa saiyang katongdan bilang an nombrado ni Jehova na Hokom, an “Makakamhan na Dios.” (Isaias 9:6) An saiyang mga mata makatatakot, siring sa “naglalaad na kalayo,” na nakatanaw sa nagkakalayong pagkalaglag kan saiyang mga kaiwal.
6 May mga diadema sa payo kan Guerrerong Hadeng ini. An mabangis na hayop na naheling ni Juan na nagbubutwa sa dagat may sampulong diadema, na ilinaladawan an temporaryong pamamahala kaiyan sa daga. (Kapahayagan 13:1) Pero si Jesus may “dakol na diadema.” An saiyang mamuraway na pamamahala daing kabaing, ta sia an “Hade kan mga namamahala bilang mga hade asin Kagurangnan kan mga namamahala bilang mga kagurangnan.”—1 Timoteo 6:15.
7. Ano an nasusurat na ngaran ni Jesus?
7 Nagpapadagos an paglaladawan ni Juan: “Igwa sia nin ngaran na nasusurat na mayo nin nakakaaram kundi sia sana.” (Kapahayagan 19:12b) Dati nang inaapod kan Biblia an Aki nin Dios na Jesus, Emmanuel, asin Miguel. Alagad an dai sinabing “ngaran” na ini minalataw na nagrerepresentar sa katongdan asin mga pribilehio na kakamtan ni Jesus durante kan aldaw kan Kagurangnan. (Ikomparar an Kapahayagan 2:17.) Si Isaias, sa paglaladawan ki Jesus poon kan 1914, nagsasabi: “An saiyang ngaran aapodon na Makangangalas na Parahatol, Makakamhan na Dios, Amang Daing Sagkod, Prinsipe nin Katoninongan.” (Isaias 9:6) Iinasosyar ni apostol Pablo an ngaran ni Jesus sa Saiyang halangkawon na mga pribilehio sa paglilingkod kan sia sumurat: “Ilinangkaw [si Jesus] nin Dios sa superyor na posisyon asin may kabootan na itinao sa saiya an ngaran na halangkaw kisa sa lambang ibang ngaran, tanganing sa ngaran ni Jesus an lambang tuhod lumuhod.”—Filipos 2:9, 10.
8. Taano ta solamente si Jesus an nakakaaram kan ngaran na nasusurat, asin kiisay nia ihinihiras an nagkapira sa saiyang halangkaw na mga pribilehio?
8 Daing kapareho an mga pribilehio ni Jesus. Apuera ki Jehova mismo, solamente si Jesus an makakasabot kun ano an kahulogan kan pagkapot nin siring kalangkaw na katongdan. (Ikomparar an Mateo 11:27.) Kun siring, sa gabos na linalang nin Dios, solamente si Jesus an lubos na makakaapresyar sa ngaran na ini. Minsan siring, iiniiba ni Jesus an saiyang nobya sa nagkapirang pribilehiong ini. Kaya ipinapanuga nia ini: “An makadaog . . . isusurat ko sa saiya . . . an bago kong ngaran.”—Kapahayagan 3:12.
9. Ano an ipinaparisa kan bagay na (a) si Jesus “nagugubingan nin pan-ibabaw na gubing na winirikan nin dugo”? (b) si Jesus inaapod na “An Tataramon nin Dios”?
9 Idinugang ni Juan: “Asin sia nagugubingan nin pan-ibabaw na gubing na winirikan nin dugo, asin an inginaran sa saiya An Tataramon nin Dios.” (Kapahayagan 19:13) Kiisay na “dugo” ini? Iyan puedeng dugo ni Jesus, na pinabolos para sa katawohan. (Kapahayagan 1:5) Alagad, sa kontekstong ini, mas posible na iyan nanonongod sa dugo kan saiyang mga kaiwal na papaboloson kun gibohon na sa sainda an mga paghokom ni Jehova. Ipinapagirumdom kaini sa sato an mas naenot na bisyon na dian an poon nin ubas kan daga ginuno asin tinimaktimakan sa dakulang pugaan nin ubas kan kaanggotan nin Dios sagkod na an dugo nakaabot “sagkod sa mga busal kan mga kabayo”—na nangangahulogan nin dakulang kapangganahan sa mga kaiwal nin Dios. (Kapahayagan 14:18-20) Siring man, an dugo na iwinirik sa pan-ibabaw na gubing ni Jesus nagpapatunay na an saiyang kapangganahan dai mapagdududahan asin kompleto. (Ikomparar an Isaias 63:1-6.) Ngonyan nagtataram giraray si Juan manongod sa ngaran na iinaapod ki Jesus. Ngonyan iyan bantog nang ngaran—“An Tataramon nin Dios”—na nagpapamidbid kan Guerrerong Hadeng ini bilang an Pangenot na Representante sa Pagtaram ni Jehova asin Paradepensa sa katotoohan.—Juan 1:1; Kapahayagan 1:1.
An mga Kapwa Guerrero ni Jesus
10, 11. (a) Paano ipinapaheling ni Juan na si Jesus dai nagsosolo sa pakikilaban? (b) Ano an ipinaparisa kan bagay na an mga kabayo puti asin an mga nangangabayo may sulot na “puti, malinig, pinong lino”? (c) Sairisay an minakompuesto sa langitnon na “mga hukbo”?
10 Dai nagsosolo si Jesus sa pakikilaban na ini. Sinasabi sato ni Juan: “Siring man, an mga hukbo na yaon sa langit nagsusurunod sa saiya na nakakabayo sa mga kabayong puti, asin sinda may sulot na puti, malinig, pinong lino.” (Kapahayagan 19:14) An bagay na “puti” an mga kabayo nagpaparisa nin matanos na guerra. An “pinong lino” angay sa mga nangangabayo kan Hade, asin an makintab, malinig na kaputian kaiyan nagpaparisa nin dalisay, matanos na kamugtakan sa atubangan ni Jehova. Kun siring, sairisay an minakompuesto sa “mga hukbong” ini? Daing duwa-duwa, kaiba dian an banal na mga anghel. Sa kapinonan kan aldaw kan Kagurangnan na iinapon ni Miguel asin kan saiyang mga anghel si Satanas asin an saiyang mga demonyo hale sa langit. (Kapahayagan 12:7-9) Dugang pa, “an gabos na anghel” maglilingkod ki Jesus mantang sia nakatukaw sa saiyang mamuraway na trono asin naghohokom sa mga nasyon asin banwaan sa daga. (Mateo 25:31, 32) Daing duwa-duwa na, sa pangultimong guerra, kun gibohon na an mga paghokom nin Dios sagkod na matapos, si Jesus iibanan giraray kan saiyang mga anghel.
11 May iba man na magigin kalabot. Kan ipadara an saiyang mensahe sa kongregasyon sa Tiatira, si Jesus nanuga: “Sa saiya na makadaog asin nag-ootob kan sakong mga gibo sagkod sa katapusan itatao ko an autoridad sa mga nasyon, asin magpapastor sia sa mga tawo paagi sa sogkod na batbat kaya magkakaparasa sinda siring sa mga lalagan na dalipay, siring kan inako ko sa sakong Ama.” (Kapahayagan 2:26, 27) Daing duwa-duwa, pag-abot kan panahon, an mga tugang ni Cristo na yaon na sa langit magkakaigwa nin kabtang sa pagpastor sa mga tawo asin nasyon paagi sa sogkod na iyan na batbat.
12. (a) Makikikabtang daw an mga lingkod nin Dios digdi sa daga sa pakikilaban sa Armagedon? (b) Paano kalabot sa Armagedon an banwaan ni Jehova digdi sa daga?
12 Pero, kumusta man an mga lingkod nin Dios digdi sa daga? An grupong Juan dai magkakaigwa nin aktibong kabtang sa pakikilaban sa Armagedon; ni an maimbod na kairiba kaiyan, an mga tawo hale sa gabos na nasyon na burunyog na nagraralaog sa espirituwal na harong ni Jehova sa pagsamba. Pinulpog na kan matoninong na mga tawong ini an mga espada na magin mga tarom nin arado. (Isaias 2:2-4) Pero, kalabot nanggad sinda! Arog kan nasabi na niato, an garo baga daing kalabanlaban na banwaan ni Jehova an maisog na sasalakayon ni Gog asin kan bilog niang hukbo. Iyan an senyal tanganing ponan kan Guerrerong Hade ni Jehova, na suportado kan mga hukbo sa langit, an pakikilaban sa sarong guerra nin pagpoho tumang sa mga nasyon na iyan. (Ezequiel 39:6, 7, 11; ikomparar an Daniel 11:44–12:1.) Bilang mga paramasid, an banwaan nin Dios digdi sa daga magigin interesado nanggad. An Armagedon mangangahulogan kan saindang kaligtasan, asin sinda mabubuhay sagkod lamang bilang mga nakaheling mismo kan dakulang guerra sa pagbindikar ki Jehova.
13. Paano niato naaaraman na an mga Saksi ni Jehova bakong tumang sa gabos na gobyerno?
13 Ini daw nangangahulogan na an mga Saksi ni Jehova tumang sa gabos na gobyerno? Bako nanggad! Kinukuyog ninda an hatol ni apostol Pablo: “An lambang kalag magpasakop sa superyor na mga autoridad.” Aram ninda na sagkod na yaon pa an presenteng sistema, an “superyor na mga autoridad” na iyan nag-eeksister sa pagtogot nin Dios tanganing mapagdanay na areglado an sosyedad nin tawo. Sa siring, an mga Saksi ni Jehova nagbubuhis, nagkukuyog kan mga ley, iginagalang an mga ordinansa sa trapiko, nagpaparehistro, asin iba pa. (Roma 13:1, 6, 7) Dugang pa, nagkukuyog sinda sa mga prinsipyo kan Biblia sa pagigin sadiosan asin onesto; pagpaheling nin pagkamoot sa kapwa; paghingoa na magkaigwa nin makosog, moral na pamilya; asin pagtotokdo sa saindang mga aki na magin arogan na mga siudadano. Sa paaging ini ikinakatao ninda “ki Cesar an mga bagay na ki Cesar, alagad sa Dios an mga bagay na sa Dios.” (Lucas 20:25; 1 Pedro 2:13-17) Mantang ipinapaheling kan Tataramon nin Dios na temporaryo an mga kapangyarihan sa gobyerno kan kinaban na ini, an mga Saksi ni Jehova nag-aandam ngonyan para sa mas kompletong buhay, an tunay na buhay, na madali nang makamtan sa irarom kan pamamahala kan Kahadean ni Cristo. (1 Timoteo 6:17-19) Minsan dai sinda makikikabtang sa pagpabagsak sa mga kapangyarihan kan kinaban na ini, an mga Saksi nakakamate nin reberensial, may pagkangirhat na paggalang sa sinasabi kan ipinasabong na Tataramon nin Dios, an Banal na Biblia, mapadapit sa paghokom na madali nang gibohon ni Jehova sa Armagedon.—Isaias 26:20, 21; Hebreo 12:28, 29.
Abante sa Pangultimong Ralaban!
14. Ano an isinisimbolisar kan “halabang espada na matarom” na nagluluwas sa ngoso ni Jesus?
14 Sa anong autoridad na tataposon ni Jesus an saiyang pandadaog? Sinasabi sato ni Juan: “Asin hale sa saiyang ngoso may nagluluwas na sarong halabang espada na matarom, tanganing ipanlugad nia sa mga nasyon, asin sia magpapastor sa sainda paagi sa sogkod na batbat.” (Kapahayagan 19:15a) An “halabang espada na matarom” nagrerepresentar sa itinao nin Dios na autoridad ni Jesus na magboot na gadanon an gabos na habong sumuportar sa Kahadean nin Dios. (Kapahayagan 1:16; 2:16) An buhay na buhay na simbolismong ini kaagid kan mga tataramon ni Isaias: “Ginibo nia [ni Jehova] an sakong ngoso na siring sa matarom na espada. Sa lindong kan saiyang kamot itinago nia ako. Asin luway-luway ginibo nia akong makinis na pana.” (Isaias 49:2) Digdi ipinanganino ni Isaias si Jesus, na nagbabalangibog kan mga paghokom nin Dios asin ginigibo iyan, na garo gamit an panang daing salto.
15. Sa panahon na ini na pinag-oolayan niato, siisay na an nabuyagyag asin nahokoman na nagsesenyalar kan kapinonan nin ano?
15 Sa panahon na ini na pinag-oolayan niato, nagibo na ni Jesus an aksion bilang kaotoban kan mga tataramon ni Pablo: “Dangan, tunay na mahahayag an tampalasan, na gagadanon kan Kagurangnan na Jesus paagi sa espiritu kan saiyang ngoso asin tutunawon paagi sa pagkahayag kan saiyang presensia.” Iyo, ipinaheling an presensia (sa Griego, pa·rou·siʹa) ni Jesus poon 1914 paagi sa pagbuyagyag asin paghokom sa tawo nin katampalasanan, an klero nin Kakristianohan. An presensiang iyan risang marhay na mahahayag kun gibohon na kan sampulong sungay kan kolor eskarlatang mabangis na hayop an paghokom na iyan asin laglagon na an Kakristianohan, kaiba an iba pang kabtang kan Dakulang Babilonya. (2 Tesalonica 2:1-3, 8) Iyan an magigin kapinonan kan dakulang kahorasaan! Pagkatapos kaiyan, an tatawan naman ni Jesus nin atension iyo an natatada pa sa organisasyon ni Satanas, kaoyon kan propesiya na: “Lulugadon nia an daga sa sogkod kan saiyang ngoso; asin sa espiritu kan saiyang mga ngabil gagadanon nia an marigsok.”—Isaias 11:4.
16. Paano ilinaladawan kan Mga Salmo asin Jeremias an papel kan nombradong Guerrerong Hade ni Jehova?
16 Bilang nombrado ni Jehova, paglalaenon kan Guerrerong Hade an mga makakaligtas asin an mga magagadan. Si Jehova, sa propetikong pagtaram sa Aking ini nin Dios, nagsasabi: “Babarion mo sinda [an mga namamahala sa daga] paagi sa setrong batbat, papasaon mo sinda siring sa lalagan kan paragibo nin koron.” Asin an sabi ni Jeremias sa maraot na mga namomoon na iyan sa gobyerno asin sa mga parasunodsunod sainda: “Pag-urungal kamo, mga pastor, asin pagkururahaw kamo! Asin pagturubog kamo, mga pinakamamuraway sa kahayopan, huli ta nag-abot na an saindong mga aldaw para sa pagbono asin para sa saindong pagkawararak, asin mabagsak kamo na siring sa magayon na lalagan!” Gurano man kagayon an mga namamahalang iyan sa pagheling nin marigsok na kinaban, saro sanang tama kan setrong batbat kan Hade asin magkakaparasa na sinda siring sa sarong magayon na lalagan. An mangyayari siring sa propesiya ni David may labot sa Kagurangnan na Jesus: “An sogkod kan saimong kakosogan ipapadara ni Jehova gikan sa Sion, na nagsasabi: ‘Mandaog ka sa tahaw kan saimong mga kaiwal.’ Si Jehova mismo sa saimong too paparasaon an mga hade sa aldaw kan saiyang kaanggotan. Sia maghohokom sa mga nasyon; papanoon nia iyan nin mga bangkay.”—Salmo 2:9, 12; 83:17, 18; 110:1, 2, 5, 6; Jeremias 25:34.
17. (a) Paano ilinaladawan ni Juan an panggadan kan Guerrerong Hade? (b) Isaysay an nagkapirang propesiya na nagpapaheling kun magigin gurano kapahapahamak an aldaw kan kaanggotan nin Dios para sa mga nasyon.
17 An makakamhan na Guerrerong Hadeng ini naglataw giraray sa sunod na eksena kan bisyon: “Tinitimaktimakan man nia an pugaan nin ubas kan kabangisan kan kaanggotan nin Dios na Makakamhan sa Gabos.” (Kapahayagan 19:15b) Sa sarong naenot na bisyon, naheling na ni Juan an pagtimaktimak sa “pugaan nin ubas kan kaanggotan nin Dios.” (Kapahayagan 14:18-20) Ilinaladawan man ni Isaias an sarong panggadan na pugaan nin ubas, asin an ibang propeta nagsasaysay kun magigin gurano kapahapahamak an aldaw kan kaanggotan nin Dios para sa gabos na nasyon.—Isaias 24:1-6; 63:1-4; Jeremias 25:30-33; Daniel 2:44; Sofonias 3:8; Zacarias 14:3, 12, 13; Kapahayagan 6:15-17.
18. Ano an ihinahayag ni propeta Joel kun dapit sa paghokom ni Jehova sa gabos na nasyon?
18 Iinaasosyar ni propeta Joel an pugaan nin ubas sa pagdatong ni Jehova “tanganing hokoman an gabos na nasyon sa palibot.” Asin si Jehova an nagboboot, sierto na sa Saiyang asosyadong Hokom, si Jesus, asin sa langitnon na mga hukbo kaini: “Tigpasan an kagot, ta hinog na an anihon. Madia kamo, hilig kamo, ta an pugaan nin ubas pano na. Naglilipwas an mga tangke kan pugaan; huli ta duminakol an saindang karatan. Mga kadaklan, mga kadaklan an yaon sa hababang kaplanodohan kan desisyon, ta an aldaw ni Jehova harani na sa hababang kaplanodohan kan desisyon. An saldang asin bulan magdidiklom nanggad, asin an mismong mga bitoon talagang dai na magliliwanag. Asin hale sa Sion si Jehova mag-uungal, asin hale sa Jerusalem ipapadangog nia an saiyang tingog. Asin magkukunogkunog nanggad an langit asin daga; alagad ta si Jehova magigin pailihan kan saiyang banwaan, asin kuta para sa mga aki ni Israel. Asin mamimidbid nanggad nindo na ako si Jehova na saindong Dios.”—Joel 3:12-17.
19. (a) Paano sisimbagon an ihinapot sa 1 Pedro 4:17? (b) Anong ngaran an nasusurat sa pan-ibabaw na gubing ni Jesus, asin taano ta magigin angay iyan?
19 Tunay nanggad na iyan magigin aldaw nin kalaglagan para sa sumbikalan na mga nasyon asin tawo alagad aldaw nin kaginhawahan para sa gabos na nagpaili ki Jehova asin sa saiyang Guerrerong Hade! (2 Tesalonica 1:6-9) Sa panahon na iyan an paghokom na nagpoon sa harong nin Dios kan 1918 nakaabot na sa kulminasyon, na sinisimbag an hapot sa 1 Pedro 4:17: “Ano an mangyayari sa mga bakong makinuyog sa maogmang bareta nin Dios?” Sa panahon na iyan natapos nang timaktimakan kan mamuraway na Ganador an pugaan, na ipinapaheling na sia an mamuraway na Saro na manongod sa saiya si Juan nagsasabi: “Asin sa saiyang pan-ibabaw na gubing, sa may paa nia, igwa sia nin ngaran na nakasurat, Hade nin mga hade asin Kagurangnan nin mga kagurangnan.” (Kapahayagan 19:16) Sia mas makakamhan nanggad kisa siisay man na daganon na namamahala, kisa siisay man na tawong hade o kagurangnan. An saiyang dignidad asin kamurawayan daing kabaing. Sia nangabayo “para sa katotoohan asin kapakumbabaan patin katanosan” asin nanggana sia sagkod lamang! (Salmo 45:4) Nasusurat sa saiyang nawirikan nin dugong gubing an ngaran na itinao sa saiya kan Soberanong Kagurangnan na Jehova, na sa Saiya sia an Parabindikar!
An Dakulang Pamanggihan nin Dios
20. Paano ilinaladawan ni Juan an “dakulang pamanggihan nin Dios,” na nagpapagirumdom nin anong mas naenot, alagad kaagid, na propesiya?
20 Sa bisyon ni Ezequiel, pagkalaglag kan hukbo ni Gog, an mga gamgam asin layas na hayop inimbitaran sa sarong bangkete! Hinale ninda sa ibabaw kan daga an mga bangkay paagi sa pagkakan sa gadan na mga kaiwal ni Jehova. (Ezequiel 39:11, 17-20) Buhay na buhay na ipinapagirumdom kan sunod na mga tataramon ni Juan an mas naenot na propesiyang iyan: “Nakaheling man ako nin sarong anghel na nagtitindog sa saldang, asin sia nagkurahaw sa makosog na tingog asin nagsabi sa gabos na gamgam na naglalayog sa kaitaasan: ‘Madia kamo, magtiripon kamo sa dakulang pamanggihan nin Dios, tanganing kakanon nindo an laman nin mga hade asin an laman nin mga komandante militar asin an laman nin mga makosog na tawo asin an laman nin mga kabayo asin kan mga nakakabayo sa sainda, asin an laman nin gabos, nin mga may libertad saka nin mga oripon asin kan saradit patin darakula.’”—Kapahayagan 19:17, 18.
21. Ano an ipinaparisa kan (a) ‘pagtindog sa saldang’ kan anghel? (b) bagay na an mga gadan papabayaan na nahuhutad sa ibabaw kan daga? (c) lista kan mga tawo na an bangkay papabayaan na nahuhutad sa daga? (d) fraseng “dakulang pamanggihan nin Dios”?
21 An anghel “nagtitindog sa saldang,” sarong marahay na posisyon tanganing maapod an atension kan mga gamgam. Iniimbitaran nia sinda na mag-andam na magpainggusto sa laman kan mga gagadanon kan Guerrerong Hade asin kan saiyang langitnon na mga hukbo. An bagay na an mga gadan papabayaan na nasa ibabaw kan daga nagpaparisa na sinda magagadan sa paaging makasusupog sa publiko. Kapareho ni Jezabel kan suanoy, dai sinda tatawan nin kagalanggalang na paglobong. (2 Hade 9:36, 37) An lista kan mga tawo na an bangkay papabayaan na nahuhutad nagpapaheling kun sairisay an lalaglagon: mga hade, komandante militar, makosog na tawo, may libertad, asin oripon. Daing eksepsion. An rebeldeng kinaban na tumang ki Jehova hahaleon sagkod sa pinakahuring gira. Pagkatapos kaini, dai na magkakaigwa nin dai mapamugtak na dagat nin ribaraw na katawohan. (Kapahayagan 21:1) Ini an “dakulang pamanggihan nin Dios,” ta si Jehova an nag-iimbitar sa mga gamgam na makikakan dian.
22. Paano sinusumaryo ni Juan an dalagan kan pangultimong guerra?
22 Sinusumaryo ni Juan an dalagan kan pangultimong guerra: “Asin naheling ko an mabangis na hayop asin an mga hade kan daga patin an saindang mga hukbo na nagkatiripon tanganing makiguerra sa nakakabayo asin sa saiyang hukbo. Asin dinakop an mabangis na hayop, asin kaiba kaiyan an falsong propeta na naggibo sa atubangan kaiyan kan mga tanda na ipinanlagalag nia sa mga nag-ako kan marka kan mabangis na hayop asin sa mga nagsasamba sa imahen kaiyan. Mantang buhay pa, sinda parehong iinapon sa nagkakalayong danaw na naglalaad nin asupre. Alagad an iba pa ginaradan paagi sa halabang espada kan nakakabayo, an espadang nagluluwas sa saiyang ngoso. Asin an gabos na gamgam nagkabarasog sa laman ninda.”—Kapahayagan 19:19-21.
23. (a) Sa anong sentido na an “ralaban kan dakulang aldaw na iyan nin Dios na Makakamhan sa Gabos” paglalabanan sa “Armagedon”? (b) Anong patanid an dai nakuyog kan “mga hade sa daga,” asin ano an resulta?
23 Pakabubuan kan ikaanom na mangko kan grabeng kaanggotan ni Jehova, ibinareta ni Juan na “an mga hade sa daga asin sa bilog na kinaban” tiniripon nin sa demonyong propaganda sa “ralaban kan dakulang aldaw na iyan nin Dios na Makakamhan sa Gabos.” Ini paglalabanan sa Armagedon—bakong literal na lugar, kundi an lakop sa globong situwasyon na naghahagad kan paggibo kan paghokom ni Jehova. (Kapahayagan 16:12, 14, 16, King James Version) Ngonyan naheheling na ni Juan an posisyon kan magkalaban. Yaon duman, nakalinya tumang sa Dios, an gabos na “hade kan daga patin an saindang mga hukbo.” Sinda may katagasan nin payong nagsayuma na pumasakop sa Hade ni Jehova. Tinawan nia sinda nin igong patanid sa ipinasabong na mensahe: “Humadok sa aki, tanganing dai Sia [si Jehova] maanggot asin dai kamo mapara sa dalan.” Huling dai nagpasakop sa pamamahala ni Cristo, dapat sindang magadan.—Salmo 2:12.
24. (a) Anong paghokom an gigibohon sa mabangis na hayop asin falsong propeta, asin sa anong sentido na sinda “buhay pa”? (b) Taano ta seguradong piguratibo an “danaw nin kalayo”?
24 An may pitong payo, may sampulong sungay na mabangis na hayop hale sa dagat, na nagrerepresentar sa politikal na organisasyon ni Satanas, paparaon, asin kaiba kaiyan an falsong propeta, an ikapitong pambilog na kinaban na kapangyarihan. (Kapahayagan 13:1, 11-13; 16:13) Mantang “buhay pa,” o nagpupunsionar pa sa saindang sararong pagtumang sa banwaan nin Dios digdi sa daga, sinda iaapon sa “danaw nin kalayo.” Ini daw literal na danaw nin kalayo? Bako, kun paanong an mabangis na hayop asin an falsong propeta bakong literal na mga hayop. Imbes, iyan simbolo nin kompleto, pangultimong kalaglagan, lugar na dai na nin balikan. Digdi iaapon sa huri an kagadanan asin Hades, saka an Diablo mismo. (Kapahayagan 20:10, 14) Bako nanggad iyan na impiernong may kalayo para sa daing sagkod na pagpadusa sa mga marigsok, ta an mismong ideya nin siring na lugar makauuyam nin makuri para ki Jehova.—Jeremias 19:5; 32:35; 1 Juan 4:8, 16.
25. (a) Sairisay an “ginaradan paagi sa halabang espada kan nakakabayo”? (b) Lalaoman daw niato na an siisay man sa “ginaradan” bubuhayon liwat?
25 An gabos na iba pa na bako man na direktang kabtang nin gobyerno alagad dai na man mababakle na kabtang kan maraot na kinaban na ini nin katawohan “ginaradan [man] paagi sa halabang espada kan nakakabayo.” Idedeklarar ni Jesus na sinda maninigo sa kagadanan. Mantang dai nasasambitan an danaw nin kalayo sa kaso ninda, lalaoman daw niato na sinda bubuhayon liwat? Mayo nin sinasabi sato na an mga gagadanon kan Hokom ni Jehova sa panahon na iyan bubuhayon liwat. Arog kan sabi mismo ni Jesus, an gabos na bakong “karnero” mapasiring sa “daing katapusan na kalayo na inandam para sa Diablo asin sa saiyang mga anghel,” an boot sabihon, “sa pagkaparang daing katapusan.” (Mateo 25:33, 41, 46) Ini an kulminasyon kan “aldaw nin paghokom asin kalaglagan kan bakong diosnon na mga tawo.”—2 Pedro 3:7; Nahum 1:2, 7-9; Malaquias 4:1.
26. Isabi sa halipot an resulta kan Armagedon.
26 Sa paaging ini, an bilog na organisasyon ni Satanas digdi sa daga matatapos. An “dating langit” nin politikal na pamamahala nakalihis na. An “daga,” an garo baga permanenteng sistema na itinogdok ni Satanas sa nag-aging mga siglo, ngonyan biyo nang nalaglag. An “dagat,” an masa nin marigsok na mga tawo na tumang ki Jehova, mayo na. (Kapahayagan 21:1; 2 Pedro 3:10) Pero ano an tagama ni Jehova para ki Satanas mismo? Sinasabi iyan sato ni Juan.
[Mga Hapot Para sa Pag-adal]
