An Kapahayagan Asin Kamo
Kapitulo 44
An Kapahayagan Asin Kamo
1. (a) Anong pag-asegurar an itinao kan anghel ki Juan mapadapit sa gabos na makangangalas na panuga sa Kapahayagan? (b) Siisay an nagsasabing, “Madatong akong madali,” asin noarin an ‘pagdatong’ na ini?
SA PAGBASA kan nakakaogmang marhay na pagkaladawan sa Bagong Jerusalem, tibaad mapahiro kamong maghapot: ‘Talaga daw na puedeng mangyari an siring kamakangangalas na bagay?’ Sinisimbag ni Juan an hapot na iyan paagi sa pagbareta kan sunod na mga tataramon kan anghel: “Asin sia nagsabi sa sako: ‘An mga tataramon na ini maimbod asin totoo; iyo, isinugo ni Jehova na Dios kan ipinasabong na mga tataramon kan mga propeta an saiyang anghel tanganing ipaheling sa saiyang mga oripon an mga bagay na mangyayari nanggad sa dai na mahahaloy. Asin, uya! madatong akong madali. Maogma an siisay man na nag-ootob kan mga tataramon kan propesiya sa rolyong ini.’” (Kapahayagan 22:6, 7) An gabos na makangangalas na panuga kan Kapahayagan talagang maootob! Sa pagtaram sa ngaran ni Jesus, sinasabi kan anghel na si Jesus madatong sa dai na mahahaloy, “madali.” Siertong ini an pagdatong ni Jesus “siring sa parahabon” tanganing laglagon an mga kaiwal ni Jehova asin papangyarihon an mamuraway asin maogmang kulminasyon kan Kapahayagan. (Kapahayagan 16:15, 16) Kun siring, maninigo na ioyon niato an satong buhay sa mga tataramon kan “rolyong ini,” an Kapahayagan, tanganing ipahayag kitang maogma sa panahon na iyan.
2. (a) Ano an nagin reaksion ni Juan sa kadakolan kan kapahayagan, asin ano an sinabi kan anghel saiya? (b) Ano an manonodan niato sa mga tataramon kan anghel na “Mag-ingat ka!” asin, “Sambahon mo an Dios”?
2 Pagkatapos nin siring kadakol na kapahayagan, natural sana na garo dai maaraman ni Juan an saiyang gigibohon: “Bueno, ako si Juan an nakakadangog asin nakakaheling kan mga bagay na ini. Asin kan ako makadangog asin makaheling, naghuruhod ako sa pagsamba sa pamitisan kan anghel na nagpaheling sa sako kan mga bagay na ini. Alagad nagsabi sia sako: ‘Mag-ingat ka! Dai mo iyan paggibohon! Ako kapwa oripon mo sana asin kan saimong mga tugang na propeta asin kan mga nag-ootob kan mga tataramon sa rolyong ini. Sambahon mo an Dios.’” (Kapahayagan 22:8, 9; ikomparar an Kapahayagan 19:10.) An duwang beses sinambit na patanid na ini na dai pagsambahon an mga anghel napapanahon kan aldaw ni Juan, na kaidto minalataw na may mga naggigibo kan siring na pagsamba o naghihingako na sinda nag-ako nin espesyal na mga kapahayagan hale sa mga anghel. (1 Corinto 13:1; Galacia 1:8; Colosas 2:18) Ngonyan, tinatawan kaiyan nin pagdodoon an bagay na an Dios sana an dapat niatong sambahon. (Mateo 4:10) Dai niato maninigong raoton an dalisay na pagsamba huli sa pagsamba sa kiisay man o sa ano man.—Isaias 42:5, 8.
3, 4. Ano an padagos na sinasabi kan anghel ki Juan, asin paano kinuyog kan linahidan na natatada an saiyang mga tataramon?
3 Nagpapadagos si Juan: “Nagsabi man sia sako: ‘Dai mo pagserahan nin tatak an mga tataramon kan propesiya sa rolyong ini, huli ta harani na an itinalaan na panahon. An naggigibo nin pagkabakong matanos, maggibo pa sia nin pagkabakong matanos; asin an maati magpakamaati pa; alagad an matanos maggibo pa nin katanosan, asin an banal magpakabanal pa.’”—Kapahayagan 22:10, 11.
4 Kinuyog kan linahidan na natatada ngonyan an mga tataramon kan anghel. Dai ninda sinerahan nin tatak an mga tataramon kan propesiya. Tara, an kaenot-enoteng luwas kan Zion’s Watch Tower and Herald of Christ’s Presence (Hulyo 1879) may mga komento sa balakid na bersikulo kan Kapahayagan. Siring kan nasabi sa enot na kapitulo kan librong ini, sa nag-aging mga taon nagpublikar an Mga Saksi ni Jehova nin iba pang mga libro na nagtatao nin kaliwanagan sa Kapahayagan. Ngonyan dinadara niamo giraray an atension kan gabos na mamomoton sa katotoohan sa mapuersang mga propesiya kan Kapahayagan asin sa kaotoban kaiyan.
5. (a) Paano kun gusto nin mga tawo na dai pag-intindihon an mga patanid asin sadol sa Kapahayagan? (b) Ano an maninigong magin reaksion kan mga mahoyo asin matanos?
5 Kun gusto nin mga tawo na dai pag-intindihon an mga patanid asin sadol sa Kapahayagan, bueno, pabayaan niato sinda! “An naggigibo nin pagkabakong matanos, maggibo pa sia nin pagkabakong matanos.” Kun iyan an gusto ninda, an mga lugom sa ati kan konsintidor na panahon na ini magagadan sa ating iyan. Sa dai na mahahaloy, an mga paghokom ni Jehova lubos na gigibohon, magpoon sa paglaglag sa Dakulang Babilonya. Magmahigos logod an mga mahoyo na kuyogon an mga tataramon kan propeta: “Hanapa nindo si Jehova . . . Hanapa nindo an katanosan, hanapa nindo an kahoyoan. Tibaad kamo matago sa aldaw kan kaanggotan ni Jehova.” (Sofonias 2:3) Kun manongod sa mga nagdusay na ki Jehova, “an matanos maggibo pa nin katanosan, asin an banal magpakabanal pa.” Aram kan madonong na daing temporaryong pakinabang gikan sa kasalan na makakakomparar sa nagdadanay na mga bendisyon na kakamtan kan mga nagmamaigot na magibo an katanosan asin kabanalan. An Biblia nagsasabi: “Padagos na baloon kun baga kamo nasa pagtubod, padagos na patunayan kun ano man nanggad kamo.” (2 Corinto 13:5) Basado sa dalan na saindong pinili asin pinagdadanayan, aakoon nindo an saindong balos.—Salmo 19:9-11; 58:10, 11.
6. Ano an sinabi ni Jehova mantang kinakaolay nia an mga parabasa kan Kapahayagan sa kahurihurihing pangyayari sa propesiya?
6 Kinakaolay ngonyan ni Jehova, an Hadeng daing sagkod, an mga parabasa kan Kapahayagan sa kahurihurihing pangyayari sa propesiya, na sinasabi: “Uya! Madatong akong madali, asin dara ko an balos na itatao ko, tanganing balosan an balang saro susog sa saiyang gibo. Ako an Alfa asin an Omega, an enot asin an huri, an kapinonan asin an katapusan. Maogma idtong mga naglaba kan saindang haralabang gubing, tanganing mapasainda an deretso sa mga kahoy nin buhay asin tanganing sinda makalaog sa siudad na minaagi sa mga tata kaiyan. Sa luwas an mga ayam asin an mga naggigibo nin espiritismo asin an mga parapakisaro asin an mga paragadan asin an mga parasamba sa idolo patin an gabos na namomoot asin naggigibo nin kaputikan.”—Kapahayagan 22:12-15.
7. (a) Huli sa ano ‘madatong nin madali’ si Jehova? (b) Taano an klero kan Kakristianohan ta dai magkakaigwa nin kabtang sa Bagong Jerusalem?
7 Sa giraray, idinodoon ni Jehova Dios an saiyang daing sagkod na soberaniya asin an bagay na an enot niang katuyohan sa katapustapusi gigibohon nia. Sia ‘madatong nin madali’ tanganing gibohon an paghokom asin babalosan nia an mga maigot na naghahanap sa saiya. (Hebreo 11:6) An saiyang mga pamantayan an nagdedeterminar kun sairisay an babalosan asin kun sairisay an isisikwal. An klero kan Kakristianohan guminawe na siring sa “pulang mga ayam,” na nagbubutabutahan sa mga bisyo na sinasabi digdi ni Jehova. (Isaias 56:10-12; helingon man an Deuteronomio 23:18, New World Translation Reference Bible, nota sa ibaba.) Tunay nanggad, sinda ‘namoot asin naggibo’ nin putik na mga doktrina asin katokdoan asin biyong dai pinag-intindi an hatol ni Jesus sa pitong kongregasyon. Huli kaini, mayo sindang kabtang sa Bagong Jerusalem.
8. (a) Sairisay sana an magkakaigwa kan “deretso sa mga kahoy nin buhay,” asin ano an kahulogan kaini? (b) Paano an dakulang kadaklan ‘naglaba kan saindang haralabang gubing,’ asin paano ninda pinapagdadanay an malinig na kamugtakan?
8 Solamente an linahidan na mga Kristiano na talagang “naglaba kan saindang haralabang gubing” tanganing magin malinig sa mga mata ni Jehova an may pribilehiong magkaigwa kan “deretso sa mga kahoy nin buhay.” An boot sabihon, aakoon ninda an deretso asin titulo sa inmortal na buhay sa saindang kamugtakan sa langit. (Ikomparar an Genesis 3:22-24; Kapahayagan 2:7; 3:4, 5.) Pagkagadan ninda bilang tawo, makakalaog sinda sa Bagong Jerusalem paagi sa pagkabuhay liwat. Papalaogon sinda kan 12 anghel, mantang dai pinapalaog an siisay man na naggigibo nin kaputikan o pagkamaati maski ngani naghihingakong may langitnon na paglaom. Siring man, an dakulang kadaklan sa daga ‘naglaba kan saindang haralabang gubing asin pinaputi iyan sa dugo kan Kordero’ asin kaipuhan na magdanay sa saindang malinig na kamugtakan. Magigibo ninda ini paagi sa paglikay sa mga bisyo na ipinapatanid digdi ni Jehova, siring man sa pagsapuso kan konseho ni Jesus sa saiyang pitong mensahe sa mga kongregasyon.—Kapahayagan 7:14; kapitulo 2 asin 3.
9. Ano an mga itinaram ni Jesus, asin, sa pangenot, para kiisay an saiyang mensahe asin an bilog na Kapahayagan?
9 Pagkatapos ni Jehova, nagtaram si Jesus. Nagtaram sia nin mga pamparigon sa boot para sa mga tama an kamugtakan nin puso na nagbabasa kan Kapahayagan, na sinasabi: “Ako, si Jesus, nagsugo kan sakong anghel tanganing magpatotoo saindo dapit sa mga bagay na ini para sa mga kongregasyon. Ako an gamot asin an gikan ni David, asin an maliwanag na bitoon sa makaaga.” (Kapahayagan 22:16) Iyo, an mga tataramon na ini sa pangenot “para sa mga kongregasyon.” Enot sa gabos, ini sarong mensahe para sa kongregasyon nin linahidan na mga Kristiano digdi sa daga. An gabos sa Kapahayagan sa pangenot ipinapaabot sa linahidan na mga Kristiano, na mag-eerok sa Bagong Jerusalem. Paagi sa kongregasyon na iyan, an dakulang kadaklan may pribilehio man na masabotan an mahalagang marhay na propetikong mga katotoohan na ini.—Juan 17:18-21.
10. Taano ta inapod ni Jesus an saiyang sadiri na (a) “an gamot asin an gikan ni David”? (b) “an maliwanag na bitoon sa makaaga”?
10 Ipinaniwala ki Jesu-Cristo an pagpaabot kan Kapahayagan ki Juan asin paagi saiya sa kongregasyon. Si Jesus “an gamot asin an gikan ni David.” Naggikan sia ki David segun sa laman asin sa siring kualipikadong magin Hade sa Kahadean ni Jehova. Sia man magigin “Amang Daing Sagkod” ni David, asin sa siring an “gamot” ni David. (Isaias 9:6; 11:1, 10) Sia an permanente, inmortal na Hade sa dinastiya ni David, na inootob an tipan ni Jehova ki David, asin “an maliwanag na bitoon sa makaaga” na ihinula kan panahon ni Moises. (Bilang 24:17; Salmo 89:34-37) Sia an “bitoon sa aga” na minasirang, kaya namamanaag na an aldaw. (2 Pedro 1:19) An gabos na pakana kan dakulang kaiwal na Dakulang Babilonya dai nakaolang sa mamuraway na pagsirang na ini.
Magsabi: “Madia!”
11. Anong bukas na pangagda an itinatao ngonyan ni Juan, asin sairisay an puedeng maghimate dian?
11 Ngonyan turno naman ni Juan na magtaram. Hale sa pusong nagsusulwak sa apresasyon para sa gabos na naheling asin nadangog nia, nagkagsing sia: “Asin an espiritu asin an nobya padagos na nagsasabi: ‘Madia!’ Asin an siisay man na nagdadangog magsabi: ‘Madia!’ Asin an siisay man na napapaha dumolok; an siisay man na boot, kumua kan tubig nin buhay na daing bayad.” (Kapahayagan 22:17) An mga pakinabang sa atang na pantubos ni Jesus bakong limitado sa 144,000, huli ta uya an sarong bukas na pangagda. An nagpapahirong espiritu ni Jehova nagtatrabaho paagi sa grupong nobya, kaya an mensahe padagos na ikinakabalangibog nin malinaw nanggad: “Kumua kan tubig nin buhay na daing bayad.” (Helingon man an Isaias 55:1; 59:21.) An siisay man na napapaha sa katanosan inaagdang “dumolok” asin akoon an abundang probisyon ni Jehova. (Mateo 5:3, 6) Abaa kapribilehiado kan gabos na may esperansang makabilang sa daganon na grupo na naghihimate sa pangagdang ini kan linahidan na grupong Juan!
12. Paano naghihimate an dakulang kadaklan sa pangagda sa Kapahayagan 22:17?
12 Poon kan enot na mga taon kan dekada 1930, an nagdadakol na dakulang kadaklan “nagdadangog”—nag-aatento sa pangagda. Kapareho kan saindang linahidan na mga kapwa oripon, nagkaigwa sinda nin malinig na kamugtakan sa atubangan ni Jehova. Hinihidaw ninda an panahon na an Bagong Jerusalem mahilig hale sa langit tanganing magin pinakapaagihan kan mga bendisyon sa katawohan. Huling nakadangog kan nakakapukaw nin boot na mensahe kan Kapahayagan, an dakulang kadaklan bako sanang nagsasabing “Madia!” kundi aktibo man na tinitipon an iba sa organisasyon ni Jehova, na tinotokdoan man an mga ini na magbalangibog: “An siisay man na napapaha dumolok.” Kaya nagpapadagos na dumakol an dakulang kadaklan, mantang an labing 6,000,000 sainda sa 235 kadagaan sa bilog na daga nakikiiba sa mayo pang 9,000 sa linahidan na grupong nobya sa pagpaabot kan pangagdang “kumua kan tubig nin buhay na daing bayad.”
13. Anong patanid an itinao ni Jesus?
13 Sunod, si Jesus giraray an nagtataram, na sinasabi: “Ako nagpapatotoo sa gabos na nagdadangog kan mga tataramon kan propesiya sa rolyong ini: Kun an siisay man magdagdag sa mga bagay na ini, dadagdagan sia nin Dios kan mga damat na nasusurat sa rolyong ini; asin kun haleon nin siisay man an ano man sa mga tataramon kan rolyo kan propesiyang ini, hahaleon nin Dios an saiyang kahirasan sa mga kahoy nin buhay asin sa banal na siudad, mga bagay na nasusurat sa rolyong ini.”—Kapahayagan 22:18, 19.
14. Ano an punto de vista kan grupong Juan sa “propesiya” kan Kapahayagan?
14 An mga kabilang sa grupong Juan dapat na mag-apod nin atension sa “propesiya” kan Kapahayagan. Dapat na dai ninda iyan itago o dagdagan. An mensahe kaiyan dapat na ihulit nin hayag, “hale sa mga atop.” (Mateo 10:27) An Kapahayagan ipinasabong nin Dios. Siisay an mangangahas na liwaton an sarong tataramon sa itinaram asin ipinaabot mismo nin Dios paagi sa nagrereynar na ngonyan na Hade, si Jesu-Cristo? Tunay nanggad, an siring na tawo angay na dai mag-ako kan buhay na hinahanap nia asin mag-agi kan mga damat na siertong maabot sa Dakulang Babilonya asin sa bilog na kinaban.
15. Ano an kahulogan kan mga tataramon ni Jesus na sia “nagpapatotoo sa mga bagay na ini” asin “madatong akong madali”?
15 Idinagdag ngonyan ni Jesus an pangultimong pagparigon sa boot: “An nagpapatotoo sa mga bagay na ini nagsasabi, ‘Iyo; madatong akong madali.’” (Kapahayagan 22:20a) Si Jesus an “maimbod asin totoong saksi.” (Kapahayagan 3:14) Kun nagpapatotoo sia sa mga bisyon sa Kapahayagan, seguradong totoo an mga iyan. Paorootrong idinoon nia sagkod ni Jehova Dios mismo an bagay na sinda madatong nin “madali,” o sa dai na mahahaloy, na digdi sinasabi iyan ni Jesus sa ikalimang beses. (Kapahayagan 2:16; 3:11; 22:7, 12, 20) An ‘pagdatong’ sa katuyohan na gibohon an paghokom sa dakulang patotot, sa politikal na “mga hade” asin sa gabos pang iba na nagtutumang sa “kahadean kan satong Kagurangnan [si Jehova] asin kan saiyang Cristo.”—Kapahayagan 11:15; 16:14, 16; 17:1, 12-14.
16. Sa pakaaram na si Jehova Dios asin si Jesus madatong nin madali, anong desididong aksion an maninigo nindong gibohon?
16 An saindong pakaaram na si Jehova Dios asin si Jesus madatong nin madali maninigong makaenkaminar sa saindo na padagos na ‘papagdanayon na harani sa isip an presensia kan aldaw ni Jehova.’ (2 Pedro 3:12) An ano man na garo baga karigonan kan daga sa sistema nin mga bagay ni Satanas imahinasyon sana. An ano man na garo baga kapangganahan na tibaad nagibo kan langit na kompuesto kan kinabanon na mga namamahala na sakop ni Satanas temporaryo sana. An mga bagay na ini malihis. (Kapahayagan 21:1) An solamenteng permanente iyo si Jehova, an saiyang Kahadean na papamahalaan ni Jesu-Cristo, asin an saiyang ipinanugang bagong kinaban. Nungka nindong paglingawan iyan!—1 Juan 2:15-17.
17. Paano kamo maninigong maapektaran kan saindong apresasyon sa kabanalan ni Jehova?
17 Kun siring, logod na togotan nindo na an saindong nanodan sa saindong pag-adal kan Kapahayagan magkaigwa nin hararom na impluwensia sa saindong buhay. Bako daw na an pakasiklap nindo sa langitnon na presensia ni Jehova nagtudok sa isip nindo kan daing kabaing na kamurawayan asin kabanalan kan satong Kaglalang? (Kapahayagan 4:1–5:14) Abaa kadakulang pribilehio na paglingkodan an siring na Dios! Logod na an saindong apresasyon sa saiyang kabanalan magpahiro saindo na isaboot na marhay an sadol ni Jesus sa pitong kongregasyon asin likayan an mga bagay na arog baga kan materyalismo, idolatriya, inmoralidad, pagigin maimbong, apostatang sektaryanismo, o ano man na puedeng magin dahelan na dai akoon ni Jehova an saindong paglilingkod. (Kapahayagan 2:1–3:22) An mga tataramon ni apostol Pedro sa grupong Juan sa pundamental aplikado man sa dakulang kadaklan: “Kaoyon kan Banal na nag-apod sa saindo, magin man kamong banal sa gabos nindong gawe-gawe.”—1 Pedro 1:15, 16.
18. Sa ano kamo maninigong magkaigwa kan pinakalubos na kabtang na mahihimo nindo, asin taano ta apretado ngonyan an gibohon na ini?
18 Saro pa, logod na pahiroon kamo sa orog pang kaigotan mantang ibinabalangibog nindo an “taon nin marahay na boot ni Jehova asin [an] aldaw nin pamamalos kan satong Dios.” (Isaias 35:4; 61:2) Baga man kamo kabilang kan sadangoton na aripompon o kan dakulang kadaklan, logod na magkaigwa kamo kan pinakalubos na pakikikabtang na mahihimo nindo sa pagpaisi kan pagbubo kan pitong mangko kan kaanggotan ni Jehova, na ibinabareta an mga paghokom nin Dios sa kinaban ni Satanas. Kadungan kaiyan, idugang an saindong tingog sa magayagayang pagbalangibog kan daing katapusan na maogmang bareta may labot sa establisado nang Kahadean ni Jehova asin kan saiyang Cristo. (Kapahayagan 11:15; 14:6, 7) Otobon an gibohon na ini na may pag-apretar. Asin logod na an pakarealisar na kita yaon na sa aldaw kan Kagurangnan magpahiro sa dakol na dai pa naglilingkod ki Jehova na makiiba sa gibohon na pagbalangibog kan maogmang bareta. Logod na sinda umoswag man pasiring sa pagdusay kan saindang buhay sa Dios tanganing makapabautismo. Girumdoma, “harani na an itinalaan na panahon”!—Kapahayagan 1:3.
19. Ano an pantapos na mga tataramon kan gurang nang apostol na si Juan, asin ano an saindong reaksion dian?
19 Sa siring, kaiba ni Juan, odok kitang namimibi: “Amen! Madia na, Kagurangnan na Jesus.” Asin idinugang pa ni Juan, an gurang nang apostol: “Logod na an dai na kutana maninigong kabootan kan Kagurangnan na Jesu-Cristo mapasa mga banal.” (Kapahayagan 22:20b, 21) Logod na iyan mapasaindo man gabos na nagbabasa kan publikasyon na ini. Logod na magkaigwa kamo nin pagtubod na harani na an mamuraway na kulminasyon kan Kapahayagan, tanganing makaibanan mi man kamo sa pagsabi nin odok sa pusong “Amen!”
[Mga Hapot Para sa Pag-adal]
[Ritrato sa pahina 314]
“Sa luwas an mga ayam . . . ”
[Ritrato sa pahina 315]
‘Maogma idtong mga nakakalaog sa siudad na minaagi sa mga tata kaiyan’
