Kapitulo 42

An Sarong Bagong Langit Asin Sarong Bagong Daga

1. Ano an ilinaladawan ni Juan kan ibalik sia kan anghel sa kapinonan kan Sangribong Taon na Paghade?

 AN MAMURAWAY na bisyon na ini nagpapadagos na mahayag mantang si Juan ibinabalik kan anghel sa kapinonan kan Sangribong Taon na Paghade. Ano an ilinaladawan nia? “Asin naheling ko an sarong bagong langit asin sarong bagong daga; huli ta nakalihis na an dating langit asin an dating daga, asin an dagat mayo na.” (Kapahayagan 21:1) Abaa kanakakaakit kan naheheling ngonyan!

2. (a) Paano an propesiya ni Isaias manongod sa bagong kalangitan asin sarong bagong daga naotob sa nakabalik na mga Judio kan 537 B.C.E.? (b) Paano niato naaaraman na may dugang pang aplikasyon an propesiya ni Isaias, asin paano naotob an panugang ini?

² Ginatos na taon bago an aldaw ni Juan, sinabi ni Jehova ki Isaias: “Huli ta uya ako naglalalang nin bagong kalangitan asin sarong bagong daga; asin an dating mga bagay dai na magigirumdoman, ni masabong pa iyan sa puso.” (Isaias 65:17; 66:22) An propesiyang ini enot na naotob kan an maimbod na mga Judio magbalik sa Jerusalem kan 537 B.C.E. pagkatapos kan 70 taon na pagkadistiero ninda sa Babilonya. Sa pagbabalik na iyan, sinda nagin sarong nalinig na sosyedad, “sarong bagong daga,” na sakop nin sarong bagong sistema nin gobyerno, an “bagong kalangitan.” Minsan siring, nasambitan ni apostol Pedro an dugang pang aplikasyon kan propesiya, na sinasabi: “Alagad igwa nin bagong kalangitan asin sarong bagong daga na satong hinahalat segun sa saiyang panuga, asin sa mga ini magdadanay an katanosan.” (2 Pedro 3:13) Ngonyan ipinapaheling ni Juan na an panugang ini maootob durante kan aldaw kan Kagurangnan. Malihis “an dating langit asin an dating daga,” an organisadong sistema nin mga bagay ni Satanas na an estruktura nin gobyerno impluwensiado ni Satanas asin kan saiyang mga demonyo. An maalon na “dagat” nin marigsok, rebeldeng mga tawo dai na mag-eeksister. Masalihid dian “an sarong bagong langit asin sarong bagong daga”—sarong bagong sosyedad sa daga na sakop nin sarong bagong gobyerno, an Kahadean nin Dios.—Ikomparar an Kapahayagan 20:11.

3. (a) Ano an ilinaladawan ni Juan, asin ano an Bagong Jerusalem? (b) Paano an Bagong Jerusalem “naghihilig hale sa langit”?

³ Nagpapadagos si Juan: “Naheling ko man an banal na siudad, an Bagong Jerusalem, na naghihilig hale sa langit gikan sa Dios asin inandam siring sa nobya na sinamnohan para sa saiyang agom na lalaki.” (Kapahayagan 21:2) An Bagong Jerusalem iyo an nobya ni Cristo, na kompuesto kan linahidan na mga Kristiano na nagdanay na maimbod sagkod sa kagadanan asin ibinangon tanganing magin mga hade asin saserdote kaiba kan pinamuraway na si Jesus. (Kapahayagan 3:12; 20:6) Kun paanong an daganon na Jerusalem nagin an kabisera nin gobyerno sa suanoy na Israel, an magayonon na Bagong Jerusalem asin an saiyang Nobyo iyo an minakompuesto sa gobyerno kan bagong sistema nin mga bagay. Ini an bagong langit. An ‘nobya naghihilig hale sa langit,’ bakong sa literal, kundi sa sentido na tinatawan kaiyan nin atension an daga. An nobya kan Kordero an magigin saiyang maimbod na katabangtabang sa pagpadalagan sa matanos na gobyerno sa  bilog na katawohan. Sarong bendisyon nanggad para sa bagong daga!

4. Ano an ipinapanuga nin Dios na kapareho kan ipinanuga nia sa bagong maorganisar na nasyon nin Israel?

⁴ Sinasabi pa sato ni Juan: “Kadungan kaiyan nakadangog ako nin makosog na tingog hale sa trono na nagsabi: ‘Uya! An tolda nin Dios nasa mga tawo, asin sia mag-eerok sa kaibanan ninda, asin sinda magigin saiyang mga banwaan. Asin an Dios mismo magigin kaibanan ninda.’” (Kapahayagan 21:3) Kan si Jehova makipagtipan sa bagong nasyon kaidto nin Israel paagi sa tipan nin Ley, nanuga sia: “Ibubugtak ko nanggad an sakuyang tabernakulo sa tahaw nindo, asin dai kamo ikakasurang nin makuri kan sakong kalag. Asin tunay na ako maglalakaw dian sa tahaw nindo asin magigin Dios nindo, asin kamo man magigin banwaan ko.” (Levitico 26:11, 12) Ngonyan si Jehova nanunuga man nin kapareho kaiyan sa maimbod na mga tawo. Durante kan sangribong taon na Aldaw nin Paghokom, sinda magigin espesyal na marhay na banwaan para sa saiya.

5. (a) Paano an Dios mag-eerok sa kaibanan kan katawohan durante kan Milenyal na Paghade? (b) Paano an Dios mag-eerok sa kaibanan kan katawohan pagkatapos kan Sangribong Taon na Paghade?

⁵ Durante kan Milenyal na Paghade, si Jehova “mag-eerok” sa tahaw kan katawohan sa sarong temporaryong areglo, ta sia irerepresentar kan saiyang hadeng Aki, si Jesu-Cristo. Minsan siring, sa katapusan kan Sangribong Taon na Paghade, kun itao na ni Jesus an Kahadean sa saiyang Ama, dai na kaipuhan an hadeng representante o nangongoltanan. Si Jehova mag-eerok sa espirituwal na paagi kaiba kan “saiyang mga banwaan” sa permanente asin direktang paagi. (Ikomparar an Juan 4:23, 24.) Abaa kanobleng pribilehio para sa ibinalik na katawohan!

6, 7. (a) Anong marahayon na mga panuga an ihinahayag ni Juan, asin sairisay an magkakamit kan mga bendisyon na iyan? (b) Paano ilinaladawan ni Isaias an sarong espirituwal sagkod pisikal na paraiso?

⁶ Si Juan nagpadagos sa pagsabi: “Asin papahidon nia an gabos na luha sa saindang mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog. An enot na mga bagay nakalihis na.” (Kapahayagan 21:4) Sa giraray, ipinapagirumdom kaini sa sato an mas naenot na ipinasabong na mga panuga. Si Isaias naglaom man sa panahon na an kagadanan asin an pagmondo mawawara na asin an kamondoan masasalidahan nin labi-labing kagayagayahan. (Isaias 25:8; 35:10; 51:11; 65:19) Kinokompirmar ngonyan ni Juan na an mga panugang ini may makangangalas na kaotoban durante kan sangribong taon na Aldaw nin Paghokom. An dakulang kadaklan an enot na magkakamit kan mga bendisyon na iyan. “An Kordero, na yaon sa tahaw kan trono,” sa padagos na pagpastor sainda, “magiya sa sainda sa mga burabod kan tubig nin buhay. Asin papahidon nin Dios an gabos na luha sa saindang mga mata.” (Kapahayagan 7:9, 17) Alagad sa katapustapusi an gabos na bubuhayon liwat asin matubod sa mga probisyon ni Jehova makakaibanan ninda, na magkakamit nin sarong espirituwal sagkod pisikal na paraiso.

⁷ “Sa panahon na iyan,” an sabi ni Isaias, “an mga mata kan mga buta magkakaburuklat, asin an mismong mga talinga kan mga bungog magkakaburukasan.” Iyo, “sa panahon na iyan an pilay matukad na garo lalaking usa, asin an dila kan pula makurahaw sa kaogmahan.” (Isaias 35:5, 6) Sa panahon man na iyan, “sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan. Huli ta magigin siring sa mga aldaw nin kahoy an mga aldaw kan sakuyang banwaan; asin an ginibo kan saindang mga kamot lubos na gagamiton kan sakuyang mga pinili.” (Isaias 65:21, 22) Kaya dai sinda hahaleon sa daga.

8. Ano an sinabi mismo ni Jehova mapadapit sa pagkamasasarigan kan marahayon na mga panugang ini?

⁸ Kahangahanga nanggad an naiimahinar niatong mga patanaw sa ngapit mantang hinohorophorop niato an mga panugang ini! Makangangalas an mga probisyon na nakatagama sa maimbod na katawohan na magigin sakop kan mamomoton na gobyerno kan langit. An siring daw na mga panuga sobra karahay kaya garo bako nang totoo? Iyan daw mga pangarap sana nin sarong gurang na lalaki na nadistiero sa isla nin Patmos? Si Jehova mismo an minasimbag: “Asin an Saro na nakatukaw sa trono nagsabi: ‘Uya! Ginigibo kong bago an gabos na bagay.’ Siring man, sinabi nia: ‘Isurat mo, huli ta an mga tataramon na ini maimbod asin totoo.’ Asin sinabi nia sa sako: ‘Nangyari na an mga iyan! Ako an Alfa asin an Omega, an kapinonan asin an katapusan.’”—Kapahayagan 21:5, 6a.

9. Taano an mga bendisyon na ini sa ngapit ta ikakabilang na sierto nanggad na maootob?

⁹ Garo baga pinipirmahan mismo ni Jehova para sa maimbod na katawohan an sarong garantiya, o titulo, sa mga bendisyon na ini sa ngapit.  Siisay baga an mangangahas na kuestionon an siring na Garantor? Tara, siertong marhay an mga panugang ini ni Jehova kaya sia nagtataram na garo baga iyan naotob na: “Nangyari na an mga iyan!” Bako daw na si Jehova “an Alfa asin an Omega . . . , an Saro na iyo ngonyan asin iyo kaidto patin iyo an madatong, an Makakamhan sa Gabos”? (Kapahayagan 1:8) Iyo nanggad! Sia mismo nagsasabi: “Ako an enot asin ako an huri, asin apuera sa sako mayo nin Dios.” (Isaias 44:6) Bilang siring, puede niang ipasabong an mga propesiya asin otobon iyan sa gabos na detalye. Abaa kanakakapakosog sa pagtubod! Kaya nanunuga sia: “Uya! Ginigibo kong bago an gabos na bagay”! Imbes na kuestionon kun baga talagang mangyayari an mga ngangalasan na ini, daing duwa-duwa na an maninigong isipon niato: ‘Ano daw an dapat kong gibohon personalmente tanganing magmana ako kan siring na mga bendisyon?’

“Tubig” Para sa mga Napapaha

10. Anong “tubig” an iinaalok ni Jehova, asin ano an irinerepresentar kaiyan?

¹⁰ Si Jehova mismo an nagsasabi: “Sa siisay man na napapaha matao ako hale sa burabod kan tubig nin buhay na daing bayad.” (Kapahayagan 21:6b) Tanganing mahale an pagkapahang iyan, an sarong tawo kaipuhan na nakakamate kan saiyang espirituwal na pangangaipo asin andam na akoon an “tubig” na itinatao ni Jehova. (Isaias 55:1; Mateo 5:3) Anong “tubig”? Sinimbag mismo ni Jesus an hapot na iyan kan nagpapatotoo sia sa sarong babae sa may bubon sa Samaria. Sinabihan nia an babae: “An siisay man na uminom sa tubig na itatao ko sa saiya dai na noarin man mapapaha, kundi an tubig na itatao ko sa saiya magigin burabod nin tubig sa saiya na nagbubulakbugak tanganing magtao nin buhay na daing katapusan.” Iyan na “burabod kan tubig nin buhay” nagbobolos hale sa Dios paagi ki Cristo bilang saiyang probisyon tanganing ibalik an katawohan sa sangkap na buhay. Arog kan Samaritana, maninigo na kita magin galaga nanggad na uminom nin dakol sa burabod na iyan! Asin arog kan babaeng iyan, maninigo na kita magin andam nanggad na ipondo an pangaroaldaw na mga interes tanganing ipaabot sa iba an maogmang bareta!—Juan 4:14, 15, 28, 29.

An mga Nakadaog

11. Ano an ipinapanuga ni Jehova, asin kiisay enot na aplikado an mga tataramon na iyan?

¹¹ An mga minainom kan nakakapapreskong “tubig” na iyan dapat man na makadaog, siring kan padagos na sinasabi ni Jehova: “An siisay man na makadaog magmamana kan mga bagay na ini, asin ako magigin Dios nia asin sia magigin aki ko.” (Kapahayagan 21:7) An panugang ini kaagid kan mga panugang manonompongan sa mga mensahe sa pitong kongregasyon; huli kaini, segurado na an mga tataramon na ini enot sa gabos aplikado sa linahidan na mga disipulo. (Kapahayagan 2:7, 11, 17, 26-28; 3:5, 12, 21) Sa gabos na panahon na nag-agi galagang inaantisipar kan espirituwal na mga tugang ni Cristo an pribilehio na magin kabtang kan Bagong Jerusalem. Kun sinda makadaog, kun paanong si Jesus nakadaog, maootob an saindang mga paglaom.—Juan 16:33.

12. Paano an panuga ni Jehova sa Kapahayagan 21:7 maootob sa dakulang kadaklan?

¹² An dakulang kadaklan hale sa gabos na nasyon naglalaom man sa panugang ini. Sinda dapat man na makadaog, na maimbod na naglilingkod sa Dios sagkod na sinda lumuwas sa dakulang kahorasaan. Dangan malaog sinda sa saindang daganon na mana, ‘an kahadean na inandam para sa sainda poon pa kan pagtugdas kan kinaban.’ (Mateo 25:34) An mga ini asin an iba pa sa daganon na mga karnero kan Kagurangnan na makakapasar sa pagbalo sa katapusan kan sangribong taon inaapod na “mga banal.” (Kapahayagan 20:9) Magkakaigwa sinda nin sagrado asin garo aki-sa-magurang na relasyon sa saindang Kaglalang, si Jehova Dios, bilang mga miembro kan saiyang unibersal na organisasyon.—Isaias 66:22; Juan 20:31; Roma 8:21.

13, 14. Tanganing magmana kan marahayon na mga panuga nin Dios, anong mga gibo an dapat na desidido niatong likayan, asin taano?

¹³ Huli sa marahayon na paglaom na ini, abaa kahalaga na an mga Saksi ni Jehova ngonyan magdanay na malinig sa nakakaramog na mga bagay sa kinaban ni Satanas! Kaipuhan kitang magin marigon, desidido, asin determinado na nungkang madara kan Diablo na makaibanan kan mga ilinaladawan digdi ni Jehova mismo: “Alagad kun dapit sa mga matalaw asin sa mga dai nin pagtubod asin sa mga makababalde sa saindang ati asin sa mga paragadan asin sa mga parapakisaro asin sa mga naggigibo nin espiritismo asin sa mga parasamba sa idolo patin sa gabos na putikon, an saindang magigin kahirasan sa danaw na naglalaad sa kalayo asin asupre. Ini nangangahulogan kan ikaduwang kagadanan.” (Kapahayagan 21:8) Iyo, dapat na likayan kan magigin paramana an mga gibo na nakapaati sa  daan na sistemang ini nin mga bagay. Kaipuhan siang makadaog paagi sa pagdadanay na maimbod sa ibong nin gabos na pangigipit asin sugot.—Roma 8:35-39.

¹⁴ An Kakristianohan, minsan ngani naghihingakong nobya ni Cristo, midbid sa makababaldeng mga gibo na ilinaladawan digdi ni Juan. Kaya sia mapapasa daing sagkod na kalaglagan kaiba kan iba pang kabtang kan Dakulang Babilonya. (Kapahayagan 18:8, 21) Siring man, an siisay man na kabilang sa linahidan o sa dakulang kadaklan na naggigibo nin siring na karompotan, o nagpoon na mag-enkaminar kan paggibo kaiyan, napapaatubang sa daing katapusan na kalaglagan. Kun magpoprosegir sinda sa mga gibong ini, dai sinda magmamana kan mga panuga. Asin sa bagong daga, an siisay man na mag-introdusir kan siring na mga gibo lalaglagon tolos-tolos, na mapasiring sa ikaduwang kagadanan na daing paglaom sa pagkabuhay liwat.—Isaias 65:20.

15. Sairisay an bantog bilang mga nakadaog, asin paagi sa anong bisyon dinadara sa mamuraway na kulminasyon an Kapahayagan?

¹⁵ Bantog bilang mga nakadaog an Kordero, si Jesu-Cristo, asin an saiyang nobya na 144,000, an Bagong Jerusalem. Kun siring, angay nanggad na an Kapahayagan darahon sa mamuraway na kulminasyon paagi sa pangultimo, daing kabaing na bisyon kan Bagong Jerusalem! Ilinaladawan ngonyan ni Juan an kahurihurihing bisyon.

[Mga Hapot Para sa Pag-adal]

 [Mga ritrato sa pahina 302]

Sa sosyedad kan bagong daga, magkakaigwa nin magayagayang trabaho asin pag-iribaiba para sa gabos