Kapitulo 31

An mga Gibo ni Jehova—Dakula Asin Makangangalas

Bisyon 10​—Kapahayagan 15:1–16:21

Tema: Si Jehova na yaon sa saiyang santuaryo; an pitong mangko kan saiyang grabeng kaanggotan iinula sa daga

Panahon nin kaotoban: 1919 sagkod Armagedon

1, 2. (a) Anong ikatolong tanda an ibinabareta ni Juan? (b) Anong papel kan mga anghel an haloy nang aram kan mga lingkod ni Jehova?

 SARONG babae na nangangaki nin sarong aking lalaki! Sarong dakulang dragon na naghihingoang hamilon an aking iyan! An duwang tandang iyan sa langit, na buhay na buhay an pagkaladawan sa Kapahayagan kapitulo 12, nagdoon sato kan bagay na an haloyon nang kontrobersia may labot sa Banhi kan simbolikong babae nin Dios asin ki Satanas saka sa saiyang banhing mga demonyo pasiring na sa kulminasyon kaiyan. Sa pagsentro kan atension sa mga simbolong ini, si Juan nagsasabi: “Asin naheling sa langit an sarong dakulang tanda . . . Asin saro pang tanda an naheling.” (Kapahayagan 12:1, 3, 7-12) Ngonyan ibinabareta ni Juan an ikatolong tanda: “Asin naheling ko sa langit an saro pang tanda, dakula asin makangangalas, pitong anghel na may pitong damat. An mga ini na an huri, huli ta paagi sa sainda matatapos an kaanggotan nin Dios.” (Kapahayagan 15:1) An ikatolong tandang ini may mahalaga man na marhay na kahulogan para sa mga lingkod ni Jehova.

² Mangnoha an mahalaga na naman na papel kan mga anghel sa pag-otob kan kabotan nin Dios. An bagay na ini haloy nang aram kan mga lingkod ni Jehova. Tara, paagi sa pasabong kinaolay pa ngani kan suanoy na salmista an mga anghel na iyan, na sinasadol sinda: “Omawa nindo si Jehova, O kamong mga anghel nia, makakamhan sa kapangyarihan, na nag-ootob kan saiyang tataramon paagi sa paghinanyog sa tingog kan saiyang tataramon”! (Salmo 103:20) Ngonyan, sa bagong eksenang ini, an mga anghel naasignaran na iula an pitong huring damat.

3. Ano an pitong damat, asin ano an kahulogan kan pag-ula kaiyan?

³ Ano an mga damat na ini? Kapareho kan pitong tanog nin trumpeta, an mga iyan malanit na mga kapahayagan nin paghokom na nagpapaisi kan pagheling ni Jehova sa laen-laen na aspekto kan kinaban na ini asin nagpapatanid manongod sa pangultimong resulta kan saiyang hudisyal na mga desisyon. (Kapahayagan 8:1–9:21) An pag-ula  kan mga iyan nag-aapod nin atension sa pag-implementar kan mga paghokom na iyan, kun an mga ikinakaanggot nin grabe ni Jehova laglagon na sa aldaw kan saiyang naglalaad na kaanggotan. (Isaias 13:9-13; Kapahayagan 6:16, 17) Sa siring, “matatapos an kaanggotan nin Dios” paagi sa mga iyan. Alagad bago iladawan an pag-ula kan mga damat, sinasabi sato ni Juan an manongod sa mga tawo na dai maaapektaran kaiyan sa bakong paborableng paagi. Huling sinayumahan an marka kan mabangis na hayop, an mga maimbod na ini nag-aawit nin mga pag-omaw ki Jehova mantang ibinabalangibog ninda an aldaw kan saiyang pamamalos.—Kapahayagan 13:15-17.

An Awit ni Moises Asin kan Kordero

4. Ano ngonyan an naheheling ni Juan?

⁴ Naheheling ngonyan ni Juan an sarong pambihirang eksena: “Asin naheling ko an garo salming na dagat na may kasalak na kalayo, asin an mga nanggana sa mabangis na hayop asin sa imahen kaiyan asin sa numero kan ngaran kaiyan na nagtitindog sa kataed kan garo salming na dagat, na may mga arpa nin Dios.”—Kapahayagan 15:2.

5. Ano an ilinaladawan kan “garo salming na dagat na may kasalak na kalayo”?

⁵ An “garo salming na dagat” iyo man sana an naheling ni Juan kaidto, na yaon sa atubangan kan trono nin Dios. (Kapahayagan 4:6) Kaagid iyan kan “minoldeng dagat” (lalagan nin tubig) sa templo ni Salomon, na duman nagkukua nin tubig na panghanaw an mga saserdote. (1 Hade 7:23) Sa siring, iyan marahay na representasyon kan “paghugas nin tubig,” an boot sabihon, an Tataramon nin Dios, na ginagamit ni Jesus sa paglinig sa kongregasyon nin linahidan na mga Kristiano na maglilingkod bilang mga saserdote. (Efeso 5:25, 26; Hebreo 10:22) An garo salming na dagat na ini “may kasalak na kalayo,” na nagpaparisa na an mga linahidan na ini binabalo asin linilinigan mantang kinukuyog ninda an halangkaw na pamantayan na ibinugtak para sa sainda. Dugang pa, ipinapagirumdom kaiyan sa sato na  an Tataramon nin Dios igwa man nin mga tataramon nin nagkakalayong mga paghokom tumang sa saiyang mga kaiwal. (Deuteronomio 9:3; Sofonias 3:8) An iba sa nagkakalayong mga paghokom na ini nahahayag sa pitong huring damat na madali nang iula.

6. (a) Sairisay an mga paraawit na nagtitindog sa atubangan kan garo salming na dagat sa langit, asin paano niato naaaraman iyan? (b) Sa anong paagi na sinda “nanggana”?

⁶ An bagay na an minoldeng dagat sa templo ni Salomon para sa paggamit kan mga saserdote nagpaparisa na an mga paraawit na nagtitindog sa atubangan kan garo salming na dagat sa langit sarong grupo nin mga saserdote. Sinda may “mga arpa nin Dios,” asin kun siring iinaasosyar niato sinda sa 24 kamagurangan asin sa 144,000, ta an mga grupong ini nag-aarawit man na inaakompanyaran nin arpa. (Kapahayagan 5:8; 14:2) An mga paraawit na naheling ni Juan “nanggana sa mabangis na hayop asin sa imahen kaiyan asin sa numero kan ngaran kaiyan.” Kaya segurado na sinda an mga kabilang sa 144,000 na nabubuhay sa daga durante kan huring mga aldaw. Bilang sarong grupo, sinda tunay nanggad na nanggagana. Sa laog nin haros 90 taon poon kan 1919, sinda nagsayumang akoon an marka kan mabangis na hayop o maglaom sa imahen kaiyan bilang an solamenteng paglaom nin tawo para sa katoninongan. An dakol sa sainda nagtagal na maimbod sagkod sa kagadanan, asin seguradong may pagkaogmang marhay na sinusundan kan mga ini, na ngonyan yaon na sa langit, an pag-awit kan saindang mga tugang na yaon pa digdi sa daga.—Kapahayagan 14:11-13.

7. Paano ginamit an arpa sa suanoy na Israel, asin paano kita maninigong maapektaran kan pagkaigwa nin mga arpa nin Dios sa bisyon ni Juan?

⁷ An maimbod na mga nangganang ini may mga arpa nin Dios. Digdi, kapareho sinda kan mga Levita sa templo kan suanoy, na nagsamba ki Jehova paagi sa mga awit na inaakompanyaran nin mga arpa. An iba man nagpropesiya na inaakompanyaran nin arpa. (1 Cronica 15:16; 25:1-3) An magayon na tanog kan arpa orog na nagpagayon sa mga awit nin kagayagayahan kan Israel asin sa mga pamibi nin pag-omaw saka pagpasalamat ki Jehova. (1 Cronica 13:8; Salmo 33:2; 43:4; 57:7, 8) Sa mga panahon nin makuring kamondoan o pagkabihag, dai nadadangog an arpa. (Salmo 137:2) An pagkaigwa nin mga arpa nin Dios sa bisyon na ini maninigong makapukaw sa satong pag-antisipar sa labi-labi an kagayagayahan, mapangganang awit nin pag-omaw asin pagpasalamat sa satong Dios. *

8. Anong awit an inaawit, asin ano an mga tataramon kaiyan?

⁸ Iyan an ibinabareta ni Juan: “Asin inaawit ninda an awit ni Moises na oripon nin Dios asin an awit kan Kordero, na sinasabi: ‘Dakula asin makangangalas an saimong mga gibo, Jehova Dios, an Makakamhan sa Gabos. Matanos asin totoo an saimong mga dalan, Hadeng daing sagkod. Siisay nanggad an dai matatakot sa saimo, Jehova, asin magpapamuraway kan saimong ngaran, huli ta ika sana an maimbod? Huli ta an gabos na nasyon madolok asin masamba sa atubangan mo, huli ta an saimong matanos na mga pagboot nahayag na.’”—Kapahayagan 15:3, 4.

9. Taano an awit ta, sa sarong kabtang, inaapod na “awit ni Moises”?

⁹ Inaawit kan mga nangganang ini an “awit ni Moises,” an boot sabihon, awit na kaagid kan inawit ni Moises sa kaparehong mga kamugtakan. Pakaheling kan mga Israelita sa sampulong damat sa Egipto asin sa pagkalaglag kan mga hukbong Egipcio sa Dagat na Pula, pinangenotan sinda ni Moises sa siring na awit nin mapangganang pag-omaw ki Jehova, na sinasabi: “Si Jehova mamamahala bilang hade sagkod sa panahon na daing talaan, sagkod lamang pa ngani.” (Exodo 15:1-19) Abaa kaangay na an mga paraawit sa bisyon ni Juan, na nanggana sa mabangis na hayop asin kalabot sa pagbalangibog kan pitong huring damat, mag-awit man sa “Hadeng daing sagkod”!—1 Timoteo 1:17.

10. Ano pang ibang awit an kinomponer ni Moises, asin paano an huring berso kaiyan konektado sa dakulang kadaklan ngonyan?

¹⁰ Sa saro pang awit, na kinomponer kan an Israel nag-aandam na kongkistaron an Canaan, sinabihan kan gurang nang si Moises an nasyon na idto: “Ipapahayag ko an ngaran ni Jehova. Iatribwir nindo an kadakulaan sa satuyang Dios!” An huring berso kan awit na ini nagparigon man sa boot kan mga bakong Israelita, asin an ipinasabong na mga tataramon ni Moises nakakaabot sagkod sa dakulang kadaklan ngonyan: “Pangag-ogma, kamong mga nasyon, kaiba kan saiyang banwaan.” Asin taano sinda ta maninigong mag-ogma? Huli ta ngonyan “ipapamalos [ni  Jehova] an dugo kan saiyang mga lingkod, asin babaloson nia an saiyang mga kaiwal.” An matanos na paghokom na ini matao nin dakulang kagayagayahan sa gabos na naglalaom ki Jehova.—Deuteronomio 32:3, 43; Roma 15:10-13; Kapahayagan 7:9.

11. Paano an awit na nadangog ni Juan padagos na naootob?

¹¹ Kanigoan kutana an kagayagayahan ni Moises kun sia nabubuhay ngonyan sa aldaw kan Kagurangnan, na nag-aawit kaiba kan langitnon na koro: “An gabos na nasyon madolok asin masamba sa atubangan mo”! An daing kabaing na awit na iyan padagos na nagkakaigwa nin makangangalas na kaotoban ngonyan mantang naheheling niato, bako sanang sa bisyon kundi bilang buhay, aktuwal na nangyayari, an minilyon hale sa mga “nasyon” na ngonyan magayagayang nagraralaog sa daganon na organisasyon ni Jehova.

12. Taano an awit kan mga nanggana ta inaapod man na “awit kan Kordero”?

¹² Minsan siring, ini awit bako sanang ni Moises kundi siring man “kan Kordero.” Taano man? Si Moises an propeta ni Jehova sa Israel, alagad si Moises mismo nagpropesiya na si Jehova mapatindog nin sarong propeta na arog nia. An Sarong ini iyo an Kordero, si Jesu-Cristo. Mantang si Moises “oripon nin Dios,” si Jesus Aki nin Dios asin si Moises na Orog na Dakula. (Deuteronomio 18:15-19; Gibo 3:22, 23; Hebreo 3:5, 6) Huli kaini, an mga paraawit nag-aawit man kan “awit kan Kordero.”

13. (a) Paano na si Jesus, minsan ngani orog na dakula ki Moises, kapareho kaini? (b) Paano kita puedeng magin kasaro kan mga paraawit?

¹³ Kapareho ni Moises, si Jesus nag-awit sa publiko kan mga kaomawan nin Dios asin nagpropesiya manongod sa Saiyang kapangganahan sa gabos na kaiwal. (Mateo 24:21, 22; 26:30; Lucas 19:41-44) Inantisipar man ni Jesus an panahon na an mga nasyon madorolok sa pag-omaw ki Jehova, asin bilang an mapagsakripisyong “Kordero nin Dios,” itinao nia an saiyang buhay bilang tawo tanganing ini magin posible. (Juan 1:29; Kapahayagan 7:9; ikomparar an Isaias 2:2-4; Zacarias 8:23.) Asin kun paanong inapresyar ni Moises an ngaran nin Dios na Jehova asin irinukyaw an ngaran na iyan, ipinahayag man ni Jesus an ngaran nin Dios. (Exodo 6:2, 3; Salmo 90:1, 17; Juan 17:6) Mantang si Jehova maimbod, an saiyang mamuraway na mga panuga seguradong maootob. Kun siring, segurado na kasaro kita kan maimbod na mga paraawit na ini, kan Kordero, asin ni Moises, sa pag-oyon sa mga tataramon kan awit: “Siisay nanggad an dai matatakot sa saimo, Jehova, asin magpapamuraway kan saimong ngaran?”

An mga Anghel na May mga Mangko

14. Siisay an naheling ni Juan na nagluluwas sa santuaryo, asin ano an itinao sa sainda?

¹⁴ Angay nanggad na madangog niato an awit kan linahidan na mga nandaog na ini. Taano? Huli ta ipinapahayag ninda sa daga an mga paghokom na laog kan mga mangko na pano kan kaanggotan nin Dios. Alagad bako sanang mga tawo an kalabot sa pag-ula kan mga mangkong ini, arog kan ipinapaheling ngonyan ni Juan: “Asin pagkatapos kan mga bagay na ini naheling ko, asin an santuaryo kan tolda kan patotoo nabukasan sa langit, asin an pitong anghel na may pitong damat nagluwas sa santuaryo, na may sulot na malinig, makintab na lino asin nahahagkosan sa saindang daghan nin mga hagkos na bulawan. Asin tinawan kan saro sa apat na buhay na linalang an pitong anghel nin pitong mangkong bulawan na parano kan kaanggotan nin Dios, na nabubuhay sagkod pa man.”—Kapahayagan 15:5-7.

15. Taano ta bakong makangangalas na an pitong anghel nagluwas sa santuaryo?

¹⁵ Kun dapit sa templo sa Israel, na may mga representasyon nin langitnon na mga bagay, solamente an halangkaw na saserdote an nakakalaog sa Kabanalbanale, na inaapod digdi na “santuaryo.” (Hebreo 9:3, 7) Iyan nagrerepresentar sa lugar kan presensia ni Jehova sa langit. Minsan siring, duman mismo sa langit, bako sanang an Halangkaw na Saserdoteng si Jesu-Cristo an may pribilehio na umatubang ki Jehova kundi siring man an mga anghel. (Mateo 18:10; Hebreo 9:24-26) Kun siring, bakong makangangalas na maheling an pitong anghel na nagluluwas sa santuaryo sa langit. Sinda isinugo mismo ni Jehova Dios: Iula an mga mangko na pano kan kaanggotan nin Dios.—Kapahayagan 16:1.

16. (a) Ano an nagpapaheling na an pitong anghel kualipikadong marhay para sa saindang gibohon? (b) Ano an nagpaparisa na may ibang kalabot sa dakulang gibohon na pag-ula kan simbolikong mga mangko?

¹⁶ An mga anghel na ini kualipikadong marhay para sa trabahong ini. Sinda may sulot na malinig, makintab na lino, na nagpapaheling na sinda malinig asin banal sa espirituwal, matanos sa pagheling ni Jehova. Siring man, sinda may mga hagkos na bulawan. An hagkos parateng ginagamit kun an saro naghahagkos para sa sarong trabaho. (Levitico 8:7, 13; 1 Samuel 2:18; Lucas 12:37;  Juan 13:4, 5) Kaya an mga anghel nahahagkosan tanganing otobon an sarong asignasyon. Dugang pa, an saindang hagkos bulawan. Sa suanoy na tabernakulo, an bulawan ginamit na magrepresentar sa mga bagay na sa Dios, langitnon. (Hebreo 9:4, 11, 12) Iyan nangangahulogan na an mga anghel na ini may gigibohon na mahalagang marhay na paglilingkod na isinugo nin Dios. May iba man na kalabot sa dakulang gibohon na ini. Saro sa apat na buhay na linalang an nagtao sa sainda kan aktuwal na mga mangko. Daing duwa-duwa na ini an enot na buhay na linalang, na agid sa leon, na nagsisimbolisar sa pagkapusoan asin dai mapapasukong kosog nin boot na kaipuhan sa pagbalangibog kan mga paghokom ni Jehova.—Kapahayagan 4:7.

Si Jehova Yaon sa Saiyang Santuaryo

17. Ano an sinasabi sato ni Juan manongod sa santuaryo, asin paano iyan nagpapagirumdom sato kan santuaryo sa suanoy na Israel?

¹⁷ Ultimo, sa pagtapos kan kabtang na ini kan bisyon, sinasabi sato ni Juan: “Asin an santuaryo napano nin aso huli sa kamurawayan nin Dios asin huli sa saiyang kapangyarihan, asin mayo nin nakalaog sa santuaryo sagkod na natapos an pitong damat kan pitong anghel.” (Kapahayagan 15:8) May mga pangyayari sa kasaysayan nin Israel na natahoban nin sarong panganoron an literal na santuaryo, asin huli sa kapahayagan na ini kan kamurawayan ni Jehova dai nakalaog duman an mga saserdote. (1 Hade 8: 10, 11; 2 Cronica 5:13, 14; ikomparar an Isaias 6:4, 5.) An mga ini panahon na si Jehova aktibong kalabot sa mga pangyayari digdi sa daga.

18. Noarin mabuelta an pitong anghel tanganing magreport ki Jehova?

¹⁸ Interesado man na marhay si Jehova sa mga nangyayari digdi sa daga ngonyan. Boot nia na matapos kan pitong anghel an asignasyon sa sainda. Iyan panahon nin pantapos na paghokom, arog kan ilinaladawan sa Salmo 11:4-6: “Si Jehova yaon sa saiyang banal na templo. Si Jehova—yaon sa kalangitan an saiyang trono. An saiyang mga mata nagmamasid, an saiyang nagliliwanag na mga mata nagsisiyasat sa mga aki nin mga tawo. Si Jehova mismo an nagsisiyasat sa matanos saka sa marigsok, asin an siisay man na namomoot sa kadahasan ikinakaongis nanggad kan Saiyang kalag. Papaoranan nia an mga marigsok nin mga siod, kalayo asin asupre patin nakakapasong doros, bilang an kopang iinomon ninda.” Sagkod na dai ikinakaula an pitong damat na ini sa mga marigsok, an pitong anghel dai mabuelta sa halangkawon na presensia ni Jehova.

19. (a) Ano an pagboot na itinao, asin niisay? (b) Kasuarin seguradong nagpoon an pag-ula kan simbolikong mga mangko?

¹⁹ Garo daguldol an makangingirhat na pagboot: “Asin nadangog ko an sarong makosog na tingog hale sa santuaryo na nagsabi sa pitong anghel: ‘Lakaw kamo asin iula nindo sa daga an pitong mangko kan kaanggotan nin Dios.’” (Kapahayagan 16:1) Siisay an nagtatao kan pagboot na ini? Seguradong si Jehova mismo, ta huli sa kinang kan saiyang kamurawayan asin kapangyarihan mayo nin siisay man na nakalaog sa santuaryo. Si Jehova nagdatong sa saiyang espirituwal na templo para sa paghokom kan 1918. (Malaquias 3:1-5) Kun siring, segurado na dai nahaloy pakalihis kan petsang iyan na itinao nia an pagboot na iula an mga mangko kan kaanggotan nin Dios. Sa katunayan, an mga paghokom na laog kan simbolikong mga mangko pinonan na ipahayag nin maigot kan 1922. Asin an pagpahayag kaiyan pakosog nang pakosog ngonyan.

An mga Mangko Asin Tanog nin Trumpeta

20. Ano an ihinahayag asin ipinapatanid kan mga mangko kan kaanggotan ni Jehova, asin paano iyan iinuula?

²⁰ An mga mangko kan kaanggotan ni Jehova naghahayag nin mga aspekto sa situwasyon kan kinaban segun sa pagheling dian ni Jehova asin nagpapatanid manongod sa mga paghokom na gigibohon ni Jehova. Iinuula kan mga anghel an mga mangko paagi sa kongregasyon kan mga linahidan na Kristiano digdi sa daga, an mga nag-aawit kan awit ni Moises asin kan awit kan Kordero. Mantang nagbabalangibog kan Kahadean bilang maogmang bareta, may kapusoan na ihinahayag kan grupong Juan an laog kan mga mangkong ini nin kaanggotan. (Mateo 24:14; Kapahayagan 14:6, 7) Sa siring, an saindang may duwang aspektong mensahe nagin matoninong sa pagbalangibog nin katalingkasan sa katawohan alagad garo nakikiguerra sa pagpatanid manongod sa “aldaw nin pamalos kan satong Dios.”—Isaias 61:1, 2.

21. Paano an punteriya kan enot na apat na mangko kan kaanggotan nin Dios kapareho kan punteriya kan enot na apat na tanog nin trumpeta, asin saen sinda nagkakalaen?

²¹ An punteriya kan enot na apat na mangko kan kaanggotan nin Dios kapareho kan punteriya kan enot na apat na tanog nin trumpeta, arin na baga, an daga, an dagat, an mga salog saka burabod nin tubig, asin an langitnon na mga pinaghahalean nin liwanag. (Kapahayagan 8:1-12) Alagad an mga tanog nin trumpeta nagpaisi nin mga damat sa “ikatolong kabtang,” mantang an gabos nagsasakit nin makuri sa pag-ula kan mga mangko kan kaanggotan nin Dios. Sa siring, mantang an Kakristianohan, bilang “ikatolong kabtang,” an tinawan nin enot na atension sa aldaw kan Kagurangnan, mayo ni sarong kabtang kan sistema ni Satanas na nakalibre sa pagdamat kan nagpapasakit na mga mensahe nin paghokom ni Jehova asin sa mga kamondoan na dara kaiyan.

22. Paano napapalaen an pangultimong tolong tanog nin trumpeta, asin paano iyan konektado sa pangultimong tolong mangko kan kaanggotan ni Jehova?

²² An pangultimong tolong tanog nin trumpeta napapalaen, ta an mga iyan inapod na herak man. (Kapahayagan 8:13; 9:12) An enot na duwa digdi sa partikular iyo an mga doron asin mga hukbo kan kabalyeriya, mantang an ikatolo nag-introdusir kan pagkamundag kan Kahadean ni Jehova. (Kapahayagan 9:1-21; 11:15-19) Arog kan maheheling niato, an pangultimong tolong mangko kan saiyang grabeng kaanggotan mapadapit man sa nagkapirang aspektong ini, alagad an mga iyan medyo may kalaenan sa tolong herak man. Tawan niato ngonyan nin maingat na atension an dramatikong mga kapahayagan na bunga kan pag-ula kan mga mangko kan kaanggotan ni Jehova.

[Nota sa Ibaba]

[Mga Hapot Para sa Pag-adal]