Bumakal nin Bulawan na Dinalisay sa Kalayo
Kapitulo 13
Bumakal nin Bulawan na Dinalisay sa Kalayo
LAODICEA
1, 2. Saen an lugar kan ultimo sa pitong kongregasyon na nag-ako nin mensahe hale sa pinamuraway na si Jesus, asin ano an nagkapirang bagay manongod sa siudad?
AN Laodicea an ultimo sa pitong kongregasyon na nag-ako nin mensahe hale sa binuhay liwat na si Jesus. Asin abaa kanakakabigla asin kanakakaanimar kan impormasyon na itinatao kaiyan!
2 Ngonyan, manonompongan nindo an kagabaan nin Laodicea harani sa Denizli, mga 90 kilometros sa timog-sirangan nin Alasehir. Kan enot na siglo, an Laodicea asensadong siudad. Nasa mayor na pinagkasangahan nin tinampo, iyan mayor na sentro nin bangko asin komersio. An pagpabakal nin midbid na panlahid sa mata nakadagdag sa kayamanan kaiyan, asin iyan bantog man huli sa de kalidad na mga gubing na ginigibo duman hale sa pino, itom na lana. An kakulangan nin tubig, na dakulang problema kan siudad, naresolberan paagi sa pagpabolos kan tubig sa mga kanal hale sa mainit na mga burabod na medyo may distansia. Sa siring, maimbong na sana an tubig pag-abot kaiyan sa siudad.
3. Paano pinonan ni Jesus an saiyang mensahe sa kongregasyon sa Laodicea?
3 An Laodicea harani sa Colosas. Sa pagsurat sa mga taga Colosas, si apostol Pablo may nasambitan na surat na ipinadara nia sa mga taga Laodicea. (Colosas 4:15, 16) Dai niato aram kun ano an isinurat dian ni Pablo, alagad an mensahe na ngonyan ipinadara ni Jesus sa mga taga Laodicea nagpapaheling na sinda nahulog sa grabe karaot na kamugtakan sa espirituwal. Pero, arog kan dati, enot ngunang sinisitar ni Jesus an saiyang mga kredensial, na sinasabi: “Asin sa anghel kan kongregasyon sa Laodicea sumurat ka: Iyo ini an mga bagay na sinasabi kan Amen, an maimbod asin totoong saksi, an kapinonan kan paglalang nin Dios.”—Kapahayagan 3:14.
4. Paano na si Jesus an “Amen”?
4 Taano ta inaapod ni Jesus an saiyang sadiri na an “Amen”? An titulong ini nagtatao nin hudisyal na gabat sa saiyang mensahe. An “Amen” transliterasyon kan termino sa Hebreo na nangangahulogan “iyo nanggad,” “mangyari logod,” asin ginagamit sa poro nin mga pamibi tanganing kompirmaron an mga saboot na ipinahayag dian. (1 Corinto 14:16) Si Jesus an “Amen” ta kinompirmar asin iginarantiya kan saiyang daing depektong integridad asin kagadanan bilang atang an kaotoban kan gabos na mahalagang marhay na panuga ni Jehova. (2 Corinto 1:20) Magpoon kaidto, an gabos na pamibi tama na ipaabot ki Jehova paagi ki Jesus.—Juan 15:16; 16:23, 24.
5. Sa anong paagi na si Jesus “an maimbod asin totoong saksi”?
5 Si Jesus man “an maimbod asin totoong saksi.” Sa propesiya sia parateng iinaasosyar sa kaimbodan, katotoohan, asin katanosan, huli ta sia biyong mapagtitiwalaan bilang lingkod ni Jehova Dios. (Salmo 45:4; Isaias 11:4, 5; Kapahayagan 1:5; 19:11) Sia an kadarudakulaing Saksi para ki Jehova. Sa katunayan, bilang “an kapinonan kan paglalang nin Dios,” ipinahayag ni Jesus an kamurawayan nin Dios poon sa kapinonan. (Talinhaga 8:22-30) Bilang tawo digdi sa daga, sia nagpatotoo sa katotoohan. (Juan 18:36, 37; 1 Timoteo 6:13) Pagkabuhay nia liwat, pinanugaan nia nin banal na espiritu an saiyang mga disipulo asin sinabihan sinda: “Kamo magigin mga saksi ko sa Jerusalem sagkod sa bilog na Judea asin Samaria patin sagkod sa kaporoporohi kan daga.” Poon kan Pentecostes 33 C.E., giniyahan ni Jesus an linahidan na mga Kristianong ini sa paghuhulit kan maogmang bareta “sa gabos na linalang sa sirong nin langit.” (Gibo 1:6-8; Colosas 1:23) Tunay nanggad, si Jesus maninigong apodon na an maimbod asin totoong saksi. Makikinabang an linahidan na mga Kristiano sa Laodicea paagi sa paghinanyog sa saiyang mga tataramon.
6. (a) Paano ilinaladawan ni Jesus an espirituwal na kamugtakan kan kongregasyon sa Laodicea? (b) Anong marahay na halimbawa ni Jesus an dai nasunod kan mga Kristiano sa Laodicea?
6 Ano an mensahe ni Jesus para sa mga taga Laodicea? Mayo siang sinabing komendasyon. Prangka na sinabi nia sa sainda: “Aram ko an saimong mga gibo, na ika bakong malipot ni mainit. Kutana ika malipot o kun dai mainit. Kaya, huli ta ika maimbong asin bakong mainit ni malipot, isusuka taka hale sa sakong ngoso.” (Kapahayagan 3:15, 16) Ano an magigin reaksion nindo sa siring na mensahe hale sa Kagurangnan na Jesu-Cristo? Dai daw kamo mamata asin masiyasat sa saindong sadiri? Daing duwa-duwa na kaipuhan na humiro an mga taga Laodicea, ta sinda nagin hugakon sa espirituwal, na minalataw na ipinapasipara na sana an kadakol na bagay. (Ikomparar an 2 Corinto 6:1.) Si Jesus, na maninigo kutanang inarog ninda bilang mga Kristiano, pirmeng nagpapaheling nin malaad na kaigotan para ki Jehova asin sa saiyang paglilingkod. (Juan 2:17) Dugang pa, nanompongan nin mga mahoyo na sia pirmeng maboot asin mahoyo, na nakakarepresko arog nin sarong baso nin malipot na tubig sa mainit na aldaw. (Mateo 11:28, 29) Alagad ta an mga Kristiano sa Laodicea bakong mainit ni malipot. Kapareho kan tubig na nagbobolos pasiring sa saindang siudad, sinda nagin maimbong. Posible na sinda biyong isikwal ni Jesus, ‘isuka hale sa saiyang ngoso’! Logod na kita pirmeng maigot na maghingoa, kapareho ni Jesus, na makatao nin espirituwal na pagparepresko sa iba.—Mateo 9:35-38.
“Ika Nagsasabi: ‘Ako Mayaman’”
7. (a) Paano sinabi ni Jesus kun ano an pinakagamot kan problema kan mga Kristiano sa Laodicea? (b) Taano ta sinasabi ni Jesus na an mga Kristiano sa Laodicea “buta patin huba”?
7 Ano an talagang pinakagamot kan problema kan mga taga Laodicea? Magkakaideya kita sa sunod na mga tataramon ni Jesus: “Huli ta ika nagsasabi: ‘Ako mayaman asin nagkaigwa nin mga kayamanan patin dai na nagkakaipo nin ano man,’ alagad dai mo aram na ika miserable asin makaheherak asin dukha asin buta patin huba.” (Kapahayagan 3:17; ikomparar an Lucas 12:16-21.) Huling nag-iistar sa sarong mayaman na siudad, sinda kompiado huli sa saindang mga kayamanan. Posible na an saindang pamumuhay naapektaran kan istadyum, mga teatro, asin mga dyimnasio, kaya sinda nagin “mga mamomoton sa kasingawan imbes na mga mamomoton sa Dios.” * (2 Timoteo 3:4) Alagad ta an mga taga Laodicea na mayaman sa materyal dukha sa espirituwal. Pipira sana, kun igwa man, an saindang ‘kayamanan na natipon sa langit.’ (Mateo 6:19-21) Dai ninda pinapagdanay na simple an saindang mata, na tinatawan nin enot na lugar sa saindang buhay an Kahadean nin Dios. Sinda sa katotoohan nasa kadikloman, buta, na mayo nin espirituwal na pagheling. (Mateo 6:22, 23, 33) Dugang pa, sa ibong kan magagayon na gubing na tibaad nabakal kan saindang materyal na kayamanan, sinda huba sa pagheling ni Jesus. Mayo sinda nin espirituwal na mga gubing na magpapamidbid sa sainda bilang mga Kristiano.—Ikomparar an Kapahayagan 16:15.
8. (a) Sa anong paagi na nag-eeksister man ngonyan an situwasyon na kapareho kan sa Laodicea? (b) Paano dinadaya nin nagkapirang Kristiano an saindang sadiri sa mahanab na kinaban na ini?
8 Abaa kanakakakubhan na kamugtakan! Alagad bako daw na kita parateng nakakaheling nin kaparehong situwasyon ngonyan? Ano an pinakagamot na dahelan? An kompiado sa sadiring aktitud na gikan sa pagsarig sa materyal na mga rogaring asin sa kakayahan nin tawo. Kapareho kan mga parasimba sa Kakristianohan, dinadaya kan nagkapira sa banwaan ni Jehova an saindang sadiri, na naghohona na mapapaogma ninda an Dios paagi sana sa paminsanminsan na pag-atender sa mga pagtiripon. Pinoprobaran ninda na pumuede na bilang paramas sanang “mga paraotob kan tataramon.” (Santiago 1:22) Sa ibong nin paorootrong patanid kan grupong Juan, an saindang puso nasa usong mga gubing, kotse, asin harong, asin sa buhay na nakasentro sa pag-aling-aling asin kasingawan. (1 Timoteo 6:9, 10; 1 Juan 2:15-17) Ini gabos nagbubunga nin paglibog kan espirituwal na pagrisa. (Hebreo 5:11, 12) Imbes na magin daing kabuhaybuhay asin maimbong, kaipuhan na palaadon giraray ninda an “laad kan espiritu” asin magpaheling sinda nin nakakarepreskong pagkagalaga na ‘ihulit an tataramon.’—1 Tesalonica 5:19; 2 Timoteo 4:2, 5.
9. (a) Anong mga tataramon ni Jesus an maninigong makatanyog sa maimbong na mga Kristiano, asin taano? (b) Paano matatabangan kan kongregasyon an nalalagalag na mga “karnero”?
9 Ano an pagheling ni Jesus sa mga Kristianong maimbong? Maninigo na matanyog sinda kan saiyang prangkang mga tataramon: “Dai mo aram na ika miserable asin makaheherak asin dukha asin buta patin huba.” Bagol na an saindang konsensia sagkod sa punto na dai na ngani ninda narerealisar na grabe an kamugtakan ninda. (Ikomparar an Talinhaga 16:2; 21:2.) An seryosong kamugtakan na ini sa kongregasyon dai puedeng pagpalimanlimanan. Paagi sa pagtao nin marahay na halimbawa sa kaigotan asin paagi sa pagpapastor na may pagkamoot, tibaad mahimo kan kamagurangan asin kan iba na iinasignar ninda na pukawon an nalalagalag na mga “karnerong” ini tanganing makabalik an dati nindang kagayagayahan sa bilog na pusong paglilingkod.—Lucas 15:3-7.
Hatol sa ‘Pagyaman’
10. Ano an “bulawan” na sinasabi ni Jesus sa mga Kristiano sa Laodicea na bakalon sa saiya?
10 Igwa daw nin remedyo an makamomondong situwasyon sa Laodicea? Igwa, kun kukuyogon kan mga Kristianong idto an hatol ni Jesus: “Hinahatolan taka na bumakal sa sako nin bulawan na dinalisay sa kalayo tanganing magyaman ka.” (Kapahayagan 3:18a) Gigibohon sindang “mayaman sa Dios” kan tunay na “bulawan” na Kristiano, na dinalisay sa kalayo asin nahalean kan gabos na ati. (Lucas 12:21) Saen daw ninda mababakal an siring na bulawan? Bakong sa lokal na mga bangko kundi ki Jesus! Ipinaliwanag ni apostol Pablo kun ano an bulawan na iyan kan sabihan nia si Timoteo na pagbotan an mayayaman na Kristiano na “maggibo nin marahay, magin mayaman sa marahay na mga gibo, magin matinao, andam na manhiras, na nagririmpos para sa sainda man sana nin marahay na pasisikadan para sa ngapit.” Solamente paagi sa arog kaining pag-ubos kan saindang makakaya na sinda ‘makakapangapot nin marigon sa tunay na buhay.’ (1 Timoteo 6:17-19) Kinuyog kutana kan mayaman sa materyal na mga taga Laodicea an sadol ni Pablo asin sa siring nagin mayaman sa espirituwal.—Helingon man an Talinhaga 3:13-18.
11. Ano an mga halimbawa niato sa presenteng aldaw kan mga minabakal nin “bulawan na dinalisay sa kalayo”?
11 Igwa daw nin mga halimbawa sa presenteng aldaw kan mga minabakal nin “bulawan na dinalisay sa kalayo”? Igwa! Minsan kan nagdadangadang an aldaw kan Kagurangnan, an sadit na grupo nin mga estudyante sa Biblia napapagmata na sa pagigin falso kan dakol na Babilonikong katokdoan nin Kakristianohan, arog baga kan Trinidad, inmortalidad kan kalag, pagpasakit sa kalayo sa impierno, pagbautismo sa mga omboy, asin pagsamba sa mga imahen (kaiba na an krus asin imahen ni Maria). Sa pagsurog sa katotoohan kan Biblia, ibinalangibog kan mga Kristianong ini an Kahadean ni Jehova bilang an solamenteng paglaom nin katawohan asin an atang ni Jesus na pantubos bilang an basehan nin kaligtasan. Haros naeenot nin 40 taon, itinokdo ninda an 1914 bilang an taon na tinandaan sa propesiya kan Biblia na katapusan kan mga panahon kan mga Hentil, na may kaibang nakakakubhan na mga pangyayari digdi sa daga.—Kapahayagan 1:10; Lucas 21:24-26, King James Version.
12. Siisay an saro sa mga nangengenot kaidto sa napapagmatang mga Kristiano, asin paano sia nagtao nin pambihirang halimbawa sa pagtipon nin kayamanan sa langit?
12 Nangengenot sa napapagmatang mga Kristianong ini si Charles Taze Russell, na, kan enot na mga taon kan dekada 1870, nag-organisar nin sarong grupo sa pag-adal sa Biblia sa Allegheny (na ngonyan sakop na nin Pittsburgh), Pennsylvania, E.U.A. Kan ponan nia an saiyang paghanap kan katotoohan, si Russell kabakas kan saiyang ama asin madali nang magin milyonaryo. Alagad ta ipinabakal nia an saiyang kahirasan sa negosyong mga tindahan asin ginasto an saiyang kayamanan sa pagtabang na masustentohan an pag-anunsiar kan Kahadean nin Dios sa bilog na daga. Kan 1884 si Russell nagin an enot na presidente kan korporasyon na ngonyan inaapod na Watch Tower Bible and Tract Society of Pennsylvania. Kan 1916 nagadan sia sa sarong tren na harani sa Pampa, Texas, pasiring sa Nueva York, na kapoy-kapoy sa saiyang ultimong biahe sa paghuhulit sa parteng solnopan nin Estados Unidos. Nagtao sia nin pambihirang halimbawa sa pagtipon nin espirituwal na kayamanan sa langit, halimbawa na inaarog ngonyan nin ginatos na ribo nin mapagsakripisyong mga ministrong payunir.—Hebreo 13:7; Lucas 12:33, 34; ikomparar an 1 Corinto 9:16; 11:1.
Paglahid nin Espirituwal na Panlahid sa Mata
13. (a) Paano mapapakarhay nin espirituwal na panlahid sa mata an kamugtakan kan mga taga Laodicea? (b) Anong klaseng mga gubing an irinerekomendar ni Jesus, asin taano?
13 Tinawan man ni Jesus nin estriktong sadol an mga taga Laodiceang idto: “Bumakal [ka] . . . nin puting pan-ibabaw na mga gubing tanganing magkaigwa ka nin gubing asin tanganing dai mahayag an kasusupgan huli sa saimong kahubaan, asin nin panlahid sa mata na ilalahid sa saimong mga mata tanganing makaheling ka.” (Kapahayagan 3:18b) Maninigo sindang maghanap nin bolong sa saindang espirituwal na pagkabuta paagi sa pagbakal nin nakakaomay na panlahid sa mata, bakong an hale sa lokal na mga parabolong, kundi an klase na si Jesus sana an makakatao. Ini matabang sainda na magkaigwa nin espirituwal na pakabatid, na nakakatabang sainda na maglakaw sa “dana kan mga matanos” mantang nakakonsentrar an makinang nindang mga mata sa paggibo kan kabotan nin Dios. (Talinhaga 4:18, 25-27) Sa siring, an ikakasulot ninda, bakong an mamahalon na mga gubing na itom na lana na ginibo duman sa Laodicea, kundi an pinong “puting pan-ibabaw na mga gubing” na nagpapahayag kan saindang pagigin pribilehiadong mga parasunod ni Jesu-Cristo.—Ikomparar an 1 Timoteo 2:9, 10; 1 Pedro 3:3-5.
14. (a) Anong espirituwal na panlahid sa mata an yaon poon kan 1879? (b) Ano an pinakaginigikanan kan pinansial na suporta sa Mga Saksi ni Jehova? (c) Sa paggamit sa mga kontribusyon, paano napapalaen sa iba an Mga Saksi ni Jehova?
14 May makukua daw na espirituwal na panlahid sa mata sa presenteng mga panahon? Igwa nanggad! Kan 1879 pinonan ni Pastor Russell, na may pagpadangat na apod saiya, na ipublikar sa pagdepensa sa katotoohan an magasin na midbid ngonyan sa bilog na kinaban bilang an The Watchtower Announcing Jehovah’s Kingdom (sa Bicol, An Torrengbantayan Nagpapahayag kan Kahadean ni Jehova). Sa ikaduwang luwas kaiyan, sia nagsabi: “Kami nagtutubod na an nagsusuportar [sa magasin na ini] iyo si JEHOVA, asin mantang siring nungka na iyan makikilimos o maghahagad nin suporta sa mga tawo. Kun Sia na nagsasabi: ‘Sakuya an gabos na bulawan asin plata sa kabukidan,’ dai na magtao kan kinakaipuhan na pondo, sasaboton mi na panahon nang ipondo an pagpublikar.” An nagkapirang ebanghelisador sa telebisyon nakatipon nin kadakoldakol na kayamanan asin namuhay sa daing supog (asin kun beses inmoral) na luho. (Kapahayagan 18:3) Sa kabaliktaran, ginamit kan Mga Estudyante sa Biblia, na ngonyan midbid na Mga Saksi ni Jehova, an gabos na dai hinagad na kontribusyon sa pag-organisar asin pagpaoswag kan pambilog na kinaban na paghuhulit kan nagdadangadang na Kahadean ni Jehova. Sagkod sa aldaw na ini an grupong Juan an nagdidirehir sa pagpublikar kan The Watchtower asin Awake!, mga magasin na sa taon 2006 may pinag-ibang sirkulasyon na labing 59 milyones. An The Watchtower nasa mga 150 lenguahe. Iyan an opisyal na babasahon nin sarong kongregasyon na binibilog nin labing anom na milyon na Kristiano na naggamit kan espirituwal na panlahid sa mata tanganing mabukasan an saindang mata sa falsong relihion asin sa pagkaapurado kan paghuhulit kan maogmang bareta sa gabos na nasyon.—Marcos 13:10.
Pakikinabang sa Pagsagwe Asin Disiplina
15. Taano si Jesus ta nagtao nin mapuersang hatol sa mga Kristiano sa Laodicea, asin ano an maninigong magin reaksion dian kan kongregasyon?
15 Balikan niato an mga taga Laodicea. Ano an magigin reaksion ninda sa estriktong hatol hale ki Jesus? Maninigo daw na panluyahan sinda nin boot asin maghona na habo na ni Jesus na sinda magin saiyang mga parasunod? Dai, bako nanggad na siring. An mensahe nagpapadagos: “An gabos na padangat ko sinasagwe ko asin dinidisiplina. Kun siring magmaigot ka asin magsolsol.” (Kapahayagan 3:19) Arog kan disiplina hale ki Jehova, an disiplina ni Jesus tanda kan saiyang pagkamoot. (Hebreo 12:4-7) Maninigong aprobetsaran kan kongregasyon sa Laodicea an saiyang mapagpadangat na pagmakolog asin iaplikar an saiyang hatol. Maninigo sindang magsolsol, na minimidbid na pagkakasala an pagigin maimbong ninda. (Hebreo 3:12, 13; Santiago 4:17) Bayaan logod kan saindang kamagurangan an materyalistikong mga dalan asin “palaadon na siring sa kalayo” an balaog na inako ninda sa Dios. Paagi sa pag-epekto kan espirituwal na panlahid sa mata, logod na an gabos sa kongregasyon marepreskohan siring kan nakakarepreskong pag-inom nin malipot na tubig nin burabod.—2 Timoteo 1:6; Talinhaga 3:5-8; Lucas 21:34.
16. (a) Paano ipinapaheling ngonyan an pagkamoot asin kapadangatan ni Jesus? (b) Kun kita mag-ako nin mapuersang hatol, ano an maninigong magin reaksion niato?
16 Kumusta man kita ngonyan? Si Jesus padagos na ‘namomoot sa saiyang mga sadiri na yaon sa kinaban.’ Ini gigibohon nia “sa gabos na aldaw sagkod sa pagtatapos kan sistema nin mga bagay.” (Juan 13:1; Mateo 28:20) An saiyang pagkamoot asin kapadangatan ipinapaheling paagi sa grupong Juan sa presenteng aldaw asin sa mga bitoon, o kamagurangan, sa Kristianong kongregasyon. (Kapahayagan 1:20) Sa masakit na marhay na mga panahon na ini, an kamagurangan interesadong marhay na tabangan kita gabos, gurang asin aki, na makapagdanay sa laog kan teokratikong toril, na pinaglalabanan an pagkaindependiente, an materyalistikong kahanaban, asin an inmoral na ati kan kinaban. Kun kita may beses na nag-aako nin mapuersang hatol o disiplina, girumdomon na “an mga pagsagwe nin disiplina iyo an dalan nin buhay.” (Talinhaga 6:23) Kita gabos bakong sangkap asin maninigong magmaigot na magsolsol siring sa kinakaipuhan tangani na kita mapakarhay giraray asin magdanay sa pagkamoot nin Dios.—2 Corinto 13:11.
17. Paano an kayamanan puedeng magin peligroso para sa sato sa espirituwal?
17 Dai niato dapat na pagtogotan na gibohon kitang maimbong kan materyalismo, mga kayamanan, o kadaihan nin kayamanan. An kayamanan puedeng makatabang sa pagbubukas nin bagong mga posibilidad sa paglilingkod, alagad iyan puede man na magin peligroso. (Mateo 19:24) Tibaad maghona an sarong mayaman na dai nia kaipuhan na magin arog nin iba kaigot sa paghuhulit, basta magtao sia nin dakulang donasyon sa panapanahon. O tibaad maghona sia na huli ta sia mayaman dapat siang tawan nin mga pabor. Dugang pa, kadakol kan kasingawan asin aling-alingan na bukas sa sarong mayaman na dai kaya nin iba. Alagad an mga dibersion na iyan nakakaubos nin oras asin tibaad magin dahelan na an dai nagmamaan maparayo sa Kristianong ministeryo, sa siring ginigibong maimbong an bakong mapagmansay. Likayan logod niato an gabos na siod na iyan asin magpadagos kitang “nagpapagal asin naghihingoa” nin bilog na puso, na may paglaom sa buhay na daing katapusan.—1 Timoteo 4:8-10; 6:9-12.
‘Pakikipamanggi’
18. Anong oportunidad an itinatao ni Jesus sa mga Kristiano sa Laodicea?
18 Si Jesus nagpadagos sa pagsabi: “Uya! Nakatindog ako sa may pinto asin nagtutuktok. Kun an siisay man makadangog sa sakong tingog asin magbukas kan pinto, ako malaog sa saiyang harong asin makikipamanggi saiya asin sia sako.” (Kapahayagan 3:20) Kun aakoon sana si Jesus kan mga Kristianong taga Laodicea sa saindang kongregasyon, tatabangan nia sindang mapangganahan an saindang pagigin maimbong!—Mateo 18:20.
19. Ano an ipinapakahulogan ni Jesus kan sia manuga na makipamanggi sa kongregasyon sa Laodicea?
19 An pagsambit ni Jesus sa pamanggihan daing duwa-duwa na nagpagirumdom sa mga taga Laodicea kan mga panahon na sia nagkakan kaiba kan saiyang mga disipulo. (Juan 12:1-8) An siring na mga okasyon pirmeng nagtao nin espirituwal na mga bendisyon sa mga yaon. Siring man, may bantog na mga okasyon pagkabuhay liwat ni Jesus na sia yaon sa pagkakan kaiba kan saiyang mga disipulo, mga okasyon na nagpakosog na marhay sa sainda. (Lucas 24:28-32; Juan 21:9-19) Huli kaini, an saiyang panuga na pumaduman sa kongregasyon sa Laodicea asin makipamanggi sa sainda panuga na darahan sinda nin nagsosopay na espirituwal na mga pakinabang kun sia aakoon sana ninda.
20. (a) Sa pagpopoon kan aldaw kan Kagurangnan, ano an ibinunga kan pagigin maimbong kan Kakristianohan? (b) Paano nakaapektar sa Kakristianohan an paghokom ni Jesus?
20 An mamomoton na sadol ni Jesus sa mga taga Laodicea may dakulang kahulogan para sa natatadang linahidan na mga Kristiano ngonyan. Nagigirumdoman kan nagkapira sa sainda na, sa pagpopoon kan aldaw kan Kagurangnan, grabe kaimbong kan mga relihionista sa Kakristianohan. Imbes na ikaogma an pagbabalik kan satong Kagurangnan kan 1914, an saiyang klero napalabot sa garadanan kan Guerra Mundial I, na dian an 24 sa 28 nagraralaban na nasyon naghihingakong Kristiano. Abaa kadakula kan saindang pagkakasala sa dugo! Kan Guerra Mundial II, na sa pangenot pinaglabanan man sa Kakristianohan, an mga kasalan kan falsong relihion sa giraray ‘natambak abot sa langit.’ (Kapahayagan 18:5) Dugang pa, tinalikdan kan klero an nagdadangadang na Kahadean ni Jehova paagi sa pagsuportar sa Liga de Naciones, sa Naciones Unidas, asin sa nasyonalistiko, rebolusyonaryong mga mobimiento, na mayo man sa mga ini na makakaresolber sa mga problema nin katawohan. Haloy nang isinikwal ni Jesus an klero, na hinokoman sinda nin bakong paborable asin iinapon sinda, kun paanong iinaapon nin sarong parasira an dai nakakakan na mga sira na nadakop sa saiyang hikot. An miserableng kamugtakan kan mga iglesia nin Kakristianohan ngonyan nagpapatotoo sa paghokom na iyan sa saiya. An saiya logod na kaaabtan magserbing patanid sa sato!—Mateo 13:47-50.
21. Poon 1919 padagos, paano an mga Kristiano sa tunay na kongregasyon naghimate sa mga tataramon ni Jesus sa mga Kristiano sa Laodicea?
21 Dawa sa laog kan tunay na kongregasyon, may maimbong na mga indibiduwal na garo inomon na mayo nin init na nakakapabagsik ni lipot na nakakarepresko. Alagad may mainit na pagkamoot pa man giraray si Jesus sa saiyang kongregasyon. Yaon sia para sa mga Kristiano na mapag-istimar na naghihimate, asin dakol an nag-ako sa saiya, na garo sa sarong pamanggihan. Bilang resulta, poon 1919 padagos nabukasan an saindang mata sa kahulogan kan mga propesiya sa Biblia. Nag-agi sinda sa panahon nin dakulang kaliwanagan.—Salmo 97:11; 2 Pedro 1:19.
22. Anong pamanggihan sa ngapit an tibaad nasa isip ni Jesus, asin sairisay an makikikabtang dian?
22 Sa pakikipag-olay sa mga taga Laodicea, tibaad may saro pang pamanggihan na nasa isip si Jesus. Sa mas huring kabtang kan Kapahayagan satong mababasa: “Maogma idtong mga imbitado sa pamanggihan sa kasal kan Kordero.” Ini an mamuraway na bangkete nin kapangganahan bilang pag-omaw ki Jehova pakatapos na hokoman nia an falsong relihion—bangkete na pakikikabtangan ni Cristo asin kan saiyang nakompleto nang nobya nin 144,000 sa langit. (Kapahayagan 19:1-9) An naghimateng mga miembro kan suanoy na kongregasyon na iyan sa Laodicea—iyo, asin an maimbod na mga tugang ni Cristo Jesus ngonyan, na nagsusulot nin malinig na mga gubing na midbidan bilang tunay na linahidan na mga Kristiano—gabos makakan kaiba kan saindang Nobyo sa pamanggihan na iyan. (Mateo 22:2-13) Abaa kamapuersang pan-agyat na magmaigot asin magsolsol!
Sarong Trono Para sa mga Nakadaog
23, 24. (a) Ano pang dugang na balos an sinasabi ni Jesus? (b) Kasuarin tuminukaw si Jesus sa saiyang Mesiyanikong trono, asin kasuarin nia pinonan an paghokom sa naghihingakong mga Kristiano? (c) Ano an makangangalas na ipinanuga ni Jesus sa saiyang mga disipulo kan ponan nia an Memorial kan saiyang kagadanan?
23 Si Jesus nagtataram manongod sa dugang pang balos, na sinasabi: “An makadaog totogotan kong tumukaw kaiba ko sa sakong trono, kun paanong ako nakadaog asin tuminukaw kaiba kan sakong Ama sa saiyang trono.” (Kapahayagan 3:21) Bilang kaotoban kan mga tataramon ni David sa Salmo 110:1, 2, an nagdanay na may integridad na si Jesus, mantang nakadaog sa kinaban, binuhay liwat kan 33 C.E. asin ilinangkaw na tumukaw kaiba kan saiyang Ama sa Saiyang langitnon na trono. (Gibo 2:32, 33) Sa saro pang importanteng taon, 1914, si Jesus nagdatong tanganing tumukaw sa sadiri niang Mesiyanikong trono bilang Hade asin Hokom. An paghokom minalataw na nagpoon kan 1918 sa naghihingakong mga Kristiano. An linahidan na mga nakadaog na nagadan bago kaidto bubuhayon liwat sa panahon na iyan asin maiba ki Jesus sa saiyang Kahadean. (1 Pedro 4:17) Ipinanuga nia ini sa sainda kan ponan nia an Memorial kan saiyang kagadanan, na sinasabi sa saiyang mga disipulo: “Ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean, tanganing kamo kumakan asin uminom sa lamesa ko sa sakong kahadean, asin tumukaw sa mga trono tanganing maghokom sa doseng tribo nin Israel.”—Lucas 22:28-30.
24 Abaa kamakangangalas na asignasyon—an tumukaw kaiba kan nagrereynar na Hade sa panahon kan “paglalang liwat” asin tumabang sa saiya, basado sa saiyang sangkap na atang, sa pagdara kan kinaban nin makinuyog na katawohan sa Edenikong pagkasangkap! (Mateo 19:28; 20:28) Arog kan sinasabi sato ni Juan, ginigibo ni Jesus an mga nakadaog na magin “sarong kahadean, mga saserdote para sa saiyang Dios asin Ama,” tanganing tumukaw sa mga trono na nasa palibot kan mamuraway na trono ni Jehova sa langit. (Kapahayagan 1:6; 4:4) Logod na isapuso niato gabos—baga man kita kabilang sa linahidan o sa sosyedad kan bagong daga na naglalaom na makikabtang sa pagbabalik kan Paraiso—an mga tataramon ni Jesus sa mga taga Laodicea!—2 Pedro 3:13; Gibo 3:19-21.
25. (a) Kapareho kan naenot na mga mensahe, paano tinatapos ni Jesus an saiyang mensahe sa Laodicea? (b) Ano an maninigong magin reaksion kan indibiduwal na mga Kristiano ngonyan sa mga tataramon ni Jesus sa kongregasyon sa Laodicea?
25 Kapareho kan naenot na mga mensahe, an sarong ini tinatapos ni Jesus paagi sa mga tataramon nin pagsadol: “An may talinga magdangog sa sinasabi kan espiritu sa mga kongregasyon.” (Kapahayagan 3:22) Nasa poro na kita kan panahon kan katapusan. Napapalibotan kita nin ebidensia na an Kakristianohan malipot kun manongod sa pagkamoot. Sa kabaliktaran, logod na odok niatong himateon bilang tunay na mga Kristiano an mensahe ni Jesus sa kongregasyon sa Laodicea, iyo, an gabos na pitong mensahe kan satong Kagurangnan sa mga kongregasyon. Ini magigibo niato paagi sa pagkaigwa nin entusiastikong kabtang sa pag-otob sa dakulang propesiya ni Jesus para sa satong aldaw: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”—Mateo 24:12-14.
26. Noarin direktang mataram giraray si Jesus ki Juan, alagad sa ano sia nakikikabtang?
26 Tapos na an hatol ni Jesus sa pitong kongregasyon. Dai na sia nakipag-olay giraray ki Juan sa Kapahayagan sagkod sa ultimong kapitulo; alagad sia nakikikabtang sa dakol na bisyon, halimbawa, sa pag-implementar kan mga paghokom ni Jehova. Umiba kita ngonyan sa grupong Juan sa pagsiyasat sa ikaduwang pambihirang bisyon na ihinayag kan Kagurangnan na Jesu-Cristo.
[Nota sa Ibaba]
^ An mga lugar na ini nakotkot nin mga arkeologo sa lugar nin Laodicea.
[Mga Hapot Para sa Pag-adal]
[Kahon sa pahina 73]
Materyalismo Kontra sa Kadonongan
Kaidtong 1956, isinurat nin sarong kolumnista sa diaryo: “Kinakarkulo na kaidtong sanggatos na taon na an nakaagi an ordinaryong tawo may 72 na bagay na gusto, na an 16 dian ibinibilang na kaipuhan. Ngonyan, an ordinaryong tawo kinakarkulo na may 474 bagay na gusto, na an 94 dian ibinibilang na kaipuhan. Kaidtong sanggatos na taon na an nakaagi, 200 na bagay an may pangongombensir na ipinapabakal sa ordinaryong tawo—alagad ngonyan 32,000 na bagay an kaipuhan na paglabanan na bakalon. Pipira sana an kaipuhan nin tawo—daing katapusan an mga bagay na gusto nia.” Ngonyan, an mga tawo pinapaoranan kan ideya na an materyal na kayamanan asin mga rogaring iyo an nangongorog sa buhay. Sa siring, dakol an dai nag-iintindi sa madonong na sadol kan Eclesiastes 7:12: “An kadonongan para sa proteksion kun paanong an kuarta para sa proteksion; alagad an bentaha nin kaaraman iyo na iniingatan na buhay kan kadonongan an mga igwa kaiyan.”
[Ritrato sa pahina 67]
An tubig na minaabot sa Laodicea maimbong kaya bakong masiram. An mga Kristiano sa Laodicea may dai nakakakontentong maimbong na espiritu
