Kapitulo 3

Mga Bagay na Mangyayari Nanggad sa Dai Na Mahahaloy

1. Paano kamo puedeng makadulag sa paghokom nin Dios sa kinaban na ini?

 MANINIGO na kamo magin interesadong marhay sa mga nangyayari sa kinaban ngonyan. Taano man? Huli ta an kinaban na ini dai makakadulag sa paghokom nin Dios. Alagad kamo puedeng makadulag. Magigibo nindo ini paagi sa pagigin “bakong kabtang kan kinaban” na seguradong malalaglag. Dai ini nangangahulogan nin pagkaigwa nin simpleng-simple, garo sa monasteryong pamumuhay. Iyan nangangahulogan na mantang may nakakarahay, makahulogan na buhay, isinisiblag nindo an saindong sadiri sa politikal na karatan, sa mahanab na komersialismo, asin sa relihion na naglalapastangan sa Dios, saka sa madahas asin inmoral na gawe-gawe. Kadungan kaiyan, dapat na sunodon nindo an halangkaw na mga pamantayan nin Dios sa gawe-gawe asin maghingoa kamong otobon an saiyang kabotan. (Juan 17:14-16; Sofonias 2:2, 3; Kapahayagan 21:8) Ipinapaheling kan libro sa Biblia na Kapahayagan kun gurano kahalaga na kamo maghingoa sa mga bagay na ini, na ginigibo an kinakaipuhan na mga pagbago sa saindong pamumuhay.

2. Paano iiniintrodusir ni apostol Juan an mamuraway na propesiya sa Kapahayagan, asin kiisay itinao nin Dios an magabat na mensaheng ini?

² Iiniintrodusir ni apostol Juan an mamuraway na propesiyang ini paagi sa mga tataramon na: “Sarong kapahayagan ni Jesu-Cristo, na itinao sa saiya nin Dios, tanganing ipaheling sa saiyang mga oripon an mga bagay na mangyayari nanggad sa dai na mahahaloy.” (Kapahayagan 1:1a) Kaya an binuhay liwat na si Jesu-Cristo iyo an nag-ako kan magabat na mensaheng ini hale sa Dios. Imbes na kabtang nin sarong mistikong Trinidad, si Jesus ipinapaheling digdi na sakop kan saiyang Ama. Sa kaparehong paagi, an “mga oripon” na minakompuesto sa Kristianong kongregasyon sakop ni Jesu-Cristo, kaya sinda ‘padagos na nagsusunod sa saiya saen man sia magduman.’ (Kapahayagan 14:4; Efeso 5:24) Alagad siisay ngonyan an talagang “mga oripon” nin Dios, asin paano sinda nakikinabang sa Kapahayagan?

3. (a) Sairisay an “mga oripon” na sakop ni Jesu-Cristo? (b) Ano an ginigibo kan maimbod na “mga oripon” sa paggiya kan mga anghel?

³ Sinasabi ni apostol Juan, na nagsurat kan Kapahayagan, na sia siring na oripon. Sia an huring nagadan sa mga apostol asin saro sa pinili, linahidan-nin-espiritung grupo nin “mga oripon” na magmamana nin inmortal na buhay sa kalangitan. Ngonyan, pipira na sanang ribo an natatada sa mga ini digdi sa daga. An Dios igwa man nin ibang lingkod, sarong dakulang kadaklan, mga lalaki, babae, asin aki, na ngonyan minilyon na an kabilangan. Sa paggiya nin mga anghel, an mga ini nakikiiba sa linahidan na “mga oripon” sa pagpahayag kan daing katapusan na maogmang bareta sa gabos na tawo. Iinuubos nanggad kan gabos na “oripon” na ini an makakaya ninda tanganing matabangan an mga mahoyo sa daga na makanompong nin kaligtasan! (Mateo 24:14; Kapahayagan 7:9, 14; 14:6) Sinasabi kan Kapahayagan kun ano an dapat nindong gibohon tanganing makinabang kamo sa maogmang bareta.

4. (a) Mantang labi nang 1,900 na taon an nakaagi poon kan isurat ni Juan an Kapahayagan, paano sia makakapagtaram manongod sa “mga bagay na mangyayari nanggad sa dai na mahahaloy”? (b) Ano an ipinaparisa ngonyan kan ebidensia manongod sa mga bagay na ihinula?

⁴ Pero, paano nasabi ni Juan na ipapaheling sa  “mga oripon” na ini “an mga bagay na mangyayari nanggad sa dai na mahahaloy”? Bako daw na an mga tataramon na iyan itinaram kaidtong labi nang 1,900 na taon an nakaagi? Sa punto de vista ni Jehova, na sa saiyang pagheling an sangribong taon “garo sana an kasuodma,” an 1,900 na taon halipot na panahon kun ikokomparar sa binilyon na taon na ginamit nia sa paglalang asin pag-andam kan daga para sa pag-istar nin tawo. (Salmo 90:4) Si apostol Pablo nagsurat manongod sa saiya mismong “galagang paghalat asin paglaom,” ta sierto na an aktuwal na balos sa saiya garo baga haranihon na para sa saiya. (Filipos 1:20) Minsan siring, kadakol kan ebidensia ngonyan na an gabos na ihinula mangyayari nin nasa iskedyul. Dai pa noarin man nangyari sa kasaysayan na nakataya an mismong kaligtasan nin katawohan. Solamente an Dios an may solusyon!—Isaias 45:21.

Pinakapaagihan sa Pagkomunikar

5. Paano ipinaabot an Kapahayagan ki apostol Juan dangan sa mga kongregasyon?

⁵ An Kapahayagan 1:1b, 2 nagpapadagos: “Asin isinugo nia [ni Jesus] an saiyang anghel asin itinao iyan [an Kapahayagan] sa mga tanda paagi sa saiya sa saiyang oripon na si Juan, na nagpatotoo sa tataramon na itinao nin Dios asin sa patotoo na itinao ni Jesu-Cristo, patin sa gabos na bagay na saiyang naheling.” Sa siring, naresibi ni Juan an ipinasabong na rekord paagi sa sarong mensaherong anghel. Isinurat nia iyan sa sarong rolyo, na ipinapaabot iyan sa mga kongregasyon kan saiyang panahon. Marahay sana ta prineserbar iyan nin Dios para sa pagparigon sa boot kan haros 100,000 na kongregasyon kan saiyang sararong mga lingkod digdi sa daga ngonyan.

6. Ano an iinapod ni Jesus sa pinakapaagihan na gagamiton nia sa pagtao nin espirituwal na kakanon sa saiyang mga “oripon” ngonyan?

⁶ An Dios may pinakapaagihan sa pagkomunikar kan Kapahayagan kaidtong aldaw ni Juan, asin si Juan an daganon na kabtang kan pinakapaagihan na iyan. Siring man, an Dios may pinakapaagihan sa pagtao nin espirituwal na kakanon sa saiyang mga “oripon” ngonyan. Sa saiyang dakulang propesiya may labot sa pagtatapos kan sistema nin mga bagay, inapod ni Jesus an daganon na kabtang kan pinakapaagihan na ini bilang “an maimbod asin mapagmansay na oripon na ninombrahan kan saiyang kagurangnan na mamahala sa saiyang mga domestiko, tanganing magtao sa sainda kan saindang kakanon sa tamang panahon.” (Mateo 24:3, 45-47) Ginagamit nia an grupong Juan na ini sa pagbukas sa kahulogan kan propesiya.

7. (a) Paano kita maninigong maapektaran kan mga tanda na yaon sa Kapahayagan? (b) Gurano na kahaloy na nakikikabtang an nagkapira sa grupong Juan sa kaotoban kan mga bisyon sa Kapahayagan?

⁷ Isinurat ni apostol Juan na itinao ni Jesus an Kapahayagan “sa mga tanda,” o simbolo. An mga ini buhay na marhay asin nakakapukaw sa boot na siyasaton. An mga iyan naglaladawan nin dinamikong aktibidad asin maninigo man na magpahiro  sa sato na maigot na maghingoa sa pagpahayag sa iba kan propesiya asin kan kahulogan kaiyan. An Kapahayagan nagtatao sato nin dakol na bisyon na nagpapalaad nin boot, na sa kada saro kaiyan nakikabtang si Juan magsalang sa aktibong paagi o bilang nagmamasid. An mga kabilang sa grupong Juan, na an nagkapira dakol na dekada nang nakikikabtang sa kaotoban kan mga bisyon na ini, naoogma na binukasan kan espiritu nin Dios an kahulogan tanganing ikapaliwanag ninda iyan sa iba.

8. (a) Ano an napapalaen manongod sa kada saro sa mga bisyon sa Kapahayagan? (b) Paano kita tinatabangan kan propesiya sa Daniel na masabotan kun ano an mga hayop sa Kapahayagan?

⁸ An mga bisyon na ini sa Kapahayagan dai iinaatubang sa kronolohikong pagkasunodsunod. An lambang saro may sadiring panahon nin pagkaotob. An dakol sa mga bisyon inootro an mga tataramon nin mas naenot na mga propesiya na nagtatao nin giya sa interpretasyon kaiyan. Halimbawa, an propesiya ni Daniel naglaladawan sa apat na makatatakot na hayop, na ipinapaliwanag na an mga ini naglaladawan sa mga kapangyarihan na namamahala sa daga. Huli kaini, natatabangan kitang masabotan na an mga hayop sa Kapahayagan nagrerepresentar sa politikal na mga organisasyon, pati an mga nag-eeksister ngonyan.—Daniel 7:1-8, 17; Kapahayagan 13:2, 11-13; 17:3.

9. (a) Kapareho ni Juan, anong aktitud an ipinaheling kan grupong Juan? (b) Paano itinotokdo sato ni Juan kun paano magigin maogma?

⁹ Si Juan maimbod sa pagpatotoo sa mensahe na itinao sa saiya nin Dios paagi ki Jesu-Cristo. Isinaysay nia nin detalyado an “gabos na bagay na saiyang naheling.” An grupong Juan maigot na naghagad nin giya sa Dios asin ki Jesu-Cristo tanganing lubos na masabotan an propesiya asin ikapaaram sa banwaan nin Dios an nakatagong mga detalye kaiyan. Para sa kapakinabangan kan linahidan na kongregasyon (asin pati kan internasyonal na dakulang kadaklan na iingatan nin Dios na buhay sa dakulang kahorasaan), si Juan nagsurat: “Maogma an nagbabasa nin makosog asin an mga nagdadangog sa mga tataramon kan propesiyang ini, asin nag-ootob kan mga bagay na nasusurat dian; huli ta harani na an itinalaan na panahon.”—Kapahayagan 1:3.

10. Ano an dapat niatong gibohon mapadapit sa Kapahayagan tanganing magkamit nin kaogmahan?

¹⁰ Makikinabang kamo nin dakula sa pagbasa kan Kapahayagan asin orog na sa pagkuyog kan mga nasusurat dian. Ipinaliwanag ni Juan sa saro kan saiyang mga surat: “Ini iyo an boot sabihon kan pagkamoot sa Dios, na kuyogon niato an saiyang mga togon; pero an saiyang mga togon dai nakakapagabat, huli ta an gabos na namundag gikan sa Dios nakakadaog sa kinaban. Asin ini an kapangganahan na nakadaog sa kinaban, an satong pagtubod.” (1 Juan 5:3, 4) Puede kamong maogma nin labi-labi paagi sa pagkaigwa nin siring na pagtubod!

11. (a) Taano ta kaipuhan na marhay na kuyogon niato an mga tataramon kan propesiya? (b) Anong panahon an seguradong haranihon na ngonyan?

¹¹ Kaipuhan na marhay na kuyogon niato an mga tataramon kan propesiya, “huli ta harani na an itinalaan na panahon.” Itinalaan na panahon para sa ano? Para sa kaotoban kan mga propesiya sa Kapahayagan, kaiba an mga paghokom nin Dios. Harani na an panahon na gigibohon nin Dios asin ni Jesu-Cristo an pangultimong paghokom sa sistema ni Satanas sa kinaban. Kan si Jesus yaon digdi sa daga, sinabi nia na solamente an saiyang Ama an nakakaaram kan ‘aldaw na iyan o kan oras’ na iyan. Sa pagtanaw sa mga kariribokan na nagdakol sa daga sa satong aldaw, sinabi man ni Jesus: “An kapag-arakian na ini dai malihis sagkod na mangyari an gabos na bagay na ini.” Kaya seguradong haranihon na an itinalaan na panahon para sa pag-implementar kan desisyon nin Dios. (Marcos 13:8, 30-32) Arog kan sabi kan Habacuc 2:3: “An bisyon para sa itinalaan na panahon pa, asin iyan naghahangoshangos sagkod sa katapusan, asin dai iyan magpuputik. Dawa pa iyan maatraso, padagos iyan na halaton; huli ta iyan daing salto na maootob. Dai iyan mahuhuri.” An kaligtasan niato sa dakulang kahorasaan depende sa satong pagkuyog sa propetikong Tataramon nin Dios.—Mateo 24:20-22.

[Mga Hapot Para sa Pag-adal]

[Kahon sa pahina 15]

Tanganing masabotan an libro nin Kapahayagan kaipuhan niato na

● Akoon an tabang kan espiritu ni Jehova

● Mabatid kun kasuarin nagpoon an aldaw kan Kagurangnan

● Rekonoseron an maimbod asin mapagmansay na oripon ngonyan