Naheling ni Juan an Pinamuraway na si Jesus
Kapitulo 5
Naheling ni Juan an Pinamuraway na si Jesus
Bisyon 1—Kapahayagan 1:10–3:22
Tema: Siniyasat ni Jesus an espirituwal na Israel digdi sa daga asin nagtao sia nin mamomoton na pagparigon sa boot
Panahon nin kaotoban: An kabtang na ini kan aldaw kan Kagurangnan poon kan 1914 sagkod sa panahon na magadan asin buhayon liwat an ultimo sa maimbod na mga linahidan
1. Paano iinaatubang an enot na bisyon, asin paano ipinarisa ni Juan an panahon kan tunay na aplikasyon kaiyan?
AN ENOT na bisyon sa libro nin Kapahayagan minapoon sa kapitulo 1, bersikulo 10. An bisyon na ini, kapareho kan iba pa sa Kapahayagan, iiniintrodusir kan pagsabi na si Juan may nadangog o naheling na ekstraordinaryo. (Kapahayagan 1:10, 12; 4:1; 6:1) An enot na bisyon na ini iinaatubang sa kamugtakan kan enot na siglo na dian may mga mensahe na ipinadara sa pitong kongregasyon na nag-eksister kan panahon ni Juan. Alagad ta ipinaparisa ni Juan an panahon kan tunay na aplikasyon kaiyan sa pagsabi: “Paagi sa pasabong ako napasa aldaw kan Kagurangnan.” (Kapahayagan 1:10a) Noarin an “aldaw” na ini? May koneksion daw dian an dramatikong mga nangyayari sa maribok na mga panahon na ini? Kun igwa, maninigo kitang magtao nin maingat na atension sa propesiya, bilang may epekto sa sato mismong buhay—pati sa satong kaligtasan.—1 Tesalonica 5:20, 21.
Sa Aldaw kan Kagurangnan
2. Noarin mapoon an aldaw kan Kagurangnan, asin noarin iyan matatapos?
2 Sa anong panahon ibinubugtak kaini an kaotoban kan Kapahayagan? Bueno, ano an aldaw kan Kagurangnan? Inaapod iyan ni apostol Pablo na panahon nin paghokom asin pagkaotob kan mga panuga nin Dios. (1 Corinto 1:8; 2 Corinto 1:14; Filipos 1:6, 10; 2:16) Pag-abot kan “aldaw” na iyan, an marahayon na mga katuyohan ni Jehova progresibo asin mapangganang mag-aabante pasiring sa kulminasyon kaiyan. An “aldaw” na iyan nagpopoon sa pagkorona ki Jesus bilang langitnon na Hade. Dawa pakatapos na hokoman ni Jesus an kinaban ni Satanas, an aldaw kan Kagurangnan nagpapadagos, sa pagbabalik kan Paraiso asin sa paggibong sangkap sa katawohan, sagkod na sa katapustapusi “itao na [ni Jesus] an kahadean sa saiyang Dios asin Ama.” —1 Corinto 15:24-26; Kapahayagan 6:1, 2.
3. (a) Paano an propesiya ni Daniel manongod sa “pitong panahon” nakakatabang sato na masabotan kun noarin mapoon an aldaw kan Kagurangnan? (b) Anong mga pangyayari sa daga an nagpapatunay na an taon 1914 iyo an kapinonan kan aldaw kan Kagurangnan?
3 An kaotoban kan ibang mga propesiya sa Biblia nakakatabang sato na masabotan kun noarin mapoon an aldaw kan Kagurangnan. Halimbawa, ilinaladawan ni Daniel an pagpalod kan pamamahala kan dinastiya ni Hadeng David; pakalihis nin “pitong panahon” mamimidbid “na an Kaharohalangkawe iyo an Namamahala sa kahadean nin katawohan, asin na itinatao nia iyan sa saro na boot nia.” (Daniel 4:23, 24, 31, 32) An mayor na kaotoban kan propesiyang iyan nagpoon sa pagkagaba kan kahadean nin Juda, na ipinaparisa kan ebidensia sa Biblia na natapos kan Oktubre 607 B.C.E. Ipinapaheling kan Kapahayagan 12:6, 14 na an 3 1/2 panahon bale 1,260 aldaw; huli kaini, an pitong panahon (doble kan numerong iyan) bale 2,520 aldaw. Sa pagkuenta na an “sarong aldaw para sa sarong taon,” an nakukua niatong lawig kan “pitong panahon” 2,520 taon. (Ezequiel 4:6) Kun siring, pinonan ni Cristo Jesus an saiyang langitnon na pamamahala kaidtong huring kabtang kan 1914. An pagputok kan enot na guerra mundial kan taon na idto nagsenyalar kan “kapinonan kan mga kolog nin kasakitan” na nagpapadagos na magpasakit sa katawohan. Poon kan 1914, abaa kapambihira na pinapatunayan kan mga pangyayari sa dugoan na dagang ini na an taon na idto iyo an kapinonan kan “aldaw” kan presensia ni Jesus!—Mateo 24:3-14. *
4. (a) Ano an ipinaparisa mismo kan mga tataramon sa Kapahayagan kun noarin maootob an enot na bisyon? (b) Noarin matatapos an kaotoban kan enot na bisyon?
4 Huli kaini, an enot na bisyon na ini asin an hatol na yaon dian para sa aldaw kan Kagurangnan, magpoon kan 1914 padagos. An panahon na ini suportado kan bagay na, sa nahuhuring kabtang kan Kapahayagan, an rekord nagsasaysay kan paggibo kan tunay asin matanos na mga paghokom nin Dios—mga pangyayari na dian an Kagurangnan na Jesus may lataw na kabtang. (Kapahayagan 11:18; 16:15; 17:1; 19:2, 11) Kun an kaotoban kan enot na bisyon nagpoon kan 1914, noarin iyan matatapos? Arog kan ipinapaheling mismo kan mga mensahe, an organisasyon na pinapanongdan iyo an kongregasyon nin Dios na kompuesto kan mga linahidan digdi sa daga. Kun siring, an kaotoban kan enot na bisyon na ini matatapos kun an ultimong maimbod na miembro kan linahidan na kongregasyon na iyan magadan na asin ibangon na pasiring sa buhay sa langit. Minsan siring, an Aldaw kan Kagurangnan, na may mga bendisyon sa daganon na ibang mga karnero, magpapadagos sagkod sa katapusan kan Milenyal na Pamamahala ni Jesu-Cristo.—Juan 10:16; Kapahayagan 20:4, 5.
5. (a) Ano an ipinagibo ki Juan nin sarong tingog? (b) Taano an lugar kan “pitong kongregasyon” ta paborable sa pagpadara sa sainda nin rolyo?
5 Sa enot na bisyon na ini, bago may naheling si Juan, may nadangog sia: “Asin nakadangog ako sa likod ko nin makosog na tingog na siring kan sa trumpeta, na an sabi: ‘Isurat mo an saimong naheheling sa sarong rolyo asin ipadara mo iyan sa pitong kongregasyon, sa Efeso asin sa Smirna asin sa Pergamo asin sa Tiatira asin sa Sardis asin sa Filadelfia patin sa Laodicea.’” (Kapahayagan 1:10b, 11) May autoridad asin makosogon siring sa tanog nin trumpeta, may tingog na nagboot ki Juan na sumurat sa “pitong kongregasyon.” Sia mag-aako nin sunod-sunod na mensahe asin dapat na ipublikar nia an mga bagay na saiyang maheheling asin madadangog. Mangnohon na an mga kongregasyon na nasambitan digdi aktuwal na nag-eksister kan aldaw ni Juan. Iyan gabos yaon sa Asia Minor, kahampang kan Patmos sa ibong kan dagat. Pasil na dumanan an lambang saro sa sainda paagi sa marahay na mga tinampong Romano sa lugar na idto. An sarong mensahero dai masasakitan na darahon an rolyo hale sa sarong kongregasyon pasiring sa masunod. An pitong kongregasyon na ini kaagid kan sarong kabtang nin sarong sirkito kan mga Saksi ni Jehova sa presenteng aldaw.
6. (a) Ano an boot sabihon kan “mga nangyayari ngonyan”? (b) Taano ta makakasierto kita na an mga kamugtakan sa kongregasyon nin linahidan na mga Kristiano ngonyan seguradong nakakaagid sa kamugtakan kaidtong aldaw ni Juan?
6 An kadaklan na propesiya sa Kapahayagan maootob pakalihis kan panahon ni Juan. An mga iyan manongod sa “mga mangyayari pakatapos kaini.” Alagad an hatol sa pitong kongregasyon manongod sa “mga nangyayari ngonyan,” mga situwasyon na talagang yaon sa pitong kongregasyon kan panahon na idto. An mga mensahe mahahalagang pantabang sa maimbod na nombradong kamagurangan sa pitong kongregasyon na idto, patin sa gabos na iba pang kongregasyon nin linahidan na mga Kristiano kaidto. * Mantang an bisyon may pangenot na aplikasyon sa aldaw kan Kagurangnan, an isinabi ni Jesus nagpapaisi na an kaagid na mga kamugtakan maaasahan sa kongregasyon nin linahidan na mga Kristiano sa satong aldaw.—Kapahayagan 1:10, 19.
7. Siisay an naheling ni Juan sa enot na bisyon na ini, asin taano iyan ta mahalagang marhay asin nakakapukaw sa boot para sa sato ngonyan?
7 Sa enot na bisyon na ini, naheling ni Juan an makinang na Kagurangnan na Jesu-Cristo sa Saiyang langitnon na kamurawayan. May maorog pa daw kaangay kisa digdi para sa sarong libro nin mga propesiya na may koneksion sa dakulang aldaw kan Kagurangnan na ini na nombrado kan langit? Asin may mas mahalaga pa daw kisa digdi para sa sato, na nabubuhay ngonyan sa panahon na iyan asin maingat na naghihimate sa kada pagboot nia? Dugang pa, nakakapukaw nanggad sa boot na masierto kan mga parasuportar sa soberaniya ni Jehova na an Mesiyanikong Banhi, pakapagtagal nia sa gabos na pagbalo asin persekusyon na itinao ni Satanas asin pakapagtios nia nin makologon na kagadanan kan an Saiyang “bool” lugadon kaidtong haros 2,000 na taon na an nakaagi, buhay na ngonyan sa langit, na tinawan nin kapangyarihan na mapangganang taposon an marahayon na katuyohan nin Dios!—Genesis 3:15.
8. Para sa anong aksion na si Jesus andam ngonyan?
8 Malinaw na si Jesus andam na ngonyan na gumibo nin aksion bilang Hade na natutukaw sa trono. Sia ninombrahan bilang Pangenot na Parakastigo ni Jehova tanganing otobon an pangultimong mga paghokom ni Jehova tumang sa daan, marigsok na sistemang ini nin mga bagay asin sa diablong dios kaiyan, si Satanas. Yaon man sia tanganing hokoman an mga kabilang sa saiyang kongregasyon nin mga linahidan asin an dakulang kadaklan na saindang kairiba, saka hokoman an kinaban.—Kapahayagan 7:4, 9; Gibo 17:31.
9. (a) Paano ilinaladawan ni Juan an pinamuraway na si Jesu-Cristo sa tahaw kan mga kandelerong bulawan? (b) Ano an ipinaparisa kan garo sa templong kamugtakan asin kan sulot ni Jesus? (c) Ano an kahulogan kan saiyang hagkos na bulawan?
9 Sinalingoy ni Juan an pinaghalean kan makosog na tingog, asin iyo ini an saiyang naheling: “Nagsalingoy ako sa pagheling kun kiisay idtong tingog na nagtataram sa sako, asin, pagsalingoy ko, nakaheling ako nin pitong kandelerong bulawan.” (Kapahayagan 1:12) Sa huri, naaraman ni Juan kun ano an isinisimbolisar kan pitong kandelerong ini. Alagad ta an persona na nasa tahaw kan mga kandelero an nakaapod kan saiyang atension. “Sa tahaw kan mga kandelero may saro na kabaing nin aki nin tawo, na may sulot na gubing na sagkod sa bitis, asin may hagkos na sarong hagkos na bulawan sa daghan.” (Kapahayagan 1:13) Digdi, ipinapaheling ni Jesus, na “aki nin tawo,” an saiyang sadiri sa namungnan na saksi, si Juan, bilang kahangahanga, nagkikinang na persona. Sia maheheling na may nakakasulang kamurawayan sa tahaw nin naglalaad na mga kandelerong bulawan. An garo sa templong kamugtakan na ini nagdodoon ki Juan kan bagay na si Jesus presente sa katongdan na dakulang Halangkaw na Saserdote ni Jehova, na may kapangyarihan na maghokom. (Hebreo 4:14; 7:21-25) An saiyang halaba, kahangahangang gubing angay sa saiyang katongdan bilang saserdote. Kapareho kan Judiong halangkaw na mga saserdote kan suanoy, sia may hagkos—hagkos na bulawan sa saiyang daghan kun saen iyan nakakatahob sa saiyang puso. Ini nangangahulogan na ootobon nia nin bilog na puso an sugo sa saiya ni Jehova Dios.—Exodo 28:8, 30; Hebreo 8:1, 2.
10. (a) Ano an ipinaparisa kan garo niebe kaputing buhok asin naglalaad na mga mata ni Jesus? (b) Ano an kahulogan kan pagigin siring sa nagbabagang tanso kan mga bitis ni Jesus?
10 An paglaladawan ni Juan nagpapadagos: “Dugang pa, an saiyang payo asin an saiyang buhok maputi siring sa maputing balukag nin karnero, siring sa niebe, asin an saiyang mga mata siring sa laad nin kalayo.” (Kapahayagan 1:14) An saiyang buhok na garo niebe kaputi nagpaparisa nin kadonongan huli sa lawig nin buhay. (Ikomparar an Talinhaga 16:31.) Asin an saiyang naglalaad na mga mata nagpapaheling na sia marinisa, alisto, sa saiyang pagsiyasat, pagbalo, o pagpahayag nin kaanggotan. Pati an mga bitis ni Jesus nakaapod sa atension ni Juan: “Asin an saiyang mga bitis siring sa pinakintab na tanso kun nagbabaga sa horno; asin an saiyang tingog siring sa burak-busak nin dakol na katubigan.” (Kapahayagan 1:15) Sa bisyon, an mga bitis ni Jesus siring sa tanso, nagbabaga, makintab—tamang-tama para sa saro na naglalakaw nin may kaigotan asin may marahay na kamugtakan sa atubangan ni Jehova Dios. Dugang pa, mantang an mga bagay nin Dios parateng ilinaladawan nin bulawan sa Biblia, an mga bagay naman na sa tawo kun beses irinerepresentar nin tanso. * Kaya an nagbabagang mga bitis ni Jesus na siring sa pinakintab na tanso nagpapagirumdom sato kun gurano ‘kagayon’ kan saiyang mga bitis kan sia maglakaw sa ibabaw nin daga na naghuhulit kan maogmang bareta.—Isaias 52:7; Roma 10:15.
11. (a) Ano an ipinapagirumdom sato kan mamuraway na mga bitis ni Jesus? (b) Ano an ipinaparisa kan bagay na an tingog ni Jesus “siring sa burak-busak nin dakol na katubigan”?
11 Tunay nanggad, bilang sangkap na tawo, si Jesus kaidto may kamurawayan na risa kan mga anghel asin nin mga tawo. (Juan 1:14) An saiyang mamuraway na mga bitis nagpapagirumdom man sato na sia naglalakaw sa banal na lugar sa laog kan organisasyon ni Jehova, na dian sia an Halangkaw na Saserdote. (Ikomparar an Exodo 3:5.) Dugang pa, an saiyang tingog nag-aaningal na siring sa dakulaon, nag-uulakbong busay. Iyan nakakagulat, nakakapukaw nin may pagkangirhat na paggalang, na angay sana para sa saro na opisyal na inaapod na Tataramon nin Dios, an saro na madigdi tanganing “hokoman an ineerokan na daga sa katanosan.”—Gibo 17:31; Juan 1:1.
12. Ano an kahulogan kan “matarom, halabang espada na may duwang tarom”?
12 “Asin kapot nia sa saiyang toong kamot an pitong bitoon, asin nagluluwas sa saiyang ngoso an sarong matarom, halabang espada na may duwang tarom, asin an saiyang lalauogon siring sa saldang kun iyan nagliliwanag sa kakosogan kaiyan. Asin kan maheling ko sia, garo gadan akong natumba sa saiyang pamitisan.” (Kapahayagan 1:16, 17a) Paghaloyhaloy ipinaliwanag mismo ni Jesus an kahulogan kan pitong bitoon. Alagad mangnoha kun ano an nagluluwas sa saiyang ngoso: “sarong matarom, halabang espada na may duwang tarom.” Kanigoan kaangay kan aspektong ini! Huli ta si Jesus an ninombrahan na magpahayag kan pangultimong mga paghokom ni Jehova tumang sa Saiyang mga kaiwal. An dai mapagdududahan na mga tataramon hale sa saiyang ngoso nagbubunga kan paggadan sa gabos na marigsok.—Kapahayagan 19:13, 15.
13. (a) An maliwanag, nagkikinang na lalauogon ni Jesus nagpapagirumdom sato nin ano? (b) Ano an pangkagabsan na impresyon na nakukua niato sa pagkaladawan ni Juan ki Jesus?
13 An maliwanag, nagkikinang na lalauogon ni Jesus nagpapagirumdom sato na an lalauogon ni Moises nagsinag pakatapos na makipag-olay sa saiya si Jehova sa Bukid nin Sinai. (Exodo 34:29, 30) Girumdomon man na kan si Jesus magkaigwa nin transpigurasyon sa atubangan kan tolo sa saiyang mga apostol kaidtong haros 2,000 na taon na an nakaagi, “an saiyang lalauogon nagliwanag na siring sa saldang, asin an saiyang pan-ibabaw na mga gubing nangintab na siring sa liwanag.” (Mateo 17:2) Ngonyan, sa pagrepresentar ki Jesus sa bisyon durante kan aldaw kan Kagurangnan, an saiyang lalauogon nagpapabanaag man kan makinang na kamurawayan nin saro na uminatubang ki Jehova. (2 Corinto 3:18) An totoo, an pangkagabsan na impresyon na itinatao kan bisyon ni Juan iyo an kinang nin kamurawayan. Magpoon sa buhok na garo niebe kaputi, sa mga matang naglalaad, asin sa lalauogon na nagliliwanag sagkod sa mga bitis na nagbabaga, iyan daing kabaing na bisyon kan Saro na nag-eerok ngonyan “sa dai maranihan na liwanag.” (1 Timoteo 6:16) Buhay na buhay an pagigin garo tunay kan eksenang ini! Ano an nagin reaksion kan namungnan na si Juan? Sinasabi sato kan apostol: “Asin kan maheling ko sia, garo gadan akong natumba sa saiyang pamitisan.”—Kapahayagan 1:17.
14. Ano an maninigong magin epekto sa sato kun binabasa niato an bisyon ni Juan sa pinamuraway na si Jesus?
14 Ngonyan, huli sa magayon, detalyadong paglaladawan kan bisyon ni Juan, an bilog na banwaan nin Dios nakakamate nin odok sa pusong pag-apresyar. Ngonyan, inagihan na niato an labing 90 taon kan aldaw kan Kagurangnan, na sa laog kaiyan an bisyon nagpapadagos na magkaigwa kan nakakapukaw sa boot na kaotoban kaiyan. Para sa sato an pamamahala ni Jesus sa Kahadean nagpupunsionar, tunay na nangyayari sa presente, bakong sarong paglaom sa ngapit. Huli kaini, tama sana para sa sato bilang maimbod na mga sakop kan Kahadean na humeling pang may pagngalas sa ilinaladawan ni Juan sa enot na bisyon na ini asin makinuyog na maghinanyog sa mga tataramon kan pinamuraway na si Jesu-Cristo.
[Mga Nota sa Ibaba]
^ Para sa detalyadong paliwanag, helingon an librong Ano Man Nanggad an Itinotokdo kan Biblia?, pahina 88-92, 215-18, na ipinublikar kan Mga Saksi ni Jehova.
^ Kan enot na siglo, kun an sarong kongregasyon nakaresibi nin sarong surat hale sa sarong apostol, kaugalean nang ilibot an surat sa ibang kongregasyon tanganing an gabos makinabang sa hatol.—Ikomparar an Colosas 4:16.
^ An mga dekorasyon asin kasangkapan sa laog kan templo ni Salomon gibo sa bulawan o nakakalupkupan kaiyan, mantang tanso an ginamit sa mga kasangkapan sa patyo.—1 Hade 6:19-23, 28-35; 7:15, 16, 27, 30, 38-50; 8:64.
[Mga Hapot Para sa Pag-adal]
[Mga ritrato sa pahina 23]
An rekord kan Biblia kinokompirmar kan arkeolohikong mga tada kan mga siudad na yaon duman kaidto an pitong kongregasyon. Sa mga lugar na ini naresibi kan mga Kristiano kan enot na siglo an nakakaparigon sa boot na mga mensahe ni Jesus na nagpapahiro ngonyan sa pambilog na kinaban na kongregasyon
PERGAMO
SMIRNA
TIATIRA
SARDIS
EFESO
FILADELFIA
LAODICEA
