“Padagos Mong Pangaptan nin Higot an Yaon Saimo”
Kapitulo 12
“Padagos Mong Pangaptan nin Higot an Yaon Saimo”
FILADELFIA
1. An ikaanom na mensahe ni Jesus para sa kongregasyon na yaon sa anong siudad, asin ano an kahulogan kan ngaran kan siudad na iyan?
KAPADANGATAN NA SA MAGTURUGANG—kanigoan karahay na kualidad! Daing duwa-duwa na ini an nasa isip ni Jesus kan itao nia an ikaanom niang mensahe, na para sa kongregasyon sa Filadelfia, huli ta an ngaran na iyan nangangahulogan “Kapadangatan na sa Magturugang.” Nagigirumdoman pa kan gurang nang si Juan an pangyayari, na labi nang 60 taon an nakaagi, kan si Pedro tolong beses na mag-insistir ki Jesus na sia, si Pedro, may mainit na kapadangatan para sa saiyang Kagurangnan. (Juan 21:15-17) Nagpapaheling man daw nin kapadangatan na sa magturugang an mga Kristiano sa Filadelfia? Minalataw na iyo!
2. Anong klaseng siudad an Filadelfia, anong klaseng kongregasyon an yaon duman, asin ano an sinasabi ni Jesus sa anghel kan kongregasyon na ini?
2 Mga 50 kilometros sa parteng timog-sirangan nin Sardis (sa lugar kan presenteng siudad nin Alasehir sa Turkiya), an Filadelfia kan aldaw ni Juan medyo asensadong siudad. Minsan siring, mas pambihira an prosperidad kan Kristianong kongregasyon duman. Segurado na kanigoan an kagayagayahan nindang akoon an ministro na nagbiahe pasiring sa sainda, na posibleng nag-agi sa Sardis! An dara niang mensahe may nakakapukaw na sadol sa sainda. Alagad primero iyan nagtataram manongod sa autoridad kan bantog na Nagpadara kaiyan. Sia nagsasabi: “Asin sa anghel kan kongregasyon sa Filadelfia sumurat ka: Iyo ini an mga bagay na sinasabi nia na banal, nia na totoo, na igwa kan liabe ni David, na nagbubukas asin mayo nin siisay man na makakapinto, patin minapinto asin mayo nin siisay man na makakabukas.”—Kapahayagan 3:7.
3. Taano ta angay na si Jesus apodon na “banal,” asin paano masasabi na sia “totoo”?
3 Si Pedro nadangog ni Juan na nagsabi sa tawong si Jesu-Cristo: “Yaon sa saimo an mga tataramon nin buhay na daing katapusan; asin kami nagtubod asin nakaaram na ika iyo an Banal nin Dios.” (Juan 6:68, 69) Mantang si Jehova Dios an pinakasangkap na halimbawa nin kabanalan, an saiyang bugtong na Aki kaipuhan man na magin “banal.” (Kapahayagan 4:8) “Totoo” man si Jesus. An termino sa Griego na ginamit digdi (a·le·thi·nosʹ) nagpaparisa nin pagigin tunay. Sa sentidong ini, si Jesus iyo an tunay na liwanag asin an tunay na tinapay na naghilig hale sa langit. (Juan 1:9; 6:32) Sia an tunay na poon nin ubas. (Juan 15:1) Totoo man si Jesus sa sentido na sia mapagtitiwalaan. Pirme siang nagtataram kan katotoohan. (Helingon an Juan 8:14, 17, 26.) An Aking ini nin Dios tunay na maninigo na maglingkod bilang Hade asin Hokom.—Kapahayagan 19:11, 16.
An “Liabe ni David”
4, 5. Sa anong tipan konektado an “liabe ni David”?
4 Si Jesus igwa kan “liabe ni David.” Sa paggamit kaiyan, sia “nagbubukas asin mayo nin siisay man na makakapinto, patin minapinto asin mayo nin siisay man na makakabukas.” Ano an “liabe ni David” na ini?
5 Ki Hadeng David kan Israel na si Jehova nakipagtipan para sa sarong daing katapusan na kahadean. (Salmo 89:1-4, 34-37) An dinastiya ni David namahala gikan sa trono ni Jehova sa Jerusalem magpoon 1070 sagkod 607 B.C.E., alagad ta hinokoman nin Dios an kahadean na idto huli ta iyan nagin marigsok. Sa siring pinonan na otobon ni Jehova an saiyang propesiya sa Ezequiel 21:27: “Gagabaon ko, gagabaon ko, gagabaon ko iyan [an daganon na Jerusalem]. Asin kun dapit man kaini, dai nanggad iyan [an setro nin pagkahade sa dinastiya ni David] magigin sadiri nin siisay man sagkod na magdatong sia na igwa kan legal na deretso, asin iyan itatao ko sa saiya.”
6, 7. Noarin asin paano malataw an saro na may “legal na deretso”?
6 Noarin asin paano malataw an sarong ini na may “legal na deretso”? Paano itatao sa saiya an setro kan kahadean ni David?
7 Pakalihis nin mga 600 na taon, an sarong gikan ni Hadeng David, an daragang Judia na si Maria, nagbados paagi sa banal na espiritu. Isinugo nin Dios an anghel na si Gabriel tanganing paaramon si Maria na sia mangangaki nin lalaki, na ngangaranan nin Jesus. Idinugang ni Gabriel: “An sarong ini magigin dakula asin aapodon na Aki kan Kaharohalangkawe; asin itatao sa saiya ni Jehova Dios an trono ni David na saiyang ama, asin sia mamamahala bilang hade sa kamag-anakan ni Jacob sagkod lamang, asin dai magkakaigwa nin katapusan an saiyang kahadean.”—Lucas 1:31-33.
8. Paano pinatunayan ni Jesus na sia kualipikadong magmana kan pagkahade ni David?
8 Kan si Jesus bautismohan sa Salog nin Jordan asin lahidan nin banal na espiritu kaidtong 29 C.E., sia nagin Designadong Hade sa dinastiya ni David. Nagpaheling sia nin arogan na kaigotan sa paghuhulit kan maogmang bareta kan Kahadean asin isinugo nia an saiyang mga disipulo na maghulit man. (Mateo 4:23; 10:7, 11) Nagpakumbaba si Jesus, sagkod pa ngani sa kagadanan sa sarong hariging pasakitan, sa siring pinapatunayan na sia biyong kualipikado na magmana kan pagkahade ni David. Si Jesus binuhay liwat ni Jehova bilang inmortal na espiritu asin ilinangkaw sia sa Saiyang toong kamot sa kalangitan. Duman minana nia an gabos na deretso sa kahadean ni David. Sa itinalaan na panahon gagamiton ni Jesus an saiyang deretso na ‘mandaog sa tahaw kan saiyang mga kaiwal.’—Salmo 110:1, 2; Filipos 2:8, 9; Hebreo 10:13, 14.
9. Paano na ginagamit ni Jesus an liabe ni David sa pagbukas asin pagpinto?
9 Mientras tanto gagamiton ni Jesus an liabe ni David, na binubukasan an mga oportunidad asin pribilehio may koneksion sa Kahadean nin Dios. Paagi ki Jesus, kakaldahon ngonyan ni Jehova an linahidan na mga Kristiano sa daga “hale sa autoridad kan kadikloman,” na ibinabalyo sinda “sa kahadean kan Aki na saiyang namomotan.” (Colosas 1:13, 14) Gagamiton man an liabe tanganing dai palaogon sa siring na mga pribilehio an siisay man na dai nagin maimbod. (2 Timoteo 2:12, 13) Mantang an permanenteng paramanang ini sa kahadean ni David igwa kan pagsuportar ni Jehova, mayo nin linalang na makakaolang sa saiya sa pag-otob kan mga katongdan na iyan.—Ikomparar an Mateo 28:18-20.
10. Anong pagparigon sa boot an itinatao ni Jesus sa kongregasyon sa Filadelfia?
10 Mantang gikan sa siring kamasasarigan na pinaghalean, seguradong nakakarangang marhay an mga tataramon ni Jesus sa mga Kristiano sa Filadelfia! Inomaw nia sinda, na sinasabi: “Aram ko an saimong mga gibo—uya! ibinugtak ko sa atubangan mo an sarong bukas na pinto, na mayo nin siisay man na makakapinto—na igwa ka nin kadikit na kapangyarihan, asin inotob mo an sakong tataramon asin dai mo pinagnegaran an sakong ngaran.” (Kapahayagan 3:8) Aktibo an kongregasyon, asin may nabukasan na pinto sa atubangan kaiyan—daing duwa-duwa na sarong pinto nin oportunidad para sa ministeryal na paglilingkod. (Ikomparar an 1 Corinto 16:9; 2 Corinto 2:12.) Kun siring, pinaparigon ni Jesus an boot kan kongregasyon na lubos na aprobetsaran an oportunidad na maghulit. Sinda nagtagal asin nagpaheling na sinda may igong kapangyarihan, sa tabang kan espiritu nin Dios, na magpadagos sa orog pang “mga gibo” sa paglilingkod ki Jehova. (2 Corinto 12:10; Zacarias 4:6) Kinuyog ninda an mga pagboot ni Jesus asin dai pinagnegaran si Cristo, sa tataramon man o sa gawe-gawe.
“Maduko Sinda sa Saimo”
11. Anong bendisyon an ipinapanuga ni Jesus sa mga Kristiano, asin paano ini naotob?
11 Huli kaini, pinapanugaan sinda ni Jesus nin bunga: “Uya! Itatao ko an mga gikan sa sinagoga ni Satanas na nagsasarabing sinda Judio, alagad ta bako man kundi nagpuputik—uya! papadolokon ko sinda asin papahuruhodon sa saimong pamitisan asin ipapaaram ko sa sainda na ika namotan ko.” (Kapahayagan 3:9) Seguro, arog sa Smirna, an kongregasyon nagkaigwa nin mga problema sa lokal na mga Judio. An mga ini inaapod ni Jesus na “sinagoga ni Satanas.” Minsan siring, an kisuerra nagkapira sa mga Judiong iyan madali nang makarealisar na an ihinuhulit kan mga Kristiano manongod ki Jesus iyo an katotoohan. An saindang ‘paghuruhod’ posibleng sa paagi na sinasabi ni Pablo sa 1 Corinto 14:24, 25, kaya sinda aktuwal na magsosolsol asin magigin mga Kristiano, na lubos na pinapahalagahan an dakulang pagkamoot ni Jesus sa pagtao dawa kan saiyang kalag para sa saiyang mga disipulo.—Juan 15:12, 13.
12. Taano an mga miembro kan sinagoga nin mga Judio sa Filadelfia ta posibleng mabigla na maaraman na an iba sa sainda “maduko” sa lokal na Kristianong komunidad?
12 An mga miembro kan sinagoga nin mga Judio sa Filadelfia posibleng mabigla na maaraman na an iba sa sainda ‘mahuruhod’ sa lokal na Kristianong komunidad. Huli sa bagay na siertong dakol an bakong Judio sa kongregasyon na iyan, lalaoman ninda na kabaliktaran kaini an mangyari. Taano? Huli ta si Isaias naghula: “An mga hade [na bakong Judio] magigin mga paraataman sa saimo [an banwaan nin Israel], asin an saindang mga prinsesa magigin nagpapasusong mga paraaling para sa saimo. Maduko sinda sa saimo na an lalauogon sa daga.” (Isaias 49:23; 45:14; 60:14) Kaagid kaiyan, si Zacarias pinasabngan na sumurat: “Mangyayari sa mga aldaw na iyan na an sampulong tawo [na bakong Judio] hale sa gabos na lenguahe kan mga nasyon makarapot, iyo, sinda totoong makarapot sa gayad kan gubing nin sarong tawo na Judio, na nagsasarabi: ‘Maiba kami sa saindo, huli ta nabaretaan niamo na an Dios yaon dian sa saindo.’” (Zacarias 8:23) Iyo, an mga bakong Judio maduko sa mga Judio, bakong an kabaliktaran!
13. Sairisay an mga Judio na makakaeksperyensia nin kaotoban kan mga propesiya na sinabi sa suanoy na Israel?
13 An mga propesiyang iyan sinabi sa piniling nasyon nin Dios. Kan iyan itaram, an Israel sa laman an nasa onradong kamugtakan na iyan. Alagad kan an Mesiyas isikwal kan nasyon na Judio, isinikwal sinda ni Jehova. (Mateo 15:3-9; 21:42, 43; Lucas 12:32; Juan 1:10, 11) Kan Pentecostes 33 C.E., pinili nia bilang karibay ninda an tunay na Israel nin Dios, an Kristianong kongregasyon. An mga miembro kaiyan iyo an espirituwal na mga Judio na may tunay na pagkaturi kan puso. (Gibo 2:1-4, 41, 42; Roma 2:28, 29; Galacia 6:16) Poon kaidto, an solamenteng paagi na an indibiduwal na mga Judio sa laman makakabalik sa inooyonan na relasyon ki Jehova iyo an pagtubod ki Jesus bilang an Mesiyas. (Mateo 23:37-39) Minalataw na ini madali nang mangyari sa nagkapirang indibiduwal sa Filadelfia. *
14. Paano an Isaias 49:23 asin Zacarias 8:23 nagkaigwa nin dakulaon na kaotoban sa presenteng mga panahon?
14 Sa presenteng mga panahon, an mga propesiya na arog kan Isaias 49:23 asin Zacarias 8:23 nagkaigwa nin dakulaon na kaotoban. Bilang bunga kan paghuhulit kan grupong Juan, an dakol na tawo naglaog sa bukas na pinto pasiring sa paglilingkod sa Kahadean. * An kadaklan kaini nagluwas sa Kakristianohan, na an mga relihion putik na naghihingakong iyo an espirituwal na Israel. (Ikomparar an Roma 9:6.) Bilang dakulang kadaklan, hinuhugasan kan mga ini an saindang gubing asin pinapaputi iyan paagi sa pagtubod sa atang na dugo ni Jesus. (Kapahayagan 7:9, 10, 14) Sa pagkuyog sa pamamahala ni Cristo sa Kahadean, sinda naglalaom na magmana kan mga bendisyon kaiyan digdi sa daga. Sinda minadolok sa linahidan na mga tugang ni Jesus asin ‘minaduko’ sa sainda, sa espirituwal na pagtaram, huli ta ‘nabaretaan ninda na an Dios yaon dian sa sainda.’ Sinda naglilingkod sa mga linahidan na ini, na nagigin kasararo ninda sa sarong lakop sa kinaban na kasararoan nin mga tugang.—Mateo 25:34-40; 1 Pedro 5:9.
An “Oras nin Pagbalo”
15. (a) Ano an ipinanuga ni Jesus sa mga Kristiano sa Filadelfia, asin pinarigon an boot ninda na gibohon an ano? (b) Anong “korona” an linalaoman na akoon kan mga Kristiano?
15 Si Jesus nagpapadagos sa pagsabi: “Huli ta iningatan mo an tataramon manongod sa sakong pakatagal, iingatan taka man sa oras nin pagbalo, na madatong sa bilog na ineerokan na daga, tanganing baloon an mga nag-eerok sa ibabaw kan daga. Madatong akong madali. Padagos mong pangaptan nin higot an yaon saimo, tanganing mayo nin magkua kan saimong korona.” (Kapahayagan 3:10, 11) Minsan ngani an mga Kristiano kan aldaw ni Juan dai mabubuhay sagkod sa aldaw kan Kagurangnan (poon kan 1914), an saindang pagsarig na si Jesus madatong matao sainda nin kapangyarihan na magpadagos sa paghuhulit. (Kapahayagan 1:10; 2 Timoteo 4:2) An “korona,” o premyong buhay na daing katapusan, naghahalat sa sainda sa langit. (Santiago 1:12; Kapahayagan 11:18) Kun sinda maimbod sagkod sa kagadanan, mayo nin siisay man na makakaolang sa pag-ako ninda kan balos na iyan.—Kapahayagan 2:10.
16, 17. (a) Ano an “oras nin pagbalo, na madatong sa bilog na ineerokan na daga”? (b) Ano an kamugtakan kan mga linahidan sa pagpopoon kan “oras nin pagbalo”?
16 Alagad ta ano an “oras nin pagbalo”? Daing duwa-duwa, kinaipuhan na atubangon kan mga Kristianong idto sa Asia an dugang pang teribleng pagpersegir kan imperyal na Roma. * Minsan siring, an mayor na kaotoban iyo an oras nin pagsaligsig asin paghokom na sa katapustapusi nag-abot sa aldaw kan Kagurangnan, na an kulminasyon poon kan 1918 padagos. An pagbalo sa katuyohan na determinaran kun baga an saro para sa napatindog nang Kahadean nin Dios o para sa kinaban ni Satanas. Iyan sa laog nin medyo halipot sanang panahon, sarong “oras,” alagad dai pa tapos iyan. Sagkod na iyan matapos, dapat na dai niato noarin man paglingawan na kita nabubuhay sa “oras nin pagbalo.”—Lucas 21:34-36.
17 Kan 1918 an grupong Juan na kompuesto nin linahidan na mga Kristiano—kapareho kan maimbod na kongregasyon na idto sa Filadelfia—kinaipuhan na umatubang sa pagtumang kan “sinagoga ni Satanas” sa presenteng aldaw. Tusong minaniobra kan mga namomoon sa mga relihion nin Kakristianohan, na naghingakong espirituwal na mga Judio, an mga namamahala na olangon an tunay na mga Kristiano. Minsan siring, an mga ini naghingoang marhay na ‘ingatan an tataramon manongod sa pakatagal ni Jesus’; huli kaini, paagi sa espirituwal na tabang, na mahalagang “kadikit na kapangyarihan,” sinda nakaligtas asin napukaw na lumaog sa pinto na ngonyan nabukasan sa atubangan ninda. Sa anong paagi?
“Sarong Bukas na Pinto”
18. Anong pagnombra an ginibo ni Jesus kan 1919, asin paano an ninombrahan nagin arog kan maimbod na mayordomo ni Ezequias?
18 Kan 1919 inotob ni Jesus an saiyang panuga asin rinekonoser an sadit na grupo nin tunay na linahidan na mga Kristiano bilang saiyang “maimbod asin mapagmansay na oripon.” (Mateo 24:45-47) An mga ini naglaog sa sarong pribilehio na nakakaagid sa nakamtan kan maimbod na mayordomong si Eliaquim kan panahon ni Hadeng Ezequias. * Si Jehova nagsabi manongod ki Eliaquim: “Ibubugtak ko an liabe kan dinastiya ni David sa saiyang abaga, asin sia mabukas na mayo nin siisay man na mapinto, asin sia mapinto na mayo nin siisay man na mabukas.” Si Eliaquim nagsaabaga nin magabat na mga paninimbagan para ki Ezequias, an hadeng aki ni David. Siring man ngonyan, an linahidan na grupong Juan binugtakan kan “liabe kan dinastiya ni David” sa abaga kaiyan sa bagay na iyan pinaniwalaan kan intereses kan Mesiyanikong Kahadean digdi sa daga. Pinakosog ni Jehova an saiyang mga lingkod para sa pribilehiong ini, na dinadagdagan an kadikit nindang kapangyarihan na magin dinamikong enerhiya na bastante para sa mahiwason na pagpatotoo sa bilog na globo.—Isaias 22:20, 22; 40:29.
19. Paano inasikaso kan grupong Juan an mga paninimbagan na itinao sainda ni Jesus kan 1919, asin may anong resulta?
19 Magpoon kan 1919 pinonan kan linahidan na natatada an sarong entusiastikong kampanya nin lakop na pagpapahayag kan maogmang bareta kan Kahadean, sa pag-arog sa halimbawa ni Jesus. (Mateo 4:17; Roma 10:18) Bilang resulta, an nagkapira sa sinagoga ni Satanas sa presenteng panahon, an Kakristianohan, nagdolok sa linahidan na natatadang ini, nagsolsol asin ‘duminuko,’ na rinerekonoser an autoridad kan oripon. Sinda naglingkod man ki Jehova kasararo kan mas gurang na mga miembro kan grupong Juan. Ini nagpadagos sagkod na matipon an bilog na kabilangan kan linahidan na mga tugang ni Jesus. Pagkatapos kaini, “an sarong dakulang kadaklan . . . hale sa gabos na nasyon” nagdolok tanganing ‘dumuko’ sa linahidan na oripon. (Kapahayagan 7:3, 4, 9) An oripon asin an dakulang kadaklan na ini magkaibanan na naglilingkod bilang an sarong aripompon kan Mga Saksi ni Jehova.
20. Taano an mga Saksi ni Jehova ngonyan ta dapat na magin espesyalmenteng makosog sa pagtubod asin aktibo sa paglilingkod sa Dios?
20 Sararo kapareho kan mga Kristiano sa Filadelfia sa bogkos nin tunay na kapadangatan na sa magturugang, nasasabotan kan mga Saksi ni Jehova ngonyan na an saindang paghuhulit kaipuhan na gibohon nin apretado. Dai na mahahaloy, tataposon kan dakulang kahorasaan an marigsok na kinaban ni Satanas. Sa panahon na iyan, an lambang saro logod sa sato manompongan na makosog sa pagtubod asin aktibo sa paglilingkod sa Dios, tanganing an satong ngaran dai paraon sa libro nin buhay ni Jehova. (Kapahayagan 7:14) Isapuso nanggad niato an konseho ni Jesus sa kongregasyon sa Filadelfia tanganing mapangaptan niato nin higot an satong mga pribilehio sa paglilingkod asin kamtan an balos na buhay na daing katapusan.
An mga Bendisyon sa mga Nakadaog
21. Paano iningatan kan linahidan na mga Kristiano ngonyan ‘an tataramon manongod sa pakatagal ni Jesus,’ asin anong esperansa an naghahalat sa sainda?
21 Iningatan kan grupong Juan ngonyan ‘an tataramon manongod sa pakatagal ni Jesus,’ an boot sabihon, sinda nag-arog sa saiyang halimbawa asin nagtagal. (Hebreo 12:2, 3; 1 Pedro 2:21) Sa siring, sinda napakosog na marhay kan dugang pang mga tataramon ni Jesus sa kongregasyon sa Filadelfia: “An makadaog—gigibohon ko siang harigi sa templo kan sakong Dios, asin dai na nanggad sia maluwas dian.”—Kapahayagan 3:12a.
22. (a) Ano an templo kan Dios ni Jesus? (b) Paano an makakadaog na linahidan na mga Kristiano magigin mga harigi sa templong ini?
22 Kanigoan kadakulang pribilehio na an saro magin harigi sa templo ni Jehova! Sa suanoy na Jerusalem, an literal na templo iyo an sentro kan pagsamba ki Jehova. Sa laog kan templo, idinodolot kan halangkaw na saserdote an dugo kan atang na mga hayop, sarong aldaw kada taon, sa atubangan kan milagrosong ilaw na nagrerepresentar sa presensia ni Jehova sa “Kabanalbanale.” (Hebreo 9:1-7) Kan bautismohan si Jesus, naglataw an saro pang templo, sarong dakulang espirituwal, garo-templong areglo para sa pagsamba ki Jehova. An kabanalbanale kan templong ini yaon sa langit, na duman si Jesus ‘uminatubang mismo sa Dios.’ (Hebreo 9:24) Si Jesus an Halangkaw na Saserdote, asin sasaro sana an atang na idinolot para sa lubos na pagbayad sa mga kasalan: an pinabolos na dugo kan sangkap na tawong si Jesus. (Hebreo 7:26, 27; 9:25-28; 10:1-5, 12-14) Sagkod na sinda nagdadanay na maimbod, an linahidan na mga Kristiano digdi sa daga naglilingkod bilang katabang na mga saserdote sa patyo kan templong ini digdi sa daga. (1 Pedro 2:9) Alagad oras na sinda makadaog, sinda man minalaog sa kabanalbanale duman sa langit asin nagigin dai nahihirong mga suporta, siring sa mga harigi, kan garo-templong areglo para sa pagsamba. (Hebreo 10:19; Kapahayagan 20:6) Mayo nin peligro na sinda “maluwas dian.”
23. (a) Ano an sunod na ipinapanuga ni Jesus sa linahidan na mga Kristiano na makakadaog? (b) Ano an ibubunga kan pagsurat kan ngaran ni Jehova asin kan ngaran kan bagong Jerusalem sa mga nakadaog na Kristiano?
23 Si Jesus nagpapadagos, na sinasabi: “Asin isusurat ko sa saiya an ngaran kan sakong Dios asin an ngaran kan siudad kan sakong Dios, an bagong Jerusalem na naghihilig hale sa langit hale sa sakong Dios, asin an bago kong ngaran.” (Kapahayagan 3:12b) Iyo, an mga nakadaog na ini susuratan kan ngaran ni Jehova—an saindang Dios asin an Dios ni Jesus. Ini malinaw na nagpapaheling na si Jehova asin si Jesus duwang separadong persona asin bakong duwang kabtang nin tolo sa sarong Dios, o nin Trinidad. (Juan 14:28; 20:17) Dapat na maheling kan gabos na linalang na an mga linahidan na ini rogaring ni Jehova. Sinda saiyang mga saksi. Nasusurat man sa sainda an ngaran kan bagong Jerusalem, an langitnon na siudad na naghihilig hale sa langit sa sentido na ipinapaabot kaiyan an maboot na pamamahala kaiyan sa gabos na maimbod na tawo. (Kapahayagan 21:9-14) Sa siring, maaaraman man kan gabos na daganon na Kristianong karnero na an linahidan na mga nakadaog na ini siudadano kan Kahadean, an langitnon na Jerusalem.—Salmo 87:5, 6; Mateo 25:33, 34; Filipos 3:20; Hebreo 12:22.
24. Ano an irinerepresentar kan bagong ngaran ni Jesus, asin paano iyan isinusurat sa maimbod na linahidan na mga Kristiano?
24 Ultimo, an linahidan na mga nakadaog susuratan kan bagong ngaran ni Jesus. Ini nanonongod sa bagong katongdan ni Jesus asin sa pambihirang mga pribilehio na itinao sa saiya ni Jehova. (Filipos 2:9-11; Kapahayagan 19:12) Mayo nin ibang nakakaaram kan ngaran na iyan, sa sentido na mayo nin ibang nagkakaigwa kan mga eksperyensiang iyan o pinapaniwalaan kan mga pribilehiong iyan. Minsan siring, sa panahon na isurat ni Jesus an saiyang ngaran sa saiyang maimbod na mga tugang, sinda minalaog sa dayupot na relasyon sa saiya sa langitnon na ronang iyan asin nakikihiras pa ngani sa saiyang mga pribilehio. (Lucas 22:29, 30) Bakong makangangalas na tinatapos ni Jesus an saiyang mensahe sa mga linahidan na iyan paagi sa pag-otro kan sadol na: “An may talinga magdangog sa sinasabi kan espiritu sa mga kongregasyon.”—Kapahayagan 3:13.
25. Paano ikakaaplikar kan lambang Kristiano ngonyan an prinsipyong nasa likod kan hatol na itinao ni Jesus sa kongregasyon sa Filadelfia?
25 An mensaheng iyan seguradong nagin dakulaon na pamparigon sa boot para sa maimbod na mga Kristiano sa Filadelfia! Asin iyan tunay na may mapuersang leksion sa grupong Juan ngonyan, durante kan aldaw kan Kagurangnan. Alagad an mga prinsipyo kaiyan mahalaga para sa kada Kristiano, baga man kabilang sa linahidan o sa ibang mga karnero. (Juan 10:16) Marahay na an lambang saro sa sato padagos na magpaluwas nin mga bunga kan Kahadean kapareho kan mga Kristianong idto sa Filadelfia. Kita gabos igwa nin kisuerra kadikit na kapangyarihan. Kita gabos may magigibo sa paglilingkod ki Jehova. Gamiton niato an kapangyarihan na ini! Mapadapit sa dagdag na mga pribilehio sa Kahadean, magin kitang alisto na lumaog sa ano man na pinto na nabubukasan para sa sato. Puede pa ngani kitang mamibi na bukasan ni Jehova an siring na pinto. (Colosas 4:2, 3) Mantang inaarog niato an pakatagal ni Jesus asin pinapatunayan na kita maimbod sa saiyang ngaran, ipapaheling niato na kita man may talingang magdadangog sa sinasabi kan banal na espiritu nin Dios sa mga kongregasyon.
[Mga Nota sa Ibaba]
^ Kan panahon ni Pablo, si Sostenes, an nangengenot na opisyal kan sinagoga nin mga Judio sa Corinto, nagin tugang na Kristiano.—Gibo 18:17; 1 Corinto 1:1.
^ An magasin na An Torrengbantayan, na ipinupublikar kan grupong Juan, padagos na nagdodoon na kaipuhan na marhay na aprobetsaran an oportunidad na ini asin makikabtang sa gibong paghuhulit sa pinakalubos na mahihimo; halimbawa, helingon an mga artikulong “An Gabos Magpahayag kan Kamurawayan ni Jehova” asin “An Saindang Tingog Nakalakop sa Bilog na Daga” sa luwas na Enero 1, 2004 kan An Torrengbantayan. Sa luwas kan Hunyo 1, 2004, sa artikulong “Maogma an mga Nagpapamuraway sa Dios,” idinoon an paglaog sa “bukas na pinto” pasiring sa bilog na panahon na paglilingkod. May pinakahalangkaw na kabilangan na 1,093,552 na payunir na nagreport nin siring na paglilingkod sa laog nin sarong bulan kan 2005.
^ An Cyclopedia ni McClintock asin Strong (Tomo X, pahina 519) nagsasabi: “An Kristianismo puersahan na narisa kan mga emperador huli sa kariribokan na pinupundar sa tahaw nin mga tawo kan paganong mga saserdote, na may pagkatakot na pinagmasdan an pambihirang pag-oswag kan pagtubod na iyan, asin si Trajan [98-117 C.E.] nadarang magpaluwas nin mga edikto para sa luway-luway na pag-olang sa bagong katokdoan na dahelan kaya an mga tawo naoongis sa mga dios. An administrasyon kan mas hoben na si Pliny bilang gobernador sa Bitinia [na kalinderos kan Romanong probinsia nin Asia sa amihanan] nakomplikar nin mga bagay na resulta kan marikas na paglakop nin Kristianismo asin kan ibinungang pagkaanggot kan paganong populasyon sa laog kan saiyang probinsia.”
^ An ngaran na Ezequias nangangahulogan “Si Jehova Nagpapakosog.” Helingon an 2 Hade 16:20, nota sa ibaba, New World Translation Reference Bible.
[Mga Hapot Para sa Pag-adal]
[Kahon sa pahina 63]
Pagtabang sa Dakol na Dumuko
Sa 144,000 na linahidan na magmamana kan langitnon na Kahadean, minalataw na may natatada, an grupong Juan, na mayo nang 9,000 na dai pa natatapos an saindang buhay digdi sa daga. Kadungan kaiyan, labi nang 6,600,000 an kabilangan kan dakulang kadaklan. (Kapahayagan 7:4, 9) Ano an nakatabang kaya nagkaigwa kan dakulaon na pag-oswag na ini? Dakula an ikinakontribwir kan manlaenlaen na paadalan kan mga Saksi ni Jehova. Laen na marhay sa mga seminaryo kan Kakristianohan na nagtotokdo nin kinabanon na mga pilosopiya asin nagmemenospresio sa Biblia, itinatadom kan mga paadalan na ini kan mga Saksi an hararom na pagtubod sa Tataramon nin Dios. Ipinapaheling kan mga paadalan an praktikal na pag-aplikar kaiyan kun mapadapit sa malinig, moral na pamumuhay asin sa dusay na paglilingkod sa Dios. Sa bilog na kinaban poon kan 1943, ginigibo kan balang kongregasyon kan mga Saksi ni Jehova sa saindang Kingdom Hall an lokal na Teokratikong Paadalan sa Pagmiministro. Minilyon an nag-aatender sa paadalan na ini serosemana, na sinusunod an nagkakasararong programa nin pagtotokdo sa Biblia.
Poon kan 1959 an mga Saksi ni Jehova nagkaigwa man nin mga Pang-Kahadean na Paadalan sa Pagmiministro para sa pagtotokdo sa kamagurangan sa kongregasyon asin ministeryal na mga lingkod. Asin poon kan 1977, natokdoan kan mga Paadalan sa Paglilingkod Bilang Payunir an ginatos na ribong tugang na lalaki asin babae, na, sa pagkaigwa nin tunay na espiritu kan mga taga Filadelfia, naglilingkod ki Jehova nin bilog na panahon sa paghuhulit. Kan 1987 pinonan an Paadalan sa Ministeryal na Pagsasanay tanganing tokdoan an mga lalaking Saksi para sa espesyal na mga asignasyon sa pambilog na kinaban na langtad.
An sarong pambihira sa mga paadalan kan mga Saksi ni Jehova iyo an Paadalan sa Biblia kan Watchtower sa Gilead. Poon kan 1943 duwang grupo nin mga estudyante an naggagradwar sa paadalan na ini para sa mga misyonero, na yaon sa Estado nin Nueva York, sa haros kada taon. Sa kabilogan, labi nang 7,000 na ministro ni Jehova an natokdoan kaiyan para sa pagmimisyonero sa ibang nasyon. An mga gradwado sa paadalan na ini naglingkod sa labing sanggatos na nasyon, na sa kadaklan kaiyan sinda an nakatabang na mabukasan an gibohon na pang-Kahadean. Pakalihis nin mga 60 taon, yaon pa sa destino ninda an nagkapira sa enot na mga misyonero, na katabang kan bagong mga misyonero sa pagpaoswag kan lakop sa globong paghiwas kan organisasyon ni Jehova. Nagin makangangalas nanggad an paghiwas na ini!
[Tsart sa pahina 64]
Kan 1919 binukasan kan nagrereynar nang si Hadeng Jesus an sarong pinto nin oportunidad para sa Kristianong paglilingkod. Inaprobetsaran kan nagdadakol na dedikadong Kristiano an oportunidad na iyan.
Mga Nasyon Mga Kristianong Bilog
na Naabot Nakikabtang na Panahon
kan sa Paghuhulit * na mga
Taon Paghuhulit Parahulit *
1918 14 3,868 591
1928 32 23,988 1,883
1938 52 47,143 4,112
1948 96 230,532 8,994
1958 175 717,088 23,772
1968 200 1,155,826 63,871
1978 205 2,086,698 115,389
1988 212 3,430,926 455,561
1998 233 5,544,059 698,781
2005 235 6,390,022 843,234
[Mga Nota sa Ibaba]
^ An mga kabilangan sa itaas bulanan na mga promedyo.
^ An mga kabilangan sa itaas bulanan na mga promedyo.
[Tsart sa pahina 65]
An aktibidad kan mga Saksi ni Jehova bilog na puso. Halimbawa, pensara an oras na saindang ginamit sa paghuhulit asin pagtotokdo saka an kadakol na libreng pag-adal sa Biblia na saindang ginibo sa harong nin mga tawo.
Oras na Ginamit Ginibong
sa Paghuhulit Pag-adal sa Biblia
Taon (Taonan na Total) (Bulanan na
Promedyo)
1918 19,116 Mayong Rekord
1928 2,866,164 Mayong Rekord
1938 10,572,086 Mayong Rekord
1948 49,832,205 130,281
1958 110,390,944 508,320
1968 208,666,762 977,503
1978 307,272,262 1,257,084
1988 785,521,697 3,237,160
1998 1,186,666,708 4,302,852
2005 1,278,235,504 6,061,534
[Ritrato sa pahina 59]
Sarong liabe kan mga Romano kaidtong enot na siglo
