Pagmamaigot na Magin mga Nakadaog
Kapitulo 8
Pagmamaigot na Magin mga Nakadaog
SMIRNA
1. (a) Anong kongregasyon an sunod na nag-ako nin mensahe hale sa pinamuraway na si Jesus? (b) Sa pag-apod sa saiyang sadiri na “an Enot asin an Huri,” ano an ipinagirumdom ni Jesus sa mga Kristiano sa kongregasyon na idto?
NGONYAN, kagabaan na an suanoy na Efeso. Alagad an pinadarahan kan ikaduwang mensahe ni Jesus sagkod ngonyan lugar nin sarong matawong siudad. Mga 55 kilometros sa amihanan kan kagabaan nin Efeso yaon an siudad nin Izmir, Turkiya, na duman manonompongan an apat na maigot na kongregasyon nin mga Saksi ni Jehova dawa ngonyan. Yaon digdi an Smirna kan enot na siglo. Helinga, ngonyan, an sunod na mga tataramon ni Jesus: “Asin sa anghel kan kongregasyon sa Smirna sumurat ka: Iyo ini an mga bagay na sinasabi nia, ‘an Enot asin an Huri,’ na nagadan asin nabuhay liwat.” (Kapahayagan 2:8) Sa pagsabi kaini sa mga Kristianong idto sa Smirna, ipinapagirumdom sa sainda ni Jesus na sia an enot na nagdanay na may integridad na direktang binuhay liwat ni Jehova sa inmortal na espiritung buhay asin an huring binuhay nin siring. Si Jesus mismo an mabuhay liwat sa gabos na ibang linahidan na Kristiano. Sa siring, sia kualipikado nanggad na magtao nin hatol sa saiyang mga tugang, na naglalaom na makaibanan nia sa inmortal na buhay sa langit.
2. Taano an gabos na Kristiano ta nararanga kan mga tataramon kan Saro na “nagadan asin nabuhay liwat”?
2 Si Jesus an nagpaarog sa pagtagal sa persekusyon para sa katanosan, asin inako nia an igong balos. An saiyang kaimbodan sagkod sa kagadanan asin an suminunod na pagkabuhay nia liwat iyo an basehan kan paglaom para sa gabos na Kristiano. (Gibo 17:31) An bagay na si Jesus “nagadan asin nabuhay liwat” nagpapatunay na an ano man na kaipuhan na tagalan huli sa katotoohan bakong sayang. An pagkabuhay liwat ni Jesus ginigikanan nin dakulang pagparigon sa boot para sa gabos na Kristiano, nangorogna kun sinda hinahagadan na magdusa huli sa saindang pagtubod. Ini daw an kamugtakan nindo? Kun siring, mapapakosog man an boot nindo kan sunod na mga tataramon ni Jesus sa kongregasyon sa Smirna:
3. (a) Anong pagparigon sa boot an itinao ni Jesus sa mga Kristiano sa Smirna? (b) Minsan ngani dukha an mga Kristiano sa Smirna, taano ta sinabi ni Jesus na sinda “mayaman”?
3 “Aram ko an saimong kahorasaan asin kadukhaan—alagad ta ika mayaman—asin an paglanghad kan mga nagsasabi na sinda Judio, alagad ta bako man kundi sarong sinagoga ni Satanas.” (Kapahayagan 2:9) Si Jesus mayo nin ikatatsar sa saiyang mga tugang sa Smirna. Mamomoton na komendasyon sana an sinabi nia. Nagtios sinda nin grabeng kahorasaan huli sa saindang pagtubod. Sinda dukha sa materyal, tibaad huli sa saindang kaimbodan. (Hebreo 10:34) Minsan siring, an pangenot nindang interes nasa espirituwal na mga bagay, asin sinda nagtipon nin kayamanan sa langit, siring sa isinadol ni Jesus. (Mateo 6:19, 20) Huli kaini, an pagheling sa sainda kan Poon na Pastor “mayaman.”—Ikomparar an Santiago 2:5.
4. Gikan kiisay nagtios nin grabeng pagtumang an mga Kristiano sa Smirna, asin ano an pagheling ni Jesus sa mga nagtutumang na idto?
4 Partikularmenteng nasambitan ni Jesus na an mga Kristiano sa Smirna nagtios nin grabeng pagtumang sa kamot nin mga Judio sa laman. Kan mas naenot na mga aldaw, determinadong tinumang kan dakol na kabilang sa relihion na ini an paglakop nin Kristianismo. (Gibo 13:44, 45; 14:19) Ngonyan, pira pa sanang dekada pagkalaglag kan Jerusalem, an mga Judiong idto sa Smirna nagpapaheling man nin kaparehong satanikong espiritu. Bakong makangangalas na an pagheling sa sainda ni Jesus “sarong sinagoga ni Satanas”! *
5. Anong mga pagbalo an naghahalat sa mga Kristiano sa Smirna?
5 Huling napapaatubang sa siring na pagkaongis, an mga Kristiano sa Smirna rinanga ni Jesus: “Dai ka matakot sa mga bagay na madali mo nang tioson. Uya! Padagos na ibibilanggo kan Diablo an nagkapira sa saindo tanganing kamo lubos na mabalo, asin tanganing magkaigwa kamo nin kahorasaan sa laog nin sampulong aldaw. Magmaimbod ka dawa sagkod sa kagadanan, asin ta itatao ko sa saimo an korona nin buhay.” (Kapahayagan 2:10) Digdi tolong beses na ginagamit ni Jesus an plural sa Griego kan Ingles na terminong “you” (sa Bicol, “saindo” asin “kamo”), na nagpapaheling na kaiba sa saiyang mga tataramon an bilog na kongregasyon. Dai ikapangako ni Jesus na an mga pagbalo sa mga Kristiano sa Smirna madali nang matapos. An iba sa sainda padagos na pepersegiron asin ibibilanggo. Sinda magkakaigwa nin kahorasaan “sa laog nin sampulong aldaw.” An sampulo numerong nagsisimbolisar nin daganon na pagkakompleto o kabilogan. Dawa an mga mayaman na idto sa espirituwal na nagdadanay na may integridad mag-aako nin lubos na pagbalo mantang nasa laman.
6. (a) Taano ta dai maninigong matakot an mga Kristiano sa Smirna? (b) Paano tinapos ni Jesus an saiyang mensahe sa kongregasyon sa Smirna?
6 Minsan siring, an mga Kristiano sa Smirna dai maninigong matakot o makikompromiso. Kun sinda magdadanay na maimbod sagkod sa katapusan, nakatagama sa sainda bilang balos an “korona nin buhay,” sa kaso ninda inmortal na buhay sa kalangitan. (1 Corinto 9:25; 2 Timoteo 4:6-8) Sa pagheling ni apostol Pablo an mahalagang marhay na premyong ini maninigo sa pagsakripisyo kan gabos na iba pa, dawa kan saiyang buhay digdi sa daga. (Filipos 3:8) Malinaw na iyo man iyan an saboot kan mga maimbod na idto sa Smirna. Tinatapos ni Jesus an saiyang mensahe sa pagsabi: “An may talinga magdangog sa sinasabi kan espiritu sa mga kongregasyon: An makadaog dai nanggad madadanyaran kan ikaduwang kagadanan.’” (Kapahayagan 2:11) An mga nakadaog ginarantiyahan nin inmortal na buhay sa langit na dai na maaano nin kagadanan.—1 Corinto 15:53, 54.
“Kahorasaan sa Laog nin Sampulong Aldaw”
7, 8. Kapareho kan kongregasyon sa Smirna, paano an Kristianong kongregasyon ‘lubos na nabalo’ kan 1918?
7 Kaparehong gayo kan mga Kristiano sa Smirna, an grupong Juan asin an kairiba ninda ngonyan nabalo asin padagos na ‘lubos na nababalo.’ An kaimbodan ninda sa irarom nin pagbalo nagpapamidbid na sinda banwaan nin Dios. (Marcos 13:9, 10) Dai nahaloy pagpoon kan aldaw kan Kagurangnan, an mga tataramon ni Jesus sa mga Kristiano sa Smirna nagtao nin lubos na karangahan sa sadit na internasyonal na grupo kan banwaan ni Jehova. (Kapahayagan 1:10) Poon kan 1879, kinokotkot ninda an espirituwal na mga kayamanan sa Tataramon nin Dios na bulaos nindang ihinihiras sa iba. Alagad kan Guerra Mundial I, napaatubang sinda sa malaad na pagkaongis asin pagtumang, sa sarong kabtang huli sa dai ninda pakikiayon sa pagkabangkag sa guerra asin sa saro pang kabtang huli sa daing takot na pagbuyagyag ninda kan mga sala nin Kakristianohan. An persekusyon na inagihan ninda sa sutsut kan nagkapirang namomoon sa Kakristianohan gruminabe nin biyo kan 1918 asin nakakabaing sa inagihan kan mga Kristiano sa Smirna sa kamot kan Judiong komunidad duman.
8 An biglang paggrabe nin persekusyon sa Estados Unidos nin Amerika uminabot sa kulminasyon kan an bagong presidente kan Watch Tower Society, si Joseph F. Rutherford, asin an pitong kaasosyar nia ibinilanggo kan Hunyo 22, 1918, na an kadaklan sainda may sentensiang 20 anyos. Nakaluwas sinda paagi sa pagpiansa pakalihis nin siyam na bulan. Kan Mayo 14, 1919, binaliktad kan korte de apelasyon an salang mga sentensia sa sainda; ipinaheling na may 130 sala sa pagbista. An Katoliko Romanong si Huwes Manton, sarong kabalyero kan orden ni San Gregoriong Dakula, na kan 1918 nagsayumang papagpiansahon an mga Kristianong ini, sa huri sinentensiahan, kan 1939, nin duwang taon na pagkabilanggo asin nin multang $10,000 huli sa anom na akusasyon nin paghagad asin pag-ako nin soborno.
9. Ano an pagtratar ni Hitler sa Mga Saksi ni Jehova sa Nazi Alemania, asin ano an reaksion kan klero?
9 Durante kan pamamahala kan mga Nazi sa Alemania, biyong ipinagprohibir ni Hitler an paghuhulit kan mga Saksi ni Jehova. Sa dakol na taon, rinibong Saksi an maringis na ibinilanggo sa mga kampo de konsentrasyon asin presohan, na duman dakol an nagadan, mantang an mga 200 na hoben na lalaki na nagsayumang magsoldados sa hukbo ni Hitler ginadan. An pagsuportar kan klero sa gabos na ini pinapatunayan kan mga tataramon nin sarong pading Katoliko, na ipinublikar sa peryodikong The German Way kan Mayo 29, 1938. Sa sarong kabtang, sia nagsabi: “Igwa na ngonyan nin sarong nasyon sa ibabaw kan daga na dian an inaapod na . . . Mga Estudyante sa Biblia [Mga Saksi ni Jehova] bawal. Iyan an Alemania! . . . Kan si Adolph Hitler tumukaw sa kapangyarihan, asin otrohon kan Obispadong Katoliko sa Alemania an saindang kahagadan, si Hitler nagsabi: ‘Ining inaapod na Maigot na mga Estudyante sa Biblia [Mga Saksi ni Jehova] mga manriribok; . . . Ibinibilang ko sindang mga palsipikado; dai ko itotogot na an mga Katolikong Aleman madigtaan sa siring na paagi kan Amerikanong ini na si Huwes Rutherford; tinatapos ko [an Mga Saksi ni Jehova] sa Alemania.’” Digdi, idinugang kan padi: “Bravo!”
10. (a) Mantang nagpapadagos an aldaw kan Kagurangnan, anong persekusyon an inatubang kan mga Saksi ni Jehova? (b) Ano an parateng ibinubunga kun ipinapakipaglaban kan mga Kristiano an relihiosong libertad sa mga husgado?
10 Mantang nagpapadagos an aldaw kan Kagurangnan, an Halas asin an saiyang banhi noarin man dai nagpondo sa pakikilaban tumang sa linahidan na mga Kristiano asin sa saindang kairiba. An dakol sa sainda ibinilanggo asin madahas na pinagpersegir. (Kapahayagan 12:17) An mga kaiwal na idto padagos na ‘nagmukna nin danyos paagi sa ley,’ alagad an banwaan ni Jehova marigon na nag-iinsistir: “Dapat na kuyogon niamo an Dios bilang namamahala imbes na mga tawo.” (Salmo 94:20, King James Version; Gibo 5:29) Kan 1954 an magasin na The Watchtower nagbareta: “Labing setentang nasyon sa manlaenlaen na panahon sa laog kan nakaaging kuarentang taon an guminibo nin mga dekretong kadakol kan bawal asin nagpersegir sa mga saksi ni Jehova.” Sa mga lugar na puedeng ipakipaglaban an relihiosong libertad sa mga husgado, ginibo iyan kan mga Kristianong ini asin nagkamit sinda nin dai mapagdududahan na mga kapangganahan sa dakol na nasyon. Duman sana sa Korte Suprema kan Estados Unidos, an mga Saksi ni Jehova nagkamit nin 50 kapangganahan.
11. Anong propesiya ni Jesus may labot sa tanda kan saiyang presensia an naotob sa mga Saksi ni Jehova sa aldaw kan Kagurangnan?
11 Mayo nin ibang grupo na siring kaatom sa pagkuyog sa pagboot ni Jesus na itao ki Cesar an mga bagay na ki Cesar. (Lucas 20:25; Roma 13:1, 7) Pero, mayo man nin ibang grupo na an mga miembro ibinilanggo sa kadakol na nasyon sa irarom nin kadakol na laen-laen na klase nin gobyerno, asin ini nagpapadagos sagkod ngonyan sa Amerika, Europa, Aprika, asin Asia. Kaiba sa dakulang propesiya ni Jesus may labot sa tanda kan saiyang presensia an mga tataramon na ini: “Dangan dadarahon kamo nin mga tawo sa kahorasaan asin gagadanon kamo, asin ikakaongis kamo kan gabos na nasyon huli sa ngaran ko.” (Mateo 24:3, 9) Tunay na ini naotob sa Kristianong mga Saksi ni Jehova sa aldaw kan Kagurangnan.
12. Paano pinakosog kan grupong Juan an banwaan nin Dios tumang sa persekusyon?
12 Tanganing mapakosog an banwaan nin Dios tumang sa kahorasaan, daing ontok na ipinapagirumdom sa sainda kan grupong Juan an kahulogan kan mga tataramon ni Jesus sa mga Kristiano sa Smirna. Halimbawa, kan pumoon an pagpersegir kan mga Nazi, an The Watchtower kan 1933 asin 1934 nagkaigwa nin mga artikulo na arog kan “Fear Them Not,” na nagpaliwanag kan Mateo 10:26-33; “The Crucible,” na basado sa Daniel 3:17, 18; asin “Lions’ Mouths,” na an pangenot na teksto iyo an Daniel 6:22. Kan dekada nin 1980, na sa mga taon na iyan enot na ipinublikar an librong ini sa Ingles asin an mga Saksi ni Jehova nagtios nin madahas na persekusyon sa labing 40 kadagaan, an banwaan nin Dios pinakosog kan An Torrengbantayan paagi sa mga artikulong arog kan “Maogma Minsan Pinaglalamag!” asin “An mga Kristiano Inaatubang an Paglamag na May Pakatagal.” *
13. Kapareho kan mga Kristiano sa Smirna, taano an Kristianong mga Saksi ni Jehova ta dai natatakot sa persekusyon?
13 Tunay nanggad, an Kristianong mga Saksi ni Jehova nagtitios nin pisikal na pagpersegir asin iba pang pagbalo sa laog nin simbolikong sampulong aldaw. Kapareho kan mga Kristiano duman sa Smirna, dai sinda natatakot; ni kaipuhan man na matakot an siisay man sa sato mantang naggagrabe an mga kariribokan digdi sa daga. Andam kitang magtagal sa irarom nin mga kasakitan asin akoon na may kagayagayahan pati ‘an pagsamsam sa satong mga rogaring.’ (Hebreo 10:32-34) Paagi sa pag-adal sa Tataramon nin Dios asin pagsapuso kaiyan, magigin andam kita na manindogan na marigon sa pagtubod. Makakasierto kamo na kamo kayang ingatan asin talagang iingatan ni Jehova sa saindong integridad. ‘Ibugtak nindo an gabos nindong kahaditan sa saiya, huli ta sia may pagmakolog sa saindo.’—1 Pedro 5:6-11.
[Mga Nota sa Ibaba]
^ Mga 60 taon pagkagadan ni Juan, an 86 anyos na si Policarpo sinolo sagkod na magadan duman sa Smirna ta habo niang talikdan an saiyang pagtubod ki Jesus. An The Martyrdom of Polycarp, sarong libro na ipinapamugtak na katemporanyo kan pangyayaring ini, nagsasabi na kan nagkukua nin songo para sa pagsolo, “maigoton an mga Judio, siring sa ugale ninda, sa pagtabang digdi”—minsan ngani an paggadan nangyari sa “dakulang aldaw nin Sabbath.”
^ Helingon an The Watchtower kan Nobyembre 1, 1933; Oktubre 1 asin 15, Disyembre 1 asin 15, 1934; An Torrengbantayan kan Disyembre 1, 1983.
[Mga Hapot Para sa Pag-adal]
[Kahon/Ritrato sa pahina 39]
Sa laog na nin dakol na taon, an mga historyador padagos na nagtatao nin patotoo mapadapit sa integridad kan Aleman na mga saksi ni Jehova kaidtong rehimen na Nazi. Ini an sabi kan librong Mothers in the Fatherland, kan historyador na si Claudia Koonz, na ipinublikar kan 1986: “An dakulaon na mayoriya sa gabos na Aleman na bakong Nazi nakanompong nin mga paagi na mabuhay sakop nin sarong rehimen na dinuduhagi ninda. . . . Nasa ibong naman na lado kan laen-laen na estadistika asin ideolohiya an 20,000 na Saksi ni Jehova na, haros daing eksepsion, dai mapagdududahan na nagsayuma na gumibo nin ano man na klase nin pagkuyog sa estadong Nazi. . . . An pinakaborogkos na grupo nin mga nagkokontra pinakosog nin relihion. Poon sa kapinonan, an mga Saksi ni Jehova dai nakikooperar sa ano man na aspekto kan estadong Nazi. Dawa pakatapos na laglagon kan Gestapo an saindang nasyonal na opisina prinsipal kan 1933 asin ipagbawal an sekta kan 1935, nagsayuma sindang magsabi man lamang nin ‘Heil Hitler.’ Mga kabanga (na an kadaklan lalaki) sa gabos na Saksi ni Jehova an ipinadara sa mga kampo de konsentrasyon, sarong ribo sa sainda an ginadan, asin sangribo pa an nagadan sa pag-oltanan nin 1933 asin 1945. . . . Nadangog kan mga Katoliko asin Protestante an saindang klero na sinasadol sindang makikooperar ki Hitler. Kun sinda man nagkontra, iyan ginibo ninda tumang sa pagboot kan iglesia sagkod kan estado.”
