Kapitulo 7

Palaadon Liwat an Enot na Pagkamoot!

EFESO

1. Para sa anong kongregasyon an enot na mensahe ni Jesus, asin ano an ipinapagirumdom nia sa mga paraataman?

 AN ENOT na mensahe ni Jesus para sa kongregasyon sa Efeso, na kaidto sarong maoswag na siudad sa gilid nin dagat sa Asia Minor harani sa isla nin Patmos. Saiyang pinagbotan si Juan: “Sa anghel kan kongregasyon sa Efeso sumurat ka: Ini an mga bagay na isinabi nia na nagkakapot kan pitong bitoon sa saiyang toong kamot, sia na naglalakaw sa tahaw kan pitong kandelerong bulawan.” (Kapahayagan 2:1) Kapareho kan anom pang ibang mensahe, inaapod digdi ni Jesus an atension sa sarong bagay na nagpaparisa kan saiyang katongdan na may autoridad. Ipinapagirumdom nia sa mga paraataman sa Efeso na an gabos na kamagurangan nasa irarom kan saiyang nagpoprotehir na pangataman asin na sinisiyasat nia an gabos na kongregasyon. Sagkod sa satong panahon, padagos niang ginigibo an mamomoton na pamamayong ini, na binabantayan an kamagurangan asin maboot na pinapastoran an gabos na asosyado sa kongregasyon. Sa panapanahon, liniliwat nia an mga areglo sa kongregasyon tanganing an ilaw makasirang nin mas maliwanag. Iyo, si Jesus an Poon na Pastor sa aripompon nin Dios.—Mateo 11:28-30; 1 Pedro 5:2-4.

2. (a) Para sa anong marahay na mga bagay na tinawan ni Jesus nin komendasyon an kongregasyon sa Efeso? (b) Anong hatol ni apostol Pablo an malinaw na kinuyog kan kamagurangan sa Efeso?

² Dangan, paagi sa pagpopoon sa mamomoton na mga tataramon nin komendasyon, inestablisar ni Jesus an magigin paagi nia para sa gabos na pito niang mensahe apuera sa duwa. Para sa mga taga Efeso, ini an saiyang mensahe: “Aram ko an saimong mga gibo, asin an saimong pagpapagal saka pakatagal, asin na dai mo natitios an maraot na mga tawo, asin na binabalo mo an mga nagsasabing sinda mga apostol, alagad bako man, asin nakua mo sindang mga putikon. Nagpapaheling ka man nin pakatagal, asin nagtios ka huli sa sakong ngaran asin dai nakapoy.” (Kapahayagan 2:2, 3) Dakol na taon bago kaini, pinatanidan na ni apostol Pablo an kamagurangan sa Efeso manongod sa “mapan-aping mga lobo,” apostatang mga paraparibok sa aripompon, asin sinabihan an kamagurangan na idto na “magpuka,” na inaarog an saiyang daing kapagalan na halimbawa. (Gibo 20:29, 31) Mantang inoomaw sinda ngonyan ni Jesus huli sa saindang pagpapagal saka pakatagal asin huli sa dai pagkakapoy, seguradong iinaplikar ninda an hatol na iyan.

3. (a) Paano prinobaran nin “falsong mga apostol” na dayaon an mga maimbod sa satong mga aldaw? (b) Anong patanid manongod sa mga apostata an itinao ni Pedro?

³ Sa aldaw man kan Kagurangnan, may naglataw na “falsong mga apostol” na ‘nagtataram nin biribid na mga bagay tanganing maguyod ninda sa sainda an mga disipulo.’ (2 Corinto 11:13; Gibo 20:30; Kapahayagan 1:10) Marahay sa pagheling ninda an gabos na magkakakontrang relihion na sektaryo, naghihingako sinda na an Dios mayo nin organisasyon, asin nagdedehar sinda na inako ni Jesus an kapangyarihan sa Kahadean kan 1914. Inootob ninda an propesiya sa 2 Pedro 3:3, 4: “Sa huring mga aldaw an mga paraolog-olog madatong na may pag-olog-olog, na naglalakaw segun sa saindang sadiring mga mawot asin nagsasarabi: ‘Haen man ining ipinanugang presensia nia? Tara, poon kan aldaw na an satong mga apoon magtorog sa kagadanan, an gabos na bagay pareho man sana poon kan kapinonan nin paglalang.’”

4. (a) Paano nahahayag an pagigin orgolyoso asin pagigin rebelde nin mga paraolog-olog? (b) Ipinapaheling nin mga Kristiano ngonyan na sinda kapareho kan mga taga Efeso paagi sa paggibo nin anong aksion tumang sa putikon na mga paratumang?

⁴ An mga paraolog-olog na ini kontra sa ideya na ipahayag ninda sa publiko an saindang pagtubod. (Roma 10:10) Naghagad sinda kan pagsuportar kan klero nin Kakristianohan asin  kan tabang nin mga peryodiko saka istasyon nin TV sa pagpalakop nin putik na mga bareta manongod sa dati nindang kairiba. Madaling nadidiskobre nin mga maimbod na an tataramon asin gawe-gawe kan mga paradayang ini bakong totoo. Kapareho kan mga taga Efeso, an mga Kristiano ngonyan ‘dai natitios an maraot na mga tawo,’ kaya itinitiwalag ninda sinda sa saindang kongregasyon. *

5. (a) Ano an sinabi ni Jesus na kaluyahan kan mga taga Efeso? (b) Anong mga tataramon an maninigo kutanang nagirumdoman kan mga taga Efeso?

⁵ Minsan siring, arog kan ginigibo nia sa lima sa pitong kongregasyon, sinasabi ngonyan ni Jesus an sarong seryosong problema. Sinasabi nia sa mga taga Efeso: “Minsan siring, igwa ako nin laban saimo, na binayaan mo an saimong pagkamoot kan enot.” (Kapahayagan 2:4) Dai kutana sinda maninigong magkulang sa bagay na ini, huli ta si Pablo nagsurat sa sainda kan 35 taon na an nakaagi na nasasambitan an ‘dakulang pagkamoot na ikinamoot sa sato’ nin Dios, asin sinadol nia sinda: “Magin kamong mga paraarog sa Dios, bilang mga aki na namomotan na marhay, asin padagos kamong maglakaw sa pagkamoot, kun paanong namotan man kamo kan Cristo.” (Efeso 2:4; 5:1, 2) Dugang pa, an mga tataramon ni Jesus maninigo kutanang natanom nin permanente sa saindang puso: “Si Jehova na satong Dios sarong Jehova, asin kamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.” (Marcos 12:29-31) Nawara na sa mga taga Efeso an enot na pagkamoot na iyan.

6. (a) Baga man kita mga gurangan o bagong makiasosyar sa kongregasyon, dapat kitang magmaan sa anong peligro asin mga tendensia? (b) An pagkamoot niato sa Dios maninigong magpahiro sato na gibohon an ano?

⁶ Baga man kita mga gurangan o bagong makiasosyar sa kongregasyon, kaipuhan kitang magmaan na dai mawara an enot niatong pagkamoot ki Jehova. Paano puedeng mangyari an pagkawarang ini? Puede niatong togotan na an magin pinakaimportante sa satong buhay iyo an pagkamuya sa satong sekular na trabaho, an pagmawot na makakua nin dakol na kuarta, o an paghanap nin kasingawan. Sa siring puede kitang magkaigwa nin sa laman na kaisipan imbes na espirituwal na kaisipan. (Roma 8:5-8; 1 Timoteo 4:8; 6:9, 10) An pagkamoot niato ki Jehova maninigong magpahiro sato na itanos an ano man na siring na tendensia asin “padagos na hanapon nguna an kahadean [nin Dios] asin an saiyang katanosan,” tanganing ‘makatipon kita nin kayamanan sa langit.’—Mateo 6:19-21, 31-33.

7. (a) An satong paglilingkod ki Jehova maninigong motibado nin ano? (b) Ano an sinabi ni Juan mapadapit sa pagkamoot?

⁷ Logod na an paglilingkod niato ki Jehova danay na motibado nin hararom na pagkamoot sa saiya. Magkaigwa kita nin odok na pag-apresyar sa gabos na ginibo ni Jehova asin ni Cristo para sa sato. Arog kan isinurat mismo ni Juan sa huri: “An pagkamoot sa bagay na ini, bakong huli ta  kita namoot sa Dios, kundi na sia namoot sa sato asin isinugo an saiyang Aki bilang pampagian nin boot na atang para sa satong mga kasalan.” Nagpadagos si Juan sa pagsabi sa sato: “An Dios pagkamoot, asin an nagdadanay sa pagkamoot nagdadanay na kasaro nin Dios asin an Dios nagdadanay na kasaro nia.” Noarin man dai logod niato togotan na mapara an satong pagkamoot ki Jehova, sa Kagurangnan na Jesu-Cristo, asin sa buhay na Tataramon nin Dios! An pagkamoot na ini ikakapahayag niato bako sanang sa maigot na paglilingkod sa Dios kundi pati sa pagkuyog sa “togon na ini hale sa saiya, na an namomoot sa Dios maninigo man na mamoot sa saiyang tugang.”—1 Juan 4:10, 16, 21; Hebreo 4:12; helingon man an 1 Pedro 4:8; Colosas 3:10-14; Efeso 4:15.

“Giboha an mga Gibo kan Enot”

8. Ano an sinabi ni Jesus na maninigong gibohon kan mga taga Efeso?

⁸ Kaipuhan na palaadon liwat kan mga taga Efesong idto an dati nindang pagkamoot kun habo nindang mawaran kan balos. “Kun siring,” sabi sa sainda ni Jesus, “girumdoma kun hale saen ka nahulog, asin magsolsol ka asin giboha an mga gibo kan enot. Kun dai, ako madian sa saimo, asin hahaleon ko an saimong kandelero sa namumugtakan kaiyan, apuera sana kun ika magsolsol.” (Kapahayagan 2:5) Paano inako kan mga Kristiano sa kongregasyon sa Efeso an mga tataramon na idto? Dai niato aram. An paglaom niato sinda nagsolsol asin nahimong pukawon liwat an saindang pagkamoot ki Jehova. Kun dai, kun siring paparongon an saindang lampara asin hahaleon an saindang kandelero. Mawawaran sinda kan saindang pribilehio na pasirangon an katotoohan.

9. (a) Ano an nakakaparigon sa boot na komento ni Jesus sa mga taga Efeso? (b) Paano an mga kongregasyon pakalihis kan aldaw ni Juan dai naghimate sa hatol ni Jesus sa mga taga Efeso?

⁹ Minsan siring, si Jesus igwa kaining nakakaparigon sa boot na komento para sa mga taga Efeso: “Pero, igwa ka kaini, na ikinakaongis mo an mga gibo kan sekta ni Nicolas, na ikinakaongis ko man.” (Kapahayagan 2:6) Minsan paano ikinaongis ninda an pagkabaranga nin mga sekta, kun paanong iyan ikinakaongis kan Kagurangnan na si Jesu-Cristo. Minsan siring, sa pag-agi nin mga taon, dakol na kongregasyon an dai naghimate sa mga tataramon na idto ni Jesus. An kadaihan nin pagkamoot ki Jehova, sa katotoohan, asin sa lambang saro nagbunga kan saindang pagkaanod pasiring sa espirituwal na kadikloman. Nagkabarangabanga sinda sa dakol na sektang nag-iiriwal. Hinale nin “Kristianong” mga parakopya na mayo nin pagkamoot ki Jehova an mismong ngaran nin Dios sa mga manuskritong Griego kan Biblia. An kadaihan nin pagkamoot nagtao man nin lugar sa pagtotokdo nin mga doktrinang Babiloniko asin Griego, arog baga kan kalayo sa impierno, purgatoryo, asin Trinidad, sa ngaran nin Kristianismo. Huling mayo nin pagkamoot sa Dios asin sa katotoohan, an kadaklan na naghihingakong Kristiano nagpondo sa paghuhulit kan maogmang bareta kan Kahadean nin Dios. Nadominar sinda nin sarong maimot na grupong klero na guminibo kan sadiri nindang kahadean digdi sa daga.—Ikomparar an 1 Corinto 4:8.

10. Ano an relihiosong kamugtakan sa Kakristianohan kan 1918?

¹⁰ Kan pumoon an paghokom sa harong nin Dios kan 1918, an sektaryong klero nin Kakristianohan nagtatao nin hayag na pagsuportar sa Guerra Mundial I, na sinasadol na maggaradanan an mga Katoliko asin Protestante sa man-ibong-ibong na lado. (1 Pedro 4:17) Bakong arog kan kongregasyon sa Efeso na ikinaongis an ginigibo kan sekta ni Nicolas, an mga relihion nin Kakristianohan haloy nang pano nin nagkakaturumang, kontra sa Dios na mga doktrina, asin an saindang klero nakisumaro na sa kinaban, na dian sinabi ni Jesus na dai dapat na magin kabtang an saiyang mga disipulo. (Juan 15:17-19) An saindang mga kongregasyon, na ignorante sa tema kan Biblia, an Kahadean nin Dios, bakong mga kandelero na nagpapasirang kan katotoohan kan Kasuratan, ni kabtang man kan espirituwal na templo ni Jehova an saindang mga miembro. An pangenot nindang mga lalaki (asin babae) bakong mga bitoon kundi nahayag na mga miembro kan “tawo nin katampalasanan.”—2 Tesalonica 2:3; Malaquias 3:1-3.

11. (a) Anong Kristianong grupo na namugtak sa situwasyon kan kinaban kaidtong 1918 an nagkuyog sa mga tataramon ni Jesus sa mga taga Efeso? (b) Ano an ginibo kan grupong Juan magpoon kan 1919?

¹¹ Minsan siring, an grupong Juan nagluwas sa maribok na mga aldaw kan enot na guerra mundial na may pagkamoot ki Jehova asin sa katotoohan na nagpahiro sainda na maglingkod sa saiya na may naglalaad na kaigotan. Linabanan ninda an mga nagprobar na ilaog an sektarismo  paagi sa haros paggibong idolo sa enot na presidente kan Watch Tower Society, si Charles T. Russell, pagkagadan nia kan 1916. Huling nadisiplina nin mga persekusyon asin kasakitan, an Kristianong grupong ini malinaw na hinusgaran na ‘marahay an gibo’ kan saindang Kagurangnan asin inagda na lumaog sa saiyang kagayagayahan. (Mateo 25:21, 23) Namidbid ninda sa dalagan kan mga pangyayari sa kinaban, asin sa sainda mismong mga eksperyensia, an kaotoban kan tanda na itinao ni Jesus na magsesenyalar kan saiyang dai naheheling na presensia na may kapangyarihan sa Kahadean. Magpoon kan 1919, sinda nag-abante tanganing makikabtang sa dugang pang kaotoban kan dakulang propesiya ni Jesus: “Asin an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 6:9, 10; 24:3-14) Kun sa ano man na paagi kulang kaidto an saindang pagkamoot ki Jehova, iyan pinalaad magpoon kan panahon na idto.

12. (a) Sa sarong historikong kombension kan 1922, anong pangagda an itinao? (b) Anong ngaran an maogmang inako kan tunay na mga Kristiano kan 1931, asin ano an pinagsolsolan ninda?

¹² Sa sarong historikong kombension, na inatenderan nin 18,000 sa mga Kristianong ini, sa Cedar Point, Ohio, E.U.A., Setyembre 5-13, 1922, itinao an pangagdang ini: “Balik kamo sa langtad, O kamong mga aki kan kaharohalangkaweng Dios! . . . Kaipuhan na maaraman kan kinaban na si Jehova Dios asin na si Jesu-Cristo Hade nin mga hade asin Kagurangnan nin mga kagurangnan. . . . Kun siring ipaisi, ipaisi, ipaisi, an Hade asin an saiyang kahadean.” Ginigibong mas prominente an mahalagang marhay na ngaran ni Jehova. Kan 1931 an mga Kristianong ini, na tiripon sa kombension sa Columbus, Ohio, E.U.A., naggayagayang akoon asin gamiton an ngaran na isinabi nin Dios sa propesiya ni Isaias—Mga Saksi ni Jehova. (Isaias 43:10, 12) Sa luwas kaiyan na Marso 1, 1939, an ngaran kan pangenot na babasahon kan organisasyon liniwat na magin An Torrengbantayan Nagpapahayag kan Kahadean ni Jehova, sa siring nagtatao nin pangenot na onra sa satong Kaglalang asin sa saiyang sa hadeng gobyerno. Pinagsolsolan kan mga Saksi ni Jehova, na may nanumbalik na pagkamoot ki Jehova, an ano man na posibleng pagkukulang ninda kan nakaagi sa pagtao nin onra asin sa pagpadakula sa kabantogan kan saiyang ngaran asin Kahadean.—Salmo 106:6, 47, 48.

“Sa Makadaog”

13. (a) Anong bendisyon an nakatagama sa mga taga Efeso kun sinda “makadaog”? (b) Paano ‘mandadaog’ an mga Kristianong taga Efeso?

¹³ Sa katapustapusi, arog kan ginigibo man nia sa iba pa niang mga mensahe, inaapod ni Jesus an atension sa espiritu nin Dios bilang iyo an nagpapahayag kan mga balos sa kaimbodan paagi ki Jesus. Sa mga taga Efeso sia nagsasabi: “An may talinga magdangog sa sinasabi kan espiritu sa mga kongregasyon: Sa makadaog itotogot ko na kumakan sa kahoy nin buhay, na yaon sa paraiso nin Dios.” (Kapahayagan 2:7) An mga may talingang nagdadangog magigin galagang kuyogon an mahalagang marhay na mensaheng iyan, sa pakaaram na iyan bakong sa kabotan ni Jesus kundi na iyan gikan mismo sa Soberanong Kagurangnan na Jehova paagi sa Saiyang banal na espiritu, o puersa aktiba. Paano sinda ‘mandadaog’? Paagi sa pagsunod nin maingat sa mga lakad ni Jesus, na nagdanay na may integridad sagkod sa kagadanan asin kun siring nakapagsabi: “Kosogan nindo an saindong boot! Nadaog ko an kinaban.”—Juan 8:28; 16:33; helingon man an 1 Juan 5:4.

14. Ano an seguradong pinapanongdan kan “paraiso nin Dios” na sinabi ni Jesus?

 ¹⁴ Mantang mayo sinda nin paglaom na mabuhay sa sarong paraiso digdi sa daga, taano an linahidan na mga Kristiano, arog kan mga taga Efeso, ta binabalosan nin pakakakan “sa kahoy nin buhay, na yaon sa paraiso nin Dios”? Ini dai puedeng an ibinalik na Paraiso digdi sa daga, ta an 144,000 na linahidan na mga Kristiano, kaiba an mga yaon sa kongregasyon sa Efeso, binakal sa katawohan tanganing mamahala kaiba kan Kordero, si Cristo Jesus, sa langitnon na Bukid nin Sion bilang espiritung mga aki. (Efeso 1:5-12; Kapahayagan 14:1, 4) Huli kaini, an sinasabi digdi seguradong an garo hardin na rona sa langit na mamanahon kan mga nakadaog na ini. Duman, “sa paraiso nin Dios,” iyo, sa atubangan mismo ni Jehova, an mga nakadaog na ini na tinawan nin inmortalidad magpapadagos na mabuhay sagkod lamang, na isinisimbolisar digdi kan pagkakan ninda sa kahoy nin buhay.

15. Taano an pagparigon ni Jesus sa boot na mandaog ta interesanteng marhay para sa dakulang kadaklan ngonyan?

¹⁵ Kumusta man an maimbod na mga parasuportar digdi sa daga sa 144,000 na mga linahidan? An sarong dakulang kadaklan kan kairibang Saksing ini nandadaog man. Alagad an saindang paglaom nasa paglaog sa sarong paraiso digdi sa daga, na duman sinda mainom sa “salog kan tubig nin buhay” asin maoomayan sa “mga dahon kan mga kahoy” na nakatanom sa pangpang kan salog na iyan. (Kapahayagan 7:4, 9, 17; 22:1, 2) Kun saro kamo sa grupong ini, logod na ipahayag man nindo an saindong mainit na pagkamoot ki Jehova asin manggana kamo sa pakikilaban sa pagtubod. Sa siring makakamtan nindo an kaogmahan na buhay na daing katapusan sa Paraisong daga.—Ikomparar an 1 Juan 2:13, 14.

[Nota sa Ibaba]

[Mga Hapot Para sa Pag-adal]

[Kahon sa pahina 36]

Mamomoton na Pag-omaw ki Jehova Asin sa Saiyang Aki

Sa libro nin mga awit na inimprenta kan banwaan ni Jehova kaidtong 1905, doble an kabilangan kan mga awit na nag-oomaw ki Jesus kisa sa mga awit na nag-oomaw ki Jehova Dios. Sa saindang libro nin mga awit kan 1928, haros magkapareho sa kabilangan an mga awit na nagrurukyaw ki Jesus asin an mga awit na nagrurukyaw ki Jehova. Alagad sa pinakabagong libro nin mga awit kan 1984, an kabilangan nin mga awit na nagtatao nin onra ki Jehova apat na doble sa mga awit na nagtatao nin onra ki Jesus. Kaoyon ini kan mismong mga tataramon ni Jesus: “An Ama orog na dakula kisa sako.” (Juan 14:28) Dapat na labaw sa gabos an pagkamoot ki Jehova, na may kaibang hararom na pagkamoot ki Jesus asin pag-apresyar sa saiyang mahalagang marhay na atang saka katongdan bilang Halangkaw na Saserdote nin Dios asin Hade.

[Tsart sa pahina 34]

An Paagi ni Jesus sa Paghatol

(na sinisitar an mga kapitulo asin bersikulo sa Kapahayagan)

Mensahe sa Autoridad sa Pambukas Malinaw Pagtatanos Ibubu- kongregasyon pagtao nin na komen- na sinasabi asin/o ngang

hatol dasyon an problema pagpari- ben-

gon sa disyon

boot

Efeso 2:1 2:2, 3 2:4 2:5, 6 2:7

Smirna 2:8 2:9 — 2:10 2:11

Pergamo 2:12 2:13 2:14, 15 2:16 2:17

Tiatira 2:18 2:19 2:20, 21 2:24, 25 2:26-28

Sardis 3:1 — 3:1, 2 3:3, 4 3:5

Filadelfia 3:7 3:8 — 3:8-11 3:12

Laodicea 3:14 — 3:15-17 3:18-20 3:21