Kapitulo 24

Sarong Mensaheng Mahamis Asin Mapait

Bisyon 6—Kapahayagan 10:1–11:19

Tema: An bisyon kan sadit na rolyo; mga eksperyensia sa templo; an pagpatanog kan ikapitong trumpeta

Panahon nin kaotoban: Poon sa pagtukaw ni Jesus sa trono kan 1914 sagkod sa dakulang kahorasaan

1, 2. (a) Ano an ibinunga kan ikaduwang herak man, asin noarin sasabihon na tapos na an herak man na ini? (b) Siisay ngonyan an naheheling ni Juan na naghihilig hale sa langit?

 NANLAGLAG nin biyo an ikaduwang herak man. Dinamat kaiyan an Kakristianohan asin an mga namomoon dian, “an ikatolong kabtang kan mga tawo,” na huli kaini nabuyagyag na gadan sa espirituwal. (Kapahayagan 9:15) Segurado na pagkatapos kaiyan inisip ni Juan kun ano man an mangyayari sa ikatolong herak man. Alagad ta halat ka! An ikaduwang herak man dai pa tapos—sagkod na maabot niato an punto na nasusurat sa Kapahayagan 11:14. Bago kaiyan, may maheheling si Juan na mga pangyayari na dian sia mismo may aktibong kabtang. Iyan minapoon sa naheling niang nakakapukaw nin may pagkangirhat na paggalang:

² “Asin nakaheling ako nin saro pang makosog na anghel na naghihilig hale sa langit, na nagugubingan nin panganoron, asin may hablon-dawani sa saiyang payo, asin an saiyang lalauogon siring sa saldang, asin an saiyang mga bitis siring sa mga hariging nagkakalayo.”—Kapahayagan 10:1.

3. (a) Siisay an “makosog na anghel”? (b) Ano an kahulogan kan hablon-dawani sa saiyang payo?

³ Siisay an “makosog na anghel” na ini? Malinaw na iyan an pinamuraway na si Jesu-Cristo sa ibang katongdan. Sia nagugubingan nin panganoron nin pagigin dai naheheling, na nagpapagirumdom sato kan mas naenot na mga tataramon ni Juan manongod ki Jesus: “Uya! Sia madatong kaiba kan mga panganoron, asin an gabos na mata makakaheling sa saiya, asin an mga suminaksak sa saiya.” (Kapahayagan 1:7; ikomparar an Mateo 17:2-5.) An hablon-dawani sa saiyang payo nagpapagirumdom sato kan mas naenot na bisyon ni Juan sa trono ni Jehova, na may “hablon-dawani na agid an itsura sa esmeralda.” (Kapahayagan 4:3; ikomparar an Ezequiel 1:28.) An hablon-dawaning iyan nagsusuherir kan katrangkilohan asin katoninongan sa palibot kan trono nin Dios. Sa kaparehong paagi, an hablon-dawaning ini sa payo kan anghel magpapamidbid sa saiya bilang espesyal na mensahero nin katoninongan, an ihinulang “Prinsipe nin Katoninongan” ni Jehova.—Isaias 9:6, 7.

4. Ano an ipinaparisa kan (a) pagigin “siring sa saldang” kan lalauogon kan makosog na anghel? (b) pagigin “siring sa mga hariging nagkakalayo” kan mga bitis kan anghel?

⁴ An lalauogon kan makosog na anghel “siring sa saldang.” Bago kaini, sa saiyang bisyon ki Jesus sa templo nin Dios, narisa ni Juan na an lalauogon ni Jesus “siring sa saldang kun iyan nagliliwanag sa kakosogan kaiyan.” (Kapahayagan 1:16) Si Jesus, bilang “an saldang nin katanosan,” minasirang na may pagpaomay sa saiyang mga pakpak para sa kapakinabangan kan mga  natatakot sa ngaran ni Jehova. (Malaquias 4:2) Bako sanang an lalauogon kundi pati an mga bitis kan anghel na ini mamuraway, “siring sa mga hariging nagkakalayo.” An masarig niang tindog tindog nin Saro na tinawan ni Jehova kan “gabos na autoridad sa langit asin sa daga.”—Mateo 28:18; Kapahayagan 1:14, 15.

5. Ano an naheheling ni Juan na kapot kan makosog na anghel?

⁵ Naobserbaran pa ni Juan: “Asin may kapot siang sadit na rolyo na nabibiklad. Asin itinungtong nia an too niang bitis sa dagat, alagad an wala niang bitis sa daga.” (Kapahayagan 10:2) Saro pang rolyo? Iyo, alagad ngonyan bako iyan na serado nin tatak. Kaiba ni Juan, makakaasa kita na sa dai na mahahaloy makakaheling kita nin dugang pang nakakapukaw sa boot na mga kapahayagan. Pero, enot, itinatao sato an mga kamugtakan na nakapalibot sa mangyayari.

6. (a) Taano ta angay na an mga bitis ni Jesus yaon sa daga asin sa dagat? (b) Kasuarin lubos na naotob an Salmo 8:5-8?

⁶ Balikan niato an paglaladawan ki Jesus. An saiyang nagkakalayong mga bitis nasa daga asin dagat, na dian sia nagkakapot ngonyan nin lubos na autoridad. Iyan siring nanggad sa sinasabi sa propetikong salmo: “Ginibo mo [ni Jehova] man sia [si Jesus] na hababa nin kadikit sa mga agid sa Dios, asin kinoronahan mo sia nin kamurawayan asin kagayonan. Pinapamahala mo sia sa mga gibo kan saimong mga kamot; an gabos ibinugtak mo sa irarom kan saiyang mga bitis: mga karnero saka kanding asin kapon na baka, sinda gabos, siring man an mga hayop sa kapatagan, an mga gamgam sa langit asin an mga sira sa dagat, ano man na nag-aagi sa mga dalan kan kadagatan.” (Salmo 8:5-8; helingon man an Hebreo 2:5-9.) An salmong ini lubos na naotob kan 1914, kan si Jesus patukawon bilang Hade kan Kahadean nin Dios asin nagpoon an panahon kan katapusan. Sa siring, an naheheling digdi ni Juan sa bisyon aplikado poon sa taon na iyan.—Salmo 110:1-6; Gibo 2:34-36; Daniel 12:4.

An Pitong Daguldol

7. Paano nagkukurahaw an makosog na anghel, asin ano an kahulogan kan saiyang kurahaw?

⁷ An pagperopensar ni Juan sa makosog na anghel na ini pinutol mismo kan anghel: “Asin sia [an anghel] nagkurahaw sa makosog na tingog siring kan leon kun minaungal. Asin kan sia kumurahaw, pinaluwas kan pitong daguldol an sadiri nindang mga tingog.” (Kapahayagan 10:3) An siring kakosog na kurahaw seguradong makakaapod sa atension ni Juan, na nagpapatunay na si Jesus iyo man nanggad “an Leon na gikan sa tribo ni Juda.” (Kapahayagan 5:5) Seguradong aram man ni Juan na kun beses si Jehova sinasabi man na ‘nag-uungal.’ An pag-ungal ni Jehova propetikong nagbabareta kan pagtipon giraray sa espirituwal na Israel asin kan pagdatong kan mapanlaglag na “aldaw ni Jehova.” (Oseas 11:10; Joel 3:14, 16; Amos 1:2; 3:7, 8) Malinaw, kun siring, an garo ungal nin leon na kurahaw kan makosog na anghel na ini naghuhula  nin kaagid na darakulang pangyayari para sa dagat asin daga. Inaapodan kaiyan an pitong daguldol na magtaram.

8. Ano an ‘mga tingog kan pitong daguldol’?

⁸ Dati nang nakadangog si Juan nin mga daguldol na naghahale sa mismong trono ni Jehova. (Kapahayagan 4:5) Kan panahon ni David, an literal na daguldol kun beses sinasabing “tingog ni Jehova.” (Salmo 29:3) Kan makosog na ipahayag ni Jehova an saiyang katuyohan na pamurawayon an saiyang ngaran kan mga aldaw kan ministeryo ni Jesus sa daga, para sa dakol idto garo daguldol. (Juan 12:28, 29) Kun siring, rasonableng isipon na an ‘mga tingog kan pitong daguldol’ mga kapahayagan mismo ni Jehova manongod sa saiyang mga katuyohan. An bagay na may “pitong” daguldol nagsusuherir kan pagkakompleto kan nadangog ni Juan.

9. Ano an ipinagboboot nin sarong tingog hale sa langit?

⁹ Alagad ta hinanyoga! Nadangog an saro pang tingog. Iyan may pagboot na seguro nagin pambihira para ki Juan: “Ngonyan kan magtaram an pitong daguldol, masurat na kuta ako; alagad ta nadangog ko an sarong tingog hale sa langit na nagsabi: ‘Serahan mo nin tatak an mga bagay na itinaram kan pitong daguldol, asin dai mo iyan ipagsurat.’” (Kapahayagan 10:4) Segurado na gustong-gusto ni Juan na madangog asin isurat an nagdadaguldol na mga mensaheng idto, kun paanong an grupong Juan ngonyan galagang naghahalat na ipahayag ni Jehova an saiyang mga katuyohan tanganing ikapublikar. An siring na mga kapahayagan minaabot sana sa itinalaan na panahon ni Jehova.—Lucas 12:42; helingon man an Daniel 12:8, 9.

An Katapusan kan Sagradong Hilom

10. Sa ngaran niisay na suminumpa an makosog na anghel, asin sa anong kapahayagan?

¹⁰ Mientras tanto, may saro pang sugo ki Juan si Jehova. Pagkatanog kan pitong daguldol, an makosog na anghel nagtaram giraray: “Asin an anghel na naheling kong nagtitindog sa dagat asin sa daga nag-itaas kan saiyang toong kamot sa langit, asin sa ngaran kan Saro na nabubuhay sagkod pa man, na naglalang sa langit saka sa mga bagay na yaon dian asin sa daga saka sa mga bagay na yaon dian patin sa dagat saka sa mga bagay na yaon dian, sia suminumpa: ‘Dai na nin pag-atraso.’” (Kapahayagan 10:5, 6) Sa ngaran niisay na suminumpa an makosog na anghel? An pinamuraway na si Jesus suminumpa, bakong sa ngaran nia, kundi sa ngaran kan Autoridad na pinakahalangkaw sa gabos, si Jehova, an inmortal na Kaglalang kan kalangitan asin kan daga. (Isaias 45:12, 18) Paagi sa sumpang ini, sinisierto kan anghel ki Juan na dai na mag-aatraso an Dios.

11, 12. (a) Ano an kahulogan kan “dai na nin pag-atraso”? (b) Ano an tataposon?

¹¹ An termino sa Griego na trinadusir digding “pag-atraso” khroʹnos, na sa literal nangangahulogan “panahon.” Huli kaini, may mga naghohona na an sinabing ini kan anghel maninigong tradusiron na: “Dai na nin panahon,” na garo baga matatapos an panahon na aram niato. Alagad ta an termino digding khroʹnos ginagamit na mayo nin artikulo depinido. Kaya iyan dai nangangahulogan nin panahon sa pangkagabsan kundi, imbes, “sarong panahon” o “sarong peryodo nin panahon.” Sa ibang pagtaram, dai na magkakaigwa nin dugang pang peryodo nin panahon (o, pag-atraso) si Jehova. An sarong berbo sa Griego na kinua sa khroʹnos ginagamit man sa Hebreo 10:37, na dian si Pablo, sa pagkotar sa Habacuc 2:3, 4, nagsurat na “an nagdadangadang . . . dai mag-aatraso.”

¹² “Dai na nin pag-atraso”—an mga tataramon na iyan gustong-gusto kan naggugurang nang grupong Juan ngonyan! Sa anong bagay na dai nin pag-atraso? Sinasabi sato ni Juan: “Kundi sa mga aldaw kan pagpatanog kan ikapitong anghel, kun  papatanogon na nia an saiyang trumpeta, an sagradong hilom nin Dios segun sa maogmang bareta na saiyang ipinahayag sa sadiri niang mga oripon na propeta tunay na tataposon na.” (Kapahayagan 10:7) Uya na an panahon ni Jehova na darahon an saiyang sagradong hilom sa maogmang kulminasyon kaiyan, na may mamuraway na kapangganahan!

13. Ano an sagradong hilom nin Dios?

¹³ Ano an sagradong hilom na ini? Kalabot dian an banhi na enot na ipinanuga sa Eden, na sa pangenot iyo si Jesu-Cristo. (Genesis 3:15; 1 Timoteo 3:16) Iyan may koneksion man sa kun siisay an babae na luluwasan kan Banhi. (Isaias 54:1; Galacia 4:26-28) Dugang pa, kaiba dian an sekondaryong mga miembro kan grupong banhi asin an Kahadean na paghahadean kan Banhi. (Lucas 8:10; Efeso 3:3-9; Colosas 1:26, 27; 2:2; Kapahayagan 1:5, 6) An maogmang bareta manongod sa daing kaagid na langitnon na Kahadean na ini dapat na ihulit sa bilog na daga sa panahon kan katapusan.—Mateo 24:14.

14. Taano an ikatolong herak man ta konektado sa Kahadean nin Dios?

¹⁴ Daing duwa-duwa na ini an pinakamaogmang bareta. Pero, sa Kapahayagan 11:14, 15, an ikatolong herak man konektado sa Kahadean. Taano? Huli ta para sa mga tawo na mas gusto an sistema nin mga bagay ni Satanas, an pagtrumpeta kan maogmang bareta na an sagradong hilom nin Dios tapos na—an boot sabihon, an Mesiyanikong Kahadean nin Dios yaon na—makamomondong bareta. (Ikomparar an 2 Corinto 2:16.) Iyan nangangahulogan na an areglo sa kinaban na gustong-gusto ninda madali nang laglagon. An mga tingog kan pitong daguldol, na igwa kan mga patanid sa nagdadangadang na bagyo, nagigin mas klaro asin makosog mantang nagdadangadang an dakulang aldaw nin pamalos ni Jehova.—Sofonias 1:14-18.

An Nabibiklad na Rolyo

15. Ano an sinabi ki Juan kan tingog hale sa langit asin kan makosog na anghel, asin ano an epekto ki Juan?

¹⁵ Mantang hinahalat ni Juan an pagpatanog kaining ikapitong trumpeta asin an pagtapos sa sagradong hilom nin Dios, tinawan sia nin dagdag pang asignasyon: “Asin an tingog na nadangog ko hale sa langit nakikipag-olay giraray sa sako asin nagsasabi: ‘Lakaw, kuana an nabibiklad na rolyo na yaon sa kamot kan anghel na nagtitindog sa dagat asin sa daga.’ Asin nagduman ako sa anghel asin sinabihan ko sia na itao sa sako an sadit na rolyo. Asin sia nagsabi sa sako: ‘Kuana asin uboson mong kakanon iyan, asin papapaiton kaiyan an saimong tulak, alagad sa saimong ngoso iyan magigin mahamis siring sa tangguli.’ Asin kinua ko an sadit na rolyo sa kamot kan anghel asin inubos kong kakanon iyan, asin sa sakong ngoso mahamis iyan siring sa tangguli; alagad kan iyan maubos ko nang kakanon, pinapait kaiyan an sakong tulak. Asin sinasabi ninda sa sako: ‘Dapat na magpropesiya ka giraray mapadapit sa mga banwaan asin mga nasyon asin mga lenguahe patin dakol na hade.’”—Kapahayagan 10:8-11.

16. (a) Paano si propeta Ezequiel nagkaigwa nin eksperyensia na kaagid kan ki Juan? (b) Taano ta nagin mahamis para ki Juan an sadit na rolyo, alagad taano ta idto mapait na tunawon?

¹⁶ An eksperyensia ni Juan medyo nakakaagid kan ki propeta Ezequiel kaidtong pagkadistiero nia sa daga nin Babilonya. Pinagbotan man siang kumakan nin rolyo na mahamis sa saiyang ngoso. Alagad kan mabasog kaiyan an saiyang tulak, ginibo sia kaiyan na may paninimbagan na maghula nin mapait na mga bagay para sa rebeldeng kamag-anakan nin Israel. (Ezequiel 2:8–3:15) An nabibiklad na rolyo na itinao ki Juan kan pinamuraway na si Jesu-Cristo saro man na mensahe nin Dios. Si Juan kaipuhan na maghulit mapadapit sa “mga banwaan asin mga nasyon asin mga lenguahe patin dakol na hade.” An pagkakan kan rolyong ini mahamis para sa saiya huli ta iyan gikan sa Dios. (Ikomparar an Salmo 119:103; Jeremias 15:15, 16.) Alagad nagin mapait iyan na tunawon ta—arog kaidto ki Ezequiel—iyan naghuhula nin mapait na mga bagay para sa rebeldeng mga tawo.—Salmo 145:20.

17. (a) Sairisay an nagsabi ki Juan na magpropesiya “giraray,” asin ano an kahulogan kaini? (b) Noarin nakatalaan na maotob an dramatikong paglaladawan na naheling ni Juan?

¹⁷ An mga nagsabi ki Juan na magpropesiya giraray daing duwa-duwa na si Jehova Dios asin si Jesu-Cristo. Si Juan, minsan ngani desterrado sa isla nin Patmos, nagpropesiya na mapadapit sa mga banwaan, nasyon, lenguahe, asin hade paagi sa impormasyon na nakasurat na sagkod kaidto sa libro nin Kapahayagan. An terminong “giraray” nangangahulogan na dapat na isurat asin ipublikar nia an natatada pang impormasyon na nakasurat sa libro nin Kapahayagan. Alagad girumdoma na si Juan aktuwal na nagpapartisipar digdi sa propetikong bisyon. Sa katunayan, an saiyang isinusurat propesiya na maootob pakalihis kan 1914, kun an makosog na anghel tumindog  nang nakatungtong sa daga asin sa dagat. Kun siring, ano an kahulogan kan dramatikong paglaladawan na ini para sa grupong Juan ngonyan?

An Sadit na Rolyo Ngonyan

18. Sa kapinonan kan aldaw kan Kagurangnan, anong interes an ipinaheling kan grupong Juan sa libro nin Kapahayagan?

¹⁸ Sa pambihirang paagi, an naheling ni Juan nagserbing anino sa nagin eksperyensia kan grupong Juan sa kapinonan kan aldaw kan Kagurangnan. Bako pang kompleto kaidto an pakasabot ninda sa mga katuyohan ni Jehova, pati sa kahulogan kan pitong daguldol. Minsan siring, hararom an interes ninda sa Kapahayagan, asin nagkomento si Charles Taze Russell sa dakol na kabtang kaiyan kan panahon na sia nabubuhay. Pagkagadan nia kan 1916, an dakol sa mga isinurat nia tinipon asin ipinublikar sa sarong libro na may titulong The Finished Mystery. Pero, pag-abot nin panahon, an librong ini nagin kulang na bilang paliwanag sa Kapahayagan. An natatada sa mga tugang ni Cristo kinaipuhan na maghalathalat pa, sagkod na pumoon na maotob an mga bisyon, para sa tamang pakasabot sa ipinasabong na rekord na iyan.

19. (a) Paano ginamit ni Jehova Dios an grupong Juan bago pa man lubos na napublikar an mga tingog kan pitong daguldol? (b) Kasuarin itinao sa grupong Juan an nabibiklad na sadit na rolyo, asin ano an nagin kahulogan kaini para sa sainda?

¹⁹ Minsan siring, kapareho ni Juan, ginamit sinda ni Jehova bago pa man lubos na napublikar an mga tingog kan pitong daguldol. Sinda maigot na naghulit sa laog nin 40 taon bago 1914, asin naghingoa sindang magdanay na aktibo kaidtong enot na guerra mundial. Sinda an nanompongan na nagtatao sa mga domestiko nin kakanon sa tamang panahon kan dumatong an kagurangnan. (Mateo 24:45-47) Sa siring, kan 1919 sinda an tinawan kan nabibiklad na sadit na rolyo—an boot sabihon, bukas na mensahe na ihuhulit sa katawohan. Kapareho ni Ezequiel sinda may mensahe para sa sarong organisasyon na bakong maimbod—an Kakristianohan—na naghihingakong naglilingkod sa Dios, alagad, sa katotoohan, dai. Kapareho ni Juan sinda kaipuhan pang maghulit mapadapit sa “mga banwaan asin mga nasyon asin mga lenguahe patin dakol na hade.”

20. Ano an ilinadawan kan pag-ubos ni Juan kan rolyo?

²⁰ An pag-ubos ni Juan kan rolyo nagladawan  sa bagay na an asignasyon na ini inako kan mga tugang ni Jesus. Iyan nagin kabtang ninda sagkod na sinda ngonyan konektado nang marhay sa kabtang na ini kan ipinasabong na Tataramon nin Dios, na nagin kakanon ninda. Alagad an kaipuhan nindang ihulit may kaibang mga kapahayagan nin mga paghokom ni Jehova na bakong manamit para sa dakol na tawo. Sa katunayan, kaiba dian an mga damat na ihinula sa Kapahayagan kapitulo 8. Minsan siring, mahamis para sa sinserong mga Kristianong ini na maaraman an mga paghokom na iyan asin marealisar na ginagamit giraray sinda ni Jehova sa pagbalangibog kaiyan.—Salmo 19:9, 10.

21. (a) Paano an mensahe sa sadit na rolyo nagin mahamis man para sa dakulang kadaklan? (b) Taano an maogmang bareta ta maraot na bareta para sa mga kalaban?

²¹ Pag-abot nin panahon, an mensahe sa rolyong ini nagin mahamis man sa “dakulang kadaklan . . . hale sa gabos na nasyon asin tribo asin banwaan patin lenguahe” na nakuang nag-aagagha huli sa makauuyam nin makuring mga bagay na naheling nindang ginigibo sa Kakristianohan. (Kapahayagan 7:9; Ezequiel 9:4) An mga ini entusiastiko man na nagbabalangibog kan maogmang bareta, na naggagamit nin mahamis, mataktikang mga tataramon sa paglaladawan kan marahayon na probisyon ni Jehova para sa arog-karnerong mga Kristiano. (Salmo 37:11, 29; Colosas 4:6) Alagad para sa mga kalaban, ini maraot na bareta. Taano? Iyan nangangahulogan na an sistemang pinagtitiwalaan ninda—asin tibaad nagtao pa ngani sainda nin temporaryong satispaksion—kaipuhan na mawara. Para sa sainda, an maogmang bareta nangangahulogan nin kalaglagan.—Filipos 1:27, 28; ikomparar an Deuteronomio 28:15; 2 Corinto 2:15, 16.

[Mga Hapot Para sa Pag-adal]

[Mga ritrato sa pahina 160]

An grupong Juan asin an saindang kairiba nagbabalangibog sa bilog na katawohan nin mensaheng mahamis asin mapait