Kapitulo 15

“Siisay an Maninigo na Magbiklad kan Rolyo?”

1. Ano ngonyan an nangyari sa bisyon ni Juan?

 MAMURAWAY! Nakakapukaw nin may pagkangirhat na paggalang! Siring kaiyan an nakakapukaw sa boot na bisyon kan trono ni Jehova sa kamugtakan kaiyan sa tahaw kan mga lampara nin kalayo, kerubin, 24 kamagurangan, asin garo salming na dagat. Alagad Juan, ano an sunod na naheheling mo? Nagkonsentrar si Juan sa mismong sentro kan langitnon na eksenang ini, na sinasabi sato: “Asin naheling ko sa toong kamot kan Saro na nakatukaw sa trono an sarong rolyo na may surat sa laog asin sa ibong, na serado nin pitong tatak. Asin naheling ko an sarong makosog na anghel na nagsasabi sa makosog na tingog: ‘Siisay an maninigo na magbiklad kan rolyo asin magtangkas kan mga tatak kaiyan?’ Alagad ta ni sa langit ni sa ibabaw kan daga ni sa irarom kan daga mayo dawa saro na nakabiklad kan rolyo o nakaheling sa laog kaiyan. Asin ako nanangis nin makuri huli ta mayo nin nakuang maninigo na magbiklad kan rolyo o magheling kan laog kaiyan.”—Kapahayagan 5:1-4.

2, 3. (a) Taano ta galaga si Juan na may manompongan na saro na mabiklad kan rolyo, alagad ta ano an garo baga esperansa manongod dian? (b) Ano an galagang hinahalat kan linahidan na banwaan nin Dios sa satong panahon?

² Si Jehova mismo, an Soberanong Kagurangnan kan gabos na linalang, iyo an nagkakapot kan rolyo. Segurado na iyan pano nin mahahalagang impormasyon, ta iyan may surat sa ibabaw asin sa likod. Napupukaw an pagmawot niatong makaaram. Ano daw an laog kan rolyo? Nagigirumdoman niato an imbitasyon ni Jehova ki Juan: “Sakat digdi, asin ipapaheling ko sa saimo an mga bagay na mangyayari nanggad.” (Kapahayagan 4:1) Haros dai na kita makahalat, naglalaom kitang maaraman an mga bagay na iyan. Alagad ta higot an pagkalulon kan rolyo, na serado nin pitong tatak!

 ³ May manonompongan daw an makosog na anghel na saro na maninigong magbiklad kan rolyo? Segun sa Kingdom Interlinear, an rolyo nasa “ibabaw kan toong kamot” ni Jehova. Ini nagsusuherir na iyan kapot nia sa saiyang bukas na palad. Alagad minalataw na mayo nin siisay man sa langit o sa ibabaw nin daga na maninigong umako asin magbiklad kan rolyo. Minsan sa irarom kan daga, sa gadan nang maimbod na mga lingkod nin Dios, mayo nin kualipikado para sa halangkaw na onrang ini. Bakong makangangalas na kuminolog na marhay an boot ni Juan! Tibaad dai nia maaraman “an mga bagay na mangyayari nanggad.” Sa sato man na panahon, an linahidan na banwaan nin Dios galagang naghahalat na itao ni Jehova an saiyang liwanag asin katotoohan manongod sa Kapahayagan. Ini gigibohon nia nin progresibo sa itinalaan na panahon na an propesiya maootob, tanganing giyahan an saiyang banwaan sa dalan nin “dakulang kaligtasan.”—Salmo 43:3, 5.

An Sarong Maninigo

4. (a) Siisay an nadiskobre na maninigo na magbiklad kan rolyo asin magtangkas kan mga tatak kaiyan? (b) Sa anong balos asin pribilehio nakikikabtang ngonyan an grupong Juan asin an saindang kairiba?

⁴ Iyo, igwa nin saro na makakabiklad kan rolyo! Si Juan nagsasaysay: “Alagad an saro sa kamagurangan nagsabi sa sako: ‘Dai ka na magtangis. Uya! An Leon na gikan sa tribo ni Juda, an gamot ni David, nakadaog tanganing makabiklad kan rolyo asin makatangkas kan pitong tatak kaiyan.’” (Kapahayagan 5:5) Kaya Juan, pahida an luha mo! An grupong Juan asin an maimbod nindang kairiba ngonyan nagtagal man nin dakol na dekada nin grabeng mga pagbalo mantang mapasensiang naghahalat para sa kaliwanagan. Abaa kanakakarangang balos sa sato ngonyan na nasasabotan niato an bisyon, asin abaa kadakulang pribilehio na makikabtang sa kaotoban kaiyan paagi sa pagbalangibog kan mensahe kaiyan sa iba!

5. (a) Anong propesiya an may labot ki Juda, asin saen namahala an mga gikan ni Juda? (b) Siisay si Silo?

⁵ A, “an Leon na gikan sa tribo ni Juda”! Pamilyar si Juan sa propesiya na sinabi ni Jacob, an apoon kan rasang Judio, may labot sa ikaapat niang aki, si Juda: “Si Juda sarong ogbon nin leon. Paghale sa paniniba, aki ko, na ika matindog nanggad. Sia luminuko, sia huminigda na siring sa leon asin, siring sa leon, siisay an mangangahas na pumukaw sa saiya? An setro dai mahale ki Juda, ni an baston nin komandante hale sa tahaw kan saiyang mga bitis, sagkod na dumatong si Silo; asin mapapasaiya an pagkuyog kan mga banwaan.” (Genesis 49:9, 10) An dinastiya kan banwaan nin Dios gikan ki Juda. Magpoon ki David, an gabos na hade na namahala sa Jerusalem sagkod na laglagon kan mga Babilonyo an siudad na idto mga gikan ni Juda. Alagad mayo ni saro sa sainda an Silo na sinabi ni Jacob sa propesiya. An Silo nangangahulogan “Sia na Saiya [an Deretso].” Sa hula, an ngaran na ini nagtokdo ki Jesus, an saro na ngonyan iyo an permanenteng kagsadiri kan Kahadean ni David.—Ezequiel 21:25-27; Lucas 1:32, 33; Kapahayagan 19:16.

6. Sa anong paagi na si Jesus “sadit na sanga” ni Jese asin “gamot ni David”?

⁶ Madaling namidbid ni Juan an pagkasambit  sa “gamot ni David.” An ipinanugang Mesiyas inaapod sa propesiya na “sadit na sanga hale sa pungo ni Jese [an ama ni Hadeng David] . . . sarong supang” sagkod “gamot ni Jese na matindog bilang sarong senyal para sa mga banwaan.” (Isaias 11:1, 10) Si Jesus sadit na sanga ni Jese, ta namundag sia sa dinastiya ni David, aki ni Jese. Dugang pa, bilang gamot ni Jese, sia an Saro na nagpasupang giraray kan dinastiya ni David, na tinatawan iyan nin buhay asin nin ikakabuhay sagkod lamang.—2 Samuel 7:16.

7. Ano an dahelan na si Jesus maninigo na kumua kan rolyo sa kamot kan Saro na nakatukaw sa trono?

⁷ Si Jesus, bilang sangkap na tawo, iyo an labaw sa gabos na naglingkod ki Jehova na may integridad asin sa irarom nin makuring mga pagbalo. Sia an nagtao kan kompletong simbag sa angat ni Satanas. (Talinhaga 27:11) Sa siring, nasabi nia an arog kan sinabi nia kan banggi bago sia nagadan bilang atang, “Nadaog ko an kinaban.” (Juan 16:33) Sa dahelan na ini, ipinaniwala ni Jehova sa binuhay liwat na si Jesus “an gabos na autoridad sa langit asin sa daga.” Sa gabos na lingkod nin Dios sia sana an kualipikado na umako kan rolyo, na an katuyohan ipahayag an importanteng mensahe kaiyan.—Mateo 28:18.

8. (a) Mapadapit sa Kahadean, ano an nagpapaheling kan pagigin maninigo ni Jesus? (b) Taano ta angay na saro sa 24 kamagurangan an maghayag ki Juan kun siisay an maninigo na magbiklad kan rolyo?

⁸ Angay nanggad na si Jesus an magbiklad kan rolyo. Poon kan 1914 sia pinatukaw sa trono bilang Hade kan Mesiyanikong Kahadean nin Dios, asin kadakol kan ihinahayag kan rolyong iyan may labot sa Kahadean asin sa gigibohon kaiyan. Si Jesus maimbod na nagpatotoo sa katotoohan manongod sa Kahadean mantang yaon sia kaidto sa daga. (Juan 18:36, 37) Tinokdoan nia an saiyang mga parasunod na ipamibi an pagdatong kan Kahadean. (Mateo 6:9, 10) Pinonan nia an paghuhulit kan maogmang bareta kan Kahadean sa kapinonan kan Kristianong kapanahonan asin sinabi sa propesiya an kulminasyon kan paghuhulit na iyan sa panahon kan katapusan. (Mateo 4:23; Marcos 13:10) Angay man na saro sa 24 kamagurangan an maghayag ki Juan na si Jesus an matangkas kan mga tatak. Taano? Huli ta an kamagurangan na ini nakatukaw sa mga trono asin may mga korona, mantang sinda paramana kaiba ni Cristo sa saiyang Kahadean.—Roma 8:17; Kapahayagan 4:4.

‘An Korderong Ginadan’

9. Imbes na leon, ano an naheling ni Juan na nakatindog “sa tahaw kan trono,” asin paano nia iyan ilinadawan?

⁹ Hineling ni Juan an “Leon na gikan sa tribo ni Juda.” Alagad ta makangangalas nanggad! An nagluwas sarong simbolikong pigura na laen na marhay: “Asin naheling ko na nakatindog sa tahaw kan trono asin kan apat na buhay na linalang asin sa tahaw kan kamagurangan an sarong kordero na garo baga ginadan, na may pitong sungay asin pitong mata, mga mata na nangangahulogan kan pitong espiritu nin Dios na isinugo sa bilog na daga.”—Kapahayagan 5:6.

10. Siisay an “kordero” na naheling ni Juan, asin taano ta angay an terminong iyan?

¹⁰ Sa tahaw mismo, sa kataed kan trono, duman mismo sa napapalibotan kan apat na buhay na linalang asin kan 24 kamagurangan, igwa nin sarong kordero! Daing duwa-duwa na madaling ikinaasosyar ni Juan an korderong ini sa “Leon na gikan sa tribo ni Juda” asin sa “gamot ni David.” Aram nia na, labing 60 taon bago kaini, si Jesus ipinamidbid ni Juan na Bautisador sa nagmamasid na mga Judio bilang “an Kordero nin Dios na naghahale kan kasalan kan kinaban!” (Juan 1:29) Sa bilog niang buhay digdi sa daga, si Jesus nagdanay na daing digta kan kinaban—siring sa korderong daing kaninan—tanganing ikadolot nia an saiyang buhay na daing katuyawan bilang atang para sa katawohan.—1 Corinto 5:7; Hebreo 7:26.

11. Taano ta bako man na daing dignidad na irepresentar an pinamuraway na si Jesus bilang “sarong kordero na garo baga ginadan”?

¹¹ Garo daw nakakamenos o daing dignidad na irepresentar an pinamuraway na si Jesus bilang “sarong kordero na garo baga ginadan”? Dai nanggad! An bagay na si Jesus nagdanay na maimbod sagkod sa kagadanan dakulang pagkadaog ni Satanas asin dakulang kapangganahan para ki Jehova Dios. An pagrepresentar ki Jesus sa paaging ini buhay na buhay na naglaladawan kan saiyang pakadaog sa kinaban ni Satanas asin nagpapagirumdom kan hararom na pagkamoot ni Jehova asin ni Jesus para sa katawohan. (Juan 3:16; 15:13; ikomparar an Colosas 2:15.) Sa siring, itinotokdo si Jesus bilang an ipinanugang Banhi, na kualipikado nanggad na magbiklad kan rolyo.—Genesis 3:15.

12. Ano an ilinaladawan kan pitong sungay kan Kordero?

¹² Ano pa an nakakadagdag sa satong pag-apresyar sa “korderong” ini? Sia may pitong sungay.  Sa Biblia an sungay parateng simbolo nin kapangyarihan o autoridad, asin an pito tanda nin pagkakompleto. (Ikomparar an 1 Samuel 2:1, 10; Salmo 112:9; 148:14.) Huli kaini, an pitong sungay kan Kordero nagrerepresentar sa pagigin lubos kan kapangyarihan na ipinaniwala ni Jehova ki Jesus. Sia “mas halangkaw na marhay kisa sa lambang gobyerno asin autoridad asin kapangyarihan asin pagkakagurangnan patin sa lambang ngaran na inginaran, bako sanang sa sistemang ini nin mga bagay, kundi siring man sa maabot.” (Efeso 1:20-23; 1 Pedro 3:22) Si Jesus partikularmenteng nagkapot nin kapangyarihan, kapangyarihan sa paggobyerno, poon kan 1914 kan sia patukawon ni Jehova sa trono bilang langitnon na Hade.—Salmo 2:6.

13. (a) Ano an ilinaladawan kan pitong mata kan Kordero? (b) Ano an ginibo kan Kordero?

¹³ Dugang pa, si Jesus lubos na napano nin banal na espiritu, na ilinaladawan kan pitong mata kan Kordero, na “nangangahulogan kan pitong espiritu nin Dios.” Si Jesus pinakapaagihan kan pagbolos kan lubos na puersa aktiba ni Jehova sa Saiyang mga lingkod digdi sa daga. (Tito 3:6) Malinaw na paagi man sa espiritung ini na naheheling nia hale sa langit an nangyayari digdi sa daga. Kapareho kan saiyang Ama, si Jesus may sangkap na pakabatid. Mayo nin natatago sa saiya. (Ikomparar an Salmo 11:4; Zacarias 4:10.) Malinaw nanggad, an Aking ini—an nagdanay na may integridad kaya nakadaog sa kinaban; an Leon na gikan sa tribo ni Juda; an gamot ni David; an saro na nagdolot kan saiyang buhay para sa katawohan; an saro na may lubos na autoridad, lubos na banal na espiritu, asin sangkap na pakabatid gikan ki Jehova Dios—iyo, an sarong ini maninigo nanggad na kumua kan rolyo sa kamot ni Jehova. Nag-aalangan daw siang akoon an katongdan na ini sa mamuraway na organisasyon ni Jehova? Dai! Imbes, “sia nagdolok asin tolos na kinua iyan [an rolyo] sa toong kamot kan Saro na nakatukaw sa trono.” (Kapahayagan 5:7) Kanigoan karahay na halimbawa nin gikan sa boot na pagkuyog!

Mga Awit nin Pag-omaw

14. (a) Ano an reaksion kan apat na buhay na linalang asin kan 24 kamagurangan sa pagkua ni Jesus kan rolyo? (b) Paano an impormasyon na inako ni Juan manongod sa 24 kamagurangan nagpapatunay sa kun sairisay sinda asin sa saindang katongdan?

¹⁴ Ano an reaksion kan iba na nasa atubangan kan trono ni Jehova? “Asin kan kuanon nia an rolyo, an apat na buhay na linalang asin an beinte kuatrong kamagurangan naghuruhod sa atubangan kan Kordero, na an lambang saro may arpa asin mga mangkong bulawan na pano nin insenso, asin an insenso nangangahulogan kan mga pamibi kan mga banal.” (Kapahayagan 5:8) Arog kan apat na buhay na linalang na kerubin sa atubangan kan trono nin Dios, an 24 kamagurangan minaduko sa atubangan ni Jesus bilang pagrekonoser sa saiyang autoridad. Alagad an kamagurangan sanang ini an igwa nin mga arpa asin mangko nin insenso. * Asin sinda sana an nag-aawit ngonyan nin bagong awit. (Kapahayagan 5:9) Sa siring, kaagid sinda kan 144,000 na kabilang sa banal na “Israel nin Dios,” na may dara man na mga arpa asin nag-aawit nin bagong awit. (Galacia 6:16; Colosas 1:12; Kapahayagan 7:3-8; 14:1-4) Dugang pa, an 24 kamagurangan ipinapaheling na may langitnon, sa saserdoteng trabaho, na ilinadawan kan trabaho kan mga saserdote sa suanoy na Israel na nagtotong nin insenso para ki Jehova sa tabernakulo—trabaho na natapos sa daga kan haleon na nin Dios an Ley ni Moises, na ipinako iyan sa hariging pasakitan ki Jesus. (Colosas 2:14) Ano an konklusyon niato sa gabos na ini? Na digdi an linahidan na mga nakadaog naheheling sa saindang asignasyon sa huri bilang ‘mga saserdote nin Dios asin kan Cristo, na mamamahala bilang mga hade kaiba nia sa laog kan sangribong taon.’—Kapahayagan 20:6.

15. (a) Sa Israel, siisay sana an may pribilehiong lumaog sa Kabanalbanale kan tabernakulo? (b) Taano ta puedeng mangahulogan nin buhay o kagadanan para sa halangkaw na saserdote an pagtotong nin insenso bago lumaog sa Kabanalbanale?

¹⁵ Sa suanoy na Israel, an nakakalaog sana sa Kabanalbanale sa atubangan kan simbolikong presensia ni Jehova iyo an halangkaw na saserdote. Para sa saiya, an pagdara nin insenso puedeng mangahulogan nin buhay o kagadanan. An sabi kan ley ni Jehova: “Kukuanon [ni Aaron] an bugtakan nin kalayo na pano nin baga nin kalayo hale sa altar na nasa atubangan ni Jehova, asin an duwa niang palad pano nin pinong insensong mahamot, asin dadarahon nia iyan sa laog kan lipod. Ibubugtak man nia an insenso sa ibabaw kan kalayo sa atubangan ni Jehova, asin matatahoban kan aso kan insenso an takop kan Kaban,  na nasa ibabaw kan Patotoo, tangani na sia dai magadan.” (Levitico 16:12, 13) Imposible para sa halangkaw na saserdote na makalaog sa Kabanalbanale kun dai sia magtotong nin insenso.

16. (a) Sa Kristianong sistema nin mga bagay, sairisay an makakalaog sa antitipikong Kabanalbanale? (b) Taano an linahidan na mga Kristiano ta kaipuhan na ‘magtotong nin insenso’?

¹⁶ Sa Kristianong sistema nin mga bagay bako sanang an antitipikong Halangkaw na Saserdote, si Jesu-Cristo, kundi pati an kada saro sa 144,000 na katabang na saserdote sa katapustapusi makakalaog sa antitipikong Kabanalbanale, an lugar kan presensia ni Jehova sa langit. (Hebreo 10:19-23) An paglaog sa Kabanalbanaleng ini imposible para sa mga saserdoteng ini, na irinerepresentar digdi kan 24 kamagurangan, kun dai sinda ‘magtotong nin insenso,’ an boot sabihon, daing ontok na magdolot nin mga pamibi asin pagngayongayo ki Jehova.—Hebreo 5:7; Judas 20, 21; ikomparar an Salmo 141:2.

Sarong Bagong Awit

17. (a) Anong bagong awit an inaawit kan 24 kamagurangan? (b) Paano an fraseng “bagong awit” parateng ginagamit sa Biblia?

¹⁷ Nadangog ngonyan an awit na magayonon pagdangogon. Iyan inaawit para sa Kordero kan kairiba niang saserdote, an 24 kamagurangan: “Asin nag-aawit sinda nin sarong bagong awit, na an sabi: ‘Maninigo ka na magkua kan rolyo asin magtangkas kan mga tatak kaiyan, huli ta ika ginadan asin paagi kan saimong dugo nagbakal ka nin mga tawo para sa Dios hale sa lambang tribo asin lenguahe asin banwaan patin nasyon.’” (Kapahayagan 5:9) An fraseng “bagong awit” naglataw nin nagkapirang beses sa Biblia asin parateng nanonongod sa pag-omaw ki Jehova huli sa sarong makakamhan na akto nin pagliligtas. (Salmo 96:1; 98:1; 144:9) Sa siring, bago an awit ta an paraawit makakapagsabi ngonyan nin dagdag na makangangalas na mga gibo ni Jehova asin makakapagpahayag nin bagong apresasyon sa Saiyang mamuraway na ngaran.

18. Huli sa ano na si Jesus inoomaw kan 24 kamagurangan paagi sa saindang bagong awit?

¹⁸ Pero digdi, an 24 kamagurangan nag-aawit nin bagong awit sa atubangan ni Jesus imbes na sa atubangan ni Jehova. Alagad pareho man sana an prinsipyo. Inoomaw ninda si Jesus huli sa bagong mga bagay na ginibo nia, bilang Aki nin Dios, para sa sainda. Paagi sa saiyang dugo, sia an nangoltanan sa bagong tipan asin sa siring ginibong posible an pagpaluwas nin bagong nasyon bilang espesyal na rogaring ni Jehova. (Roma 2:28, 29; 1 Corinto 11:25; Hebreo 7:18-25) An mga miembro kan bagong espirituwal na nasyon na ini gikan sa dakol na mga nasyon sa laman, alagad ta pinagsararo sinda ni Jesus sa sarong kongregasyon bilang sarong nasyon.—Isaias 26:2; 1 Pedro 2:9, 10.

19. (a) Anong bendisyon an dai nakamtan kan Israel sa laman huli sa saindang pagigin bakong maimbod? (b) Anong bendisyon an nakakamtan kan bagong nasyon ni Jehova?

¹⁹ Kan an mga Israelita organisaron ni Jehova na magin sarong nasyon kaidtong panahon ni Moises, sia nakipagtipan sa sainda asin nanuga na kun sinda magdadanay na maimbod sa tipan na iyan, sinda magigin sarong kahadean nin mga saserdote sa atubangan nia. (Exodo 19:5, 6) An mga Israelita dai nagmaimbod asin noarin man dai nakaeksperyensia kan kaotoban kan panugang iyan. Sa ibong na lado, nagdanay na maimbod an bagong nasyon, na inorganisar sa puersa kan bagong tipan na si Jesus an nangoltanan. Kun siring, an mga miembro kaiyan makakapamahala sa daga bilang mga hade asin makakapaglingkod man bilang mga saserdote, na tinatabangan na makipag-ulian ki Jehova an mga tawong tama an kamugtakan nin puso. (Colosas 1:20) Iyan arog nanggad kan sinasabi kan bagong awit: “Asin ginibo mo sindang sarong kahadean asin mga saserdote para sa satong Dios, asin sinda mamamahala bilang mga hade sa daga.” (Kapahayagan 5:10) Kanigoan nanggad an kagayagayahan kan 24 kamagurangan sa pag-awit kan bagong awit na ini nin pag-omaw sa pinamuraway na si Jesus!

Sarong Langitnon na Koro

20. Anong awit nin pag-omaw sa Kordero an nadadangog ngonyan?

²⁰ Ano an reaksion sa bagong awit na ini kan iba pa sa dakulaon, langitnon na kadaklan sa organisasyon ni Jehova? Napapalukso an puso ni Juan sa pagheling kan saindang odok sa pusong pagkaoroyon: “Asin naheling ko, asin nadangog ko an tingog nin dakol na anghel sa palibot kan trono asin kan buhay na mga linalang patin kan kamagurangan, asin an kabilangan ninda miriada nin mga miriada asin rinibong ribo-ribo, na nagsasabi sa makosog na tingog: ‘An Korderong ginadan maninigo na mag-ako kan kapangyarihan asin kayamanan asin kadonongan asin kosog asin onra asin kamurawayan patin kaomawan.’” (Kapahayagan 5:11, 12) Abaa kanakakagulat na awit nin pag-omaw!

21. An pag-omaw daw sa Kordero nakakabawas sa soberaniya o posisyon ni Jehova? Ipaliwanag.

 ²¹ Ini daw nangangahulogan na sa dai maaraman na paagi sinalidahan na ngonyan ni Jesus si Jehova Dios asin na sia na an inoomaw kan gabos na linalang imbes na an saiyang Ama? Dai nanggad! Imbes, an awit na ini nin pag-omaw kaoyon kan isinurat ni apostol Pablo: “Ilinangkaw [si Jesus] nin Dios sa superyor na kamugtakan asin may kabootan na itinao sa saiya an ngaran na halangkaw kisa sa lambang ibang ngaran, tanganing sa ngaran ni Jesus an lambang tuhod lumuhod kaidtong mga nasa langit asin sa daga asin mga nasa irarom kan daga, asin an lambang dila hayag na magrekonoser na si Jesu-Cristo iyo an Kagurangnan para sa kamurawayan nin Dios na Ama.” (Filipos 2:9-11) Irinurukyaw digdi si Jesus huli sa saiyang kabtang sa paghusay kan pangenot na isyu na nasa atubangan kan gabos na linalang—an pagbindikar sa lehitimong soberaniya ni Jehova. Abaa kadakulang kamurawayan an itinao kaini sa saiyang Ama!

Sarong Nagkokosog na Awit nin Pag-omaw

22. Sa anong awit nin pag-omaw minaiba an mga tingog hale sa daga?

²² Sa eksenang ilinadawan ni Juan, an darakulaon na kadaklan sa langit nagtatao nin magayonon pagdangogon na aklamasyon ki Jesus bilang pagrekonoser sa saiyang kaimbodan asin sa saiyang langitnon na autoridad. Digdi, sinda iniibanan nin mga tingog hale sa daga mantang an mga ini man nakikikabtang sa pag-omaw sa Ama sagkod sa Aki. Kun paanong an mga nagigibo nin sarong aking tawo nakakatao nin dakulang kaomawan sa mga magurang, an kaimbodan man ni Jesus nakakakontribwir na marhay sa “kamurawayan nin Dios na Ama” sa tahaw nin gabos na linalang. Sa siring, si Juan nagpapadagos sa pagbareta: “Asin an gabos na linalang na yaon sa langit asin nasa ibabaw nin daga asin nasa irarom nin daga patin nasa dagat, asin an gabos na bagay na yaon dian, nadangog kong nagsasarabi: ‘Sa Saro na nakatukaw sa trono asin sa Kordero, mapasainda logod an kaomawan asin an onra asin an kamurawayan patin an kosog sagkod pa man.’”—Kapahayagan 5:13.

23, 24. (a) Ano an nagpaparisa kun noarin mapoon sa langit an awit nin pag-omaw, asin kun noarin digdi sa daga? (b) Paano nagkokosog an awit nin pag-omaw sa pag-agi nin mga taon?

²³ Noarin madadangog an magayonon na awit na ini nin pag-omaw? Iyan nagpoon sa kapinonan kan aldaw kan Kagurangnan. Pakatapos na si Satanas asin an saiyang mga demonyo palayason sa kalangitan, “an gabos na linalang na yaon sa langit” puede nang magsararo sa pag-awit kan awit na ini nin pag-omaw. Asin, arog kan ipinapaheling kan rekord, magpoon kan 1919 an nagdadakol na kadaklan sa ibabaw nin daga pinagsararo an saindang tingog sa pag-omaw ki Jehova, na nagdadakol magpoon sa pirang ribo sagkod sa labing anom na milyon kaidtong taon 2005. * Pakalaglaga kan daganon na sistema ni Satanas, “an gabos na linalang na . . . nasa ibabaw nin daga” mag-aawit nin mga pag-omaw ki Jehova asin sa saiyang Aki. Sa itinalaan na panahon ni Jehova, mapoon an pagbuhay liwat sa dai mabilang na minilyon na gadan, dangan “an gabos na linalang na . . . nasa irarom nin daga” na nasa memorya nin Dios magkakaoportunidad na umiba sa pag-awit kan awit na iyan nin pag-omaw.

²⁴ Ngonyan pa, “magpoon sa kaporoporohi kan daga . . . dagat asin . . . mga isla,” minilyon na tawo an nag-aawit nin bagong awit kaasosyar kan lakop sa globong organisasyon ni Jehova. (Isaias 42:10; Salmo 150:1-6) An magayagayang pag-omaw na ini maabot sa pinakamakosog sa katapusan kan Milenyo, kun an katawohan nadara na sa pagkasangkap. Pakatapos kaiyan, an gurang na halas, an pangenot na paradaya, si Satanas mismo, lalaglagon bilang lubos na kaotoban kan Genesis 3:15, asin sa mapangganang kulminasyon, an gabos na buhay na linalang, espiritu asin tawo, maawit nin durungan: “Sa Saro na nakatukaw sa trono asin sa Kordero, mapasainda logod an kaomawan asin an onra asin an kamurawayan patin an kosog sagkod pa man.” Dai magkakaigwa nin tingog na minakontra sa bilog na uniberso.

25. (a) An pagbasa kan salaysay ni Juan manongod sa unibersal na awit nin pag-omaw nagpapahiro sato na gibohon an ano? (b) Anong marahayon na halimbawa an itinatao sa sato kan apat na buhay na linalang asin kan 24 kamagurangan sa pagtatapos kan bisyon?

²⁵ Iyan magigin magayagaya nanggad na panahon! Daing duwa-duwa, an ilinaladawan digdi ni Juan nagpapataba sa satong puso huli sa kaogmahan asin nagpapahiro sato na umiba sa langitnon na mga kadaklan sa pag-awit nin odok sa pusong  mga pag-omaw ki Jehova Dios asin ki Jesu-Cristo. Dai daw kita nagigin orog na determinado kisa kasuarin pa man na magtagal sa tamang mga gibo? Kun gigibohon niato iyan, makakalaom kita na, sa tabang ni Jehova, an lambang saro sa sato yaon duman sa maogmang kulminasyon, na idinudugang an satong tingog sa unibersal na korong iyan nin pag-omaw. Tunay nanggad na an apat na buhay na linalang na mga kerubin asin an binuhay liwat na linahidan na mga Kristiano biyong nagkakaoroyon, ta an bisyon natatapos sa mga tataramon na: “Asin an apat na buhay na linalang nagsarabi: ‘Amen!’ asin an kamagurangan naghuruhod asin nagsamba.”—Kapahayagan 5:14.

26. Sa ano kita maninigong magkaigwa nin pagtubod, asin nag-aandam na an Kordero na gibohon an ano?

²⁶ Logod na kamo, namomotan na nagbabasa, magkaigwa nin pagtubod sa atang kan Kordero—an ‘sarong maninigo’—asin bendisyonan sa saindong mapakumbabang mga paghihingoa na sumamba asin maglingkod ki Jehova—an “Saro na nakatukaw sa trono.” Patabang kamo ngonyan sa grupong Juan mantang iyan nagtatagama kan kinakaipuhan na espirituwal na “kakanon sa tamang panahon.” (Lucas 12:42) Alagad helinga! An Kordero nag-aandam na tangkason an pitong tatak. Ano daw na nakakaogmang mga kapahayagan an nakatagama sa sato ngonyan?

[Mga Nota sa Ibaba]

[Mga Hapot Para sa Pag-adal]

 [Bilog na pahinang ritrato sa pahina 86]