Kapitulo 11

Yaon daw sa Libro nin Buhay an Saindong Ngaran?

SARDIS

1. Ano an espirituwal na kamugtakan kan kongregasyon sa Sardis, asin paano pinoponan ni Jesus an saiyang mensahe?

 MGA 50 kilometros sa timog kan Akhisar (Tiatira) sa presenteng panahon an lugar kan sunod na kongregasyon na nag-ako nin mensahe hale sa pinamuraway na si Jesus: an Sardis. Kan ikaanom na siglo bago an satong Kumon na Kapanahonan, an siudad na ini iyo an may pag-orgolyong kabisera kan suanoy na kahadean nin Lidia asin residensia kan mayamanon na si Hadeng Criso. Kan panahon ni Juan, iyan pobre na, asin kasaysayan na sana an dating kagayonan kaiyan kaidtong iyan sakop ni Criso. Siring man, nagin pobre sa espirituwal an Kristianong kongregasyon duman. Sa kaenot-enote, dai pinonan ni Jesus nin komendasyon an saiyang mensahe. Imbes, sia nagsasabi: “Asin sa anghel kan kongregasyon sa Sardis sumurat ka: Ini an mga bagay na sinasabi nia na igwa kan pitong espiritu nin Dios asin kan pitong bitoon, ‘Aram ko an saimong mga gibo, na ika igwa kan ngaran na ika buhay, alagad ta ika gadan.’”—Kapahayagan 3:1.

2. (a) Ano an kahulogan para sa mga Kristiano sa Sardis kan bagay na si Jesus igwa kan “pitong espiritu”? (b) Ano an reputasyon kan kongregasyon sa Sardis, alagad ta ano an mga katunayan?

² Taano ta ipinamidbid ni Jesus an saiyang sadiri  bilang an saro “na igwa kan pitong espiritu”? Huli ta an mga espiritung ini nagrerepresentar sa banal na espiritu ni Jehova na nagbobolos sa kalubosan kaiyan. Sa huri, inapod man iyan ni Juan na “pitong mata,” na ipinaparisa an nakakalagbas na pagheling na itinatao ki Jesus kan banal na espiritu nin Dios. (Kapahayagan 5:6) Sa siring, nadidiskobre nia asin naaasikaso an ano man na situwasyon na lumataw. (Mateo 10:26; 1 Corinto 4:5) An kongregasyon sa Sardis may reputasyon na iyan buhay, aktibo. Alagad naheling ni Jesus na iyan gadan sa espirituwal. Minalataw na an kadaklan na miembro kaiyan nagbalik sa pagkaindiperente na nakakaagid sa saindang kamugtakan bago sinda nagin Kristiano.—Ikomparar an Efeso 2:1-3; Hebreo 5:11-14.

3. (a) Taano ta maninigong tawan nin espesyal na atension kan “anghel kan kongregasyon sa Sardis” an bagay na si Jesus igwa kan “pitong bitoon”? (b) Anong makosog na hatol an itinatao ni Jesus sa kongregasyon sa Sardis?

³ Ipinapagirumdom man ni Jesus sa “anghel kan kongregasyon sa Sardis” na Sia an igwa kan “pitong bitoon.” Kapot nia sa too niang kamot an kamagurangan na idto sa kongregasyon, na may autoridad na giyahan sinda sa saindang pagpapastor. Maninigong isapuso ninda an ‘pag-aram na gayo sa kamugtakan kan aripompon.’ (Talinhaga 27:23) Huli kaini, marahay na maingat sindang maghinanyog sa sunod na mga tataramon ni Jesus: “Magin mapagbantay ka, asin pakosoga an mga bagay na natatada na madali nang magadan, huli ta dai ko nanompongan na an saimong mga gibo lubos na ginigibo sa atubangan kan sakuyang Dios. Kun siring, padagos mong isaisip kun paano ka nag-ako asin kun paano ka nakadangog, asin padagos na otoba iyan, asin magsolsol ka. Tunay na kun ika dai magmamata, ako madatong na siring sa parahabon, asin dai mo lamang maaaraman kun anong oras ako madatong sa saimo.”—Kapahayagan 3:2, 3.

4. Paano makakatabang an mga tataramon ni Pedro sa kongregasyon sa Sardis na ‘pakosogon an mga bagay na natatada’?

⁴ Kaipuhan na girumdomon kan kamagurangan sa Sardis an nagin kagayagayahan ninda kaidtong manodan ninda an katotoohan asin an mga bendisyon na inako ninda kaidto. Alagad ngonyan sinda gadan kun manongod sa espirituwal na aktibidad. Nagpipirawpitaw an saindang ilaw bilang kongregasyon huli sa kadaihan nin mga gibo nin pagtubod. Dakol na taon bago kaini, nagsurat si apostol Pedro sa mga kongregasyon sa Asia (na posibleng kaiba an Sardis) tanganing pakosogon an pag-apresyar sa mamuraway na maogmang bareta na inako nin mga Kristiano asin ipinahayag “na igwa kan banal na espiritu na ipinadara hale sa langit”—na irinerepresentar kan pitong espiritu sa bisyon ni Juan. Ipinagirumdom man ni Pedro sa mga Kristianong idto sa Asia na sinda kabilang sa ‘rasang pinili, sa hadeng grupo nin mga saserdote, banal na nasyon, banwaan para sa espesyal na pagkasadiri, tanganing ipahayag ninda nin mahiwas an mga kamurawayan kan saro na nag-apod sa sainda hale sa kadikloman pasiring sa saiyang makangangalas na liwanag.’ (1 Pedro 1:12, 25; 2:9) An paghorophorop sa espirituwal na mga katotoohan na iyan makakatabang sa kongregasyon sa Sardis na magsolsol asin ‘pakosogon an mga bagay na natatada.’—Ikomparar an 2 Pedro 3:9.

5. (a) Ano an nangyari sa pag-apresyar kan mga Kristiano sa Sardis? (b) Ano an mangyayari kun an mga Kristiano sa Sardis dai maghimate sa hatol ni Jesus?

⁵ Sa panahon na idto, an saindang pag-apresyar asin pagkamoot sa katotoohan garo kalayo na madali nang maparong. Pipira na sanang baga an mainit. Ineenkaminar sinda ni Jesus na paypayan an baga, palaadon an kalayo, pagsolsolan an mga kasalan na ibinunga kan saindang kapabayaan, asin magin giraray sarong kongregasyon na buhay sa espirituwal. (Ikomparar an 2 Timoteo 1:6, 7.) Ta kun dai, kun bigla na sanang dumatong si Jesus—“siring sa parahabon”—sa paghokom, dai magigin andam an kongregasyon sa Sardis.—Mateo 24:43, 44.

Pagdatong na “Siring sa Parahabon”

6. Paano si Jesus nagdatong na “siring sa parahabon” kan 1918, asin anong kamugtakan an nanompongan nia sa tahaw kan mga naghihingakong parasunod nia?

⁶ An patanid ni Jesus na sia madatong na “siring sa parahabon” sagkod sa presenteng mga panahon. Iyan may espesyal na aplikasyon sa mga Kristiano na nakaabot sa aldaw kan Kagurangnan. Dai nahaloy pakalihis kan 1914, nagkaigwa nin kaotoban an propesiya ni Malaquias: “‘Sa panale maabot sa Saiyang templo an tunay na Kagurangnan, na saindong pinaghahanap, asin an mensahero kan tipan na nawiwilihan nindo. Uya! Sia maabot nanggad,’ an sabi ni Jehova nin mga hukbo.” (Malaquias 3:1; Kapahayagan 1:10) Bilang “mensahero kan tipan,” si Jesus nag-abot sa pagsiyasat asin paghokom sa mga naghihingakong parasunod nia. (1 Pedro 4:17) Kan panahon na  idto, kan 1918, an Kakristianohan napapalabot sa pagpabolos nin dugo kan Guerra Mundial I asin gadan nin biyo, sa espirituwal na pagtaram. Dawa an tunay na mga Kristiano, na maigot na marhay sa paghuhulit bago kan guerra, nag-agi sa panahon nin espirituwal na pagtungka. An iba sa prominente nindang kamagurangan nabilanggo, asin haros napondo an paghuhulit. Kan an mga Kristianong ini pukawon kan espiritu ni Jehova kan suminunod na taon, bakong gabos andam. An iba, kapareho kan lolong na mga daraga sa parabola ni Jesus, bakong andam sa espirituwal para sa pribilehio na maglingkod ki Jehova. Pero, makaoogma, kadakol kan naghimate sa patanid ni Jesus, kapareho kan mapagmansay na mga daraga: “Kun siring, magdanay kamong mapagbantay, huli ta dai nindo naaaraman an aldaw ni an oras.”—Mateo 25:1-13.

7. Taano an mga Kristiano ngonyan ta kaipuhan na magpuka?

⁷ An pangangaipo na an Kristiano magin mapagbantay dai natapos sa pagpopoon kan aldaw kan Kagurangnan. Sa saiyang dakulang propesiya may labot sa “tanda na an gabos na bagay na ini nakatalaga nang dumatong sa pagtatapos,” si Jesus nagtao nin makosog na patanid: “Mapadapit sa aldaw na iyan o sa oras mayo nin siisay man na nakakaisi . . . Magdanay kamong mapagmasid, magpuka kamo, huli ta dai nindo aram kun noarin an itinalaan na panahon. Alagad an isinasabi ko sa saindo isinasabi ko sa gabos, Magdanay kamong mapagbantay.” (Marcos 13:4, 32, 33, 37) Iyo, sagkod sa mismong oras na ini, an lambang saro sa sato, baga man kabilang sa linahidan o sa dakulang kadaklan, kaipuhan na magdanay na mapagbantay asin labanan an pagkatorog sa espirituwal. Kun an aldaw ni Jehova dumatong na garo “parahabon kun banggi,” manompongan logod kitang mata tanganing mag-ako nin paborableng paghokom.—1 Tesalonica 5:2, 3; Lucas 21:34-36; Kapahayagan 7:9.

8. Paano pinahiro kan grupong Juan ngonyan an banwaan nin Dios na magdanay na buhay sa espirituwal?

⁸ An mismong grupong Juan ngonyan puka sa pangangaipo na pahiroon an banwaan nin Dios na magdanay na buhay sa espirituwal. Sa katuyohan na ini, iinaareglo sa bilog na daga an espesyal na mga pagtiripon nagkapirang beses kada taon. Sa sarong nakakaagi pa sanang taon, an nag-atender sa 2,981 pandistritong kombension 10,953,744 gabos, asin 122,701 na bagong nagturubod an nabautismohan. Sa laog nin labi nang sanggatos na taon, ginagamit kan grupong Juan an magasin na The Watchtower (sa Bicol, An Torrengbantayan) sa pagpapahayag kan ngaran asin katuyohan ni Jehova. Huli sa mapait na mga pagpersegir kaidtong duwang guerra mundial, an mga Saksi ni Jehova pinukaw kan The Watchtower na ibalik an kaigotan paagi sa pagpublikar nin mga artikulo na arog baga kan “Blessed Are the Fearless” (1919), “A Call to Action” (1925), asin “Defeat of Persecution” (1942).

9. (a) Ano an maninigong ihapot nin gabos na Kristiano sa saindang sadiri? (b) Anong pagparigon sa boot an itinao kan An Torrengbantayan?

⁹ Arog kaidto sa Sardis, siring man sa mga kongregasyon ngonyan, an padagos na pagsiyasat sa sadiri mahalagang marhay para sa gabos na Kristiano. Maninigo na padagos na hapoton niato gabos an satong sadiri: An satuya daw na “mga gibo lubos na ginigibo” sa atubangan kan satuyang Dios? Mantang dai man naghohokom sa iba, kita daw personalmenteng nagkukultibar kan espiritu nin pagsakripisyo kan sadiri asin naghihingoa na itao an bilog na kalag na paglilingkod sa Dios? Sa bagay na ini, an magasin na An Torrengbantayan nagtao nin pagparigon sa boot paagi sa pagtokar sa mga tema na arog baga kan “Padagos na Patunayan Kun Ano Man Nanggad Kamo” asin “Dai Na Nabubuhay Para sa Sato Man Sana.” * Huling igwa kita kan siring na tabang na sono sa Kasuratan, siyasaton niato an kairairaromi niatong saboot mantang kita naghihingoa na mapakumbaba asin mapagngayongayong lumakaw na may integridad sa atubangan ni Jehova.—Salmo 26:1-3; 139:23, 24.

“Nagkapirang Ngaran”

10. Anong nakakaparigon sa boot na bagay an narisa ni Jesus sa kongregasyon sa Sardis, asin paano kita maninigong maapektaran kaini?

¹⁰ Nakakaparigon nanggad sa boot an sunod na mga tataramon ni Jesus sa kongregasyon sa Sardis. Sia nagsasabi: “Minsan siring, igwa ka nin nagkapirang ngaran dian sa Sardis na dai dinigtaan an saindang pan-ibabaw na mga gubing, asin sinda malakaw sa kaibahan ko na nakaputi, huli ta sinda maninigo. An makadaog gugubingan sa siring na paagi nin puting pan-ibabaw na mga gubing;  asin dai ko nanggad paparaon an saiyang ngaran sa libro nin buhay, kundi rerekonoseron ko an saiyang ngaran sa atubangan kan sakong Ama asin sa atubangan kan saiyang mga anghel.” (Kapahayagan 3:4, 5) Bako daw na an mga tataramon na ini nakakapukaw sato asin nagpapakosog sa satong determinasyon na magmaimbod? Huli sa kapabayaan nin sarong grupo nin kamagurangan, an sarong kongregasyon sa kabilogan puedeng mapatorog nin nanok sa espirituwal. Pero, an nagkapirang indibiduwal dian tibaad makosog an boot na maghingoa na papagdanayon na malinig asin daing digta an saindang midbidan bilang Kristiano asin sa siring magpadagos na may marahay na ngaran ki Jehova.—Talinhaga 22:1.

11, 12. (a) Dawa durante kan grabeng apostasiya, paano an nagkapira seguradong nagin siring sa maimbod na “nagkapirang ngaran” na idto sa Sardis? (b) Anong pakaginhawa an nagdatong sa garo trigong mga Kristiano durante kan aldaw kan Kagurangnan?

¹¹ Iyo, an “pan-ibabaw na mga gubing” na iyan nanonongod sa matanos na midbidan nin sarong tawo bilang Kristiano. (Ikomparar an Kapahayagan 16:15; 19:8.) Seguradong ikinakaogma ni Jesus na maheling na, sa ibong kan pagkaindiperente kan kadaklan, nahihimo pa man giraray kan “nagkapirang ngaran,” kan nagkapirang linahidan na Kristiano sa Sardis, na papagdanayon an midbidan na ini. Siring man, kan an naghihingakong mga Kristiano makasalak sa Dakulang Babilonya, an pankinaban na imperyo nin falsong relihion, durante kan halawig na mga siglo kan grabeng apostasiya, segurado na dai nawawaran kaidto nin nagkapirang indibiduwal na naghingoang otobon an kabotan ni Jehova minsan ngani garo baga imposible idto. An mga ini matanos na siring sa trigo na natatahoban nin kadakol na doot na sektaryo.—Kapahayagan 17:3-6; Mateo 13:24-29.

¹² Si Jesus nanuga na sia danay na makakaibanan kan garo trigong mga Kristianong ini “sa gabos na aldaw sagkod sa pagtatapos kan sistema nin mga bagay.” Aram nia kun siisay sinda asin kun anong marahay na ngaran an ginibo ninda para sa saindang sadiri. (Mateo 28:20; Eclesiastes 7:1) Isip-isipa an kagayagayahan kan maimbod na “nagkapira” na buhay pa kan magpoon an aldaw kan Kagurangnan! Sa katapustapusi sinda isiniblag sa Kakristianohan na gadan sa espirituwal asin tinipon sa sarong matanos na kongregasyon na mas nakakaagid sa kongregasyon sa Smirna.—Mateo 13:40-43.

13. Anong mga bendisyon an natatagama sa linahidan na mga Kristiano na dai ‘dinidigtaan an saindang pan-ibabaw na mga gubing’?

¹³ An mga yaon sa Sardis na maimbod sagkod sa katapusan asin dai inaatian an saindang midbidan bilang Kristiano nagkamit kan kaotoban nin sarong makangangalas na paglaom. Pakapatindoga kan Mesiyanikong Kahadean ni Jesus kan 1914, sinda binuhay liwat sa espiritung buhay asin bilang mga nakadaog ginubingan sinda nin puting pan-ibabaw na mga gubing bilang simbolo kan  saindang daing depekto, daing digtang katanosan. Huling naglakaw sa piot na dalan na pasiring sa buhay, sinda magkakamit nin daing sagkod na balos.—Mateo 7:14; helingon man an Kapahayagan 6:9-11.

Sagkod Lamang na Nasa Libro nin Buhay!

14. Ano an “libro nin buhay,” asin kiisay na mga ngaran an nasusurat dian?

¹⁴ Ano an “libro nin buhay,” asin kiisay na mga ngaran an papagdadanayon dian? An libro, o rolyo, nin buhay nanonongod sa rekord kan mga lingkod ni Jehova na mag-aako kan premyong buhay na daing katapusan. (Malaquias 3:16) Digdi sa Kapahayagan espesipikong sinambit an ngaran nin linahidan na mga Kristiano. Pero nasusurat man dian an ngaran kan mga tatawan nin buhay na daing katapusan digdi sa daga. Dugang pa, may mga ngaran na puedeng ‘paraon’ sa librong iyan. (Exodo 32:32, 33) Minsan siring, an mga kaiba sa grupong Juan na an ngaran nagdanay sa libro nin buhay sagkod na sinda magadan mag-aako nin inmortal na buhay sa langit. (Kapahayagan 2:10) Iyo ini an mga ngaran na espesyalmenteng rerekonoseron ni Jesus sa atubangan kan saiyang Ama asin kan Saiyang mga anghel. Kanigoan kadakula kan balos na iyan!

15. Paano mahihimo kan mga kabilang sa dakulang kadaklan na an saindang ngaran ikasurat nin permanente sa libro nin buhay?

¹⁵ An dakulang kadaklan, na an ngaran nasusurat man sa libro nin buhay, maluwas na buhay sa dakulang kahorasaan. Paagi sa pagkaigwa nin pagtubod sa bilog na Milenyal na Paghade ni Jesus asin sa panahon kan masunod na pangultimong pagbalo, sinda babalosan nin buhay na daing katapusan sa Paraiso digdi sa daga. (Daniel 12:1; Kapahayagan 7:9, 14; 20:15; 21:4) Dangan an saindang ngaran isusurat na nin permanente sa libro nin buhay. Sa pakaaram kan ipinapahayag digdi paagi sa banal na espiritu, dai daw kamo naghihimateng may entusiasmo sa paorootrong sadol ni Jesus: “An may talinga magdangog sa sinasabi kan espiritu sa mga kongregasyon”?—Kapahayagan 3:6.

[Nota sa Ibaba]

[Mga Hapot Para sa Pag-adal]

[Ritrato sa pahina 57]

Magdanay logod sa libro nin buhay an saindong ngaran