Madali Nang Matapos an Gabos na Pagdusa!

 May panahon sa saindong buhay na posibleng marhay na naghapot kamo, ‘Taano daw ta grabe an pagdusa?’ Sa laog nin rinibong taon, an pamilya nin tawo nagdusa nin grabe sa mga guerra, kadukhaan, kalamidad, krimen, inhustisya, helang, asin kagadanan. Sa nakaaging sanggatos na taon an katawohan nakaeksperyensia nin mas dakol na pagdusa kisa kasuarin man kaidto. Matatapos pa daw an gabos na ini?

An nakakarangang simbag iyo, asin madali nang marhay! An Tataramon nin Dios, an Biblia, nagsasabi: “An maraot mawawara na . . . Alagad an mga mahoyo mismo makakasadiri kan daga, asin tunay na manonompongan ninda an saindang labi-labi nanggad na kaogmahan sa nagsosopay na katoninongan.” Sagkod noarin? “An mga matanos mismo magmamana kan daga, asin sinda mag-eerok dian sagkod lamang.”​—Salmo 37:​10, 11, 29.

Pakatapos na haleon nin Dios an karatan asin pagdusa, an daga gigibohon na paraiso. Sa panahon na iyan an mga tawo mabubuhay sagkod lamang na may sangkap na salud asin kaogmahan. An Tataramon nin Dios naghuhula: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.”​—Kapahayagan 21:4.

Sa bagong kinaban na iyan, pati an mga gadan bubuhayon liwat tanganing magkamit man kan mga bendisyon na iyan: “Magkakaigwa nin pagkabuhay liwat an mga matanos sagkod an mga bakong matanos.” (Gibo 24:15) Iyan an dahelan na nasabi ni Jesu-Cristo sa sarong nagsosolsol na paragibo nin maraot na nagpahayag nin pagtubod sa saiya: “Ika makakaibahan ko sa Paraiso.”​—Lucas 23:43.

 Taano ta Nagpoon an Pagdusa?

Mantang katuyohan nin Dios na an mga tawo magkaigwa kan siring na makangangalas na ngapit, taano ta tinogotan nia na magpoon an pagdusa? Taano ta tinogotan nia iyan nin haloyon na panahon?

Kan lalangon nin Dios si Adan asin Eva, ginibo Nia sinda na sangkap an hawak asin isip. Ibinugtak nia sinda sa sarong paraisong hardin asin tinawan sinda nin nakakakontentong trabaho. An Biblia nagsasabi: “Naheling nin Dios an gabos niang ginibo asin, uya! idto marahayon.” (Genesis 1:31) Kun kinuyog ninda an Dios, sangkap kutana an magigin mga aki ninda, asin an daga magigin kutanang paraiso na lakop sa globo, kun saen an mga tawo mabubuhay sagkod lamang na may katoninongan asin kaogmahan.

Ibinugtak nin Dios ki Adan asin Eva an makangangalas na balaog na libreng kabotan bilang kabtang kan naturalesa nin tawo. Dai sinda magigin daing isip na mga robot. Minsan siring, an padagos na kaogmahan ninda depende sa paggamit ninda kan libreng kabotan sa tamang paagi​—an kuyogon an mga ley nin Dios. An Dios nagsasabi: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan.” (Isaias 48:17) An salang paggamit sa libreng kabotan maresulta sa kapahamakan, huling an mga tawo dai linalang na magin mapanggana kun independiente sa Dios. An Biblia nagsasabi: “Bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.”​—Jeremias 10:23.

Makamomondo, an enot niatong mga magurang nagsaboot na puede sindang magin independiente sa Dios asin magin mapanggana pa man giraray. Alagad kan sumuway sinda sa pamamahala nin Dios, dai na nia sinusteniran an  saindang pagkasangkap. Kaya nagpoon sindang lumuya sagkod na sa katapustapusi sinda naggurang asin nagadan. Kaoyon kan mga ley sa henetika, minana niato an pagkabakong sangkap asin kagadanan na iyan.​—Roma 5:12.

An Pangenot na Isyu​—Soberaniya

Taano ta dai ginadan nin Dios si Adan asin Eva asin linalang an saro pang tawong mag-agom? Huli ta kinuestion an unibersal na soberaniya nin Dios, an boot sabihon, an saiyang deretso na mamahala. An kuestion iyo an, Siisay an may deretso na mamahala, asin kiisay na pamamahala an tama? Asin nin huli kaiyan, Mas mapaparahay daw an mga tawo kun dai sinda papamahalaan nin Dios? Sa pagtao sa sainda nin igong panahon na mag-eksperimentong magin lubos na independiente, papatunayan nin Dios nin sararoan sana kun baga mas mapaparahay sinda sa irarom kan pamamahala nia o kan pamamahala ninda. An panahon na itatao dapat na igo an lawig tanganing maprobaran kan mga tawo an gabos na klase nin politikal, sosyal, pinansial, asin relihiosong sistema na mayo kan paggiya nin Dios.

Ano an nagin resulta? An rinibong taon na kasaysayan nin tawo nagsasabi sa sato na nagkaigwa nin paorog nang paorog na pagdusa. Sa nakaaging siglo, naeksperyensiahan kan pamilya nin tawo an pinakagrabeng pagdusa kasuarin man. Minilyon an ginadan durante kan Holocaust. Labing 100 milyones an nagadan sa mga guerra. Lakop an krimen asin kadahasan. Kadakol kan nagdodroga. Padagos na naglalakop an mga helang na ikinakaolakit paagi sa pagdodorog. Manampulong milyon an nagagadan taon-taon sa gutom asin helang. An buhay pampamilya asin moral na mga prinsipyo sa buhay ruminuro na sa gabos na lugar. Mayong gobyerno nin tawo na may solusyon sa mga problemang ini. Mayo ni saro sa sainda na nakahale sa paggurang, helang, asin kagadanan.

 An kamugtakan nin tawo kapareho nanggad kan ihinula kan Biblia na mangyayari sa satong panahon. Sinasabi kan Tataramon nin Dios na an satong kapanahonan iyo an “huring mga aldaw” kan sistemang ini nin mga bagay na “maabot an delikadong mga panahon na masakit pakibagayan.” Asin siring nanggad kan sabi kan Biblia, ‘an mga maraot asin nandadaya orog na nagraot.’​—2 Timoteo 3:1-5, 13.

Harani Na an Katapusan kan Pagdusa

An gabos na ebidensia nagpapaheling na naghaharani na kita sa katapusan kan makaturotristeng pag-eksperimento nin tawo na magin independiente sa Dios. Malinaw na napatunayan na an pamamahala nin mga tawo na suhay sa Dios nungkang magigin mapanggana. Solamente an pamamahala nin Dios an makakatao nin katoninongan, kaogmahan, sangkap na salud, asin buhay na daing katapusan. Kaya madali nang matapos an pagtogot ni Jehova sa karatan asin pagdusa. Sa dai na mahahaloy mainterbenir an Dios sa mga gibo-gibo nin tawo paagi sa paglaglag sa enterong sistemang ini nin mga bagay na dai nakakakontento.

An hula sa Biblia nagsasabi: “Sa mga aldaw kan mga hadeng idto [mga pamamahala nin tawo na nag-eeksister ngonyan] an Dios nin kalangitan mapatindog nin sarong kahadean [sa langit] na dai noarin man malalaglag. . . . Iyan an maronot asin matapos kan gabos na ining kahadean [mga pamamahala sa presente], asin iyan mismo magdadanay sagkod sa mga panahon na daing talaan.” (Daniel 2:44) An pagbindikar sa soberaniya ni Jehova, an saiyang deretsong mamahala, paagi sa saiyang langitnon na Kahadean iyo an pangenot na katokdoan kan Biblia. Sa paghula sa sarong importanteng marhay na kabtang kan tanda kan “huring mga aldaw,” si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”​—Mateo 24:14.

 Pag-abot kan katapusan, siisay an makakaligtas? An Biblia minasimbag: “An mga tanos iyo an mag-eerok sa daga, asin an mga daing katuyawan iyo an matatada dian. Kun dapit sa mga maraot, sinda popohoon sa mismong daga.” (Talinhaga 2:​21, 22) An mga tanos iyo an mga nag-aadal kan kabotan ni Jehova asin ginigibo iyan. Si Jesu-Cristo nagsabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.” (Juan 17:3) Iyo, “an kinaban maagi sana . . . , alagad an naggigibo kan kabotan nin Dios magdadanay sagkod lamang.”​—1 Juan 2:17.

Laen sana kun may ibang tanda, an mga kotasyon sa Kasuratan trinadusir hale sa nasa modernong tataramon na Ingles na New World Translation of the Holy Scriptures​​—With References.