An Pagtao nin Atension Nagligtas kan Saindang Buhay

SI Jesu-Cristo nagpatanid antes pa manongod sa katapusan kan Judiong sistema nin mga bagay na nakasentro sa templo sa Jerusalem. Dai sia nagtao nin petsa kun noarin iyan mangyayari. Alagad ilinadawan nia an mga pangyayari na masagkod sa kalaglagan na iyan. Sinadol nia an saiyang mga disipulo na magdanay na mapagbantay asin humale sa lugar na peligroso.

Ihinula ni Jesus: “Kun maheling na nindo an Jerusalem na napapalibotan nin nagkakampong mga hukbo, dangan aramon nindo na harani na an paggaba sa saiya.” Sinabi man nia: “Kun maheling na nindo an makababaldeng bagay na nagpapangyari nin kagabaan . . . na nagtitindog sa sarong banal na lugar, . . . dangan an mga nasa Judea magpoon nang dumulag pasiring sa kabukidan.” Sinadol ni Jesus an saiyang mga disipulo na dai magpuli tanganing isalbar an materyal na mga rogaring. Apretado an pagdulag tangani na maligtas an saindang buhay.​—Lucas 21:​20, 21; Mateo 24:​15, 16.

Tanganing maolang an halawig na rebelyon, pinangenotan ni Cestio Gallo an mga hukbong Romano tumang sa Jerusalem kan 66 C.E. Linaog pa ngani nia an siudad asin sinalikopan an templo. Nagkariribok nin grabe an siudad. Naheheling kan mga nagdadanay na mapagbantay na madali nang umabot an kalamidad. Alagad posible daw na dumulag? Bigla na sana, pinasibog ni Cestio Gallo an saiyang mga hukbo. Linapag sinda nin mga insurektong Judio. Ngonyan na an panahon na dumulag hale sa Jerusalem asin sa bilog na Judea!

Kan sumunod na taon, nagbuelta an mga hukbong Romano sa pangengenot ni Vespasiano asin kan aki niang si Tito. Nagkaguerra sa bilog na nasyon. Sa kapinonan nin 70 C.E., an mga Romano nagtogdok sa palibot nin Jerusalem nin kuta nin mapapanas na taldok. Dai na puedeng dumulag. (Lucas 19:​43, 44) Naggaradanan an mga paksion sa laog kan siudad. An iba pa sa banwaan magsalang ginadan kan mga Romano o binihag. Biyong linaglag an siudad asin an templo kaiyan. Segun sa Judiong historyador kan enot na siglo na si Josefo, labing sarong milyon na Judio an nagdusa asin nagadan. Nungka na ikinatogdok liwat an templong idto.

Kun an mga Kristiano yaon pa sa Jerusalem kan 70 C.E., ginadan kutana sinda o inoripon kaiba kan gabos na iba pang yaon duman. Minsan siring, sinasabi nin suanoy na mga historyador  na an mga Kristiano naghimate sa patanid nin Dios asin duminulag hale sa Jerusalem sagkod sa bilog na Judea pasiring sa kabukidan na nasa sirangan kan Salog nin Jordan. An iba namirmehan sa Pella, sa probinsia nin Perea. Binayaan na ninda an Judea asin dai na sinda nagbalik. An paghimate sa patanid ni Jesus nagligtas kan saindang buhay.

Isinasaboot daw Nindo an mga Patanid Hale sa Respetableng mga Ginikanan?

Pakadangog nin balakid na patanid na dai man nangyari, dai na iniintindi nin dakol na tawo an gabos na patanid. Minsan siring, an paghimate sa mga patanid puedeng magligtas kan saindong buhay.

Sa Tsina kan 1975, may itinaong mga patanid na magkakalinog. Guminibo nin aksion an mga opisyales. Naghimate an mga tawo. Rinibong buhay an naligtas.

Kan Abril 1991 sa Pilipinas, ibinareta nin mga taga baryo sa mga bakilid kan Pinatubo na may nagluluwas na alintuto asin abo sa bukid. Pakatapos na masubaybayan an situwasyon sa laog nin duwang bulan, nagpatanid an Philippine Institute of Volcanology and Seismology na may peligrong madali nang umabot. Tolos-tolos, pinaebakwit sa lugar na idto an manampulong ribo katawo. Amay pa kan Hunyo 15, kaiba an makosogon na putok, labing walong kilometro kubiko na garo polbos an pinaturon paitaas dangan buminagsak sa mga banwaan. An pagtao nin atension nagligtas nin rinibong buhay.

An Biblia nagpapatanid manongod sa katapusan kan presenteng sistema nin mga bagay. Nabubuhay na kita ngonyan sa huring mga aldaw. Mantang nagrarani an katapusan, kamo daw nagdadanay na mapagbantay? May ginigibo daw kamong aksion tangani na magdanay na luwas sa peligro? May pag-apura daw na pinapatanidan nindo an iba na iyan man an gibohon?

[Ritrato sa pahina 20]

An pagtao nin atension sa patanid nagligtas kan buhay nin dakol kan an Pinatubo magbuga nin abo hale sa bulkan

[Ritrato sa pahina 21]

An buhay nin mga Kristiano na naghimate sa patanid ni Jesus naligtas kan an Jerusalem laglagon kan 70 C.E.