Ano an Kahulogan Kaiyan Gabos?

SABI ni Jesu-Cristo: An “pagtatapos kan sistema nin mga bagay” mamimidbid sa guerra, mga kakulangan nin kakanon, peste, asin mga linog.​—Mateo 24:1-8; Lucas 21:​10, 11.

Poon kan 1914 an buhay rinaraot nin mga guerra sa pag-oltanan nin mga nasyon asin sa pag-oltanan nin mga grupong etniko, na sa parate bunga nin pakikiaram nin mga klerigo sa politika asin ngonyan nin lakop na mga pagsalakay nin mga terorista.

Sa ibong nin mga progreso sa siensia, grabeng mga kakulangan nin kakanon an inaagihan nin ginatos na milyon na tawo sa bilog na daga. Kada taon minilyon na tawo an nagagadan huli sa kakulangan nin kakanon.

An peste, an boot sabihon, lakop na epidemya nin helang na nakakaolakit, kabtang man kan tanda na itinao ni Jesus. Pakalihis kan Guerra Mundial I, an epidemya nin trangkaso guminadan nin labing 21,000,000. Bakong arog nin mga damat kaidtong mga nakaagi na sa lokal sana, apektado kaiyan an mga nasyon sa bilog na daga saka an hararayong isla. Lakop na ngonyan sa daga an AIDS, asin nagpapadagos sa mga nasyon na nagpoprogreso pa sana an mga damat na arog kan tisis, malaria, nakakabutang helang gikan sa ulod na dara nin langaw, asin Chagas’ disease.

Segun sa bareta, manampulong ribo an linog kada taon na laen-laen an kosog. Ano man an kasangkapan na yaon asin an mas marahay na mga paagi nin pagbareta, an mga kalamidad sa matawong mga lugar na bunga nin mga linog parateng nababareta.

Ihinula man kan Biblia: “Aramon mo ini, na sa huring mga aldaw maabot an delikadong mga panahon na masakit pakibagayan. Huli ta an mga tawo magigin mga mamomoton sa sainda man sana, mga mamomoton sa kuarta, mga nagpapasikat sa sadiri, mga maabhaw, mga paralanghad, mga masumbikal sa mga magurang, mga daing utang na boot, mga bakong maimbod, mga dai nin natural na kapadangatan, mga dai maoyonan, mga parapakaraot, mga mayong pagpopogol sa sadiri, mga maringis, mga mayong pagkamoot sa karahayan, mga parapasaloib, mga matagas an payo, mga mahambog, mga mamomoton sa kasingawan imbes na mga mamomoton sa Dios, na may porma nin diosnon na debosyon alagad nagpapainda sa kapangyarihan kaiyan; asin sa mga ini lumikay ka.”​—2 Timoteo 3:1-5.

Dai daw kamo minaoyon na kita nabubuhay sa “delikadong mga panahon na masakit pakibagayan”?

Namasdan daw nindo na an mga tawo, na ngana na man, mamomoton sa sadiri, mamomoton sa kuarta, asin minomotibar nin kahambogan?

Siisay an makikidiskutir na an kinaban pano nin mga tawo na kadakol kan hinahagad alagad daing utang na boot, dai maoyonan, bakong maimbod?

Aram daw nindo na naggrabeng marhay an kasumbikalan sa mga magurang kaiba an labi-labing kadaihan nin kapadangatan, bako sanang sa nagkapirang lugar kundi sa bilog na daga?

Daing duwa-duwa na narerealisar nindo na kita nabubuhay sa kinaban na burat sa pagkamoot  sa kasingawan alagad mayo nin pagkamoot sa karahayan. Iyan an pagkaladawan kan Biblia sa mga aktitud na mangingibabaw sa “huring mga aldaw.”

Kaipuhan daw an dagdag pa digdi tangani na mamidbid kun ano an panahon na nabubuhayan niato? Ihinula man ni Jesus na sa panahon man na ini, an maogmang bareta kan Kahadean nin Dios ihuhulit sa bilog na ineerokan na daga. (Mateo 24:14) Ginigibo daw iyan?

An Torrengbantayan, sarong basado sa Biblia na babasahon na dedikado sa pagpaisi kan maogmang bareta kan Kahadean ni Jehova, regular na iniimprenta sa mas dakol na lenguahe kisa arin pa man na ibang babasahon.

Taon-taon, an Mga Saksi ni Jehova nagdudusay nin labing sarong bilyon na oras sa personal na paghuhulit sa iba manongod sa Kahadean nin Dios.

An mga babasahon na nagpapaliwanag kan Biblia ipinupublikar ninda sa  presente sa mga 400 na lenguahe, pati mga lenguahe na an nagbabasa hararayo asin saradit sanang grupo nin populasyon. Ikinapaabot na kan Mga Saksi ni Jehova an maogmang bareta sa gabos na nasyon; naghuhulit man sinda sa dakol na isla asin teritoryo na daing politikal na halaga huli sa kasaditan. Sa kadaklan na kadagaan, ginigibo ninda an regular na programa nin pagtotokdo kan Biblia.

Tunay nanggad, ihinuhulit an maogmang bareta kan Kahadean nin Dios sa bilog na ineerokan na daga, bakong sa pagkombertir sa kinaban, kundi sa pagtao nin patotoo. An mga tawo sa gabos na lugar tinatawan nin oportunidad na ipaheling kun baga may pagmakolog sindang maaraman kun siisay an kaglalang kan kalangitan asin kan daga asin kun baga mapaheling sinda nin paggalang sa saiyang mga ley asin nin pagkamoot sa saindang kapwa.​—Lucas 10:25-27; Kapahayagan 4:11.

Dai na mahahaloy, hahaleon kan Kahadean nin Dios an gabos na maraot sa daga asin gigibohon iyan na lakop sa globong paraiso.​—Lucas 23:43.

[Kahon sa pahina 6]

Huring mga Aldaw kan Ano?

Bakong huring mga aldaw kan katawohan. Para sa mga naggigibo kan kabotan nin Dios, iinoopresir kan Biblia an esperansang mabuhay sagkod lamang.​—Juan 3:​16, 36; 1 Juan 2:17.

Bakong huring mga aldaw kan daga. Ipinapanuga kan Tataramon nin Dios na an ineerokan na daga magdadanay sagkod lamang.​—Salmo 37:29; 104:5; Isaias 45:18.

Imbes, ini an huring mga aldaw kan madahas, daing pagkamoot na sistemang ini nin mga bagay asin kan mga nangangapot sa mga gibo kaiyan.​—Talinhaga 2:​21, 22.

[Kahon/Ritrato sa pahina 7]

Talaga daw na Tataramon nin Dios an Biblia?

Paorootro, isinurat kan mga propeta sa Biblia: “Iyo ini an sinabi ni Jehova.” (Isaias 43:14; Jeremias 2:2) Dawa si Jesu-Cristo, an Aki nin Dios, nagdoon na sia ‘dai nagtaram hale sa saiya man sana.’ (Juan 14:10) An Biblia mismo malinaw na nagsasabi: “An gabos na Kasuratan ipinasabong nin Dios.”​—2 Timoteo 3:16.

Mayo nin ibang libro na napublikar sa arog kaiyan kadakol na lenguahe​​—labing 2,200, segun sa report kan Sararong Sosyedad sa Biblia. Mayo nin ibang libro na may siring kadakulang sirkulasyon​​—ngonyan labi nang kuatro bilyones na kopya. Bako daw na iyan an lalaoman nindo sa mensahe hale sa Dios na para sa bilog na katawohan?

Para sa mas lubos na pagtokar sa mga ebidensia na an Biblia ipinasabong nin Dios, helingon an librong The Bible​​—God’s Word or Man’s?, na ipinublikar kan Mga Saksi ni Jehova.

Kun babasahon nindo an Biblia na sinasabot an bagay na iyan talagang Tataramon nin Dios, makikinabang kamo nin dakula.

[Kahon/Mga ritrato sa pahina 8]

Ano an Kahadean nin Dios?

Iyan an gobyerno sa langit na nagrerepresentar sa pamamahala kan tunay na Dios, si Jehova, an Kaglalang kan langit asin daga.​—Jeremias 10:​10, 12.

Sinasabi kan Biblia na si Jesu-Cristo an tatawan nin Dios kan siring na autoridad na mamahala. (Kapahayagan 11:15) Kan yaon digdi sa daga, ipinaheling ni Jesus na sia may pambihira nang autoridad hale sa Dios​​—autoridad na nagpangyari sa saiya na makontrol an naturalesa, magpaomay sa gabos na klase nin helang, asin buhayon pa ngani an mga gadan. (Mateo 9:2-8; Marcos 4:37-41; Juan 11:11-44) Ihinula nin ipinasabong na hula sa Biblia na itatao man sa saiya nin Dios “an pamamahala asin dignidad patin kahadean, tanganing an mga banwaan, mga grupo nasyonal asin mga lenguahe gabos maglingkod sa saiya.” (Daniel 7:​13, 14) An gobyernong iyan inaapod na Kahadean kan langit; duman sa langit na si Jesu-Cristo nagkakapot na ngonyan kan saiyang pamamahala.

[Mga ritrato sa pahina 7]

Lakop sa globong paghuhulit kan maogmang bareta