“Dai Sinda Nagmangno”

AN DAI pag-intindi sa mga patanid puedeng magbunga nin grabeng kapahamakan.

An Darwin, Australia, sibot kaidto sa pag-andam para sa kapiestahan kan 1974 kan may mga sirenang magpatanid manongod sa nagdadangadang na buwawi. Alagad mga 30 taon nang dai nadadanyaran nin buwawi an Darwin. Ngonyan pa daw? Dai hinona kan kadaklan na residente na talagang seryoso an peligro sagkod kan tinutuklab na nin makosogon na doros an mga atop asin binabaklas an lanob nin mga harong na duman nagrurulukob an mga tawo. Pagkaaga, biyo nang gaba an siudad.

Sa Colombia kan Nobyembre 1985, nagtuga an sarong bulkan. An labing 20,000 na habitante kan banwaan nin Armero ilinobong nin nagraragasang laboy na hale sa natutunaw na niebe asin yelo. Mayo daw nin patanid antes pa? Dakol na bulan nang nagkunogkunog an bukid. Minsan siring, huling tuod nang mag-istar harani sa bulkan, dai nahadit an kadaklan na taga Armero. Pinatanidan an mga opisyales na madali nang umabot an kalamidad, alagad haros mayo sindang ginibo na mapatanidan an publiko. May mga anunsio sa radyo sa paghihingoa na parigonon giraray an kompiansa kan namamanwaan. Ginamit an laudispiker kan simbahan sa pagsadol sa mga tawo na magdanay na kalmado. Kan banggi, nagkaigwa nin duwang makosogon na pagputok. Kun kamo, babayaan daw nindo an saindong mga rogaring asin madulag na kamo? Pipira sana an naghingoang gibohon iyan sagkod na huri na.

Parate na eksaktong nasasabi antes pa nin mga geologo kun saen magkakalinog. Alagad bihira nindang masabi nin eksakto kun noarin iyan maabot. Kan 1999, mga 20,000 katawo an nagadan sa linog sa bilog na kinaban. An dakol sa nagadan naghona na nungka iyan na mangyayari sa sainda.

Ano an Reaksion Nindo sa mga Patanid na Gikan Mismo sa Dios?

Buhay na buhay na ilinadawan kan Biblia kaidto pa an mga pangyayaring magigin tanda kan huring mga aldaw. Mapadapit dian, sinasadol kita kaiyan na estudyaran an “mga aldaw ni Noe.” “Kan mga aldaw na idto bago kan baha,” an mga tawo sibot sa pinagkatodan na mga aktibidad sa buhay, dawa ngani daing duwa-duwa na nahahadit sinda ta lakop an kadahasan. Kun  dapit man sa patanid na itinao nin Dios paagi sa lingkod niang si Noe, “dai sinda nagmangno sagkod na dumatong an baha asin iinanod sinda gabos.” (Mateo 24:37-39) Kun kamo, hihimateon daw nindo an patanid? Naghihimate daw kamo ngonyan?

Paano kun nag-iistar kamo sa Sodoma, harani sa Gadan na Dagat, kan kaaldawan kan tawong si Lot, na sobrino ni Abraham? Garo paraiso an kaomahan. Asensado an siudad. Mayong pinaghahaditan an mga tawo. Kan kaaldawan ni Lot, “sinda nagkakarakan, sinda nag-iirinom, sinda nagbabarakal, sinda nagpapabakal, sinda nagtatanom, sinda nagtotorogdok.” Grabe man kainmoral an sosyedad na kinabubuhayan ninda. Kun kamo, isasapuso daw nindo an patanid kan kondenaron ni Lot an maraot na mga gibo? Maghihinanyog daw kamo kun sabihan nia kamo na nagdesisyon an Dios na laglagon an siudad nin Sodoma? O ibibilang daw nindo iyan na suba sana, kapareho kan magigin mga manugang na lalaki ni Lot? Posible daw na kamo duminulag na kutana alagad ta buminirik pa kamo, kapareho kan agom ni Lot? Minsan ngani dai sineryoso nin iba an patanid, kan aldaw na si Lot luminuwas sa Sodoma, “uminoran nin kalayo asin asupre hale sa langit asin linaglag sinda gabos.”​—Lucas 17:​28, 29.

An mayoriya sa satong kaaldawan dai nagmamangno. Alagad an mga halimbawang ini prineserbar sa Tataramon nin Dios bilang patanid sa sato, tangani na enkaminaron kita na MAGDANAY NA MAPAGBANTAY!

[Kahon/Ritrato sa pahina 22]

Talaga daw na Nagkaigwa nin Baha na Lakop sa Globo?

Dakol na kritiko an nagsasabing Dai. Alagad an Biblia nagsasabing Iyo.

Si Jesu-Cristo mismo nagtaram manongod dian, asin buhay sia kan iyan mangyari, na pinagheheling iyan hale duman sa kalangitan.

[Kahon/Ritrato sa pahina 23]

Talaga daw na Linaglag an Sodoma Asin Gomorra?

Pinapatunayan nin arkeolohiya an pangyayaring ini.

Nasasambitan iyan nin sekular na kasaysayan.

Binerepikar ni Jesu-Cristo an pangyayari, asin nasasambitan sa 14 libro kan Biblia an nangyari.