Nag-abot Na ‘an Oras nin Paghokom’

IPINAPAARAM sa sato kan Kapahayagan, an huring libro kan Biblia, na an sarong anghel na naglalayog sa tahaw kan langit may darang “daing katapusan na maogmang bareta na ipapahayag bilang nakakaogmang notisya.” Sinasabi nia sa makosog na tingog: “Matakot kamo sa Dios asin pamurawayon sia, huli ta nag-abot na an oras kan saiyang paghokom.” (Kapahayagan 14:​6, 7) Kaiba sa ‘oras nin paghokom’ na iyan an pagpahayag sagkod an pag-implementar kan paghokom nin Dios. An “oras” medyo halipot sanang panahon. An pag-implementar kan paghokom iyo an kulminasyon kan “huring mga aldaw,” na kinabubuhayan niato ngonyan.​—2 Timoteo 3:1.

An ‘oras nin paghokom’ maogmang bareta para sa mga namomoot sa katanosan. Iyan panahon na pagiginhawahon nin Dios an saiyang mga lingkod, na nagdusa sa kamot kan madahas, daing pagkamoot na sistemang ini nin mga bagay.

Ngonyan, bago matapos ‘an oras nin paghokom’ sa paglaglag sa presenteng maraot na sistema nin mga bagay, sinasadol kita: “Matakot kamo sa Dios asin pamurawayon sia.” Ginigibo daw nindo iyan? An kalabot digdi bako sanang pagsabing, “Nagtutubod ako sa Dios.” (Mateo 7:21-23; Santiago 2:​19, 20) An tamang pagkatakot sa Dios maninigong makamotibar sa sato na magkaigwa nin may pagkangirhat na paggalang sa saiya. Iyan maninigong magpahiro sa sato na talikdan an karatan. (Talinhaga 8:13) Iyan maninigong makatabang sa sato na kamotan an marahay asin ikaongis an maraot. (Amos 5:​14, 15) Kun tinatawan niato nin onra an Dios, maghihinanyog kita sa saiya na may dakulang paggalang. Dai kita magigin sibot-sibot sa ibang bagay kaya dai na niato nababasa nin regular an saiyang Tataramon, an Biblia. Magtitiwala kita sa saiya sa gabos na panahon asin sa bilog niatong puso. (Salmo 62:8; Talinhaga 3:​5, 6) Rinerekonoser kan mga tunay na nagtatao nin onra sa saiya na bilang an Kaglalang kan langit asin daga, sia an Unibersal na Soberano, asin sinda mamomoton na nagpapasakop sa saiya bilang an Soberano sa saindang buhay. Kun narerealisar niato na kaipuhan na tawan niato nin orog na atension an mga bagay na ini, gibohon niato iyan na daing pag-atraso.

An oras kan pag-implementar kan paghokom na sinabi kan anghel inaapod man na “aldaw ni Jehova.” Uminabot an siring na “aldaw” sa suanoy na Jerusalem kan 607 B.C.E. ta dai hinimate kan mga nag-eerok dian an mga patanid ni Jehova paagi sa saiyang mga propeta. Sa pagdigson kan aldaw ni Jehova sa isip ninda, orog pa nindang isinapeligro an saindang buhay. Pinatanidan sinda ni Jehova: “Iyan harani na, asin iyan naghihidaling marhay.” (Sofonias 1:14) An saro pang “aldaw ni Jehova” nag-abot sa suanoy na Babilonya kan 539 B.C.E. (Isaias 13:​1, 6) Kompiado sa mga kuta ninda asin sa mga dios ninda, dai inintindi kan mga Babilonyo an mga patanid na itinao kan mga propeta ni Jehova. Alagad sa saro sanang banggi, buminagsak an dakulang Babilonya sa mga Medo asin Persiano.

Sa ano kita napapaatubang ngonyan? Sa saro pa asin mas mahiwas an naaabot na “aldaw ni Jehova.” (2 Pedro 3:11-14) Hinokoman na nin Dios an “Dakulang Babilonya.” Segun sa Kapahayagan 14:​8, ipinapahayag nin sarong anghel: “An Dakulang Babilonya buminagsak na.” Nangyari na iyan. Dai na nia kayang pogolan an mga parasamba ki Jehova. Nabuyagyag nang biyo an saiyang karatan asin pakikilabot sa guerra. Ngonyan harani na an pinal na paglaglag sa saiya. Huli kaiyan, an mga tawo saen man sinasadol kan Biblia: “Lumuwas kamo sa saiya [Dakulang Babilonya] . . . kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat. Huli ta an saiyang mga kasalan nakaabot na sagkod sa langit, asin ginirumdom na nin Dios an saiyang mga gibo nin inhustisya.”​—Kapahayagan 18:​4, 5.

Ano an Dakulang Babilonya? Iyan an lakop sa globong sistema nin relihion na may mga karakteristiko kan suanoy na Babilonya. (Kapahayagan, kapitulo 17, 18) Estudyare an nagkapira sa mga pagkakaagid:

 • An mga saserdote kan suanoy na Babilonya kalabot na marhay sa politikal na mga gibo-gibo kan nasyon. Totoo iyan sa dakol na relihion ngonyan.

• An mga saserdote kan Babilonya parate na iyong mga promotor kan pakikiguerra kan nasyon. An relihion sa presenteng aldaw parateng nangengenot sa mga nagbebendisyon sa mga soldados kun nakikiguerra an mga nasyon.

• Dinara kan mga katokdoan asin gibo kan suanoy na Babilonya sa grabeng inmoralidad an nasyon. Kun ipinapagilid nin mga namomoon sa relihion ngonyan an pamantayan kan Biblia sa moralidad, lakop an inmoralidad sa tahaw nin klero sagkod lego. Mahalaga man na mangnohon an bagay na huling nagpapakangpampam an Dakulang Babilonya sa kinaban asin sa mga sistema politikal kaiyan, ilinaladawan sia kan Kapahayagan bilang sarong patotot.

• Sinasabi man kan Biblia na an Dakulang Babilonya namumuhay “sa daing supog na luho.” Sa suanoy na Babilonya, nagkarogaring nin mahihiwas na daga an organisasyon kan templo, asin an mga saserdote nagin prominente sa mga negosyo. Ngonyan, apuera sa mga lugar nin pagsamba, kadakol kan negosyo asin rogaring kan Dakulang Babilonya. An mga katokdoan nia asin an mga piesta nia nagtatao nin dakulang kayamanan sa saiya sagkod sa iba pa na nasa kinaban nin negosyo.

• Uso kaidto sa suanoy na Babilonya an paggamit nin mga imahen, mahika, asin panraratak, kun paanong uso man iyan ngonyan sa dakol na lugar. An kagadanan ibinilang kaidto na pagbalyo sa saro pang klase nin buhay. An Babilonya pano nin mga templo asin kapilya para sa mga dios kaiyan, alagad kinontra kan mga Babilonyo an mga nagsasamba ki Jehova. An Dakulang Babilonya midbid sa iyo man sanang mga paniniwala asin gibo.

Kan suanoy na mga panahon, minaniobra ni Jehova an makapangyarihan na mga nasyon na politikal asin militar tanganing padusahan an mga prosegidong magbasangbasang sa saiya asin sa saiyang kabotan. Sa siring linaglag an Samaria kan mga Asirio kan 740 B.C.E. Rinadas an Jerusalem kan mga Babilonyo kan 607 B.C.E. asin kan mga Romano kan 70 C.E. An Babilonya sinakop man kan mga Medo asin Persiano kan 539 B.C.E. Para sa satong kaaldawan, ihinula kan Biblia na sasalakayon kan politikal na mga gobyerno, na siring sa mabangis na hayop, an “patotot” asin huhubaan sia, sa siring ibinubuyagyag kun ano man nanggad sia. Sia biyo nindang lalaglagon.​—Kapahayagan 17:16.

Talaga daw na gigibohon kan mga gobyerno sa kinaban an siring na bagay? Sinasabi kan Biblia na ‘ibubugtak iyan nin Dios sa saindang puso.’ (Kapahayagan 17:17) Iyan magigin bigla, nakakataraka, labi-labi kanakakakubhan, bakong dati nang nahehelingheling o gradwal.

Anong aksion an kaipuhan nindong gibohon? Ihapot sa sadiri: ‘Nagdadanay pa daw ako sa relihiosong organisasyon na naulakitan nin mga katokdoan asin gibo na tanda na iyan kabtang kan Dakulang Babilonya?’ Dawa kun bako kamong miembro, puede nindong ihapot sa sadiri: ‘Tinotogotan ko daw na makaimpluwensia sa sako an espiritu kaiyan?’ Anong klaseng espiritu? Espiritu nin pagpabaya sa malaswang moral, pagkamoot sa materyal na mga rogaring asin kasingawan imbes na pagkamoot sa Dios, o tuyong pagbasangbasang (dawa sa garo baga saradit na bagay) sa Tataramon ni Jehova. Isip-isipang marhay an saindong simbag.

Tanganing kamtan niato an pabor ni Jehova, mahalagang marhay na sa satong mga gawe-gawe asin sa mga kamawotan kan satong puso, pinapatunayan niato na kita talagang bakong kabtang kan Dakulang Babilonya. Mayo nin panahon na mag-atraso. Sa pagpatanid sa sato na an katapusan biglang maabot, sinasabi kan Biblia: “Iaapon sa marikas na pagbaribad an Babilonya na dakulang siudad, asin dai na sia noarin man makukua giraray.”​—Kapahayagan 18:21.

 Alagad bako sana iyan. Sa saro pang aspekto kan ‘oras nin paghokom’ na iyan, hohokoman ni Jehova Dios an lakop sa globong sistema politikal, an mga namamahala dian, asin an gabos na dai nag-iintindi sa saiyang lehitimong pamamahala paagi sa saiyang langitnon na Kahadean sa kamot ni Jesu-Cristo. (Kapahayagan 13:​1, 2; 19:19-21) Ilinaladawan kan makahulang bisyon na nasusurat sa Daniel 2:20-45 an politikal na pamamahala poon kan panahon kan suanoy na Babilonya sagkod sa presente bilang higanteng imahen na gibo sa bulawan, pirak, tanso, batbat, asin dalipay. Mapadapit sa satong kaaldawan, sinabi kan hula: “An Dios nin kalangitan mapatindog nin sarong kahadean na dai noarin man malalaglag.” Asin mapadapit sa gigibohon pa kan Kahadean na iyan durante kan ‘oras nin paghokom’ ni Jehova, sinasabi kan Biblia: “Iyan an maronot asin matapos kan gabos na ining kahadean [na gibo nin tawo], asin iyan mismo magdadanay sagkod sa mga panahon na daing talaan.”​—Daniel 2:44.

Pinapatanidan kan Biblia an tunay na mga parasamba tumang sa pagkamoot sa “mga bagay kan kinaban,”​—an pamumuhay na pinapalakop kan kinaban na ini na siblag sa tunay na Dios. (1 Juan 2:15-17) Ipinapaheling daw kan saindong mga desisyon asin gawe-gawe na kamo marigon na apabor sa Kahadean nin Dios? Talaga daw na ineenot nindo iyan sa saindong buhay?​—Mateo 6:33; Juan 17:​16, 17.

[Kahon sa pahina 14]

Noarin Maabot an Katapusan?

“Sa oras na dai nindo pinaghohona, an Aki nin tawo madatong.”​—Mateo 24:44.

“Magdanay kamong mapagbantay, huli ta dai nindo naaaraman an aldaw ni an oras.”​—Mateo 25:13.

“Dai iyan mahuhuri.”​—Habacuc 2:3.

[Kahon sa pahina 14]

May Epekto daw kun Iyan Aram Nindo?

Kun segurado nindo na nagkapira pang taon na dai maabot an nagdadangadang na paghokom nin Dios, makakapabago daw iyan sa paggamit nindo kan saindong buhay? Kun atrasado na an katapusan kan daan na sistemang ini kisa inaasahan nindo, pinabayaan daw nindo na makapaluya ini sa saindo sa paglilingkod ki Jehova?​—Hebreo 10:36-38.

An dai niato pakaaram kan eksaktong oras nagtatao sa sato nin oportunidad na ipaheling na dalisay an satong mga motibo sa paglilingkod sa Dios. Aram kan mga nakakamidbid ki Jehova na an ultima orang pagpaheling nin kaigotan daing epekto sa Dios, na nakakaheling kan nasa puso.​—Jeremias 17:10; Hebreo 4:13.

Para sa mga talagang namomoot ki Jehova, sia an pirmeng enot. Kapareho nin ibang tawo, an tunay na mga Kristiano puedeng may sekular na trabaho. Minsan siring, an pasohan ninda, bakong magpayaman, kundi magkaigwa nin supisyenteng materyal na mga bagay asin nin kadikit na ikakahiras sa iba. (Efeso 4:28; 1 Timoteo 6:7-12) Naoogma man sindang magkaigwa nin marahay sa lawas na pag-aling-aling asin kadikit na pagkaliwat kan rutina, alagad an mawot ninda magpapresko, bakong arogon sana an ginigibo nin iba. (Marcos 6:31; Roma 12:2) Kapareho ni Jesu-Cristo, ikinakaogma ninda an paggibo kan kabotan nin Dios.​—Salmo 37:4; 40:8.

Boot nin tunay na mga Kristiano na mabuhay asin maglingkod ki Jehova sagkod lamang. An esperansang iyan dai naiinaan an halaga huli sana ta kaipuhan na halaton ninda an nagkapirang bendisyon nin mas halawig nin kadikit kisa tibaad inaasahan nin iba.

 [Kahon/Ritrato sa pahina 15]

Isyu Manongod sa Soberaniya

Tanganing masabotan kun taano ta itinotogot nin Dios an grabeng pagdusa, kaipuhan na masabotan niato an isyu manongod sa soberaniya. Ano an soberaniya? Iyan supremasiya nin autoridad.

Huling si Jehova an Kaglalang, sia may deretsong mamahala sa daga asin sa gabos na nag-eerok dian. Minsan siring, ipinapaliwanag kan Biblia na sa kapinonan kan kasaysayan nin tawo, inangat an soberaniya ni Jehova. Hiningako ni Satanas na Diablo na si Jehova labi-labi kamapamogol, na nagputik Sia sa enot niatong mga magurang manongod sa mangyayari kun dai ninda iintindihon an ley nin Dios asin magawe sinda sono sa gusto ninda, asin na an totoo magigin mas marahay kun pamamahalaan ninda an saindang sadiri na siblag sa Dios.​​—Genesis, kapitulo 2, 3.

Kun tolos na linaglag nin Dios an mga rebelde, ikinapaheling kutana kaiyan an saiyang kapangyarihan, alagad dai man kaiyan naresolberan an mga isyung pinalataw. Imbes na laglagon tolos an mga rebelde, pinabayaan ni Jehova na maheling kan gabos na intelihenteng linalang an resulta nin pagrebelde. Dawa ngani ini may kalabot na pagdusa, ini nagtao man nin oportunidad na kita mamundag.

Apuera kaini, sa dakulang pagsakripisyo nia mismo, si Jehova mamomoton na guminibo nin probisyon tangani na an mga tawo na makuyog sa saiya asin matubod sa pantubos na atang kan saiyang Aki makatalingkas sa kasalan saka sa mga resulta kaiyan asin mabuhay sa Paraiso. Kun kaipuhan, ini puedeng paagi sa pagkabuhay liwat hale sa mga gadan.

An pagtao nin panahon na maresolberan an isyu nagtao man nin oportunidad sa mga lingkod nin Dios na ipaheling na kaya nindang balosan an pagkamoot nin Dios asin patunayan an integridad ninda ki Jehova sa irarom nin gabos na kamugtakan. An pagresolber sa isyu manongod sa soberaniya nin Dios, kaiba an konektadong isyu manongod sa integridad nin tawo, mahalagang marhay tangani na magkaigwa nin tamang paggalang sa ley sa uniberso. Kun mayo kaiyan, nungka na magigin posible an tunay na katoninongan. a

[Nota sa Ibaba]

[Ritrato]

An lakop sa globong sistema nin politikal na pamamahala matatapos