“Orog sa Gabos, Magkaigwa nin Malaad na Pagkamoot”

“Harani na an katapusan kan gabos na bagay. . . . Orog sa gabos, magkaigwa nin malaad na pagkamoot sa lambang saro.”​—1 PEDRO 4:​7, 8.

 ARAM ni Jesus na mahalagang marhay an huring pirang oras nia kaiba kan saiyang mga apostol. Aram nia kun ano an naghahalat sa sainda. Dakulaon an trabahong kaipuhan na mahaman ninda, alagad ikakaongis asin paglalamagon sinda, kapareho nia. (Juan 15:18-20) Bako sanang sarong beses sa pag-iribaiba ninda kan ultimong bangging idto, ipinagirumdom nia sa sainda an pangangaipo na “magkaminorootmootan.”​—Juan 13:​34, 35; 15:​12, 13, 17.

² Nakua ni apostol Pedro, na yaon kan bangging idto, an punto. Pakalihis nin mga taon, kan nagsusurat dai na mahahaloy bago an pagkalaglag nin Jerusalem, idinoon ni Pedro an halaga nin pagkamoot. Hinatolan nia an mga Kristiano: “Harani na an katapusan kan gabos na bagay. . . . Orog sa gabos, magkaigwa nin malaad na pagkamoot sa lambang saro.” (1 Pedro 4:​7, 8) Makahulogan na marhay an mga tataramon ni Pedro para sa mga nabubuhay sa “huring mga aldaw” kaining presenteng sistema nin mga bagay. (2 Timoteo 3:1) Ano an “malaad na pagkamoot”? Taano ta importante na magkaigwa kita nin siring na pagkamoot sa iba? Asin paano niato ikakapaheling na kita talagang may siring na pagkamoot?

“Malaad na Pagkamoot”​​—Ano Iyan?

³ Dakol an naghohona na an pagkamoot sarong emosyon na dapat na natural na lumuwas. Alagad an boot sabihon ni Pedro bako sanang minsan anong klaseng pagkamoot; sia nagtataram manongod sa pinakanobleng klase nin pagkamoot. An terminong “pagkamoot” sa 1 Pedro 4:8 traduksion kan termino sa Griego na a·gaʹpe. An terminong iyan nangangahulogan nin bakong maimot na pagkamoot na ginigiyahan, o dinedeterminaran, nin prinsipyo. Sinasabi nin sarong reperensia: “An pagkamoot na agape puedeng mandahan ta sa pangenot iyan bakong emosyon kundi desisyon na nagbubunga nin aksion.” Huli ta may namana kitang tendensia sa kaimotan, kaipuhan niato nin mga pagirumdom na magpaheling nin pagkaminootan, na ginigibo iyan sa mga paaging idinidirehir nin diosnon na mga prinsipyo.​—Genesis 8:21; Roma 5:12.

⁴ Dai boot sabihon kaini na kita magkakaminorootmootan huli sana ta iyan obligasyon niato. An a·gaʹpe bako man na kulang sa init asin pagsaboot. Sinabi ni Pedro na dapat na kita “magkaigwa nin malaad [sa literal, “ignit”] na pagkamoot sa lambang saro.” a (Kingdom Interlinear) Pero, nagkakaipo nin paghihingoa an siring na pagkamoot. Mapadapit sa termino sa Griego na trinadusir na “malaad,” sinasabi nin sarong intelektuwal: “Ilinaladawan kaiyan an ideya nin pinupuersang kalamnan nin sarong atleta mantang inuubos nia an natatada niang kosog sa katapusan kan paorumbasan.”

⁵ Kun siring, an satong pagkamoot dapat na bakong paggibo sana kan pasil o limitado sana sa nagkapira. Hinahagad nin Kristianong pagkamoot na “igniton” niato an satong puso, na ipinapaheling an pagkamoot dawa kun iyan masakit na gibohon. (2 Corinto 6:11-13) Malinaw na an klaseng ini nin pagkamoot bagay na kaipuhan niatong kultibaron asin pagmaigotan, kun paanong dapat na magsanay asin maghingoa an sarong atleta tangani na mapaoswag an saiyang abilidad. Mahalagang marhay na igwa kita kan siring na pagkamoot sa lambang saro. Taano? Sa kisuerra tolong dahelan.

 Taano ta Maninigo Kitang Magkaminorootmootan?

⁶ Enot, “huli ta an pagkamoot gikan sa Dios.” (1 Juan 4:7) Si Jehova, an Burabod kan kawiliwiling kualidad na ini, enot na namoot sa sato. Sinasabi ni apostol Juan: “Huli kaini nahayag sa sato an pagkamoot nin Dios, huli ta sinugo nin Dios an saiyang Aking bugtong sa kinaban tanganing kita magkamit nin buhay paagi sa saiya.” (1 Juan 4:9) “Sinugo” an Aki nin Dios paagi sa pagigin tawo, pag-otob kan saiyang ministeryo, asin pagkagadan sa hariging pasakitan​​—gabos sa katuyohan na “kita magkamit nin buhay.” Ano an maninigong magin reaksion niato sa kadarudakulaing kapahayagan na ini kan pagkamoot nin Dios? Sinasabi ni Juan: “Kun siring kaini an pagkamoot sa sato nin Dios, kun siring kita mismo nasa irarom nin obligasyon na magkaminorootmootan.” (1 Juan 4:11) Mangnoha na an isinurat ni Juan, “Kun siring kaini an pagkamoot sa sato nin Dios”​​—bako sanang sa saindo kundi sa sato. Malinaw an punto: Kun namomotan nin Dios an satong mga kapagtubod, kun siring kaipuhan na kamotan man niato sinda.

⁷ Ikaduwa, nangorognang mahalagang marhay na orog kitang magkaminorootmootan ngonyan tangani na tabangan an mga tugang niatong nangangaipo ta “harani na an katapusan kan gabos na bagay.” (1 Pedro 4:7) Nabubuhay kita sa “delikadong mga panahon na masakit pakibagayan.” (2 Timoteo 3:1) An mga kamugtakan sa kinaban, natural na mga kalamidad, asin oposisyon nagtatao sa sato nin mga kadepisilan. Sa irarom nin masakit na mga kamugtakan, kaipuhan na orog kitang magin harani sa lambang saro. An malaad na pagkamoot pagsasararoon kita asin momotibaron kitang ‘pangatamanan an lambang saro.’​—1 Corinto 12:​25, 26.

⁸ Ikatolo, kaipuhan na kita magkaminorootmootan ta habo niatong ‘tawan nin lugar an Diablo’ na aprobetsaran kita. (Efeso 4:27) Listo si Satanas na gamiton an mga pagkabakong sangkap kan satong mga kapagtubod​​—an saindang mga kaluyahan, depekto, asin sala​​—bilang mga singkogan. An saro daw na dai inisip na komento o daing kabootan na gibo magigin dahelan na kita rumayo sa kongregasyon? (Talinhaga 12:18) Dai kun kita may malaad na pagkamoot sa lambang saro! Nakakatabang sa sato an siring na pagkamoot na papagdanayon an katoninongan asin sararong paglingkodan an Dios nin “daramay.”​—Sofonias 3:9.

Kun Paano Ipapaheling na Namomotan Nindo an Iba

⁹ An pagpaheling nin pagkamoot dapat na magpoon sa harong. Sinabi ni Jesus na mamimidbid an tunay niang mga parasunod sa pagkamoot ninda sa lambang saro. (Juan 13:​34, 35) Dapat na risang-risa an pagkamoot bako sanang sa kongregasyon kundi pati sa pamilya​​—sa pag-oltanan nin mag-agom asin sa pag-oltanan nin mga magurang asin aki. Bakong igo na makamate nin pagkamoot sa mga miembro nin pamilya; kaipuhan na ipahayag niato iyan sa positibong mga paagi.

¹⁰ Paano makakapaheling nin pagkaminootan an mag-agom? An agom na lalaki na tunay an pagkamoot sa saiyang agom ipinapaaram digdi paagi sa saiyang mga tataramon asin gibo​​—sa publiko asin sa pribado​​—na ini saiyang pinakamamahal. Iginagalang nia an personal na dignidad kaini asin makonsiderasyon sia sa mga opinyon, punto de vista, asin saboot kaini. (1 Pedro 3:7) Ipinapaorog nia an ikakarahay kaini sa sadiri niang ikakarahay, asin ginigibo nia an gabos niang magigibo sa pag-asikaso sa materyal, espirituwal, asin emosyonal na mga pangangaipo kaini. (Efeso 5:​25, 28) An agom na babae na talagang namomoot sa saiyang agom tinatawan ini nin “hararom na paggalang,” dawa may beses na ini dai nakakaabot sa saiyang mga inaasahan. (Efeso 5:​22, 33) Mapagsuportar sia sa saiyang agom asin mapagpasakop digdi, na dai naghahagad nin mga bagay na sobra na, kundi nakikikooperar digdi sa pagdadanay na konsentrado sa espirituwal na mga bagay.​—Genesis 2:18; Mateo 6:33.

 ¹¹ Mga magurang, paano nindo ikakapaheling an pagkamoot sa saindong mga aki? An pagigin andam nindo na maghingoa tangani na masustentohan sinda sa materyal patunay kan saindong pagkamoot. (1 Timoteo 5:8) Alagad bako sanang kakanon, gubing, asin istaran an kaipuhan nin mga aki. Tangani na sinda magdakula na namomoot asin naglilingkod sa tunay na Dios, kaipuhan ninda an espirituwal na pagpatuod. (Talinhaga 22:6) Iyan nangangahulogan nin pagtagama nin panahon bilang pamilya na mag-adal kan Biblia, makikabtang sa ministeryo, asin mag-atender sa Kristianong mga pagtiripon. (Deuteronomio 6:4-7) An pagigin dayaday sa siring na mga aktibidad nagkakaipo nin awad-awad na sakripisyo, nangorogna sa delikadong mga panahon na ini. An pagmalasakit asin paghihingoa nindo na maasikaso an espirituwal na mga pangangaipo kan saindong mga aki kapahayagan nin pagkamoot, ta paagi kaiyan ipinapaheling nindo na nasa puso nindo an daing sagkod na ikakarahay ninda.​—Juan 17:3.

¹² Mahalagang marhay na an mga magurang magpaheling man nin pagkamoot paagi sa pag-asikaso sa emosyonal na mga pangangaipo kan saindang mga aki. Delikado an mga aki; kaipuhan kan hoben nindang puso an pag-asegurar giraray kan saindong pagkamoot. Sabihon nindo sa sainda na namomotan nindo sinda, asin padangaton nindo sindang marhay, ta an siring na mga kapahayagan nag-aasegurar sa sainda na sinda madaling kamotan asin may halaga. Tawan sinda nin komendasyon na may init asin tunay, ta sinasabi kaiyan sa sainda na naheheling asin pinapahalagahan nindo an saindang mga paghihingoa. Disiplinahon sinda na may pagkamoot, ta sinasabi sa sainda kan siring na pagtatanos na may pagmakolog kamo sa kun ano an nagigin pagkatawo ninda. (Efeso 6:4) An gabos na nakakarahay na mga kapahayagan na iyan nin pagkamoot nakakatabang na magkaigwa nin maogma, dayupot na pamilya na mas andam na paglabanan an mga sakit sa huring mga aldaw na ini.

¹³ Pinapahiro kita nin pagkamoot na dai intindihon an mga pagkukulang nin iba. Girumdoma na kan sinasadol an mga parabasa nia na “magkaigwa nin malaad na pagkamoot sa lambang saro,” itinao ni Pedro an dahelan kun taano ta ini importanteng marhay: “Huli ta an pagkamoot nakakatahob sa dakol na kasalan.” (1 Pedro 4:8) An ‘pagtahob’ sa mga kasalan dai nangangahulogan nin pagtago nin magagabat na kasalan. An siring na mga bagay tama sanang isabi sa asin asikasohon nin mga may paninimbagan sa kongregasyon. (Levitico 5:1; Talinhaga 29:24) Bako nanggad na mamomoton​​—asin sono sa Kasuratan​​—na pabayaan an mga grabeng parakasala na padagos na mandanyar o mambiktima sa mga inosente.​—1 Corinto 5:9-13.

¹⁴ Sa kadaklan, an sala asin depekto nin mga kapagtubod saradit sana. Kita gabos may beses na nasasala sa pagtaram o gibo, na sinusudya an linalaoman nin o nakokolgan pa ngani an lambang saro. (Santiago 3:2) Maninigo daw na kita magin listong ipamareta an mga pagkukulang nin iba? An siring na gawe-gawe pagpoponan sana nin dai pagkakaoyon sa kongregasyon. (Efeso 4:1-3) Kun kita ginigiyahan nin pagkamoot, dai niato ‘sasabihon an sala’ nin sarong kapwa nagsasamba. (Salmo 50:20) Kun paanong tinatahoban nin palitada asin pintura an mga depekto nin sarong lanob, tinatahoban man nin pagkamoot an mga depekto nin iba.​—Talinhaga 17:9.

¹⁵ Papahiroon kita nin pagkamoot na tabangan an mga talagang nangangaipo. Mantang padagos na naggagrabe an mga kamugtakan sa huring mga aldaw, tibaad may mga panahon na nagkakaipo nin materyal o pisikal na tabang an satong mga kapagtubod. (1 Juan 3:​17, 18) Halimbawa, grabe daw an pagkapierde o nawaran daw nin trabaho an sarong miembro kan satong kongregasyon? Kun siring, tibaad makakatao kita nin materyal na tabang, segun sa itinotogot kan satong kamugtakan. (Talinhaga 3:​27, 28; Santiago 2:14-17) Kaipuhan daw na hirahayon an harong nin may edad nang babaeng balo? Kun siring, tibaad puede kitang gumibo nin angay na inisyatiba na tumabang sa nagkapirang kabtang kan trabaho.​—Santiago 1:27.

¹⁶ An pagpaheling niato nin pagkamoot sa iba bako sanang sa mga nag-iistar sa lugar niato.  Kun beses, tibaad makadangog kita nin mga bareta manongod sa mga lingkod nin Dios sa ibang kadagaan na nabiktima nin makokosog na bagyo, linog, o kariribokan sibil. Tibaad grabe an pangangaipo ninda nin kakanon, gubing, asin iba pang bagay. Bakong mahalaga kun iba man an saindang rasa o grupong etniko. ‘Namomoot kita sa bilog na kasararoan nin mga tugang.’ (1 Pedro 2:17) Kaya, kapareho nin mga kongregasyon kan enot na siglo, galaga kitang sumuportar sa mga pag-ayudang inorganisar tanganing tumabang. (Gibo 11:27-30; Roma 15:26) Kun kita nagpapaheling nin pagkamoot sa gabos na paaging iyan, pinaparigon niato an bogkos kan satong pagkasararo sa huring mga aldaw na ini.​—Colosas 3:14.

¹⁷ Pinapahiro kita nin pagkamoot na ipaabot sa iba an maogmang bareta kan Kahadean nin Dios. Estudyare an halimbawa ni Jesus. Taano sia ta naghulit asin nagtokdo? Sia “napahiro nin pagkaherak” sa mga kadaklan huli sa kaherakherak na kamugtakan ninda sa espirituwal. (Marcos 6:34) Sinda pinabayaan asin ilinagalag kan mga pastor nin falsong relihion, na maninigo kutanang nagtokdo sa sainda nin espirituwal na mga katotoohan asin nagtao sa sainda nin paglaom. Kaya, minomotibar nin hararom, odok sa pusong pagkamoot asin pagkaludok, rinanga ni Jesus an mga tawo paagi sa “maogmang bareta kan kahadean nin Dios.”​—Lucas 4:16-21, 43.

¹⁸ Ngonyan man, dakol an pinabayaan saka ilinagalag sa espirituwal asin mayo nin paglaom. Kun, kapareho ni Jesus, orog kitang magigin sensitibo sa espirituwal na mga pangangaipo kan mga dai pa nakakamidbid sa tunay na Dios, momotibaron kita nin pagkamoot asin pagkaludok na ipaabot sa sainda an maogmang bareta kan Kahadean nin Dios. (Mateo 6:​9, 10; 24:14) Huling halipot na an panahon na natatada, mas apurado ngonyan kisa kasuarin man na ihulit an nagliligtas-buhay na mensaheng ini.​—1 Timoteo 4:16.

“Harani Na an Katapusan kan Gabos na Bagay”

¹⁹ Girumdoma, iinintrodusir ni Pedro an hatol nia na magkaminorootmootan paagi sa mga tataramon na: “Harani na an katapusan kan gabos na bagay.” (1 Pedro 4:7) Dai na mahahaloy an maraot na kinaban na ini sasalidahan kan matanos na bagong kinaban nin Dios. (2 Pedro 3:13) Kun siring, bako ini an panahon na magin kontento na sa sadiri. Pinatanidan kita ni Jesus: “Atenderan an saindong sadiri na an saindong mga puso dai noarin man mapagabatan nin sobrang pagkakan asin makosog na pag-inom patin mga kahaditan sa buhay, asin sa panale an aldaw na iyan mag-abot sa saindo na siring sa sarong siod.”​—Lucas 21:​34, 35.

²⁰ Kun siring, ‘magdanay nanggad kitang mapagbantay,’ na marigmat sa kun saen na kita sa dalagan nin panahon. (Mateo 24:42) Magmaan kita sa ano man na sugot ni Satanas na puedeng makadisturbo sa sato. Nungka na togotan niato an indiperente, daing pagkamoot na kinaban na ini na olangon kita sa pagpaheling kan satong pagkamoot sa iba. Orog sa gabos, orog kitang rumani sa tunay na Dios, si Jehova, na an Mesiyanikong Kahadean madali nang mag-otob kan saiyang mamuraway na katuyohan para sa dagang ini.​—Kapahayagan 21:​4, 5.

[Nota sa Ibaba]

MGA HAPOT PARA SA PAG-ADAL

• Anong hatol an itinao ni Jesus sa saiyang mga disipulo kan pahale na sia, asin ano an nagpapaheling na nakua ni Pedro an punto? (Par. 1-2)

• Ano an “malaad na pagkamoot”? (Par. 3-5)

• Taano ta maninigo kitang magkaminorootmootan? (Par. 6-8)

• Paano nindo ikakapaheling na namomotan nindo an iba? (Par. 9-​18)

• Taano ta bako ini an panahon na magin kontento na sa sadiri, asin maninigo na magin determinado kitang gibohon an ano? (Par. 19-​20)

[Ritrato sa pahina 29]

An dayupot na pamilya mas andam na paglabanan an mga sakit sa huring mga aldaw na ini

[Ritrato sa pahina 30]

Pinapahiro kita nin pagkamoot na tabangan an mga talagang nangangaipo

[Ritrato sa pahina 31]

An pagpaabot sa iba kan maogmang bareta kan Kahadean nin Dios sarong akto nin pagkamoot