Pasaen daw an Kinaban na Ini?

An magagabat na problema asin nakakasustong mga pangyayari nagin ordinaryo na sanang bareta sa palibot kan kinaban! Ano an kahulogan kaiyan?

PERSONAL NA KATIWASAYAN: May mga bombang pinapaputok sa mga sadan. Nababadil sa eskuelahan an mga maestro asin estudyante. Nagtalikod sana an mga magurang kinikidnap na an mga omboy. Aldaw na aldaw sinasalakay an mga babae asin may edad nang mga lalaki.

AN KAMUGTAKAN KAN RELIHION: Suportado nin mga iglesia an mga naggeguerra. Akusado nin pagpara sa sarong bilog na rasa an klero. An mga padi nangangaprobetsar sa hobenes sa seksuwal na paagi; tinatahoban iyan kan iglesia. Nagdidikit an nagsisimba; ipinapabakal na an mga simbahan.

AN PALIBOT: Kinakalbo an mga kadlagan huli sa negosyo. Pinapalod kan mga dukha an kakahoyan para sa pangatong. Maati na an tubig hale sa irarom kan daga, dai na puedeng inomon. Nararaot an paninira huli sa mga basurang itinatapok sa mga salog saka dagat asin sa nagkapirang modernong paagi nin paninira. Pano-pano nin polusyon an aire.

 PAGHANAP-BUHAY: An ginaganar kan kada tawo sa parte nin Aprika sa timog kan Sahara sinasabing mga $480 (E.U.) kada taon. Bagsak an negosyo huli sa kahanaban nin mga korporasyon, kaya rinibo an nawawaran nin trabaho. Nawawaran an mga kapitalista kan gabos nindang natipon huli sa pandadaya.

MGA KAKULANGAN NIN KAKANON: Mga 800,000,000 katawo sa bilog na kinaban an pirmeng natotorog na gutom.

GUERRA: Labing 100,000,000 katawo an nawaran nin buhay huli sa guerra sa ika-20 siglo. May natatambak na armas nuklear na igong lumaglag sa gabos na tawo nin dakol na beses. Mga guerra sibil. Apektado na kan terorismo an bilog na globo.

PESTE ASIN IBA PANG HELANG: Poon kan 1918, an trangkaso Española guminadan nin 21,000,000 katawo. An AIDS nagin nang “an pinakamapandestrosong pagkahelang na lakop asin kadakol kan apektado sa kasaysayan nin tawo.” An kanser asin helang sa puso nagtatao nin kamondoan sa bilog na kinaban.

Bako sanang kada bareta an helingon. An mga iyan daw nasosolo sanang mga pangyayari? O an mga iyan daw kabtang kan dalagan nin mga pangyayari sa kinaban na may tunay na kahulogan?

 [Kahon/Ritrato sa pahina 5]

Talaga daw na May Pagmakolog an Dios?

Napupurisaw huli sa nakakasustong mga pangyayari o grabeng personal na kawaran, dakol na tawo an nag-iisip-isip kun taano ta dai nag-iinterbenir an Dios tanganing olangon an siring na mga bagay.

Talagang may pagmakolog an Dios. Nagtatao sia ngonyan nin masasarigan na paggiya asin tunay na kaginhawahan. (Mateo 11:28-30; 2 Timoteo 3:​16, 17) Ibinugtak nia an basehan para sa permanenteng pagtapos sa kadahasan, helang, asin kagadanan. Ipinapaheling kan saiyang mga probisyon na an pinagmamakolgan nia bako sanang an mga tawo sa sarong nasyon kundi an mga tawo sa gabos na nasyon, tribo, asin lenguahe.​—Gibo 10:​34, 35.

Gurano an pagmakolog niato? Aram daw nindo kun siisay an Kaglalang kan langit asin daga? Ano an ngaran nia? Ano an katuyohan nia? Sinisimbag nia an mga hapot na ini sa Biblia. Dian sinasabi nia sa sato kun anong mga aksion an ginigibo nia tanganing taposon an kadahasan saka an helang asin kagadanan. Tanganing makinabang, ano an kaipuhan na gibohon niato? Kaipuhan na mag-adal kita manongod sa saiya asin sa saiyang katuyohan. Paano kita makakalaom na makinabang sa mga probisyon nia kun dai kita mapaheling nin pagtubod sa saiya? (Juan 3:16; Hebreo 11:6) Kaipuhan man na kuyogon an mga kahagadan nia. (1 Juan 5:3) May igo daw kamong pagmakolog na gibohon iyan?

Tanganing masabotan kun taano ta itinotogot nin Dios an mga kamugtakan sa presente, dapat na masabotan niato an sarong mahalagang marhay na isyu. Ipinapaliwanag iyan kan Biblia. Sa pahina 15 kan publikasyon na ini, sinasabi kun ano an isyung ini.