Pasaen daw an Saindong Buhay?

• Dakol na tawo an nawiwiling marhay sa mga gibo-gibo nin buhay sa aroaldaw kaya daing gayo ninda iniisip kun pasaen sinda.

• Sinasabi sa sato kan Biblia an marahayon na mga mangyayari sa ngapit. Nagpapatanid man iyan manongod sa nagdadangadang na radikal na pagbago kan mga institusyon nin tawo sa bilog na kinaban. Tangani na kita makinabang asin makalikay sa kalamidad, kaipuhan na marhay an positibong aksion.

• May mga tawo na aram an sinasabi kan Biblia asin naghihingoang iaplikar iyan alagad pinapabayaan na madisturbo sinda kan mga kahaditan sa buhay.

• Ikinakaogma daw nindo an nagigin direksion kan saindong buhay? Kun kamo nagpaplano nin mga aktibidad, pinepensar daw nindo kun paano ini puedeng makaapektar sa saindong panhaloyan na mga pasohan sa buhay?

[Kahon/Mga ritrato sa pahina 9]

Ano an Pinakaimportante sa Saindo?

Paano nindo tatasaran an minasunod? Bugtakan nin grado an mga iyan.

An dakol sa mga iyan may tamang lugar sa buhay, alagad kun kaipuhan kamong pumili, ano an enot? ikaduwa? asin iba pa.

․․․ Pag-aling-aling/dibersion

․․․ An sakong trabaho o an sakong karera

․․․ An sakong salud

․․․ Personal na kaogmahan

․․․ An sakong agom

․․․ An sakong mga magurang

․․․ An sakong mga aki

․․․ Magayon na harong, magagayon na gubing

․․․ Pagigin pinakamatibay sa ano man na ginigibo ko

․․․ Pagsamba sa Dios

 [Kahon sa pahina 10, 11]

Dinadara daw Kamo kan Saindong mga Pinipili sa Direksion na Talagang Gusto Nindo?

PENSARA AN MGA HAPOT NA INI

PAG-ALING-ALING/DIBERSION: Nakakarepresko daw sa sako an pinipili kong dibersion? May mga kaogmahan daw iyan na puedeng magsapeligro kan sakong salud o makapilay pa ngani sako nin permanente? Iyan daw sarong klase nin “pagpasiramsiram” na maogma sa laog nin tibaad pirang oras alagad puedeng magtao nin panhaloyan na kamondoan? Dawa kun nakakarahay an pag-aling-aling na pinipili ko, dakolon daw na oras an inuubos ko dian kaya inaagawan na kaiyan nin lugar an mas importanteng mga bagay?

AN SAKONG TRABAHO O AN SAKONG KARERA: Iyan daw nagseserbing pansustento, o ako daw talagang oripon kaiyan? May mga kahagadan daw iyan na nakakaraot sa sakong salud? Mas suno ko daw na mag-obertaim sa sakong trabaho o gamiton an oras kaiba kan sakong agom o kan sakong mga aki? Kun hinahagad kan sakong among an trabaho na nakakaparibok sa sakong konsensia o parateng nan-aagaw kan lugar para sa espirituwal na intereses, gigibohon ko daw an trabahong iyan tangani na dai ako mahale sa trabaho?

AN SAKONG SALUD: Binabali-wala ko daw iyan, o pirme ko daw iyan na iniingatan? Iyan na sana daw an pirme kong ipinapakipag-olay? Nagpapaheling daw nin pagmakolog sa sakong pamilya an pagtratar ko dian?

PERSONAL NA KAOGMAHAN: Ini daw an enot kong kinokonsiderar? Ipinapaorog ko daw iyan sa kaogmahan kan sakong agom o kan sakong pamilya? An paagi daw kan sakong paghanap kaiyan kabagay kan pagigin parasamba sa tunay na Dios?

AN SAKONG AGOM: Ibinibilang ko daw an sakong agom na kaibaiba ko kun noarin ko sana gusto? Tinatratar ko daw an sakong agom na may onra, bilang saro na dapat sa personal na dignidad? Impluwensiado daw kan pagtubod ko sa Dios an sakong punto de vista sa sakong agom?

AN SAKONG MGA MAGURANG: Kun ako menor de edad pa, makinuyog daw ako sa sakong mga magurang​​—na magalang kun minasimbag, ginigibo an mga trabahong iinasignar sa sako, minapuli sa ano man na oras na itinalaan ninda, linilikayan an mga pag-iriba asin aktibidad na ipinapatanid ninda? Kun ako nasa edad na, naghihinanyog daw ako sa sakong mga magurang na may paggalang, na tinatawan sinda nin angay na tabang kun ini kaipuhan? An pagtratar ko daw sa sainda ginigiyahan kan kagianan ko o kan hatol kan Tataramon nin Dios?

AN SAKONG MGA AKI: Namamatean ko daw an paninimbagan na tokdoan an sakong mga aki nin tamang pamantayan sa moral, o inaasahan ko daw an mga eskuelahan na iyong gumibo kaiyan? Tinatawan ko daw nin oras an sakong mga aki, o inaasahan ko daw na mga kawatan, TV, o komputer an makaaling sa sainda? Dinidisiplina ko daw pirme an sakong mga aki kun pinapalimanlimanan ninda an mga pagirumdom nin Dios, o ginigibo ko daw iyan prinsipalmente kun iritado na ako?

MAGAYON NA HARONG, MAGAGAYON NA GUBING: Ano an nagdidikta sa atension na itinatao ko sa sakong itsura asin sa sakong mga rogaring​​—an gusto kong itaong impresyon sa kataraed? an ikakarahay kan sakong pamilya? an bagay na ako parasamba sa Dios?

PAGIGIN PINAKAMATIBAY SA ANO MAN NA GINIGIBO KO: Importante daw para sa sako na gibohon sa marahay na paagi an mga bagay? Hinihingoa ko daw na magin an pinakamatibay? Napupurisaw daw ako kun may ibang mas matibay?

PAGSAMBA SA DIOS: Mas importante daw sa sako an pagkamit kan pag-oyon nin Dios kisa pag-oyon kan sakong agom, kan sakong mga aki, kan sakong mga magurang, o kan sakong among? Tanganing mapagdanay an komportableng estilo nin pamumuhay, magugusto daw akong gibohon na segunda na sana an paglilingkod sa Dios?

 MAINGAT NA PENSARON AN HATOL KAN BIBLIA

Ano an lugar nin Dios sa saindong buhay?

Eclesiastes 12:13: “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”

IHAPOT SA SADIRI: Ipinapaheling daw kan sakong buhay na arog kaiyan an punto de vista ko sa mga bagay? An pagkuyog daw sa mga togon nin Dios iyong nagdedeterminar kun paano ko inaasikaso an mga paninimbagan sa harong, sa trabaho, o sa eskuelahan? O an iba daw na mga intereses o an mga sakit daw sa buhay iyong nagdedeterminar kun baga tatawan ko nin panahon an Dios?

Anong klase an relasyon nindo sa Dios?

Talinhaga 3:​5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.”

Mateo 4:10: “Si Jehova na saimong Dios an dapat mong sambahon, asin sa saiya ka sana dapat na magtao nin sagradong paglilingkod.”

IHAPOT SA SADIRI: Arog daw kaiyan an saboot ko manongod sa Dios? Ipinapaheling daw kan sakong mga aktibidad sa aroaldaw, saka kan paagi nin pag-atubang ko sa mga krisis, an siring na pagtitiwala asin debosyon?

Gurano kaimportante sa saindo an pagbasa asin pag-adal kan Biblia?

Juan 17:3: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”

IHAPOT SA SADIRI: An importansia daw na itinatao ko sa pagbasa kan Tataramon nin Dios asin hararom na pag-isip-isip kaiyan nagpapaheling na ako talagang tubod dian?

Gurano kaimportante sa saindo an pag-atender sa mga pagtiripon kan Kristianong kongregasyon?

Hebreo 10:​24, 25: “Konsideraron niato an lambang saro tanganing mandagka sa pagkamoot asin sa marahay na mga gibo, na dai pagpabayaan an satong pagtorotiripon, . . . asin lalo na ta naheheling nindo na an aldaw harani na.”

Salmo 122:1: “Ako naogma kan sinda nagsasabi sa sako: ‘Sa harong ni Jehova magduruman kita.’”

IHAPOT SA SADIRI: An sakuya daw na pamumuhay nagpapaheling nin pag-apresyar sa pagdirehir na ini na yaon sa Tataramon nin Dios? Sa nakaaging bulan, nagpalta daw ako sa arin man na Kristianong pagtiripon ta itinogot kong agawan iyan nin lugar nin ibang bagay?

Kamo daw maigot na nakikikabtang sa pakikipag-olay sa iba manongod sa Dios asin sa saiyang katuyohan?

Mateo 24:14: “An maogmang baretang ini kan kahadean ihuhulit sa bilog na ineerokan na daga para sa pagpatotoo . . . , dangan madatong an katapusan.”

Mateo 28:​19, 20: “Kun siring paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.”

Salmo 96:​2, 3: “Mag-awit kamo ki Jehova, pag-omawon nindo an saiyang ngaran. Sa aroaldaw ibalangibog nindo an maogmang bareta kan saiyang pagliligtas.”

IHAPOT SA SADIRI: An aktibidad daw na ini talagang tinatawan ko kan maninigong lugar sa buhay ko? An sakuya daw na pakikikabtang dian nagpapabanaag kan sakong kombiksion kun dapit sa pagkaseryoso kan mga panahon na kinabubuhayan niato?