Maogma sa Buhay Pampamilya

Talaga daw na puwedeng magin maogma an mga pamilya?

Paano iyan mahihimo?

 May midbid daw kamong mga pamilya na sararo asin maogma arog kan maheheling sa pulyetong ini? An mga pamilya sa gabos na lugar nagkakaburulag. An diborsio, kadaihan nin kasegurohan sa trabaho, mga problema nin nagsosolong magurang, pagkadiskontento​—ini gabos nakadadagdag sa krisis. An sarong eksperto sa buhay pampamilya nag-agrangay: “Ngonyan, pamilyar na sa gabos an mga prediksion manongod sa pagkagadan kan pamilya.”

Taano ta binobomba nin siring kaseryosong mga problema an mga pamilya ngonyan? Paano kita magigin maogma sa buhay pampamilya?

Kun Paano Nagpoon an Pamilya

Tanganing masimbag an mga hapot na ini, kaipuhan na maaraman niato an ginikanan nin pag-agoman asin pamilya. Huli ta kun an mga ini may Kagpundar​—Kaglalang—​an mga miembro nin pamilya maninigong pagiya sa saiya, ta seguradong aram nia an pinakamarahay kun paano kita lubos na maoogma sa buhay pampamilya.

Interesante nanggad, dakol an nagtutubod na an areglo nin pamilya daing Kagpundar. An The Encyclopedia Americana nagsasabi: “An ibang iskolar may tendensiang susugon an ginikanan nin pag-agoman sa pagpadispadis nin mga hayop na mas hababa sa tawo.” Pero si Jesu-Cristo nagtaram manongod sa paglalang sa lalaki asin babae. Kinotar nia bilang autoridad an enot na rekord kan Biblia asin nagsabi: “An pinagsaro  nin Dios dai puwedeng pagsuwayon nin siisay man.”​—Mateo 19:​4-6.

Kaya tama si Jesu-Cristo. Linalang nin sarong intelihenteng Dios an enot na mga tawo asin ginibo an areglo para sa maogmang buhay pampamilya. Kinasal nin Dios an enot na mag-agom asin sinabi na an lalaki “magdadanay kaiba kan saiyang agom asin sinda magigin sarong laman.” (Genesis 2:​22-24) Kaya posible daw na an mga problema sa pamilya ngonyan huli sa mga estilo nin pamumuhay na minalapas sa mga pamantayan na ibinugtak kan Kaglalang sa saiyang Tataramon, an Biblia?

Arin an Dalan Pasiring sa Kapangganahan?

Siring sa siertong aram nindo, an modernong kinaban nagpapalakop nin pagmakolog  sa sadiring bentaha asin pagpanigo sa sadiri. “An kapasloan marahay,” sabi nin sarong kapitalista sa sarong klaseng naggraduwar sa kolehiyo sa Estados Unidos. “Puwede kamong magin paslo asin marahay pa man giraray an pagmate sa saindong sadiri.” Pero an pagparahanap nin materyal na mga rogaring dai nagdadara sa kapangganahan. An totoo, an materyalismo saro sa pinakadakulang peligro sa buhay pampamilya ta iyan nakaoolang sa mga relasyon nin tawo asin inuubos an panahon asin kuwarta nin mga tawo. Kabaliktaran, helinga kun paano an duwa sanang talinhaga sa Biblia nakatatabang sato na maheling kun ano an mahalaga sa kaogmahan.

“Orog karahay an magkakan nin gulay kaiba nin mga tawong saindong namomotan kisa magkakan kan pinakamasiram na karne sa lugar na igwa nin pagkaongis.”

“Orog karahay na magkakan nin alang na tinapay na matoninong an isip kisa magkaigwa nin bangkete sa harong na pano nin kariribokan.”

Talinhaga 15:17; 17:​1, “Today’s English Version.”

Mapuwersa, bako daw? Isip-isipa kun gurano an magigin kalaenan kan kinaban kun an kada pamilya mangapot sa mas mahahalagang bagay na ini! An Biblia nagtatao man nin mahalagang giya kun paano maninigong trataron kan mga miembro nin pamilya an kada saro. Helinga an nagkapira sana sa giyang itinatao kaiyan.

Mga Agom na Lalaki: ‘Mamoot sa saindong agom siring sa saindong sadiring hawak.’​—Efeso 5:​28-30.

Simple, pero praktikal nanggad! Sinasabihan man kan Biblia an agom na lalaki na ‘tawan nin onra an saiyang agom.’ (1 Pedro 3:7) Ginigibo nia ini paagi sa pagtao sa babae nin espesyal na atension, kaiba an kabootan, pagsabot, asin pagpasarig sa boot. Pinahahalagahan man nia an mga opinyon kan babae asin dinadangog ini. (Ikomparar an Genesis 21:12.) Dai daw kamo minaoyon na makikinabang an arin man na pamilya kun an lalaki trataron na may pagmakolog an saiyang agom, siring sa boot niang magin trato sa saiya?​—Mateo 7:12.

 Mga Agom na Babae: “Magkaigwa nin hararom na paggalang sa [saindong] agom.”​—Efeso 5:33.

An agom na babae nakakokontribuwir sa kaogmahan kan pamilya paagi sa pagtabang sa saiyang agom na maotob an magagabat na paninimbagan kaini. Ini an talagang katuyohan, ta an Dios nagtao nin agom na babae tanganing magin “katabang para sa saiya, bilang komplemento nia.” (Genesis 2:18) Nasasabotan daw nindo an magigin bendisyon sa buhay pampamilya kun an agom na babae nagpapaheling nin paggalang sa saiyang agom paagi sa pagsuportar sa mga desisyon kan lalaki asin pagkooperar sa saiya tanganing maabot an mga pasohan kan pamilya?

Mga Mag-agom: “An mga agom na lalaki asin agom na babae kaipuhan na magin maimbod sa lambang saro.”​—Hebreo 13:​4, TEV.

Kun siring sinda kaiyan, an buhay pampamilya siertong makikinabang. An pagsambay parateng nakalalaglag sa pamilya. (Talinhaga 6:​27-29, 32) Kaya madonong na nagsasadol an Biblia: “Mag-ogma ka sa saimong agom asin maggayagaya ka sa babae na saimong pinakasalan . . . Taano ta itatao mo an saimong pagkamoot sa ibang babae?”​—Talinhaga 5:​18-20, TEV.

Mga Magurang: “Patoodon [nindo] an [saindong mga] aki oyon sa dalan para sa [sainda].”​—Talinhaga 22:6.

Kun an mga magurang nagtatao nin panahon asin atension sa mga aki, an buhay pampamilya seguradong marahay. Kaya, sinasadol kan Biblia an mga magurang na tokdoan nin tamang mga prinsipyo an saindang mga aki ‘kun sinda nagtutukaw sa saindang harong asin kun sinda naglalakaw sa dalan asin kun sinda naghihigda patin kun sinda minabangon.’ (Deuteronomio 11:19) Sinasabi man kan Biblia na maninigong ipaheling nin mga magurang na namomotan ninda an saindang mga aki paagi sa pagdisiplina sa sainda.​—Efeso 6:4.

Mga Aki: “Mga aki, magin makinuyog sa saindong mga magurang na nasa Kagurangnan.”​—Efeso 6:1.

Totoo, sa tampalasan na kinaban na ini, bakong perming pasil na kumuyog sa saindong mga magurang. Pero, dai daw kamo minaoyon na madonong na gibohon an sinasabi sato kan Kagpundar sa pamilya? Aram nia kun ano an pinakamarahay tanganing magin orog na maogma an satong buhay pampamilya. Kaya pagmaigotan na kuyogon an saindong mga magurang. Magin determinado na likayan an dakol na sugot kan kinaban na gumibo kan maraot.​—Talinhaga 1:​10-19.

 Sagkod na iinaaplikar kan kada miembro kan pamilya an hatol kan Biblia, makikinabang an buhay pampamilya. Bako sana na an pamilya magkakaigwa nin mas marahay na buhay ngonyan kundi iyan magkakaigwa kan paglaom sa maogmahon na ngapit sa bagong kinaban na ipinanuga nin Dios. (2 Pedro 3:13; Kapahayagan 21:​3, 4) Kaya ugaleon kan pamilya na iribang pag-adalan an Biblia! An minilyon na pamilya sa bilog na daga nakinabang na marhay sa paggiyang itinatao sa librong An Sekreto sa Kaogmahan nin Pamilya.

Apuwera sana kun may ibang indikasyon, an gabos na kotasyon sa Biblia hale sa New World Translation of the Holy Scriptures.