Kapitulo 6

An Isyu na Kaipuhan na Atubangon nin Gabos na Linalang

1. (a) Anong isyu an pinalataw ni Satanas sa Eden? (b) Paano an isyung iyan ipinamate kan saiyang isinabi?

 KAN magkaigwa nin pagrebelde sa Eden may luminataw na sarong seryosong isyu na nakakaapektar sa gabos na linalang. Sa pagdolok ki Eva, ipinamate ni Satanas na sia asin an agom niang si Adan pinangungurihan na gayo. Sia naghapot: “Ano totoo na an Dios nagsabi na dai kamo magkakan sa gabos na kahoy kan tatamnan?” Si Eva nagsimbag na manongod sana sa sarong kahoy na an Dios nagsabi: “Dai kamo magkakan kaiyan, dai, dai kamo dumutdot kaiyan tanganing dai kamo magadan.” Dangan direktang pinagsahotan ni Satanas si Jehova na nagpuputik, na sinasabi na an buhay ni Eva o ni Adan bakong depende sa pagkuyog sa Dios. Sia nagsabi na may itinatago an Dios sa saiyang mga linalang na sarong bagay na marahay—an kakayahan na magbugtak kan saindang sadiring pamantayan sa buhay. “Dai nanggad kamo magagadan,” sabi ni Satanas. “Huli ta naaaraman nin Dios na sa mismong aldaw na kamo kumakan kaiyan mabubuklat an saindong mga mata asin kamo magigin arog nin Dios, na nakakamidbid kan marahay asin maraot.” (Gen. 3:1-5) Pinatubod ni Satanas si Eva na mas magigin marahay an kamugtakan nia kun magsasadiri siang magdesisyon. Paagi sa pagpamate, inangat nia duman an diretso nin Dios na maghade asin an Saiyang paagi nin paghade. An pinalataw na isyu sa aktuwal may labot sa unibersal na soberaniya.

2. Ano kutana an nagserbing proteksion sa enot na mag-agom?

² An pagkamoot ki Jehova nakaprotehir kutana ki Eva.  An paggalang sa pagkapayo kan saiyang agom nakaolang man kutana sa saiya sa pagkakasala. Alagad ta an inisip sana nia iyo an garo baga makakamtan tolos na pakinabang. An ipinangangalad nagin magayon sa saiyang pagheling. Huling biyong nadaya kan pangangatanosan ni Satanas, linapas nia an pagboot nin Dios. Dangan idinamay nia si Adan. Minsan ngani dai nadaya kan kaputikan ni Satanas, si Adan nagpaheling man nin dakulang kadaihan nin pag-apresyar sa pagkamoot nin Dios. Binasangbasang nia an pagkapayo ni Jehova asin ginusto na umiba sa saiyang rebeldeng agom na babae.—Gen. 3:6; 1 Tim. 2:13, 14.

3. (a) Anong saro pang isyu an konektadong gayo sa pag-atake ni Satanas sa soberaniya ni Jehova? (b) Siisay an apektado kaiyan?

³ An pag-atake ni Satanas sa soberaniya ni Jehova dai natapos sa nangyaring idto sa Eden. An saiyang garo baga kapangganahan duman sinundan kan saiyang pagduda sa kaimbodan nin iba ki Jehova. Kaya ini nagin konektadong ikaduwang isyu. An angat nia nakaabot tanganing idamay pareho an mga aki ni Adan asin an gabos na espiritung mga aki nin Dios, pati an namomotan na gayong matuang Aki ni Jehova. Kan kaaldawan ni Job, si Satanas nagsabi na an mga naglilingkod ki Jehova naggigibo kaiyan, bakong huli ta namomotan ninda an Dios asin an saiyang paagi nin paghade, kundi huli sa paslong mga dahelan. Sia nangatanosan na, kun masasakitan, sinda gabos mapadara sa paslong mga kamawotan. Tama daw sia?—Job 1:6-12; 2:1-6; Kap. 12:10.

Kun Ano an Reaksion Ninda sa Isyu

4. Taano ta dakol an tawo na dai nagsusuportar sa soberaniya ni Jehova?

⁴ Dai hinale ni Jehova an posibilidad na an iba maiba ki Satanas sa pagrebelde. An totoo, sa pagtao nin sentensia sa Eden, nasabihan nin Dios an mga makompuwesto sa ‘banhi kan halas.’ (Gen. 3:15) An mga Fariseo na nagplano na gadanon si Jesus asin si Judas Iscariote, na nagpasaloib ki Cristo, kabilang sa mga ini. Sinda dai sana guminibo nin salang bagay bago ninda iyan naaraman. Aram ninda kun  ano an tama, alagad tuyong nanindogan tumang ki Jehova asin sa saiyang mga lingkod. Minsan siring, an dai mabilang na iba pa na dai nakapaoyon sa mga kahagadan ni Jehova guminibo kaiyan huli sa dai pakaaram.—Gibo 17:29, 30.

5. (a) Bakong arog ni Eva, ano an pagheling kan mga nagdanay na maimbod ki Jehova sa saiyang tataramon? (b) Paano pinatunayan ni Noe an saiyang kaimbodan, asin paano kita makikinabang sa saiyang halimbawa?

⁵ Napapalaen sa gabos na ini an mga lalaki asin babae na may pagtubod na nag-adal manongod sa saindang Kaglalang asin pinatunayan an saindang kaimbodan sa saiya bilang Soberano. Sinda nagtubod sa Dios. Aram ninda na an saindang buhay nasasarig sa paghinanyog sa saiya asin pagkuyog sa saiya. Si Noe sarong tawong arog kaiyan. Kaya, kan an Dios magsabi ki Noe, “Nagdatong na para sa sako an katapusan kan gabos na laman . . . Gumibo ka nin sarong dahong,” si Noe nagpasakop sa paggiya ni Jehova. An ibang tawo kan aldaw na idto, dawa ngani tinawan nin patanid, nagpadagos sa saindang normal na pamumuhay na garo baga mayo nin ano man na pambihirang mangyayari. Alagad si Noe nagtogdok nin sarong dakulaon na dahong asin nagmasibot sa paghuhulit sa iba manongod sa matanos na mga dalan ni Jehova. Arog kan sinasabi kan rekord, “ginibo ni Noe an sono sa gabos na ipinagboot sa saiya nin Dios. Siring nanggad kaiyan an saiyang ginibo.”—Gen. 6:13-22; helingon man an Hebreo 11:7 asin 2 Pedro 2:5.

6. (a) Ano pa an ibang kuwalidad nin mga nagdadanay sa integridad? (b) Paano ipinaheling ni Sara an mga kuwalidad na ini, asin sa anong paagi kita makikinabang sa saiyang halimbawa?

⁶ An halangkaw na paggalang sa prinsipyo nin pagkapayo, kaiba an personal na pagkamoot ki Jehova, nagin pambihira man sa tahaw nin mga nagdadanay sa integridad. Bako sindang arog ni Eva, na nangenot sa saiyang agom. Ni arog man ni Adan, na dai nag-intindi sa pagboot ni Jehova. Si Sara, an agom ni Abraham, nagpaheling kan marahay na mga kuwalidad na ini. Bako sanang sa saiyang pagtaram kundi pati sa saiyang puso si Abraham an  saiyang “kagurangnan.” Dugang pa, sia personal na namomoot ki Jehova asin sia sarong babae na may pagtubod. Kaiba ni Abraham, sia “naghahalat sa siudad [Kahadean nin Dios] na may tunay na mga pundasyon, na an paratogdok asin kaglalang kan siudad na iyan iyo an Dios.”—1 Ped. 3:5, 6; Heb. 11:10-16.

7. (a) Sa irarom nin anong mga kamugtakan na sinuportaran ni Moises an soberaniya ni Jehova? (b) Paano an saiyang halimbawa puwedeng magtao nin pakinabang sa sato?

⁷ Mga 430 taon pakahale ni Abraham sa saiyang sadiring daga, sinuportaran ni Moises an soberaniya ni Jehova sa personal na pakipaghampangan sa Faraon nin Egipto. Bakong boot sabihon si Moises may pagsarig sa sadiri. Al kontraryo, pinagdudahan nia an saiyang abilidad na makapagtaram nin marahay. Alagad sia nagkuyog ki Jehova. Sa tabang ni Jehova asin kan saiyang tugang na si Aaron, paorootrong itinao ni Moises an tataramon ni Jehova ki Faraon. Matagas an puso ni Faraon. Minsan an iba sa mga aki ni Israel maringis na nagtatatsar ki Moises. Alagad may kaimbodan na ginibo ni Moises an gabos na ipinagboot sa saiya ni Jehova, asin paagi sa saiya an Israel naligtas sa Egipto.—Ex. 7:6; 12:50, 51.

8. (a) Ano an nagpapaheling na an kaimbodan ki Jehova kalabot bako sanang an paggibo kan nasusurat na espisipikong isinabi nin Dios? (b) Paano an pag-apresyar sa arog kaining kaimbodan makatatabang sato na ikaaplikar an 1 Juan 2:15?

⁸ An mga maimbod ki Jehova dai nangatanosan na an kaipuhan sana kumuyog sa letra kan pagboot, kuyugon sana an ipinasurat nin Dios. Kan an agom ni Potifar maghingoa na akiton si Jose na makisambay sa saiya, mayo nin nasusurat na pagboot hale sa Dios na espisipikong nangangalad nin pagsambay. Alagad basado sa aram ni Jose manongod sa areglo nin pag-agoman na ibinugtak ni Jehova sa Eden, aram nia na an pakikidorog sa agom nin iba dai ikaoogma nin Dios. Habo ni Jose na probaran kun sagkod saen sia totogotan nin Dios na magin kapareho kan mga Egipcio. Sinuportaran nia an mga dalan ni Jehova paagi sa paghorophorop sa mga pagtratar nin Dios sa katawohan dangan maimbod na pag-aplikar kan namansayan  nia bilang kabotan nin Dios.—Gen. 39:7-12; ikomparar an Salmo 77:11, 12.

9. Paano an Diablo paorootrong napatunayan na putikon sa saiyang pagsahot kan aldaw ni Job?

⁹ Dawa kun namumugtak sa masakit na pagbalo, an mga tunay na nakakamidbid ki Jehova dai minatalikod sa saiya. Si Satanas nagsahot na kun si Job mawaran kan saiyang mga rogaring o pasakitan sa pisikal, minsan an sarong ini na inoomaw na gayo ni Jehova matalikod sa Dios. Alagad pinatunayan ni Job na an Diablo putikon, asin ginibo nia iyan minsan ngani dai nia aram kun ano an dahelan kan gabos na kalamidad na minaabot sa saiya. (Job 2:3, 9, 10) Sa paghihingoa pa giraray na patunayan an saiyang punto, kan huri pinapangyari ni Satanas an naaanggot na hade nin Babilonya na umaon an tolong hoben na Hebreo nin kagadanan sa naglalaad na horno kun dai sinda dumuko sa pagsamba sa atubangan nin sarong ladawan na tinindog kan hade. Huling napiritan na mamili sa pagboot kan hade asin sa pagboot ni Jehova tumang sa pagsamba sa ladawan, marigon nindang ipinahayag na sinda naglilingkod ki Jehova asin na sia an saindang Supremong Soberano. Mas mahalaga para sa sainda ki sa buhay an kaimbodan sa Dios.—Dan. 3:14-18.

10. Paano posible para sa sato na bakong sangkap na mga tawo na patunayan na kita talagang maimbod ki Jehova?

¹⁰ Iisipon daw niato huli kaini na tanganing magin maimbod ki Jehova an saro kaipuhan na magin sangkap, na an saro na nasasala biyong nasudya? Dai nanggad! An Biblia espisipikong nagsasabi sato nin mga okasyon na si Moises nagkulang. Si Jehova dai naogma, alagad dai man nia isinikwal si Moises. An mga apostol, minsan ngani marahay na arogan sa dakol na bagay, may mga kaluyahan man. An kaimbodan naghahagad nin daing ontok na pagkuyog gikan sa puso. Alagad, sa pagkonsiderar sa bagay na kita nagmana nin pagkabakong sangkap, naoogma si Jehova kun kita dai tuyong magpalimanliman sa saiyang kabotan sa ano man na bagay. Kun, huli sa kaluyahan, kita maholog sa pagkakasala, mahalaga na  kita odok na magsolsol asin kun siring dai gibohon na ugale iyan. Sa siring ipinaheheling niato na kita talagang namomoot sa sinasabi nin Dios na marahay asin naoongis sa sinasabi niang maraot. Basado sa satong pagtubod sa nakatutubos sa kasalan na halaga kan atang ni Jesus, puwede kitang magkaigwa nin malinig na kamugtakan sa atubang nin Dios.—Amos 5:15; Gibo 3:19; Heb. 9:14.

11. (a) Siisay sa gabos na tawo an nakapagpadanay sa sangkap na diosnon na debosyon, asin ano an pinatunayan kaini? (b) Paano kita natatabangan kan saiyang ginibo?

¹¹ Minsan siring, an sangkap daw na diosnon na debosyon talagang bakong posible para sa mga tawo? Sa laog nin mga 4,000 na taon an simbag digdi sarong “banal na hilom.” (1 Tim. 3:16) Si Adan, minsan ngani linalang na sangkap, dai nagtao nin sangkap na halimbawa nin diosnon na debosyon. Siisay daw an makakatao? Sierto na mayo sa saiyang makasalan na mga aki. Si Jesu-Cristo an solamenteng tawo na makakagibo kaiyan. An ginibo ni Jesus nagpatunay na si Adan, na igwa nin mas paborableng mga kamugtakan, nakapagpadanay kutana nin sangkap na integridad kun binoot nia iyan. An diperensia bakong sa linalang nin Dios. Si Jesu-Cristo kun siring an halimbawa na hinihingoa niatong arogon sa pagpaheling bako sanang nin pagkuyog sa banal na pagboot kundi siring man nin personal na debosyon ki Jehova, an Unibersal na Soberano.

Ano an Satong Personal na Simbag?

12. Taano ta dapat kitang perming mag-ingat sa satong kaisipan manongod sa soberaniya ni Jehova?

¹² An lambang saro sa sato ngonyan kaipuhan na umatubang sa unibersal na isyu. Dai niato iyan madudulagan. Kun hayag niatong isinabi na kita nasa lado ni Jehova, gigibohon kitang punteriya ni Satanas. Dadarahon nia an gabos na pangigipit asin gigibohon nia iyan sagkod sa katapusan kan saiyang maraot na palakaw nin mga bagay. Dai kita maninigong magpabaya. (1 Ped. 5:8) An satong gawe nagpapaheling kun ano an satong paninindogan mapadapit sa supremong isyu.

13. (a) Anong bagay manongod sa ginikanan nin pagputik asin paghabon an maninigong magin dahelan na isikwal niato iyan? (b) Simbagon an mga hapot sa poro kan parapong ini, na saro-saro, manongod sa mga situwasyon na nagdadara sa nagkapira sa siring na kasalan.

¹³  Dai niato puwedeng ibilang na bakong mahalaga an sarong gawe na bakong maimbod huli sana ta iyan uso sa kinaban. An pagdadanay sa integridad nagkakaipo na iaplikar niato an matanos na mga dalan ni Jehova sa gabos na bagay sa buhay. Sa pag-ilustrar, konsiderara an minasunod:

 (1) Si Satanas guminamit nin sarong kaputikan tanganing darahon sa kasalan an satong enot na mga magurang. Sia nagin “an ama kan kaputikan.” (Juan 8:44)

 Sa anong mga kamugtakan na an mga hobenes kun beses nagkukulang sa pagigin sadiosan sa saindang mga magurang? Taano ta mahalaga na likayan ini nin Kristianong mga hobenes? (Tal. 6:16-19)

 Anong mga kaugalean sa negosyo an tibaad magpamidbid na an saro nasa lado kan “ama kan kaputikan” imbes na sa lado kan Dios nin katotoohan? (Miq. 6:11, 12)

 Kun kita may sinasabing mga bagay tanganing tumao nin mas marahay ki sa totoong impresyon manongod sa satong sadiri, sala daw iyan kun mayo man nin ibang nadadanyaran? (Sal. 119:163; ikomparar an Gibo 5:1-11.)

 Kun an saro naholog sa magabat na pagkakasala, taano ta mahalaga na dai pagmaigotan na tahoban iyan paagi sa pagputik? (Tal. 28:13)

 (2) Kan si Eva asin dangan si Adan kumuyog sa pagsadol ni Satanas na gibohon an sadiri nindang desisyon dapit sa marahay asin maraot, an enot nindang ginibo kumua nin sarong bagay na bako ninda. Sinda nagin mga parahabon.

 Nagigin makatanosan daw an paghabon kun an saro nangangaipo o kun an kinukuanan igwa man nin dakol kaiyan? (Tal. 6:30, 31; 1 Ped. 4:15)

 Nababawasan daw an karatan kaiyan kun iyan uso sa lugar na iniistaran niato o kun kadikit sana an kinua? (Roma 12:2; Efe. 4:28; Luc. 16:10)

14, 15. (a) Sa katapusan kan Sangribong Taon na Paghade ni Cristo anong pagbalo an maabot sa bilog na katawohan? (b) Paano na an ginigibo niato ngonyan nakakaapektar sa magigin resulta para sa sato sa panahon na iyan?

¹⁴ Sa Sangribong Taon na Paghade ni Cristo, si Satanas  asin an saiyang mga demonyo mamumugtak sa bungaw, na dai na nakakaimpluwensia sa katawohan. Kanigoan na kaginhawahan nanggad kaiyan! Alagad pakalihis kan sangribong taon, sinda bubutasan sa kadikit na panahon. Si Satanas asin an mga nagsusunod sa saiya iimpluwensiahan an “mga banal,” an mga kabilang sa nakabalik na katawohan na nagdadanay sa saindang integridad. Sia maabante na garo nasa pakikiguerra tumang sa “namomotan na siudad,” an langitnon na Bagong Jerusalem, paagi sa paghihingoa na paraon an katanosan na inestablisar kaiyan sa daga.—Kap. 20:7-10.

¹⁵ Posible nanggad na, arog kan mga nakaagi, gagamiton ni Satanas an pandadaya, kaiba an pagpukaw sa kapasloan asin kapalangkawan, tanganing darahon an tawo sa mga akto nin kadaihan nin kaimbodan ki Jehova. Kun pribilehiyo niato na mabuhay sa panahon na iyan, ano an magigin personal na reaksion niato? Saen mamumugtak an satong puso mapadapit sa unibersal na isyu? Mantang an gabos na tawo sangkap na sa panahon na iyan, an ano man na akto nin pagtraydor magigin tinutuyo asin magbubunga nin daing sagkod na pagkalaglag. Tanganing kita magin maimbod sa panahon na iyan, napakahalaga nanggad na pataluboon na niato ngonyan an ugaleng pagkuyog nin andam asin positibo sa ano man na paggiyang itinatao sato ni Jehova, baga man paagi sa saiyang Tataramon o paagi sa saiyang organisasyon! Sa paggibo kaiyan, ipinaheheling niato an satong tunay na debosyon sa saiya bilang Unibersal an Soberano.

Pagrerepaso

● Ano an dakulang isyu na kaipuhan na atubangon kan gabos na linalang? Paano kita napapalabot?

● Ano an pambihira sa mga paagi na an lambang saro sa mga lalaki asin babae na ipinaheheling sa pahina 49 nagpatunay kan saindang integridad ki Jehova?

● Taano ta mahalaga na kita mag-ingat sa aroaldaw na tawan nin onra si Jehova paagi sa satong paggawe?

[Mga Hapot Para sa Pag-adal]

 [Mga ritrato sa pahina 49]

SINUPORTARAN NINDA AN SOBERANIYA NI JEHOVA

Si Noe

Si Sara

Si Moises

Si Jose

Si Job

Paano kita puwedeng makinabang sa saindang halimbawa?