Kapitulo 12

An Kahulogan kan Saindong Bautismo

1, 2. (a) Taano an bautismo sa tubig ta maninigong pagkainteresan kan lambang saro sa sato? (b) Sa halipot, ano an isisimbag nindo sa mga hapot na nasa parapo 2?

 KAN taon 29 C.E., si Jesus binautismohan sa Salog nin Jordan. Si Jehova mismo nagmamasid asin nagpahayag nin pag-oyon. (Mat. 3:16, 17) Pakalihis nin tolo may kabangang taon, pagkabuhay nia liwat, si Jesus nagtao nin instruksion sa saiyang mga disipulo, na nagsasabi: “An gabos na kapangyarihan sa langit asin sa daga itinao na sa sako. Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda.” (Mat. 28:18, 19) Kamo daw nabautismohan na kaoyon sa ipinagboot na iyan ni Jesus? O nag-aandam kamong magpabautismo?

² Arin man digdi, mahalaga an malinaw na pakasabot sa bautismo. Kaiba sa mga hapot na maninigong horophoropon an mga ini: An bautismo daw kan mga Kristiano ngonyan may kaparehong kahulogan sa bautismo ni Jesus? An gabos daw na sinasabi kan Biblia manongod sa bautismo aplikado sa saindo? Ano an kalabot sa pamumuhay kaoyon sa kahulogan kan Kristianong pagpabautismo sa tubig?

Mga Bautismo na Ginibo ni Juan

3. Kiisay sana an bautismo ni Juan?

³ Mga anom na bulan bago nagpabautismo si Jesus, si Juan Bautista nagduman sa kapatagan nin Judea, na naghuhulit: “Magsorolsol kamo, huli ta an kahadean kan kalangitan naghaharani na.” (Mat. 3:1, 2) An mga tagaduman sa bilog na rehiyon na idto nakadangog sa isinabi ni Juan, hayag na nagtuga kan saindang mga kasalan  asin binautismohan nia sa Jordan. An bautismong idto para sa mga Judio.—Gibo 13:23, 24; Luc. 1:13-16.

4. (a) Taano an mga Judio ta kaipuhan na gayo na magsolsol? (b) Ano an kinakaipuhan tanganing makalikay sinda na ‘mabautismohan sa kalayo’?

⁴ An mga Judiong idto nagkakaipong gayo na magsolsol. Kan taon 1513 B.C.E. sa Bukid nin Sinai an saindang mga apoon naglaog sa nasyonal na pakipagtipan ki Jehova Dios. Alagad ta dai ninda inotob an saindang mga paninimbagan sa irarom kan tipan na idto kaya sinda kinondenar kaidto bilang mga parakasala. Delikado an saindang kamugtakan. “An dakula asin makangingirhat na aldaw ni Jehova” na ihinula ni Malaquias harani na, asin kan 70 C.E. iyan nagdatong sa Jerusalem bilang marikas na pagkalaglag. Si Juan Bautista, na igwa nin kaigotan para sa tunay na pagsamba kapareho ni Elias, isinugo bago an kalaglagan na idto “tanganing andamon para ki Jehova an sarong andam na banwaan.” Kaipuhan na pagsolsolan ninda an saindang mga kasalan tumang sa tipan nin Pagboot asin magin andam an puso asin isip na akoon an Aki nin Dios, na isusugo sa sainda ni Jehova. (Mal. 4:4-6; Luc. 1:17; Gibo 19:4) Arog kan ipinaliwanag ni Juan, an Aki nin Dios magbabautismo sa banal na espiritu (bautismo na enot na naeksperyensiahan nin maimbod na mga disipulo kan Pentecostes nin 33 C.E.) asin sa kalayo (na uminabot sa mga dai nagsolsol bilang kalaglagan kan 70 C.E.). (Luc. 3:16) Tanganing makalikay na personal na umagi sa ‘bautismo sa kalayong’ idto an mga Judio kan enot na siglo kaipuhan na magpabautismo sa tubig bilang simbolo kan saindang pagsolsol, asin kaipuhan na sinda magin mga disipulo ni Jesu-Cristo kun mabukasan na an oportunidad na iyan.

5. (a) Kan si Jesus paduman tanganing magpabautismo, taano ta inusisa iyan ni Juan? (b) Ano an ipinagsimbolo kan pagpabautismo ni Jesus sa tubig? (c) Gurano kaseryoso si Jesus manongod sa pag-otob sa kaotoban nin Dios para sa saiya?

⁵ Kabilang sa mga nagdolok ki Juan na magpabautismo iyo si Jesus mismo. Alagad taano? Aram ni Juan na si Jesus mayo nin mga kasalan na kaipuhan na ituga, kaya  sia nagsabi: “Ako an nagkakaipo na bautismohan mo, asin ika an minadigdi sa sako?” Alagad ta an bautismo ni Jesus magkakaigwa nin ibang ipagsisimbolo. Kaya sia nagsimbag: “Pabayae nguna, ngonyan, huli ta sa paaging iyan maninigo para sa sato na otobon an gabos na matanos.” (Mat. 3:13-15) An bautismo ni Jesus dai puwedeng magsimbolisar sa pagsolsol sa kasalan; ni kinaipuhan man niang idusay an saiyang sadiri sa Dios, huli ta sia miembro nin sarong nasyon na dati nang dusay ki Jehova. Imbes, an saiyang bautismo, kan makaabot na sa tamang edad para sa mga Judio na 30 anyos, ipinagsimbolisar an pagpresentar kan saiyang sadiri sa saiyang langitnon na Ama tanganing otobon an Saiyang dagdag pang kabotan. An kabotan nin Dios para sa “tawo, si Cristo Jesus,” may kaibang aktibidad may koneksion sa Kahadean, saka pag-atang kan saiyang sangkap na buhay na tawo bilang pantubos asin bilang pasisikadan kan bagong tipan. (Luc. 8:1; 17:20, 21; Heb. 10:5-10; Mat. 20:28; 26:28; 1 Tim. 2:5, 6) Isinapusong gayo ni Jesus an isinisimbolo kan saiyang bautismo sa tubig. Dai nia itinogot na sia malingling sa ibang intereses. Sagkod sa katapusan kan saiyang buhay sa daga nagdanay sia sa pag-otob sa kabotan nin Dios.—Juan 4:34.

Bautismo sa Kagadanan

6. Ano pang ibang bautismo an inagihan ni Jesus asin sa laog nin anong peryodo nin panahon?

⁶ Kaoyon sa isinimbolo kan bautismo ni Jesus sa tubig, sia nag-agi man sa saro pang bautismo. Aram nia na an asignasyon na itinao sa saiya nin Dios magbubunga kan saiyang pagtao kan saiyang buhay na tawo bilang atang alagad sia bubuhayon liwat sa espiritu sa ikatolong aldaw. Sia nagtaram manongod digdi bilang sarong bautismo. An “bautismong” ini nagpoon kan 29 C.E. alagad dai natapos sagkod kan sia aktuwal na magadan asin buhayon liwat. Kaya mga tolong taon pakalihis kan saiyang bautismo sa tubig sia tamang makapagsabi: “May sarong bautismo na ibabautismo sa sako, asin kanigoan an sakong kahaditan sagkod na iyan matapos!”—Luc. 12:50.

7. (a) Siisay pa an binabautismohan sa kagadanan? (b) Siisay an naggigibo kan pagbautismong ini?

⁷  An mga maghahade kaiba ni Cristo sa saiyang langitnon na Kahadean kaipuhan man na bautismohan sa kagadanan. (Mar. 10:37-40; Col. 2:12) Sa saindang kagadanan saindang binabayaan sagkod lamang an saindang buhay na tawo, arog kan ginibo ni Jesus. Asin sa saindang pagkabuhay liwat sinda minaiba sa saiya sa langitnon na paghade. An bautismong ini ginigibo, bakong nin siisay man na tawo, kundi nin Dios paagi sa saiyang langitnon na Aki.

8. Ano an kahulogan kan sainda man na pagigin “nabautismohan dian ki Cristo Jesus”?

⁸ An mga binabautismohan sa kagadanan ni Jesus sinasabi man na “nabautismohan dian ki Cristo Jesus.” Paagi sa banal na espiritu na ipinaaabot paagi ki Cristo, sinda nagigin kasaro nia, an saindang payo, bilang mga miembro kan saiyang linahidan nin espiritung kongregasyon, an saiyang “hawak.” Huling an espiritung iyan nagpapangyari sainda na ipaheling an superyor na personalidad ni Cristo, puwedeng sabihon na sinda gabos nagigin “sarong persona na kasaro ni Cristo Jesus.”—Roma 6:3-5; 1 Cor. 12:13; Gal. 3:27, 28; Gibo 2:32, 33.

Bautismo sa Tubig kan mga Disipulong Kristiano

9. (a) Kasuarin enot na nangyari an bautismo sa paagi na sinasabi sa Mateo 28:19? (b) Ginagamit an mga hapot asin teksto na itinao sa parapong ini, analisaron an ipinaririsa ni Jesus na dapat na midbidon kan mga kandidato sa bautismo.

⁹ An enot na mga disipulo ni Jesus binautismohan ni Juan sa tubig dangan itinokdo ki Jesus bilang may esperansang mga miembro kan saiyang espirituwal na nobya. (Juan 3:25-30) Sa paggiya ni Jesus sinda man nagsagibo nin mga pagbabautismo, na igwa nin kahulogan na kapareho kan bautismo ni Juan. (Juan 4:1-3) Alagad ta poon kan Pentecostes nin 33 C.E. pinonan nindang otobon an sugo na magbautismo “sa ngaran kan Ama asin kan Aki patin kan banal na espiritu.” (Mat. 28:19) Magigin kapakipakinabang na gayo para sa saindo na repasohon kun  ano an kahulogan kaiyan, sa liwanag kan mga teksto na sinisitar sa minasunod na hapot:

 Tanganing mabautismohan “sa ngaran kan Ama,” ano an kaipuhan na midbidon nin saro manongod sa Ama? (2 Hade 19:15; Sal. 3:8; 73:28; Isa. 6:3; Roma 15:6; Heb. 12:9; Sant. 1:17)

 An bautismo sa ngaran “kan Aki” naghahagad nin pagmidbid sa ano? (Mat. 16:16, 24; Fil. 2:9-11; Heb. 5:9, 10)

 Ano an kaipuhan na tubudon nin saro tanganing mabautismohan sa ngaran “kan banal na espiritu”? (Luc. 11:13; Juan 14:16, 17; Gibo 1:8; 10:38; Gal. 5:22, 23; 2 Ped. 1:21)

10. (a) Ano an ipinagsisimbolo kan Kristianong bautismo sa tubig ngonyan? (b) Paano ini napapalaen sa bautismo mismo ni Jesus? (c) Kun nababautismohan an mga tawo na kuwalipikado sono sa Kasuratan, sinda nagigin ano?

¹⁰ An mga enot na nabautismohan kaoyon sa mga instruksion na iyan na itinao ni Jesus mga Judio (asin proselitong Judio), na bilang sarong nasyon dati nang dusay sa Dios asin tinawan nia nin espesyal na konsiderasyon sagkod kan 36 C.E. Minsan siring, kan an pribilehiyo na magin Kristianong disipulo ipaabot sa mga Samaritano asin Hentil, bago mabautismohan kaipuhan na sinda personal na gumibo nin lubos na pagdusay ki Jehova na maglingkod sa saiya bilang mga disipulo kan saiyang Aki. Para sa gabos, pati sa mga Judio, ini an nagpapadagos na kahulogan kan Kristianong bautismo sa tubig sagkod sa satong aldaw. An “sarong bautismong” ini aplikado sa gabos na nagigin tunay na mga Kristiano. Sa siring sinda nagigin Kristianong mga saksi ni Jehova, ordenadong mga ministro nin Dios.—Efe. 4:5; 2 Cor. 6:3, 4.

11. (a) Ano an katimbang kan Kristianong bautismo sa tubig, asin paano? (b) Sa siring an Kristiano naliligtas sa ano?

¹¹ An bautismong iyan igwa nin dakulang halaga sa pagheling nin Dios. Pakasambita kan pagtogdok ni Noe kan dahong na dian sia asin an saiyang pamilya ilinigtas sa Baha, dinara ni apostol Pedro an atension digdi. Sia nagsurat: “An katimbang kaini nagliligtas naman saindo  ngonyan, an bautismo, (bakong an paghale kan ramog nin laman, kundi an paghagad sa Dios nin marahay na konsensia,) paagi sa pagkabuhay liwat ni Jesu-Cristo.” (1 Ped. 3:21) An dahong kaidto naheheling na ebidensia na si Noe idinusay an sadiri sa pag-otob sa kabotan nin Dios asin maimbod na ginibo an gibohon na itinao nin Dios. Ini nagbunga kan saiyang kaligtasan. Sa katimbang na paagi, an mga nagdudusay kan saindang sadiri ki Jehova basado sa pagtubod sa binuhay liwat na si Cristo, nagpapabautismo bilang simbolo kaiyan asin dangan nag-ootob sa kabotan nin Dios para sa saiyang mga lingkod sa satong aldaw naliligtas sa presenteng maraot na kinaban. (Gal. 1:3, 4) Sinda bako nang pasiring sa kalaglagan kaiba kan kinaban. Sinda ilinigtas na digdi asin tinawan nin marahay na konsensia nin Dios.

Pag-otob sa Satong mga Paninimbagan

12. Taano an pagpabautismo nin saro ta bakong garantiya sa kaligtasan?

¹² Sala na isipon na an pagpabautismo mismo garantiya nin kaligtasan. Iyan may halaga sana kun talagang idinusay nin saro an saiyang sadiri ki Jehova paagi ki Jesu-Cristo asin pakalihis kaiyan otobon an kabotan nin Dios, na maimbod sagkod sa katapusan.—Mat. 24:13.

13. (a) Ano an kabotan nin Dios kun dapit sa paggamit kan bautisadong mga Kristiano sa saindang buhay? (b) An pagkadisipulong Kristiano kaipuhan na magin gurano kahalaga sa satong buhay?

¹³ Kabale sa kabotan nin Dios para ki Jesus an paggamit nia sa saiyang buhay bilang tawo. Idto kaipuhan na itao sa kagadanan bilang atang. Sa kaso niato an satong hawak kaipuhan na ipresentar sa Dios, tanganing gibohon an mapagsakripisyo sa sadiring buhay. Iyan kaipuhan na esklusibong gamiton sa pag-otob sa kabotan nin Dios. (Roma 12:1, 2) Tunay na dai niato iyan ginigibo kun, minsan bihira sana, kita tuyong gumawe na kapareho kan kinaban na nasa palibot niato o isentro niato an satong buhay sa paslong mga katuyohan mantang nagtatao sana nin paramas na paglilingkod sa Dios. (1 Ped. 4: 1-3; 1 Juan 2:15-17) Kan an sarong Judio maghapot kun ano an kaipuhan niang gibohon tanganing magkaigwa nin buhay na daing katapusan, ipinagirumdom sa saiya ni Jesus an halaga nin pamumuhay na malinig sa moral, dangan idinoon nia an pangangaipo na gibohon an Kristianong pagkadisipulo, an pagigin parasunod ni Jesus, na pangenot na bagay sa buhay. Iyan dai puwedeng magin segunda sana sa materyal na mga pasohan.—Mat. 19:16-21.

14. (a) Anong paninimbagan may koneksion sa Kahadean an nasa gabos na Kristiano? (b) Arog kan ipinaheheling sa pahina 101, ano an nagkapira sa epektibong mga paagi na magibo an gibohon na ini? (c) Kun kita talagang bilog na puso na nakikikabtang sa siring na aktibidad, iyan ebidensia nin ano?

¹⁴ Kaipuhan man na girumdomon na kaiba sa kabotan nin Dios para ki Jesus an mahalagang aktibidad may koneksion sa Kahadean. Si Jesus mismo linahidan na magin Hade. Alagad mantang nasa daga sia man maigot na saksi manongod sa Kahadean. Kita igwa man nin kaparehong pagpapatotoo na dapat na gibohon asin yaon sato an gabos na dahelan na bilog na pusong gumibo kaiyan. Sa paggibo kaiyan ipinaheheling niato an satong pag-apresyar sa soberaniya ni Jehova asin an satong pagkamoot sa mga kapwa tawo. Siring man ipinaheheling niato na kita kasaro kan mga kapwa niato parasamba sa bilog na kinaban, na an gabos mga saksi sa Kahadean, sa paghihingoa na aboton an pasohan na buhay na daing katapusan na sakop kan Kahadean na iyan.

Pagrerepaso

Ano an mga pagkakaagid asin ano an mga pagkakalaen sa pag-oltanan kan bautismo ni Jesus asin kan bautismo sa tubig ngonyan?

Para kiisay an bautismo ni Juan? Siisay an binabautismohan sa kagadanan? Asin siisay an ‘binabautismohan dian ki Cristo Jesus’?

Ano an kalabot sa pag-otob sa mga paninimbagan nin Kristianong bautismo sa tubig?

[Mga Hapot Para sa Pag-adal]

 [Kahon/Mga ritrato sa pahina 101]

Sa Anong mga Paagi Nindo Ibinabalangibog an Kahadean?

Sa pagharong-harong

Paagi sa pagdalaw liwat sa mga interesado

Sa mga pag-adal sa Biblia sa harong

Sa mga tinampo

Sa mga kaeskuwela

Sa mga katrabaho