Kapitulo 24

An Katuyohan ni Jehova Makaaabot sa Mamuraway na Kapangganahan

1, 2. (a) Ano an katuyohan ni Jehova manongod sa intelihenteng mga linalang nia? (b) Siisay an kaiba sa sararong pamilya nin mga parasamba nin Dios? (c) Manonongod digdi, anong personal na hapot an maninigong horophoropon?

 AN GABOS na intelihenteng mga linalang sararo sa tunay na pagsamba asin sinda gabos may mamuraway na katalingkasan kan mga aki nin Dios—iyan an madonong asin mamomoton na katuyohan ni Jehova. Iyan man an pinakamamawot kan gabos na mamomoton sa katanosan.

² Pinonan na otobon ni Jehova an makangangalas na katuyohan na ini kan ponan nia an saiyang paglalang. An enot niang linalang sarong Aki, saro na nagin “ladawan kan saiyang kamurawayan asin an eksaktong representasyon kan saiya mismong naturalesa.” (Heb. 1:1-3) An sarong ini pambihira, ta an Dios sana an naglalang saiya. Paagi sa saiya an iba pang aki linalang—primero, an mga anghel sa kalangitan, dangan an tawo sa daga. (Job 38:7; Luc. 3:38) An gabos na aking ini minakompuwesto sa sarong unibersal na pamilya. Sa sainda gabos si Jehova an Dios, an iyo sanang dapat sambahon. Sia an Unibersal na Soberano. Sia man an saindang mamomoton na Ama. Sia man daw an saindong Ama, asin saro daw kamo sa saiyang mga aki? Napakahalaga nanggad kan relasyon na iyan!

3. (a) Taano ta mayo sa sato na nagin aki nin Dios kan mamundag? (b) Alagad anong mamomoton na probisyon an ginibo ni Jehova para sa mga aki ni Adan?

³ Minsan siring, kaipuhan na atubangon niato an bagay  na kan an enot niatong mga magurang kondenaron sa kagadanan bilang tuyong mga parakasala, sinda pinalayas sa Eden asin isinikwal nin Dios. Sinda bako nang kabtang kan unibersal na pamilya ni Jehova. (Gen. 3:22-24; ikomparar an Deuteronomio 32:4, 5.) Kita gabos, mantang kita guminikan sa parakasalang si Adan, namundag na may makasalan na mga tendensia. Mantang kita gikan nin mga magurang na pinaluwas sa pamilya nin Dios, dai kita makapagsasabing aki nin Dios basado sana sa pagkamundag bilang tawo. Alagad aram ni Jehova na an iba sa mga aki ni Adan mamomoot sa katanosan, asin Sia mamomoton na guminibo nin probisyon na paagi kaiyan an mga ini makaabot sa mamuraway na katalingkasan kan mga aki nin Dios.—Roma 8:20, 21.

An Pinapaboran na Kamugtakan nin Israel

4. (a) Basado sa ano na an mga Israelitas “mga aki” nin Dios? (b) Ano an boot sabihon kaini?

⁴ Mga 2,500 na taon pakalalanga ki Adan, itinao liwat ni Jehova sa nagkapirang tawo an pribilehiyo na magkaigwa nin relasyon sa saiya bilang saiyang mga aki. Kaoyon sa saiyang pakipagtipan ki Abraham, pinili ni Jehova an Israel na magin saiyang banwaan. Kaya, ki Faraon nin Egipto, inapod nia an Israel na “aki ko.” (Ex. 4:22, 23; Gen. 12:1, 2) Kan huri itinao nia sa Israel an saiyang Pagboot sa Bukid nin Sinai, ginibong sarong nasyon an banwaan na idto asin ginamit sinda may koneksion sa saiyang katuyohan. Sa nasyonal na punto-de-vista, huli ta sinda “espesyal na rogaring” ni Jehova, sinda inapod na “mga aki” nin Dios. (Deut. 14:1, 2; Isa. 43:1) Siring man, huli sa saiyang espesyal na relasyon sa nagkapirang indibiduwal sa laog kan nasyon na iyan, inapod sinda ni Jehova na mga aki. (1 Cron. 22:9, 10) An kamugtakan na ini basado sa relasyon nin pakipagtipan sa Dios. Alagad dai iyan nangahulogan na nakamtan ninda an mamuraway na katalingkasan na yaon ki Adan bilang aki nin Dios. Sinda oripon pa man giraray nin kasalan asin kagadanan.

5. Paano nawara sa Israel an espesyal na kamugtakan kaiyan sa atubang nin Dios?

 ⁵ Minsan siring, bilang mga aki sinda may pinapaboran na kamugtakan sa atubang nin Dios. Igwa man sinda kan paninimbagan na igalang an saindang Ama asin gumibo oyon sa saiyang katuyohan. Idinoon ni Jesus an halaga kan pag-otob ninda sa katongdan na iyan—bako sanang nagsasabing an Dios an saindang Ama, kundi ‘pinatutunayan an saindang sadiri’ na saiyang mga aki. (Mat. 5:43-48; Mal. 1:6) Minsan siring, an mga Judio bilang nasyon nagkulang digdi. Kaya, sa huring taon kan ministeryo ni Jesus sa daga, kan an mga Judio na gustong gadanon si Jesus magsabi, “Kami igwa nin sarong Ama, an Dios,” marigon na sinabi ni Jesus na an saindang mga gibo asin an espiritu na saindang ipinaheheling nagpapahimutik sa paghihingakong iyan. (Juan 8:41, 44, 47) Kan 33 C.E. an tipan nin Pagboot tinapos nin Dios, asin natapos an basihan kan espesyal na relasyon na nakamtan kan Israel. Pero, si Jehova dai nawaran nin mga tawo na saiyang inaako bilang aki.

Pinagsararo ni Jehova an Saiyang Banwaan

6. Anong “administrasyon” an ilinadawan ni Pablo sa Efeso 1:9, 10, asin ano an katuyohan kaiyan?

⁶ Sa mga Kristiano sa Efeso si apostol Pablo nagsurat manongod sa programa ni Jehova sa pagsararo sa saiyang banwaan—an areglo nin Dios na paagi kaiyan an mga naggigibo nin pagtubod puwedeng magin namomotan na mga miembro kan Saiyang pamilya, na an sabi: “Ipinaaram [nin Dios] sa sato an banal na hilom kan saiyang kabotan. Sono sa saiyang kabotan na sia nagmawot nin sarong administrasyon [pagpalakaw sa pamilya] sa katapusan kan itinalaan na mga panahon, na iyo, an tiponon giraray an gabos dian ki Cristo, an mga bagay sa kalangitan asin an mga bagay sa daga.” (Efe. 1:9, 10) An “administrasyon” na ini nasisentro ki Jesu-Cristo. Paagi sa saiya, an mga tawo dinadara sa inooyonan na kamugtakan sa atubang nin Dios—an iba may paglaom na  makaduman sa langit; an iba, digdi sa daga—tanganing maglingkod kasaro kan anghel na mga aki nin Dios na nagmaimbod ki Jehova.

7. Ano an “mga bagay sa kalangitan,” asin ano an kahulogan para sa sainda kan pagkatipon sa sainda?

⁷ Enot, poon kan Pentecostes nin 33 C.E., tinawan nin atension an “mga bagay sa kalangitan,” an boot sabihon, an mga makakaibanan na paramana ni Cristo sa langitnon na Kahadean. Basado sa saindang pagtubod sa halaga kan atang ni Jesus, sinda ipinahayag nin Dios na matanos. (Roma 5:1, 2) Dangan sinda “namundag giraray,” o ipinangaki bilang mga aki nin Dios na may paglaom sa langitnon na buhay. (Juan 3:3; 1:12, 13) Sa mga ini bilang espirituwal na nasyon an Dios guminibo nin bagong tipan. Pag-abot nin panahon, an mga Judio asin Hentil parehong iaayon, asin an magigin total na kabilangan 144,000.—Gal. 3:26-29; Kap. 14:1.

8. Paano an relasyon sa Ama kan mga paramana sa Kahadean nakakokomparar sa relasyon kan mga Judio na sakop kan Pagboot ni Moises?

⁸ Minsan ngani bako pang sangkap sa laman, an natatada sa mga paramanang iyan kan langitnon na Kahadean igwa nin mahalaga asin haraning relasyon sa Ama. Manonongod digdi, si Pablo nagsurat: “Ngonyan huling kamo mga aki, isinugo nin Dios an espiritu kan saiyang Aki sa satong puso asin iyan nagkukurahaw: ‘Abba, Ama!’ Kun siring, bako ka nang oripon kundi aki; asin kun aki, paramana man paagi sa Dios.” (Gal. 4:6, 7) An tataramon na iyan sa Aramaiko na “Abba” nangangahulogan “ama,” pero iyan nakapupukaw nin pagkamoot na pag-apod—arog kan ginagamit nin sarong sadit na aki sa saiyang tatay. Huli sa pagigin superyor kan atang ni Jesus asin sa mismong dai na kutana maninigong pagkaherak nin Dios, an linahidan nin espiritung mga Kristianong ini may relasyon sa Dios na mas harani ki sa ano man na posible para sa bakong sangkap na mga tawo na sakop kan Pagboot. Minsan siring, an natatagama sa sainda sa ngapit orog pang makangangalas.

9. Ano an kahulogan kan lubos na pagkaotob kan saindang pagigin aki?

 ⁹ Kun sinda magmaimbod sagkod sa kagadanan, inaako ninda an lubos na kaotoban kan pagkaaki ninda paagi sa pagbuhay liwat sa sainda sa inmortal na buhay sa kalangitan. Duman sinda magkakapribilehiyo na maglingkod na sararo sa mismomg presensia ni Jehova Dios. Kakadikit na sana sa mga aking ini nin Dios an yaon pa sa daga.—Roma 8:14, 23; 1 Juan 3:1, 2.

Pagtipon sa “mga Bagay sa Daga”

10. (a) Ano an “mga bagay sa daga,” asin poon kasuarin sinda tinipon sa pagkasararo sa pagsamba? (b) Ano an relasyon ninda ki Jehova?

¹⁰ An “administrasyon” na nagpapangyari sa mga tawo na tiponon sa pamilya nin Dios na may paglaom sa langitnon na buhay iyo man an nagtatao nin atension sa “mga bagay sa daga.” Partikularmente poon kan 1935 C.E. na an mga tawong may pagtubod sa atang ni Cristo tinipon na may paglaom sa buhay na daing sagkod digdi sa daga. Nakikidamay sa natatada kan grupong linahidan, pinamumuraway ninda an ngaran ni Jehova asin ilinalangkaw an saiyang pagsamba. (Sof. 3:9; Isa. 2:2, 3) May hararom na paggalang an mga ini nag-aapod man ki Jehova na “Ama,” na minimidbid sia bilang an Burabod nin buhay, asin odok nindang hinihingoa na ipaheling an saiyang mga kuwalidad siring sa linalaoman nia sa saiyang mga aki. Sinda may inooyonan na kamugtakan sa atubang nia basado sa saindang pagtubod sa pinabolos na dugo ni Jesus. (Mat. 6:9; Kap. 7:9, 14) Alagad aram ninda na an kagayagayahan na lubos na midbidon nin Dios bilang saiyang mga aki nasa ngapit pa para sa sainda.

11. (a) Anong panuga an itinatao kan Roma 8:19-21 sa katawohan? (b) Ano an “kapahayagan kan mga aki nin Dios” na may pag-antisipar na hinahalat ninda?

¹¹ Arog kan sinasabi sa Roma 8:19-21, may dakulang pag-antisipar na hinahalat ninda an “kapahayagan kan mga aki nin Dios,” huli ta sa panahon na iyan an mga tawong linalang na ini “bubutasan [na] hale sa kaoripnan  nin kalapaan.” An “kapahayagan” na iyan mangyayari kun an mga tawo digdi sa daga makaheling nin ebidensia na an linahidan nin espiritung mga aki nin Dios na nagkamit kan saindang langitnon na balos naghiro na bilang kairiba kan saindang pinamuraway na Kagurangnan, si Jesu-Cristo. Ini mahahayag sa pagkalaglag kan bilog na maraot na palakaw nin mga bagay, na susundan kan mga bendisyon kan Sangribong Taon na Paghade ni Cristo na dian an “mga aki nin Dios” na ini makikiiba sa saiya bilang hade asin saserdote.—Kap. 2:26, 27; 20:6.

12. Pakalihis kan dakulang kahorasaan, sa anong awit nin pag-omaw maiba an mapangganang linahidan nin espiritung mga aki nin Dios, asin ano an boot sabihon kaiyan?

¹² Nakaoogma nanggad kun an dakulang kahorasaan nakalihis na asin an mga aki nin Dios na nagin kasaro ni Cristo iiba an saindang tingog sa pag-omaw sa Dios, na magayagayang sinasabi: “Dakula asin makangangalas an saimong mga gibo, Jehova Dios, an Makakamhan sa gabos. Matanos asin tunay an saimong mga dalan, Hade na daing katapusan. Siisay nanggad an dai matatakot saimo, Jehova, asin magpapamuraway kan saimong ngaran, huli ta ika sana an maimbod? Huli ta an gabos na nasyon madolok asin masamba sa atubang mo, huli ta an saimong matanos na mga pagboot nahayag na”! (Kap. 15:3, 4) Iyo, an bilog na katawohan, na kompuwesto nin mga tawo hale sa gabos na nasyon kaidto, magkakasararo sa pagsamba sa tunay na Dios. Pati an mga nasa lolobngan nin girumdoman bubuhayon liwat asin tatawan nin oportunidad na iiba an saindang tingog sa pag-omaw ki Jehova.

13. Anong makangangalas na katalingkasan an makakamtan tolos kan mga nakaligtas sa dakulang kahorasaan?

¹³ Si Satanas na Diablo bako nang “dios kan palakaw na ini nin mga bagay.” An mga parasamba ki Jehova digdi sa daga dai na kaipuhan na manlaban sa saiyang marigsok na impluwensia. (2 Cor. 4:4; Kap. 20:1-3) An falsong relihiyon dai na magmimisrepresentar sa satong mamomoton na Dios asin magigin nakakapabangang impluwensia sa sosyedad nin tawo. An mga lingkod kan tunay na  Dios dai na makakaeksperyensia nin inhustisya asin pag-aprobetsar sa kamot nin mga tawo na nasa katongdan sa gobyerno. Makangangalas nanggad na katalingkasan an magigin kahulogan kaiyan para sa mga makaliligtas sa dakulang kahorasaan!

14. Paagi sa ano na sinda bubutasan sa kasalan asin sa gabos na epekto kaiyan?

¹⁴ Bilang an “Kordero nin Dios na naghahale kan kasalan kan kinaban,” iaaplikar ni Jesu-Cristo an halaga kan saiyang atang tanganing kanselaron an gabos na nakaaging kasalan nin katawohan. (Juan 1:29) Digdi sa daga, kan si Jesus magsabi na ipinatawad na an mga kasalan nin sarong tawo, pinaomayan man nia an pinatawad bilang pruweba dian. (Mat. 9:1-7) Kaagid kaiyan, gikan sa langit milagroso niang paoomayan an mga buta, bongog, pula, pilay sa pisikal, may helang sa isip asin an mga may iba pang helang. Luway-luway, paagi sa maimbod na pagmolde kan saindang sadiri sa matanos na mga dalan nin Dios, an gabos na boot asin makinuyog biyong mawawaran kan “pagboot kan kasalan” kaya an gabos nindang hiro, isip asin kamawotan sa puso makakapaogma na sa sainda asin sa Dios. (Roma 7:21-23; ikomparar an Isaias 25:7, 8 asin Kapahayagan 21:3, 4.) Bago matapos an Milenyo, sinda natabangan nang makaabot sa lubos na pagkasangkap nin tawo. Sinda biyo nang nakabutas sa kasalan asin sa gabos na makamomondong epekto kaiyan. Ipaheheling ninda nin tama an ‘ladawan asin kabaing’ nin Dios sa tahaw nin daganon na Paraiso na lakop sa bilog na globo.—Gen. 1:26.

15. Sa katapusan kan Milenyo, ano an gigibohon ni Cristo, asin may anong katuyohan?

¹⁵ Kun an katawohan nadara na ni Cristo sa pagkasangkap, ibubuwelta na nia sa Ama an autoridad na itinao sa saiya para sa gibohon na ini. Arog kan ihinula sa 1 Corinto 15:28: “Kun an gabos na bagay ikinapasakop na saiya [an Aki], dangan an Aki mismo mapasakop man sa Saro na nagpasakop sa saiya kan gabos na bagay, tanganing an Dios magin gabos na bagay sa gabos na tawo.”

16. Sa ano ngonyan papaagihon an gabos na nagin sangkap na tawo, asin taano?

 ¹⁶ Ngonyan an sangkap nang katawohan tatawan kan oportunidad na ipaheling na an dai maliliwat na pinili ninda iyo an maglingkod sa iyo sanang nabubuhay asin tunay na Dios sagkod lamang. Kaya, bago sinda amponon bilang saiyang mga aki paagi ki Jesu-Cristo, an gabos na sangkap nang mga tawong iyan papaagihon ni Jehova sa lubos, ultimong pagbalo. Si Satanas asin an saiyang mga demonyo bubutasan hale sa bungaw. Ini dai magbubunga nin nagdadanay na danyos sa mga tunay na namomoot ki Jehova. Alagad an siisay man na may katraydoran na itogot na sinda madara sa pagmasumbikal ki Jehova sagkod lamang na lalaglagon kaiba kan orihinal na rebelde asin kan saiyang mga demonyo.—Kap. 20:7-10.

17. Bilang kaotoban kan katuyohan ni Jehova, ano liwat an magigin kamugtakan kan gabos niang intelihenteng mga linalang?

¹⁷ Ngonyan mamomoton nang aamponon ni Jehova bilang saiyang mga aki paagi ki Cristo an gabos na nagin sangkap na mga tawo na makapapasar sa ultimo, nagdedesisyon na pagbalong iyan. Sa panahon na iyan sinda lubos nang makikikabtang sa “mamuraway na katalingkasan kan mga aki nin Dios.” (Roma 8:21) Sa katapustapusi sinda magigin nang kabtang kan sararo, unibersal na pamilya nin Dios, na sa sainda gabos si Jehova an sagkod lamang na magigin iyo-iyong Dios, Unibersal na Soberano, asin mamomoton na Ama. Dangan an gabos na intelihenteng linalang ni Jehova, sa langit asin sa daga, magkakasararo liwat sa pagsamba sa iyo sanang tunay na Dios.

Pagrerepaso

● Bago an pagrebelde sa Eden, ano an relasyon ki Jehova kan gabos na parasamba sa saiya?

● Ano an paninimbagan kan mga aki nin Dios?

● Siisay ngonyan an mga aki nin Dios? Siisay pa an magigin mga aki nin Dios, asin paano ini konektado sa katuyohan ni Jehova manongod sa sararong pagsamba?