Kapitulo 9

An Puwersa kan Paglaom sa Pagkabuhay Liwat

1. Anong makangangalas na mga paglaom an ginigibong posible kan pagkabuhay liwat?

 KUN mayo an pagkabuhay liwat, mayo nin paglaom sa ano man na buhay sa ngapit para sa mga gadan na tawo. Alagad ta si Jehova, huli sa dai na kutana maninigong pagkaherak, binukasan para sa binilyon na nagadan an daing kaagid sa halaga na oportunidad na magkamit nin buhay na daing sagkod. Bilang resulta, igwa man kita kan nakaoogmang paglaom na makaibanan giraray an mga namomotan na natotorog sa kagadanan.—Ikomparar an Marcos 5:35, 41, 42; Gibo 9:36-41.

2. (a) Sa anong mga paagi na an pagkabuhay liwat mahalaga sa pag-otob sa katuyohan ni Jehova? (b) Noarin partikularmente na an paglaom sa pagkabuhay liwat nagigin mahalagang burabod nin kosog para sa sato?

² Huli sa pagkabuhay liwat puwedeng itogot ni Jehova, na daing nagdadanay na danyos sa saiyang maimbod na mga lingkod, na gibohon ni Satanas an gabos na medyos sa paghihingoa na patunayan an saiyang pagbalobagi, “An gabos na sadiri nin tawo itatao nia para sa saiyang kalag.” (Job 2:4) Huling si Jesus binuhay liwat hale sa mga gadan ikinapresentar nia an halaga kan saiyang atang bilang tawo sa atubangan kan langitnon na trono kan saiyang Ama, na may nagliligtas sa buhay na pakinabang sa sato. Paagi sa pagkabuhay liwat an kairibang paramana ni Cristo nakakaibanan nia sa langitnon na Kahadean. Asin para sa sato gabos na may pagtubod, an pagkabuhay liwat sarong burabod nin kosog na orog ki sa ordinaryo kun kita minaagi sa mga pagbalo na nagdadara sato sa atubang nin kagadanan.

 Kun Taano ta May Pangenot na Halaga sa Kristianong Pagtubod

3. (a) Sa anong sentido na an pagkabuhay liwat “enot na katokdoan”? (b) Ano an kahulogan kan pagkabuhay liwat sa kinaban sa pankagabsan?

³ An pagkabuhay liwat, siring sa sinasabi sa Hebreo 6:1, 2, “enot na katokdoan,” kabtang kan pasisikadan nin pagtubod na kun mayo iyan kita noarin man dai magigin maygurang na mga Kristiano. Alagad iyan mayo sa kaisipan kan kinaban sa kagabsan. Mantang kulang nin espirituwalidad, padakol nang padakol na mga tawo an nabubuhay sa paghanap nin kaalingan. An buhay sanang ini an naheheling nindang tunay. (1 Cor. 15:32) An mga nangangapot sa tradisyonal na mga relihiyon, sa laog asin luwas kan Kakristianohan, naghohona na sinda igwa nin kalag na dai nagagadan, na minagibo sa pagkabuhay liwat na dai na kaipuhan. An siisay man na naghihingoang pag-oyonon an duwang ideyang ini mas nariribaraw ki sa natatawan nin paglaom. Paano niato matatabangan an mga boot na maghinanyog?—Gibo 17:32.

4. (a) Bago mapahalagahan nin saro an pagkabuhay liwat, ano an tibaad kaipuhan na ipakipag-olay niato sa saiya? (b) Ano an mga tekstong gagamiton nindo tanganing ipaliwanag kun ano an kalag? An kamugtakan kan gadan? (c) Alagad ano kun gamiton nin saro an traduksion sa Biblia na garo baga tinatahoban an mga katotoohan na nasa mga tekstong iyan?

⁴ Bago mapahalagahan kan mga siring kun gurano kamakangangalas kan probisyon na pagkabuhay liwat, kaipuhan na masabotan nguna ninda kun ano an kalag asin an kamugtakan kan gadan. Parate, an pipira sanang teksto igo na tanganing liwanagon an mga bagay na ini sa saro na nagugutom sa katotoohan. (Gen. 2:7; Ezeq. 18:4; Sal. 146:3, 4) Alagad ta an pirang modernong traduksion asin nagtatao nin pakahulogan na mga edisyon kan Biblia tinatahoban an mga katotoohan na ini. Kaya tibaad kaipuhan na pag-olayan an mga termino na ginamit sa orihinal na mga tataramon kan Biblia.

5. Paano nindo tatabangan an siring na tawo na masabotan kun ano an kalag?

⁵ An New World Translation nangorognang mahalaga sa paggibo kaini, huli ta daing pagliwatliwat na tinatradusir  kaiyan an termino sa Hebreo na neʹphesh asin an katimbang na termino sa Griego na psy·kheʹ na “kalag,” asin nalilista sa apendise kaiyan an gabos na teksto na makukuanan kan mga terminong ini. An ibang modernong bersion tibaad isalin an iyo man sanang orihinal na mga terminong iyan bako sanang bilang “kalag” kundi siring man bilang “linalang,” “nabubuhay,” “persona” asin “buhay”; an “sakuyang neʹphesh” tibaad isalin na “ako,” asin an “saimong neʹphesh” bilang “ika.” An pagkokomparar kan mga Bibliang ini sa mas gurang na mga traduksion o sa New World Translation matabang sa sarong sinserong estudyante na masabotan na an mga termino sa orihinal na tataramon na isinalin na “kalag” nangangahulogan nin (1) persona, (2) hayop asin (3) kan buhay na nasa sainda. Alagad nungka iyan nagtatao kan ideya na an kalag dai naheheling, dai maduotan na bagay na nakakaluwas sa hawak pagkagadan asin nagpapadagos na mabuhay sa ibang lugar.

6. (a) Taano ta riniribaraw nin nagkapirang modernong traduksion an mga parabasa dapit sa kahulogan nin Sheol, Hades asin Gehenna? (b) Paano nindo ipaliliwanag hale sa Biblia an kamugtakan kan mga nasa Sheol, o Hades? Sa Gehenna?

⁶ Siring man, an New World Translation daing pagliwatliwat sa paggamit kaiyan sa Sheol tanganing itransliterar an termino sa Hebreo na sh^eōlʹ asin sa paggamit kaiyan sa Hades para sa termino sa Griego na haʹdes asin sa Gehenna para sa geʹen·na. Alagad an ibang modernong traduksion asin pagpakahulogan sa Biblia riniribaraw an parabasa paagi sa pagsasalin PAREHO sa haʹdes asin geʹen·na bilang “impierno,” apuwera sa paggamit sa “lolobngan” asin “kinaban kan mga gadan” bilang iba pang pagsasalin sa sh^eōlʹ asin haʹdes. Paagi sa pagkokomparar sa mga traduksion, kun kaipuhan, ikakapaheling na an Sheol iyo an katimbang kan Hades. (Sal. 16:10; Gibo 2:27) Liniliwanag kan Biblia na an Sheol, o Hades, an pankagabsan na lolobngan nin katawohan, konektado sa kagadanan, bakong sa buhay. (Sal. 89:48; Kap. 20:13) Itinotokdo man kaiyan an paglaom na makabalik hale dian paagi sa pagkabuhay liwat. (Job 14:13; Gibo 2:31) Kabaliktaran, daing itinataong paglaom sa buhay sa  ngapit para sa mga minaduman sa Gehenna, asin, siyempre, an kalag dai sinasabi na igwa nin may pakaaram na pag-eksister duman.—Mat. 18:9; 10:28.

7. Kun tama an pagkasabot, paano puwedeng makaimpluwensia an pagkabuhay liwat sa kaisipan asin mga hiro nin saro?

⁷ Kun naliwanagan na an mga bagay na iyan, an kagadanan asin pagkabuhay liwat ni Cristo nagkakaigwa nin tunay na kahulogan. Puwede nang matabangan ngonyan an tawo na masabotan kun ano an puwedeng magin kahulogan para sa saiya kan pagkabuhay liwat asin maapresyar an pagkamoot ni Jehova sa pagtao nin siring kamakangangalas na probisyon. An kamondoan na namamatean kan mga nagagadanan nin mga namomotan puwede na ngonyan na masalidahan nin maogmang pag-antisipar sa pagkakairibanan giraray sa Bagong Areglo nin Dios. Aram kan mga Kristiano kan enot na siglo na an pagkabuhay liwat ni Jesu-Cristo sarong pasisikadan kan Kristianong pagtubod. Sinda mahigos na nagpatotoo sa iba manongod kaiyan asin manongod sa paglaom na iginagarantiya kaiyan. Kaya, an mga nagpapahalaga dian ngonyan maigot man na ihiras sa iba an mahalagang katotoohan na ini.—Gibo 5:30-32; 10:40-43; 13:32-39; 17:31.

Paggamit sa ‘Liyabe nin Hades’

8. Ano an kahulogan para sa saiyang linahidan nin espiritung mga parasunod kan paggamit ni Jesus sa “mga liyabe nin kagadanan asin nin Hades”?

⁸ An gabos na makakaibanan ni Cristo sa saiyang langitnon na Kahadean kaipuhan na magadan. Alagad aram na gayo ninda an panuga na itinao nia kan sia magsabi ki apostol Juan: “Ako nagadan, alagad, helinga! ako nabubuhay sagkod lamang, asin igwa ako kan mga liyabe nin kagadanan asin nin Hades.” (Kap. 1:18) Ano an boot niang sabihon? Inaapod nia an atension sa saiya mismong eksperyensia. Sia man nagadan. Alagad dai sia pinabayaan nin Dios sa Hades. Sa ikatolong aldaw personal siang binuhay liwat ni Jehova sa espiritung buhay asin tinawan sia nin inmortalidad. Bako sana iyan, kundi tinawan man sia nin Dios kan “mga liyabe nin kagadanan asin nin  Hades” tanganing gamiton sa pagkalda sa iba sa pankagabsan na lolobngan nin katawohan asin sa mga epekto kan kasalan ni Adan. Huli sa pagkakapot sa mga liyabeng iyan, nabubuhay ni Jesus hale sa mga gadan an saiyang maimbod na mga parasunod. Kun ginigibo nia iyan, itinatao nia sa linahidan nin espiritung mga miembro kan saiyang kongregasyon an mahalagang balaog na inmortal na buhay sa langit, arog kan ginibo kan saiyang Ama para sa saiya.—Roma 6:5; Fil. 3:20, 21.

9. Noarin an pagkabuhay liwat nin maimbod na mga linahidan na Kristiano?

⁹ Noarin maeeksperyensiahan kan maimbod na linahidan na mga Kristiano an pagkabuhay liwat na iyan? Iyan nagpoon na. Ipinaliliwanag ni apostol Pablo na sinda bubuhayon liwat ‘sa presensia ni Cristo,’ presensia na nagpoon kan 1914 C.E. (1 Cor. 15:23) Ngonyan, kun matapos kan mga ini an saindang buhay sa daga, dai na sinda kaipuhan na maghalat na nasa kagadanan para sa pagbuwelta kan saindang Kagurangnan. Oras na sinda magadan sinda binubuhay liwat sa espiritu, na “naliliwat, sa panale, sa sarong pagpirok nin mata.” Kanigoan an kaogmahan na napapasainda, huli ta “an mga bagay na saindang ginibo kaibanan ninda”!—1 Cor. 15:51, 52; Kap. 14:13.

10. Ano pang ibang pagkabuhay liwat an nangyayari, asin noarin iyan mapoon?

¹⁰ Alagad an nakakamtan ninda bako sanang iyo an pagkabuhay liwat. An bagay na iyan inaapod na “enot na pagkabuhay liwat” nagpaparisa na may masunod pang saro. (Kap. 20:6) An mga nakikinabang sa nahuhuring pagkabuhay liwat na ini magkakaigwa kan maogmang paglaom sa buhay na daing katapusan sa Paraisong daga. Noarin iyan mangyayari? Ipinaheheling kan libro nin Kapahayagan na iyan mangyayari pakahalea sa “daga asin langit” kan presenteng maraot na palakaw nin mga bagay. An katapusan na iyan kan daan na palakaw haranihon na. Pakalihis kaiyan, sa itinalaan na panahon nin Dios, mapoon na an daganon na pagkabuhay liwat.—Kap. 20:11, 12.

11. Siisay an kaibanan sa mga maimbod na bubuhayon liwat sa daga, asin taano iyan ta makaoogmang paglaom?

¹¹  Siisay an kabale dian? An maimbod na mga lingkod ni Jehova poon pa kan suanoy. Kabilang sainda an mga tawo na, huli sa saindang marigon na pagtubod sa pagkabuhay liwat, ‘habong mag-ako nin pagkabutas paagi sa ibang pantubos’—an pakikipagkompromiso kan saindang integridad sa Dios tanganing makadulag sa madahas na kagadanan. (Heb. 11:35) Makaoogma nanggad na personal sindang mamidbid asin madangog mismo sa sainda an mga detalye manongod sa mga pangyayari na isinasabi sana sa halipot sa Biblia! Kabilang sa iba pa, yaon si Abel, an enot na maimbod na saksi ni Jehova. Si Enoc asin Noe, an daing takot na mga parabalangibog kan mensahe nin Dios sa pagpapatanid bago an Baha. Si Abraham, na nag-istimar sa mga anghel. Si Moises, na paagi sa saiya an Pagboot itinao sa Bukid nin Sinai. An mapusong mga propeta na arog ni Jeremias, na nakaheling sa pagkalaglag nin Jerusalem kan 607 B.C.E. Asin si Juan Bautista, na nadangog mismo an Dios na ipinamimidbid si Jesus bilang Saiyang Aki. Magkakaigwa man nin mga maimbod na nagadan sa huring mga aldaw kan presenteng palakaw.—Heb. 11:4-38; Mat. 11:11.

12. (a) Pira sa mga gadan sa Hades an bubuhayon liwat? (b) Kaya siisay an kaibanan dian, asin taano?

¹² Sa pag-abot nin panahon, bubuhayon man liwat an iba. An sokol kan paggamit ni Jesus sa ‘liyabe nin Hades’ para sa katawohan ipinaheheling sa bisyon na itinao ki apostol Juan na dian naheling nia an Hades na “iinapon sa danaw nin kalayo.” Ano an boot sabihon kaiyan? Na iyan linaglag; iyan mawawara huli ta iyan biyo nang daing laog. Kaya, apuwera sa pagbuhay liwat sa maimbod na mga parasamba ki Jehova, maheherakon na bubuhayon liwat ni Jesus sa Hades, o Sheol, pati an mga bakong matanos. An mga ini dai bubuhayon liwat tangani sanang mahokoman na maninigo na magadan giraray. Sa matanos na kamugtakan sa irarom kan Kahadean nin Dios sinda tatabangan na ioyon an saindang buhay sa mga dalan ni Jehova. Ipinaheling kan bisyon na binukasan an “balumbon  nin buhay,” asin sinda magkakaigwa kan oportunidad na ikasurat an saindang ngaran dian. An lambang saro sa sainda ‘hohokoman oyon sa saindang mga gibo’ na ginibo pakalihis kan saindang pagkabuhay liwat. (Kap. 20:12-14; Gibo 24:15) Kaya, sa punto-de-vista kan huring resulta, an saindang pagkabuhay liwat puwedeng magin “pagkabuhay liwat sa buhay” asin dai kaipuhan na magin “pagkabuhay liwat sa [nagkokondenar na] paghokom.”—Juan 5:28, 29.

13. (a) Siisay an dai bubuhayon liwat? (b) Paano an kaaraman sa katotoohan manongod sa pagkabuhay liwat maninigong makaapektar sa satong buhay?

¹³ Siyempre, bakong gabos na nabuhay kaidto bubuhayon liwat. An iba nakaginibo nin kasalan na dai nang kapatawadan. An mga gagadanon sa “dakulang kahorasaan,” na ngonyan harani na, makakabilang sa mga magkakamit nin daing katapusan na kalaglagan. (Mat. 12:31, 32; 23:33; 24:21, 22; 25:41, 46; 2 Tes. 1:6-9) Kaya, minsan ngani ipinaheheling an pambihirang pagkaherak sa pagkalda sa gabos na nasa Hades, an pagkabuhay liwat dai nagtatao sa sato nin basihan para sa pagigin indiperente sa satong pamumuhay ngonyan. Imbes, iyan maninigong magmotibar sato na ipaheling kun gurano an satong pag-apresyar sa dai na kutana maninigong pagkaherak na ini nin Dios.

Napakosog kan Paglaom sa Pagkabuhay Liwat

14. Paano an pagkabuhay liwat puwedeng magin burabod nin dakulang kosog sa saro na harani na sa katapusan kan saiyang presenteng buhay?

¹⁴ An mga isinapuso an paglaom sa pagkabuhay liwat nakakakua nin dakulang kosog gikan dian. Kun sinda harani na sa katapusan kan saindang buhay, aram ninda na dai ninda puwedeng idigson sagkod lamang an kagadanan, ano man an gamiton na mga pamamaagi sa medikal. (Ecl. 8:8) Kun sinda nagin sibot sa gibohon kan Kagurangnan asin maimbod na naglingkod kaibanan kan saiyang organisasyon, sinda makakatanaw sa ngapit na may bilog na kasarigan. Aram ninda na paagi sa pagkabuhay liwat sinda magkakamit giraray nin buhay sa itinalaan na panahon  nin Dios. Asin kanigoan karahay na buhay iyan! “An tunay na buhay,” arog kan apod dian ni apostol Pablo.—1 Tim. 6:19; 1 Cor. 15:58; Heb. 6:10-12.

15. Kun kita inuuma nin madahas na mga paralamag, ano an makatatabang sato na mapagdanay an integridad ki Jehova?

¹⁵ An nagpapangyari sato na magin marigon bako sanang an pakaaram na igwa nin pagkabuhay liwat, kundi an pakamidbid sa Saro na iyo an Burabod kan probisyon na iyan. Ini nagpaparigon sato na magin maimbod sa Dios dawa kun nasa peligro nin kagadanan sa kamot nin madahas na mga paralamag. Haloy nang ginagamit ni Satanas an takot sa amay na pagkagadan bilang instrumento sa pag-oripon sa mga tawo. Alagad ta si Jesus dai napadaog sa siring na takot; sia nagmaimbod ki Jehova sagkod sa kagadanan. Paagi sa nagibo kan saiyang kagadanan itinao nia an paagi na makabutas an iba sa siring na takot. (Heb. 2:14, 15) Bilang resulta kan saindang pagtubod sa probisyon na iyan, an tunay niang mga parasunod naggigibo nin pambihirang rekord bilang mga nagdadanay sa integridad. Kun nasa kagipitan, pinatutunayan ninda na ‘dai ninda namomotan an saindang kalag’ nin labi sa pagkamoot ninda ki Jehova. (Kap. 12:11) Madonong, dai ninda hinihingoa na iligtas an saindang presenteng buhay paagi sa pagtalikod sa Kristianong mga prinsipyo, tangani sanang mawaran kan paglaom sa buhay na daing sagkod. (Luc. 9:24, 25) Igwa daw kamo kan arog kaiyan na pagtubod? Iyo kun kamo tunay na namomoot ki Jehova asin isinapuso an kahulogan para sa saindo kan paglaom sa pagkabuhay liwat.

Pagrerepaso

● Taano ta kaipuhan na masabotan nin saro kun ano an kalag asin an kamugtakan kan gadan bago nia mapahalagahan an pagkabuhay liwat?

● Siisay an mabuwelta hale sa mga gadan? Paano kita maninigong maapektaran kan kaaraman na ini?

● Paano kita pinakokosog kan paglaom sa pagkabuhay liwat?

[Mga Hapot Para sa Pag-adal]