Kapitulo 4

An Saro na Pinatotoohan kan Gabos na Propeta

1. Ano an ipinaheheling kan mga katotoohan manongod sa pagkabuhay ni Jesus bago nagin tawo kun dapit sa saiyang relasyon ki Jehova?

 SA PAGLALADAWAN sa saiyang mainit na relasyon ki Jehova, si Jesus nagsabi: “An Ama namomoot sa Aki asin ipinaheheling sa saiya an gabos na saiyang ginigibo.” (Juan 5:19, 20) An pagigin dayupot kan relasyon na iyan nagpoon kan panahon na sia lalangon, na dai mabilang na mga milenyo bago sia namundag bilang tawo. Sia an bugtong na Aki nin Dios, an solamenteng linalang ni Jehova nin nagsosolo. An gabos na iba sa langit asin daga linalang paagi sa namomotan na gayong panganay na Aking iyan. Sia man naglingkod bilang Tataramon o Representante sa Pagtaram nin Dios, an saro na paagi sa saiya an kabotan nin Dios ipinaisi sa iba. An sarong ini, an Aki na nangorognang namomotan nin Dios, nagin an tawong si Jesu-Cristo.—Col. 1:15, 16; Juan 1:14; 12:49, 50.

2. Gurano an pagkasambit ki Jesus sa mga hula sa Biblia?

² Bago kan saiyang milagrosong pagkamundag bilang tawo, kadakol na ipinasabong na hula manongod sa saiya an isinurat. Arog kan pinatunayan ni apostol Pedro ki Cornelio, “Sa saiya an gabos na propeta nagpapatotoo.” (Gibo 10:43) Dakulaon nanggad an kabtang ni Jesus may koneksion sa malinig na pagsamba na sinasabi sa Biblia kaya an sarong anghel nagsabi ki apostol Juan: “Magsamba ka sa Dios; huli ta an pagpatotoo ki Jesus iyo an nagpapasabong nin paghuhula.” (Kap. 19:10) An mga hulang idto malinaw na nagpapamidbid sa saiya asin  nag-aapod kan atension sa mga kabtang kan katuyohan nin Dios manongod sa saiya na mahalagang-mahalaga para sa sato ngonyan.

An Ipinaheheling kan mga Hula

3. (a) Sa hula na nasa Genesis 3:14, 15, siisay an ipinagrerepresentar kan “halas”? “Babae”? ‘Banhi kan halas’? (b) Taano an ‘paglugad sa halas sa payo’ ta may dakulang halaga sa mga lingkod ni Jehova?

³ An enot sa mga hulang iyan itinaram pakatapos kan pagrebelde sa Eden. Iyan kaiba sa paghokom ni Jehova na isinabi sa halas. Si Jehova nagsabi: “Pag-iiwalon ko ika asin an babae asin an saimong banhi asin an saiyang banhi. Lulugadon ka nia sa payo asin lulugadon mo sia sa bool.” (Gen. 3:14, 15) Ano an boot sabihon kaiyan? Sa itinalaan na panahon nin Dios an iba pang mga hula nagpaliwanag kaiyan asin dinugangan iyan. Bilang resulta aram niato na an saro na pinanongdan kaiyan, na ipinagrepresentar kan halas, iyo si Satanas na Diablo. “An babae” iyo an maimbod na langitnon na organisasyon ni Jehova, na para sa saiya garo maimbod na agom na babae. ‘An banhi kan halas’ kompuwesto nin mga anghel asin tawo na nagpapaheling kan espiritu kan Diablo, an mga nagtutumang ki Jehova asin sa saiyang banwaan. Huli sa paggamit kan Diablo sa halas duman sa Eden, mamamansayan gikan sa hula na an ‘paglugad sa halas sa payo’ nangangahulogan nin kalaglagan kan rebeldeng aking ini nin Dios na nagpakaraot ki Jehova asin nagdara nin labi-labing kamondoan sa katawohan. Alagad kun dapit sa kun siisay an “banhi” na manlulugad, ini haloy na nagdanay na banal na hilom.—Roma 16:25, 26.

4. Paano an ginikanan ni Jesus nakatabang na ipamidbid sia bilang an ipinanugang Banhi?

⁴ Pakalihis nin mga 2,000 na taon nin kasaysayan nin tawo si Jehova nagtao nin dugang pang mga detalye. Ipinarisa nia na an Banhi malataw sa pamilya ni Abraham. (Gen. 22:15-18) Minsan siring, an linya pasiring sa Banhi madepende bako sanang sa ginikanan sa laman  kundi sa pagpili nin Dios. Sa ibong kan pagkamoot ni Abraham sa aki niang si Ismael, na ipinangaki kan babaeng oripon na si Agar, si Jehova direktang nagsabi: “Ibubugtak ko an sakuyang tipan ki Isaac, na ipangangaki ni Sara sa saimo.” (Gen. 17:18-21; 21:8-12) Kan huri an tipan na iyan sinierto, bakong sa panganay ni Isaac na si Esau, kundi ki Jacob, na ginikanan kan 12 tribo nin Israel. (Gen. 28:10-14) Pag-abot nin panahon ipinarisa na an Banhi mamumundag sa tribo ni Juda, sa harong ni David.—Gen. 49:10; 1 Cron. 17:3, 4, 11-14.

5. Dawa sa pagpopoon pa sana kan ministeryo sa daga ni Jesus, ano pa an nagparisa na sia an Mesiyas?

⁵ Labing 700 na taon bago pa, isinabi kan Biblia na an Betlehem an lugar kan pagkamundag bilang tawo kan Banhi pero ipinaheling man na sia saro na dati nang nabubuhay “poon sa mga aldaw nin panahon na daing sagkod,” poon kan panahon na sia linalang sa langit. (Miq. 5:2) An panahon kan saiyang paglataw sa daga bilang Linahidan ni Jehova, an Mesiyas, ihinula paagi ki propeta Daniel. (Dan. 9:24-26) Asin kan sia lahidan kan banal na espiritu, ipinamidbid sia kan sarong tingog hale sa langit. (Mat. 3:16, 17) Kaya, kan magin nang parasunod ni Jesus, si Felipe nakapagsabi na may marigon na pagtubod: “Nakua niamo an saro na isinurat ni Moises, sa Pagboot, asin kan mga Propeta, si Jesus, an aki [paagi sa pag-ampon] ni Jose, na taga-Nazaret.”—Juan 1:45.

6. (a) Pagkagadan ni Jesus, ano an narealisar kan saiyang mga parasunod? (b) Siisay, sa pangenot, an ‘banhi kan babae,’ asin ano an boot sabihon kan saiyang paglugad sa payo kan halas?

⁶ Pakalihis kaidto, narealisar nin mga parasunod ni Jesus na kadakol kan makahulang pagkasabi sa saiya na nasa ipinasabong na Kasuratan. Pakalihis kan saiyang pagkagadan asin pagkabuhay liwat, personal niang “ipinaliwanag sa sainda an mga bagay manongod sa saiya sa bilog na Kasuratan.” (Luc. 24:27) Maliwanag na ngonyan na si Jesus, sa pangenot, iyo an ‘banhi kan babae,’ an saro na malugad sa payo kan “halas” sa paagi na si Satanas  sa katapustapusi mapapara. Paagi ki Jesus an gabos na panuga nin Dios sa katawohan, an gabos na minamawot niato, maootob.—2 Cor. 1:20.

7. Apuwera sa kun siisay an sinasabi sa mga hulang ini, ano pa an kapakipakinabang na konsideraron?

⁷ Kan primero nindong mabasa an nagkapira sa mga hulang ini tibaad naghapot kamo, kapareho kan kapon na Etiope, “Manongod kiisay sinasabi ini kan propeta?” Alagad ta dai pinabayaan sana kan kapon an bagay na iyan kan maako nia an simbag. Pakapaghinanyog nin maingat sa paliwanag ni Felipe, narealisar kan tawo na an pag-apresyar sa pagkaotob ni Jesus sa hula naghahagad nin paghiro sa parte nia, paagi sa saiyang pagpabautismo. (Gibo 8:32-38; Isa. 53:3-9) Arog man daw kaiyan an satong reaksion? Kun beses an pagkaatubang nin sarong hula an nakakapahirong gayo sa sato, o tibaad mapahiro an satong puso kan mga konklusyon na sinasabi mismo sa Biblia kun isinasabi an kaotoban.

8. An apat na makahulang arogan manongod ki Jesu-Cristo ipinaliliwanag digdi. Mangatanosan sa mga hapot asin teksto na itinatao tanganing ipaheling kun paano an mga hulang ini nakakaapektar sa sato. Saro-saroon sana na pag-olayan.

⁸ Helinga kun paano ini totoo sa minasunod na makahulang mga panuga asin arogan manongod ki Jesu-Cristo. An mga hapot sa katuyohan na simbagon nindo sa tabang kan sitadong mga teksto.

 (1) Paano an rekord manongod sa pagprobar ni Abraham na idolot si Isaac makatatabang sato na maapresyar an ginibo ni Jehova sa pagtao kan pantubos paagi sa saiyang Aki? (Juan 3:16; Gen. 22:1-18 [helinga kun paano ilinaladawan si Isaac sa bersikulo 2.])

 Anong kasarigan sa boot an maninigong itao kaini sa sato? (Roma 8:32, 38, 39)

 Alagad ano an hinahagad sa parte niato? (Gen. 22:18; Juan 3:36)

 (2) Sa pagsabi na si Jesus iyo an propeta na kaagid ni Moises, anong magabat na paninimbagan an ipinagigirumdom sa sato kan Biblia? (Gibo 3:22, 23; Deut. 18:15-19)

  Ano an nagkapira sa mga bagay na isinabi sa sato ni Jesus, asin taano iyan ta napapanahon ngonyan? (Mat. 28:18-20; 19:4-9; 18:3-6)

 (3) Kan ipinaliliwanag kun ano an ipinanganganino kan pagkasaserdote ni Aaron, sa anong nakaaagyat na mga kuwalidad ni Jesus bilang halangkaw na saserdote inaapod kan Biblia an satong atension? (Heb. 4:15–5:3; 7:26-28)

 Kaya ano an maninigong magin saboot niato manongod sa pagdolok sa Dios sa pamibi paagi ki Cristo sa paghagad nin tabang na mapangganahan an satong mga kaluyahan?

 (4) Huli sa pagigin superyor kan atang ni Jesus (na sinasalidahan an gabos na idinolot sa irarom kan Pagboot ni Moises), taano ta maninigo kitang mag-ingat na gayo na likayan na magin ugale an paggibo nin ano man na aram niatong dai ikinaoogma nin Dios? (Heb. 10:26, 27)

 Kun talagang pinahahalagahan niato an paglaom sa buhay na pinapangyayari bilang resulta kan atang ni Jesus, anong mga bagay an maigot niatong gigibohon? (Heb. 10:19-25)

Paano Niato Ikakapaheling an Satong Pagtubod ki Cristo?

9. Taano ta mayo nin kaligtasan para sa sato na siblag ki Jesu-Cristo?

⁹ Pakatapos na ikapaheling sa halangkaw na hokoman nin mga Judio sa Jerusalem kun paano an hula naotob ki Jesus, mapuwersang ikinonklusyon ni apostol Pedro: “Mayo nin kaligtasan sa siisay pa man, huli ta mayo na nin ibang ngaran sa sirong nin langit na itinao sa mga tawo na sukat makaligtas sa sato.” (Gibo 4:11, 12; Sal. 118:22) An gabos na aki ni Adan parakasala, kaya an saindang kagadanan minaabot bilang pagkondenar sa kasalan asin mayo nin merito na magagamit bilang pantubos sa siisay pa man. Alagad si Jesus sangkap, asin an pagdolot kan saiyang buhay may halaga bilang atang. (Sal. 49:6-9; Heb. 2:9) Idinolot nia sa Dios an sarong pantubos na katimbang na gayo sa halaga kan iwinara ni Adan para sa saiyang mga aki. Paano ini nagtao nin kapakinabangan sa sato?—1 Tim. 2:5, 6.

10. Ipaliwanag an sarong paagi na an atang ni Jesus nagtao nin dakulang pakinabang sa sato.

¹⁰  Pinapangyari kaiyan an pagkaigwa niato nin malinaw na konsensia huli sa kapatawadan nin kasalan—bagay na orog nanggad sa nagibo para sa Israel kan mga atang na hayop sa irarom kan Pagboot ni Moises. (Gibo 13:38, 39; Heb. 9:13, 14) Siyempre, an pagkaigwa kaini nagkakaipo na kita magin sadiosan sa satong sadiri asin na kita may tunay na pagtubod ki Jesu-Cristo. Personal daw niatong nasasabotan kun gurano niato kakaipuhan an atang ni Cristo? “Kun kita nagsasabi: ‘Kita dai nin kasalan,’ dinadaya niato an sato man sana asin mayo sa sato an katotoohan. Kun ituga niato an satong mga kasalan, sia maimbod asin matanos tanganing ipatawad sa sato an satong mga kasalan asin linigan kita sa gabos na kabikoan.”—1 Juan 1:8, 9.

11. Taano an pagpabautismo sa tubig ta sarong mahalagang bagay sa pagkakamit nin marahay na konsensia sa Dios?

¹¹ Siyempre, an iba na nagsasabi na aram ninda na sinda mga parakasala asin nagsasabi na nagtutubod ki Cristo, na nakikikabtang pa ngani nin kadikit sa pagsabi sa iba manongod sa Kahadean nin Dios kapareho kan ginibo ni Jesus, kulang pa man giraray sa pagkaigwa nin bilog na pagtubod ki Jesus. Sa anong paagi? Bueno, arog kan ipinaheheling sa Biblia, kan an mga tawo kan enot na siglo tunay na magin mga nagturubod, paano ninda iyan ipinaheling sa publiko? Sinda nagpabautismo. Taano? Huli ta ipinagboot ni Jesus na an mga disipulo magpabautismo. (Mat. 28:19, 20; Gibo 8:12; 18:8) Kun an puso nin saro talagang napapahiro kan mamomoton na probisyon ni Jehova paagi ki Jesu-Cristo, dai sia mag-aalangan. Gigibohon nia an ano man na kinakaipuhan na pagbakle sa saiyang buhay, idudusay an saiyang sadiri sa Dios asin sisimbolisaran ini nin pagpabautismo sa tubig. Arog kan ipinaheheling kan Biblia, paagi sa pagpaheling nin pagtubod sa paaging ini na sia ‘minahagad sa Dios nin marahay na konsensia.’—1 Ped. 3:21.

12. Kun aram niato na kita nakaginibo nin kasalan, ano an maninigo niatong gibohon manongod dian, asin taano?

¹²  Siyempre, minsan pakalihis kaiyan, an makasalan na mga tendensia mahahayag. Ano na? “Isinusurat ko sa saindo an mga bagay na ini tanganing dai kamo makaginibo nin kasalan,” sabi ni apostol Juan. Kaya dai niato maninigong paglipaslipasan sana an kasalan niato, baga man nahahayag sa gawe, pagtaram o kaisipan. “Minsan siring, kun an siisay man makaginibo nin kasalan, igwa kita nin parasorog sa Ama, si Jesu-Cristo, sarong matanos. Asin sia sarong pantubos na atang para sa satong mga kasalan, alagad bako sanang kan sa sato kundi siring man kan sa bilog na kinaban.” (1 Juan 2:1, 2) Iyan daw nangangahulogan na, ano man an satong ginibo, kun kita mamibi sa Dios, ‘Ipatawad mo samo an samong mga kasalan,’ areglado na an gabos? Dai. An liyabe sa kapatawadan tunay na pagsolsol. Tibaad kaipuhan man an tabang kan kamagurangan sa Kristianong kongregasyon. Kaipuhan na midbidon niato an pagigin sala kan ginibo asin makamate nin odok na pagbasol dian tanganing gumibo kita nin odok na paghihingoa na likayan na maotro iyan. (Gibo 3:19; Sant. 5:13-16) Kun gigibohon niato ini, makaseseguro kita sa tabang ni Jesus. Basado sa satong pagtubod sa nakatutubos sa kasalan na halaga kan saiyang atang, posible an pakabalik sa pabor ni Jehova, asin ini kaipuhan tanganing an satong pagsamba akoon nia.

13. (a) Ipaliwanag an saro pang paagi na kita nakinabang sa atang ni Jesus. (b) Taano an satong paglilingkod sa Dios ta dai makakakua kan bayad na ini? (c) Alagad kun talagang kita may pagtubod, ano an gigibohon niato?

¹³ An atang ni Jesus nagbukas man sa sato kan oportunidad para sa buhay na daing sagkod—sa kalangitan para sa “sadangoton na aripompon,” asin sa Paraisong daga para sa binilyon pa nin katawohan. (Luc. 12:32; Kap. 20:11, 12; 21:3, 4) Ini bakong sarong premyo na nakukua niato. Minsan pa gurano an gibohon niato sa paglilingkod ki Jehova, dai kita noarin man makakatipon nin dakulaon na merito na an Dios magkakautang na nin buhay sa sato.  An buhay na daing sagkod “regalo na itinatao nin Dios . . . paagi ki Cristo Jesus na satong Kagurangnan.” (Roma 6:23; Efe. 2:8-10) Minsan siring, kun kita may pagtubod sa regalong iyan asin pag-apresyar sa paagi na iyan pinagin posible, ini iparirisa niato. Sa pakamansay kun paano makangangalas na ginamit ni Jehova si Jesus sa pag-otob sa Saiyang kabotan asin kun gurano kahalaga na kita gabos sumunod sa mga lakad ni Jesus, gigibohon niato an Kristianong ministeryo na saro sa pinakamahalagang bagay sa satong buhay. An satong pagtubod maririsa sa may kombiksion na pagtaram niato sa iba manongod sa makangangalas na regalong ini nin Dios.—Ikomparar an Gibo 20:24.

14. Paano an siring na pagtubod ki Jesu-Cristo may epektong nakakapagpasaro?

¹⁴ An siring na pagtubod igwa nanggad nin marahay, nakakapagpasarong epekto! Paagi kaiyan kita nakakarani ki Jehova, sa saiyang Aki asin sa lambang saro sa laog kan Kristianong kongregasyon. (1 Juan 3:23, 24) Iyan dahelan na kita mag-ogma na maboot na itinao ni Jehova sa saiyang Aki “an ngaran na halangkaw ki sa lambang ibang ngaran [apuwera sa ngaran nin Dios], tanganing sa ngaran ni Jesus an lambang tuhod magluhod kaidtong mga nasa langit asin sa daga asin mga nasa irarom kan daga, asin an lambang dila hayag na magmidbid na si Jesu-Cristo iyo an Kagurangnan sa kamurawayan nin Dios na Ama.”—Fil. 2:9-11.

Pagrerepaso

● Kan dumatong an Mesiyas, taano ta malinaw an midbidan sa saiya para sa mga tunay na nagtutubod sa Tataramon nin Dios?

● Paano kita maninigong maapektaran kan makahulang mga arogan na naotob ki Jesus, arog kan ipinaheheling sa kahon na nasa pahina 26?

● Sa anong mga paagi na kita nakinabang na sa atang ni Jesus? Paano niato ikakapaheling an satong pagpahalaga dian?

[Mga Hapot Para sa Pag-adal]

 [Kahon/​Mga ritrato sa pahina 34]

Makahulang mga Arogan Manongod ki Jesus—Paano Kamo Maninigong Maapektaran Kaiyan?

An pagdolot ni Abraham ki Isaac

Si Moises bilang representante nin Dios sa pagtaram

Si Aaron bilang halangkaw na saserdote

Mga atang na hayop