Kapitulo 23

Girumdomon an Aldaw ni Jehova

1. (a) Kan enot nindong manodan na madali na an pagkakalda sa mga kakologan sa puso sa daan na palakaw na ini, ano an reaksion nindo? (b) Anong mga hapot manongod digdi an maninigo niatong odok na horophoropon?

 DAING duwa-duwa na an saro sa enot na mga bagay na nanodan nindo sa pag-adal sa Biblia iyo na an pagkakalda sa mga kakologan sa puso sa presenteng palakaw nin mga bagay harani na. (Luc. 21:28) Narealisar nindo na an katuyohan nin Dios magin Paraiso an bilog na daga. An krimen, guerra, helang asin kagadanan mawawara na, asin minsan an gadan na mga namomotan magkakaburuhay liwat. Nakaoogma nanggad na paglaom! An kaharanihan kaiyan gabos idinoon kan ebidensia na an dai naheheling na presensia ni Cristo bilang natutukaw nang Hade nagpoon kan 1914 C.E. asin na poon kaidto kita nasa huring mga aldaw na kan maraot na kinaban na ini. An kaaraman daw na iyan nagbunga nin mga pagkaliwat sa saindong buhay? An saindo daw na pamumuhay talagang nagpaparisa nin marigon na pagtubod na an “aldaw ni Jehova” harani na?

2. (a) Noarin maabot an “aldaw ni Jehova”? (b) Paano nagin kapakipakinabang an bagay na dai isinabi ni Jehova an “aldaw o an oras”?

² An Kasuratan malinaw na nagpapaheling na an “kapag-arakian” na nakaheling sa pagpopoon kan presensia ni Cristo makakaheling man sa “dakulang aldaw ni Jehova” na sa panahon na iyan hohokoman nia an gabos na naggigibo nin karatan. (Mat. 24:34; Sof. 1:14–2:3) An “kapag-arakian” na iyan gurang na. Alagad dai sinasabi kan Biblia an eksaktong petsa na si Jesu-Cristo maabot bilang parapadusa ni Jehova tumang  sa daganon na palakaw nin mga bagay ni Satanas. “Mapadapit sa aldaw na iyan o sa oras mayo nin siisay man na nakakaisi, ni an mga anghel sa langit ni an Aki, kundi an Ama sana,” sabi ni Jesus. (Mar. 13:32) Ini nagin kapakipakinabang na gayo. Paano? Iyan nakatabang na iparisa kun ano an nasa puso nin mga tawo. Kun an siisay man mayo nin tunay na pagkamoot ki Jehova, may tendensia sinda na idigson an saiyang “aldaw” sa saindang isip asin balingan an sekular na mga pasohan na dian may hilig an saindang puso. An inooyonan sana ni Jehova bilang saiyang mga lingkod iyo an mga tunay na namomoot sa saiya asin ipinaheheling iyan paagi sa paglilingkod sa saiya nin bilog na kalag, minsan noarin umabot an katapusan kan maraot na palakaw. An pag-oyon nin Dios asin kan saiyang Aki mayo sa mga gabinhod o may duwang isip.—Kap. 3:16; Sal. 37:4; 1 Juan 5:3.

3. Ano an isinabi ni Jesus bilang patanid sa sato sa bagay na ini?

³ Sa pagpatanid sa mga namomoot ki Jehova, si Jesus nagsabi: “Magbantay kamo, magpuka kamo, huli ta dai nindo aram kun noarin an itinalaan na panahon.” (Mar. 13:33-37) Sinasadol nia kita na dai pabayaan na an pagkakan asin pag-inom o an “mga kahaditan sa buhay” makaubos sa dakol niatong atension tanganing malingawan na niato an pagkaseryoso kan panahon.—Luc. 21:34-36; Mat. 24:37-42.

4. Arog kan ipinaliwanag ni Pedro, ano an mangyayari sa “aldaw ni Jehova?”

⁴ Kan huri, hinatolan ni apostol Pedro an gabos na may tunay na pagtubod na ‘halaton asin girumdomon an presensia kan aldaw ni Jehova, na paagi kaiyan an kalangitan mantang naglalaad sa kalayo matutunaw asin an mga elemento mantang labi-labi kainit matutunaw.’ An kaharanihan kan “aldaw ni Jehova” sarong katunayan na dai noarin man maninigong pasaditon kan siisay man sa sato. An naheheling na naggogobyernong kalangitan asin maraot na sosyedad nin tawo madali nang salidahan kan “bagong kalangitan asin sarong  bagong daga” na gigibohon nin Dios, asin an gabos na “elemento” na kaiba kan presenteng kinabanon na palakaw—an independienteng kaisipan kaiyan, an inmoral asin materyalistikong pamumuhay kaiyan—tatapuson sa mapanlaglag na init kan “aldaw ni Jehova.” (2 Ped. 3:10-13) Maninigo kitang magpuka, sa pakaaram na an nakatatanyog sa kinaban na mga pangyayaring iyan puwedeng pumoon sa ano man na oras.—Mat. 24:44.

Magpuka sa mga Pangyayari na Nakaootob sa Tanda

5. (a) Gurano kaaplikado sa katapusan kan Judiong palakaw an simbag ni Jesus sa hapot na nasa Mateo 24:3? (b) Anong mga kabtang kan saiyang simbag an nagtatao nin atension sa mga pangyayari poon kan 1914 C.E.?

⁵ Nangorogna huli sa panahon na nabubuhayan niato, maninigong aram na gayo niato an mga detalye kan may dakol na kabtang na tanda na nagpapamidbid sa “huring mga aldaw,” o “pagtatapos kan palakaw nin mga bagay.” Tanganing mabasa nin tama an tanda, kaipuhan na girumdomon niato na kan simbagon ni Jesus an hapot kan saiyang mga disipulo na nasusurat sa Mateo 24:3, an iba sa sinabi nia aplikado sa katapusan kan Judiong palakaw kan enot na siglo, pero an mayor na aplikasyon lihis na gayo dian. An isinaysay nia sa bersikulo 4 sagkod 22 talagang nagkaigwa nin sadit na kaotoban sa pag-oltanan nin 33 asin 70 C.E. Pero an hula may mayor na kaotoban sa satong aldaw asin ipinamimidbid an panahon poon kan 1914 C.E. bilang an panahon kan “presensia [ni Cristo] asin kan pagtatapos kan palakaw nin mga bagay.” (Siring man an Marcos 13:5-20 asin Lucas 21:8-24) An Mateo 24:23-28 nagsasabi kan mangyayari poon 70 C.E. sagkod sa panahon kan presensia ni Cristo. (Siring man an Marcos 13:21-23) Kun dapit sa mga pangyayari na sinasabi poon sa Mateo 24:29 sagkod sa katapusan kan kapitulo 25, ini nagtotokdo sa panahon poon kan 1914 C.E.—Siring man an Marcos 13:24-37 asin Lucas 21:25-36.

6. (a) Taano ta maninigo kitang personal na magpuka sa kun paano an presenteng mga pangyayari nakaootob sa “tanda”? (b) Simbagon an mga hapot sa poro kan parapong ini tanganing ipaheling kun paano an “tanda” naotob poon kan 1914.

 ⁶ Kita kaipuhan na personal na magin mapagmasid sa presenteng mga pangyayari na nakaootob sa “tanda.” An pagkonektar niato kan mga pangyayaring ini sa hula sa Biblia makatatabang sato na ‘girumdomon’ an aldaw ni Jehova. Magpapangyari man iyan sato na magin nakakokombensir kun pinatatanidan an iba manongod sa kaharanihan kan “aldaw nin pamalos kan satong Dios.” (Isa. 61:1, 2) Nasa isip an mga katuyohan na ini, repasohon an minasunod na mga kabtang kan “tanda.”

 Sa anong pambihirang paagi naotob an ihinulang pagtindog nin ‘nasyon tumang sa nasyon asin kahadean tumang sa kahadean’ poon kan 1914 C.E.? Ano an nangyari minsan sa nakakaagi pa sanang mga bulan na nakakadugang sa kaotoban?

 Gurano nakaapektar sa daga an mga kakulangan nin kakanon sa ibong kan sientipikong kaaraman sa ika-20 siglo?

 Talaga daw na may kalaenan sa pagkaparate nin mga linog sa surunodsunod na lugar poon kan 1914 C.E.?

 Kan 1918 anong peste an nagkua nin mas dakol na buhay ki sa guerra mundial? Sa ibong nin medikal na kaaraman, anong mga helang an sagkod ngonyan garo epidemya?

 Anong ebidensia an naheheling nindo na an mga tawo talagang nalulunosan huli sa takot, arog kan ihinula sa Lucas 21:26?

 Ano an nakakokombensir saindo na an mga kamugtakan na sinasabi sa 2 Timoteo 3:1-5 bako sanang an dating dalagan nin buhay kundi na iyan naggagrabe sa nakakukubhan na paagi mantang kita nagrarani sa katapusan kan huring mga aldaw?

Pagbubulagbulag sa mga Tawo

7. (a) Ano pang ibang pangyayari, na sinasabi sa Mateo 13:36-43, an iinasosyar ni Jesus sa pagtatapos kan palakaw nin mga bagay? (b) Ano an kahulogan kan ilustrasyon na iyan?

⁷ Igwa man nin ibang makahulogan na mga pangyayari na lataw na iinasosyar ni Jesus sa pagtatapos kan palakaw nin mga bagay. An saro digdi iyo an pagbubulag  kan “mga aki kan kahadean” sa “mga aki kan maraot.” Si Jesus nagtaram manongod digdi sa saiyang parabola dapit sa oma nin trigo na sinabwagan nin mga doot nin sarong kaiwal. An “trigo” sa saiyang ilustrasyon nagrerepresentar sa tunay na linahidan na mga Kristiano. An “mga doot” palsipikadong mga Kristiano. Sa pagtatapos kan palakaw nin mga bagay an “mga doot”—an mga naghihingakong Kristiano pero pinatutunayan na sinda “mga aki kan maraot” huli ta nagdadanay sinda sa kinaban na an poon an Diablo—ibinubulag sa “mga aki kan kahadean” nin Dios asin tinatandaan para sa kalaglagan. (Mat. 13:36-43) Ini daw aktuwal na nangyari?

8. (a) Pakalihis kan Guerra Mundial I, anong dakulang pagbubulagbulag sa gabos na naghihingakong Kristiano an nangyari? (b) Paano nagtao nin ebidensia an tunay na linahidan na mga Kristiano na sinda talagang “mga aki kan kahadean”?

⁸ Pakalihis kan Guerra Mundial I talagang nagkaigwa nin dakulang pagbubulagbulag sa gabos na naghihingakong Kristiano sa duwang grupo: (1) An klero nin Kakristianohan asin an saindang mga parasunod, na makosog na nagsuportar sa Liga de Naciones (ngonyan Naciones Unidas), mantang nangangapot man sa saindang nasyonalismo. (2) An kadikit sanang tunay na linahidan na Kristiano kan panahon na idto pakaguerra, na lubos na nagsuportar sa Mesiyanikong Kahadean nin Dios. Paagi sa hayag na pagsuportar sa mga gobyerno kan kinaban bilang an paagi na magkaigwa nin katoninongan asin katiwasayan, liniwanag kan enot na grupo na sinda bakong tunay na mga Kristiano. (Juan 17:16) Kabaliktaran, ipinamidbid nin tama kan mga lingkod ni Jehova na an Liga de Naciones iyo an modernong “makababaldeng bagay na nagpapangyari nin kagabaan,” na sinasabi sa Mateo 24:15. Pinatutunayan na sinda tunay na “mga aki kan kahadean” nin Dios, ginibo ninda an paghuhulit kan “maogmang baretang ini kan kahadean . . . sa bilog na ineerokan na daga.” (Mat. 24:14) Ano an resulta?

9. Ano an enot na resulta kan paghuhulit na ini kan Kahadean?

 ⁹ Primero, tinipon an natatada sa “mga pinili,” linahidan nin espiritung mga Kristiano. Minsan ngani wararak sa mga nasyon, na garo baga sa “apat na doros,” sa paggiya nin mga anghel sinda dinara sa organisasyonal na pagkasararo.—Mat. 24:31.

10. (a) Paano ginibo an dugang pang pagbubulagbulag, asin kaoyon sa anong hula? (b) Ano an kahulogan kan pagkaotob sa mga hulang ini?

¹⁰ Dangan, arog kan ihinula ni Jesus, pinonan niang pagbulagbulagon an mga tawo kan gabos na nasyon, “kun paanong ibinubulag nin pastor an karnero hale sa mga kanding.” An gibohon na ini, na pinamamahalaan ni Cristo gikan sa saiyang langitnon na trono, nagpapadagos sagkod ngonyan, asin kamo personal na apektado kaiyan. An kadaklan sa katawohan nagsisikwal sa Kahadean nin Dios asin sa linahidan nin espiritung “mga aki” kaiyan kaya ibubugtak sinda sa “pagkaparang daing katapusan” sa kagadanan. Minsan siring, sa iba itinatao kan Kagurangnan an imbitasyon na manahon an daganon na sakop kan saiyang Kahadean, na may paglaom sa buhay na daing katapusan. An mga arog-karnerong iyan nakiasosyar sa linahidan na “mga aki kan kahadean,” minsan ngani an mga ini punteriya nin mabangis na paglamag. (Mat. 25:31-46) Maimbod na tinatabangan ninda sinda na ipaisi an mahalagang mensahe kan Kahadean. An dakulang kadaklan na minilyon na an kabilangan nakikikabtang sa gibohon na ini. An mensahe kan Kahadean nadadangog sagkod sa kaporoporohi kan daga. Ano an kahulogan kan mga pangyayaring ini? Na kita haranihon na sa katapusan kan “huring mga aldaw” asin na an “aldaw ni Jehova” haranihon na.

Ano an Natatagama sa Ngapit?

11. Kaipuhan pa daw an dugang na paghuhulit bago umabot an “aldaw ni Jehova”?

¹¹ Igwa pa daw nin mga hulang kaipuhan maotob bago pumoon an dakula asin makangingirhat na aldaw ni Jehova? Iyo! An pagbubulagbulag sa mga tawo  basado sa isyu kan Kahadean dai pa tapos. Sa ibang lugar na nagkaigwa nin grabeng pagtumang sa dakol na taon, inaani ngonyan an dakol na bagong disipulo. Asin dawa sa mga lugar na an mga tawo habo sa maogmang bareta, an hustisya asin pagkaherak ni Jehova napatutunayan kan pagtao niato nin patotoo. Kaya, ipagpadagos an gibohon! Sinisierto sato ni Jesus na, kun iyan tapos na, “madatong an katapusan.”—Mat. 24:14.

12. (a) Arog kan ipinaheheling sa 1 Tesalonica 5:2, 3, ano pa an makahulogan na mangyayari? (b) Ano an magigin kahulogan kaiyan sa sato?

¹² An saro pang makahulogan na gayong hula sa Biblia nagsasabi: “Sa panahon na sinda nagsasarabi: ‘Katoninongan asin katiwasayan!’ dangan an biglang pagkalaglag madaling maabot sainda siring sa kolog kan bados na babae; asin dai sinda makaliligtas minsan sa anong paagi.” (1 Tes. 5:2, 3) Dai pa aram kun paano an pagdeklarar na iyan nin “katoninongan asin katiwasayan.” Pero iyan tunay na dai mangangahulogan na an mga namomoon sa kinaban talagang nakaresolber na sa mga problema kan katawohan. An mga ‘naggigirumdom’ sa aldaw ni Jehova dai madadaya kan deklarasyon na iyan. Aram ninda na, pagkatapos tolos kaiyan, an “biglang pagkalaglag” maabot.

13. Anong mga pangyayari an masunod tolos sa pagdeklarar nin “katoninongan asin katiwasayan,” asin sa anong pagkasunodsunod?

¹³ Primero, arog kan ipinaheheling kan Kasuratan, an politikal na mga namomoon bibirikan, nin lakop sa globo, an Dakulang Babilonya, an pankinaban na imperyo nin falsong relihiyon, asin tutunawon sia. (Kap. 17:15, 16) Mahalaga nanggad na mangnohon na ngonyan pa nahahayag na an anggot na mga kaisipan nangorogna sa mga relihiyon nin Kakristianohan. An mga gobyerno na may makokosog na palakaw tumang sa relihiyon may makapangyarihan nang impluwensia sa Naciones Unidas, asin an publiko mismo sa dati relihiyosong mga nasyon lagduan na minatalikod sa mga relihiyon kan saindang mga apoon. Ano an kahulogan  kaiyan gabos? Na harani na an paglaglag sa gabos na falsong relihiyon. Pakalihis kaiyan, kun an mga nasyon mapan-angat na birikan, sa bilog na puwersa, an mga nagsusuportar sa soberaniya ni Jehova, an banal na kabangisan mapapasa politikal na mga gobyerno asin sa mga parasuportar sainda, na magbubunga nin lubos na pagkalaglag para sa sainda gabos. Sa katapustapusi, si Satanas mismo kaiba kan saiyang mga demonyo ihoholog sa bungaw, na biyong mapopogolan na man-impluwensia sa katawohan. Ini tunay na magigin “aldaw ni Jehova,” aldaw na an saiyang ngaran ilalangkaw.—Ezeq. 38:18, 22, 23; Kap. 19:11–20:3.

14. Taano ta bakong madonong na mangatanosan na harayo pa an aldaw ni Jehova?

¹⁴ Iyan maabot nin eksakto sa panahon, sono sa iskedyul nin Dios. Iyan dai mahuhuri. (Hab. 2:3) Girumdoma, an pagkalaglag kan Jerusalem kan 70 C.E. biglang nag-abot, sa panahon na iyan dai linalaoman kan mga Judio, sa panahon na paghona ninda nakalihis na an peligro. Asin kumusta man an suanoy na Babilonya? Idto makapangyarihan, may kasarigan, nakukutaan nin mahibog na mga lanob. Alagad iyan buminagsak sa sarong banggi sana. Siring man, an “biglang pagkalaglag” maabot sa presenteng maraot na palakaw. Kun iyan mangyari, kita logod manompongan na nagkakasararo sa tunay na pagsamba, huling kita ‘naggirumdom’ sa aldaw ni Jehova.

Pagrerepaso

● Taano ta napakahalaga na ‘girumdomon’ an aldaw ni Jehova? Paano niato iyan magigibo?

● Paano kita personal na naaapektaran kan nangyayaring pagbubulagbulag sa mga tawo?

● Ano pa an natatagama sa ngapit bago pumoon an aldaw ni Jehova? Kaya ano an maninigong personal na gibohon niato?

[Mga Hapot Para sa Pag-adal]