Kapitulo 11

‘Hanapon Nguna an Kahadean’

1. (a) Taano, kaidtong 1,900 na taon na an nakaagi, ta si Jesus nagsabi na hanapon nguna an Kahadean? (b) Ano an maninigo niatong ihapot sa satong sadiri?

 KAIDTONG labi nang 1,900 na taon an nakaagi, sa sarong pahayag sa Galilea, sinadol ni Jesus an mga nagdadangog sa saiya: “Kaya padagos na hanapon nguna an kahadean asin an saiyang katanosan.” Alagad taano? Bako daw na dakol pang siglo an maagi bago an pagtukaw sa trono ni Cristo? Iyo. Alagad an Mesiyanikong Kahadean na iyan iyo an instrumento na paagi kaiyan an banal na ngaran ni Jehova mabibindikar asin an saiyang makangangalas na katuyohan sa daga maootob. An siisay man na tunay na nagpapahalaga kaini tatawan nin enot na lugar sa saiyang buhay an Kahadean. Idto totoo kan enot na siglo asin tunay na iyan totoo ngonyan na naghahade na an Kahadean. Ipinaheheling daw kan saindong pamumuhay na hinahanap nindo nin enot an Kahadean nin Dios?—Mat. 6:33.

2. Ano an mga bagay na maigot na hinahanap nin kadaklan na tawo?

² An kadaklan na tawo mas interesado sa ibang bagay. Sinda maigot na naghahanap nin mga kayamanan asin nin gubing, kakanon patin iba pang materyal na mga rogaring asin kaalingan na mababakal nin kuwarta. (Mat. 6:31, 32) An saindang pamumuhay nagpaparisa nin pagigin okupado sa sadiri asin sa kaalingan. Sa saindang buhay, an Dios segunda sana—kun may pagtubod ngani sinda sa saiya.

3. (a) Anong klaseng mga kayamanan an isinadol ni Jesus sa saiyang mga disipulo na hanapon, asin taano? (b) Taano ta dai kaipuhan na sobra an pag-asikaso sa materyal na mga pangangaipo?

³ Alagad sa saiyang mga disipulo si Jesus nagtao kan hatol: “Ontok na kamo sa pagtipon nin mga kayamanan sa daga,” huli ta mayo sa mga rogaring na iyan an magdadanay sagkod lamang. “Kundi,” sabi nia, “magtipon kamo  nin kayamanan sa langit,” paagi sa paglilingkod ki Jehova. Sinadol nia an saiyang mga parasunod na papagdanayon na “simple” an saindang mata, na itinotorohok an saindang atension sa saro sanang bagay, an pag-otob sa kabotan nin Dios. “Dai kamo makakapaglingkod sa Dios asin sa Kayamanan,” an sabi nia sainda. Alagad ano man an materyal na mga pangangaipo—kakanon, gubing asin istaran? “Dai kamo magparahadit,” an hatol ni Jesus. Itinokdo nia an mga gamgam—pinakakakan sinda nin Dios. Sinadol nia an saiyang mga parasunod na makanood sa mga burak—sinda tinatawan nin Dios nin magagayon na gubing. Bako daw na an intelihenteng mga lingkod na tawo ni Jehova mas mahalaga ki sa arin man sa mga ini? “Kaya padagos na hanapon nguna an kahadean asin an saiyang katanosan,” sabi ni Jesus, “asin ini gabos na ibang [kinakaipuhan na] bagay idadagdag na sana saindo.” (Mat. 6:19-34) Nagtutubod daw kamo kaiyan? Ipinaheheling daw iyan kan saindong mga gibo?

Dai Pabayaan na Malamos an Katotoohan kan Kahadean

4. Kun an saro sobra an pag-asikaso sa materyal na mga bagay, ano an tibaad magin resulta? Iilustrar.

⁴ Kun an saro sobra an pag-asikaso sa materyal na mga bagay, puwedeng magin kapahapahamak an mga resulta. Dawa kun sia naghihingakong interesado sa Kahadean, kun sa saiyang puso inienot nia an ibang mga bagay, an katotoohan kan Kahadean malalamos. (Mat. 13:18, 19, 22) Halimbawa, sa sarong okasyon an sarong mayaman na poon naghapot ki Jesus, “Ano an kaipuhan kong gibohon tanganing magmana nin buhay na daing katapusan?” An saiyang simbag sa isinimbag ni Jesus nagpaheling na sia may moral na pamumuhay asin marahay an pagtratar sa iba. Alagad ta sobra an saiyang pagkamoot sa saiyang materyal na mga rogaring. Dai nia mahimong bayaan iyan apabor sa pagigin parasunod ni Cristo. Kaya pinalihis nia an oportunidad na nagbunga kutana kan saiyang pagigin hade kaiba ni Cristo sa langitnon na Kahadean. Arog kan sabi ni Jesus sa okasyon na idto: “Magigin mapawot na  gayo sa mga mayaman na lumaog sa kahadean nin Dios!”—Mar. 10:17-23.

5. (a) Sinadol ni Pablo si Timoteo na manigoan na sa anong mga bagay, asin taano? (b) Paano ginagamit ni Satanas an “pagkamoot sa pirak” bilang mapanlaglag na siod?

⁵ Pakalihis nin mga taon, si apostol Pablo nagsurat ki Timoteo, na kaidto nasa Efeso, sarong mayaman na sentro nin komersio. Ipinagirumdom nia sa saiya: “Dai kita nagdara nin ano man sa kinaban, asin dai man kita makakadara nin ano man hale dian. Kaya, kun igwa na nin kakanon asin gubing, manigoan na kita kan mga bagay na iyan.” An pagtrabaho tanganing makapagtagama nin angay na “kakanon asin gubing” para sa sadiri asin sa pamilya tama. Alagad ta si Pablo nagpatanid: “Idtong mga nag-iisip na magyaman mahoholog sa sugot asin sa siod asin sa dakol na rungaw asin nakakaraot na horot, na nagdadara sa mga tawo sa kalaglagan asin kapahamakan.” Tuso si Satanas. Sa primero tibaad sugotan nia an saro sa saradit na paagi. Ini parateng sinusundan nin mas darakulang pangigipit—tibaad an oportunidad na lumangkaw an katongdan sa trabaho na mas dakula an suweldo alagad naghahagad nin oras na dating nakatagama para sa espirituwal na mga bagay. Kun dai kita mag-iingat, an “pagkamoot sa pirak” puwedeng makalamos sa pinakamahalagang intereses kan Kahadean. Arog kan pagkasabi ni Pablo, “Sa pag-aabot sa pagkamoot na ini [sa pirak] an nagkapira nagkaralagalag sa pagtubod asin sinaksak an bilog nindang sadiri nin dakol na kakologan.”—1 Tim. 6:7-10.

6. (a) Tanganing dai masiod, ano an kaipuhan na gibohon niato? (b) Iyan daw realistiko huli sa kamugtakan sa ekonomiya kan kinaban ngonyan?

⁶ May tunay na pagkamoot sa saiyang Kristianong tugang, sinadol ni Pablo si Timoteo: “Dumulag ka sa mga bagay na ini,” asin, “Makipaglaban ka kan marahay na pakilaban nin pagtubod.” (1 Tim. 6:11, 12) Kaipuhan an maigot na paghihingoa tanganing malikayan niato na madara kan materyalistikong pamumuhay kan kinaban sa palibot niato. Alagad kun kita talagang maghihingoa kaoyon sa satong pagtubod, dai kita noarin man pababayaan  ni Jehova. Sa ibong nin haralangkaw na presyo asin lakop na kadaihan nin trabaho, sisiertohon nia na kita igwa kan talagang kaipuhan niato.—Heb. 13:5, 6.

An Enot na mga Disipulo Nagtatao nin Arogan

7. Kan isugo ni Jesus an mga apostol na maghulit sa Israel, anong instruksion an itinao nia sa sainda, asin taano ini ta maninigo?

⁷ Pakatapos na matawan ni Jesus nin igong pagtotokdo an saiyang mga apostol isinugo nia sinda sa Israel tanganing maghulit kan maogmang bareta. “An kahadean kan kalangitan naghaharani na.” Maogmahon nanggad idtong mensahe! Si Jesu-Cristo, an Mesiyanikong Hade, nasa tanga ninda. Mantang idinudusay kan mga apostol an saindang sadiri sa paglilingkod sa Dios, sinadol sinda ni Jesus na magsarig na aatamanon sinda nin Dios. Kaya sia nagsabi: “Dai kamo magdara nin ano man sa saindong pagbaklay, ni sogkod ni takupis, ni tinapay ni pirak; ni magkaigwa man nin duwang pan-irarom na gubing. Kundi sa arin man na harong na lumaog kamo, mag-ontok kamo dian asin dian kamo humale.” (Mat. 10:5-10; Luc. 9:1-6; 10:4-7) Sisiertohon ni Jehova na mapanigoan an saindang mga pangangaipo paagi sa mga kapwa ninda Israelita, na sa sainda kaugalean na an pag-istimar sa mga estranghero.

8. (a) Taano si Jesus ta nagtao nin ibang instruksion bago sia nagadan? (b) Minsan siring, ano an kaipuhan pa man giraray na enoton sa saindang buhay?

⁸ Kan huri, bago sia nagadan, pinatanidan ni Jesus an saiyang mga apostol sa bagay na sinda magtatrabaho sa naliwat na kamugtakan. Bilang resulta nin opisyal na pagtumang, an pag-istimar tibaad dai nang gayo iopresir sa Israel. Siring man, madali na nindang darahon an mensahe kan Kahadean sa mga kadagaan na Hentil. Ngonyan kaipuhan na sindang magdara nin “supot” asin nin “takupis.” Minsan siring, kaipuhan na hanapon nguna ninda an Kahadean ni Jehova asin an saiyang katanosan, na nagsasarig na bebendisyonan nin Dios an saindang mga paghihingoa na makakua kan kinakaipuhan na kakanon asin gubing.—Luc. 22:35-37.

9. (a) Paano pinapagdanay ni Pablo na enot an Kahadean? (b) Paano naasikaso an saiyang pisikal na mga pangangaipo? (c) Anong hatol an itinao nia sa iba sa mga bagay na ini?

⁹  Si apostol Pablo nagtao nin marahay na halimbawa sa kun paano iaaplikar an hatol ni Jesus. Isinentro ni Pablo an saiyang buhay sa ministeryo. (Gibo 20:24, 25) Kun sia minaduman sa sarong lugar sa paghuhulit inaasikaso nia an saiyang materyal na mga pangangaipo paagi sa paggibo nin tolda. Dai nia linaoman an iba na mag-ataman sa saiya. (Gibo 18:1-4; 1 Tes. 2:9; 1 Cor. 9:18) Pero may pagpasalamat niang inako an pag-istimar asin mga regalo kun boot nin iba na ipahayag an saindang pagkamoot asin pag-apresyar sa paaging ini. (Gibo 16:15, 34; Fil. 4:15-17) Dai nia sinadol an Kristianong mga lalaki asin babae na pabayaan an saindang obligasyon sa pamilya tanganing maghulit, kundi imbes asikasohon an saindang laen-laen na paninimbagan sa timbang na paagi. Sinadol nia sinda na magtrabaho sa saindang kamot, kamotan an saindang pamilya asin magin matinao sa iba. (Efe. 4:28; 2 Tes. 3:7-12; Tito 2:3-5) Sinadol man nia sinda na magsarig, bakong sa materyal na mga rogaring, kundi sa Dios asin gamiton an saindang buhay sa paagi na nagpaparisa na talagang nasasabotan ninda kun ano man nanggad an mas mahalaga sa buhay. Kaoyon sa mga katokdoan ni Jesus, iyan nangahulogan nin paghanap nguna sa Kahadean nin Dios asin sa saiyang katanosan.—Fil. 1:9-11.

Papagdanayon na Enot sa Saindong Buhay an Kahadean

10. (a) Ano an boot sabihon kan ‘hanapon nguna an kahadean’? (b) Alagad ano an maninigong dai pabayaan?

¹⁰ Gurano niato ihinihiras personalmente an maogmang bareta kan Kahadean sa iba? Iyan depende, sa sarong kabtang, sa satong mga kamugtakan asin, sa dakulang kabtang, sa rarom kan satong pag-apresyar. Isipon na si Jesus dai nagsabi, ‘Hanapon nindo an Kahadean kun mayo na kamong ibang gigibohon.’ Ni nagsabi man sia, ‘Basta kamo magtaram manongod sa Kahadean paminsanminsan, ginigibo na nindo an gabos na kaipuhan.’ Ni nagsabi man sia, ‘Pumoon kamo na may kaigotan para sa intereses  kan Kahadean; pero kun an Bagong Areglo garo baga naaatraso, padagos kamong maglingkod sa Dios alagad mamuhay na kamo na kapareho nin iba.’ Sa pakaaram na gayo sa halaga kan Kahadean, ipinahayag nia an kabotan kan saiyang Ama sa bagay, na an sabi: “Padagos nindong hanapon an saiyang kahadean.” O, arog kan pagkasurat dian ni apostol Mateo: “Kaya padagos na hanapon nguna an kahadean asin an saiyang katanosan.” (Luc. 12:31; Mat. 6:33) Minsan ngani an kadaklan sa sato kinakaipuhan na magtrabaho tanganing maasikaso an pisikal na mga pangangaipo niato asin kan satong pamilya, kun talagang kita may pagtubod, an satong pamumuhay nakasentro sa gibohon na itinao sa sato nin Dios may koneksion sa saiyang Kahadean. Kadungan kaiyan dai niato pababayaan an satong mga paninimbagan sa pamilya.—1 Tim. 5:8; Tal. 29:15.

11. (a) Paano iinilustrar ni Jesus an bagay na bakong parareho an magigibo kan gabos sa pagpalakop kan mensahe kan Kahadean? (b) Anong mga bagay an nagdedeterminar digdi?

¹¹ An iba sa sato nakakapagdusay nin mas dakol na oras ki sa iba sa ministeryo sa langtad. Alagad sa saiyang parabola manongod sa laen-laen na klase nin daga ipinaheling ni Jesus na an gabos na an puso kapareho nin marahay na daga magbubunga. Gurano? An mga kamugtakan nin mga indibiduwal laen-laen. An edad, salud asin mga paninimbagan sa pamilya gabos mga bagay na nagdedeterminar. Alagad kun igwa nin tunay na apresasyon, dakula an mahahaman.—Mat. 13:19, 23.

12. Anong marahay na espirituwal na pasohan an nangorognang isinasadol sa mga hobenes na horophoropon?

¹² Marahay na magkaigwa nin mga pasohan na makatatabang sato na dugangan an satong pakikikabtang sa ministeryo sa Kahadean. An mga hobenes maninigong horophoropon na gayo an marahayon na halimbawa kan mahigos na hoben na Kristianong si Timoteo. (Fil. 2:19-22) Ano pa an mas marahay para sa sainda kundi lumaog sa bilog na panahon na ministeryo kun matapos na sinda sa saindang sekular na pag-eskuwela? An mga gurang makikinabang man paagi sa pagkaigwa nin marahay na espirituwal na mga pasohan.

13. (a) Siisay an nagdedesisyon kun ano an personal nindong magigibo sa paglilingkod sa Kahadean? (b) Kun talagang hinahanap niato nin enot an Kahadean, ini patotoo sa ano?

¹³  Imbes na tatsaran an mga pinaghohona niato na makakagibo pa nin orog, maninigo kitang mapahiro nin pagtubod na maghingoa sa personal na pag-oswag tanganing makapaglingkod kita sa Dios sa pinakalubos na itinotogot kan satuya mismong mga kamugtakan. (Roma 14:10-12; Gal. 6:4) Arog kan ipinaheheling sa kaso ni Job, si Satanas nagsasahot na kita interesado sana sa satong materyal na mga rogaring, sa sadiri niatong katrangkilohan asin personal na karahayan, asin na an motibo niato sa paglilingkod sa Dios paslo. Alagad kun talagang hinahanap niato nin enot an Kahadean, nagkakaigwa kita nin kabtang sa pagpatunay na an Diablo talagang dakulang putikon. Kita nagtatao nin patotoo na an naeenot sa satong buhay bakong materyal na mga rogaring o personal na katrangkilohan kundi an paglilingkod sa Dios. Sa tataramon asin gibo pinatutunayan niato an satong hararom na pagkamoot ki Jehova, an satong maimbod na pagsuportar sa saiyang soberaniya asin an satong pagkamoot sa satong kapwa.—Tal. 27:11; Job 1:9-11; 2:4, 5.

14. (a) Taano ta kapakipakinabang an iskedyul sa paglilingkod sa langtad? (b) Gurano an pakikikabtang kan dakol na Saksi sa ministeryo sa langtad, asin taano?

¹⁴ An iskedyul nakatatabang sato na mahaman an orog ki sa tibaad magibo niato kun mayo kaiyan. Si Jehova mismo igwa nin ‘itinalaan na mga panahon’ sa pag-otob sa saiyang katuyohan, asin marahay na arogon niato iyan. (Ex. 9:5; Mar. 1:15; Gal. 4:4) Kun posible, marahay na makikabtang sa ministeryo sa langtad sa saro o labi pang itinalaan na mga panahon serosemana. An manampulong ribo na Saksi ni Jehova sa bilog na kinaban nagpalista bilang auxiliary payunir asin naoogmang gamiton an duwa o labi pang oras aroaldaw, sa promedyo, sa paghuhulit kan maogmang bareta. An iba ginigibo ini nin regular; an iba man, nin pirang beses kada taon. Rinibo pa an naglilingkod bilang regular payunir, na ginagamit an kisuerra tolong oras aroaldaw, sa promedyo, sa pagbalangibog kan mensahe kan Kahadean. An iba pa, bilang mga  espesyal payunir asin misyonero, naggagamit nin mas dakol pang panahon sa paglilingkod sa Kahadean. Asin baga man aktuwal na nasa ministeryo sa langtad o dai, naghahanap kita nin mga oportunidad na ikahiras an paglaom sa Kahadean sa gabos na angay na okasyon sa siisay man na maghihinanyog. (Ikomparar an Juan 4:7-15.) Maninigo na horophoropon niato gabos an mga kalabot sa hula ni Jesus na “an maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” Maninigo na an pagmawot niato magkaigwa nin pinakalubos na pakikikabtang sa gibohon na iyan siring sa itinotogot kan satong kamugtakan.—Mat. 24:14; Efe. 5:15-17.

15. Mapadapit sa satong ministeryo, taano sa paghona nindo ta napapanahon an hatol sa 1 Corinto 15:58?

¹⁵ Sararo, sa gabos na kabtang kan daga, saen man sindang nasyon nag-iistar, an mga Saksi ni Jehova aktibong nakikikabtang sa makangangalas na pribilehiyong ini nin paglilingkod. Iinaaplikar ninda sa saindang sadiri an ipinasabong na hatol kan Biblia: “Magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong daing kapakanan dian sa Kagurangnan.”—1 Cor. 15:58.

Pagrerepaso

● Kan si Jesus magsabi na hanapon nguna an Kahadean, ano an ipinaririsa nia na maninigong ibugtak sa segunda?

● Ano an maninigong magin punto-de-vista niato manongod sa pag-asikaso sa pisikal na mga pangangaipo niato asin kan satong pamilya? Ano an tabang na itatao sato nin Dios?

● Mahalaga daw kun gurano an ginigibo niato sa paglilingkod sa Kahadean basta kita nakikikabtang? Taano?

[Mga Hapot Para sa Pag-adal]