Kapitulo 18

Kaipuhan na Gibohon Niato an Diosnon na Debosyon sa Harong

1. (a) Pakatapos na manodan an mga pamantayan ni Jehova sa pag-agom, anong mga pagbakle an ginibo nin dakol? (b) Alagad ano pa an kalabot sa Kristianong buhay pampamilya?

 KABILANG sa nakaoogmang mga katotoohan na nanodan niato sa enot niatong pag-adal sa Biblia iyo an mga mapadapit sa pag-agoman asin buhay pampamilya. Namidbid niato si Jehova bilang an Kagpundar sa pag-agoman asin naheling niato na sa Biblia itinao nia an pinakamarahay na giya para sa mga pamilya. Bilang resulta kan giyang iyan, dakol an tinalikdan an seksuwal na inmoralidad asin ipinarehistro nin legal an saindang pag-agoman. Alagad bako sana iyan an napapalabot sa Kristianong buhay pampamilya. Kalabot man dian an satong kaisipan manongod sa pagigin permanente kan bogkos nin pag-agoman, pag-otob sa satong mga paninimbagan sa pamilya, asin sa satong pagtratar sa ibang miembro kan pamilya.—Efe. 5:33–6:4.

2. (a) Ginigibo daw kan gabos sa harong an aram nia sa Biblia? (b) Paano idinodoon ni Jesus asin Pablo an halaga na gibohon iyan?

² Minilyon an nakakaaram kan sinasabi kan Biblia manongod sa mga bagay na ini. Alagad kun napapaatubang sa mga problema sa sainda mismong harong, dai ninda iyan ginigibo. Kumusta man kita? Tunay na mayo sa sato an boot na magin arog kan mga kinondenar ni Jesus ta ipinagilid ninda an pagboot nin Dios na nagboboot sa mga aki na igalang an saindang mga magurang paagi sa pangangatanosan na igo na an pagsagin may relihiyosong debosyon. (Mat. 15:4-9) Habo niatong magin mga tawo na may porma nin diosnon na debosyon pero dai iyan nagigibo “ sa saindang sadiring pamilya.” Imbes, maninigo kitang magmawot na magpaheling nin tunay na diosnon na debosyon, na “may dakulang pakinabang.”—1 Tim. 5:4; 6:6; 2 Tim. 3:5.

Gurano an Ilalawig kan Pag-agoman?

3. (a) Ano an nangyayari sa dakol na mag-agom, alagad ano an maninigong magin determinasyon niato? (b) Gamiton an saindong Biblia sa pagsimbag sa mga hapot na nalilista sa itaas manongod sa pagigin permanente nin pag-agoman.

³ Mas nagigin parate, an bogkos nin pag-agom nagigin matapo nanggad. An mga mag-agom na nag-iba-iba sa laog nin 20, 30 o 40 taon nagdedesisyon ngonyan na pumoon nin “bagong buhay” kaiba an iba. Bako naman na pambihirang mabaretaan na an hoben pang mag-aragom nagsusuway pakalihis sana nin pirang bulan na pag-iba-iba. Ano man an ginigibo nin iba, bilang mga parasamba ki Jehova maninigo niatong mawoton na makapaogma sa Dios. Ano an sinasabi kan saiyang Tataramon manongod digdi?

 Kun nagpapakasal an sarong lalaki asin babae, gurano kahaloy nindang lalaoman na mag-iba-iba? (Roma 7:2, 3; Mar. 10:6-9)

 Ano an solamenteng pasisikadan nin diborsio na balido sa pagheling nin Dios? (Mat. 19:3-9; 5:31, 32)

 Gurano kakosog kan pagmate ni Jehova manongod sa mga diborsio na dai autorisado kan saiyang Tataramon? (Mal. 2:13-16)

 Irenerekomendar daw kan Biblia an pagsusuway bilang paaging maresolberan an mga problema nin mag-agom? (1 Cor. 7:10-13)

4. Sa ibong nin modernong mga nangyayari, taano ta nagdadanay an nagkapirang pag-agoman?

⁴ Taano an ibang pag-agoman ta nagdadanay, mantang an iba—dawa sa tahaw nin naghihingakong mga Kristiano—nalalaglag? An paghalat na an duwa parehong nasa edad na bago magpakasal parateng mayor na dahelan. An paghanap nin agom na kapareho nindo sa interes asin puwede nindong kaolayon nin prangkahan manongod sa mga bagay mahalaga man. Alagad mas mahalaga pa an  pagigin saro na may tunay na diosnon na debosyon. Kun an saro talagang namomoot ki Jehova asin kombensido na an Saiyang mga dalan tama, magkakaigwa nin marigon na pasisikadan sa pagresolber sa mga problema na minalataw. (Sal. 119:97, 104; Tal. 22:19) An pag-agom kan tawong iyan dai mararaot kan kaisipan na, kun iyan dai magin mapanggana, puwede siang sumuway o makipagdiborsio. Dai nia gagamiton an mga pagkukulang kan saiyang agom bilang sarahotan sa pagpabaya sa saiyang sadiring mga paninimbagan. Imbes, sia makakanood na atubangon an mga problema sa buhay asin humanap nin marahay na mga solusyon.

5. (a) Paano napapalabot an kaimbodan ki Jehova? (b) Dawa kun agihan an grabeng kasakitan, anong mga pakinabang an makakamtan sa marigon na pangangapot sa mga pamantayan ni Jehova?

⁵ Aram na gayo niato na an Diablo nagsasahot na kun kita umagi sa personal na kasakitan dai na niato iintindihon an mga dalan ni Jehova asin iisipon niato na mas marahay na magsadiri na kitang magdesisyon kun ano an marahay asin kun ano an maraot. Alagad an mga tawo na maimbod ki Jehova bakong arog kaiyan. (Job 2:4, 5; Tal. 27:11) An mayoriya sa mga Saksi ni Jehova na nag-agi sa paglamag nin mga agom na daing pagtubod dai nagtalikod sa saindang sinumpaan sa pag-agom. (Mat. 5:37) An iba, pakalihis nin mga taon, nagkamit ngani kan kaogmahan na makaiba an saindang agom sa paglilingkod ki Jehova. (1 Cor. 7:16; 1 Ped. 3:1, 2) Kun dapit sa iba, na an agom mayo nin ipinaririsang pagliliwat o an agom nagbaya sa sainda huli ta sinda marigon na nangapot sa saindang pagtubod—aram man ninda na sinda nagkamit nin nagsosopay na bendisyon huli sa pangangapot sa mga pamantayan ni Jehova. Sa anong paagi? An saindang kamugtakan nakatokdo sa sainda na orog na magin harani ki Jehova. Nakanood sindang magpaheling nin diosnon na mga kuwalidad dawa sa irarom nin kasakitan. Sinda mga tawo na an pamumuhay nagtatao nin ebidensia sa puwersa nin diosnon na debosyon.—Sal. 55:22; Sant. 1:2-4; 2 Ped. 1:5, 6.

 Ginigibo kan Lambang Saro an Saiyang Kabtang

6. Tanganing magkaigwa nin mapangganang pag-agoman, anong areglo an dapat na igalang?

⁶ Siyempre, bako sanang padagos na pagsasaro an kaipuhan tanganing magkaigwa nin mapangganang pag-agom. An pundamental na kinakaipuhan iyo an paggalang kan kada miembro kan pamilya sa areglo ni Jehova manongod sa pagkapayo. Ini nakakokontribuwir sa marahay na areglo asin pakamate nin katiwasayan sa harong.—1 Cor. 11:3; Tito 2:4, 5; Tal. 1:8, 9; 31:10, 28.

7. Paano maninigong gibohon an pagkapayo sa pamilya?

⁷ Paano gigibohon an pagkapayong iyan? Sa paagi na nagpapaheling kan mga kuwalidad ni Jesu-Cristo. Si Jesus marigon sa pangangapot sa mga dalan ni Jehova; sia namomoot sa katanosan asin naoongis sa katampalasanan. (Heb. 1:8, 9) Sia namomoot man na gayo sa saiyang kongregasyon, tinatawan iyan nin kinakaipuhan na paggiya asin inaataman iyan. Sia bakong mapalangkaw asin daing konsiderasyon kundi, imbes, “maboot asin mapakumbaba sa puso,” asin an mga napapairarom sa saiyang pagkapayo ‘nakakakua nin kaginhawahan para sa saindang kalag.’ (Mat. 11:28, 29; Efe. 5:25-33) Kun arog kaiyan an pagtratar nin agom na lalaki asin ama sa saiyang pamilya, malinaw na sia nagpapasakop ki Cristo, na iyo an nagtao kan sangkap na halimbawa sa diosnon na debosyon. Siyempre, an Kristianong mga ina maninigo man na magpaheling kan kaparehong mga kuwalidad sa pagtratar sa saindang mga aki.

8. (a) Sa nagkapirang harong, taano ta garo baga dai ikinakatao kan Kristianong mga paagi an minamawot na mga resulta? (b) Ano an maninigo niatong gibohon kun mapaatubang kita sa siring na situwasyon?

⁸ Minsan siring, huli sa dai pagkasangkap nin tawo, tibaad lumataw an mga problema. An pagkaanggot sa paggiyang itinatao nin iba tibaad nakagamot na bago an siisay man sa pamilya nagpoon na mag-aplikar kan mga prinsipyo sa Biblia. An maboot na mga pakiolay asin mamomoton na ugale tibaad daing ibinubunga. Aram niato na sinasabi kan Biblia na haleon an “kaanggotan  asin kaongisan asin sirilyakan asin rilibakan.” (Efe. 4:31) Alagad kun may mga tawo na daing ibang nasasabotan, ano an maninigong gibohon? Bueno, ano an ginibo ni Jesus kan sia nasa grabeng kagipitan? Dai nia inarog an mga nag-uuma asin nagmumuda. Imbes, ipinamahala na nia an saiyang sadiri sa saiyang Ama, na nagsarig sa saiya. (1 Ped. 2:22, 23) Siring man, kun may lumataw na masakit na mga kamugtakan sa harong, nagtatao kita nin ebidensia nin diosnon na debosyon kun kita madolok ki Jehova, na inaarang an saiyang tabang, imbes na arogon an mga ugale kan kinaban.—Tal. 3:5-7.

9. Imbes na magparahanap nin sala, anong mga paagi an nanodan na gamiton nin dakol na Kristianong agom na lalaki?

⁹ An mga pagkaliwat dai perming madaling nangyayari, pero talagang epektibo an hatol kan Biblia. An dakol na lalaki na kaidto mapait na nagrereklamo manongod sa mga pagkukulang kan saindang agom narisa na nagpoon an pagrahay kan sinda mismo orog na makasabot sa mga pagtratar ni Cristo sa saiyang kongregasyon. An kongregasyon na iyan bakong kompuwesto nin sangkap na mga tawo. Pero si Jesus namomoot sa kongregasyon, nagtao kan tamang arogan para kaiyan, itinao pa ngani an saiyang buhay para kaiyan, asin ginagamit an Kasuratan bilang paagi na matabangan iyan na umoswag tangani na iyan lubos na makapaogma sa saiya. (Efe. 5:25-27; 1 Ped. 2:21) An saiyang halimbawa nakadagka sa dakol na Kristianong agom na lalaki na maghingoa na makatao nin marahay na arogan asin nin mamomoton na personal na tabang sa ikakarahay. An arog kaiyan na mga paagi nagtatao nin mas marahay na resulta ki sa mapait na paghanap nin sala o dai na sana paggirong.

10. (a) Sa anong mga paagi tibaad ginigibo nin sarong agom na lalaki o ama—minsan an saro na naghihingakong Kristiano—na magin masakit an buhay nin iba sa saiyang pamilya? (b) Ano an magigibo tanganing mapakarhay an kamugtakan?

¹⁰ Siyempre, tibaad an mga pagkukulang kan agom na lalaki asin ama an ginigikanan nin mga problema sa harong. Ano kun bako siang sensitibo sa emosyonal na mga pangangaipo kan saiyang pamilya o dai nangengenot paagi sa pag-areglo nin pag-orolay kan pamilya sa  Biblia asin iba pang aktibidad? An ibang pamilya nagkaigwa nin marahay na resulta pakalihis nin prangka, magalang na orolay manongod sa problema. (Tal. 15:22; 16:23; 31:26) Alagad dawa pa kun an resulta bakong arog sa linalaoman, an lambang saro makakatao nin mahalagang kontribusyon sa mas marahay na kamugtakan sa pamilya paagi sa personal na pagpatalubo sa mga bunga kan espiritu asin pagpaheling nin mamomoton na pagmakolog asin konsiderasyon sa ibang miembro kan pamilya. An pag-oswag mangyayari, bakong paagi sa paghalat sa iba na may gibohon, kundi paagi sa paggibo kan satong kabtang, sa siring ipinaheheling na kita personal na naggigibo nin diosnon na debosyon sa harong.—Col. 3:18-20, 23, 24.

Kun Saen Makua nin mga Simbag

11, 12. (a) Anong mga probisyon an itinao ni Jehova tanganing tabangan kita sa mga problema sa buhay pampamilya? (b) Tanganing lubos na makinabang, ano an irenerekomendar na gibohon niato?

¹¹ Kadakol kan pinagkukuanan nin mga tawo nin hatol para sa saindang pamilya. Alagad aram niato na an Tataramon nin Dios igwa kan pinakamarahay na hatol, asin nagpapasalamat kita na paagi sa saiyang naheheling na organisasyon tinatabangan nia kita na iaplikar iyan. Lubos daw kamong nakikinabang sa tabang na iyan?—Sal. 119:129, 130; Miq. 4:2.

¹² Apuwera sa pag-atender sa mga pagtiripon kan kongregasyon, igwa daw kamo nin regular na oras na itinagama sa pampamilyang pag-adal sa Biblia? An mga pamilya na ginigibo ini nin regular serosemana nagkakasararo sa saindang pagsamba. Nagigin maogma an saindang buhay pampamilya mantang pinag-oolayan ninda an pag-aplikar kan Tataramon nin Dios sa saindang kamugtakan.—Ikomparar an Deuteronomio 11:18-21.

13. (a) Kun kita may hapot manongod sa espisipikong punto sa pag-agom o pamilya, saen niato parateng manonompongan an kinakaipuhan na tabang? (b) Ano an maninigong marisa sa gabos na desisyon na ginigibo niato?

¹³ Tibaad may mga hapot manongod sa espisipikong  punto sa pag-agom o pamilya na apektado kamo. Halimbawa, ano an manongod sa birth control? Tama daw an esterilisasyon para sa mga Kristiano? Puwede daw na ipakua an aki kun garo baga posible na an aki mamumundag na may diperensia? Igwa daw nin mga limitasyon sa klase nin relasyon sa sekso na maninigo sa mag-agom? Kun an sarong tin-edyer nagpapaheling nin kakadikit na interes sa espirituwal na mga bagay, gurano sia maninigong obligaron na umiba sa pamilya sa pagsamba? Segurado na may masasabi kamo manongod sa kada saro digdi. Alagad makasisimbag daw kamo basado sa mga prinsipyo sa Biblia? An lambang saro sa mga hapot na ini ipinaliwanag na sa The Watchtower. Pag-adalan na gumamit nin mga indese sa paghanap nin siring na materyal. Kun mayo kamo kan mas daan na mga publikasyon na itinotokdo kan indese, helingon an librariya sa Kingdom Hall. Dai nindo laoman an Iyo o Dai sa kada hapot. Kun beses kaipuhan kamong magdesisyon—bilang indibiduwal o bilang mag-agom. Alagad pag-adalan na magdesisyon sa paagi na nagpaparisa kan saindong pagkamoot ki Jehova asin sa mga miembro kan saindong pamilya. Gumibo nin mga desisyon na nagtatao nin ebidensia sa saindong maigot na kamawotan na makapaogma sa Dios. Kun gigibohon nindo iyan, maririsa ni Jehova asin nin iba na nakakamidbid sa saindo na kamo talagang naggigibo nin diosnon na debosyon bako sanang sa publiko kundi pati sa saindong harong.—Efe. 5:10; Roma 14:19.

Pagrerepaso

● Paano napapalabot an kaimbodan ki Jehova sa pagigin maimbod sa sinumpaan nin saro sa pag-agom?

● Kun nagigipit nin pampamilyang mga problema, ano an makatatabang sato na gibohon an nakakapaogma sa Dios?

● Dawa kun magkulang an iba sa pamilya, ano an magigibo niato tanganing mapakarhay an situwasyon?

[Mga Hapot Para sa Pag-adal]