Kapitulo 17

“Magkaigwa nin Makosog na Pagkamoot sa Lambang Saro”

1, 2. (a) Ano an parateng hinahangaan nin mga bagohan sa pagtiripon kan mga Saksi ni Jehova? (b) Ano pang ibang ebidensia kan kuwalidad na ini an namamasdan ninda sa satong mga kombension?

 KUN an mga tawo minaatender sa mga pagtiripon nin mga Saksi ni Jehova sa primero parate na minahanga sindang gayo sa pagkamoot na ipinaheheling dian. Namamasdan ninda iyan sa mainit na pag-iriba-iba asin sa personal na pag-istimar sa sainda.

² Sa satong mga kombension naririsa man nin mga bisita na an kadaklan sa mga nag-aatender marahayon an ugale. An sarong peryodista nagsurat manongod sa siring na kombension: ‘Mayo nin nakapagdroga o nakainom. Mayo nin pagsirilyakan asin pagkinurahawan. Mayo nin pagturuludan. Mayo nin pagsinikohan. Mayo nin nagraraway o nagmumuda. Mayo nin berdeng sorobahan o maraot na pagtaram. Mayo nin aire na pano kan aso nin sigarilyo. Mayo nin harabonan. Mayo nin nag-aapon nin mga lata sa ibaba. Talagang pambihira idto.’ Ini gabos patotoo nin pagkamoot, an klase na ‘dai naggigibo kan bakong maninigo asin dai naghahanap kan saiyang sadiring kapakanan.’—1 Cor. 13:4-8.

3. (a) Pag-abot nin panahon, ano an maninigong marisa sa satong pagpaheling nin pagkamoot? (b) Sa pag-arog ki Cristo, anong klaseng pagkamoot an kaipuhan niatong pataluboon?

³ An pagkamoot kuwalidad na nagpapamidbid sa lambang tunay na Kristiano. (Juan 13:35) Mantang kita nagtatalubo sa espirituwal, kaipuhan na ipahayag niato iyan nin orog. Si apostol Pablo namibi na an pagkamoot logod kan saiyang mga tugang “mag-oswag nin orog.” (Fil. 1:9;  1 Tes. 3:12) Sinadol man ni Pedro an mga kapwa nia Kristiano na kamotan an “bilog na kasararoan nin mga tugang.” (1 Ped. 2:17) An pagkamoot niato maninigong magpahiro sato na gumibo nin orog pa sa pag-atender sana sa mga pagtiripon kaiba nin mga tawo na dai man niato pinagmamaigotan na personal na mamidbid. Kaipuhan na iyan bako sanang pagsabi nin maboot na “Kumusta” sa panapanahon. Ipinaliwanag ni apostol Juan na iyan maninigong magin mapagsakripisyo. Sia nagsurat: “Paagi kaini namidbid niato an pagkamoot, huli ta an [Aki nin Dios] nagtao kan saiyang kalag para sa sato; asin kita may paninimbagan man na itao an satong kalag para sa satong mga tugang.” (1 Juan 3:16; Juan 15:12, 13) Dai pa niato iyan nagigibo. Alagad talaga daw na itatao niato an satong buhay para sa satong mga tugang? Bueno, gurano an paghihingoa niato na tabangan sinda ngonyan, dawa kun tibaad bakong kombenyente?

4. (a) Sa ano pang ibang paagi na tibaad marisa niato na mas lubos niatong ikakapahayag an pagkamoot? (b) Taano ta mahalaga na magkaigwa nin makosog na pagkamoot sa lambang saro?

⁴ Kaiba an mga gibo na nagpapaheling nin mapagsakripisyong espiritu, mahalaga man na magkaigwa nin tunay na mainit na pagmate para sa satong mga tugang. An Tataramon nin Dios nagsasadol sato: “Sa pagkamoot nin sa magturugang magkaigwa kamo nin maboot na pagpadangat sa lambang saro.” (Roma 12:10) Kita gabos may arog kaiyan na pagmate para sa nagkapira. Puwede daw niatong iiba an mas dakol pa sa grupo na padangat niato? Mantang nagrarani an katapusan kan daan na palakaw, kaipuhan na kita orog na rumani sa satong Kristianong mga tugang. Pinatatanidan kita digdi kan Biblia, na sinasabi: “Harani na an katapusan kan gabos na bagay. . . . Orog sa gabos, magkaigwa nin makosog na pagkamoot sa lambang saro, huli ta an pagkamoot nakakatahob sa dakol na kasalan.”—1 Ped. 4:7, 8.

5. Taano ta salang laoman na mayo nin malataw na problema sa pag-oltanan kan mga miembro nin kongregasyon?

⁵ Siyempre, sagkod na kita bakong sangkap, may panahon na makakagibo kita nin mga bagay na ikakaanggot  nin iba. Sinda man magkakasala sato sa laen-laen na paagi. (1 Juan 1:8) Kun makua nindo an saindong sadiri sa siring na situwasyon, ano an maninigo nindong gibohon?

An Maninigong Gibohon Kun Lumataw an Problema

6. (a) Taano an hatol kan Biblia ta tibaad dai perming makaoyon kan satong mga tendensia? (b) Alagad ano an magigin resulta kun iyan gigibohon niato?

⁶ An Kasuratan nagtatao kan kinakaipuhan na giya. Alagad an ihinahatol kaiyan tibaad bakong kaoyon sa tendensia niato bilang bakong sangkap na mga tawo. (Roma 7:21-23) Minsan siring, an maigot niatong paghihingoa dian magpapatunay sa satong odok na pagmawot na makapaogma ki Jehova, asin paooswagon man kaiyan an kuwalidad kan satong pagkamoot sa iba.

7. (a) Kun makolgan kita nin iba, taano ta dai kita maninigong bumalos? (b) Taano ta dai sana niato maninigong likayan an tugang na nagkasala sa sato?

⁷ Kun beses kun nakokolgan an tawo naghahanap sinda nin paagi na makabalos sa nagkasala. Alagad ta pinagagrabe sana kaiyan an kamugtakan. Kun kaipuhan an balos, maninigong ipabaya niato iyan sa Dios. (Tal. 24:29; Roma 12:17-21) An iba tibaad probaran na ipuwera sa saindang buhay an nagkasala, na linilikayan an pakikipag-olay sa saiya. Alagad ta dai niato iyan magigibo sa mga kapwa parasamba. An pag-ako sa satong pagsamba depende, sa sarong kabtang, sa satong pagkamoot sa satong mga tugang. (1 Juan 4:20) Masasabi daw niato nin sadiosan na namomotan niato an saro na habo niatong kaolayon o an mismong presensia nakakaistorbo sa sato? Kaipuhan na atubangon niato an problema asin resolberan iyan. Paano?

8, 9. (a) Kun may reklamo kita tumang sa sarong tugang, ano an tamang gibohon? (b) Alagad ano kun paorootro siang magkasala sa sato? (c) Taano ta maninigo niatong atubangon an bagay sa paaging ini, asin ano an makatatabang sato na gibohon iyan?

⁸ Sa bagay na ini si apostol Pablo nagsurat: “Padagos kamong magpatiriostios asin magpatarawadtawadan kun an siisay man igwa nin sumbong tumang sa saro. Kun paanong pinatawad kamo ni Jehova, siring man an gibohon  nindo.” (Col. 3:13) Magigibo daw nindo iyan? Ano kun an tawo paorootrong nagkakasala sa saindo sa laen-laen na paagi?

⁹ Iyan man an hapot ni apostol Pedro, asin isinuherir nia na seguro maninigo niang pagmaigotan na patawadon an tugang sagkod sa makapito. Si Jesus nagsimbag: “Sinasabi ko sa saimo, bakong, Sagkod sa pitong beses, kundi, Sagkod sa pitong polo may pitong beses.” Alagad taano? Si Jesus nagpaliwanag paagi sa sarong ilustrasyon na nagdodoon kan kadakulaan kan satong utang sa Dios kun ikokomparar sa puwedeng magin utang sa sato nin siisay man na tawo. (Mat. 18:21-35) Sa dakol na paagi kita nagkakasala sa Dios aroaldaw—kun beses huli sa paslong gawe, parateng huli sa satong sinasabi o iniisip, saka huli sa dai pakagibo kan maninigo niatong gibohon. Huli sa ignoransia tibaad dai ngani niato marisa na an iba sa mga ginibo niato sala, o huli sa pagkaapretado nin buhay tibaad dai niato hinohorophorop nin igo an bagay. Puwedeng hagadon nin Dios an satong buhay bilang kabayadan sa satong mga kasalan. (Roma 6:23) Alagad ta sia nagpapadagos na magin maheherakon sa sato. (Sal. 103:10-14) Kaya rasonable sana na hinahagad nia sato na arog man kaiyan an magin pagtratar niato sa lambang saro. (Mat. 6:14, 15; Efe. 4:1-3) Kun ginigibo niato iyan, imbes na magtanom nin maraot na boot, iyan patotoo na kita nagkaigwa na kan klase nin pagkamoot na “dai naggigirumdom kan maraot.”—1 Cor. 13:4, 5; 1 Ped. 3:8, 9.

10. Ano an maninigo niatong gibohon kun an tugang may bagay tumang sa sato?

¹⁰ Tibaad may panahon na marisa niato na, minsan ngani mayo kita nin maraot na boot sa satong tugang, sia may tumang sa sato. Ano an maninigo niatong gibohon? Daing pag-atraso kaipuhan na kaolayon niato sia asin pagmaigotan na ikabalik an matoninong na relasyon. Sinasadol kita kan Biblia na gumibo kan enot na aksion. (Mat. 5:23, 24) Tibaad bakong madali na gibohon iyan. Iyan nagkakaipo nin pagkamoot na may kaibang kapakumbabaan. An mga kuwalidad daw na iyan may igong puwersa dian sa saindo tanganing gibohon nindo an ihinahatol  kan Biblia? Ini mahalagang pasohan na maninigong pag-aaboton.

11. Kun an tugang naggigibo nin mga bagay na ikinakaanggot niato, ano an maninigong gibohon manongod dian?

¹¹ Sa ibong na kampi, tibaad may saro na may mga ginigibong ikinakaanggot nindo—asin tibaad nin iba pa. Bako daw na marahay na may makipag-olay sa saiya? Seguro. Kun personal nindong ipaliliwanag an problema sa saiya sa maboot na paagi, tibaad ini magtao nin marahay na resulta. Alagad primero kaipuhan na ihapot nindo sa saindong sadiri: ‘Talaga daw na bakong Makakasuratan an mga ginigibo nia? O an dakulang dahelan daw kan problema iyo na an sakong pinagdakulaan asin pinagkatodan iba kan saiya?’ Kun iyo, mag-ingat na dai magbugtak kan sadiri nindong pamantayan asin maghusgar sono dian. (Sant. 4:11, 12) Si Jehova daing pagpalaenlaen na inaako an mga tawo hale sa gabos na klase nin pamumuhay asin mapasensia sa sainda mantang sinda nagtatalubo sa espirituwal.

12. (a) Kun may kaso nin grabeng pagkakasala sa kongregasyon, siisay an nag-aasikaso kaiyan? (b) Alagad sa irarom nin anong mga kamugtakan na paninimbagan kan sarong pinagkasalaan na iyo an enot na humiro? Na may anong katuyohan?

¹² Minsan siring, kun may saro sa kongregasyon na maholog sa grabeng pagkakasala, ini nagkakaipo nin listong atension. Niisay? Parateng kan kamagurangan. Pero kun iyan manongod sa negosyo sa pag-oltanan nin mga tugang, o tibaad salang paggamit sa dila na nakadanyar na gayo sa iba, kun siring an pinagkasalaan maninigong maghingoa nguna na personal na tabangan an nagkasala. Tibaad iyan garo masakit para sa nagkapira. Alagad ta iyan an ihinahatol ni Jesus sa Mateo 18:15-17. An pagkamoot sa tugang asin makosog na pagmawot na mapagdanay siang tugang makatatabang sa saro na gibohon iyan sa paagi na, kun mapupuwede, mataros an puso kan nagkasala.—Tal. 16:23.

13. Kun may problemang lumataw sa pag-oltanan niato asin nin saro pang tugang, ano an makatatabang sato na magkaigwa nin tamang punto-de-vista sa bagay?

¹³ Kun minalataw an problema, dakula man o sadit,  natatabangan kita kun pagmamaigotan niatong saboton an punto-de-vista ni Jehova. Dai sia oyon sa ano man na klaseng kasalan, alagad ta iyan naheheling nia sa sato gabos. Sa itinalaan niang panahon an daing pagsolsol na mga paragibo nin kasalan hinahale sa saiyang organisasyon. Alagad kumusta man kita? Kita gabos nag-aako kan saiyang pakatios asin pagkaherak. Nagtatao sia kan modelo na maninigo niatong arogon. Kun ginigibo niato iyan, ipinaheheling niato an saiyang pagkamoot.—Efe. 5:1, 2.

Humanap nin mga Paagi na “Humiwas”

14. (a) Taano ta sinadol ni Pablo an mga taga-Corinto na “humiwas”? (b) Paano ipinaririsa kan mga tekstong sinitar digdi na marahay na kita gabos maghorophorop manongod kaiyan?

¹⁴ Si apostol Pablo dakol na bulan na pinarigon an kongregasyon sa Corinto, Grecia. Sia nagpagal tanganing tabangan an mga tugang duman asin namomotan nia sinda. Alagad ta an nagkapira sa sainda bakong mainit sa saiya. Sobra sinda kamapagtatsar. Sinadol nia sinda na “humiwas” sa pagpahayag nin pagkamoot. (2 Cor. 6:11-13; 12:15) Marahay na horophoropon niato gabos kun gurano an satong pagpahayag nin pagkamoot sa iba asin humanap nin mga paagi na “humiwas.”—1 Juan 3:14; 1 Cor. 13:3.

15. Ano an makatatabang sato na magtalubo an satong pagkamoot para sa siisay man na tibaad daing gayo niato kursunada an ugale?

¹⁵ Igwa daw nin nagkapira sa kongregasyon na nadedepisilan kitang makadayupot? Kun pagmamaigotan niato na tahoban an ano man na saradit nindang pagkakasala, arog kan boot man niatong gibohon ninda sa sato, ini makatatabang na uminit an relasyon sa pag-oltanan niato. (Tal. 17:9; 19:11) Magigin marahay man an satong saboot manongod sa sainda kun hahanapon niato an saindang marahay na mga kuwalidad asin magkonsentrar dian. Talaga daw na rinisa na niato kun paano ginagamit ni Jehova an mga tugang na ini? Ini seguradong mapatalubo sa satong pagkamoot sa sainda.—Luc. 6:32, 33, 36.

16. Sa realistikong paagi, paano kita puwedeng “humiwas” sa pagpaheling nin pagkamoot sa mga nasa satong kongregasyon?

¹⁶ Totoo, may sagkodan an magigibo niato sa iba. Tibaad dai niato matitino an gabos sa kada pagtiripon. Tibaad dai  puwedeng imbitaran an gabos kun nangingimbitar kita sa mga katood para sa pagkakan. Kita gabos may kadayupot na mga kaamigo na mas dakol na oras niatong nakakaibaiba ki sa iba. Alagad puwede daw kitang “humiwas”? Puwede daw kitang gumamit nin pirang minuto kada semana tanganing orog na makamidbid an saro sa satong kongregasyon na bako niatong dayupot na kaamigo? Puwede daw na paminsanminsan agdahon niato an saro sa mga ini na umiba sa sato sa ministeryo sa langtad? Kun talagang kita may makosog na pagkamoot sa lambang saro, segurado na makakahanap kita nin mga paagi na ikapaheling iyan.

17. Kun nasa tahaw nin mga tugang na dai pa niato nakamidbid, ano an magpaparisa kun baga kita may makosog man na pagkamoot sa sainda?

¹⁷ An Kristianong mga kombension nagtatao nin marahay na mga oportunidad na “humiwas” an satong pagkamoot. Tibaad rinibo an presente. Dai niato sinda puwedeng makamidbid gabos. Pero makakagawe kita sa paagi na nagpapaheling na inienot niato an saindang ikakarahay ki sa sadiri niatong katrangkilohan, dawa kun dai pa niato sinda nakamidbid. Asin makakapaheling kita nin personal na interes sa pag-oltanan nin mga sesyon paagi sa pag-enot niato mismo na makipagmidbidan sa mga nasa palibot niato. Pag-abot nin panahon an gabos na nag-eerok sa daga magturugang, na sararo sa pagsamba sa Dios asin Ama nin gabos. Kanigoan na kaogmahan na makamidbid sinda gabos, na may dakol asin laen-laen na kuwalidad! An makosog na pagkamoot sa sainda mapahiro sato na magmawot na gibohon iyan. Taano ta dai pumoon ngonyan pa?

Pagrerepaso

● Kun minalataw an problema sa pag-oltanan nin magturugang, paano ini maninigong resolberan? Taano?

● Mantang kita nagtatalubo sa espirituwal, sa anong mga paagi maninigong magtalubo an satong pagkamoot?

● Paano mahihimong magpaheling nin makosog na pagkamoot bako sanang sa satong dayupot na mga kaamigo?

[Mga Hapot Para sa Pag-adal]