Mangapot nin Marigon sa Tataramon nin Dios
Kapitulo 3
Mangapot nin Marigon sa Tataramon nin Dios
1. (a) Paano naeksperyensiahan kan suanoy na Israel an pagigin totoo kan Tataramon nin Dios? (b) Taano ta interesante iyan para sa sato?
“ARAM nindong gayo sa bilog nindong puso asin sa bilog nindong kalag na ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob sa saindo.” Ini an ipinagirumdom ni Josue sa kamagurangan nin Israel kan sinda mamugtak na sa Dagang Panuga. Alagad sa suminunod na mga taon dai ninda perming isinasapuso asin ginigibo an Tataramon nin Dios. Ano an resulta? Ipinaliliwanag kan Biblia na kun paanong an mga panuga ni Jehova nin bendisyon nagin masasarigan, inotob man nia an isinabi nia kun dapit sa mga resulta nin pagmasumbikal. (Jos. 23:14-16) An rekord na iyan, saka an gabos na iba pa sa Biblia, iningatan para sa pagtotokdo sa sato—tanganing kita “magkaigwa nin paglaom” asin tanganing dai kita gumibo nin ano man na magbubunga kan pagkawara kan paglaom na iyan.—Roma 15:4.
2. (a) Sa anong sentido na an Biblia “ipinasabong nin Dios”? (b) Sa pakaaram kaini, ano an paninimbagan niato?
2 Minsan ngani mga 40 tawong “sekretaryo” an ginamit sa pagsurat kan Biblia, si Jehova mismo an Autor kaiyan. Iyan daw nangangahulogan na sia aktibong nagdirehir sa pagsurat kan gabos na yaon dian? Iyo. Arog kan totoong isinabi ni apostol Pablo, “An gabos na Kasuratan ipinasabong nin Dios.” Mantang kombensido dian, sinasadol niato an gabos na tawo sa gabos na lugar na kumuyog dian asin isentro an saindang buhay sa nasa laog kaiyan, siring sa pinagmamaigotan niatong gibohon.—2 Tim. 3:16; 1 Tes. 2:13.
Ano an Matabang sa Iba na Masabotan Iyan?
3. Ano an pinakamarahay na paagi na matabangan an dakol sa mga dai kombensido na an Biblia iyo an Tataramon nin Dios?
3 Siyempre, an dakol na nakakaolay niato dai nagtutubod kapareho niato na an Biblia talagang iyo an Tataramon nin Dios. Paano daw niato sinda matatabangan? Parate na an pinakamarahay na paagi buksan an Biblia asin ipaheling sa sainda an laog kaiyan. “An tataramon nin Dios buhay asin mapuwersa asin mas matarom ki sa arin man na minasbad na may duwang tarom . . . asin nakakamidbid kan mga kaisipan asin mawot kan puso.” (Heb. 4:12) “An tataramon nin Dios” iyo an tataramon nin panuga, na nasusurat sa Biblia. Iyan bakong gadan na kasaysayan kundi buhay asin dai mapopogolan na pasiring sa kaotoban kaiyan. Sa paggibo nin siring, an tunay na motibasyon sa puso nin mga tawo na nakakabasa nagigin hayag kun dapit sa pagkaotob sa mga kondisyon. An impluwensia kaiyan mas makapangyarihan ki sa ano man na masasabi niato nin personal.
4. Anong simpleng mga paliwanag manongod sa mga katotoohan kan Biblia an nakaliwat sa kaisipan nin nagkapira manongod sa Biblia? Taano?
4 An pakaheling sana sa ngaran nin Dios sa Biblia iyo an nakapaliwat sa dakol. An iba man nagdesisyon na mag-adal kan Biblia kan ipaheling sainda an sinasabi kaiyan manongod sa katuyohan kan buhay, an dahelan kun taano ta tinotogotan nin Dios an karatan, an kahulogan kan presenteng mga pangyayari o an realistikong paglaom na nakasentro sa Kahadean nin Dios. Sa kadagaan na an mga kaugalean na relihiyoso nagin dahelan na an mga tawo riniribok na gayo nin maraot na mga espiritu, an paliwanag kan Biblia manongod sa causa kaini asin kun paano makakaginhawa dian nakapukaw nin interes. Taano ta nagin mapuwersang gayo an mga puntong ini sa sainda? Huli ta an Biblia iyo an solamenteng gikanan nin masasarigan na impormasyon manongod sa mahahalagang bagay na ini.—Sal. 119:130.
5. Kun an sarong tawo nagsasabi na dai sia nagtutubod sa Biblia, ano an tibaad dahelan? Paano niato sia matatabangan?
5 Alagad, ano kun direktang sabihon sa sato nin sarong tawo na dai sia nagtutubod sa Biblia? Iyan daw maninigong tumapos na sa orolay? Bako kun sia gustong makipagrasonan. Kaipuhan na makamate kita nin paninimbagan na magtaram na may marigon na pagsarig para sa Tataramon nin Dios. Tibaad ibinibilang nia an Biblia na libro kan Kakristianohan. An rekord kaini nin pagsaginsagin asin politikal na pakikiaram, saka an daing ontok na paghagad kaini nin kuwarta, tibaad iyo an dahelan kan negatibong reaksion kan tawong iyan sa Biblia. Taano ta dai ihapot kun iyan an dahelan? An pagkondenar kan Biblia sa kinabanon na mga gibo kan Kakristianohan, kaiba an mga punto nin pagkakalaen sa pag-oltanan kan Kakristianohan asin kan tunay na Kristianismo, tibaad makapukaw sa saiyang interes.—Ikomparar an Mateo 15:7-9; Santiago 4:4; Miqueas 3:11, 12.
6. (a) Ano an nakakombensir sa saindo personalmente na an Biblia Tataramon nin Dios? (b) Ano pang ibang pangangatanosan an magagamit tanganing tabangan an mga tawo na masabotan na an Biblia talagang gikan sa Dios?
6 Para sa iba, an prangkahan na pag-oolay sa mga ebidensia nin pagpasabong nakatatabang. Ano an malinaw na nagpapatunay sa saindo na an Biblia gikan sa Dios? An sinasabi daw mismo kan Biblia manongod sa ginikanan kaiyan? (2 Tim. 3:16, 17; Kap. 1:1) O an bagay daw na an Biblia igwa nin dakol na hula na nagpaparisa nin detalyadong kaaraman sa ngapit, mga hula na kun siring seguradong gikan sa sarong persona na mas makapangyarihan sa tawo? (2 Ped. 1:20, 21; Isa. 42:9) An panlaog daw na pagkaoroyon kan Biblia, minsan ngani isinurat nin dakol na tawo sa laog nin 1,610 na taon? O an sientipikong katamaan kaiyan bakong arog nin ibang mga kasuratan kan mga panahon na idto? O an pagkasadiosan kan mga kagsurat kaiyan? O an pagkapreserbar dian sa atubang nin maringis na mga paghihingoa na laglagon iyan? Ano man an narisa nindong kahangahanga magagamit man na tabang sa ibang tawo.
An Satong Personal na Pagbasa sa Biblia
7, 8. (a) Ano an maninigong gibohon kan lambang saro sa sato manongod sa Biblia? (b) Ano an kaipuhan niato puwera sa personal na pagbasa sa Biblia, asin paano ini ipinaheheling mismo kan Biblia? (c) Paano kamo personal na nagkamit nin pakasabot sa mga katuyohan ni Jehova?
7 Apuwera sa pagtabang sa iba na tumubod sa Biblia, kita mismo kaipuhan na magtagama nin panahon na basahon iyan nin regular. Ginigibo daw nindo iyan? Sa gabos na librong ginibo, an sarong ini an pinakamahalaga. Siyempre, dai iyan nangangahulogan na kun babasahon niato iyan mayo na kitang ibang kaipuhan. An Kasuratan nagpapatanid tumang sa pagsolosolo, na nag-iisip na kaya niatong saboton an gabos paagi sa independienteng pagsiyasat. An personal na pag-adal asin regular na pag-atender sa pagtiripon kaipuhan pareho tanganing kita magin timbang na Kristiano.—Tal. 18:1; Heb. 10:24, 25.
8 Para sa satong kapakinabangan an Biblia nagsasaysay manongod sa sarong opisyal na Etiope na sa saiya giniyahan nin sarong anghel an Kristianong ebanghelisador na si Felipe kan an opisyal nagbabasa sa hula ni Isaias. Hinapot ni Felipe an tawo: “Nakakasabot ka kan binabasa mo?” Mapakumbaba an Etiope nagsimbag: “An totoo, paano ko magigibo iyan, kun daing gumiya sa sako?” Inagda nia si Felipe na ipaliwanag an teksto. Ngonyan, si Felipe bakong saro sanang independienteng parabasa sa Biblia na duman nagtao kan saiyang opinyon manongod sa Kasuratan. Bako; ipinaheheling kan rekord na sia dayupot na kaibaiba kan mga apostol sa kongregasyon sa Jerusalem asin miembro kan naheheling na organisasyon ni Jehova. Kaya matatabangan nia an Etiope na makinabang sa pagtotokdo na itinatao ni Jehova paagi sa organisasyon na iyan. (Gibo 6:5, 6; 8:5, 14, 15, 26-35) Siring man ngonyan, siisay sa sato an nagkaigwa nin malinaw asin tamang pakasabot sa mga katuyohan ni Jehova sa sadiri nia sana? Al kontraryo, kinaipuhan, asin kaipuhan pa giraray niato, an tabang na mamomoton na itinatao ni Jehova paagi sa saiyang naheheling na organisasyon.
9. Anong mga programa nin pagbasa sa Biblia an mapapakinabangan niato gabos?
9 Tanganing matabangan kita na gamiton asin masabotan an Biblia, an organisasyon ni Jehova nagtatao nin ekselenteng Makakasuratan na materyal sa An Torrengbantayan asin konektadong mga publikasyon. Dugang pa, an regular na iskedyul sa pagbasa sa Biblia ginibo para sa sato may koneksion sa Teokratikong Paadalan sa Pagmiministro sa mga kongregasyon nin mga Saksi ni Jehova. An iba sa mga Saksi ni Jehova naggigibo nin sunod-sunod na pagbasa sa Biblia apuwera kaini. Dakulang pakinabang an makakamtan sa oras na ginamit sa pagsiyasat sa Banal na Kasuratan. (Sal. 1:1-3; 19:7, 8) Saindo na daw na personal na nabasa an bilog na Biblia? Kun dai pa, gumibo nin espesyal na paghihingoa na mabasa iyan. Minsan pa dai nindo lubos na nasasabotan an gabos, an pagkaigwa nindo nin pankagabsan na ideya manongod dian magkakaigwa nin dakulang halaga. Kun babasahon nindo an apat o limang pahina sana aroaldaw, matatapos nindo an Biblia sa laog nin sarong taon.
10. (a) Noarin nindo binabasa an Biblia? (b) Taano ta mahalaga an pagkaregular?
10 Noarin nindo ikakaareglo na basahon an Biblia? Kun makakapagtagama kamo nin minsan 10 o 15 minutos aroaldaw, kanigoan kapakipakinabang kaini! Kun dai, kisuerra mag-iskedyul nin regular na mga oras para kaiyan kada semana, dangan otobon an iskedyul na iyan. An pagbasa sa Biblia maninigong magin parasiempreng ugale, kapareho kan pagkakan. Arog kan aram nindo, kun bako nang marahay an ugale sa pagkakan nin sarong tawo, nadadanyaran an saiyang salud. Iyo man an satong espirituwalidad. An satong buhay depende sa dayaday niatong pagkakan sa “lambang tataramon na minaluwas sa ngoso ni Jehova.”—Mat. 4:4.
11. Ano an maninigong magin katuyohan niato sa pagbasa kan Biblia?
11 Ano an maninigong magin katuyohan niato sa pagbasa kan Biblia? Magigin sala kun an pasohan niato matapos sana an kota nin mga pahina o magkamit sana nin buhay na daing sagkod. Tanganing makinabang sagkod lamang, kaipuhan na magkaigwa kita nin mas halangkaw na motibo—pagkamoot sa Dios, pagmawot na mamidbid sia nin orog, masabotan an saiyang kabotan asin masamba sia nin tama. (Juan 5:39-42) An kaisipan niato maninigong magin kapareho kan sa kagsurat kan Biblia na nagsabi: “Paaraman sa sako an saimong mga dalan, O Jehova; tokdoi ako kan saimong mga dana.”—Sal. 25:4.
12. (a) Taano ta kaipuhan an pagkaigwa nin “tamang kaaraman,” asin anong paghihingoa kun nagbabasa an tibaad kaipuhan tanganing makamit iyan? (b) Arog kan ipinaheheling sa pahina 27, sa anong mga punto-de-vista puwede niatong kapakipakinabang na analisaron an binabasa niato sa Biblia? (c) Iilustrar an limang puntong ini, saro-saro, paagi sa pagsimbag sa mga hapot na nasa katapusan kan parapong ini. Seguradohon na gamiton an saindong Biblia.
12 Mantang inaako niato an katokdoan na iyan, maninigong magin kamawotan niato na magkamit nin “tamang kaaraman.” Kun mayo kaiyan, paano niato ikakaaplikar nin tama an Tataramon nin Dios sa satong buhay o ikakapaliwanag iyan nin tama sa iba? (Col. 3:10; 2 Tim. 2:15) An pagkakamit nin tamang kaaraman naghahagad na kita magbasa nin maingat, asin na kun hararom an sarong kabtang tibaad kaipuhan na basahon niato iyan nin bako sanang sarong beses tanganing masabotan iyan. Makikinabang man kita kun magtatao kita nin oras sa paghorophorop sa materyal, na iniisip-isip iyan sa laen-laen na punto-de-vista. An limang mahahalagang punto na iisip-isipon idinodoon sa pahina 27 kan librong ini. An dakol na kabtang kan Kasuratan puwedeng analisaron sa kapakipakinabang na paagi sa paggamit kan saro o labi pa sa mga ini. Sa pagsimbag nindo sa mga hapot na nasa ibaba maheheling nindo kun taano.
(1) Sa parate an kabtang kan Kasuratan na binabasa nindo nagpaparisa kun anong klaseng persona si Jehova.
Kun may pag-apresyar niatong hinohorophorop an sinasabi sato kan Biblia manongod sa mga linalang ni Jehova, paano iyan nakakaapektar sa satong kaisipan manongod sa saiya? (Sal. 139:13, 14; poon sa Job kapitulo 38-42 nangorognang risahon an 38:1, 2 asin 40:2, 8, dangan 42:1-6.)
Huli sa sinabi ni Jesus sa Juan 14:9, 10, ano an masasabi niato manongod ki Jehova gikan sa mga pangyayari na arog kan nasusurat sa Lucas 5:12, 13?
(2) Horophoropon kun paano an pangyayari nakakokontribuwir sa kaotoban kan tema kan Biblia, arin na baga, an pagkabindikar kan ngaran ni Jehova paagi sa Kahadean na pamamahalaan ni Jesu-Cristo na Ipinanugang Banhi.
Paano konektado sa temang ini an mga damat sa Egipto? (Helingon an Exodo 5:2; 9:16; 12:12.)
Ano man an nakakaogmang kasaysayan manongod ki Rut na Moabita? (Rut 4:13-17; Mat. 1:1, 5)
Paano konektado dian an paisi ni Gabriel ki Maria manongod sa nagdadangadang na pagkamundag ni Jesus? (Luc. 1:26-33)
Taano ta makahulogan an paglahid sa mga disipulo ni Jesus kan banal na espiritu kan Pentecostes? (Gibo 2:1-4; 1 Ped. 2:4, 5, 9; 2 Ped. 1:10, 11)
(3) An konteksto may koneksion sa kahulogan nin espisipikong mga bersikulo.
Siisay an pinanonongdan kan mga sinasabi sa Roma 5:1 asin 8:16? (Helingon an Roma 1:7.)
Ipinaririsa daw kan konteksto na an 1 Corinto 2:9 nagkokomento manongod sa buhay sa daga sa Bagong Areglo nin Dios? Arog kan ipinaheheling sa bersikulo 6-8, kiisay na mata asin talinga an dai nakasasabot sa mga bagay na isinurat ni Pablo?
(4) Ihapot sa sadiri kun paano nindo personal na ikakaaplikar an saindong binabasa.
An rekord daw manongod sa paggadan ni Cain ki Abel makasaysayan sana o igwa daw dian nin hatol para sa sato? (Gen. 4:3-12; 1 Juan 3:10-15; Heb. 11:4)
Kun nababasa niato (sa Exodo sagkod sa Deuteronomio) an manongod sa mga inagihan kan Israel sa kapatagan, anong personal na pag-aplikar an maninigo niatong gibohon? (1 Cor. 10:6-11)
An hatol daw manongod sa paggawe na isinurat sa linahidan na mga Kristiano minaaplikar sa mga tawo na may paglaom sa buhay na daing sagkod sa daga? (Ikomparar an Bilang 15:16; Juan 10:16.)
Dawa kun kita nasa marahay na kamugtakan sa Kristianong kongregasyon, kaipuhan daw na horophoropon niato an mga paagi na orog niatong ikakaaplikar an hatol kan Biblia na dati na niatong aram? (2 Cor. 13:5; 1 Tes. 4:1)
(5) Isipon kun paano nindo magagamit an saindong binabasa sa pagtabang sa iba.
Siisay an puwedeng matabangan kan rekord manongod sa pagbuhay liwat sa aking daraga ni Jairo? (Luc. 8:41, 42, 49-56)
13. Anong mga resulta an malalaoman niato sa padagos na programa na pagbasa sa Biblia asin pag-adal kaiba kan organisasyon ni Jehova?
13 Kapakipakinabang nanggad an pagbasa sa Biblia kun ginigibo sa paaging ini! Totoo, an pagbasa sa Biblia sarong angat—sarong proyekto na mapagmamaigotan niato sa bilog niatong buhay na may dakulang pakinabang. Alagad mantang ginigibo niato iyan kita makosog sa espirituwal. Irarani kita kaiyan nin orog sa satong mamomoton na Ama, si Jehova, asin sa satong Kristianong mga tugang. Tatabangan kita kaiyan na makuyog an hatol na ‘marigon na mangapot sa tataramon nin buhay.’—Fil. 2:16.
Pagrerepaso
● Taano ta isinurat asin iningatan an Biblia sagkod sa satong aldaw?
● Paano niato matatabangan an iba na apresyaron iyan?
● Taano ta kapakipakinabang an regular na personal na pagbasa sa Biblia? Sa anong limang punto-de-vista maaanalisar niato an satong binabasa sa kapakipakinabang na paagi?
[Mga Hapot Para sa Pag-adal]
[Kahon/Ritrato sa pahina 27]
Kun Binabasa Nindo an Biblia Horophoropon—
Kun ano an sinasabi sa saindo kan lambang kabtang manongod ki Jehova bilang sarong persona
Kun paano iyan konektado sa pankagabsan na tema kan Biblia
Kun paano an konteksto nakakaapektar sa kahulogan
Kun paano iyan maninigong makaapektar sa saindong buhay
Kun paano iyan magagamit nindo tanganing tumabang sa iba
