Omawon si Jehova Bilang an Tunay na Dios
Kapitulo 2
Omawon si Jehova Bilang an Tunay na Dios
1. (a) Siisay an tunay na Dios? (b) Mantang kita nakakanood manongod sa saiya, paano maninigong maapektaran an satong buhay?
SA MGA kapwa Kristiano si apostol Pablo nagsurat na, dawa ngani kadakol kan inaapod na mga dios, “sa sato igwa nin sarong Dios na Ama . . . asin igwa nin sarong Kagurangnan, si Jesu-Cristo.” (1 Cor. 8:5, 6) An “sarong Dios” na sinabi ni Pablo iyo si Jehova, an Kaglalang kan gabos na bagay. (Deut. 6:4; Kap. 4:11) An mapag-apresyar na mga tawo na nakakanood manongod sa saiyang mga kuwalidad asin sa mga ginibo nia para sa katawohan dai nakakapogol na maparani sa saiya. Na may anong resulta? Natural sana para sa sainda na omawon an Saro na hinahangaan na gayo ninda, na ginigibo iyan paagi sa mga tataramon asin gibo. Mantang nagtatalubo an saindang pagkamoot sa Dios, napapahiro sinda na magtaram sa iba manongod sa saiya, asin sagkod sa makakaya ninda bilang mga tawo boot ninda na arogon sia. An Biblia nagsasadol sa sato gabos na gibohon iyan, na an sabi: “Magin kamong mga paraarog sa Dios, bilang namomotan na mga aki, asin padagos na lumakaw sa pagkamoot.” (Efe. 5:1, 2) Tanganing ikaaplikar an hatol na iyan, kaipuhan na mamidbid niato si Jehova sono sa tunay niang personalidad.
Kun Anong Klaseng Persona si Jehova
2. Ano an nagkapira sa pambihirang mga kuwalidad nin Dios na nagpapahiro sato na omawon sia?
2 Maheheling sa bilog na Biblia an dakol na direktang mga kapahayagan na nagsasabi kan pambihirang mga kuwalidad nin Dios. Kun binabasa nindo ini, horophoropon kun ano man nanggad an mga kuwalidad na iyan asin kun gurano iyan kahalaga para sa saindo. Halimbawa: “An Dios pagkamoot.” (1 Juan 4:8) “An gabos niang dalan hustisya.” (Deut. 32:4) ‘Sa saiya igwa nin kadonongan.’ (Job 12:13) Sia “makosog sa kapangyarihan.” (Isa. 40:26) Mantang hinohorophorop nindo an mga atributong ini, dai daw kamo napapahiro, huli sa paghanga sa Dios, na omawon sia?
3. Ano pang ibang bagay sa personalidad ni Jehova an nakakaagyat na gayo?
3 Sa orog pang pagpamidbid sa sato kan saiyang nakakaagyat na personalidad, an Biblia nagsasabi sato na si Jehova “Dios na maheherakon asin maugayon, maluya sa pagkaanggot asin mayaman sa mamomoton na kabootan asin katotoohan.” (Ex. 34:6) “Ika, O Jehova, marahay asin andam na magpatawad.” (Sal. 86:5) “Kun manongod ki Jehova, an saiyang mga mata naglilibot sa bilog na daga tanganing ipaheling an saiyang kosog para duman sa mga an puso bilog sa saiya.” (2 Cron. 16:9) “An Dios dai nagpapalaen, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:34, 35) Si Jehova “abundang nagtatao” asin an “maogmang Dios.” (Sant. 1:5; 1 Tim. 1:11) Nakakaginhawa nanggad na maglingkod sa daing kaagid na Dios na ini asin manamitan an saiyang mamomoton na pangataman!
4. (a) Anong klaseng debosyon an hinahagad ni Jehova, asin gurano kahalaga kaiyan? (b) Sa ano kita inaagdang makikabtang kan Salmo 34:3?
4 Kaoyon sa saiyang mga atributos an bagay na sia “sarong Dios na naghahagad nin dai nababangang debosyon.” (Ex. 20:5) Tanganing mapaglingkodan sia nin tama kaipuhan na itao niato sa saiya an satong bilog na debosyon. Dai puwede na kamotan man niato an kinaban na si Satanas an dios. (1 Juan 2:15-17; 2 Cor. 4:3, 4) Naheheling ni Jehova an ano man na pagsaginsagin nin katanosan. Biyo niang aram bako sanang kun ano an ginigibo niato kundi siring man kun ano an saboot niato manongod dian asin kun anong klaseng personalidad an pinagmamaigotan niato. Kun kita tunay na namomoot sa katanosan, tinatabangan nia kita. (Jer. 17:10; Tal. 15:9) Huli sa klase kan personalidad ni Jehova, minilyon na tawo sa bilog na daga an maogmang nag-ako kan pangagda kan salmista sa Biblia na nagsurat: “O pakadakulaa nindo si Jehova sa kaibanan ko, kamo banwaan, asin iriba niatong ilangkaw an saiyang ngaran.” (Sal. 34:3) Saro daw kamo sa sainda?
5. Ano an matabang sato na lubos na makinabang sa satong pag-adal manongod sa personalidad ni Jehova?
5 An saindong kamawotan na magtaram manongod sa Dios mararom, asin matatabangan na gayo kamo sa saindong mga paghihingoa na umarog sa saiya kun odok nindong sisiyasaton an saiyang haralangkaw na kuwalidad. Aramon (1) nin eksakto kun ano an kada kuwalidad, tibaad kun ano an ikinakapalaen kaiyan sa ibang mga kuwalidad, (2) kun paano iyan ipinaheling ni Jehova asin kiisay, siring man (3) kun paano nindo ikakapaheling iyan o kun paano iyan maninigong makaapektar sa saindong punto-de-vista.
6. Ginagamit an pagkamoot bilang halimbawa, ipaheling kun paano nindo puwedeng siyasaton an mga kuwalidad ni Jehova. Gibohon ini paagi sa pagsimbag sa mga hapot na nasa katapusan kan parapong ini, na iiniiba an mga teksto sa saindong simbag.
6 Konsideraron digdi an saro sanang halimbawa. Kun an Biblia nagsasabing, “An Dios pagkamoot,” ano an boot sabihon kaiyan? (1 Juan 4:8) Siyempre, igwa nin nagkapirang klase nin pagkamoot. An terminong Griego na ginamit sa tekstong ini a·gaʹpe, na nangangahulogan kan pinakahalangkaw na klase nin pagkamoot, na ipinaheling mismo ni Jehova Dios. An siring na pagkamoot kapahayagan nin biyong kadaihan nin kapasloan. Nasa isip iyan, bilogon an saindong mga simbag sa mga hapot na nasa ibaba, na ginagamit an sitadong mga teksto.
Paano an kuwalidad na ini ipinaheheling sa mga linalang ni Jehova? (Gibo 14:16, 17)
Ano an pinakapambihirang halimbawa kan pagkamoot ni Jehova para sa katawohan? (Juan 3:16) Huli daw sa karahayan nin tawo na ginibo ini ni Jehova? (Roma 5:8)
Paano an ginibo ni Jehova paagi sa saiyang Aki maninigong makaimpluwensia sa paggamit niato sa satong buhay? (2 Cor. 5:14, 15, 18, 19)
Sa anong mga paagi na kita bilang mga Kristiano makakapaheling na igwa kita kan kaparehong klase nin pagkamoot para sa mga kapwa niato Kristiano? (1 Cor. 13:4-7; 1 Juan 4:10, 11; 3:16-18)
Siisay pa an maninigo niatong pahelingan nin pagkamoot, asin paano? (Mat. 5:43-48; 28:19, 20; Gal. 6:10)
7. Sa saindong personal na pag-adal, paano nindo manonompongan an kaagid na materyal manongod sa iba pang mga kuwalidad ni Jehova?
7 Boot man daw nindong siyasaton an nagkapira sa iba pang mga kuwalidad ni Jehova? Sa pagpopoon, sa personal na pag-adal taano ta dai probaran an “hustisya” asin “kadonongan,” dangan tibaad an “mamomoton na kabootan” asin “pagkaherak.” Paagi sa mga indese sa mga publikasyon kan Watch Tower asin konkordansia sa Biblia, makakanompong kamo nin kadakoldakol na materyal na nakakapagtao nin kaliwanagan.
Tabangan an Iba na Manodan an Katotoohan Manongod sa Dios
8. (a) Anong klaseng mga dios an sinasamba kan mga tawo sa kinaban? (b) Siisay an nasa likod kan gabos na karibarawan na ini, asin taano ta siring an saindong sinasabi?
8 Katumang sa pagsamba sa tunay na Dios, minilyon na iba pang dios an sinasamba nin mga tawo. Kan ikaapat na siglo, inako kan Kakristianohan an pagtubod sa “Trinidad,” na itinokdo nin mga taga-Babilonya, Egipto, mga Hindu asin Budista bago kaidto. Apuwera sa paniniwalang ini manongod sa Dios, may makapangyarihan na mga namomoon, pambihirang mga parakawat asin parakanta an ginibong idolo na garo mga dios. An kuwarta, sadiri asin sekso nagin man mga dios na tinatawan nin maigot na debosyon. Siisay an nasa likod kaiyan gabos? “An dios kan palakaw na ini nin mga bagay,” si Satanas na Diablo. (2 Cor. 4:4; 1 Cor. 10:20) Paagi sa gabos na maiisip, tusong paagi pinagmamaigotan niang irayo an mga tawo ki Jehova, o kisuerra bangaon an saindang debosyon.
9. Ano an pinakamarahay na paagi na matabangan an siisay man na makanood kan katotoohan manongod sa Dios?
9 Paano niato matatabangan an siring na mga tawo, baga man naghihingakong Kristiano o iba pa, na makaaram kan katotoohan manongod sa Dios? An saro sa pinakamarahay na paagi ipaheling sa sainda sa nakatatabang na paagi kun ano an sinasabi mismo kan Biblia manongod sa kun siisay an tunay na Dios asin kun anong klaseng persona sia. Dangan kaipuhan na suportaran niato ini nin gawe na nagpapaheling nin diosnon na mga kuwalidad sa sato mismong buhay.—1 Ped. 2:12.
10. Kun kaolay an sarong Trinitaryo, taano ta bakong madonong na ipamugtak na aram niato nin eksakto kun ano an saiyang tinutubod?
10 Alagad ano kun an nagkapira sa mga miembro kan mga iglesya nin Kakristianohan makipagdiskutiran sa saindo, na sinasabi na an saindang paniniwala sa “Trinidad” Makakasuratan? Enot sa gabos, aramon na, minsan igwa nin opisyal na mga kapahayagan manongod sa doktrina nin “Trinidad,” an dakol na tawo igwa nin sadiring mga ideya. Agdahon sinda na ipahayag an nasa isip ninda, dangan tabangan sinda na ikomparar an saindang paniniwala sa kun ano an nasa sainda mismong Biblia. Pag-abot nin panahon, dagkahon man sinda na ikomparar an opisyal na katokdoan kan iglesya sa Tataramon nin Dios.
11. Sinasarosaro an limang pangenot na punto, gamiton an mga hapot asin teksto na nalilista sa parapong ini tanganing mangatanosan sa pagigin bakong makakasuratan kan doktrina nin “Trinidad.”
11 Nasa isip an pagmawot na tabangan an sinserong mga tawo, helingon kun paano nindo magagamit an mga tekstong sinasabi sa ibaba sa pangangatanosan sa mga punto na kaiba kan mga tekstong ini:
(1) May mga Trinitaryo na nagdodoon kan ideya na igwa nin tolong banal na Persona (an Ama, Aki asin Espiritu Santo) alagad saro sanang Dios.
Alagad ipinaririsa daw kan Gibo 2:4, 17 na an “Espiritu Santo,” o “banal na espiritu,” sarong persona?
Taano ta makatatabang na risahon kun pirang persona an sinasabi sa kada saro sa minasunod na teksto? (Juan 17:20-22; Gibo 7:56; Kap. 7:10)
(2) May mga nagtutubod na an gabos na kabtang kan “Trinidad” may pararehong kamurawayan, na mayo nin mas dakula o mas hababa ki sa iba, na sinda pantay-pantay saka pararehong daing sagkod.
Minaoyon daw an Kasuratan? (Para sa simbag, helingon an Juan 14:28; Mateo 24:36; Kapahayagan 3:14.)
(3) May mga itinotokdo an Juan 1:1 bilang pruweba kan “Trinidad.” Sinda nangangatanosan na an tekstong Griego digdi mayo nin artikulo indepinido (“a” [sa Bicol, “saro”]) asin kun siring an teksto dapat na magsabi: “an Tataramon Dios,” imbes na “sarong dios.”
Alagad pirang persona an pinag-oolayan sa Juan 1:1? Tolo? O duwa? Paano an Juan 1:18 kontra sa doktrinang “Trinidad”?
Totoo na an Griego mayo nin artikulo indepinido, alagad an dakol na lenguahe igwa, asin iyan ginagamit sa mga lenguaheng iyan tanganing ikapahayag nin tama an mga ideya. Kun may naghohona na sala na gamiton an artikulo indepinido sa pagtradusir kan Juan 1:1, boot man daw nia na haleon iyan sa Gibo 28:6 sono sa King James Version asin iba pa? (An saro pang paagi sa pagtradusir kan Juan 1:1, arog kan ipinaheheling sa An American Translation, iyo “an Tataramon dibino,” an boot sabihon, sia igwa nin banal na mga kuwalidad na kapareho kan sa Dios.)
(4) An mga Trinitaryo nangangatanosan man na sa Genesis 1:1, 26 an terminong Hebreo na itrinadusir na “Dios” El·ohimʹ asin na ini an plural sa Hebreo asin sa aktuwal nangangahulogan na “mga Dios.”
Taano ta iyan dai nagsusuportar sa katokdoan nin tolong banal na Persona sa “sarong Dios”?
Kun iyan nagpaparisa nin “Trinidad” sa Genesis 1:1, ano an ipinaririsa kaiyan sa Hokom 16:23, na minagamit kan el·o·himʹ para sa “dios,” na an berbong Hebreo nasa numerong singular, bakong plural?
Taano ta ginagamit an pormang plural nin Dios sa mga tekstong ini sa Hebreo? Ini an sarong paagi na ipinaririsa sa Hebreo an ideya nin pagkaekselente o kamurawayan. Kun labi sa sarong persona an boot sabihon, an kaibang mga berbo nasa plural man, alagad sa mga kaso sa itaas iyan bako.
(5) Huli sa pagdodoon kan mga iglesya ki Jesus (kadungan kan bagay na an ngaran na Jehova hinale sa dakol na traduksion kan Biblia), an nagkapira si Jesus sana an nasa isip kun nasasabihan an Dios.
Alagad anong halimbawa sa pagsamba an itinao ni Jesus para arogon niato? (Luc. 4:8)
12. Taano ta tamang inapod ni Jesus an saiyang Ama na “an iyo sanang tunay na Dios”?
12 Minsan ngani si Jesus inaapod sa Kasuratan na “sarong dios,” “Makosog na Dios” pa ngani, inomaw nia an saiyang Ama, na inaapod siang “sakong Dios asin saindong Dios.” (Juan 1:1; 20:17; Isa. 9:6) Uminoyon sia ki Moises, na kan enot nagsabi: “Si Jehova an tunay na Dios; mayo na nin iba apuwera sa saiya.” (Deut. 4:35) Si Jehova laen na gayo sa mga sinasamba na arog kan mga idolo, mga tawo na ginibong dios asin si Satanas na Diablo. Bakong arog kan gabos na iyan, si Jehova, arog kan pagkaapod sa saiya ni Jesus, an “iyo sanang tunay na Dios.”—Juan 17:3.
“Maglakaw sa Ngaran ni Jehova”
13, 14. Ano an kalabot sa ‘pakamidbid’ asin ‘paglakaw’ sa ngaran ni Jehova?
13 Pakalihis nin mga taon nin pagkaribaraw dapit sa kun siisay an Dios, dakol an naoogmang gayo kun primero nindang naheheling an personal na ngaran nin Dios, Jehova, sa saindang Biblia. (Ex. 6:3) Alagad sinda magkakamit sana nin nagdadanay na pakinabang sa kaaraman na ini kun sinda ‘maglalakaw sa ngaran ni Jehova sagkod lamang.’ (Miq. 4:5) An kalabot digdi bako sanang pakaaram sa ngaran ni Jehova o pagsabi na sinda mga Saksi ni Jehova.
14 Mapadapit sa kahulogan kan ngaran nin Dios, an Salmo 9:10 nagsasabi: “An mga nakakamidbid sa saimong ngaran mananarig sa saimo, . . . O Jehova.” Ano an kalabot dian? An kalabot dian bako sanang pakaaram sa ngaran ni Jehova, na dai man automatikong nangangahulogan nin pagsarig ki Jehova. An ‘pakamidbid’ sa ngaran nin Dios digdi nangangahulogan nin pakasabot kun anong klaseng Dios si Jehova, paggalang sa saiyang autoridad, pagkuyog sa saiyang mga pagboot. Kaagid kaiyan, an ‘paglakaw sa ngaran ni Jehova’ nagpaparisa nin pagigin nagdusay sa saiya asin pagrepresentar sa saiya bilang saro sa saiyang mga parasamba, na talagang ginagamit an buhay nin saro kaoyon sa kabotan nin Dios. (Luc. 10:27) Ginigibo daw nindo iyan?
15. Ano, apuwera sa pakamate nin obligasyon, an kaipuhan tangani kitang makapaglingkod ki Jehova sagkod lamang?
15 Tanganing kita makapaglingkod ki Jehova nin daing sagkod, bako sanang pakamate nin obligasyon an dapat na magpahiro sa sato. Si apostol Pablo nagsadol ki Timoteo, na dakol nang taon na naglilingkod ki Jehova: “Patoodon mo an saimong sadiri na diosnon na debosyon an saimong pag-aaboton.” (1 Tim. 4:7) An debosyon gikan sa puso; iyan pinupukaw kan pag-apresyar sa persona na napapanongdan kaiyan. An “diosnon na debosyon” hararom na paggalang ki Jehova mismo. Iyan nagpapahayag nin mamomoton na relasyon sa saiya huli sa pag-apresyar sa saiya asin sa saiyang mga dalan. Iyan nagpapahiro sato na mawoton na an gabos gumalang sa saiyang ngaran. Kaipuhan na kultibaron niato an “diosnon na debosyon” bilang pasohan o katuyohan sa satong buhay tanganing kita maglakaw sa ngaran ni Jehova, an tunay na Dios, sagkod lamang.—Sal. 37:4; 2 Ped. 3:11.
Pagrerepaso
● Anong klaseng persona si Jehova? Paano kita nakikinabang sa pagkaigwa nin malinaw na pakasabot sa lambang saro sa saiyang mga kuwalidad?
● Paano niato matatabangan an ibang tawo na manodan an katotoohan manongod sa Dios?
● Ano an kalabot sa ‘pakamidbid’ ki Jehova asin ‘paglakaw sa saiyang ngaran’?
[Mga Hapot Para sa Pag-adal]
