Kapitulo 22

Padagos na Itaram an Tataramon nin Dios na May Kapusoan

1. (a) Anong maogmang bareta an ibinalangibog kan mga disipulo ni Jesus poon kan Pentecostes nin 33 C.E., alagad ano an reaksion kan mga namomoon asin kamagurangan na lalaki kan mga Judio? (b) Ano an puwede niatong ihapot sa satong sadiri manongod digdi?

 AN PINAKAMAHALAGANG mga pangyayari sa labing 4,000 na taon nin kasaysayan nin tawo nangyari na. An Aki nin Dios, si Jesu-Cristo, linahidan bilang an magigin Hade sa bilog na daga. Sa ibong kan paggadan ki Jesus sa sutsot nin relihiyosong mga kaiwal, binuhay ni Jehova an saiyang Aki sa mga gadan. Paagi sa saiya an kaligtasan nagin posible na may paglaom sa buhay na daing katapusan. Alagad kan ibalangibog sa publiko kan maimbod na mga disipulo ni Jesus an maogmang baretang ini, nangyari an maisog na pagtumang. Enot, an duwa sa mga apostol ibinilanggo, dangan sinda gabos. Sinda pinagpakol asin pinagbotan na pumondo sa pagtaram sa ngaran ni Jesus. (Gibo 4:1-3, 17; 5:17, 18, 40) Ano an maninigo nindang gibohon? Ano an gigibohon nindo? Kamo daw padagos na magpapatotoo na may kapusoan?

2. (a) Ano an mas makangangalas na bareta na kaipuhan na ibalangibog sa satong aldaw? (b) Siisay an may paninimbagan na gibohon iyan?

² Kan taon 1914 C.E. nangyari an mas makangangalas pang pangyayari na mahalaga sa bilog na uniberso. An Kahadean nin Dios sa kamot ni Jesu-Cristo aktuwal na tinindog sa langit. Sumunod, si Satanas asin an saiyang mga demonyo ihinolog sa daga. (Kap. 12:1-5, 7-12) Nagpoon na an huring mga aldaw kan presenteng maraot na palakaw. Bago maubos na magadan an kapag-arakian na  nakaheling sa mga pangyayari kan 1914, roronoton nin Dios an bilog na palakaw nin mga bagay ni Satanas. (Mat. 24:34) An mga makaliligtas magkakaigwa kan paglaom na buhay na daing sagkod. Bilang kaotoban kan orihinal na katuyohan nin Dios, an bilog na daga magigin Paraiso. Kun inako na nindo an maogmang baretang ini, may paninimbagan kamo na itao iyan sa iba. (Mat. 24:14) Alagad anong reaksion an malalaoman nindo?

3. (a) Ano an reaksion nin mga tawo sa mensahe kan Kahadean? (b) Kaya, anong hapot an kaipuhan na atubangon niato?

³ Minsan an iba tibaad maogmang umako sa saindo bilang parabalangibog kan Kahadean, an kadaklan magigin indiperente. (Mat. 24:37-39) An iba tibaad tuyaon o mapait na tumangon kamo. Si Jesus nagpatanid na an ibang pagtumang tibaad gumikan sa saindo mismong mga paryentes. (Luc. 21:16-19) Tibaad iyan manompongan man sa saindong pinagtatrabawohan o sa eskuwelahan. Sa dakol na parte kan daga an mga Saksi ni Jehova nasa irarom pa ngani nin bakong rasonableng pagprohibir kan gobyerno. Kun napapaatubang sa arin man o sa gabos na kamugtakan na ini, kamo daw magpapadagos na itaram an Tataramon nin Dios na may kapusoan?

4. An personal na determinasyon daw garantiya na kita magpapadagos na maglingkod sa Dios na may kaimbodan?

⁴ Daing duwa-duwa, boot nindong magin mapusong lingkod nin Dios. Pero an iba na naghona na mayo nin ano man na makakapatalikod sa sainda dai na kabilang sa mga parabalangibog kan Kahadean. Kabaliktaran, an iba, kaiba an mga garo baga masosopgon, nagpapadagos na daing ontok sa pagigin mahigos na mga lingkod nin Dios. Paano nindo mapatutunayan na kamo naninindogan nin “marigon sa pagtubod”?—1 Cor. 16:13.

Dai Nagsasarig sa Sadiri Niatong Kosog

5. (a) Tanganing patunayan na kita maimbod na mga lingkod nin Dios, ano an pundamental na kahagadan? (b) Taano ta napakahalaga kan mga pagtiripon?

⁵ Siyempre kadakol kan mga bagay na kalabot sa pagigin maimbod na lingkod nin Dios. Alagad an pundamental sa gabos na ini iyo an pagsarig ki Jehova asin sa  saiyang mga probisyon. Paano niato ipinaheheling an siring na pagsarig? An sarong paagi iyo an pag-atender sa mga pagtiripon kan kongregasyon. Sinasadol kita kan Kasuratan na dai iyan pagpabayaan. (Heb. 10:23-25) An mga nagpadagos na maimbod na mga saksi ni Jehova, baga man sa atubang nin pagkaindiperente kan publiko o nin paglamag, naghingoa na magin regular sa pag-atender sa mga pagtiripon kaiba nin mga kapagtubod. Sa mga pagtiripon na ini nadudugangan an satong kaaraman sa Kasuratan, alagad bako sanang pagkawili sa bagong mga bagay an nakaaakit sato. (Ikomparar an Gibo 17:21.) An pagpahalaga niato sa aram nang mga katotoohan nag-oorog, asin nadudugangan an pakaaram niato sa mga paagi na iyan magamit. An halimbawa na itinao sato ni Jesus nakatatanom na gayo sa satong isip asin puso. (Efe. 4:20-24) Kita ikinararani sa satong Kristianong mga tugang sa sararong pagsamba asin kita personal na napakokosog na padagos na otobon an kabotan nin Dios. An espiritu ni Jehova nagtatao nin paggiya paagi sa kongregasyon, asin paagi sa espiritung iyan si Jesus nasa tahaw niato kun kita nagtitiripon sa ngaran nia.—Kap. 3:6; Mat. 18:20.

6. Kun prohibido an mga Saksi ni Jehova, ano an ginigibo sa mga pagtiripon?

⁶ Kamo daw regular na nag-aatender sa gabos na pagtiripon asin personal daw nindong iinaaplikar an saindong nadadangog? Kun beses, kun nasa irarom nin pagprohibir, kinaipuhan na gibohon an pagtiripon sa saradit na grupo sa pribadong mga harong. Tibaad liwatliwaton an mga lugar asin oras asin tibaad iyan bakong perming kombenyente, na an ibang pagtiripon sa matangang banggi. Pero, sa ibong nin personal na kadepisilan o peligro, an maimbod na mga tugang na lalaki asin babae naghihingoa nanggad na magin presente sa kada pagtiripon.

7. (a) Paano pa niato ipinaheheling an satong pagsarig ki Jehova? (b) Paano ini makatatabang sato na padagos na magtaram na may kapusoan?

⁷ An pagsarig ki Jehova ikinakapaheling man paagi sa  regular na pagdolok sa saiya sa pamibi—bakong pormal sanang rutina, kundi may odok sa pusong pakarealisar na kaipuhan niato an tabang nin Dios. Ginigibo daw nindo iyan? Si Jesus paorootrong namibi kaidtong saiyang ministeryo digdi sa daga. (Luc. 3:21; 6:12, 13; 9:18, 28; 11:1; 22:39-44) Asin kan banggi bago sia ipako sinadol nia an saiyang mga disipulo: “Magpuka kamo asin mamibi, tangani kamong dai maholog sa sugot.” (Mar. 14:38) Kun napapaatubang kita sa grabeng pagkaindiperente sa mensahe kan Kahadean, tibaad masugotan kita na lumuya sa satong ministeryo. Kun pinagtutuya kita nin mga tawo o kun may mas grabeng paglamag, tibaad masugotan kita na dai na maggirong tanganing malikayan iyan. Alagad kun odok niatong aarangon an espiritu nin Dios na tabangan kitang padagos na magtaram na may kapusoan, maiingatan kita tumang sa pagkaholog sa sugot na iyan.—Luc. 11:13; Efe. 6:18-20.

Rekord nin Mapusong Pagpapatotoo

8. (a) Taano ta may espesyal na interes sa sato an rekord sa Mga Gibo? (b) Simbagon an mga hapot sa poro kan parapong ini, na idinodoon kun paano kita makikinabang sa impormasyon.

⁸ An rekord na yaon sa librong Mga Gibo may espesyal na interes para sa sato gabos. Iyan nagsasaysay kun paano an mga apostol asin iba pang enot na mga disipulo, mga tawo na kapareho man niato an pagmate, napangganahan an mga kaolangan asin nagin mapuso saka maimbod na mga saksi ni Jehova. Siyasaton niato an sarong kabtang kan rekord na iyan sa tabang kan minasunod na mga hapot asin sitadong mga teksto. Mantang ginigibo iyan, horophoropon kun paano kamo personal na makikinabang sa binabasa nindo.

 Halangkaw daw an inadalan kan mga apostol? Sinda daw mga tawo na sa naturalesa daing takot, ano man an mangyari? (Gibo 4:13; Juan 18:17, 25-27; 20:19)

 Ano an nagpangyari ki Pedro na mapusong magtaram sa atubangan kan Judiong hokoman na nagkondenar sa mismong Aki nin Dios pira pa sanang semana an nakaagi? (Gibo 4:8; Mat. 10:19, 20)

  Ano an ginigibo kan mga apostol kaidtong mga semana bago sinda iatubang sa Sanhedrin? (Gibo 1:14; 2:1, 42)

 Kan pagbotan sinda kan mga namomoon na pumondo sa paghuhulit basado sa ngaran ni Jesus, ano an isinimbag ni Pedro asin Juan? (Gibo 4:19, 20)

 Kan butasan na sinda, kiisay giraray sinda nagdolok para sa tabang? Nakimaherak daw sinda sa saiya na pondohon an paglamag, o ano? (Gibo 4:24-31)

 Paagi sa ano na si Jehova nagtao nin tabang kan probaran nin mga nagtutumang na papondohon an paghuhulit? (Gibo 5:17-20, 33-40)

 Paano ipinaheling kan mga apostol na nasabotan ninda an dahelan na sinda ilinigtas? (Gibo 5:21, 41, 42)

 Dawa kan an dakol sa mga disipulo nagkasuruhaysuhay huli sa grabeng paglamag, ano an padagos nindang ginibo? (Gibo 8:3, 4; 11:19-21)

9. (a) Anong makaoogmang mga resulta an ibinunga kan ministeryo kan enot na mga disipulong idto? (b) Paano kita napapalabot?

⁹ Bakong basang an saindang ginibo may koneksion sa maogmang bareta. Mga 3,000 na disipulo an nabautismohan kan Pentecostes nin 33 C.E. “An mga nagturubod sa Kagurangnan padagos na nakakadagdag, mga kadaklan nin mga lalaki asin babae.” (Gibo 2:41; 4:4; 5:14) Pag-abot nin panahon nabareta na minsan an saro sa pinakadesididong paralamag, si Saulo na taga-Tarso, nagin nang Kristiano asin mapuso naman na nagpapatotoo sa katotoohan. Namidbid sia na apostol Pablo. (Gal. 1:22-24) Dai napondo an gibohon na nagpoon kan enot na siglo. Iyan nagkokosog sa “huring mga aldaw” na ini asin nakaabot sa gabos na kabtang kan daga. May pribilehiyo kita na makikabtang dian, asin sa paggibo kaiyan makakanood kita sa halimbawang itinao kan maimbod na mga saksi na naenot na naglingkod sato.

10. (a) Anong mga oportunidad an ginamit ni Pablo tanganing makapagpatotoo? (b) Sa anong mga paagi nindo dinadara sa iba an mensahe kan Kahadean?

¹⁰ Kan si Pablo makanood sa katotoohan manongod ki  Jesu-Cristo, dai sia nagpadirodigson. “Tolos man . . . ipinaghulit nia si Jesus, na an Sarong ini iyo an Aki nin Dios.” (Gibo 9:20) Inapresyar nia an dai na kutana maninigong kabootan nin Dios sa saiya asin aram nia na an gabos nagkakaipo sa maogmang bareta na inako nia. Sono sa kaugalean kaidto, mantang sia Judio sia nagduman sa mga sinagoga, na Judiong mga lugar nin panpublikong katiriponan, tanganing magpatotoo. Sia naghulit man sa harong-harong asin nakipangatanosan sa mga tawo sa sadan. Asin andam siang magduman sa bagong mga teritoryo tanganing magbalangibog kan maogmang bareta.—Gibo 17:17; 20:20; Roma 15:23, 24.

11. (a) Paano ipinaheling ni Pablo na, minsan ngani sia mapuso, sia mapagmansay man sa paagi nin saiyang pagpatotoo? (b) Paano daw niato ikakapaheling an kuwalidad na iyan kun nagpapatotoo sa mga paryentes, katrabaho o kaklase?

¹¹ Si Pablo mapuso, pero mapagmansay man, siring sa maninigo sato. Sa mga Judio sia nangombensir basado sa mga panuga nin Dios sa saindang mga apoon. Sa mga Griego sia nagtaram basado sa mga bagay na pamilyar sa sainda. Kun beses ginagamit nia an mismong eksperyensia nia sa pakanood kan katotoohan bilang paagi na makapagpatotoo. Arog kan paliwanag nia: “Ginigibo ko an gabos na bagay para sa kapakanan kan maogmang bareta, tanganing ikahiras ko iyan sa iba.”—1 Cor. 9:20-23; Gibo 22:3-21.

12. (a) Minsan ngani mapuso, ano an ginibo ni Pablo tanganing malikayan an daing ontok na pakipaghampangan sa mga nagtutumang? (b) Noarin niato madonong na maaarog an halimbawang iyan, asin paano? (c) Saen naggigikan an kosog tanganing makapagpadagos na magtaram na may kapusoan?

¹² Kun huli sa pagtumang sa maogmang bareta garo baga pinakamarahay na maghulit sa ibang lugar o bumalyo sa ibang teritoryo sa kadikit na panahon, ginibo ini ni Pablo imbes na ipirit an daing ontok na pakipaghampangan sa mga kaiwal kan katotoohan. (Gibo 14:5-7; 18:5-7; Roma 12:18) Pero noarin man dai nia ikinasopog an maogmang bareta. (Roma 1:16) Minsan  ngani dai ikinaogma ni Pablo an bastos, madahas pa nganing, tratamiento nin mga nagtutumang, sia “nagmapuso nin huli sa samong Dios” tanganing makapagpadagos sa paghuhulit. Sa ibong kan nagin masakit na mga kamugtakan nia, sia nagsabi: “Sinorog ako kan Kagurangnan asin pinakosog ako, tanganing paagi sako an paghuhulit lubos na ikasagibo.” (1 Tes. 2:2; 2 Tim. 4:17) An payo kan Kristianong kongregasyon, an Kagurangnan na Jesus, padagos na nagtatao kan kosog na kaipuhan tanganing maotob an gibohon na ihinula nia para sa satong aldaw.—Mar. 13:10.

13. Ano an nagtatao nin ebidensia sa Kristianong kapusoan, asin ano an basihan kaiyan?

¹³ Nasa sato an gabos na dahelan na padagos na itaram nin may kapusoan an Tataramon nin Dios, arog kan ginibo ni Jesu-Cristo asin kan iba pang maimbod na mga lingkod nin Dios kan enot na siglo. Ini dai nangangahulogan nin pagigin maisog o mapan-angat sa satong hiro. Dai kaipuhan na magin daing konsiderasyon o ipirit an mensahe sa mga habo kaiyan. Pero kita dai minasuko huli ta indiperente an mga tawo, ni napapatakot man kita nin pagtumang na dai na maggirong. Kapareho ni Jesus, itinotokdo niato an Kahadean nin Dios bilang an may diretsong gobyerno sa bilog na daga. Kita nagtataram na may kompiansa ta kita nagrerepresentar ki Jehova, an Unibersal na Soberano, asin an mensaheng ibinabalangibog niato bakong gikan sa sato kundi sa saiya.—Fil. 1:27, 28; 1 Tes. 2:13.

Pagrerepaso

● Taano ta mahalaga na darahon an mensahe kan Kahadean sa gabos na mapupuwede? Alagad anong mga reaksion an lalaoman niato?

● Paano niato ikakapaheling na dai kita nagsasarig sa sadiri niatong kosog sa paglilingkod ki Jehova?

● Anong mahahalagang leksion an manonodan niato sa librong Mga Gibo?

[Mga Hapot Para sa Pag-adal]