Kapitulo 1

Pagkasararo sa Pagsamba—Ano an Maninigong Magin Kahulogan Kaiyan Para sa Saindo?

1, 2. (a) Basado sa ano na an tunay na pagkasararo sa pagsamba nangyayari sa satong kaaldawan? (b) Paano ilinaladawan kan Biblia an nangyayari?

 SA BILOG na kinaban igwa nin nakaoogmang mobimiento pasiring sa pagkasararo sa pagsamba. Pinagsasararo kaiyan an mga tawo hale sa gabos na nasyon asin tribo patin mga tataramon. An saindang pagkasararo bakong bunga nin ano man na pagkompromiso sa paniniwala. Iyan dai nagigibo paagi sa dai ninda pagtatsar sa pamumuhay na kontra sa Tataramon nin Dios. Kun siring ano an dahelan kaiyan? An bagay na an mga tawo hale sa gabos na pinaghalean nakakamidbid ki Jehova bilang an iyo sanang tunay na Dios asin andam na ioyon an saindang pamumuhay sa saiyang matanos na mga dalan.—Ikomparar an Kapahayagan 15:3, 4.

² Ini kaotoban sa sarong hula na isinurat ni propeta Miqueas mga 2,700 na taon na an nakaagi. Mapadapit sa “huring kabtang kan mga aldaw,” sia nagsurat: “Dakol na nasyon an maduruman asin masarabi: ‘Madia kamo, banwaan, asin magturukad kita sa bukid ni Jehova asin sa harong kan Dios ni Jacob; asin totokdoan nia kita mapadapit sa saiyang mga dalan, asin magraralakaw kita sa saiyang mga dana.’” (Miq. 4:1, 2) * Naheheling daw nindong nangyayari iyan?

3, 4. (a) Paano totoo na an “mga nasyon” minadolok ki Jehova? (b) Anong mga hapot an maninigo niatong ihapot sa sadiri?

³ Mayo nin bilog na mga “nasyon” na nagpepresentar  sa espirituwal na harong ni Jehova para sa pagsamba. Alagad ta an mga indibiduwal hale sa mga nasyon na ini naggigibo kaiyan. Sa saindang pakanood manongod sa mamomoton na katuyohan asin nakakaakit na personalidad ni Jehova Dios, napapahirong gayo an saindang puso. Mapakumbaba na pinagmamaigotan nindang aramon kun ano an hinahagad sa sainda nin Dios. An saindang pamibi kapareho kan ki David, sarong tawong may pagtubod na nagsabi: “Tokdoan mo ako na gibohon an saimong kabotan, huli ta ika an sakong Dios.”—Sal. 143:10.

⁴ Naheheling daw nindo an saindong sadiri na kabilang sa dakulang kadaklan na iyan nin mga parasamba ki Jehova? An saindo daw na reaksion sa instruksion na inaako nagpapaheling na kamo biyong nakakasabot na si Jehova an ginikanan kaiyan? Gurano an saindong ‘paglakaw sa saiyang mga dana’?

Kun Paano Iyan Nahihimo

5. (a) Sa katapustapusi gurano kahiwas na pagkasararo sa pagsamba an mangyayari? (b) Taano ta napakahalaga na magin parasamba ki Jehova ngonyan, asin paano niato matatabangan an iba na magibo ini?

⁵ An katuyohan ni Jehova iyo na an gabos na intelihenteng linalang magkasararo sa pagsamba—mayo ni saro na nadadaya nin kaputikan, mayo ni saro na nagkakapkap huli sa dai pakanompong sa tunay na kahulogan kan buhay. Kanigoan an paghalat niato sa aldaw na iyan na an gabos na nabubuhay mag-oomaw sa iyo sanang tunay na Dios! (Sal. 103:19-22) Alagad bago iyan mangyari, kaipuhan na linigan ni Jehova an saiyang mga linalang kan mga nagsisikwal sa saiyang mamomoton na paghade asin nag-iinsistir na raoton an buhay nin iba. Huli sa pagkaherak sia nagtatao nin patienot na paisi kan saiyang gigibohon. An mga tawo sa gabos na lugar may oportunidad na magbakle. Kaya sa sato mismong aldaw an apretadong pakimaherak na ini itinatao sa bilog na kinaban: “Matakot sa Dios asin pamurawayon sia, huli ta nag-abot na an oras kan saiyang paghokom, asin kaya sambahon an Saro na naglalang kan langit asin daga asin dagat asin mga burabod  nin tubig.” (Kap. 14:6, 7) Inako na daw nindo an pangagdang iyan? Kun iyo, pribilehiyo na nindo ngonyan na makipagtabangan sa organisasyon ni Jehova tanganing tumabang man sa iba na makagibo kaini.

6. Pakatapos na manodan an pundamental na mga katokdoan kan Biblia, ano pang dugang na pag-oswag an maninigo niatong odok na pagmaigotan?

⁶ Bakong katuyohan nin Dios na ilaog sa saiyang organisasyon an mga tawo na nagsasabi sanang nagtutubod sinda ki Jehova asin boot nindang mabuhay sa Paraiso alagad kadungan kaiyan padagos na ginigibo an saindang sadiring paslong mga interes. Boot nia na an mga tawo makaabot sa “tamang kaaraman manongod sa saiyang kabotan,” asin ini maninigong marisa sa saindang buhay. (Col. 1:9, 10) Pakatapos na makanood an may pag-apresyar na mga tawo kan pundamental na mga katokdoan kan Biblia, boot ninda na magpadagos sa Kristianong pagkamaygurang. An saindang kamawotan orog na mamidbid si Jehova, pahiwason asin pararomon an saindang pagsabot sa saiyang Tataramon, asin orog na iaplikar iyan sa saindang buhay. Naghihingoa sindang makaagid sa saindang langitnon na Ama, na ipinaheheling an saiyang mga kuwalidad asin igwa nin kaparehong pagmansay sa saiya. Ini nagpapahiro sainda na humanap nin paagi na makapakikabtang sa pinakalubos na mapupuwede sa gibohon na ipinagigibo nia sa daga sa satong aldaw. Iyan daw an ginigibo nindo?—Efe. 5:1; Heb. 5:12–6:3; 1 Tim. 4:15.

7. Sa anong mga paagi posible ngonyan an tunay na pagkasararo, asin paano iyan nahihimo?

⁷ Ipinaheheling kan Biblia na an mga naglilingkod ki Jehova magigin nagkakasararong banwaan. (Efe. 4:1-3) An pagkasararong ini mag-eeksister na ngonyan, dawa ngani kita nabubuhay sa barangang kinaban asin nakikipaglaban pa sa satong sadiring mga pagkabakong sangkap. Si Jesus odok na namibi na an saiyang mga disipulo magin logod saro, na may tunay na pagkasararo. Ano an magigin kahulogan kaini? Na enot sa gabos sinda magkaigwa nin marahay na relasyon ki Jehova asin sa saiyang Aki. Siring man na sinda magkasararo sa lambang saro. (Juan 17:20, 21)  Ini nahihimo na mantang saindang ginigibo an instruksion na inaako sa “harong” ni Jehova.

Anong mga Bagay an Nakakokontribuwir sa Pagkasararo?

8. (a) Ano an napapatalubo niato kun personal niatong ginagamit an Biblia sa pangangatanosan sa mga simbag sa mga hapot na nakakaapektar sa sato? (b) Sa pagsimbag sa mga hapot na nasa itaas, analisaron an mga bagay na nakakokontribuwir sa Kristianong pagkasararo.

⁸ An nagkapira sa pangenot na mga bagay na nakakokontribuwir sa pagkasararong ini sinarosaro sa ibaba. Sa pagsimbag nindo sa mga hapot na kasunod kaiyan, horophoropon kun paano an lambang saro makakaapektar sa saindong relasyon ki Jehova asin sa kapwa mga Kristiano. An pangangatanosan sa mga puntong ini sa liwanag kan mga tekstong sitado makontribuwir sa saindong pakapagpatalubo nin maka-Dios na kaisipan asin pagmansay, mga kuwalidad na kaipuhan niato gabos. (Tal. 5:1, 2; Fil. 1:9-11) Kaya konsideraron an mga bagay na ini nin saro-saro:

 (1) Kita gabos nagsasamba ki Jehova asin minimidbid an saiyang diretso na magbugtak kan pamantayan kun ano an marahay asin maraot.

 Ano an magigin punto-de-vista ni Jehova kun tuyo niatong dai iintindihon an saiyang hatol sa bagay na garo baga sadit para sa sato? (Luc. 16:10; ikomparar an Malaquias 1:6-8.)

 Apektado daw an iba kun dai niato perming kukuyogon an mga pagboot ni Jehova? (Ikomparar an Roma 5:12; Josue 7:20-26; 1 Hade 14:16.)

 (2) Saen man kita sa kinaban, nasa sato an Tataramon nin Dios na magiya sa sato.

 Kun kita nagdedesisyon, ano an peligro sa paggibo kan “pinaghohona” niatong tama? (Jer. 17:9; Tal 14:12)

 Kun dai niato aram kun ano an hatol kan Biblia dapit sa sarong bagay, ano an maninigo niatong gibohon? (Tal. 2:3-5)

 (3) Kita gabos nakikinabang sa saro sanang espirituwal na programa sa pagpakakan.

 Ano an mga kamugtakan kan mga dai nagpapahalaga sa  mga areglo ni Jehova para sa espirituwal na pagpakakan? (Ikomparar an Isaias 1:3; 9:16; 65:14.)

 (4) Si Jesu-Cristo, asin bakong tawo, an satong Namomoon asin an saro na paagi sa saiya kita gabos minadolok ki Jehova sa pagsamba.

 An siisay man daw sa sato igwa nin balidong dahelan na magtubod na bilang mga tawo kita mas halangkaw kisa iba? (Roma 3:23, 24; 12:3; Mat. 23:8-10)

 (5) Saen man kita nag-iistar, kita naglalaom sa Kahadean nin Dios bilang an solamenteng paglaom para sa katawohan.

 Paano kita kaini iniingatan tumang sa nakakapabangang mga impluwensia? (Mat. 6:9, 10; Miq. 4:3)

 (6) An banal na espiritu nagpapaluwas sa mga parasamba ki Jehova nin mga kuwalidad na mahalaga sa Kristianong pagkasararo.

 Paano niato binubukasan an dalan para sa espiritu nin Dios tanganing iyan magbunga sa sato? (Sal. 1:2; Tal. 22:4; Kap. 3:6; Gibo 5:32)

 Paano nakakaimpluwensia an pagkaigwa niato kan mga bunga kan espiritu sa satong relasyon ki Jehova? Sa satong mga tugang? (Gal. 5:22, 23)

 (7) Kita gabos may paninimbagan na maghulit kan maogmang bareta kan Kahadean nin Dios.

 Paano an satong pagigin sibot sa pakikikabtang sa gibong paghuhulit na ini kaiba kan mga kapwa Kristiano nakakaimpluwensia sa satong saboot manongod sa sainda? (Ikomparar an Colosas 4:7, 11.)

9. Ano an epekto kun talagang iaaplikar niato an mga katotoohan na ini sa satong buhay?

⁹ An pagmidbid sa mga bagay na ini sarong bagay. An pamumuhay kaoyon dian nagkakaipo nin orog pa. Alagad kun ginigibo niato iyan, kita napaparani ki Jehova. An satong pakikiasosyar sa mga kapagtubod nagigin man burabod nin kaginhawahan. Arog kan sabi kan Salmo 133:1: “Uya! Kanigoan karahay asin kanigoan kaogma na an magturugang mag-ontok na sararo!” Bako daw na kamo personal nang nakaeksperyensia kun gurano kasiram an makarayo sa kinaban, kaiba an gabos na  kapasloan kaiyan, asin magin presente sa pagtiripon kaiba nin iba na tunay na namomoot ki Jehova?

Likayan an Nakakabangang mga Impluwensia

10. Taano ta maninigo kitang magin maingat tanganing malikayan an independienteng espiritu?

¹⁰ Tanganing dai maraot an mahalagang pagkasararong iyan, kaipuhan na likayan an nakakabangang mga impluwensia. An saro sa pangenot digdi iyo an espiritu nin independensia. Tinatabangan kita ni Jehova na likayan iyan paagi sa pagbuyagyag kan ginigikanan kaiyan, si Satanas na Diablo. Sia an duminaya ki Eva na maghona na ikakarahay nia an pagbinongog sa isinabi nin Dios asin paggibo kan sadiri niang mga desisyon. Si Adan uminiba sa saiya sa pagrebeldeng iyan. An resulta kalamidad para sa sainda asin para sa sato. (Gen. 2:16, 17; 3:1-6, 17-19) Kita nabubuhay sa kinaban na tuok kan independienteng espiritung iyan, kaya dai kita maninigong mapangalas kun kaipuhan na pogolan niato an espiritung iyan sa satong sadiri mismo. Mamomoton na tinatabangan kita ni Jehova na magibo iyan paagi sa hatol sa saiyang organisasyon.

11. Ano an nagpaparisa kun baga kita odok na nag-aandam para sa buhay sa matanos na Bagong Areglo nin Dios?

¹¹ Paagi sa organisasyon na iyan naaraman niato an makangangalas na panuga ni Jehova na ribayan an presenteng kamugtakan nin bagong kalangitan asin bagong daga na dian “an katanosan an magdadanay.” (2 Ped. 3:13) Ikinaoogma niato an paglaom na sa dai na mahahaloy an maraot na kinaban na ini mawawara asin an daga magigin Paraiso. Alagad ipinaheheling daw kan satong pamumuhay na kita odok na nag-aandam para sa buhay sa kinaban na an magigin lakop na ugale katanosan? An Biblia malinaw na nagsasabi sa sato: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya.” (1 Juan 2:15) Totoo na kadakol kan mga bagay dapit sa kinaban na habo niato gabos. Alagad an hinahaboan daw niato iyo an mga bagay sa kinaban na nakakaolang  sa sato mismong kaogmahan sa buhay? O isinisikwal man daw niato an espiritu kaiyan—an independienteng kaisipan kaiyan, an sobrang pagmakolog kaiyan sa sadiri? Talaga daw na ginigibo niatong ugale na maghinanyog ki Jehova asin kumuyog sa saiya gikan sa puso, sa ibong nin ano man na kontrang tendensia kan laman? An satong bilog na pamumuhay—saen man kita, ano man an ginigibo niato—maninigong magtao nin patotoo na an satong kaisipan asin satong mga motibo maka-Dios.—Tal. 3:5, 6.

12. (a) Taano ta mahalaga na aprobetsaran an oportunidad ngonyan na manodan an mga dalan ni Jehova asin kuyugon iyan sa satong buhay? (b) Ano an kahulogan sa sato personalmente kan mga teksto na sinitar sa parapo?

¹² Kun an itinalaan na panahon ni Jehova sa paglaglag sa maraot na palakaw na ini nin mga bagay asin sa gabos na namomoot sa dalan kaiyan umabot na, dai sia mag-aatraso. Dai nia ididigson an panahon na iyan o liliwaton an saiyang pamantayan tanganing matawan nin lugar an mga nangangapot pa sa kinaban, an mga nag-uurong-sulong dapit sa pakanood sa kabotan nin Dios asin paggibo kaiyan. Ngonyan na an panahon na humiro! (Luc. 13:23, 24; 17:32; 21:34-36) Kaya nakaoogma nanggad na maheling an “dakulang kadaklan” nin mga tawo na nangangapot sa mahalagang oportunidad na ini, na odok na hinahanap an instruksion ni Jehova paagi sa saiyang mamomoton na organisasyon dangan sararong naglalakaw sa saiyang mga dana!

[Nota sa Ibaba]

Pagrerepaso

● Ano an katuyohan ni Jehova kun dapit sa pagsamba?

● Pakatapos na manodan an pundamental na mga katokdoan kan Biblia, ano pang dugang na pag-oswag an maninigo niatong odok na pagmaigotan?

● Ano an magigibo kan lambang saro sa sato, tanganing an nakakapagpasararong mga bagay na napag-olayan makaimpluwensia sa satong buhay nin siring sa maninigo?

[Mga Hapot Para sa Pag-adal]

 [Bilog na pahinang ritrato sa pahina 4]