Kapitulo 10

Sarong Kahadean “na Dai Malalaglag”

1, 2. (a) Anong bagay an idinodoon aroaldaw kan mga pangyayari sa kinaban, asin paano? (b) Ano an solamenteng solusyon?

 AN MGA pangyayari sa kinaban aroaldaw nagpapatotoo sa bagay na an mga tawo dai nakanompong nin kaogmahan sa pagsikwal sa soberaniya ni Jehova asin, imbes, pagprobar na pamahalaan an sadiri. Mayo nin palakaw nin gobyerno nin tawo na nakapagtao nin pantay-pantay na pakinabang sa katawohan. Minsan ngani napaoswag nin mga tawo an saindang sientipikong kaaraman sa daing kaagid na grado, dai ninda nahimong haleon an kasalan, daogon an helang asin tapuson an kagadanan, minsan para sa saro sana sa saindang mga sakop. Al kontraryo, an mga nasyon padagos na naggigibo nin bago asin mas makatatakot na mga armas. Naggagrabe an kriminal na kadahasan. An teknolohiya, kapasloan asin ignoransia nagtatarabang sa pagramog sa daga, tubig asin aire. An naglalangkaw na implasyon asin kadaihan nin trabaho ginigibong depisilon para sa dakol na makua an mga pangangaipo sa buhay. An mga tawo gustong-gustong makanompong nin solusyon.—Ecl. 8:9.

² Ano an solusyon? An Kahadean nin Dios, na itinokdo ni Jesus sa saiyang mga parasunod na ipamibi. (Mat. 6:9, 10) Kita nagpapasalamat na gayo na an kaginhawahan na dadarahon kaiyan haranihon na ngonyan!

3. (a) Mapadapit sa Kahadean na ini, ano an nangyari sa langit kan 1914 C.E.? (b) Taano ta mahalaga iyan para sa sato?

³ Poon kan 1914 C.E., an Kahadean nin Dios sa kamot ni Jesu-Cristo nagpupunsionar na. * Kan taon na idto an  mga pangyayari na naheling ni Daniel sa makahulang bisyon aktuwal na nangyari sa langit. An “Suanoy nin mga Aldaw,” si Jehova Dios, itinao sa Aki nin tawo, si Jesu-Cristo, an “paghade asin kamahalan patin kahadean, tanganing an mga banwaan, mga nasyon asin mga tataramon gabos maglingkod sa saiya.” Sa pagbareta manongod sa bisyon, si Daniel nagsurat: “An saiyang paghade sarong paghade na daing katapusan na dai mapapara, asin an saiyang kahadean saro na dai malalaglag.” (Dan. 7:13, 14) Paagi sa Kahadean na ini na papangyayarihon nin Dios an mga mamomoton sa katanosan na magkamit kan daing kabilangan na marahay na mga bagay na katuyohan nia kan ibugtak nia sa Paraiso an enot niatong mga magurang.

4. Kita interesadong gayo sa anong mga detalye manongod sa Kahadean, asin taano?

⁴ An maimbod na mga sakop kan Kahadean interesadong gayo sa estruktura asin pagpunsionar kan gobyernong ini. Boot nindang maaraman kun ano an ginigibo kaiyan ngonyan, kun ano an gigibohon kaiyan sa ngapit asin kun ano an hinahagad kaiyan sa sainda. Iyan sinisiyasat na gayo ninda, asin sa paggibo ninda kaiyan, an saindang pagpahalaga dian nagdadakula asin sinasangkapan ninda an saindang sadiri na isabi sa iba an manongod dian.—Sal. 48:12, 13.

Sarong Nakakapahiro sa Puso na Pagsiyasat

5. (a) Paano ipinaheheling kan Kasuratan kun kiisay na soberaniya an ipinahahayag paagi sa Mesiyanikong Kahadean? (b) Kaya paano kita naaapektaran kan nanonodan niato manongod sa Kahadean?

⁵ An saro sa enot na bagay na ipinaheheling kan siring na pagsiyasat iyo na an Mesiyanikong Kahadean na ini kapahayagan kan soberaniya mismo ni Jehova. Sia an nagtao kan “paghade asin kamahalan patin kahadean” sa saiyang Aki. Kaya, kan an Kahadean na ini nagpoon nang maghade, an mga tingog sa langit angay nanggad na nagpahayag: “An kahadean kan kinaban nagin nang kahadean kan satong Kagurangnan [si Jehova Dios] asin  kan saiyang Cristo, asin sia [si Jehova] maghahade sagkod lamang.” (Kap. 11:15) Kaya an gabos na namamasdan niato manongod sa Kahadean na ini asin sa nagigibo kaiyan irinarani kita nin orog ki Jehova mismo. Pinupukaw kaiyan sa sato an pagmawot na pumasakop sa saiyang soberaniya sagkod lamang.

6. Taano ta interesado kita sa bagay na si Jesu-Cristo iyo an katabang na hade ni Jehova?

⁶ Marahayon nanggad na ibinugtak ni Jehova sa trono si Jesu-Cristo bilang Saiyang katabang na hade! Bilang an Pangenot na Trabahador na ginamit nin Dios sa paggibo sa daga asin tawo, aram ni Jesus an satong mga pangangaipo nin orog ki sa aram kan siisay man sa sato. Dugang pa, ipinaheling nia poon pa sa kapinonan kan kasaysayan nin tawo an saiyang ‘pagkaogma sa mga aki nin mga tawo.’ (Tal. 8:30, 31; Col. 1:15-17) Dakulaon an pagkamoot na iyan na sia personal na nagdigdi sa daga asin itinao an saiyang buhay bilang pantubos sa sainda. Sa siring itinao nia sa sato an paagi na makalda sa kasalan asin kagadanan, asin an oportunidad para sa buhay na daing sagkod.—Mat. 20:28.

7. (a) Bakong arog nin paghade nin siisay man na tawo, taano ta magdadanay an gobyernong ini? (b) Ano an relasyon kan “maimbod asin madonong na oripon” sa langitnon na gobyerno?

⁷ Ini marigon, nagdadanay na gobyerno. An pagigin nagdadanay kaiyan iginagarantiya kan bagay na si Jehova mismo daing kagadanan. (Hab. 1:12; Sal. 146:3-5, 10) Bakong arog nin mga hadeng tawo, si Jesu-Cristo, an saro na tinawan nin Dios kan pagkahade, inmortal man. (Roma 6:9; 1 Tim. 6:15, 16) Makakaibanan ni Cristo sa langitnon na mga trono an 144,000 na iba pa, maimbod na mga lingkod nin Dios na kinua sa “lambang tribo asin tataramon asin banwaan patin nasyon.” An mga ini man tatawan nin inmortal na buhay. (Kap. 5:9, 10; 1 Cor. 15:42-44, 53) An mayoriya sa sainda yaon na sa kalangitan, asin an natatada sa sainda na nasa daga pa minakompuwesto sa grupong “maimbod asin madonong na oripon,” na maimbod na nagpapaoswag sa mga intereses kan Kahadean na iyan digdi.—Mat. 24:45-47.

8, 9. (a) Anong nakakapabanga, nakakaraot na mga impluwensia an hahaleon kan Kahadean? (b) Kaya, tanganing malikayan niato an pagigin mga kaiwal kan Kahadean nin Dios, sa anong mga organisasyon asin aktibidad kita maglilikay na mapalabot?

⁸  Dai na mahahaloy, sa itinalaan na panahon ni Jehova, an saiyang mga hukbo sa pagkastigo mahiro tanganing linigan an daga. Lalaglagon ninda sagkod lamang an mga tawo na huli sa saindang sadiring kagustohan dai nakakamidbid sa Dios, na habong midbidon an saiyang soberaniya, asin binabasangbasang an mamomoton na mga probisyon na ginigibo nia paagi ki Jesu-Cristo. (2 Tes. 1:6-9) Ini an aldaw ni Jehova, an haloy nang hinahalat na panahon para sa saiyang pagkabindikar bilang Unibersal na Soberano.

⁹ An gabos na falsong relihiyon, patin an gabos na gobyerno nin tawo asin an saindang mga hukbo, na kontrolado kan dai naheheling na maraot na poon kan kinaban na ini, paparaon sagkod lamang. An gabos na ipinamimidbid an sadiri na kabtang kan kinaban na ini paagi sa paslo, madaya, inmoral na pamumuhay popohoon sa kagadanan. Si Satanas asin an saiyang mga demonyo irarayo sa mga nag-eerok sa daga, na ibibilanggo sa laog nin sangribong taon. Kanigoan na kaginhawahan ini para sa gabos na namomoot sa katanosan!—Kap. 18:21, 24; 19:11-16, 19-21; 20:1, 2.

An mga Katuyohan Kaiyan—Kun Paano Maootob

10. (a) Paano ootobon kan Mesiyanikong Kahadean an katuyohan ni Jehova para sa daga mismo? (b) Ano an magigin kahulogan kaini para sa mga tawo na nabubuhay sa daga sa panahon na iyan?

¹⁰ Biyong maootob kan Mesiyanikong Kahadean na ini an orihinal na katuyohan nin Dios para sa daga. (Gen. 2:8, 9, 15; 1:28) Sagkod sa aldaw na ini, dai naootob nin tawo an katuyohan na iyan. Minsan siring, “an ineerokan na daga na maabot” ipinasakop sa Aki nin tawo, si Jesu-Cristo. An gabos na makaliligtas sa paghokom ni Jehova sa daan na palakaw na ini sararong magtatrabaho na sakop ni Cristo bilang Hade, na maogmang ginigibo an  ano man na ipinagboboot nia tanganing an daga magin panglobong Paraiso. (Heb. 2:5-9) An bilog na katawohan maoogma sa gibo kan saindang mga kamot asin lubos na makikinabang sa abundansia kan mga bunga kan daga.—Sal. 72:1, 7, 8, 16-19; ikomparar an Isaias 65:21, 22.

11. (a) Paano papangyayarihon an pagkasangkap sa isip asin lawas para sa mga sakop kan Kahadean? (b) Ano an kabale digdi?

¹¹ Kan lalangon si Adan asin Eva sinda sangkap, asin katuyohan nin Dios na an daga mapano kan saindang mga aki, na sinda gabos may pagkasangkap sa isip asin hawak. Sa pagsakop kan Kahadean, an katuyohan na iyan magkakaigwa nin mamuraway na kaotoban. Hinahagad kaini an paghale sa gabos na epekto nin kasalan, asin sa katuyohan na iyan si Cristo maglilingkod bako sanang bilang Hade kundi siring man bilang Halangkaw na Saserdote. Mapasensia na tatabangan nia an saiyang makinuyog na mga sakop na makinabang sa nakatutubos sa kasalan na halaga kan atang kan saiya mismong buhay bilang tawo. An mga buta magkakaburuklat. An mga bongog na talinga mabubukasan. An kublit na naraot nin kagurangan o helang magigin mas hoben pa ki sa aki. An dai nahahaleng mga kaluyahan masasalidahan nin mabagsik na salud. Maabot an aldaw na mayo nin siisay man na may dahelan na magsabi, “Naghehelang ako,” huli ta an matatakton sa Dios na mga tawo makakalda na sa kasalan asin sa makamomondong mga epekto kaiyan.—Ikomparar an Isaias 33:22, 24; 35:5, 6; Job 33:25; Lucas 13:11-13.

12. (a) Ano pa an hinahagad kan pagkasangkap nin tawo? (b) Paano iyan magigibo, asin ano an ibubunga kaiyan?

¹² Alagad an pakaabot sa pagkasangkap bako sanang pagkaigwa nin marahay na lawas asin marahay na isip an napapalabot. Kabale dian an tamang pagpaheling kan mga kuwalidad kan personalidad ni Jehova, huli ta an tawo ginibo ‘sa ladawan nin Dios, siring sa saiyang kaagid.’ (Gen. 1:26) Sa katuyohan na iyan, kakaipuhanon an dakulang pagtotokdo. Ini Bagong Areglo na dian “an katanosan an magdadanay,” kaya, arog kan ihinula ni  propeta Isaias, “an katanosan iyo an manonodan kan mga nag-eerok sa mabungang daga.” (2 Ped. 3:13; Isa. 26:9) An kuwalidad na ini nagbubunga nin katoninongan—sa pag-oltanan nin mga tawo hale sa gabos na nasyon, sa tahaw nin dayupot na magkakairiba, sa sadiring pamilya asin, orog sa gabos, sa Dios mismo. (Isa. 32:17; Sal. 85:10-13) An mga makakanood nin katanosan progresibong totokdoan sa kabotan nin Dios para sa sainda. Mantang an pagkamoot sa mga dalan ni Jehova hararom na nakagagamot sa saindang puso, ini kukuyogon ninda sa gabos na kabtang kan saindang buhay. An sangkap na tawong si Jesus nakapagsabi, ‘Danay kong ginigibo an mga bagay na nakakapaogma sa sakong Ama.’ (Juan 8:29) Kanigoan kaogma nanggad kan buhay kun iyan totoo na sa gabos na tawo!

Mga Nagibo na Naheheling Na

13. Gamiton an mga hapot sa itaas tanganing idoon an mga nagibo na kan Kahadean asin an maninigo niatong gibohon.

¹³ Maliwanag na naheheling na nin mga tawo na may mga mata nin pagtubod an makangangalas na mga nagibo kan Kahadean. An minasunod na mga hapot asin teksto sa Kasuratan magpapagirumdom sa saindo kan nagkapira sa mga ini, saka kan mga bagay na puwede asin maninigong gibohon ngonyan nin gabos na sakop kan Kahadean:

 Tumang kiisay na enot na naghiro an Hade, asin may anong resulta? (Kap. 12:7-10, 12)

 An pagtipon sa huring mga miembro nin anong grupo an tinawan tolos nin atension pakatukaw ni Cristo sa trono? (Mat. 24:31; Kap. 7:1-4)

 Sa Mateo 25:31-33, anong ibang gibohon an ihinula ni Jesus na gigibohon nia pakatukaw nia sa trono asin bago laglagon an mga maraot?

 Paano ginigibo an gibohon na ini? Siisay an nakikikabtang dian? (Mat. 24:14; Sal. 110:3; Kap. 14:6, 7)

 Taano ta dai iyan napaontok nin politikal asin relihiyosong mga paratumang? (Gibo 5:38, 39; Zac. 4:6)

  Bilang resulta kan pagtotokdo na ginigibo, anong mga pagbakle an nangyari na sa buhay nin mga tawo na nagpapasakop sa Kahadean? (Isa. 2:4; 1 Cor. 6:9-11)

Pagigin Nagdadanay kan Kahadean

14. (a) Gurano kalawig na maghahade si Cristo? (b) Ano an magigibo sa panahon na iyan?

¹⁴ Pakahologan sa bungaw ki Satanas asin sa saiyang mga demonyo, si Jesu-Cristo kaiba an saiyang 144,000 na kairibang paramana maghahade sa laog nin sangribong taon. (Kap. 20:6) Sa panahon na iyan an tawo dadarahon sa pagkasangkap. An gabos na gobyerno asin autoridad patin kapangyarihan na tumang ki Jehova hahaleon. Kun nagibo na iyan, iientrega ni Jesus an Kahadean sa saiyang Ama, “tanganing an Dios magin gabos na bagay sa gabos na tawo.” —1 Cor. 15:24, 28.

15. Paano totoo na an Kahadean na ini ‘dai noarin man malalaglag’?

¹⁵ Kaya maliliwat an kamugtakan ni Jesus may koneksion sa daga. Minsan siring, an saiyang paghade magigin “daing katapusan” asin an saiyang Kahadean “dai malalaglag.” (Dan. 7:14) Sa anong sentido? Sa sentido na an autoridad sa paghade dai mapapasakamot nin iba na may laen man na mga katuyohan. An mga nagibo kan Kahadean ‘dai noarin man malalaglag.’ An gigibohon kan Kahadean sa pagbindikar sa ngaran ni Jehova asin sa saiyang katuyohan manongod sa dagang ini magdadanay sagkod lamang.

[Nota sa Ibaba]

Pagrerepaso

● Taano an Kahadean nin Dios ta iyo an solamenteng solusyon sa mga problema nin katawohan? Kasuarin iyan nagpoon na maghade?

● Ano an espesyalmenteng nagugustohan nindo manongod sa Kahadean nin Dios asin sa gigibohon kaiyan? Taano?

● Anong mga nagibo kan Kahadean an naheheling na niato ngonyan? Ano an kabtang niato digdi?

[Mga Hapot Para sa Pag-adal]

 [Ritrato sa pahina 84, 85]

 Katanosan an manonodan kan mga tawo