Kapitulo 17

An Pagbalik ni Cristo—Paano Maheheling?

1. (a) Ano an ipinanuga ni Cristo? (b) Ano an pangangaipo para sa pagbabalik ni Cristo?

 “AKO MADIGDI LIWAT.” (Juan 14:3) Ini ipinanuga ni Jesu-Cristo sa saiyang mga apostol kan sia nasa kaibanan ninda kan banggi bago sia magadan. Seguro maoyon kamo na orog kasuarin pa man yaon an pangangaipo para sa katoninongan, mabagsik na salud asin buhay na dadarahon sa katawohan kan pagbabalik ni Cristo sa kapangyarihan kan Kahadean. Alagad ta paano mabalik si Cristo? Siisay an makakaheling saiya, asin sa anong paagi?

2. (a) Sa saiyang pagbabalik, saen dadarahon ni Cristo an saiyang linahidan na mga parasunod, pati an saiyang mga apostol, tanganing mag-erok? (b) Anong klase an magigin hawak ninda duman?

² Sa saiyang pagbalik, si Cristo dai madigdi tanganing mag-erok sa daga. Imbes, an mga maghahade kaiba nia kukuanon tanganing makaibanan nia sa langit. Sinabihan ni Jesus an saiyang mga apostol: “Ako madigdi liwat asin ipag-iiba ko kamo, tanganing kun saen ako duman man kamo.” (Juan 14:3) Kaya, sa pagbabalik ni Cristo, an mga dadarahon sa langit magigin espiritung mga persona, asin maheheling ninda si Cristo sa saiyang mamuraway na espiritung hawak. (1 Corinto 15:44) Alagad ta an iba daw sa katawohan, na dai maduman sa langit, makakaheling ki Cristo kun sia bumalik?

KUN TAANO TA DAI SIA PUWEDENG BUMALIK BILANG TAWO

3. Anong ebidensia sa Biblia an nagpapaheling na an mga tawo dai na noarin man makakaheling pa giraray ki Cristo?

³ Kan banggi man sanang idto si Jesus nagsabi sa saiyang mga  apostol: “Kadikit pang panahon asin an kinaban dai na makakaheling sa sako.” (Juan 14:19) An “kinaban” napapanongod sa katawohan. Kaya digdi malinaw na sinasabi na an mga tawo sa daga dai na makakaheling sa saiya giraray pagkagadan nia. Si apostol Pablo nagsurat: “Minsan namidbid mi si Cristo sono sa laman, tunay na ngonyan bako nang siring an pagkamidbid mi sa saiya.”—2 Corinto 5:16.

4. Ano an nagpapaheling na si Cristo mabalik bilang sarong makapangyarihan na dai naheheling na espiritung persona?

⁴ Alagad ta dakol an nagtutubod na si Cristo mabalik sa iyo man sanang hawak nin tawo na hawak nia kan sia magadan, asin na an gabos na nabubuhay sa daga makakaheling sa saiya. Alagad ta sinasabi kan Biblia na si Cristo mabalik sa kamurawayan kaiba an gabos niang anghel, asin na sia matukaw “sa saiyang mamuraway na trono.” (Mateo 25:31) Kun si Jesus maabot asin matukaw bilang tawo sa sarong daganon na trono, magigin mas hababa sia ki sa mga anghel. Alagad ta sia madatong bilang an pinakamakapangyarihan asin pinakamamuraway sa gabos na espiritung aki nin Dios asin kun siring dai naheheling, kapareho ninda.—Filipos 2:8-11.

5. Taano si Cristo ta dai puwedeng magbalik sa sarong hawak nin tawo?

⁵ Sa ibong na kampi, kaidtong 1,900 na taon na an nakaagi kinaipuhan na si Jesus ibaba an sadiri asin magin tawo. Kaipuhan na itao nia an saiyang sangkap na buhay bilang tawo bilang pantubos sa sato. Sarong beses iyan ipinaliwanag ni Jesus nin arog kaini: “An tinapay na sakong itatao iyo an sakong laman manongod sa buhay kan kinaban.” (Juan 6:51) Kun siring itinao ni Jesus an saiyang laman na hawak bilang atang para sa katawohan. Gurano kalawig na magkakaepekto an atang na iyan? Si apostol Pablo minasimbag: “Kita napakangbanal paagi sa pagdolot kan hawak ni Jesu-Cristo nin makasaro para sa gabos na panahon.” (Hebreo 10:10) Mantang ikinatao na an saiyang laman para sa buhay kan kinaban, dai na puwede na bawion iyan ni Cristo asin magin tawo giraray. Huli sa pundamental na dahelan na iyan an saiyang pagbalik dai puwedeng nasa hawak nin tawo na saiyang iinatang nin makasaro para sa gabos na panahon.

AN HAWAK SA LAMAN DAI DINARA SA LANGIT

6. Taano ta dakol an nagtutubod na dinara ni Cristo an saiyang hawak sa laman duman sa langit?

⁶ Minsan siring, dakol an nagtutubod na dinara ni Cristo an saiyang hawak na laman sa langit. Itinotokdo ninda an bagay na kan si Cristo buhayon liwat hale sa mga gadan, an saiyang hawak na laman mayo na sa linubngan. (Marcos 16:5-7) Saro pa, pagkagadan nia si Jesus nagpaheling sa saiyang mga disipulo sa sarong hawak na laman tanganing ipaheling sa sainda na sia buhay. Sarong beses tinogotan pa  ngani Nia si apostol Tomas na ibugtak an saiyang kamot sa labot sa Saiyang hirog tanganing si Tomas tumubod na Sia talagang binuhay liwat. (Juan 20:24-27) Dai daw ini nagpapatunay na si Cristo binuhay sa iyo man sanang hawak na hawak nia kan sia magadan?

7. Ano an nagpapatunay na si Cristo nagduman sa langit bilang sarong espiritung persona?

⁷ Dai. An Biblia malinawon sa pagsabi kaiyan: “Si Cristo nagadan nin makasaro para sa gabos na panahon manongod sa mga kasalan . . . , na sia ginadan sa laman, alagad binuhay sa espiritu.” (1 Pedro 3:18) An mga tawo na may hawak na laman asin dugo dai puwedeng mabuhay sa langit. Mapadapit sa pagkabuhay liwat pasiring sa langitnon na buhay, an Biblia nagsasabi: “Iyan itinatanom na pisikal na hawak, binubuhay na espirituwal na hawak. . . . an laman asin dugo dai makakapagmana sa kahadean nin Dios.” (1 Corinto 15:44-50) Solamente an mga espiritung persona na may espirituwal na hawak an puwedeng mabuhay sa langit.

8. Ano an nangyari sa hawak na laman ni Cristo?

⁸ Kun siring, ano an nangyari sa hawak na laman ni Jesus? Bako daw na naheling kan saiyang mga disipulo na an saiyang linubngan dai nang laog? Iyo, ta hinale nin Dios an hawak ni Jesus. Taano daw ta ginibo ini nin Dios? Iyan nakaotob sa isinurat sa Biblia. (Salmo 16:10; Gibo 2:31) Kaya pinagmarhay ni Jehova na haleon an hawak ni Jesus, arog kan ginibo nia kaidto sa hawak ni Moises. (Deuteronomio 34:5, 6) Saro pa, kun an hawak nawalat sa linubngan, dai kutana nasabotan kan mga disipulo ni Jesus na sia binuhay na liwat hale sa mga gadan, ta kan panahon na idto sinda dai pa lubos na nakasasabot sa espirituwal na mga bagay.

9. Paano nangyari na ikinabugtak ni Tomas an saiyang kamot sa sarong lugad sa nagmateryalisar na hawak kan binuhay liwat na si Jesus?

⁹ Alagad mantang ikinalaog ni apostol Tomas an saiyang kamot sa labot na nasa hirog ni Jesus, dai daw iyan nagpapaheling na si Jesus binuhay liwat sa mga gadan na an hawak pareho man sana kan hawak nia na ipinako sa harigi? Dai, ta si Jesus nagmateryalisar sana o nagsulot nin hawak na laman, arog kan ginibo nin mga anghel kan mga nakaagi. Tanganing makombensir si Tomas kun siisay Sia, Sia naggamit nin sarong hawak  na may mga lugad. Sia naheling, o garo baga, talagang tawo, na nakakapagkakan asin nakakainom, arog kan mga anghel na sarong beses inistimar ni Abraham.—Genesis 18:8; Hebreo 13:2.

10. Ano an nagpapaheling na si Jesus guminamit nin laen-laen na pisikal na hawak?

¹⁰ Minsan ngani si Jesus nagpaheling ki Tomas sa sarong hawak na nakakaagid sa hawak Nia kan Sia magadan, Sia naggamit man nin laen-laen na hawak sa pagpaheling sa Saiyang mga parasunod. Kaya ngani si Maria Magdalena sa primero naghona na si Jesus hardinero. Sa ibang okasyon dai sia sa primero namidbid kan saiyang mga disipulo. Sa mga okasyon na ini bakong an saiyang personal na itsura an nagpamidbid sa saiya, kundi an sarong tataramon o aksion na namidbid ninda.—Juan 20:14-16; 21:6, 7; Lucas 24:30, 31.

11, 12. (a) Sa anong paagi na si Cristo naghale sa daga? (b) Kaya sa anong paagi maninigong laoman niato an pagbabalik ni Cristo?

¹¹ Sa laog nin 40 aldaw pagkabuhay nia liwat, si Jesus nagpaheling sa saiyang mga disipulo sa sarong hawak na laman. (Gibo 1:3) Dangan sia nagsakat na sa langit. Alagad an iba tibaad maghapot: ‘Bako daw na an duwang anghel na yaon nagsabi sa mga apostol na si Cristo “madatong sa iyo man sanang paagi na naheling sia nindong nagsasakat sa langit“?’ (Gibo 1:11) Iyo. Alagad mangnoha na sinda nagsabi “sa iyo man sanang paagi,” bakong sa iyo man sanang hawak. Asin ano an paagi kan paghale ni Jesus? Idto daing ribok, daing pag-eksibir sa publiko. An nakakaaram sana iyo an saiyang mga apostol. An kinaban dai.

¹² Helinga kun paano ilinaladawan kan Biblia an paagi na binayaan ni Jesus an saiyang mga apostol sa pagsakat nia sa langit: “Mantang sinda nagheheriling, sia dinara paitaas asin itinago sia sa saindang mga mata nin sarong panganoron.” (Gibo 1:9) Kaya kan si Jesus nagpoon nang sumakat sa langit, itinago sia nin sarong panganoron sa literal na pagheling kan saiyang mga apostol. Kun siring an pahaleng si Jesus dai na ninda naheling. Sinda dai na nakakaheling saiya. Dangan sa saiyang espirituwal na hawak sia nagsakat sa langit. (1 Pedro 3:18) Kun siring an saiyang pagbalik magigin man dai naheheling, sa sarong espirituwal na hawak.

 KUN PAANO MAHEHELING KAN GABOS NA MATA

13. Paano niato dapat na saboton an mga tataramon na “an gabos na mata makakaheling” ki Cristo kun sia dumatong kaiba kan mga panganoron?

¹³ Kun siring, paano niato sasaboton an mga tataramon sa Kapahayagan 1:7? Dian si apostol Juan nagsurat: “Uya! Sia madatong kaiba kan mga panganoron, asin an gabos na mata makakaheling sa saiya, asin an mga naglugad sa saiya; asin an gabos na tribo sa daga magmomorondo nin labi-labi huli sa saiya.” Digdi an Biblia nagtataram manongod sa pakaheling, bakong paagi sa pisikal na mga mata, kundi sa sentido nin pakamansay o pakasabot. Kaya ngani, kun nasasabotan nin sarong tawo an sarong bagay, tibaad sia magsabi, ‘Naheling ko na.’ An totoo, an Biblia nagtataram manongod sa “mga mata kan saindong pakasabot.” (Efeso 1:18, King James Version) Kaya an mga tataramon na “an gabos na mata makakaheling sa saiya” nangangahulogan na sa panahon na iyan an gabos makasasabot o makakamidbid na si Cristo presente na.

14. (a) Siisay an boot sabihon kan “mga naglugad sa saiya”? (b) Taano ta magkakaigwa nin labi-labing kamondoan kun sa katapustapusi mamidbid nin gabos an presensia ni Cristo?

¹⁴ An mga aktuwal na “naglugad” ki Jesus dai na nabubuhay sa daga. Kaya sinda nagrerepresentar sa mga tawo na, paagi sa pangongolog sa mga parasunod ni Cristo sa presenteng aldaw, nag-aarog sa iginawe kan mga tawong idto kan enot na siglo. (Mateo 25:40, 45) Madali nang umabot an panahon tanganing laglagon ni Cristo an mga maraot na iyan. Sinda patienot na pinatanidan manongod digdi. Kun mangyari na an paglaglag na ini, saindang ‘maheheling’ o mamimidbid an nangyayari. Asin tunay nanggad na magigin labi-labi an saindang kamondoan!

SI CRISTO DAW MABUWELTA SA DAGA?

15. Sa anong paagi na parateng ginagamit an terminong “pagbabalik”?

¹⁵ An pagbabalik dai perming nangangahulogan na an saro minaduman sa sarong literal na lugar. Kaya ngani an mga may helang sinasabing ‘nagbalik sa kabagsikan.’ Asin an dating namomoon puwedeng sabihon na ‘nagbalik sa kapangyarihan.’ Sa kaparehong paagi, an Dios nagsabi ki Abraham: “Ako mabalik sa saimo, sa panahon na ini sa masunod na taon, asin si Sara magkakaigwa nin aking lalaki.” (Genesis 18:14; 21:1) An pagbabalik ni Jehova nangahulogan, bakong nin literal na pagbabalik, kundi nin pagtao kan saiyang atension ki Sara tanganing gibohon an saiyang ipinanuga.

16. (a) Sa anong paagi na si Cristo mabalik sa daga? (b) Kasuarin nagbalik si Cristo, asin ano an nangyari kaidto?

¹⁶ Sa kaparehong paagi, an pagbabalik ni Cristo dai nangangahulogan na sia literal na mabuwelta sa dagang ini. Imbes, iyan nangangahulogan na saiyang kakapotan an kapangyarihan sa Kahadean para sa dagang ini asin itatao nia an saiyang atension dian. Dai sia kaipuhan na humale  sa saiyang langitnon na trono asin aktuwal na humilig sa daga tanganing gibohon ini. Arog kan naheling niato sa nakaaging kapitulo, an ebidensia sa Biblia nagpapaheling na kan taon 1914 C.E. uminabot an panahon na itinalaan nin Dios tanganing si Cristo bumalik asin magpoon na maghade. Kaidto nadangog sa langit an kurahaw na: “Nangyari na an kaligtasan asin an kapangyarihan asin an kahadean kan satong Dios asin an autoridad kan saiyang Cristo.”—Kapahayagan 12:10.

17. Mantang an pagbabalik ni Cristo dai naheheling, ano an itinao nia tanganing maaraman na sia nagbalik na?

¹⁷ Mantang dai naheheling an pagbabalik ni Cristo, may paagi daw na seguradohon na iyan talagang nangyari? Iyo, igwa. Si Cristo mismo nagtao nin naheheling na “tanda” na paagi kaiyan puwede niatong maaraman na sia presente na sa dai naheheling na paagi asin na harani na an katapusan kan kinaban. Siyasaton niato an “tandang” iyan.

[Mga Hapot Para sa Pag-adal]

[Ritrato sa pahina 142]

Itinao ni Cristo an saiyang hawak bilang atang. Dai na nia iyan puwedeng bawion noarin pa man asin magin tawo giraray

[Mga ritrato sa pahina 144, 145]

Taano ta namaluan si Jesus ni Maria Magdalena na sarong hardinero pagkabuhay nia liwat?

Sa anong hawak na laman na hinagad kan binuhay liwat na si Jesus ki Tomas na ilaog an saiyang kamot?

[Ritrato sa pahina 147]

Si Cristo mabalik sa paagi na kapareho sa paghale nia sa daga. Sa anong paagi sia naghale?