An Pagkabuhay Sagkod Lamang Bakong Pangatorogan Sana
Kapitulo 1
An Pagkabuhay Sagkod Lamang Bakong Pangatorogan Sana
1, 2. Taano ta masakit tubudon na an mga tawo puwedeng mabuhay sagkod lamang sa kaogmahan digdi sa daga?
KAOGMAHAN digdi sa daga—garo baga bakong posibleng kamtan iyan dawa sa kadikit sanang panahon. An helang, paggurang, gutom, krimen—sa pagsabi nin pira sanang problema—parateng ginigibong miserable an buhay. Kaya, tibaad sabihon nindo, an pagtaram manongod sa pagkabuhay sagkod lamang sa paraiso digdi sa daga pagpirong kan saimong mga mata sa katotoohan. Tibaad para sa saindo pagsayang sana nin oras an pag-oolay manongod dian, na an pagkabuhay sagkod lamang pangatorogan sana.
2 Daing duwa-duwa na maoyon sa saindo an kadaklan. Kaya, taano ta nakasesegurong gayo kita na puwede kamong mabuhay sagkod lamang sa paraiso digdi sa daga? Taano ta makatutubod kita na an buhay na daing katapusan bakong pangatorogan sana?
KUN TAANO TA MAKATUTUBOD KITA
3. Ano an nagpapaheling na boot nin Dios na an mga tawo maogma digdi sa daga?
3 Makatutubod kita ta an sarong Supremong Kapangyarihan, an Dios na Makakamhan sa gabos, inandam an daga na yaon an gabos na kaipuhan tanganing mapanigoan an gusto niato. Ginibo niang sangkap an daga para sa sato! Asin linalang nia an lalaki asin babae sa pinakamarahay na paagi tanganing sinda biyong maogma sa buhay sa daganon na erokan na ini—sagkod lamang.—Salmo 115:16.
4. Ano an nanodan nin mga sientista manongod sa hawak nin tawo na nagpapaheling na iyan ginibo tanganing mabuhay sagkod lamang?
4 Haloy nang aram kan mga sientista an kakayanan kan hawak nin tawo na bagohon an sadiri. Paagi sa makangangalas na mga paagi an mga selula kan hawak magsalang sinasalidahan o hinihirahay, sono sa pangangaipo. Asin minalataw na an prosedimientong ini nin pagbago sa sadiri maninigong magpadagos sagkod lamang. Alagad ta dai, asin ini bagay na dai ikinakapaliwanag nin mga sientista. Dai pa ninda lubos na nasasabotan sagkod ngonyan kun taano an mga tawo ta naggugurang. Sinasabi ninda na, sa irarom nin tamang mga kamugtakan, an mga tawo maninigo na mabuhay sagkod lamang.—Salmo 139:14.
5. Ano an sinasabi kan Biblia manongod sa katuyohan nin Dios para sa daga?
5 Pero, talaga daw na katuyohan nin Dios na an mga tawo mabuhay nin maogma sa daga sagkod lamang? Kun iyo, an buhay na daing katapusan bako sanang kamawotan o pangatorogan—iyan seguradong maabot! Ano an sinasabi kan Biblia, an libro na nagsasabi kan mga katuyohan nin Dios, manongod sa bagay na iyan? Inaapod kaiyan an Dios na “an Naghaman kan daga asin an Naggibo kaiyan,” asin idinugang: “Sia an Saro na masarig na nagbugtak kaiyan, na dai iyan linalang na dai nin kapakanan, na naghaman kaiyan tanganing pag-istaran.”—Isaias 45:18.
6. (a) Ano an kamugtakan ngonyan sa daga? (b) Ini daw an gustong mangyari nin Dios?
6 Sa paghona daw nindo an daga iniistaran ngonyan sa paagi na katuyohan dian nin Dios? Totoo, may mga tawong nag-iistar sa haros gabos na parte kan daga. Alagad sinda daw nag-iiriba nin maogma bilang sararong pamilya, sa marahay na paagi na katuyohan para sa sainda kan saindang Kaglalang? Ngonyan an kinaban baranga. Igwa nin pagkaongis. Igwa nin krimen. Igwa nin guerra. Minilyon na tawo an nagugutom asin naghehelang. An iba aroaldaw na sanang nahahadit sa istaran, trabaho asin gastos. Asin mayo sa mga bagay na ini na nagtatao nin onra sa Dios. Kaya malinaw na an daga dai iniistaran sa paagi na katuyohan kan Makakamhan sa gabos na Dios kan enot.
7. Ano an katuyohan nin Dios para sa daga kan lalangon nia an enot na mag-agom?
7 Pakalalanga sa enot na mag-agom, ibinugtak sinda nin Dios sa sarong paraiso digdi sa daga. Boot nia na sinda maogma sa buhay digdi sa daga sagkod lamang. An katuyohan nia pahiwason ninda an saindang paraiso sa bilog na daga. Ipinaririsa ini kan saiyang mga instruksion sa sainda: “Pangagbunga asin pangagdakol kamo asin panoa nindo an daga asin sakopa nindo iyan.” (Genesis 1:28) Iyo, an katuyohan nin Dios iyo na, pag-abot nin panahon, an bilog na daga masakop kan pamamahala nin matanos na pamilya nin tawo na nag-iiribaiba sa katoninongan asin kaogmahan.
8. Minsan ngani an enot na mag-agom nakisuway sa Dios, taano ta makasisierto kita na an katuyohan nin Dios para sa daga dai nagliwat?
8 Minsan ngani an enot na mag-agom nakisuway sa Dios, sa siring pinatutunayan na dai sinda maninigong mabuhay sagkod lamang, dai nagliwat an orihinal na katuyohan nin Dios. Iyan kaipuhan na maotob! (Isaias 55:11) An Biblia nanunuga: “An mga matanos mismo magmamana kan daga, asin sinda mag-eerok dian sagkod lamang.” (Salmo 37:29) An Biblia parateng nagtataram manongod sa areglo nin Dios na tawan nin buhay na daing katapusan an mga tawo na naglilingkod sa saiya.—Juan 3:14-16, 36; Isaias 25:8; Kapahayagan 21:3, 4.
AN PAGMAWOT NA MABUHAY—SAEN?
9. (a) Ano an normal na pagmawot nin mga tawo? (b) Ano an boot sabihon kan Biblia sa pagsabi kaiyan na ‘Ibinugtak nin Dios an kadaihan nin katapusan sa saindang isip’?
9 Ikapag-oogma nanggad niato na katuyohan nin Dios na kita mabuhay sagkod lamang. Huli ta isip-isipa: Kun kaipuhan kamong magdesisyon, sa anong petsa nindo gustong magadan? Mayo kamo nin napipili, ano? Habo nindong magadan, ni an siisay man na normal na tawo na may kosog pa. Ginibo kita nin Dios na may pagmawot na mabuhay, bakong pagmawot na magadan. Manonongod sa pagkagibo nin Dios sa tawo, sinasabi kan Biblia: “Ibinugtak ngani nia an kadaihan nin katapusan sa saindang isip.” (Eclesiastes 3:11, Byington) Ano an boot sabihon kaini? Iyan nangangahulogan na sa kadaklan an mga tawo boot na mabuhay nin padagos, na dai nagagadan. Huli sa kamawotan na ini sa daing sagkod na ngapit, an mga tawo haloy nang nagpaparahanap nin paagi na magdanay na hoben sagkod lamang.
10. (a) Saen minamawot nin tawo na mabuhay sagkod lamang? (b) Taano ta makasasarig kita na gigibohon na posible nin Dios na kita mabuhay sagkod lamang digdi sa daga?
10 Saen gusto nin mga tawo na mabuhay sagkod lamang? Sa pinagkatodan na nindang pag-istaran, digdi sa daga. An tawo ginibo para sa daga, asin an daga para sa tawo. (Genesis 2:8, 9, 15) An Biblia nagsasabi: “Pinatindog nia [nin Dios] an daga sa mga pasisikadan kaiyan; dai iyan matatanyog sagkod sa panahon na daing katapusan, sagkod lamang.” (Salmo 104:5) Mantang an daga ginibo tanganing magdanay sagkod lamang, kun siring an tawo maninigo man na mabuhay sagkod lamang. Tunay na an mamomoton na Dios dai malalang nin mga tawo na may pagmawot na mabuhay sagkod lamang dangan dai gibohon na posible para sa sainda na maotob an pagmawot na iyan!—1 Juan 4:8; Salmo 133:3.
AN BUHAY NA BOOT NINDO
11. Ano an sinasabi kan Biblia tanganing ipaheling na an mga tawo puwedeng mabuhay sagkod lamang na may sangkap na salud?
11 Helinga an minasunod na pahina. Anong klase an buhay kan mga tawong ini? Boot daw nindong makabilang sa sainda? Tara, siyempre, an sabi nindo! Helinga kun gurano karahay asin kahoben kan itsura ninda! Kun sabihon saindo na an mga tawong ini rinibo nang taon na nabuhay, matubod daw kamo? Sinasabi sato kan Biblia na an gurang na magigin hoben giraray, an may helang mararahayan asin an pilay, buta, bongog asin pula paoomayan gabos sa saindang kamatean. Kan sia nasa daga si Jesu-Cristo naggibo nin dakol na milagro sa pagpaomay sa mga naghehelang. Paagi kaini ipinaheheling nia kun paanong, sa mamuraway na panahon na harani na, an gabos na nabubuhay ibabalik sa sangkap na salud.—Job 33:25; Isaias 33:24; 35:5, 6; Mateo 15:30, 31.
12. Anong mga kamugtakan an naheheling niato sa mga retratong ini?
12 Helinga kun gurano kagayon kan hardin na istaran na ini! Arog kan ipinanuga ni Cristo, iyan tunay na paraiso, na kapareho kan nawara sa masumbikal na enot na mag-agom. (Lucas 23:43) Asin mangnoha an katoninongan asin pagkaoroyon dian. An mga tawo hale sa gabos na rasa—itom, puti, madarag—nabubuhay bilang sarong pamilya. Pati an mga hayop matoninong. Helinga an aki na nakikikawat sa leon. Pero mayo nin dahelan na matakot. Dapit digdi an Kaglalang nagsasabi: “An leopardo maghihigdang kadorog kan kanding, asin an bakang ogbon asin an leon saka an hayop na basog nag-iiriba; asin sarong aking sadang an mangengenot sa sainda. . . . Asin minsan an leon magkakakan nin dagami kapareho kan baka. Asin an aking pasusohon magkakawat sa lungib kan kobra.”—Isaias 11:6-9.
13. Ano an mawawara sa daga kun otobon na an mga katuyohan nin Dios?
13 Sa paraiso na katuyohan nin Dios para sa mga tawo, magkakaigwa kan gabos na dahelan na mag-ogma. An daga magbubunga nin dakol na masisiram na pagkakan. Mayo nin siisay man na magugutom pa. (Salmo 72:16; 67:6) An mga guerra, krimen, kadahasan, pati an pagkaongis asin kapasloan, magigin mga bagay na nakaagi na. Iyo, iyan mawawara na sagkod lamang! (Salmo 46:8, 9; 37:9-11) Nagtutubod daw kamo na posible an gabos na ini?
14. Ano an dahelan na kamo nagtutubod na tatapuson nin Dios an kasakitan?
14 Bueno, horophoropa: Kun igwa kamo kan kapangyarihan, tatapuson daw nindo an gabos na bagay na causa kan pagsakit nin tawo? Asin papangyayarihon daw nindo an mga kamugtakan na minamawot kan puso nin tawo? Siyempre. Iyan mismo an gigibohon kan satong mamomoton na langitnon na Ama. Papanigoan nia an satong mga pangangaipo asin kamawotan, ta an Salmo 145:16 nagsasabi manongod sa Dios: “Binibiklad mo an saimong kamot asin pinaninigoan an mawot nin lambang bagay na may buhay.” Alagad ta noarin ini mangyayari?
HARANI NA AN MAKANGANGALAS NA MGA BENDISYON
15. (a) Ano an magigin kahulogan para sa daga kan katapusan kan kinaban? (b) Ano an magigin kahulogan kaiyan para sa mga tawong maraot? (c) Ano an magigin kahulogan kaiyan para sa mga naggigibo kan kabotan nin Dios?
15 Tanganing papangyarihon an marahay na mga bendisyon na ini sa daga, an Dios nanunuga na tapuson an karatan asin an mga ginigikanan kaiyan. Kadungan kaiyan, iingatan nia an mga naglilingkod sa saiya, ta an Biblia nagsasabi: “An kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:17) Abaa kadakulang pagkaliwat kaiyan! An katapusan kan kinaban dai mangangahulogan kan katapusan kan satong daga. Imbes, arog kan nangyari sa panglobong baha kan aldaw ni Noe, iyan mangangahulogan kan pagkatapos sana nin maraot na mga tawo asin kan saindang pamumuhay. Alagad an mga naglilingkod sa Dios makaliligtas sa katapusan. Dangan, sa ibabaw nin daga na lininig na, sinda magigin talingkas na sa gabos na gustong mangolog asin man-api sa sainda.—Mateo 24:3, 37-39; Talinhaga 2:21, 22.
16. Anong mga pangyayari an ihinula para sa “huring mga aldaw”?
16 Alagad tibaad may magsabi: ‘Naggagrabe an mga kamugtakan, bakong nagrarahay. Paano niato masisierto na harani na an makangangalas na pagkaliwat na ini?’ Si Jesu-Cristo naghula nin dakol na bagay na maninigong bantayan kan saiyang mga parasunod sa ngapit tanganing maaraman ninda na panahon na nin Dios sa pagtapos sa kinaban. Sinabi ni Jesus na an huring mga aldaw kan palakaw na ini tatandaan nin mga bagay na arog baga nin darakulang guerra, kakulangan sa pagkakan, makokosog na linog, nag-oorog na katampalasanan asin naggagrabeng pagkawara nin pagkamoot. (Mateo 24:3-12) Sia nagsabi na magkakaigwa nin “kahandalan nin mga nasyon, na dai naaaraman an gigibohon.” (Lucas 21:25) Siring man, sinasabi pa kan Biblia: “Sa huring mga aldaw maabot an delikadong mga panahon na masakit pakibagayan.” (2 Timoteo 3:1-5) Bako daw na ini mismo an mga kamugtakan na inaagihan niato ngonyan?
17. Ano an sinasabi nin mga tawong naghohorophorop manongod sa mga kamugtakan ngonyan?
17 An dakol na nag-aadal sa mga nangyayari sa kinaban nagsasabi na nagdadangadang an dakulang pagkaliwat. Halimbawa, an editor kan Herald nin Miami, E.U.A., nagsurat: “An siisay man na may kadikit na isip puwedeng pagsurusumpayon an kapahapahamak na mga pangyayari sa nakaaging pirang taon asin maheling na an kinaban nasa makasaysayan na tata. . . . Liliwaton kaiyan sagkod lamang an buhay nin tawo.” Sa nakaaagid na tema, an Amerikanong parasurat na si Lewis Mumford nagsabi: “An sibilisasyon pabagsak na. Sierto ini. . . . Kan nakaagi kun minabagsak an mga sibilisasyon, idto sa saro sanang lugar nangyayari. . . . Ngonyan, mantang an kinaban mas konektado asin binobogkos nin modernong komunikasyon, kun bumagsak an sibilisasyon, an bilog na planeta an mabagsak.”
18. (a) Ano an ipinaheheling kan mga kamugtakan sa kinaban manongod sa ngapit? (b) Ano an masalida sa mga gobyerno ngonyan?
18 An mismong mga kamugtakan sa kinaban ngonyan nagpapaheling na kita nabubuhay ngonyan sa panahon na nakatalaan na mangyari an kalaglagan kan bilog na palakaw na ini nin mga bagay. Iyo, dai na mahahaloy hahaleon nin Dios sa daga an gabos na gustong lumaglag dian. (Kapahayagan 11:18) Hahaleon nia an presenteng mga gobyerno tanganing tawan nin lugar an saiyang matanos na gobyerno na magsakop sa bilog na daga. An gobyernong ini kan Kahadean an itinokdo ni Cristo sa saiyang mga parasunod na ipamibi.—Daniel 2:44; Mateo 6:9, 10.
19. Kun boot niatong mabuhay sagkod lamang, ano an kaipuhan niatong gibohon?
19 Kun kamo namomoot sa buhay asin boot na mabuhay sagkod lamang sa daga na sakop kan pamamahala nin Dios, kaipuhan na mag-apreta kamong magkaigwa nin tamang kaaraman manongod sa Dios, sa saiyang mga katuyohan asin sa saiyang mga kahagadan. Si Jesu-Cristo nagsabi sa pamibi sa Dios: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Nakaoogma nanggad na maaraman na puwede kitang mabuhay sagkod lamang—na iyan bakong pangatorogan sana! Alagad tanganing kamtan an marahay na bendisyon na ini hale sa Dios kaipuhan na manodan niato an dapit sa kaiwal na naghihingoang olangon kita sa pagkamit kan bendisyon na ini.
[Mga Hapot Para sa Pag-adal]
[Ritrato sa pahina 8, 9]
Binoot daw nin Dios na magin arog kaini an kinaban?
[Bilog na pahinang ritrato sa pahina 11]
