Kapitulo 26

An Pakipaglaban Tanganing Gumibo nin Tama

1. Anong duwang bagay an dapat labanan nin mga Kristiano?

 MANTANG nagdadanay an kinaban ni Satanas, kaipuhan makipaglaban an mga Kristiano tanganing malikayan an maraot na impluwensia kaini. Nagsurat si apostol Pablo: “Isolog nindo an bilog na pangalasag nin Dios, tanganing makatindog kamo tumang sa [mga katusohan] nin Diablo.” (Efeso 6:11-18) Minsan siring, an satong pakipag-iwal bako sanang tumang ki Satanas asin sa saiyang kinaban; tumang man iyan sa satong sadiring mga mawot na gumibo nin maraot. An Biblia nagsasabi: “An tendensia kan puso nin tawo maraot poon sa saiyang pagkaniaki.”—Genesis 8:21; Roma 5:12.

2. (a) Taano ta kun beses igwa kita nin makosog na mawot na gumibo nin sala? (b) Taano ta dapat labanan niato an salang mga horot?

² Huli sa kasalan na minana hale sa enot na tawong si Adan, minamawot nin satong mga puso na gumibo nin maraot. Kun totogotan niato an mga pagmawot na ini, dai kita makakaako nin buhay na daing sagkod sa bagong areglo nin Dios. Kaya kaipuhan kitang makipaglaban tanganing magibo an tama. Maski si apostol Pablo nagkaigwa man nin siring na pakipaglaban, siring sa ipinaliwanag nia: “Kun boot kong gumibo nin tama, an maraot iyo an yaon sa sako.” (Roma 7:21-23) Tibaad manompongan man nindo na an pakilaban na ini bakong pasil. Kun beses igwa nin makosog na pagkakatumang sa saindong sadiri. Ano an dapat nindong gibohon?

3. (a) Anong panlaog na pagkontrahan igwa an dakol na mga tawo? (b) Anong katotoohan sa Biblia an nagpapaheling kan katunayan na kadakol an nakakagibo nin maraot mantang boot nindang gibohon an marahay?

³ Naaraman nindo an makangangalas na panuga dapit sa buhay na daing sagkod sa irarom kan sangkap na mga kamugtakan sa daga. Tinutubod nindo an mga panugang ini, asin boot nindo an marahay na mga bagay na ini para sa saindong sadiri. Kaya aram nindo na an paglilingkod sa Dios para sa saindong daing sagkod na pakinabang. Pero tibaad sa saindong puso magmawot kamo nin mga bagay na aram nindong maraot. Kun beses tibaad magkaigwa kamo nin makosog na pagmawot na makidorog, maghabon, o na makikabtang sa ibang maraot na mga gibo. An nagkapirang tawo na nag-aadal kan librong You Can Live Forever in Paradise on Earth tibaad  aktuwalmenteng nakikikabtang sa siring na maraot na mga gibo, maski ngani aram na ninda na an mga bagay na ini kinokondenar nin Dios. An katunayan na ginigibo an maraot mantang minamawot na gumibo nin marahay nagpapaheling kan katunayan kan Biblia: “Madaya an puso nin labi sa gabos na bagay asin maraot.”—Jeremias 17:9.

PUWEDENG MANGGGANA SA PAKIPAGLABAN

4 (a) An kapangganahan o pagkadaog depende kiisay? (b) Ano an kahagadan tanganing manggana sa pakipag-iwal sa paggibo nin marahay?

⁴ Minsan siring, dai boot sabihon na dai kayang pogolon nin tawo an saiyang pagmawot na gumibo nin sala. Kun talagang boot nindo, puwedeng pakosogon nindo an saindong puso tanganing giyahan kamo kaiyan sa tamang paagi. Alagad nasa saindo an paggibo. (Salmo 26:1, 11) Mayo nin ibang puwedeng makipaglaban para sa saindo. Kaya, enot sa gabos, magpadagos na magkua nin nagtataong-buhay na kaaraman sa Biblia. (Juan 17:3) Alagad orog pa an kaipuhan sa simpleng pagtipon kan kaaraman na ini sa saindong payo. Dapat man makataros iyan sa saindong puso. Kaipuhan magkaigwa kamo nin hararom na pagmate dapit sa saindong nanonodan tanganing iyan magpahiro saindo na gumibo basado dian.

5. Paano nindo makakamtan an hale sa pusong pag-apresyar sa mga pagboot nin Dios?

⁵ Alagad paano kamo puwedeng magkaigwa nin hararon na pagpahalaga sa mga pagboot nin Dios? Kaipuhan kamong maghorophorop, o mag-isip nin hararom dapit kaiyan. Halimbawa, hapota an saindong sadiri: Ano talaga kan karahayan kan pagsunod sa Dios? Dangan helingon an buhay nin mga tawo na nagbaya sa mga pagboot nia, siring kan sarong 19 anyos na babae na nagsurat: “Tolong beses akong nagkaigwa nin helang na beneryal. Kan ikatolo nawaran ako kan diretso nin pag-aki huli ta hinale na an sakuyang matris.” Tunay na makamomondo na horophoropon an gabos na problema na dinadara kun an mga tawo dai minasunod sa mga pagboot nin Dios. (2 Samuel 13:1-19) Sarong babae na nakipagdorog may kamondoan na nagsabi: “Dai bawi an kolog asin kapaitan nin puso na itinatao nin dai pagsonod. Nagbabayad na ako ngonyan.”

6. (a) Taano ta dai bawi an kaogmahan na naghahale sa paggibo nin maraot? (b) Anong klaseng buhay an kinamtan kutana ni Moises sa Egipto?

⁶ Pero madadangog nindong magsabi an mga tawo na, an pakikisaro, siring man an pagburat asin paggamit nin droga, tunay na maogma. Alagad temporaryo sana an inaapod na kaogmahan na ini. Dai kamo padaya sa dalan na ma-agaw saindo kan tunay asin nagdadanay na kaogmahan. Isip-isipa si Moises na pinadakula bilang “an aking lalaki kan aking babae ni Paraon.” Namuhay sia sa kayamanan duman sa makahadeng harong  kan suanoy na Egipto. Minsan siring, an Biblia nagsasabi na, kan sia dakula na pinili nia na “makidamay na pasakitan sa kaibahan kan banwaan nin Dios kisa magpaoyon sa kaogmahan nin kasalan sa kadikit na panahon.” (Hebreo 11:24, 25) Kaya puwede ser na nagkaigwa nin kaogmahan o kagayagayahan sa inmoral, malaswang paagi nin pamumuhay na yaon sa makahadeng pamilya nin Egipto. Kun siring, taano daw ta tinalikodan ini ni Moises?

7. Taano ta tinalikodan ni Moises “an temporaryong kaogmahan nin kasalan” sa makahadeng harong nin Egipto?

⁷ Huli ta nagtubod si Moises ki Jehova Dios. Asin aram nia na igwa pang orog sa temporaryong kaogmahan na maaagihan nia sa makahadeng pamilya nin Egipto. An Biblia nagsasabi: “Tinorohokan nia an katimbang na balos.” Naghorophorop si Moises o nag-isip nin hararom, dapit sa mga bagay na ipinanuga nin Dios. Igwa sia nin pagtubod sa katuyohan nin Dios na maglalang nin sarong matanos na bagong areglo. Napahiro an saiyang puso kan dakulang pagkamoot asin pag-asikaso ni Jehova sa katawohan. Bako sanang huli ta si Moises nakadangog o nakabasa dapit ki Jehova. An Biblia nagsasabi na “nagpadagos siang marigon na garo baga nakakaheling kan Saro na dai  naheheling.” (Hebreo 11:26, 27) Tunay na gayo si Jehova ki Moises, kaya sia nagsurat kan mga panuga kan buhay na daing sagkod.

8. (a) Tanganing manggana sa ralaban nin paggibo nin marahay, ano an kaipuhan niatong gibohon? (b) Anong punto-de-vista, an siring sa ipinaheling nin sarong hoben an madonong na sunodon niato?

⁸ Totoo man daw ini saindo? Ibinibilang daw nindo si Jehova na sarong tunay na Persona, bilang Ama na namomotan na nindo? Kan mabasa nindo an dapit sa saiyang mga panuga na magtatao nin buhay na daing sagkod sa sarong Paraisong Daga, naheheling daw nindo an saindong sadiri na yaon duman na nagkakamit nin mga bendisyon? (Helingon an mga pahina kan librong Live Forever sa mga pahina 156 sagkod sa 162.) Tanganing magin mapanggana sa mga pan-gigipit na gumibo nin sala, kaipuhan niato na magkaigwa nin dayupot na relasyon ki Jehova. Asin siring ki Moises, kaipuhan niatong “magtorohok sa katimbang na balos.” Sarong 20 anyos na hoben na napaatubang sa pagsugot na gumibo nin pakikisaro, nagkaigwa kan pagmansay ni Moises. Sia nagsabi: “An paglaom ko na buhay na daing katapusan mahalagang gayo na ipakibalyo para sa nagkapirang segundong inmoralidad.” Bako daw na iyo ini an tamang saboot?

PAKANOOD GIKAN SA MGA PAGKUKULANG NIN IBA

9. Sa paanong paagi nadaog si Hadeng David sa pakipag-iwal sa paggibo nin marahay?

⁹ Dai kamo puwedeng magmaluya sa pakikipaglaban na ini, siring sa naginibo ni Hadeng David. Sarong aldaw mantang yaon sia nagtatanaw sa saiyang atop, asin natanawan nia na nagkakarigos an magayon na si Bat-seba. Imbes na tumalikod bago magtalubo an bakong tamang mga kaisipan sa saiyang puso, nagdanay siang nagheling. An saiyang pagmawot na makipagdorog ki Bat-seba nagin makosog na gayo sagkod na dinara nia sia sa saiyang palasyo.  Dangan, kan sia magbados, asin dai na nia kayang tahoban an saiyang pagsambay, iinareglo nia na an agom kaini ipagadan sa ralaban.—2 Samuel 11:1-17.

10. (a) Paano pinadusahan si David huli sa kasalan nia? (b) Ano sana an makakapogol ki David tanganing dai maholog sa pagsambay?

¹⁰ Tunay na saro idtong dakulang kasalan. Asin talagang nagsapar si David huli kaiyan. Bako sanang nahadit sia sa saiyang nagibo, kundi pinadusahan sia ni Jehova nin mga problema sa laog kan saiyang harong sa natatadang kabtang kan saiyang buhay. (Salmo 51:3, 4; 2 Samuel 12:10-12) An puso ni David tunay na nagin tuso kisa sa paghona nia; nadaog sia kan saiyang maraot na mga horot. Pagkatapos kaini sia nagsabi: “Uya! Sa karatan naginibo ako, asin sa kasalan ipinangidam ako nin sakuyang ina.” (Salmo 51:5) Alagad an maraot na ginibo ni David ki Bat-seba dai kutana nangyari. An problema nia iyo an padagos niang pagheling; dai nia linikayan an kamugtakan na nagin dahelan nin mainit na sekuswal na pagmawot para sa agom nin iba.

11. (a) Ano an dapat niatong manodan sa agi-agi ni David? (b) Anong mga gibo an masasabi nindong magpupukaw sa “seksuwal na horot”? (c) Siring kan sinabi nin sarong hoben, ano an lilikayan nin sarong madonong na tawo?

¹¹ Gikan sa eksperyensia ni David dapat niatong manodan na mag-ingat sa mga kamugtakan na nagpupukaw sa dai tamang pagmate sa sekso. Halimbawa, ano an mangyayari kun magbasa kamo nin mga libro o magheling nin mga programa sa telebisyon asin mga pelikula na nagtatampok nin sekso? Tibaad mapukaw an saindong seksuwal na horot. Kaya likayan an mga gibohon asin pag-aling-aling na nagpapainit sa mga “malaswang horot.” (Colosas 3:5; 1 Tesalonica 4:3-5; Efeso 5:3-5) Dai nindo ibugtak an saindong sadiri sa kamugtakan na ma-giya saindo sa pakikisaro. Sarong 17 anyos an may kadonongan na nagkomento: “Maski siisay makakapagsabi, ‘aram niamo kun noarin mapondo.’ Totoo, puwedeng aram nin saro kun noarin, pero pira daw an nakakagibo kaiyan?  Mas marahay pang likayan an siring na mga situwasyon.”

12. Anong halimbawa ni Jose an dapat niatong isaisip?

¹² Kun nagirumdoman kutana ni David an halimbawa ni Jose, nalikayan nia an dakulang pagkakasala tumang sa Dios. Sa Egipto kaidto, si Jose nagin enkargado kan bilog na harong ni Potifar. Mantang mayo si Potifar, an mainit sa sekso niang agom hinihingoang piriton an guwapong si Jose, sa pagsabi: “Dorogan mo ako.” Alagad nagsayuma si Jose. Dangan sarong aldaw rinabsing nia sia asin hiningoa na padorogon sia saiya. Alagad si Jose duminolag. Pinakosog nia an saiyang puso paagi sa pag-isip, na dai panigoan an saiyang seksuwal na horot, kundi an tama sa pagheling nin Dios. “Paano ko magigibo ining dakulang kasalan na ini asin tunay na magkasala tumang sa Dios?” sia naghapot.—Genesis 39:7-12.

TABANG NA KAIPUHAN NINDO TANGANING MANGGANA

13, 14. (a) Ano an kaipuhan tanganing manggana sa pakipag-iwal na ini? (b) Anong pagbabago an ginibo kaidtong nagin Kristiano sa Corinto asin sa tabang nin ano? (c) Dati anong klaseng mga tawo si Tito asin Pablo?

¹³ Tanganing manggana sa pakipaglaban na ini kaipuhan togotan na makataros sa saindang puso an kaaraman sa Biblia tanganing  pahiroon kamo kaiyan na oyon dian. Alagad kaipuhan man kamong makiiba sa banwaan nin Dios, tanganing magin kabtang kan naheheling na organisasyon ni Jehova. Sa tabang kaiyan, gurano man kararom an pagkakasala na saidong naginibo, puwede kamong magbago. Dapit sa mga tawo kan suanoy na Corinto na nagbago, si apostol Pablo nagsurat: “Dai kamo madayaan. Minsan an mga parapakisaro, ni an mga parasamba sa ladawan, ni an mga parasambay, ni an mga binabae, ni an mga nagdodorog sa kapwa lalaki, ni an mga mahabon, ni an mga tawong maaraon, ni an mga paraburat, ni an paramuda, ni an mga maagaw dai magmamana kan kahadean nin Dios. Asin siring an nagkapira sa saindo. Alagad kamo mga hinugasan na.”—1 Corinto 6:9-11.

¹⁴ Isip-isipa iyan! Nagkapira sa suanoy na mga Kristiano an dating mga parapakisaro, parasambay, homoseksuwal, mga mahabon asin mga paraburat. Alagad paagi sa tabang na hale sa Kristianong organisasyon sinda nagbago. Si apostol Pablo sa saiya man sana nakaginibo nin maraot na mga bagay. (1 Timoteo 1:15) Sa saiyang kapwa Kristiano, si Tito nagsurat: “Huli ta kita man kaidto mga kablas, masumbikal, nadayaan, naglilingkod sa manlaenlaen na kasingawan.”—Tito 3:3.

15. (a) Ano an nagpapaheling na bakong pasil para ki Pablo na gibohon an tama? (b) Paano kita makikinabang sa halimbawa ni Pablo?

¹⁵ Kan si Pablo magin Kristiano, pasil daw para sa saiya an gumibo nin marahay? Dai. Si Pablo nagkaigwa nin habang-buhay na pakipag-iwal tumang sa maraot na mga horot asin mga kasingawan na kun saen sia dating nagin oripon. Sia nagsurat: “[Linalanog] ko an sakong hawak, asin pinapaoripon ko, ta tibaad, kun sa ano man na paagi, pakapaghulit ko sa iba ako isikwal.” (1 Corinto 9:27) ‘Dinisiplina’ ni Pablo an saiyang sadiri. Pinirit nia an saiyang sadiri na gumibo nin tama, maski an saiyang hawak nagmamawot na gumibo nin sala. Asin kun gibohon nindo an ginibo nia, kamo man magigin mapanggana.

16. Anong bagong mga halimbawa an makakatabang sato tanganing magin mapanggana sa pakikipaglaban sa paggibo nin tama?

¹⁶ Kun nadedepisilan kamong daogon an nagkapirang maraot na mga gawe, mag-atender sa masunod na dakulang asamblea nin mga Saksi ni Jehova. Siertong mapapangalas kamo kan malinig na gawe asin kaogmahan kan mga presente. Alagad dakol sa mga ini an dating kabtang kaining kinaban na an pakikisaro, pagsambay, pagburat, homoseksuwalidad, pagsigarilyo, pagdroga, paghabon, pandadaya, pagputik asin pagsugal uso sainda. Kadaklan sainda dating naggigibo kaiyan. (1 Pedro 4:3, 4) Siring man, mantang kamo nakikiiba sa mga Saksi ni Jehova sa saindang mga saradit na pagtiripon sa kongregasyon, na dapat gibohon na daing pag-atraso, magigin kaiba kamo nin mga tawong nakipaglaban asin napangganahan an maraot na mga gawe ain mga horot  na tibaad saindong linalabanan ngonyan. Pakosogon an saindong boot! Magigibo man nindo ini sa tabang nin Dios.

17. (a) Anong pakikiiba an kaipuhan niato tanganing magin mapanggana sa pakikipaglaban? (b) Kiisay kita makakaako nin tabang sa mga problema?

¹⁷ Kun haloy na kamong nakikipag-adal sa Biblia sa mga Saksi ni Jehova, daing duda na nag-atender na kamo sa mga pagtiripon sa Kingdom Hall. Gibohon na regular an siring na pag-atender sa pagtiripon. An lambang saro sato nangangaipo nin espirituwal na pagdagka na inaako hale sa siring na Kristianong pag-iriba. (Hebreo 10:24, 25) Kamidbidon an “kamagurangan na lalaki,” o mga magurang kan kongregasyon. An saindang responsibilidad iyo na “atamanon an aripompon nin Dios.” (1 Pedro 5:1-3; Gibo 20:28) Dai mag-alangan na dumulok sainda kun nangangaipo kamo nin tabang tanganing mapangganahan an nagkapirang gawe na minakontra sa mga pagboot nin Dios. Manonompongan nindo sindang mamomoton, maboot asin makonsiderasyon.—1 Tesalonica 2:7, 8.

18. Anong mga paglaom sa ngapit an nagtataong kosog tanganing ikapagpadagos niato an pakikipaglaban?

¹⁸ An pagtulod na gumibo nin sala yaon sa sato, asin bako sanang hale sa kinaban ni Satanas kundi mismo sa satong makasalan na mga sadiri. Kaya tanganing magin maimbod sa Dios kaipuhan an aroaldaw na pakipag-iwal. Alagad marahayon nanggad huli ta an pakipag-iwal na iyan bakong daing katapusan! Dai mahahaloy si Satanas hahaleon na asin an saiyang bilog na maraot na kinaban lalaglagon. Asin, sa bagong areglo nin Dios na ngonyan harani na, magkakaigwa nin matanos na mga kamugtakan na magpapapasil kan satuyang paghihingoa. Dangan an gabos na girra nin kasalan malihis na, asin dai na magkakaigwa nin siring kaini kagabat na pakipag-iwal tanganing gumibo nin marahay.

19. Taano ta dapat kitang magin andam na magpagal tanganing mapaogma si Jehova?

¹⁹ Danay na isipon an mga bendisyon kan bagong areglo. Iyo, isolot “an paglaom nin kaligtasan na takop sa payo.” (1 Tesalonica 5:8) Logod na an saindong saboot magin siring kan sarong hoben na babae na nagsabi: “Iniisip ko an gabos na naginibo ni Jehova para sa sako asin an ipinanuga sako. Dai nia ako pinabayaan. Benendisyonan nia ako nin kadakol na bagay. Aram kong mawot nia an pinakamarahay para sa sako, kaya gusto ko siang paogmahon. Bawi an ano man na paghihingoa makamtan sana an buhay na daing sagkod.” Kun may kaimbodan na hanapon niato an katanosan, ‘an gabos na marahay na ipinanuga ni Jehova’ para sa mga namomoot saiya tunay na maabot.—Josue 21:45.

[Mga Hapot Para sa Pag-adal]

[Ritrato sa pahina 219]

Mantang may kaogmahan sa pamumuhay sa suanoy na Egipto, taano ta hinaboan iyan ni Moises?

[Mga ritrato sa pahina 220, 221]

Si David nagpadagos sa pagheling; dai nia linikayan an kamugtakan na nagbunga nin inmoralidad

[Ritrato sa pahina 222]

Dinulagan ni Jose an inmoral na mga alok kan agom ni Potifar