Ano an Nangyayari sa Pagkagadan?
Kapitulo 8
Ano an Nangyayari sa Pagkagadan?
1. Ano an parateng mga ihinahapot nin mga tawo manongod sa gadan?
TIBAAD aram nindo an kapungawan na namamatean kun an saro nagagadanan nin namomotan. Kanigoan na kamondoan asin kadaihan nin paglaom an namamatean nindo! Natural sanang ihapot: Ano an nangyayari sa tawo kun sia nagagadan? Sia daw nagpapadagos na mabuhay sa ibang lugar? Makakaibaiba pa daw giraray sa daga kan mga nabubuhay an mga nagadan na ngonyan?
2. Ano an nangyari sa enot na tawo, si Adan, kan sia magadan?
2 Tanganing masimbag an mga hapot na iyan, makatatabang sato na maaraman kun ano an nangyari ki Adan kan sia magadan. Kan sia magkasala, sinabihan sia nin Dios: “Ika [mabalik] sa kabokabo, huli ta dian ka kinua. Huli ta ika kabokabo asin sa kabokabo ka man mabalik.” (Genesis 3:19) Isip-isipa kun ano an boot sabihon kaiyan. Bago sia lalangon nin Dios hale sa kabokabo, mayo nin Adan. Dai sia nag-eeksister. Kaya, pagkagadan nia, si Adan nagbuwelta sa kamugtakan na iyan nin dai pag-eksister.
3. (a) Ano an kagadanan? (b) Ano an sinasabi kan Eclesiastes 9:5, 10 manongod sa kamugtakan kan gadan?
3 Sa simpleng pagtaram, an kagadanan iyo an kasarungat nin buhay. Ipinaheheling ini kan Biblia sa Eclesiastes 9:5, 10. Sono sa Authorized o King James Version, an mga bersikulong ini nagsasabi: “Huli ta an nabubuhay nakaaaram na sinda magagadan; alagad an gadan mayo na lamang nin naaaraman, ni may balos pa man sinda; huli ta an pakagirumdom sa sainda nalingawan na. Ano man an magigibo kan saimong kamot, gibohon iyan na may kaigotan; huli ta mayo na nin gibohon, ni pag-isip, ni kaaraman, ni kadonongan, sa lolobngan, na saimong padudumanan.”
4. (a) Ano an nangyayari sa kaisipan nin tawo kun nagagadan? (b) Taano ta minapondo sa pag-andar an gabos na sentido nin tawo pagkagadan?
4 Ini nangangahulogan na an gadan mayo nin nagigibo asin mayo nin pagmate. Mayo na sinda nin pag-isip, arog kan sabi kan Biblia: “Dai ka manarig sa mga prinsipe, ni sa aki kan daganon na tawo, na dian mayo nin kaligtasan. An saiyang espiritu minaluwas, minabalik sia sa saiyang daga; sa aldaw na iyan an saiyang mga pag-isip napapara.” (Salmo 146:3, 4) Pagkagadan an espiritu nin tawo, an saiyang puwersa nin buhay, na sinususteniran paagi sa paghangos, “minaluwas.” Iyan mayo na. Kaya an mga sentido nin tawo na pagdangog, pakaheling, pakamate, pakaparong asin pakanamit, na depende sa saiyang abilidad nin pag-iisip, gabos minapondo sa pag-andar. Sono sa Biblia, an gadan namumugtak sa biyong kadaihan nin pag-aram.
5. (a) Paano ipinaheheling kan Biblia na an kamugtakan nin gadan na mga tawo asin gadan na mga hayop pareho? (b) Ano an “espiritu” na nagpapangyari kapwa sa mga tawo asin hayop na mabuhay?
5 Kun gadan, an mga tawo asin hayop pareho nasa kamugtakan na ini nin biyong kadaihan nin pag-aram. Helinga kun paano ini liniliwanag kan Biblia: “Kun paano nagagadan an saro, siring man an pagkagadan kan saro; asin sinda gabos sasaro sana an espiritu, kaya mayo nin kalabihan an tawo sa hayop, huli ta an gabos daing kamanungdanan. An gabos pasiring sa sarong lugar. An gabos gikan sa kabokabo, asin an gabos mabalik sa kabokabo.” (Eclesiastes 3:19, 20) An “espiritu” na nagpapangyari sa mga hayop na mabuhay kapareho sa nagpapangyari sa mga tawo na mabuhay. Kun an “espiritung” ini, o dai naheheling na puwersa nin buhay, lumuwas, an tawo asin hayop pareho minabuwelta sa kabokabo na pinaghalean ninda.
AN KALAG NAGAGADAN
6. Paano ipinaheheling kan Biblia na an mga hayop kalag?
6 May mga nagsasabi na an ikinakapalaen nin tawo sa hayop iyo na an tawo may kalag pero an mga hayop mayo. Minsan siring, an Genesis 1:20 asin 30 nagsasabi na an Dios naglalang nin “nabubuhay na mga kalag” na mag-iistar sa katubigan, asin na an mga hayop igwa nin “buhay bilang kalag.” Sa mga bersikulong ini may mga Biblia na ginagamit an mga terminong “linalang” asin “buhay” imbes na “kalag,” pero an mga nota kaiyan sa gilid minaoyon na an terminong “kalag” iyo an minalataw sa orihinal na lenguahe. Kabilang sa mga pag-apod kan Biblia sa hayop na kalag yaon sa Bilang 31:28. Dian iyan nagtataram manongod sa “sarong kalag sa kada limang gatos, sa mga tawo asin sa mga baka asin sa mga asno patin sa mga karnero.”
7. Ano an sinasabi sa Biblia tanganing patunayan na an kalag nin hayop asin kalag nin tawo pareho nagagadan?
7 Mantang an mga hayop kalag, kun sinda nagagadan an saindang kalag nagagadan. Arog kan sabi kan Biblia: “An lambang nabubuhay na kalag nagadan, iyo, an mga bagay na nasa dagat.” (Kapahayagan 16:3) Ano man an kalag nin tawo? Arog kan nanodan niato sa nakaaging kapitulo, an tawo dai linalang nin Dios na igwa nin kalag. An tawo sarong kalag. Kaya, siring sa lalaoman niato, kun nagagadan an tawo, an saiyang kalag nagagadan. Paorootrong sinasabi kan Biblia na ini totoo. Nungkang sinasabi kan Biblia na an kalag dai nagagadan o na iyan dai puwedeng magadan. “An gabos na manini kabokabo maruluhod, asin mayo nin siisay man na mapagdadanay na buhay an saiyang sadiring kalag,” sabi kan Salmo 22:29. “An kalag na nagkasala—iyan mismo magagadan,” an paliwanag kan Ezequiel 18:4 asin 20. Asin kun bubukasan nindo sa Josue 10:28-39, may manonompongan kamong pitong lugar na dian sinasabi na an kalag ginadan o linaglag.
8. Paano niato naaaraman na an tawong kalag, si Jesu-Cristo, nagadan?
8 Sa sarong hula manongod ki Jesu-Cristo, an Biblia nagsasabi: “Pinabolos nia an saiyang kalag sagkod sa mismong kagadanan . . . asin dinara nia an kasalan nin dakol.” (Isaias 53:12) An katokdoan dapit sa pantubos nagpapatunay na sarong kalag (si Adan) an nagkasala, asin na tanganing matubos an mga tawo kaipuhan na may iatang na sarong katimbang na kalag (tawo). Si Cristo, paagi sa ‘pagpabolos kan saiyang kalag sa kagadanan,’ iyo an nagtao kan halagang pantubos. Si Jesus, an kalag na tawo, nagadan.
9. Ano an boot sabihon kan mga tataramon na, ‘an espiritu mismo minabalik sa Dios na nagtao kaiyan’?
9 Arog kan naheling na niato, an “espiritu” laen man sa satong kalag. An espiritu iyo an satong puwersa nin buhay. An puwersa nin buhay na ini nasa lambang selula sa hawak kapwa kan mga tawo asin hayop. Iyan sinususteniran, o binubuhay, paagi sa paghangos. Kun siring, ano an boot sabihon kun an Biblia nagsasabi na sa pagkagadan “an kabokabo minabalik sa daga . . . asin an espiritu mismo minabalik sa tunay na Dios na nagtao kaiyan”? (Eclesiastes 12:7) Pagkagadan an puwersa nin buhay minaluwas sa gabos na selula kan hawak asin an hawak nagpopoon na malapa. Alagad dai ini nangangahulogan na an satong puwersa nin buhay literal na minahale sa daga asin nagbibiyahe sa espasyo pasiring sa Dios. Imbes, an espiritu minabalik sa Dios sa sentido na ngonyan biyo nang nasa kamot nin Dios an satong paglaom sa buhay sa ngapit. Solamente paagi sa kapangyarihan nia na an espiritu, o puwersa nin buhay, ikatatao giraray tanganing kita mabuhay liwat.—Salmo 104:29, 30.
LAZARO—SARONG TAWO NA APAT NA ALDAW NA GADAN
10. Minsan ngani nagadan na si Lazaro, ano an sinabi ni Jesus manongod sa saiyang kamugtakan?
10 An nangyari ki Lazaro, na apat na aldaw na gadan, nakatatabang sato na masabotan an kamugtakan kan gadan. Sinabihan ni Jesus an saiyang mga disipulo: “Si Lazaro na katood niato nagpahingalo, alagad ako maduman tanganing pukawon ko sia sa pagtorog.” Minsan siring, an mga disipulo nagsimbag: “Kagurangnan, kun sia nagpahingalo, sia maoomayan.” Kaya, sinabi na sa sainda nin sayod ni Jesus: “Si Lazaro nagadan.” Taano ta sinabi ni Jesus na si Lazaro natotorog mantang an totoo sia nagadan? Helingon niato.
11. Ano an ginibo ni Jesus para sa gadan na si Lazaro?
11 Kan si Jesus harani na sa banwaan na istada ni Lazaro, sinabat sia ni Marta, an tugang na babae ni Lazaro. Dai nahaloy sinda, kaiba an dakol pang iba, nagduman sa linubngan ki Lazaro. Idto sarong kuweba, asin may gapo na nasa bunganga kaiyan. Si Jesus nagsabi: “Halea nindo an gapo.” Mantang apat na aldaw nang gadan si Lazaro, si Marta nagsabi: “Kagurangnan, sa panahon na ini mabata na sia.” Alagad ta hinale an gapo, asin si Jesus nagkurahaw: “Lazaro, lumuwas ka!” Asin iyo man nanggad! Sia luminuwas na buhay, na napapatos pa nin mga henerong sa gadan. “Hubadi sia nindo asin palakawa,” sabi ni Jesus.—Juan 11:11-44.
12, 13. (a) Taano ta makasisierto kita na si Lazaro daing pag-aram kan sia gadan? (b) Taano ta sinabi ni Jesus na si Lazaro natotorog mantang, an totoo, sia gadan?
12 Ngonyan isip-isipa ini: Ano an kamugtakan ni Lazaro sa laog kan apat na aldaw na sia gadan? Nasa langit daw sia? Sia tawong marahay. Pero si Lazaro dai nagkasabi na sia nakaduman sa langit, na seguradong gigibohon nia kun sia nakaduman. Dai, si Lazaro talagang gadan, arog kan sabi ni Jesus. Kun siring taano ta sa primero sinabi ni Jesus sa saiyang mga disipulo na si Lazaro natotorog sana?
13 Bueno, aram ni Jesus na an gadan na si Lazaro daing pag-aram, arog kan sabi kan Biblia: “An gadan mayo man lamang . . . nin pakaaram.” (Eclesiastes 9:5) Pero an tawong buhay puwedeng pukawon hale sa nanok na pagkatorog. Kaya ipaheheling ni Jesus na, paagi sa kapangyarihan nin Dios na itinao sa saiya, an katood niang si Lazaro puwedeng pukawon hale sa kagadanan.
14. An kaaraman sa kapangyarihan ni Cristo na bumuhay sa gadan maninigong makapahiro sato na gibohon an ano?
14 Kun an tawo nanok na gayo an pagkatorog, mayo sia nin nagigirumdoman. Arog man kaiyan an gadan. Mayo sinda nin pagmate. Dai na sinda nag-eeksister. Alagad, sa itinalaan na panahon nin Dios, an mga gadan na tinubos nin Dios bubuhayon liwat. (Juan 5:28) Tunay na an kaaraman na ini maninigong magpahiro sato na magmawot na kamtan an pag-oyon nin Dios. Kun gigibohon niato iyan, dawa kun kita magadan, kita gigirumdomon nin Dios asin bubuhayon liwat.—1 Tesalonica 4:13, 14.
[Mga Hapot Para sa Pag-adal]
[Ritrato sa pahina 76]
SI ADAN—ginibo hale sa kabokabo . . . nagbalik sa kabokabo
[Ritrato sa pahina 78]
Ano an kamugtakan ni Lazaro bago sia buhayon liwat ni Jesus?
