Kapitulo 30

Kun Ano an Dapat Nindong Gibohon Tanganing Mabuhay na Daing Sagkod

1. (a) Anong duwang dalan an bukas sa saindo? (b) Paano nindo mapipili an tamang dalan?

 AN Dios na Jehova nag-aalok saindo nin sarong bagay na makangangalas—buhay na daing sagkod sa saiyang bagong sistema nin mga bagay. (2 Pedro 3:13) Alagad an buhay duman depende sa saimong paggibo kan kabotan nin Dios ngonyan. An presenteng maraot na kinaban, kaiba kan gabos na nagdadanay dian na kabtang kaiyan, madale nang lumihis, “alagad an naggigibo kan kapagbotan nin Dios magdadanay sagkod lamang.” (1 Juan 2:17) Kaya magpili kamo sa duwang dalan. An saro pasiring sa kagadanan asin an saro sa daing sagkod na buhay. (Deuteronomeo 30:19, 20) Arin an saindong pipilion?

2. (a) Kun igwa kamo nin tunay na pagtubod, sa ano kamo makokombinsir? (b) Paano na an pagtiwala sa Dios siring sa pagtiwala nin sarong aki sa sarong mamomoton na ama matabang saindo na maglingkod saiya?

² Paano nindo ipapaheling na pinipili nindo an buhay? Enot sa gabos, kaipuhan igwa kamo nin pagtubod ki Jehova asin sa saiyang mga panuga. Talaga daw kamong kombinsido na an Dios nabubuhay “asin na sia iyo an parabalos sa gabos na naghahanap nanggad saiya”? (Hebreo 11:6) Kaipuhan kamong magtiwala sa Dios kun paanong an sarong aki nagtitiwala sa sarong mamomoton asin maheherakon na ama. (Salmo 103:13, 14; Talinhaga 3:11, 12) An pagkaigwa nin siring na pagtubod, dai kamo magdududa na an saiyang sadol madonong o na an saiyang mga dalan tama, maski kun beses dai nindo biyong nasasabotan an gabos na bagay-bagay.

3. (a) Dugang pa sa pagtubod, ano pa an importante? (b) Anong mga gibo an kaipuhan na magpapaheling na pinipili nindo an buhay?

³ Minsan siring, orog pa sa pagtubod an kaipuhan. Kaipuhan man an mga gibo na magpapaheling kun ano an saindong tunay na saboot para ki Jehova. (Santiago 2:20, 26) Igwa na daw kamong ginibo tanganing ipaheling na ikinamomondo nindo an saindong dai pakagibo nin tama kan nakaagi? Napahiro na daw kamo na gomibo nin pagsolsol o nin mga  pagbabago sa saindong paagi nin buhay tanganing makapaoyon sa katuyohan ni Jehova? Binayaan na daw nindo, boot sabihon, isinikwal an salang dalan na dati nindong sinusonod, asin pinonan na daw nindong gibohon an mga bagay na hinahagad nin Dios? (Gibo 3:19; 17:30) An siring na mga gibo magpapaheling na pinipili nindo an buhay.

DEDIKASYON ASIN BAUTISMO

4. (a) Ano an dapat magpahiro sindo na gibohon an kabotan nin Dios? (b) Kun magdesisyon na kamo maglilingkod sa Dios, ano an dapat gibohon?

⁴ Ano an kaipuhan magpahiro saindo na pilion an buhay paagi sa paggibo kan kabotan nin Dios? Apresasyon an kaipuhan. Isipa na sana: Ginibong posible ni Jehova na kamo mahale sa kahelangan, pagsakit, asin maski kagadanan! Paagi sa mahalagang regalo kan saiyang Aki binuksan nia an dalan pasiring sa daing sagkod na buhay sa paraiso digdi sa daga. (1 Corinto 6:19, 20; 7:23; Juan 3:16) Kun an pagkamoot ni Jehova pahiroon kamo na mamotan sia bilang balos, ano an saindong gigibohon? (1 Juan 4:9, 10; 5:2, 3) Dumolok kamo sa Dios sa ngaran ni Jesus asin sabihon saiya sa pamibi na boot nindong magin saiyang lingkod, na boot nindong mapabilang saiya. Sa paaging ini saindong idinededikar an saindong sadiri sa Dios. Ini sarong personal, pribadong bagay. Mayong siisay pa man na makakagibo kaiyan para saindo.

5. (a) Pakapagdedikar nindo sa Dios, ano an lalaoman nia saindo na gigibohon? (b) Anong tabang an makukua nindo tanganing mamuhay nin oyon sa saindong dedikasyon?

⁵ Pakatapos na mahaman nindo an saindong dedikasyon sa Dios, lalaoman kamo nia na mamuhay kaoyon dian. Kaya patunayan na kamo tawong igwa nin palabra de onor paagi sa pangapot sa desisyon na ini, o dedikasyon, sagkod na kamo nabubuhay. (Salmo 50:14) Kun kamo magin dayupot sa organisasyon nin Dios, matatabangan kamo nin kapuwa mga Kristiano na maogmang matao saindo nin mamomoton na pagdagka asin pagsuportar.—1 Tesalonica 5:11.

6. (a) Kun saindong idedikar an saindong buhay sa Dios, anong masunod na lakdang an kaipuhan? (b) Ano an boot sabihon kan bautismo?

 ⁶ Minsan siring, kaipuhan na gumibo kamo nin orog pa sa pagsabi ki Jehova na boot nindong mapabilang saiya. Kaipuhan ipaheling nindo sa iba na nagdedikar na kamo na maglingkod sa Dios. Paano nindo gigibohon ini? Paagi sa pagpabautismo sa tubig. An pagpabautismo sa tubig sarong panpublikong demonstrasyon na an sarong tawo nagdedikar na kan saiyang buhay ki Jehova asin ipinepresentar an saiyang sadiri sa paggibo kan Saiyang kabotan.

7. (a) Anong halimbawa an itinao ni Jesus sa mga Kristiano? (b) Taano ta an ipinagboot ni Jesus na bautismo ta bakong para sa mga omboy?

⁷ An siring na bautismo sa tubig sarong importanteng kahagadan na ipinaheling kan halimbawa ni Cristo Jesus. Dai sana sinabi ni Jesus sa saiyang Ama na gigibohon nia an Saiyang kabotan. (Hebreo 10:7) Kan madale na siang magpoon kan saiyang paglilingkod bilang parahulit kan Kahadean nin Dios, iprinesentar ni Jesus an saiyang sadiri asin nagpabautismo sa tubig. (Mate 3:13-17) Mantang itinao ni Jesus an arogan, an mga nagdedikar ngonyan kan saindang buhay ki Jehova na gibohon an saiyang kabotan kaipuhan pabautismo. (1 Pedro 2:21; 3:21) Katunayan, pinagbotan ni Jesus an saiyang mga parasunod na gumibo nin mga disipulo sa gabos na mga nasyon asin dangan bautismohan an mga bagong disipulong ini. Bako ining pagbunyag nin mga omboy. Iyan bautismo nin mga tawo na nagturubod, na nagdesisyon na maglingkod ki Jehova.—Mateo 28:19; Gibo 8:12.

8. Kun boot nindong pabautismo, kiisay sa kongregasyon nindo iyan ipapaisi, asin taano?

⁸ Kun nakapagdesisyon na kamo na maglingkod ki Jehova asin boot na magpabautismo, ano an saindong gigibohon? Ipaisi nindo an saindong pagmawot sa nangengenot na paraataman sa kongregasyon nin mga Saksi ni Jehova na saindong inaasosyaran. Sia, kaiba kan ibang kamagurangan sa kongregasyon, maogmang irerepaso saindo an mga impormasyon na kaipuhan nindong maaraman tanganing makapaglingkod sa Dios sa maaako na paagi. Dangan puwedeng iareglo an saindong pagpabautismo.

AN KABOTAN NIN DIOS PARA SA SAINDO NGONYAN

9. Ano an ginibo ni Noe bago kan baha na kabotan nin Dios na gibohon nindo ngonyan?

⁹ Bago kan baha, ginamit ni Jehova si Noe, “sarong parahulit nin katanosan,” tanganing magpatanid kan nagdadangadang na kalaglagan asin itokdo an solamenteng lugar nin seguridad, an dahong. (Mateo 24:37-39; 2 Pedro2:5; Hebreo 11:7) An kabotan nin Dios iyo na ngonyan gibohon na nindo an siring na trabahong paghuhulit. Si Jesus naghula dapit kan satong aldaw: “Ining maogmang bareta nin kahadean ihuhulit sa bilog na ineerokan na daga sa pagpatotoo sa  gabos na nasyon; asin dangan madatong an katapusan.” (Mateo 24:14) Kaipuhan manodan nin iba an mga bagay na saindong nanodan dapit sa mga katuyohan nin Dios kun boot nindang maligtas sa katapusan kan sistemang ini asin mabuhay na daing sagkod. (Juan 17:3) Dai daw napapahiro an saindong puso na makikabtang sa paghiras kan nagliligtas buhay na kaaraman na ini sa iba?

10. (a) Anong halimbawa ni Jesus an kaipuhan na sunodon niato sa pagkamoot sa tawo? (b) Paano an kadaklan sa paghuhulit isinasagibo?

¹⁰ Sunodon an halimbawa ni Cristo. Dai nia hinalat na an tawo dumolok saiya, kundi hinanap nia an mga maghihinanyog sa mensahe nin Kahadean. Asin tinogon nia an saiyang mga parasonod—gabos sainda—naggibo nin siring. (Mateo 28:19; Gibo 4:13; Roma 10:10-15) Paagi sa pagsonod kan mga togon nin instruksyon asin halimbawa ni Jesus, an enot na mga Kristiano dinumanan an mga tawo sa saindang harong. Sinda “nagharong-harong” na dara an mensahe nin Kahadean. (Lucas 10:1-6; Gibo 20:20) Ini pa giraray an pangenot na paagi na isinasagibo kan tunay na mga Kristiano an ministeryo sa ngonyan.

11. (a) Taano ta kaipuhan an kosog boot tanganing ihulit an dapit sa kahadean nin Dios, alagad taano ta dai kita dapat matakot? (b) Paano daw hiniheling ni Jehova an trabahong ginigibo niato?

¹¹ Kaipuhan an kosog-boot sa paggibo kaini. Si Satanas asin an saiyang kinaban siertong paoontokon kamo, kun paano na hiningoang paontokon an enot na mga parasunod ni Cristo sa paghuhulit. (Gibo 4:17-21; 5:27-29, 40-42) Alagad dai kamo dapat matakot. Kun paanong tinabangan ni Jehova asin pinakosog an enot na mga Kristiano, siring man an saiyang gigibohon saindo ngonyan. (2 Timoteo 4:17) Kaya magin mapuso! Patunayan na talagang namomotan nindo si Jehova asin an saindong kapuwa tawo paagi sa biyong pakikabtang sa nagliligtas buhay na trabahong paghuhulit asin pagtotokdo. (1 Corinto 9:16; 1 Timoteo 4:16) Dai ni Jehova lilingawan an saindong ginigibo, kundi mayaman na bebendisyonan kamo.—Hebreo 6:10-12; Tito 1:2.

12. Ano an manonodan niato sa halimbawa kan agom ni Lot?

¹² Mayong ikaka-alok na tunay na halaga ining gurang na sistema, kaya dai mag-isip na igwang mawawara saindo kun tatalikodan nindo iyan. “Girumdoma an agom ni Lot,” sabi ni Jesus. (Lucas 17:32) Pakatapos na sia asin an saiyang pamilya makadulag sa Sodoma, nagsalingoy sia na igwang paghinayang sa mga bagay na saiyang nawalat. Naheling nin Dios kun yaon saen an saiyang puso, asin sia nagin hariging asin.  (Genesis 19:26) Dai mag-arog sa agom ni Lot! Itorohok an saindong mata sa enotan, sa “tunay na buhay” sa matanos na bagong areglo nin Dios.—1 Timoteo 6:19.

PILION AN BUHAY NA DAING SAGKOD SA PARAISO SA DAGA

13. Paano inatubang ni Jesus an pagpili na kaipuhan gibohon niato gabos?

¹³ Totoo, igwa sana nin duwang pagpipilian. Ikinomparar iyan ni Cristo sa pagpili sa arin man na duwang dalan. An saro, sabi nia, “halakbang asin mahiwas.” Dian kaiyan an mga nag-aagi tinotogotan nin mga libertad na paoyonan an saindang sadiri. An sarong dalan, minsan siring, “piot.” Iyo, an yaon sa dalan na iyan kaipuhan na sumonod sa mga intruksiyon asin mga pagboot nin Dios. An kadaklan, sabi ni Jesus, pinili an mahiwas na dalan, dikit sana an yaon sa piot. Arin na dalan an saindong pipilion? Sa saindong pagpili ini an saindong girumdomon: An mahiwas na dalan tolos man maabot sa katapusan—kalaglagan! Sa ibong na kampi, an piot na dalan gigiyahan kamo pasiring sa bagong areglo nin Dios. Duman kamo puwedeng makikabtang na gibohon mamuraway na paraiso an daga, kun saen kamo puwedeng mabuhay na dai nin sagkod sa kaogmahan.—Mateo 7:13, 14.

14. Sa ano kamo kaipuhan magin kabtang tanganing maligtas na buhay pasiring sa bagong areglo nin Dios?

¹⁴ Dai mag-isip na igwa nin dakol na iba-ibang dalan, o tinampo, na puwede nindong lakawan tanganing kamtan an buhay sa bagong areglo nin Dios. Igwa sana nin saro. Igwa sana man nin sarong dahong na nagligtas sa Baha, bakong nagkapirang baroto. Asin magkakaigwa sana nin sarong organisasyon—an naheheling na organisasyon nin Dios—na maliligtas na buhay sa nagdadangadang na “dakulang kahorasaan.” Talagang bakong tama na an gabos na relihiyon pasiring sa saro sanang padudumanan. (Mateo 7:21-23; 24:21) Kaipuhan magin kamong kabtang kan organisasyon ni Jehova, na ginigibo an saiyang kabotan, tanganing mag-ako kan saiyang bendisyon na buhay na daing katapusan.—Salmo 133:1-3.

15. (a) Ano an kaipuhan niatong gibohon aroaldaw? (b) Anong paglaom an bako sanang pangatorogan?

¹⁵ Kaya papagdanayon na maliwanag an retrato kan ipinanugang bagong areglo nin Dios sa saindong isip asin puso. Aroaldaw isipon an dakulang premyo na inaandam ni Jehova sa saindo—an mabuhay nin daing sagkod sa Paraiso sa daga. Bako ining pangatorogan sana. Iyan tunay! Huli ta an panuga kan Biblia siertong maootob: “An mga matanos mismo magmamana kan daga, asin sinda mabubuhay noarin pa man dian . . . Mantang an mga maraot popotolon, maheheling nindo iyan.”—Salmo 37:29, 34.

[Mga Hapot Para sa Pag-adal]

[Ritrato sa pahina 251]

Idusay an saindong sadiri ki Jehova . . . asin magpabautismo

[Ritrato sa pahina 253]

“Girumdoma an agom ni Lot”

 [Mga ritrato sa pahina 254]

Papagdanayon na maliwanag sa saindong isip asin puso an bagong palakaw nin Dios