Pagmidbid sa Tunay na Relihiyon
Kapitulo 22
Pagmidbid sa Tunay na Relihiyon
1. Siisay an naggigibo nin tunay na relihiyon kan enot na siglo?
DAING duwa-duwa kun siisay an naggigibo nin tunay na relihiyon kan enot na siglo. Idto an mga parasunod ni Jesu-Cristo. Ini gabos miembro kan sarong Kristianong organisasyon. Ano man ngonyan? Paano puwedeng mamidbid an naggigibo kan tunay na relihiyon?
2. Paano puwedeng mamidbid an naggigibo kan tunay na relihiyon?
2 Sa pagpaliwanag kun paano niato ini magigibo, si Jesus nagsabi: “Paagi sa saindang mga bunga mamimidbid nindo sinda. . . . An gabos na kahoy na marahay nagbubunga nin marahay, alagad an gabos na kahoy na maraot nagbubunga nin maraot; . . . Tunay, kun siring, paagi sa saindang mga bunga mamimidbid nindo an mga tawong iyan.” (Mateo 7:16-20) Anong marahay na mga bunga an lalaoman nindong paluwason nin tunay na mga parasamba sa Dios? Ano an maninigo nindang sinasabi asin ginigibo ngonyan?
NAGPAPAKANGBANAL SA NGARAN NIN DIOS
3, 4. (a) Ano an enot na kahagadan sa Arogan na Pamibi ni Jesus? (b) Paano pinakangbanal ni Jesus an ngaran nin Dios?
3 An tunay na mga parasamba sa Dios magawe kaoyon sa Arogan na Pamibi na itinao ni Jesus sa saiyang mga parasunod. An enot na nasabihan ni Jesus dian iyo ini: “Ama niamo na nasa langit, pakangbanalon logod an saimong ngaran.” Arog kaini an pagkasabi kan mga tataramon na ini sa saro pang bersion kan Biblia: “An saimo logod na ngaran pakangbanalon.” (Mateo 6:9, Jerusalem Bible) Ano an boot sabihon kan pagpakangbanal sa ngaran nin Dios? Paano iyan ginibo ni Jesus?
4 Ipinaheling ni Jesus kun paano nia iyan ginigibo kan sia magsabi sa pamibi sa saiyang Ama: “Ipinahayag ko an saimong ngaran sa mga tawo na itinao mo sa sako hale sa kinaban.” (Juan 17:6) Iyo, ipinamidbid ni Jesus sa iba an ngaran nin Dios, si Jehova. Dai sia nagkulang sa paggamit sa ngaran na iyan. Aram ni Jesus na katuyohan kan saiyang Ama na an Saiyang ngaran mapamuraway sa bilog na daga. Kaya sia nagtao kan halimbawa sa pagbalangibog kan ngaran na iyan asin pagpakangbanal kaiyan.—Juan 12:28; Isaias 12:4, 5.
5. (a) Paano an Kristianong kongregasyon konektado sa ngaran nin Dios? (b) Ano an kaipuhan na gibohon niato tanganing magkamit nin kaligtasan?
5 Ipinaheheling kan Biblia na an mismong pag-eksister kan tunay na kongregasyon Kristiano konektado sa ngaran nin Dios. Si apostol Pedro nagpaliwanag na an Dios “nagtao kan saiyang atension sa mga nasyon tanganing kumua hale sa sainda nin sarong banwaan para sa saiyang ngaran.” (Gibo 15:14) Kaya an tunay na banwaan nin Dios kaipuhan na ibilang an saiyang ngaran na banal asin ipamidbid iyan sa bilog na daga. An totoo, an pakaaram sa ngaran na iyan kaipuhan para sa kaligtasan, arog kan sabi kan Biblia: “Huli ta ‘an gabos na nag-aapod sa ngaran ni Jehova maliligtas.’”—Roma 10:13, 14.
6. (a) Ibinibilang daw na banal an ngaran nin Dios kan kadaklan na iglesya? (b) Igwa daw nin siisay man na nagpapatotoo sa ngaran nin Dios?
6 Ngonyan, siisay an ibinibilang an ngaran nin Dios na banal asin ipinamimidbid iyan sa bilog na daga? An mga iglesya sa kadaklan linilikayan an paggamit sa ngaran na Jehova. An iba ngani hinale na iyan sa saindang mga traduksion kan Biblia. Minsan siring, kun makikipag-olay kamo sa saindong pagtaraed asin parate nindong masasabihan si Jehova, na ginagamit an saiyang ngaran, sa paghona nindo sa anong organisasyon ninda kamo iaasosyar? Saro sana an banwaan na talagang nag-aarog sa halimbawa ni Jesus sa bagay na ini. An pangenot na katuyohan ninda sa buhay maglingkod sa Dios asin magpatotoo sa saiyang ngaran, kapareho ni Jesus. Kaya ginamit ninda an ngaran sa Kasuratan na “mga Saksi ni Jehova.”—Isaias 43:10-12.
PAGBALANGIBOG KAN KAHADEAN NIN DIOS
7. Paano ipinaheling ni Jesus an halaga kan kahadean nin Dios?
7 Sa Arogan na Pamibi na itinao ni Jesus, ipinaheling man nia an halaga kan kahadean nin Dios. Tinokdoan nia an mga tawo na mamibi: “Dumatong logod an kahadean mo.” (Mateo 6:10) Paorootro idinoon ni Jesus an Kahadean bilang an solamenteng solusyon sa mga problema kan katawohan. Ini ginibo nia asin kan saiyang mga apostol paagi sa paghuhulit sa mga tawo manongod sa kahadean na iyan “sa baryo-baryo” asin “sa harong-harong.” (Lucas 8:1; Gibo 5:42; 20:20) An kahadean nin Dios iyo an tema kan saindang paghuhulit asin pagtotokdo.
8. Paano ipinaheling ni Jesus kun ano an magigin pangenot na mensahe kan saiyang tunay na mga parasunod sa “huring mga aldaw” na ini?
8 Kumusta man sa satong aldaw? Ano an pangenot na katokdoan kan tunay na organisasyon Kristiano nin Dios? Sa paghula manongod sa “huring mga aldaw” na ini, si Jesus nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Kaya an Kahadean dapat na iyo an pangenot na mensahe kan banwaan nin Dios ngonyan.
9. Siisay ngonyan an naghuhulit kan mensahe kan Kahadean?
9 Hapota an saindong sadiri: Kun may sarong magdian sa saindong harong asin sia nagtataram manongod sa kahadean nin Dios bilang an tunay na paglaom para sa katawohan, sa anong organisasyon nindo iaasosyar an tawong iyan? An mga miembro daw nin ibang relihiyon apuwera sa mga Saksi ni Jehova nakipag-olay na saindo manongod sa kahadean nin Dios? Tara, pipira ngani sa sainda an nakakaaram kun ano iyan! Sinda daing girong manongod sa gobyerno nin Dios. Pero an gobyernong iyan sarong bareta na nakakatanyog sa kinaban. Si propeta Daniel naghula na an kahadean na ini ‘maronot asin matapos sa gabos na ibang kahadean asin iyan sana an maghahade sa daga.’—Daniel 2:44.
PAGGALANG SA TATARAMON NIN DIOS
10. Paano si Jesus nagpaheling nin paggalang sa Tataramon nin Dios?
10 An saro pang paagi na an mga naggigibo nin tunay na relihiyon puwedeng mamidbid iyo an saindang pagtratar sa Biblia. Si Jesus nagpaheling nin paggalang sa Tataramon nin Dios sa gabos na panahon. Paorootro ginamit nia iyan bilang an pinakaultimong autoridad sa mga bagay. (Mateo 4:4, 7, 10; 19:4-6) Si Jesus nagpaheling man nin paggalang sa Biblia paagi sa pamumuhay kaoyon sa mga katokdoan kaiyan. Noarin man dai nia minenus an Biblia. Imbes, kinondenar nia an mga dai nakapagtokdo kaoyon sa Biblia asin naghingoa na paluyahon an puwersa kan mga katokdoan kaiyan paagi sa pag-enot sa saindang sadiring mga ideya.—Marcos 7:9-13.
11. Anong kaisipan manongod sa Tataramon nin Dios an parateng ipinaheheling kan mga iglesya?
11 Kumusta man an mga iglesya nin Kakristianohan kun dapit sa halimbawa ni Cristo sa bagay na ini? Igwa daw sinda nin hararom na paggalang sa Biblia? An dakol na klerigo ngonyan dai nagtutubod sa tala sa Biblia manongod sa pagkakasala ni Adan, baha kan aldaw ni Noe, si Jonas asin an dakulang sira, asin iba pa. Sinda nagsasabi man na an tawo naglataw paagi sa ebolusyon, bakong paagi sa direktang paglalang nin Dios. Paagi kaiyan sinda daw nagpapakosog sa paggalang sa Tataramon nin Dios? Saro pa, may mga nangengenot sa iglesya na nangangatanosan na an pagdodorog sa luwas nin kasal bakong sala, o na puwede pa nganing magin tama an homoseksuwalidad o poligamya. Sasabihon daw nindo na sinasadol ninda an mga tawo na gamiton an Biblia bilang saindang giya? Tunay na dai sinda nag-aarog sa halimbawa kan Aki nin Dios asin sa saiyang mga apostol.—Mateo 15:18, 19; Roma 1:24-27.
12. (a) Taano an pagsamba nin dakol na igwa ngani kan Biblia ta dai nakakaogma sa Dios? (b) Kun an tuyong mga parakasala tinotogotan na magdanay na may marahay na kamugtakan sa iglesya, ano an kaipuhan na ikonklusyon niato?
12 May mga miembro kan iglesya na igwa kan Biblia asin pinag-aadalan pa ngani iyan, alagad an saindang pamumuhay nagpaparisa na sinda dai nagkukuyog dian. Manongod sa siring na mga tawo, an Biblia nagsasabi: “Sinda nagpapahayag na midbid ninda an Dios, alagad ta sinda nagpapainda sa saiya paagi sa saindang mga gibo.” (Tito 1:16; 2 Timoteo 3:5) Kun an mga miembro kan iglesya na nagsusugal, nagbuburat o naggigibo nin iba pang sala tinotogotan na magdanay na may marahay na kamugtakan sa laog kan saindang iglesya, ano an ipinaririsa kaini? Iyan ebidensia na an saindang relihiyosong organisasyon dai inooyonan nin Dios.—1 Corinto 5:11-13.
13. Anong seryosong pagdedesisyon an kaipuhan na gibohon nin saro kun nadiskobre nia na an mga katokdoan kan saiyang iglesya bakong kaoyon kan Biblia?
13 Kun hinorophorop nindo an naenot na mga kapitulo na nagluwas sa magasin na ini, na pinag-aadalan an mga teksto sa Biblia na yaon dian, naaraman na nindo an pundamental na mga katokdoan kan Tataramon nin Dios. Alagad ano kun an mga katokdoan kan relihiyosong organisasyon na naaayonan nindo bakong kaoyon sa mga katokdoan kan Tataramon nin Dios? Kun siring igwa kamo nin magabat na problema. Iyan an problema nin pagdedesisyon kun baga aakoon an katotoohan kan Biblia o isisikwal iyan apabor sa mga katokdoan na dai sinusuportaran kan Biblia. Siyempre, an gigibohon nindo sadiri nindong desisyon. Minsan siring, kaipuhan na pagturotimbangon nindo nin maingat an mga bagay. Ini huli ta an desisyon na gigibohon nindo makakaapektar sa saindong kamugtakan sa atubang nin Dios asin sa saindong paglaom na mabuhay sagkod lamang sa paraiso digdi sa daga.
PAGDADANAY NA SIBLAG SA KINABAN
14. (a) Ano an saro pang midbidan kan tunay na relihiyon? (b) Taano ta napakahalaga na an tunay na mga parasamba makaotob sa kahagadan na ini?
14 An saro pang nagpapamidbid na tanda sa mga naggigibo kan tunay na relihiyon iyo na, arog kan sabi ni Jesus, “sinda bakong kabtang kan kinaban.” (Juan 17:14) Ini nangangahulogan na an tunay na mga parasamba nagdadanay na siblag sa maraot na kinaban asin sa mga gibo-gibo kaiyan. Si Jesu-Cristo nagsayuma na magin politikal na namomoon. (Juan 6:15) Masasabotan nindo kun taano ta napakahalaga kan pagdadanay na siblag sa kinaban kun magigirumdoman nindo na sinasabi kan Biblia na si Satanas na Diablo an poon kan kinaban. (Juan 12:31; 2 Corinto 4:4) An pagigin seryoso kan bagay na ini orog pang maheheling sa sinasabi kan Biblia: “An siisay man, kun siring, na magin katood kan kinaban ginigibo an saiyang sadiri na kaiwal nin Dios.“—Santiago 4:4.
15. (a) An mga iglesya daw na midbid nindo talagang “bakong kabtang kan kinaban”? (b) May aram daw kamong relihiyon na nakakaabot sa kahagadan na ini?
15 Ipinaheheling daw kan mga katunayan na isinasaboot an bagay na ini kan mga iglesya sa saindong komunidad? An klero daw saka an mga miembro kan mga kongregasyon talagang “bakong kabtang kan kinaban”? O sinda daw napapalabot na gayo sa nasyonalismo, politika asin mga iriwal sa rasa kan kinaban? An mga hapot na ini bakong masakit na simbagon, ta an mga aktibidad kan mga iglesya aram na gayo. Sa ibong na kampi, madali man na helingon an mga aktibidad kan mga Saksi ni Jehova. Sa paggibo kaiyan, maririsa nindo na sinda talagang nag-aarog sa halimbawa ni Cristo asin kan saiyang enot na mga parasunod paagi sa pagdadanay na siblag sa kinaban, sa politikal na mga gibo-gibo kaiyan asin sa paslo, inmoral, madahas na mga gibo kaiyan.—1 Juan 2:15-17.
PAGKAMINOROOTMOOTAN
16. Ano an sarong mahalagang paagi na namimidbid an tunay na mga disipulo ni Cristo?
16 An pinakaimportanteng paagi na puwedeng mamidbid an tunay na mga disipulo ni Cristo iyo an pagkaminorootmootan ninda. Si Jesus nagsabi: “Paagi kaini an gabos makakaaram na kamo an sakong mga disipulo, kun kamo nagkakaminorootmootan.” (Juan 13:35) An relihiyosong mga organisasyon daw na midbid nindo igwa kan pagkamoot na ini? Halimbawa, ano an ginigibo ninda kun an mga nasyon na iniistaran ninda naggeguerra?
17. Kumusta an relihiyosong mga organisasyon asin an saindang mga miembro kun dapit sa pagkaotob sa kahagadan na magkaminorootmootan?
17 Aram nindo kun ano an parateng nangyayari. Sa pagboot nin kinabanon na mga tawo an mga miembro kan laen-laen na relihiyosong organisasyon minaduman sa mga kampo de batalya asin ginagadan an saindang kapagtubod na tagaibang nasyon. Kaya an mga Katoliko ginagadan an Katoliko, an Protestante ginagadan an Protestante asin an Muslim ginagadan an Muslim. Sa paghona daw nindo an siring na gawe sono sa Tataramon nin Dios asin talagang nagpapaheling kan espiritu nin Dios?—1 Juan 3:10-12.
18. Kumusta man an mga Saksi ni Jehova sa bagay na ini nin pagpaheling nin pagkaminorootmootan?
18 Kumusta an mga Saksi ni Jehova sa bagay na ini nin pagpaheling nin pagkaminorootmootan? Dai sinda nag-aarog sa gibo kan kinabanon na mga relihiyon. Dai ninda ginagadan an mga kapagtubod sa mga kampo de batalya. Dai sinda nagkasala sa pamumuhay sa putik paagi sa pagsabing, “Ako namomoot sa Dios,” mantang ikinaoongis an saindang tugang na iba an nasyonalidad, tribo o rasa. (1 Juan 4:20, 21) Alagad sinda nagpapaheling man nin pagkamoot sa ibang paagi. Paano? Paagi sa saindang pagtratar sa saindang pagtaraed asin paagi sa saindang mamomoton na mga paghihingoa na tabangan an iba na makanood manongod sa Dios.—Galacia 6:10.
SARONG TUNAY NA RELIHIYON
19. Taano ta makatanosan asin makakasuratan na sabihon na igwa nin saro sanang tunay na relihiyon?
19 Makatanosan sana na saro sana an tunay na relihiyon. Ini kaoyon sa bagay na an tunay na Dios sarong Dios, “bakong nin karibarawan, kundi nin katoninongan.” (1 Corinto 14:33) An Biblia nagsasabi na sa katunayan igwa sana nin “sarong pagtubod.” (Efeso 4:5) Kun siring, siisay an minakompuwesto sa grupo nin tunay na mga parasamba ngonyan?
20. (a) Sa liwanag kan ebidensia, siisay an itinotokdo kan publikasyon na ini bilang an tunay na mga parasamba ngonyan? (b) Iyan daw an paniniwala nindo? (c) Ano an pinakamarahay na paagi na mamidbid na gayo an mga Saksi ni Jehova?
20 Dai kami nag-aalangan na magsabi na sinda an mga Saksi ni Jehova. Tangani kamong makombensir kaini inaagda mi kamo na orog sindang midbidon. An pinakamarahay na paagi na gibohon ini iyo an pag-atender sa saindang mga pagtiripon sa Kingdom Hall kan mga Saksi ni Jehova. Mantang ipinaheheling kan Biblia na an paggibo nin tunay na relihiyon nagtatao nin dakulang pagkakontento ngonyan asin nagbubukas kan dalan tanganing magkamit nin buhay na daing katapusan sa paraiso sa daga, tunay na magigin kapakipakinabang na gibohon nindo an siring na pagsiyasat. (Deuteronomio 30:19, 20) Itinatao mi sa saindo an mainit na imbitasyon na gibohon iyan. Taano ta dai magsiyasat ngonyan?
[Mga Hapot Para sa Pag-adal]
[Ritrato sa pahina 185]
Kun kamo makikipag-olay manongod ki Jehova asin sa saiyang kahadean, sa anong relihiyon kamo iaasosyar nin mga tawo?
[Mga ritrato sa pahina 186]
Iginagalang daw nin saro an Tataramon nin Dios kun dai sia nakapamumuhay sono dian?
[Ritrato sa pahina 188, 189]
Si Jesus nagsayuma na magin politikal na namomoon
[Ritrato sa pahina 190]
Kamo mainit na iniimbitaran na mag-atender sa mga pagtiripon nin mga Saksi ni Jehova
