Kapitulo 19

Pakalihis kan Armagedon, Sarong Paraisong Daga

1. (a) Ano an punto-de-vista nin kadaklan manongod sa Armagedon? (b) Ano an sinasabi kan Biblia manongod dian?

 AN “ARMAGEDON” makatatakot na termino para sa dakol. Parate na ginagamit iyan kan mga namomoon sa kinaban para sa sarong posibleng Guerra Mundial III. Minsan siring, an Biblia nagtataram manongod sa Armagedon bilang an lugar nin matanos na ralaban nin Dios. (Kapahayagan 16:14, 16, King James Version) An ralaban na ini nin Dios maandam kan dalan para sa sarong matanos na bagong areglo.

2. (a) Siisay an lalaglagon sa Armagedon? (b) Kaya anong mga gawe an madonong niatong dapat na likayan?

² Bakong arog kan mga ralaban nin tawo, na minagadan pareho sa marahay asin sa maraot, an lalaglagon sana kan Armagedon iyo an mga maraot. (Salmo 92:7) Si Jehova Dios an magigin Hokom, asin hahaleon nia an siisay man na tuyong habong kumuyog sa saiyang matanos na mga pagboot. Ngonyan dakol an dai man lamang nin naheheling na sala sa mga bagay na arog baga kan pakikisaro, pagbuburat, pagputik o pandadaya. Alagad ta, sono sa Dios, an mga bagay na ini sala. Kaya sa Armagedon dai nia ililigtas an mga padagos na naggigibo kaiyan. (1 Corinto 6:9, 10; Kapahayagan 21:8) Kun aram na an mga pagboot nin Dios sa mga bagay na ini, mahalaga para sa mga tawo na tibaad naggigibo nin siring na mga bagay na magbakle.

3. (a) Sa ano ibinaing ni Jesus an katapusan kan presenteng kinaban? (b) Ano an mangyayari ki Satanas asin sa saiyang mga demonyo? (c) Sono sa mga kasuratan na nasa kahon sa minasunod na pahina, anong mga kamugtakan an kakamtan sa paraisong daga?

³ Pakalihis kan Armagedon mayo nin matatada na kabtang kan maraot na kinaban na ini. Solamente an mga naglilingkod sa Dios an magpapadagos na mabuhay. (1 Juan 2:17) Ibinaing ni Jesu-Cristo an kamugtakan sa aldaw ni Noe. (Mateo 24:37-39; 2 Pedro 3:5-7, 13; 2:5) Pakalihis kan Armagedon, an kahadean nin Dios iyo na sana an solamenteng gobyerno na mamamahala sa daga. Mayo na si Satanas asin an saiyang mga demonyo. (Kapahayagan 20:1-3) Helinga, sa kahon na nasa pahinang ini, an nagkapira sa mga bendisyon na ipinaheheling kan Biblia na kakamtan nin makinuyog na mga tawo.

  MAGIGIN MATONINONG AN BILOG NA KATAWOHAN

 “Namundag sa sato an sarong aki, may itinao sa satong sarong aking lalaki; asin an sa-prinsipeng pamamahala mamumugtak sa saiyang abaga. Asin an saiyang ngaran aapodon na . . . Prinsipe nin Katoninongan. An kadakolan kan sa-prinsipeng pamamahala asin katoninongan magigin daing kasagkodan.”—Isaias 9:6, 7.

 “Sa saiyang mga aldaw an matanos mamumurak, asin an kadakolan nin katoninongan sagkod na mayo na nin bulan. Asin magkakaigwa sia nin mga sakop hale sa dagat sagkod sa dagat asin hale sa Salog sagkod sa kaporoporohi kan daga.”—Salmo 72:7, 8.

 MAWAWARA NA AN GUERRA

 “Madia kamo, banwaan, helingon nindo an mga ginigibo ni Jehova, kun paano sia nagbugtak nin mga ngangalasan sa daga. Pinapaontok nia an mga ralaban sagkod sa kaporoporohi kan daga.”—Salmo 46:8, 9.

  MAGAGAYON NA HARONG ASIN MAKAOOGMANG TRABAHO PARA SA GABOS

 “Sinda siertong magtotogdok nin mga harong asin mag-oontok sinda dian . . . Dai sinda magtotogdok asin iba an mag-oontok; dai sinda matanom asin iba an makakan . . . An ginibo kan saindang mga kamot lubos na gagamiton kan sakuyang mga pinili. Dai sinda magpapagal na mayong kapakanan, ni mangangaki man sinda para sa karibokan; huli ta sinda an mga aki na kompuwesto kan mga pinili ni Jehova, asin an saindang mga aki kaiba ninda.”—Isaias 65:21-23.

 MAWAWARA NA AN KRIMEN, KADAHASAN ASIN KARATAN

 “Huli ta an mga maraot gagadanon . . . Asin dai na mahahaloy, asin ta an maraot mawawara na; asin hehelingon mo nanggad an saiyang namumugtakan, asin ta mayo na sia dian.”—Salmo 37:9, 10.

 “Kun manongod sa mga maraot, sinda popohoon sa daga; asin kun manongod sa mga madaya, sinda hahaleon dian.”—Talinhaga 2:22.

  MAGIGIN PARAISO AN BILOG NA DAGA

 Si Jesus nagsabi: “Ika makakaibahan ko sa Paraiso.”—Lucas 23:43.

 “An mga matanos mismo magmamana kan daga, asin sinda mag-eerok dian sagkod lamang.”—Salmo 37:29.

 MAGIGIN ABUNDA AN MASISIRAM NA KAKANON PARA SA GABOS

 “Si Jehova kan mga hukbo magibo para sa gabos na banwaan . . . nin bangkete nin matatabang putahe, bangkete nin arak na laon, nin matatabang putahe na pano nin hotok.”—Isaias 25:6.

 “Magkakaigwa nin kadakoldakol na tipasi sa ibabaw kan daga; magkakaigwa nin abundansia sa alitoktok kan kabukidan.” “An daga mismo magtatao kan bunga kaiyan; an Dios, an satong Dios, mabendisyon sa sato.”—Salmo 72:16; 67:6.

4, 5. (a) Anong mga kamugtakan an mawawara na sa paraisong daga? (b) Ano an magigibo nin mga tawo na, sa dakol na lugar, dai ninda kayang gibohon ngonyan?

 ⁴ Segurado na boot nindong mabuhay sa paraisong daga na kapareho kan tatamnan na dian linalang an enot na tawong si Adan. (Genesis 2:8; Lucas 23:43) Isip-isipa—mayo na nin guerra, krimen o kadahasan. Makakapaglakaw kamo saen man sa ano man na oras kan aldaw o banggi na dai natatakot na kun mapaano kamo. Mayo na an mga maraot.—Salmo 37:35-38.

⁵ Ini nangangahulogan na mayo na nin madayang mga politiko asin paslong mga namomoon sa negosyo na man-aapi sa mga tawo. Ni magagabatan pa man an mga tawo nin haralangkaw na buhis tanganing mabayadan an mga armas militar. Nungka pa na an siisay man mawaran nin masiram na pagkakan asin komportableng erokan huli ta dai nia kayang bayadan iyan. Mayo na an kadaihan nin trabaho, implasyon asin haralangkaw na presyo. An mga problema na nagtatao nin kasakitan sa mga pamilya ngonyan mawawara na. An gabos magkakaigwa nin marahay na trabaho, asin maheheling ninda asin makakamtan ninda an mga bunga kan saindang kapagalan.

6. (a) Ano an magigin trabaho kan mga nakaligtas sa Armagedon? (b) Paano bebendisyonan nin Dios an gigibohon na trabaho duman?

⁶ Enot sa gabos, an mga makaliligtas sa Armagedon magkakaigwa kan trabaho na paglinig sa daga asin paghale kan mga kagabaan kan daan na palakaw na ini. Dangan magkakaigwa sinda kan pribilehiyo, sa pamamahala kan Kahadean, na kultibaron an daga asin gibohon iyan na magayon na lugar na erokan. Kamakaoogma nanggad kan trabahong iyan! Bebendisyonan nin Dios an gabos na gigibohon. Itatao nia an tamang klase nin klima sa pagtanom asin pag-ataman nin mga hayop, asin seseguradohon nia na ini maingatan sa helang asin danyos.

7. (a) Anong panuga nin Dios an maootob? (b) Ano an hinahalat nin mga Kristiano sono sa panuga nin Dios?

⁷ An panugang ini kan mamomoton na Kaglalang, na itinao paagi sa salmista kan Biblia, maootob: “Binibiklad mo an saimong kamot asin pinaninigoan an mawot nin lambang bagay na may buhay.” (Salmo 145:16) Iyo, an gabos na tamang pagmawot nin mga tawong matatakton sa Dios biyong paninigoan. Dai ngani niato kayang imahinaron kun gurano kagayon kan magigin buhay sa paraiso sa daga. Sa pagtaram manongod sa areglo nin Dios para sa pagbendisyon sa saiyang banwaan, si apostol Pedro nagsurat: “Igwa nin bagong kalangitan asin sarong bagong daga na satong hinahalat oyon sa  panuga [nin Dios], asin dian an katanosan an magdadanay.”—2 Pedro 3:13; Isaias 65:17; 66:22.

8. (a) Taano ta dai niato kaipuhan an bagong pisikal na kalangitan? (b) Ano an “bagong kalangitan”?

⁸ Ano an “bagong kalangitan” na ini? Iyan bakong bagong pisikal na kalangitan. Ginibo nin Dios na sangkap an satong pisikal na kalangitan, asin iyan nagtatao saiya nin kamurawayan. (Salmo 8:3; 19:1, 2) An “bagong kalangitan” nangangahulogan nin bagong pamamahala sa daga. An “kalangitan” ngonyan kompuwesto nin gibong tawong mga gobyerno. Sa Armagedon an mga ini mawawara. (2 Pedro 3:7) An “bagong kalangitan” na masalida dian iyo an langitnon na gobyerno nin Dios. An hade iyo si Jesu-Cristo. Alagad ta maghahade kaiba nia bilang kabtang kan “bagong kalangitan” an 144,000 sa saiyang maimbod na mga parasunod.—Kapahayagan 5:9, 10; 14:1, 3.

9. (a) Ano an “bagong daga”? (b) Ano an daga na lalaglagon?

⁹ Kun siring, ano man an “bagong daga”? Iyan bakong bagong planeta. Ginibo nin Dios an planetang Daga na tamang-tama na pag-istaran nin mga tawo, asin kabotan nia na iyan magdanay sagkod lamang. (Salmo 104:5) An “bagong daga” nangangahulogan nin bagong grupo o sosyedad nin mga tawo. Parate na ginagamit kan Biblia an terminong “daga” sa siring na paagi. Halimbawa, iyan nagsasabi: “An bilog na daga [nangangahulogan, mga tawo] nagpadagos na saro sana an lenguahe.” (Genesis 11:1) An “daga” na lalaglagon iyo an mga tawo na ginigibo an saindang sadiri na kabtang kan maraot na palakaw na ini nin mga bagay. (2 Pedro 3:7) An “bagong daga” na masalida sa sainda kompuwesto nin tunay na mga lingkod nin Dios na ibinulag an saindang sadiri sa kinaban na ini nin maraot na mga tawo.—Juan 17:14; 1 Juan 2:17.

10. (a) Siisay ngonyan an tinitipon, asin sa ano? (b) Sono sa mga kasuratan na nasa kahon sa pahinang ini, ano an gigibohon sa paraisong daga na dai kayang gibohon nin mga gobyerno nin tawo?

¹⁰ Ngonyan an mga tawo hale sa gabos na rasa asin nasyonalidad na magigin kabtang kan “bagong daga” tinitipon sa Kristianong kongregasyon. An pagkasararo asin katoninongan na nasa sainda sadit sanang paheling sa kun ano an magpapangyaring magin dakulang kagayagayahan an pag-istar sa paraisong daga pakalihis kan Armagedon. Tunay na papangyayarihon kan Kahadean nin Dios an dai ngani kayang laoman nin gobyerno nin tawo na gibohon. Helinga sana an nagkapira sa mga bendisyon na iyan na nasa kahon sa pahinang ini.

  SARONG MAMOMOTON NA ASOSASYON NIN MAGTURUGANG KAN BILOG NA KATAWOHAN

 “An Dios dai nagpapalaen, kundi sa lambang nasyon an tawo na natatakot sa saiya asin naggigibo nin katanosan saiyang inaako.”—Gibo 10:34, 35.

 “Uya! an sarong dakulang kadaklan, na dai nin siisay man na makakabilang, hale sa gabos na nasyon asin tribo asin banwaan patin tataramon . . . Dai na sinda magugutom ni mapapaha man.”—Kapahayagan 7:9, 16.

 KATONINONGAN SA TAHAW NINmMGA TAWO ASIN MGA HAYOP

 “An lobo mag-eerok na kasaro kan kordero, asin an leopardo maghihigdang kadorog kan kanding, asin an bakang ogbon asin an leon saka an hayop na basog mag-iiriba; asin sarong aking sadang an mangengenot sa sainda.”—Isaias 11:6; Isaias 65:25.

  MAWAWARA NA AN HELANG, PAGGURANG O KAGADANAN

 “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo usa, asin an dila kan pula makurahaw sa kaogmahan.”—Isaias 35:5, 6.

 “Asin an Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”—Kapahayagan 21:3, 4.

 AN MGA GADAN BUBUHAYON LIWAT

 “An oras maabot na an gabos na nasa mga lolobngan nin girumdoman makakadangog kan saiyang tingog asin maruluwas.”—Juan 5:28, 29.

 “Itinao kan dagat an mga gadan na yaon dian, asin itinao kan kagadanan asin kan Hades an mga gadan na yaon dian.”—Kapahayagan 20:13.

11. Ano an parateng nakararaot sa paraiso na ginigibo ngonyan nin mga tawo?

 ¹¹ An paraiso na sakop kan kahadean nin Dios magigin labi nanggad sa ano pa man na ikakatao kan daan na palakaw na ini! Totoo, may mga tawo ngonyan na ginibo an saindang istada na garo paraiso. Alagad an mga nag-iistar sa mga lugar na ini tibaad maisog asin paslo, asin tibaad nagkakainongisan pa ngani. Asin, pag-abot nin panahon, sinda naghehelang, naggugurang asin nagagadan. Alagad pakalihis kan Armagedon, an yaon sa paraiso na nasa daga bako sanang magagayon na harong, tatamnan asin parke.

12, 13. (a) Anong mga kamugtakan nin katoninongan an maeksister pakalihis kan Armagedon? (b) Ano an kaipuhan tanganing mangyari an mga kamugtakan na ini?

¹² Isip-isipa. An mga tawo hale sa gabos na rasa asin nasyonalidad makakanood na mag-iriba bilang sarong pamilya nin magturugang na lalaki asin babae. Sinda tunay na magkakaminorootmootan. Mayo nin siisay man na magigin paslo o maisog. Mayo nin siisay man na maoongis sa iba huli sana sa saiyang rasa, kolor, o pinaghalean. Mawawara na an daing binabasaran na pagkaanggot. An gabos sa daga magigin tunay na katood asin kataed kan gabos na iba pa. Tunay na iyan magigin paraiso sa espirituwal na paagi. Boot daw nindong mag-erok sa paraisong ini na sakop kan “bagong kalangitan”?

¹³ Ngonyan an mga tawo dakol an sinasabi manongod sa pag-iriba na may katoninongan, asin tinindog pa ngani an organisasyon nin “Naciones Unidas.” Alagad ta an mga tawo asin mga nasyon mas baranga ki sa kasuarin pa man. Ano an kaipuhan? An puso nin tawo kaipuhan na magbakle. Alagad ta imposible para sa mga gobyerno kan kinaban na ini na magibo an siring na milagro. Alagad ta an mensahe kan Biblia manongod sa pagkamoot nin Dios tunay na nakagigibo kaiyan.

14. Ano an nangyayari ngonyan na nagpapatunay na maootob an mga kamugtakan na ini sa paraiso?

¹⁴ Kun manodan na an matanos na bagong palakaw, an puso nin dakol napapahiro na mamoot sa Dios. Kaya sinda minapoon man na humiro sa mamomoton na paagi sa iba, kapareho nin Dios. (1 Juan 4:9-11, 20) Ini nangangahulogan nin dakulang pagbakle sa saindang buhay. An dakol na dating maisog asin may pagkaongis, arog nin maringis na mga hayop, nagigin mahoyo asin matoninong. Kapareho nin makinuyog na mga karnero, sinda tinitipon sa Kristianong aripompon.

15. (a) Ano an duwang grupo nin mga Kristiano? (b) Siisay an magigin mga enot na kabtang kan “bagong daga”?

¹⁵ Sa laog nin labing 1,900 na taon tinipon an “sadangoton na aripompon” nin 144,000 na Kristiano na maghahade kaiba ni Cristo. Pipira sana sa mga ini an natatada sa daga; an kadaklan naghahade na kaiba ni Cristo sa langit. (Lucas 12:32; Kapahayagan 20:6) Alagad  sa pagtaram manongod sa ibang Kristiano, si Jesus nagsabi: “Igwa pa ako nin ibang karnero, na bakong sa toril na ini [kan “sadangoton na aripompon”]; kaipuhan man na darahon ko an mga ini, asin sinda maghihinanyog sa sakong tingog, asin sinda manini sarong aripompon, sarong pastor.” (Juan 10:16) An sarong “dakulang kadaklan” kan “ibang karnerong” ini tinitipon ngonyan. Sinda an enot na magigin mga kabtang kan “bagong daga.” Iingatan sinda ni Jehova sa “dakulang kahorasaan” sa katapusan kan maraot na palakaw na ini tanganing padagos na mamuhay sa daganon na paraiso.—Kapahayagan 7:9, 10, 13-15.

16. Anong milagro an magpapangyari na magin nakaoogma an mag-erok kaiba kan mga hayop?

¹⁶ Pakalihis kan Armagedon may saro pang milagro na makakadugang sa mga kamugtakan sa paraiso. An mga hayop na kapareho kan leon, tigre, leopardo asin oso, na ngonyan puwedeng magin peligroso, magigin matoninong. Magayonon nanggad na mamasyar sa kadlagan asin sa kadikit na panahon ibanan nin sarong leon, asin tibaad paghaloyhaloy nin sarong dakulang oso! Nungka pang matatakot an siisay man sa ibang linalang.

17, 18. (a) Anong dahelan nin kamondoan an mawawara na sa paraisong daga? (b) Taano ta makasisierto kita na an sangkap na salud kakamtan nin gabos?

¹⁷ Pero minsan pa gurano kagayon kan mga harong asin tatamnan, minsan pa gurano kaboot asin kamamomoton kan mga tawo, o minsan pa gurano kamakiamigo kan mga hayop, kun kita naghehelang, naggugurang asin nagagadan igwa pa man giraray nin kamondoan. Alagad siisay an makakapagtao nin sangkap na salud sa gabos? An mga gobyerno nin tawo nasudya na haleon an kanser, helang sa puso asin iba pang mga helang. Alagad ta minsan pa iyan magibo ninda, inaadmitir nin mga doktor na iyan dai makakapaontok sa paggurang nin mga tawo. Kita maggugurang pa man giraray. Pag-abot nin panahon an satong mga mata madiklom, an satong kalamnan maluya, an satong kublit makurundot asin an mga organo sa laog kan satong hawak mararaot. Masunod an kagadanan. Makamomondo nanggad!

¹⁸ Pakalihis kan Armagedon, sa paraisong daga, an sarong makangangalas na milagro nin Dios maliwat sa gabos na iyan, huli ta an panuga kan Biblia: “Mayo nin nag-eerok na masabi: ‘Naghehelang ako.’” (Isaias 33:24) Kan si Jesu-Cristo nasa daga pinatunayan nia an saiyang kapangyarihan na magpaomay sa gabos na klase nin helang asin kamatean, na bunga kan kasalan na minana niato ki Adan. (Marcos 2:1-12; Mateo 15:30, 31) An paggurang papaontokon man sa pamamahala kan Kahadean. An gurang magigin hoben pa ngani. Iyo, ‘an laman nin tawo magigin mas malomoy ki sa kan sia aki pa.’ (Job  33:25) Makaoogma nanggad sa panahon na iyan na magmata kada aga asin marealisar na kamo mas mabagsik an salud ki sa kasuodma!

19. Anong ultimong kaiwal an paparaon, asin paano?

¹⁹ Tunay na mayo nin siisay man na nabubuhay sa mabagsik, sangkap na salud sa paraisong daga an magugustong magadan. Asin mayo nin siisay man na kinakaipuhan na magadan! An pag-ako ninda sa mga pakinabang kan pantubos na atang mangangahulogan sa kahurihurihi kan pagkakamit sa makangangalas na balaog nin Dios na “daing sagkod na buhay paagi ki Cristo Jesus na satong Kagurangnan.” (Roma 6:23) Arog kan sabi kan Biblia, si Cristo “kaipuhan na maghade sagkod na ikinabugtak na nin Dios an gabos na kaiwal sa irarom kan saiyang mga bitis. Bilang an ultimong kaiwal, an kagadanan paparaon.”—1 Corinto 15:25, 26; Isaias 25:8.

20. Siisay, apuwera sa mga nabubuhay ngonyan, an magkakamit kan paraisong daga, asin paano iyan magigin posible?

²⁰ Dawa an mga gadan na ngonyan magkakamit man kan paraisong daga. Sinda mabubuhay liwat! Kaya, sa panahon na iyan, imbes kan mga paisi nin pagkagadan, magkakaigwa nin maogmang mga bareta manongod sa mga binuhay liwat. Makangangalas nanggad na sabaton hale sa lolobngan an gadan na mga ama, ina, aki asin iba pang namomotan! Mayo nin mga punerarya, sementeryo o lapida na matatada tanganing makapakanos sa kagayonan kan paraisong daga.

21. (a) Siisay an matabang na seguradohon na an mga ley asin instruksion kan “bagong kalangitan” maotob? (b) Paano niato ikakapaheling na talagang minamawot niato an “bagong kalangitan” asin an “bagong daga”?

²¹ Siisay an mamamahala o magpapalakaw sa mga aktibidad digdi sa paraisong daga? An gabos na ley asin instruksion mahale sa “bagong kalangitan” sa itaas. Alagad sa ibabaw kan daga magkakaigwa nin maimbod na mga lalaki na nonombrahan tanganing seguradohon na maotob an mga ley asin instruksion na ini. Huli ta an mga lalaking ini nagrerepresentar sa langitnon na kahadean sa espesyal na paagi, inaapod sinda kan Biblia na “mga prinsipe.” (Isaias 32:1, 2; Salmo 45:16) Minsan sa Kristianong kongregasyon ngonyan may mga lalaki na ninombrahan kan banal na espiritu nin Dios tanganing mangataman asin mangenot sa mga aktibidad kaiyan. (Gibo 20:28) Pakalihis kan Armagedon makasasarig kita na sisiertohon ni Cristo na an tamang mga lalaki an nombrahan na magrepresentar kan gobyerno kan Kahadean, huli ta sa panahon na iyan sia magkakaigwa nin direktang pangunlabot sa mga bagay-bagay sa daga. Paano nindo ikakapaheling na kamo naghahalat nanggad kan “bagong kalangitan” asin “bagong daga” nin Dios? Paagi sa paggibo kan gabos nindong makakaya na maotob an mga kahagadan para sa pag-erok sa matanos na bagong palakaw na iyan.—2 Pedro 3:14.

[Mga Hapot Para sa Pag-adal]