Ranga Para sa mga May Depresyon

“An gabos na linalang padagos na nag-aaragrangay asin nagtitios nin kolog sagkod ngonyan.” (Roma 8:22) Dakula an pagsakit nin tawo kan iyan isurat kaidtong labi nang 1,900 na taon an nakaagi. Dakol an nagmomondo nin makuri o may depresyon. Kaya, sinadol an mga Kristiano: “Rangahon an mga kalag na nagmomondo nin makuri.”​—1 Tesalonica 5:14.

Ngonyan, mas dakula pa an kasakitan nin tawo, asin mas dakol kisa kasuarin man an may depresyon. Alagad maninigo daw niatong ipagngalas iyan? Dai man, ta sinasabi kan Biblia na an panahon ngonyan “huring mga aldaw” asin inaapod iyan na “delikadong mga panahon na masakit pakibagayan.” (2 Timoteo 3:​1-5) Ihinula ni Jesu-Cristo na sa huring mga aldaw, magkakaigwa nin “makatatakot na mga hehelingon.”​—Lucas 21:​7-11; Mateo 24:​3-14.

Kun an mga tawo nag-aagi sa halawig na kahaditan, takot, kamondoan, o iba pang negatibong emosyon, sinda parateng nagkakadepresyon. An causa nin depresyon o makuring kamondoan tibaad pagkagadan nin sarong namomotan, diborsio, pagkawara nin trabaho, o dai nahahaleng helang. An mga tawo nagkakadepresyon man kun sinda tinutubuan nin pagmate nin kadaihan nin halaga, kun hinohona ninda na sinda nagkulang asin binigo an gabos. An siisay man puwedeng manluya an boot huli sa masakit na situwasyon, pero kun an saro tinutubuan nin kadaihan nin paglaom asin daing naheheling na solusyon sa maraot na situwasyon, tibaad an ibunga grabeng depresyon.

An mga tawo kan suanoy na panahon nakamate man nin kaagid na mga saboot. Si Job nagtios nin helang asin personal na kadimalasan. An paghona nia binayaan na sia nin Dios, kaya nagpahayag sia nin pagkabalde sa buhay. (Job 10:1; 29:​2, 4, 5) Si Jacob nagkadepresyon huli sa pinaghohonang pagkagadan kan saiyang  aki, na habong paranga asin gusto nang magadan. (Genesis 37:​33-35) Huli sa pakamate nin kasalan sa sarong magabat na sala, si Hadeng David nanambitan: “Sa bilog na aldaw naglakaw akong mamondo. Ako namagol.”​—Salmo 38:​6, 8; 2 Corinto 7:​5, 6.

Ngonyan, dakol an nagkakadepresyon huli sa pagpalabilabi sa kapagalan, na hinihingoang sunodon an pan-aroaldaw na rutina na dai kaya kan saindang isip, emosyon, asin hawak. Minalataw na an tension, kaiba an negatibong mga kaisipan asin emosyon, puwedeng makaapektar sa hawak asin makakontribuwir sa kemikal na pagkawara nin balanse sa hotok, sa siring nagbubunga nin depresyon.​—Ikomparar an Talinhaga 14:30.

An Tabang na Kaipuhan Ninda

Si Epafrodito, sarong Kristianong taga-Filipos kan enot na siglo, “namomondo nin makuri huli ta nadangog [kan mga katood nia] na sia naghelang.” Si Epafrodito, na naghelang pakasugoa kan mga katood nia na pumasiring sa Roma dara an mga suplay para ki apostol Pablo, tibaad naghona na binigo nia an saiyang mga katood asin na sia ibinibilang nindang nagkulang. (Filipos 2:​25-27; 4:18) Paano nakatabang si apostol Pablo?

Pinapuli nia si Epafrodito na may darang surat sa mga katood na taga-Filipos na nagsabi: “[Si Epafrodito] tawan nindo kan pinagkatodan na pag-ako dian sa Kagurangnan na may bilog na kaogmahan; asin padagos na mamotan an siring na mga lalaki.” (Filipos 2:​28-30) An bagay na sia inomaw na gayo ni Pablo asin inako sia kan mga taga-Filipos na may init asin pagkamoot seguradong nakaranga ki Epafrodito asin nakatabang na maomayan an saiyang depresyon.

Daing duwa-duwa, an hatol kan Biblia na “rangahon an mga kalag na nagmomondo nin makuri” iyo an pinakamarahay. “Kaipuhan na maaraman mo na an iba nagmamakolog saimo bilang sarong persona,” sabi nin sarong babae na nagkadepresyon. “Kaipuhan na madangog mo an saro na magsabi, ‘Nasasabotan ko; mararahayan ka.’”

An tawong may depresyon parateng kaipuhan na iyo an gumibo kan inisyatiba paagi sa paghanap nin madinamayon na tawo na mapagsasabihan nia. An tawong ini maninigong magin matibay magdangog asin pasensiosong marhay. Maninigo niang likayan na  sermonan an may depresyon o magtaram na may paghusgar, arog baga kan, ‘Dai mo dapat isipon iyan’ o, ‘Iyan an salang kaisipan.’ An emosyon kan may depresyon delikadong marhay, asin mapagagrabe sana kan siring na mapagtatsar na mga komento an pagmate nia manongod sa saiyang sadiri.

An may depresyon tibaad may pagmateng sia daing halaga. (Jonas 4:3) Pero maninigong girumdomon nin saro na an talagang mahalaga kun gurano an pagpahalaga nin Dios sa saiya. Si Jesu-Cristo ibinilang nin mga tawo “na daing halaga,” pero dai kaini naliwat an tunay niang halaga sa Dios. (Isaias 53:3) Manarig kamo na, kun paanong namomotan nin Dios an saiyang padangat na Aki, sia namomoot man sa saindo.​—Juan 3:16.

Si Jesus naherak sa mga nagsasakit asin hiningoa na tabangan sindang maheling an saindang indibiduwal na halaga. (Mateo 9:36; 11:​28-30; 14:14) Ipinaliwanag nia na pinahahalagahan nin Dios pati an saradit, garo daing halagang mga dignos. “Ni saro sa sainda dai nalilingawan nin Dios,” an sabi nia. Gurano pa daw an pagpahalaga nia sa mga tawo na naghihingoang gibohon an saiyang kabotan! Manongod sa mga ini si Jesus nagsabi: “An mismong buhok kan saindong payo bilang gabos.”​—Lucas 12:​6, 7.

Totoo, tibaad an saro na may makuring depresyon, na dai makaya an saiyang mga kaluyahan asin pagkukulang, madepisilan na tumubod na sia pinahahalagahan na gayo nin Dios. Tibaad sa paghona nia sierto na sia dai maninigo sa pagkamoot asin pangataman nin Dios. Tibaad “kita kondenaron kan satong puso,” an inaadmitir kan Tataramon nin Dios. Alagad ta iyan daw an nagdedeterminar sa mga bagay? Bako. Aram nin Dios na an makasalan na mga tawo puwedeng magkaigwa nin negatibong kaisipan asin tibaad kondenaron pa ngani an sadiri. Kaya rinaranga sinda kan saiyang Tataramon: “An Dios orog kadakula kisa kan satong puso asin nakaaaram kan gabos na bagay.”​—1 Juan 3:​19, 20.

Iyo, an naheheling kan satong mamomoton na langitnon na Ama bako sanang an satong mga kasalan asin sala. Aram nia an nagpapagian na mga kamugtakan, an satong bilog na buhay, an satong mga motibo asin intension. Aram nia na kita nagmana nin kasalan, helang, asin kagadanan asin kun siring may dakulang mga limitasyon. An bagay na kita namomondo asin naaanggot sa satong sadiri pruweba na mismo na habo niatong magkasala asin bako pa man  kitang labi karaot. Sinasabi kan Biblia na kita “ipinasakop sa kasayangan” tumang sa satong kagustohan. Kaya an Dios nakidadamay sa satong miserableng kamugtakan, asin may pagkaherak niang kinokonsiderar an satong mga kaluyahan.​—Roma 5:12; 8:20.

“Si Jehova maheherakon asin maugayon,” an sinisierto sa sato. “Kun gurano kaharayo kan subangan sa solnopan, siring man kaiyan kaharayo na saiyang irinayo sa sato an satong mga kasumbikalan. Huli ta aram niang gayo an satong kamugtakan, na ginigirumdom na kita kabokabo.” (Salmo 103:​8, 12, 14) Tunay na si Jehova “an Dios nin gabos na karangahan, na minaranga sa [sato] sa gabos [niatong] kasakitan.”​—2 Corinto 1:​3, 4.

An tabang na pinakakaipuhan nin mga may depresyon gikan sa pagrani sa saindang maheherakon na Dios asin pag-ako sa saiyang pag-agda na ‘ibugtak an saindang pasan sa saiya.’ Tunay na kaya niang “buhayon an puso kan mga nasasakitan.” (Salmo 55:22; Isaias 57:15) Kaya isinasadol kan Tataramon nin Dios an pamibi, na sinasabi: ‘Ibugtak nindo an gabos nindong kahaditan ki Jehova, huli ta sia may pagmakolog sa saindo.’ (1 Pedro 5:7) Iyo, paagi sa pamibi asin pagngayongayo an mga tawo makararani sa Dios asin magkakamit kan “katoninongan nin Dios na minalampas sa gabos na kaisipan.”​—Filipos 4:​6, 7; Salmo 16:​8, 9.

An praktikal na pagliliwat sa estilo nin pamumuhay makatatabang man sa saro na mahale an depresyon. An pisikal na ehersisyo, pagkakan nin masustansiang kakanon, paghangos nin preskong aire asin bastanteng pagpahingalo, asin paglikay sa sobrang pagheling nin TV gabos importante. An sarong babae nakatabang sa mga may depresyon paagi sa pagdagka sainda na maglakawlakaw nin maliksi. Kan an sarong babaeng may depresyon magsabi: “Habo kong maglakaw,” an babae maboot pero marigon na nagsimbag: “Ata malakaw ka.” An babae nagbareta: ‘Anom na kilometro an samong linakaw. Pagbuwelta mi, pagal sia, pero mas marahay an pagmate nia. Dai mo mapaniniwalaan kun gurano kanakatatabang an maliksing ehersisyo sagkod na dai mo iyan napoprobaran.’

Minsan siring, kun beses imposibleng biyong mahale an depresyon, dawa kun prinobaran na an gabos, pati an medikal na mga bolong. “Prinobaran ko na an gabos,” sabi nin sarong medyo may edad nang babae, “alagad ta nagdadanay an depresyon.” Kabaing  kaiyan, sa parate imposible ngonyan na paomayan an buta, an bongog, o an lopog. Pero, an mga may depresyon puwedeng makanompong nin karangahan asin paglaom paagi sa dayaday na pagbasa sa Tataramon nin Dios, na nagtatao kan seguradong paglaom na permanenteng pakaginhawa sa gabos na sakit nin tawo.​—Roma 12:12; 15:4.

Kun Mayo Na nin Magkakadepresyon Liwat

Kan isinasaysay ni Jesus an makangingirhat na mga bagay na maabot sa daga sa huring mga aldaw, idinugang nia: “Kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong kaligtasan naghaharani na.” (Lucas 21:28) An boot sabihon ni Jesus kaligtasan pasiring sa matanos na bagong kinaban nin Dios, na duman “an mga linalang mismo bubutasan man hale sa kaoripnan nin kalapaan asin magkakaigwa kan mamuraway na katalingkasan kan mga aki nin Dios.”​—Roma 8:21.

Kanigoan na kaginhawahan para sa katawohan na makalda sa mga pagabat kan nakaagi asin mapagmata kada aga na an isip arog kalinaw sa kristal, galagang atubangon an aktibidad sa aldaw na iyan! Dai na maoolang an siisay man kan dagom nin depresyon. An seguradong panuga sa katawohan iyo na “papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”​—Kapahayagan 21:​3, 4.

Apuwera sana kun may ibang indikasyon, an gabos na kotasyon sa Biblia hale sa New World Translation of the Holy Scriptures.